ورتلناه ترتيلا

[shahd]

ياترى لو فن التجويد كلم البني ادم المسلم الي مش بيعرف يقرا القرأن صح وما كانش حتى بيحاول يتعلم ومكسل وفجأه حس ان الوقت بيضيع وانه لازم يلحق القطر قبل ما يفوته وقرر يتعرف علىالأستاذ تجويد ويكلمه ويتعلم منه يا ترى في الحاله دي ايه الحوار الي ممكن يدور بينهم

بني ادم مسلم: يا استاذ تجويد انا عايز اقرا قرأن بس مش بعرف اعمل ايه

استاذ تجويد: لازم الأول نبتدي بخطوات بسيطه واحده واحده يعني النهاردة مثلا حنتكلم في مبادئ في

التجويد

استاذ تجويد: يا مبادئ فن التجويد الأستاذ بني ادم مسلم عايز يتعرف على حضراتكم

مبادئ فن التجويد يرد ويقول انا:

احنا مبادئ فن التجويد

تعريفنا: التجويد

انا اللغة والمعنى فيا : التحسين ,يقال هذا شيئ جيد أي حسن , وجودت الشيء اي احسنته

اناالأصطلاح : وفيا بيخرج كل حرف من مخرجه الصحيح واعطائه حقه ومستحقه من الصفات حق الحرف هو صفاته الذاتية اللازمة كالجهر والشدة والاستعلاء والأستفال والغنة وغيرها فأنها لازمة لذات الحرف ولا تنفك عنه فأن انفكت عنه ولو بعضها كان لحنا , ومستحقه صفاته العرضية الناشئة عن الصفات الذاتية كالتفخيم وكالترقيق فأنه ناشئ عن الاستفال هكذا

بني ادم مسلم: وياترى ايه احكامك

استاذ تجويد:الحكم يتفضل يتكلم:

انا الحكم انا هنا .....العلم بيا فرض كفاية , والعمل بيا فرض عين على كل قارئ على كل قارئ مسلم ومسلمة لقوله تعالى( ورتل القرآن ترتيلا)

موضعي: الكلمات القرآنية

فضلي: أنه من اشرف العلوم و أفضلها لتعلقه بأشرف الكتب واجلها

واضعي : أئمة القراءة

استمدادي: من الكتاب والسنة

اسمي : علم التجويد

مسائله: قواعده وقضاياه الكلية التي يتوصل بها إلى معرفة أحكام الجزئيات

غايتي: صون اللسان عن اللحن في كلام الله تعالى

اللحن ده شيئ مش جميل و ييأدي لخطأ جليل

يا لحن قلي ايه الي بتعمله في الي بيقرا بطريقتك

اللحن : اخليه يغلط ويميل عن الصواب وليا اصحاب اتنين جلي وخفي

الجلي: خطأ يطرأ على الألفاظ فيخل بعرف القراءة سواء أخل بالمعنى أم لا كتغيير حرف بحرف أو حركة بحركه . فالأول كإبدال الطاء دالا أو تاء بترك الاستعلاء , والثاني كضم تاء أنعمت أو فتح دال الحمد لله , وسمي جليا اي ظاهراً لاشتراك القراء وغيرهم في معرفته .

الخفي: وهو خطأ يطرأ على الألفاظ فيخل بالعرف دون المعنى , كترك الغنة وقصر الممدود ومد المقصور وهكذا , وسمي خفياً لاختصاص أهل هذا الفن بمعرفته والأول أي الجلي حرام يأثم القارئ بفعله : والثاني , أي الخفي مكروه ومعيب عند أهل الفن وقيل يحرم كذلك لذهابه برونق القراءة.

بني ادم مسلم : يا استاذ تجويد انت ليك طريقة واحدة وبس

استاذ تجويد: ازاي انا ليا اربع اساليب

اولها الترتيل: : وهو القراءة بتؤدة واطمئنان واخراج كل حرف من مخرجه مع إعطائه حقه ومستحقه مع تدبر المعاني

وثانيهاالتحقيق: وهو مثل الترتيل الا انه أكثر منه اطمئناناً وهو المأخوذ به في مقام التعليم

وثالثها الحدر: وهو الإسراع في القراءة مع مراعاة الأحكام .

ورابعها التدوير: وهو مرتبه متوسطة بين الترتيل والحدر

وياسلام على الترتيل الي نزل بيه القرآن

قال تعالى " ورتلناه ترتيلا"

بني آدم مسلم: يا استاذ تجويد بس انا عايز اقرا قرأن صح وابقىفريرة وزي الفل وابقى مع السفرة الكرام البررة

الأستاذ تجويد: الصبر جميل وبالجد ولاجتهاد كله حيبقى تمام وللحديث بقية سلالالالالالالالالالالالالالالام

تم تعديل 8 مارس 2006 بواسطة شهد

[shahd]

حنتعرف على مين النهاردة

:blush: :wub:

وبعد ما حضرت الأستاذ بني ادم مسلم أتعرف على استاذ تجويد وعرف :

تعريفه لغة واصطلاحا وماحكمة وفائدته وحق الحرف ومستحقه وأقسامه ومراتب القراءة فضل وبقوا أصحاب وكله تمام

قرره يزروه في بيتهم عشان عايز يتعرف على حكم من ضمن الأحكام الجميلة اسمه الاستعاذة

ما هو الأستاذ بني آدم مسلم فضل يفكر ازاي قرا الأستعاذه صح فلقى مافيش حل غير انه يتعرف بيها شخصيا وهي تقله

بني ادم مسلم : الو السلام عليكوووو ازيك يا استاذ تجويد ممكن من فضلك تعرفني بالآنسة استعاذة

استاذ تجويد حاضر غالي والطلب رخيص الآنسة استعاذة عندي اهي حديهاللك تكلمها

استعاذة: السلام عليكم ازي حضرتك يا استاذ بني آدم مسلم

بني ادم مسلم: الحمدلله يا انسة استعاذة ممكن تعلميني حضرتك اقولك ازاي عشان مش بعرف

استعاذة : انا الاستعاذة وليا اربع احكام ومن اسمي إبليس بيخاف وياخد ديله في سنانه ويجري وبده ربنا اكرمني عايز تعرفني تعالى زورني وتلاقي الي يرضيك

بني ادم مسلم يروح للاستعاذة في بيتها عشان يعرف ويتعلم

يخبط على الباب

السلام عليكم تفتح استعاذة

بني ادم مسلم ممكن تتكرمي وتعلميني ارجوووووووووووووكي

استعاذة حاضر حاضر من عنيا

بص يا أستاذ بني ادم مسلم

انا ليا زي ما قلت اربع أحكام

اولها: قطع الجميع يعني مثلا لو بتقرى في سورة على سبيل المثال ( مش الفاتحة وبس بس ده مجرد مثل) تروح قاري أعوذ بالله من الشيطان الرجيم وتستنا حبه بسم الله الرحمن الرحيم وكمان حبه الحمد لله رب العالمين

وثانيها: قطع الأول ووصل الثاني بالثالث ازاي بقى

يعني تقول أعوذ بالله من الشيطان الرجيم وتروح ساكت حبه صغيرين وتقول بسم الله الرحمن الرحيم الحمد لله رب العالمين على طول

ثالثها: توصل الأول الي هوانا الأستعاذة بالثاني الي هو البسملة وتتقف على الثالث الي هو بداية السورة

اما الرابعة وصل الجميع يعني ايه يا استاذ بني ادم مسلم وصل الاستعاذة بالبسملة والبسملة بأول السورة

يعني لما حضرتك تقرا الفاتحة مثلا تروح قايل

اعوذ بالله من الشيطان الرجيم بسم الله الرحمن الرحيم الحمد لله رب العالمين مع بعض من غير ما تفصل بين واحده والتانيه

وليا بين كل سورتين 3 اوجه الي هما قطع الجميع

2 قطع الأول ووصل الثاني بالثالث

3 وصل الجميع , واما بين الأنفال وبراءة فلك الوقف والسكت والوصل دون البسملة

ها فهمت يا استاذ

بني ادم مسلم: ايوه الحمدلله فهمت بس عايز اعرف ايه احكام النون الساكنه والتنوين

استعاذة: انا الأستعاذة لو عايز تتعرف على النون الساكنة واختها التنوين روح دور عليهم يلا ما تعطلنيش انا وريا طلاب غيرك

سلام عليكوووووووووو

[shahd]

الجزء الثالث

بني ادم مسلم: ياترى هما فين هما فين يا انسة ميم ساكنه شفتي الأنسة نون ساكنه وتوأمها التنوين

الأنسه :ميم ساكنه: لا ما شفتهاش روح دور عليها وماتعطلنيش

وريا درس :wub:

النون الساكنه : مين بينده عليا :wub: انا هنا في حد عايزني

بني ادم مسلم: انا انا عايزك بقالي ساعة بدور عليكي

النون الساكنة : ايوة يا استاذ اي خدمة

بني ادم مسلم: بحاول اقر الكلمة دي من القرأن"ينحتون" قالولي انت بتقراها غلط ولازم تروح للنون الساكنة عشان تعلمك ترقرا الكلمة دي ازاي وكما كلمات تانية كتير غيرها ممكن حضرتك تساعديني

النون الساكنه : طبعا طبعا من عنيا هو انا افديك الساعه

بص يا سيدي انا بيسموني النون الساكنة عشان ما فيش علي ;) حرمة لاضمة ولاكسره زي لما ببقى في عن ,من وبكون في الأسم والفعل والحرف في النص وفي الأخر واختي التوأم اسمها التنوين وهي نون ساكنة زايده بتيجي في اخر الأسماء لفظا يعني نطق بس مش بتتكتب زيي واحنا الأثنين لينا اربع احكام

في حاجه اسمها الأظهار وتعريفها اللغوي: هو البيان والأصطلاحي

هو: اخراج كل حرف من مخرجه الصحيح مع اعطائه حقه ومستحقه من الصفات من غير غنه في الحرف المظهر والحروف هنا سته : الهمزه والهاء والعين والحاء والغين والخاء وبتكون الحروف دي معايا( النون الساكنه) في كلمة وكلمتين ومع اختي التنوين في كلمتين ومش بتكون في كلمة واحده على سبيل المثال( ينأون/من امن/منهم/من هاد/انعمت/ بنحتون/من حاد/فسينغضون/من غل/المنخنقه) اما الأنسة تنوين اختي توأمي فالأمثله بتاعتها اهيه( جرف هار/خلق عظيم/ عليم حكيم/قولا غير /يومئذ خاشعه) بس العله في اظهار النون والتنوين عند الأحرف دي ان المخرج بعيد يعني ان مخرج ان مخرجي انا واختي التنوين بعيد عن مخرج حورف الحلق فأنا والتنوين بينخرج من طرف اللسان اما الحروف السته فمخرجهم من الحلق ومراتب الأظهار ثلاثة

1) اعلى عند الهمزة والهاء

2) اوسط عند العين والحاء

3) ادنى عند الغين والخاء

واليك مني شاهد التحفة على الأظهار

للنون ان تسكنا وللتنوين

اربع احكام فخذ تبيينى

فالأول الأظهار من قبل أحرف

للحلق ست رتبت فلتعرف

همز فهاء ثم عين حاء

مهملتان ثم غين خاء

كده اديتك او احكامي وهو الأظهار والمرة الجاية حكلمك على

الأدغام بس ياريت تحاول تطبق الحكم ده وانت بتقرا القرأن متفقين سلام عليكم

تم تعديل 1 يوليو 2005 بواسطة شهد

[shahd]

هااااااااااااااا يا استاذ بني ادم مسلم عايز ايه طيب حاضر حشرحلك حكمي التاني :wub: الي هو اناااااااااااا الأدغام

اهلا اهلا هو حضرتك وصلت اهو معاك اهو خليه يعرفك بنفسه

الأدغام:ايه مين الي عايزني

بني ادم مسلم: انا نفسي اتعرف على حضرتك من زمان ممكن تكلمني عن نفسك شويه

ادغام/ بس كده من عنيا

شوف يا باشا ليا تعريفنين واحد لغوي وهو الأدخال

واصطلاحي الي هو : التقاء حرف ساكن بأخر متحرك فيصيرا حرف واحد مشدد من جنس الحرف الأخير يعني زي الحرف الأخير, يرتفع اللسان عنهما ارتفاعه وحده

وبتجمع في ست حروف مجموعين في كلمة( يرملون)

بس ايه ليا طريقتين الأولانيه

ادغام بغيرغنه كامل في الراء واللام

بني ادم مسلم:يعني ايه غنه

الأدغام: ما تصبر على رزقك ومش تقاطعني :wub:

بني ادم مسلم: حاضر حاضر اتفضل كمل

الأدغام كنت بقول ان الأولاني ادغام بغير غنه كامل ليه بقى عشان :عشان الحرف والصفة راحوا

يعني ايه يعني يا حضرت انك لما تقرا كلمة في القرأن الكرم زي (من لدنه ) بتقول ملدنه من غير ما تغن شفت انت شلت النون ازاي وكمان ما فيش غنه

ودي الأمثلة بتاعته:(من لدنه)(يومئذ لخبير( تنوين))

( ملدنه / يومئذلخبير)اهو التنوين راح اهو وفضلت الراء بس ما فيش غنه كمان

وفي الراء( من ربهم )

(وثمرة رزقا) في حالةالتنوين

حنقول (مربهم/ وثمرتررزقا )

على فكرة ده مثل في النطق بس مش بتتكتب كده

لما تسمعها حتفهمها اكتر ماشي الكلام ;)

وحضرتي ليا اوجه في الحروف الستة

التماثل في النون والتجانس مع الواو والياء في الأنفتاح والأستفال والجهر . وماضارعتهما النون والتنوين باللين الذي فيهما لشبهه بالغنة وعشان الواو من مخرج الميم ادغم فيها ادغام كما ادغم في الميم ثم ادغم في الياء لشبههابما اشبه الميم وهو الواو وادغم في اللام والراء للتقارب في المخرج وفي اكثر الصفات اما سبب حذف الأنسه غنه هنا هو المبالغة في التخفيف مع اللام والراء واسبابي انا الأدغام 3

1) التماثل

2) التقارب

3) التجانس

مش تقلق حتفهم ان شاء الله وحده وحده لما نبتدي نطبق

بني ادم مسلم

والثاني ناقص بغنه وقالوا عليه ناقص عشان : عشان الحرف راح والصفة فضلت موجوده وبيتجمعوا في كلمة ( ينمو) خد عندك الأمثلة دي( من نعمة/ من ولي/من يقول/وبرق يجعلون/يومئذ ناعمة) وتتقري بالطريقة دي( مولي / ميقول وبرقيجعلون) وزي ما قلت لما نسمعها حتوضح اكتر

بني أدم مسلم:

وخد عندك بيت الشعر ده من التحفة :

والثاني ادغام بستة اتت

في يرملون عندهم قد ثبتت

لكنهما قسمان قسم يدغما

فيه بغنة ينمو علما

الا اذا كان بكلمة ليلا

تدغم كدنيا ثم صنوان تلا

والثاني ادغام بغير غنة

في اللام والراء ثم كررته

بس الأدغام لازم يبقى في كلمتين

وخد بالك في كام كلمة كده بس مش ينفع فيهم الأدغام لازم يبقى اظهارمطلق هاااااااا مطلقاديني بقلك اهو مش حلقي ولا شفوي مش متعلق لا بحلق ولا بشفه اوعى تغلط وتعك الدنيا

الكلمات دي هي:( دنيا /صنوان/ قنوان/ وبنيان) اربعه مالهاش خامس في القرأن

يعني مش ينفع نقول قوان ولا بيان ولا صوان ولا ديا ده كده يبقى اخر لخبطه اوعي وركز

وعارف ليه مش تدغم

عشان ماتتلخبطش وماتعرفش تفرق ياترى هي من الدني والصنو ولا من الدي والصو واخد بال حضرتك

بني ادم مسلم: اه واخد بالي بس لازم اطبق

الأدغام:ده شغلك بقى ;)

ما تنحليش وركز وانت بتقرا واوعى تفتكر اني خلصت على كده بس كده كفايه عليك

سلام عليكوووووووو في الحلقة الجاية

[shahd]

انا جيت :D اهو وجبتلكو معايا ضيف خفيف قوييييييييي

عارفين هو مين

مش حقول فكر فكر

بني ادم مسلم:

ما تقول حيرتني

انا انا الأقلاب

وليا حرف واحد هو الباااااااااااااااااااااء مافيش غيروا

لما بيعرفوني بيقولوا عني في اللغة: تحويل الشيئ على وجهه

وفي الأصطلاح: جعل حرف مكان اخر يعني تحط حرف مكان حرف في النطق بس اوعى تعك الدنيا

يعني تقلب النون الساكنة والتنوين ميما مخفاة بس تاخد بالك من الغنه مش تلغيها لازم تبقىموجودة وكمان تاخد بالك من الأخفاء حاسب تغلط ارجوك

بني ادم مسلم: طب ممكن بعد اذنك تديني شوية امثلة من القأن الكريم عشان لما اطبق اعرف انا بقول ايه

الأقلاب : بس كده غالي والطلب رخيص خد عند يا استاذ

في كلمة واحد( انبئهم وتتقري امبئهم اهي الباء بقت ميم بس لازم تبقى مخفاه) وفي كلمتين( ان بورك وتقراها امبورك ) بقلك ايه هي مش بتتكتب كده واوعى تحتار لما نطبق حنفهم اكتر ولما تسمع اشرطه القرأن حتعرف قصدي

وفي التنوين مش ينفع غير في كلمتين زي( سميع بصيرا وبتتقري سميعمبصيرا) وفي كل الأحوال اوعى تسيب الغنه ولا تشيل الأخفاء لحسن ازعل منك واشتكيك للأخفاء ومش اخليه يشرحلك هو بيعمل ايه مع النون الساكنة والتنوين

سلالالالالالالالالام

لحظه لحظه حضرتك نسيت تديني ابيات التحفة الي بتوصف جنابك

الأقلاب: ايو ة صح يا حضرة الأستاذ بني ادم مسمل انت بقيت ذكي قوي ومركز بسم الله ما شاء الله

خد عندك التحفة بتقول

والثالث الأقلاب عند الباء

ميماً بغنة مع الأخفاء

اشوفكو الحلقة الجاية في امان الله

[shahd]

النون الساكنة:حان وقت الوداع

بس قبل ما اودعكم لازم اعرفكم بأخر اصدقائي وهو الأخفاااااء

النون الساكنة: يا اخفاء تعالى الأستا بني ادم مسلم عايز يتعرف

الأخفاء : ايه في ايه ما اني مستور وفي حالي اهو عايزين مني ايييييييه :D :D

النون الساكن هما كلمتين وحنمشي على طول

الأخفاء: هاااااا عايزين ايه قولوا

النون الساكنة : لأ حضرتك الي حتقول وتكلم الأستاذ

بني ادم مسلم: ايوا يا استاذ اخفاء ارجوك تعرفني بنفسك ده انا حكون سعيد قوي

الأخفاء : امري لله ولو

انا في اللغة بيقولوا عني الستر ( سترت الشيئ يعني اخفيته)

اما في الأصطلاح : نطق الحرف بصفة ما بين الأظهار والأدغام بغنه يعني انا بين البينين لا انا زي الأظهار الحرف بيطلع واضح زي ماهو ولا انا زي الأدغام بلتقي ببقى زي الحرف التاني زي ما اتعرفنا على صحابنا الأولانين

وليا خمسة عشر حرف

بني ادم مسلم:

الأخفاء: ايه مالك ما تنحليش الله يخليك هي مش حروف اللغة العربية 28 منها ست ادغام(يرملون) وست اظهار همز فهاء ثم عين حاء مهملتان ثم غين خاء) والأقلاب ليه حرف واحد هو الباء . يبقى خلاص فاضل 15 حرف دول تبعي

بني ادم مسلم: ايه هما ايه هما

الأخفاء بس اهدى بقى وبطل دوشه اهم موجودين في بيت الشعر ده:

صف ذا ثنا كم جاد شخص قد سما

دم طيباً زد في تقى ضع ظالما

اول حرف من كل كلمة مش كله

يعني ( الصاد/الذال/الكاف/ الجيم/الشين/القاف/ السين/ الدال/ الطاء/ الزاي/ الفاء/ التاء/ الضاد/ الظاء)

بني ادم مسلم: ما فيش امثلة

الأخفاء: طبعا في

( منصورا/أن صدوكم/ريحاً صرصرا/منذرين/من ذكر/سراعاً ذلك/منثورا/من ثمرة/جميعاً ثم/ينكثون/من كل/عاداً كفروا/انجيناكم/

أن جاءكم/شيئاً جنات/المنشئون/لمن شاء/عليم شرع/أندادا/من دابة/قنوان دانية/ينطقون/من طيبات/صعيدا طيباً/فأنزلنا/فأن زللتم/يومئذ رزقا/انفروا/وان فاتكم/عمي فهم/ منتهون/من تحتها/ جنات تجري/منضود/ومن ضل/ينطقون/مسفرة ضاحكة/انظروا/من ظهير/ظلاً ظليلاً) .

وقبل ما انسى عايز اقولك ان ليا 3 مراتب

1 اعلى عند الطاء والدال والتاء

2 ادنى عند القاف والكاف

3 واسط عند الباقين

والتحفة بتقول

والرابع الأخفاء عند الفاضل

من الحروف واجب للفاضل

في خمسة من بعد عشر رمزها

في كلم هذا البيت قد ضمنتها

صف ذا ثنا كم جاد شخص قد سما

دم طيباً زد في تقى ضع ظالماً

بني ادم مسلم:يا نهار ابيض كل ده ولسه الدروس الأولانيه حفظهم ازايييييي

الأخفاء: يا سلالالالالالام جد اجتهد زانت بأذن الله حتفهم

ودلوقتي اقدر اودعكم واقول في امان الله كده خلص الجزء الأول

من النون الساكنة والتنوين وفاضل ولا بلاش خليها مفاجأه

على فكرة الدرس الجاي حنتكلم في موضوع تاني اشوفكو الحلقة الجاية ما تقلقوش كله بأذن الله حيبقى تمام :D

تم تعديل 4 يوليو 2005 بواسطة شهد

[bentmasria]

ماشاء الله تبارك الله ربنا يحفظك ياشهد

شرح مبسط وجميل وانا متابعاه من اول مداخلة بس ما حبيتش اقاطع تسلسل الدروس ربنا يكرمك وينفع به ويجعله فى ميزان حسناتك ان شاء الله

[shahd]

ماشاء الله تبارك الله ربنا يحفظك ياشهد

شرح مبسط وجميل وانا متابعاه من اول مداخلة بس ما حبيتش اقاطع تسلسل الدروس ربنا يكرمك وينفع به ويجعله فى ميزان حسناتك ان شاء الله

<{POST_SNAPBACK}>

اللهم اميـــــــــــــــــــــــــن

جزاك الله خيرا على هذا الرد المشجع,واشكر لك المتابعة

واتمنى من الله ان تعم الفائدة

اكرر شكري وتقديري

[shahd]

مين حضرتك ؟؟؟؟؟ عايز اناااااااااام

استاذ تجويد: ها ما فيش نوووم يابني ادم مسلم خلاص اتعرفت على النون الساكنة والتنوين احكامها

بني ادم مسلم: ايوة يا استاذ بس في مشكلة

استاذ تجويد : مشكلة ايه بس كفاالله الشر

بني ادم مسلم انا فهمت الحمد لله بس اصل مش بعرف أطبق

اصل الحكاية صعبة قوي

الأستاذ تجويد: لالالا ما تقلقش لما يجي وقت التطبيق ان شاء الله حيبقلنا كلام تاني

ولا يهمك بأذن الله مش حسيبك

بني ادم مسلم: بجد يا استاذ يعني حتعمل ايه

استاذ تجويد: لالالالالالالا مش حقلك ده سر

وربنا يقدرني عليه بس ما تعطلنيش دلوقتي وسيبني اعرفك على ضيف جديد ولا مش عايز

بني ادم مسلم: لأ عايز طبعا هو مين فين

يا حضرة الضيف اللطيف اتفضل في ناس عايزينك

لحظة لحسن عندي حوار صحفي :

مين الي بينده على انا جيت اهوووووووووووو

الميم الساكنة وصلت وسع يا جداااااااااااااااااااع وسعوا يابناااااااااااااااااااااااات

بس بس ايه الهليلة الي انتوا عاملينها دي

ابدا يا افندم بس اصل بني ادم الأستاذ بني ادم مسلم عايز يتعرف على حضرتك

الميم الساكنة: طيب طيب يعني مش شايف ان عندي حوار صحفي اسمع الحوار وانت تتعرف عليا

بني ادم مسلم: حاضر امري لله

الصحفي: يا افندم احنا يحصلنا الشرف اننا نتعرف بحضرتك فياريت تتكرم وتدينا نبذه عن سيادتك بس في اختصار

شديد لو سمحت

الميم الساكنة: اختصار يعني ايه يا اما اقول كل الي عندي واخد وقت زي ما انا عايزة يا اما انا ماشية وما فيش حوار صحفي وخلوا مجلتكم تتحرق

الصحفي: لا يا افندم حنا تحت الأمر ورهن الأشارة

الميم الساكنة : ايوة كده قال اختصار قال

اسمي الميم الساكنة

واول احكامي: الأخفاء مع حرف واحد الي هو الباء بس من غير ماننسى الغنه

في حال لو جيت وبعدي باء لازم يكون الحكم اخفاء واسم اخفاء شفوي عشان بيطلع من الشفايف

مثلا ( يوم هم بارزون) ( إليهم بهديه)

والأخفاء ملازمني مع حرف اباء لييييييييييه

عشان احنا مشتركين في المخرج ومتاجانسين في بعض الصفات اصل يا جماعة الأظهار تقيل علينا والأدغام كمان تقيل

والتحفة بتقول

فالأول الأخفاء عند الباء

وسمه الشفوي للقراء

الصحفي : بيشوف الساعةوزهقان

والميم الساكنة ولا مهتمة بتكلم بكل هدوء

اما الحكم الناني وهو الأدغام ويا سلام على الأدغام

لما يبقى مع الميم الساكنة وفي حرف واحد الميم وبس

ايوة الميم مع الميم وبيسموه ادغام مثلين صغير مثال( خلق لكم مافي الأرض)

كلام التحفة بيقول

والثاني ادغام بمثلها اتى

وسم ادغام صغير يا فتى

اخر حاجة الأظهار مع بقيتالحروف الستة وعشرين هو واجب بس من غير غنة

مثال( تمسون) في كلمة وحده وفي كلمتين( لعلكم تتقون) بس لاحظ في حاجة صاحب التحفة نبه على حكاية الأظهرا مع الفاء والواواصل في ناس بتخفي حرف الفاء مع الميم الساكنة اوعى ده غلط وكمان الواو عشان هما ليهم نفس المخرج

والثالث الأظهار في البقية

من احرف وسمها شفوية

واحذر لدى واو وفاء ان تختفي

لقربها والأتحاد فاعرف

اشكركم انا كده خلصت كل الي عندي

الصحفي: متشكرين جدا يا افندم وفرصة سعيده

كانامعكم مع حوار مباشر وعلى الهواء مباشرة مع الميم الساكنة من قناة ورتلناه ترتيلا

تم تعديل 5 يوليو 2005 بواسطة شهد

[shahd]

ايوا مين الي جايلي عا الصبح كده??!!! يييييييييه هو ايه اصله ده ايه الدوشة دي هو الواحد ما يعرفش يستريح في بيته شويه :D

ايه على مهلك على الباب ما انا جاية اهو

بني ادم مسلم:مين يا ماما

يألف مرحب اتفضلوا ايه يا ماما هو حضرتك مش عارفاهم دول لام ال ولام الفعل

الأم: يادي الهنا يادي الهنا انستم وشرفتم

معلش انا اسفة اصلي ماكنتش اعرفكم والي ما يعرفك يجهلك تحبوا تشربوا ياه شاي قهو قرفة بالجنزبيل

لام ال: متشكرين ياهانم احنا جاين حسب طلب بني ادم ابنكم بني ادم مسلم في مهمة محدده وما شين فوراً

ماما: طيب مش حعطلكم واسيبكم تكلموا شغل وربنا معاكم

لام الفعل : طب ايه رايك ياهانم تخليكي معانا وتسمعينا

بني ادم مسلم: ايوة صح اتفضلي حضرتك

طيب يا جماعة ممكن اتعرف بحضراتكم

انا لام ال وبيسموني لام التعريف وبعتبر زايدة عن بنية الكلمة فمثلا في كلمة زي المحسنين لو شالوا اللام مش حتبقى الكلمة صح لكن لو شالوها في كلمة زي الذي /التي الحالة دي حيتغير المعنى لكن في كلى الحالتين فأنا لام زائدة عن بنية الكلمة

بس احنا هنا بنتكلم عن الي يصح تجريدها او حذفها من الكلمة

فعندي حكمين اولهم الأظهارفي اربعة عشر حرفا ومجموع في كلمة ( ابغ حجك وخف عقيمه) الهمز/الباء/الغين/ الحاء/الجيم/الكاف/الواو/الخاء/الفاء/العين/القاف/الياء/الميم/الهاء)

خد عندك الأمثلة دي:( الأرض/البيت / الحليم/ الغفور/الجبار/الكريم/الودود/الخبير/الفتاح/العليم/القيوم/الملك اليوم/ الهدي)

وفي الحالة دي بيتسمى اظهار قمريا اذا جيت قبل حرف من الأحرف دي وجب اظهري وبتسمى لام قمرية

اما الموضوع التاني يا با اخينا فهو الأدغام في اوائل كلمات البيت الي جاي ده خد بالك اول حرف من كل كلمة مش زي الأولاني كل الأحرف

طب ثم صل رحماً تفز ضعف ذا نعم

دع سوء ظن زر شريفاً للكرم

الطيبات /الثواب/الصادقين/الرحمن/التواب/ الضالين/الذكر/الناس/الداع /السبع/الظانين/الزبور

/الشافعين/ الليل/)

لو جيت حضرتي قبل حرف من الحروف دية فيجب ادغامي وبيسمى ادغام شمسياً وبيسموني في الحالة دي لام شمسية

بني ادم مسلم: وايه اخبار لام الأسم الأصلية

لام ال:سؤال ممتاز بص يا سيدي لام الأسم الأصليه حكمها الأظهار مطلقاً يعني على طووووووول زي سلطان / سلسبيلا/والسنتكم والوانكم/)

بني ادم مسلم: يا لام الفعل حضرتك ساكتة ليه

لام الفعل: اظهاري واجب زي لام الأسم سواء الفعل ماضي زي التقى او مضارع زي يلتقطه او امر زي قل بس ده في حالة لو ما جاش بعرد لاماو راء والا وجب الأدغام للتماثل والتقارب

مثال( قل لكم/ قل ربكم)

بني ادم مسلم: طب متشكرقوي وتعبتكم معايا

لام ال ولام الفعل : اصبر ده في حاجة مهمة قوي كنا حننساها

اللام في الفعل اظهرت عند النون ولم تدغم مش احنا قلنا لام الفعل تظهر بس في احكام النون الساكنة زمان كنا بنقول ان اللام م تدغم مع النون ( يرملون ) فمش حينفع تدغم هنا( النون لا يدغم فيها حرف هي ادغمت فيه) :D ركزوا معيا يا بناااااااااات الهمة يا جدعاااااااااااان

اما بالنسبة للأدغام في كلمة زي الناس والنار فده لكثرة دورانها وزي لام الفعل في الأظهارمثلا : هل ترى /بل طبع ده في حالة لول ماجاش بعده راء او لام والا الأدغام واجب

مثال( هل لكم) (بل ران)لكن حفص ليه سكته لطيفة على لام بل

(كلا بل ران) وبالمناسبة ليه سكته لطيفه على الف عوجا من اول سورة الكهف وعلى الف (مرقدنا ) من سورة يسوعلى نون

(من راق) من سورة القيامة عشان الوصل من غير سكت يوهم خلاف المعنى والسكته بتشيل التوهم ده

واخيرا وليس اخرا اصل احنا دوشنا دماغك يااستاذ بني ادم مسلم وزهقنا الست الهانم الوالدة

حنقول ابيات التحفة ونستودعك الله

اللام أل حالان قبل الأحرف

اولاهما اظها فلتعرف

قبل اربع من عشرة خذ علمه

من( ابغ حجك وخف عقيمه)

ثانيهما ادغامها في اربع

وعشرة ايضاً رمزها فع

طب ثم صل رحماً تفز ضعف ذا نعم

دع سوء ظن زر شريفاً للكرم

واللام الأولى سمها قمرية

واللام الأخرى سمها شمسية

واظهرن لام فعل مطلقاً

في نحو قل نعم وقلتا والتقى

حنشو فكم الحلقة الجاية مع ايه ياترى

مش حقلك

[shahd]

مخارج الحروف وصلت يا بشرررررررررر

اصحا يا ناااااااااايم احنا لسه هنااااااااا

ايه الدوشة دي مخارج ولا مداخل واحنا مالنا اف اف اف

واحنا مالنا ايه دي حاجة جميلة قوي اسمعوا بس

يادي اليوم الي مش فايت مش عايزة اسمع هي عافيه لا حتسمعي لامش حسمع

هاااااااا

حاااااااااااضر حسمع واشوف واقرااااااااا بس بلاش الزيطة والزمبليطة دي

ايوة كده حكم الناس دي ما بتجيش غير بالعين الحمرااا هو انا لازم اديهم على دماغهم عشان يتعلموا

هو التعليم بالعافية يا خوااااااااااتي

ايه بتقول ايه حضرتك

ما فيش يا افندم يلا نبتدي

ححكيلكو حكاية جميلة ولزيزة

هو ده وقت حكايات

ششششششششش بلاش غلبة

كان ياماكان يا سعد يا اكرام وما يحلى الكلام الا بذكر النبي عليه الصلاة والسلام

عليه الصلاة والسلام

كان في صحاب ظراف وامامير اساميهم مخارج الحروف

يعني ايه مخارج يا جدتي???

مخارج جمع مخرج

المخرج ده في اللغة يعني:محل الخروج

وفي الأصطلاح محل خروج الحرف وتميزه عن غيره

مش فاهم يا تيتا

بص يا حبيبي وانت يا عنيا

مخارج جمع مخرج والمخرج هو المكان الي بيطلع منه الحرف

فهمت يا ستو هيييييييييييه هييييييييييه

بس ياولاد منك ليه له له

حاااااااااضر يا تيتاااااااا امرك يا ستوووووووو

المهم يا حبايب قلبي للعلماء في مخارج الحروف ثلاث مذاهب

الخليل بن احمد الفراهيدي وكتير من الي بتوع النحو والقارء انها 17 مخرج اما سيبويه والي معاه زي الشاطبي قال انها 16 مخرج اما قرطب والجرمي والفراء دول بقى قالو انها 14

يادي الهنا كل ده حنفهمه رحمتك يااااااااااارب

ولد بتقول ايه فين الكرباااااااااااج يالالالالالالالالالالالا

حفهم حفهم ورجلي فوق رقبتي

حنشوف المخارج السبعة عشر

الأول: الجوف وهو الخلاء الداخل في الحلق والفم ويخرج منه حروف المد الثلاثة الي هي: الواو الساكنةالمضموم ما قبلها والياء الساكنة المكسور ما قبلها والألف ولا تكون الا ساكنة ولا يكون ما قبلها الا مفتوحاً

الثاني: اقصى الحلق الي هو ابعده اخره يعني مما يلي الصدر وتخرج منه الهمزه والهاء

الثالث: وسط الحلق ويخرج منه العين والحاء

الرابع: ادنى الحلق مما يلي الفم ويخرج منه الغين والخاء

الخامس: اقصى اللسان مما يلي الحلق وما يحاذيه من الحنك الأعلى ويخرج منه القاف

السادس: اقصى اللسان مع ما يحاذيه من الحنك الأعلى تحت مخرج القاف ويخرج منه الكاف وبيقولو على الحرفين دول لهويان لخروجهما من قرب اللهاه

السابع: وسط اللسان مع ما يحاذيه من الحنك الأعلى ويخرج منه الجيم والشين والحروف دي بتسمى حروف شجرية عشان بتتطلع من شجر اللسان اي منفتحه

الثامن: احدى حافتي اللسان وما يحاذيه من الأضراس العليا ويخرج منه الضاد المعجمة وخروجها من الجهة اليسرى اسهل واكثر استخداماً ومن اليمنى اصعب واقل ومن الجانبين اعسر فهي اصعب الحروف مخرجاً

التاسع: مابين حافتي اللسان معاً بعد مخرج الضاد وما يحاذيها من اللثة اي لحمة الأسنان العليا ويخرج منه اللام

العاشر: طرف اللسان وخارجه خمسه وحروفه احد عشر حرفا فطرف اللسان وما يحاذيه من لثة الأسنان العليا تحت مخرج اللام

قليلا يخرج منه النون المظهرة واما المدغمة والمخفاة فمخرجهما الخيشوم

الحادي عشر: طرف اللسان مع ظهره وما تلا رأسه ويخرج منه الراء وهي ادخل الى ظهراللسان من النون وتسمى الأحرف الثلاثة ذلقيه لخروجها من ذلق اللسان الى طرفه

الثاني عشر: ظهر رأس اللسان واصل الثنيتين العليين ويخرج منها الطاء فالدال المهملتان فالتاء الفوقيه وبيقولوا مهملتان عشان ما فيهمش نقط اصل زمان كانت الحروف من غير نقط وجه عالم وعمل نقط للحروف والحروف ديه بسميها نطعية اي جلدة غاره

الثالث عشر: طرف اللسان مع ما بين الأسنان العليا والسفلى قريبة الى السفلى مع انفراج قليل بينهما ويخرج منهما الصاد والسين والزاي وتسمى هذه الحروف اسلية لخروجها من اسلة اللسان اي مستدقة

الرابع عشر: طرف اللسان مع اطراف الثنايا العليا وتخرج منها الظاء والذال والثاء وتسمى هذه الحروف لثويه لخروجها من قرب اللثة

الخامس عشر: بطن الشفة السفلى مع اطراف الثنايا العليا ويخرج منها الفاء

السادس عشر: الشفتان معاً وتخرج منهم الباء الموحدة والميم والواو الا انهما بأنطباق مع الميم والباء وانفتاح مع الواو وتسمى هذه الحروف شفويه لخروجها من الشفاه

السابع عشر: الخيشوم وهو فرق الأنف المنجذب الى الداخل فوق سقف الأنف وليس بالمنخر ويخرج منه الغنه

واخر الكلام يا حلوين حنقول ابيات من شعر جميل

مخارج الحروف سبعة عشر

على الذي يختاره من اختبر

فألف الجوف واختها وهي

حروف مد للهواء تنتهي

ثم لأقصى الحلق همز هاء

ثم لوسطه فعين حاء

ادناه غين خاؤها والقاف

اقصى اللسان فوق ثم الكاف

اسفل والوسط فجيم الشين يا

والضاد من حافته اذ وليا

لاضراس من ايسر أو يمنها

واللام أدناها لمنتهاها

والنون طرفه تحت اجعلوا

والرا يدانيه لظهر ادخل

والطاء والدال وتا منه ومن

عليا الثنايا والصفير مستكن

منه وفوق الثنايا السفلى

والظاء والذال وثا للعليا

من طرفيهما ومن بطن الشفة

فالفا مع اطراف الثنايا المشرفة

للشفتين الواو باء ميم

وغنة مخرجها الخيشوم

انا تعبت عايزة اروح اناااااااااام حكملكو بعديييييييييييين

تم تعديل 6 يوليو 2005 بواسطة شهد

[shahd]

ياستو اصحي بقا كمليلنا الحدوته يلا انا مش عارف اقرا الكلمة دي فص فص فصات الحروف هييييييييه صح

الجدة: هههههههههههه ضحكتني يا بني

اسمها صفات الحروف امري لله حشرحالك بس اقوم اخدلي فنجان قهوة واجيلك فريرررررره

هههههههههه قال فصات الحروف قال اما العيال دو ل عليهم كلام

يلا يا تيتا يلا يا تيتااااااا

طيب طيب انا جية اهو يا ولاد

شوف يا حبيبي صفات جمع صفة والصفة في اللغة

ما قام بالشيئ من المعاني كالعلم , او البياض او السواد

واصطلاحاً: كيفية عارضه للحرف عند حصوله له في المخرج من جهر ورخاوة وما اشبه ذلك بس ايه بيختلف في عدد الصفات

فمنهم مين قال عنها سبعة عشر ومنهم الي زاد وقال اربعة واربعين ومنهم الي نقصها لحد اربعة عشر بحذف الأذلاق وضده الأنحراف واللين وزيادة صفة الغنه وفي منهم الي مدها ل 16 بحذف الأذلاق وضده عكسه يعني واحنا هنا حنختار مذهب الجزرية الي هو السبعة عشر وهي على قسمين قسم له ضد وقسم لا ضد له

الي ليه ضد خمسة وضدجه خمسة طبعا والي مالوش ضد سبعة

التفاصيل وحيقول ايه في الجزرية

:)

:blink:

:blink:

هو ده الي حنشوفه في الحلقة الجاية

ياستوووووووووووووووووووو الله يخليكي الله يخليكي قولي عايزن تعرف تعبت ياولاد روحوا اقروا الكلمتين دول عشان

المرة الجاية حوضحهم اكتر اتفقنا يلا اغسلو سنانكو واشربوا اللبن ونامووووووووو

[وليد صفوت]

أنت شهد يا شهد ..........

إسم على مسمى .......

طريقتك فى الحكاية .... لا تشعر بالتعب أو الملل أبداً .......

أقولك بس ماتزعليش ........ انت فكرتينى بجدتى زمااااااااااااااااان لما كانت بتحكيلى حكاية الحروف الأبجدية :D ... حرف الألف كان ليه حكاية ,..و حرف الباء كان له حكاية مع حرف الثاء , اللى كان له حكاية مع حرف التاء ( كان بيغير منه عشان هو شايل نقطتين بس على ظهره ,... مش ثلاثة زى الثاء :) ) ..... كده يعنى :blink:

ربنا يوفقك .........و مش عاوز اقاطعك ,... كلنا آذان مصغية ,...

اللهم أجزها خير الجزاء ,...... آمين :blink:

تحياتى,.....

[shahd]

أنت شهد يا شهد ..........

إسم على مسمى .......

طريقتك فى الحكاية .... لا تشعر بالتعب أو الملل أبداً .......

أقولك بس ماتزعليش ........ انت فكرتينى بجدتى زمااااااااااااااااان لما كانت بتحكيلى حكاية الحروف الأبجدية

ربنا يوفقك .........و مش عاوز اقاطعك ,... كلنا آذان مصغية ,...

اللهم أجزها خير الجزاء ,...... آمين  :)

تحياتى,.....

<{POST_SNAPBACK}>

ربنا يخليك رفعت روحي المعدنية :blink:

بجد اشكرك على كلامك الرقيق ده ومش حزعل بالعكس دي حاجه جميلة جداااااا هو في حد يقدر يعمل زي اجدادنا دول كان ليهم اساليب تحفة بصراحة

جزاك الله خير على دعوتك الجميلة دي

اللهم اميــــــــــــــن

[shahd]

ماما ستو ماما ستو يلا اصحي يلا عايزينك عايزين نكمل فصات الحروف قصدي صفات الحروف مش حضرتك قلتي حتكمليهم

ايوا يا بني يا حبيبي بتصحيني لييييييييييييه ما الكتاب قدامك اهو ما تقرا فيه سيبني انام الله لا يسيئك

ياستو حرام عليكي

هوانافاهم حاجة ؟؟؟؟؟!!!!!!!!

يلا عشان خاطريييييييييي

اهئ اهئ اهئئئئئئئئئئئ

طيب حاضر امري لله حقوم واكملك الحدوته اه يادماغي يااااااااااااااني

احنا كنا حنكمل النهاردة حدوتة صفات الحروف

وحنبتدي بلي ليها ضد عكس يعني

الأول: الهمس وعكسه الجهر يعني لما الواحد يوشوشك يبقى العكس ايه يخرم ودانك مثلا يعني هااااااااااااا

والشدة والتوسط وعكسهم الرخاوة والاستعلاء , والأطباق وضده الأنفتاح والأذلاق وضده الآصمات

اما السبع الي مالهاش ضد : الصفير/القلقلة/الأنحراف والتكرير واللين, والتفشي,الأستطالة وخد عندك التفاصيل

الهمس: في اللغة الخفاء

في الأصطلاح:جريان النفس عند النطق بالحروف لضعف الأعتماد على المخرج وحروفه عشرة في الكلمة دي

( فحثه شخص سكت)

والحروف دي بعضها اقوى من بعض زي الصاد والخاء فهما اقوى من باقي الخروف

ههههههههههههههه خروف ايه ياستو

يادماغي ياني قصدي الحرووووووووووف يادي الكسوف

المهم يا غلاباوي انت وهو وهي الخاء والصاد اقوى من الباقي عشان مشتملين على بعض الصفات القوية واضعف الحروف ياعيني عليها الهاء عشان مش عندها صفة قوية

الجهر: في اللغة الأعلان وفي الأصطلاح انحباس جريان النفس عند النطق لقوة الأعتماد على المخرج وحروفة تسعة عشر وهي الباقية بعد حروف الهمس

والحروف دي فيها القوي والي اقوى من بعضه وده بقى على حسب قوة الصفات الي فيها

زي الطاء لما فيها من استعلاء وشدة

الشدة: في اللغة القوة وفي الاصطلاح انحباس جرى الصوت عند النطق بالحروف لكمال الأعتمادعلى المخرج

وحروفها 8 مجموعه في كلمة( أجد قط بكت)

التوسط: في اللغة الأعتدال والأصطلاح اعتدال الصوت عند النطق بالحروف لعدم كمال انحباسه زي ما في الشدة وعدم كمال جريانه زي ما في الرخاوة وحروفها خمسة حتلاقيها في كلمة( لن عمر)

الرخاوة: في اللغة اللين وفي الأصطلاح جريان الصوت مع الحروف لضعف الأعتماد على المخرج وحروفها 16

وهس ماعدا حروف الشدة والتوسط

الأستعلاء: لغة الأرتفاع وواصطلاحاً ارتفاع اللسان الى الحنك الأعلى عند النطق بالحرف وحروفه 17 في كلمة( خص ضغط قظ)

الأستفال: لغة الأنخفاض ,وفي الأصطلاح انخفاض اللسان اي انحطاطه من الحنك الأعلى عند النطق بالحروف وحروفه 22 وهي الباقي بعد حروف الأستعلاء

الاطباق : لغة الآلصاق واصطلاحا تلاصق ما يحاذي اللسان من الحنك الأعلى للسان عند النطق بالحروف وهو تلاقي طائفتي اللسان والحنك الأعلى عند النطق بالحرف وحروفه 4 وهما الطاء والظاء والصاد الضادواقوى حروف الأطباق الطاء واضعفها الظاء المعجمة

هاوبعدين سكتي ليه ياماما ستووووووووووو

خلاص ياولاد انا صوتي بح خلاص حكمل المرة الجاية باقي الصفات هو انتوا ما تعبتوش :excl: :D

تم تعديل 8 يوليو 2005 بواسطة شهد

[shahd]

<span style='color:blue'>يالا يا لالالالالالا انت وهو عايزة اكمل الحدوته ما تغلبونيش

يلا يلا بلاش غلبة

حااااااااضر ياماما ستو حاضر : احنا جاين اهوووووووووو

طيب يا غلابوي انت وهو وهيه وقفنا اخر مرة عند الأطباق

والنهارده اه يادماغي ياني حنكلم عن

الأنفتاح

ههههههههههه انفتاح ايه ياماما ستو هو احنا في امريكا ههههههههههه

بس يا مغلبني اسمع معنى الأنفتاح قبل ما افتحلك دماغك

الأنفتاح في اللغة الأفتراق وفي الأصطلاح تجافي كل من طرفي اللسان والحنك الأعلى عن الآخر حتى يخرج الريح من بينهما عند النطق بالحرف . وحروفه خمسة وعشرونوهي ما عدا حروف الأطباق.

الأذلاق: في اللغة حدة اللسان , يعني طلاقته واضطلاحاً سرعة النطق بالحرف لخروجه من طرف اللسان كاللام والراء والنون وبعضها من الشفتين كالفاء والياء والميم ويجمع هذه الحروف قوله( فر من لب) الباقي لضده وهو الأصمات

الاصمات: لفغة المنع

اصطلاحاً : امتناع حروفه من الأنفراد اصولا في الكلمات الرباعية والخماسية

يعني ايه ياماما ستو

يعني يا ضنيا ويانور عيني انها لايتكون منها هذه الكلمات من غير ان يكون فيها حروف من حروف الذلاقة ولذلك كل كلمة رباعية او خماسية اصولاً لا يوجد فيها حرف من حروف الذلاقة ولذلك فهي غير عربية زي لفظ

( عسجد) اسم للذهب وحروف الأصمات 23 وسموها مصمتة للي قلناه قبل كده

الصفير: في اللغة صوت يشبه صوت الطائر وفي الأصطلاح : صوت زائد يخرج من الشفتين يصاحب احرفه الثلاثة وهي الصاد والسين المهملتان ( يعني من غير نقط زي ما كانو بيكتبوا زمان الحروف من غير نقط) والزاي المعجمة وسميت بالصفير لأنك بتسمع لها صوت يشبه صوت صفير الطائر

الصاد مثلا صوتها يشبه صوت الوزة

والسين شبه صوت الجراد

اما الزاي فشبه صوت النحوله واقوى هذه الحروف الصاد للي فيها من استعلاء واطباق

القلقلة: في اللغة الاضطراب والتحريك وفي الاصطلاح اضطراب المخرج عند التعلق بالحرف ساكناً حتى يسمع له نبرة قوية . وحروفها خمسة مجموعه في كلمة( قطب جد)والسبب في هذا الأضطراب والتحريك شدة حروفها لما فيها من الجهر والشدة والجهر يمنع جريان النفس والشدة تمنع جريان الصوت فاحتاجت كلفة في بيانها ومراتب القلقلة ثلاثة

اعلاها الطاء واوسطها الجيم وادناها الباقي وكمان في ناس بتقول

اعلاها المشدود الموقوف عليه ثم الساكن الموقوف عليه ثم الساكن وصلا ثم المتحرك . والقلقلة صفة لازمة لهذه الأحرف حالة سكونها متوسطة كانت مثل( حلقنا) ( قمطريرا) ( ربوة)

( واجتباه) ( ويدخلون) ام متطرفة موقوفا عليها مثل( خلاق)

( محيط) ( بهيج) ( قريب) ( مجيد) ويجب بيانها في حالة الوقف اكثر من حالة الوصل خاصة اذا كان الحرف الموقوف عليه مشدد

مثل( الحق) وقال في الجزرية:

وبينن مقلقلا ان سكنا

وان يكن في الوقف كان ابينا

وهي تابعة لما قبلها على الراجح

وقال بعضهم ان تكون قريبة من الفتح مطلقا وقد قيل في ذلك

وقلقلة ميل ال الفتح مطلقا

وان تتبعها بالذي قبل تجملا

اللين: في اللغة هو ضد الخشونة وفي الاصطلاح اخراج الحرف في لين وعدم كلفة منغير تكلف يعني

وحروفه 2 الواو والياء الساكنتان المفتوح ما قبلهما زي ( خوف) ( بيت)

الأنحراف: لغة الميل والعدول واصطلاحا ميل الحرف بعد خروجه الى طرف اللسان وله حرفان اللام والراء فالأنحراف صفة لازمة لهما لأنحرافهما عن مخرجهما حتى لا يتصلا بمخرج غيرهما فاللام ناحية طرف اللسان والراء الى ظهره

التكرير: في اللغة اعادة الشيئ مرة بعد مرة واصطلاحاً ارتعاد رأس اللسان عند النطق بالحرف . وهي صفة تغلب على اللسان عند النطق بالراء للراء ولكن يجب ان تكون بقصد حتى لايتولد من الراء راءات والغرض من معرفةهذه الصفة التحفظ منها عند النطق بالراء وقال صاحب الجزرية:

وأخف تكريرااذ تشدد

وليس معنى اخفائها عدمها بالكلية ( يعني مش تلغيها خالص)

لأن ذلك يسبب حصرا في الصوت فتخرج كالطاء وده غلط

التفشي: لغة الأنتشار والأتباع واصطلاحا - انتشار الريح في الفم عند النطق بالشين حتى يتصل بمخرج الظاء المعجمة وهذه صفة للشين خاصة وهو الأرجح وقيل الفاء,واالثاء والصاد والراء والسين , تفشيا كذلك والأصح الأول كما تقدم

الأستطالة: لغة الأمتداد واصطلاحاًامتداد الصوت من اول احدى حافتي اللسان ال اخرها وهي صفة الضاد المعجمة

اما الغنة فهي صفة لازمة للنون والميم تحركتا او سكنتا ظاهرتين او مخفاتين او مدغمتين والكلام كان مستوفي عليها في حكم النون والميم المشددتين

وابن الجزري قال

صفاتها جهر ورخو مستفل

منفتح مصمتة والضد قل

مهموسها فحثه شخص سكت

شديدها لفظ اجد قط بكت

وبين رخو والشديد لن عمر

وسبع علو خص ضغط قط حصر

وصاد طاء ظاء مطبقة

وفر من لب الحروف المذلقة

صفيرها صاد وزاي سين

قلقلة قطب جد واللين

واو سكنا وانفتحا

قبلهما الأنحراف صححا

في اللام والراء بتكرير جعل

وللتفشي الشين ضادا استطل

وتوته توته خلصت الحدوته

وبكده خلصت حوتة ماما ستو ياترى المرة الجاية مين الي حيحكي الي عايز يعرف يستانانا</span>

<span style='color:royalblue'>سلام عليكووووووو </span>

تم تعديل 16 فبراير 2008 بواسطة شهد

[shahd]

وحشتوووووووووووووني ازيكو يا حلوين

انا مين لالالالالا مش عارفني

:wub:

:D

اناااااااااااااا

:huh:

:wub:

الأستاذ تجويد حعرفكم النهاردة على اتنين من صحابي الي هما

التفخيم والترقيق

بصوا يا احلى اصحاب

يا تفخيم انت فين حبايبي عايزين يتعرفوا عليك

التفخيم / انا موجود وتحت الطلب انا في اللغة التسمين وفي الأصطلاح انا عبارة عن سمن بيدخل علىصوت الحرف

ههههههههههه سمن ولا زبده

التفخيم: ايه يا استاذ تجويد حضرتك جايبهم يتريقوا علي

الأستاذ تجويد: لا ابدا بس انت وهو

حاضر حاضر اسفين يا تفخيم افندي

التفخيم: طيب طيب زي ما كنت بقول انا في الأصطلاح سمن بيدخل على صوت الالحرف لحد ما يتملي الفم بالصدأ . وانا والتسمين والتغليظ اخوات وبناخد نفس المعنى بس الي بيستخدم في اللام التغليظ وفي الراء التفخيم الي هو انا

ويقابلني الترقيق يلا يا عسل انت فين يا رقيق اظهر وبان عليك الأمان

يادي الكسوف انا جاي اهو

الترقيق: انا في اللغة التنحيف وفي الأصطلاح عبارة عن نحول يدخل صوت الحرف فلا يمتلئ الفم بصداه بقلك ايه الحروف على قسمين

الأستعلاء كلها مفخمة لا يتثنى منها اي شيئ سواء جاورت مستفلا ام لا وهي سبعة عشر في قول ابن الجزري

( خص ضغط قظ) وتختص حروف الأطباق وهي الصاد والضاد والطاء والظاء بتفخيم اقوى مثلا ( طال/صابرين )

وحرف الاستعلاء فخم واخصصا

الاطباق اقوى نحو طال والعصا

ومراتبي انا التفخيم طبعا ال 5 اعلاها المفتوح وبعده الف نحو طائعين وبعده المفتوح وليس بعده الف نحو صبر ثم المضموم نحو: فضرب ثم الساكن نحو فاقض ثم المكسور نحو خيانة

واما الأمور الرقيق المكسوف ده اصله مشي معلش

حروفه الاستفال فكلها مرققه لايجوز تفخيمها الا اللام والراء في بض احوالها وابن الجزري قال

وررق مستفلا من احرف

وحاذرن تفخيم لفظ الألف

فاللام تفخم في لفظ الجلالة الي بيجي بعد فتح او ضم

( ويعلم الله) وترقق في لفظ الجلالة الواقع بعد كسر ولو منفصل عنها ( بالله/ بسم الله) وكمان لو كان قبلها امالة كبرى وده الي بيقوله السوسي في احد وجهيه مثلا( نرى الله ) وابن الجزري

قالنا في الحكاية دي

وفخم الللام من اسم الله

عن فتح او ضم كعبد الله

اما الراء يا عيني عــــ الراء عندها حالتين متحركة وساكنة

فالمتحركة لو كانت مكسورة فما فيش خلاف في ترقيقها سواء كانت الكسرة اصليه ام عارضة , وسطاً ام طرفا منونة ام غير منونة سكن ما قبها ام تحرك بأي حركة وقع بعدها حرف استعلاء ام استفال في اسم ام فعل مثال( رزقاً/ الغارمين/فضرب/انذر الناس /امر مريج/وليال عشر)

ولو كانت مفتوحة او مضمومة يا تفخيم افندي

التفخيم: في الحالة دي تفخم زي الراء ( ربنا/الرحمن/رزقنا/ الروح) الا في حالة الأمالة

زي( مجريها) والراءالساكنة في الأول اي بعد همزة الوصل او في الوسط او في الطرف فأن كانت في الأول فهي مفخمة مطلقا على حد سواء

ولسه يا ما حنشوف في التفخيم والترقيق بقلكوا ايه كده فل اشفكوا الحلقة الجاية

[وليد صفوت]

عزيزتى شهد ,......

استأذنك فى حفظ الموضوع بجهازى ,.. و ربما طبعه على ورق بعد ذلك ( إذا سمحتى لى ) ,... لأن أمى تحب قراءة تلك الموضوعات و هى تفضل قراءته على الورق بدلاً من الكومبيوتر ( العتب عالنظر بقى :D ) ,...

هاااااااا ؟ قولتى اييييييييه ؟؟ :wub:

[shahd]

عزيزتى شهد ,......

استأذنك فى حفظ الموضوع بجهازى ,.. و ربما طبعه على ورق بعد ذلك ( إذا سمحتى لى ) ,... لأن أمى تحب قراءة تلك الموضوعات و هى تفضل قراءته على الورق بدلاً من الكومبيوتر ( العتب عالنظر بقى  :D  ) ,...

هاااااااا ؟ قولتى اييييييييه ؟؟ :D

<{POST_SNAPBACK}>

بكل سرور وعلى الرحب والسعه :D

[وليد صفوت]

عزيزتى شهد ,......

استأذنك فى حفظ الموضوع بجهازى ,.. و ربما طبعه على ورق بعد ذلك ( إذا سمحتى لى ) ,... لأن أمى تحب قراءة تلك الموضوعات و هى تفضل قراءته على الورق بدلاً من الكومبيوتر ( العتب عالنظر بقى  :D  ) ,...

هاااااااا ؟ قولتى اييييييييه ؟؟ :D

<{POST_SNAPBACK}>

بكل سرور وعلى الرحب والسعه :D

<{POST_SNAPBACK}>

ميييييييييرســــــــــــــــــــــــــــــــــــــــــــــــى :D :D :D