الكتب المدرسيــــــــــــة

[Alshiekh]

سؤال راودنى كثيرا وترددت فى طرحه

الموضوع عن الكتب المدرسية ، ليس عن مضمونها أو محتوياتها .....

الموضوع هو هل نحن اغنى من الدول المتقدمة؟ لماذا نهدر بعضا من مواردنا المالية فى اعادة طبع الكتب المدرسية كل عام؟

لاحظت انهم فى امريكا ، - أقول امريكا لانه ليست لى دراية بما يحدث فى الدول الآخرى - يلزمون الطلبة بأعادة الكتب المدرسية فى نهاية العام الدراسى الى المدرسة ويجب ان تكون فى حالة جيدة وخالية من التعليقات وما الى ذلك ، فقط مسموح بوضع اسم الطالب فقط ، ويعاد تسليم نفس الكتب لطلبة السنة الدراسية الجديدة وهكذا لمدة تتراوح بين 3 الى 5 سنوات.
لايسمح للكالب بالانتقال للصف الذى يليه قبل اعادة الكتب سليمة نظيفة وصالحة للاستخدام او بدفع ثمنها ان كانت قد فقدت او ان حالتها قد اصبحت مزرية.

هل يمكن تطبيق ذلك النظام فى مصر حيث اننا جميعا نعلم ان مصير الكتب المدرسية دائما الى بائعى الترمس والطعمية ومحلات العطارة وهو مايمثل اهدارا للمال مما يوفر الكثير للعملية التعليمية بالاضافة الى انها تعلم الطالب كيفية المحافظة على كتابه سليم ونظيف.

أم ترانى قد شططت فى تفكيرى؟

[se_ Elsyed]

طبعاً شططت في تفكيرك ..

يا عزيزي محمد ... التطوير والنهضة وحل المشكلات يحتاج إلى عقول ناضجة وغير تقليدية ..

وللأسف هذه النوعية غير موجوده لدينا حيث أن المسئولين عن التعليم عندنا عقولهم خشبت وتيبست ... ويجيبوا فتحي سرور يشيلوا حسين كامل بهاء الدين ... العقول المعفنة هي هي ...

وبعدين من ناحية تانية الشعب عندنا عايز يتوجه ويتشكل من جديد ...

فسيادتك عايز تقولي إن الأطفال عندنا وأولياء الأمور هايبوا بين يوم وليلة عندهم وعي ويخلوا الولد يحافظ على كتابه لنهاية السنة عشان طالب تاني يستلمه ويلاقيه نضيف ؟

يا خي ديهدا .... ده بالصلاة على الحبيب ديتها بس أول إسبوعين دراسة وتلاقي الكتاب كله بُقع زيت طعمية .... والظاهر إن الطعمية هل كلمة السر في مسألة الكتاب المدرسي ... فخلال الدراسة تلاقي الكتاب من بره وجوه إتملى بُقع طعمية ... وبعد الدراسة ما تخلص بيتحول الكتاب إلى قراطيس طعمية .

[مصرية الهوى]

بص يا أستاذ محمد .. ولو حضرتك فتحت الكتب المدرسية السعودية هتلاقي أول صفحة مكتوب فيها ...

لهذا الكتاب قيمة مهمة وفائدة كبيرة فحافظ عليه واجعل نظافته تشهد على حسن سلوكك معه.

إذا لم تحتفظ بهذا الكتاب في مكتبتك الخاصة في آخر العام للاستفادة، فاجعل مكتبة مدرستك تحتفظ به.

بس مين اللي هيسمع وينفذ ؟؟!!

عارف حضرتك إن أمريكا تنفق 5.5% من الناتج القومي على التعليم ... والعرب ينفقوا كام ؟ .. ينفقوا 5.8% من الناتج القومي على التعليم ... يعني مثلاً مصر تنفق على كل 1000 طالب أكتر من اللي تنفقه أمريكا على نفس العدد ... السعودية والخليج بشكل عام تعتبر من أكثر دول العالم إنفاقاً على التعليم ...!!!

بس للأسف احنا فيييييييين وهما فيييييييييين !!! .. كما بين الثرى و الثريا !!!

وعشان حضرتك اتكلمت عن الكتب أنا هأتكلملك عن الكتب هنا في السعودية !!!

وزارة التربية التعليم هنا بتطبع كل سنة كتب بالهببببببل .. أه والله العظيم .. أنا مش عارفة ليه ميعملوش إحصائيات للطلبة ويطبعوا على عددهم !! ... مخازن الوزارة ومخازن المدارس بتلاقيها آخر السنة ملياااانة كتب .. والسنة الجاية يطبعوا جديد .. وبتاعت السنة اللي فاتت تفضل متخزنة والعناكب معششة عليها !!

وبعض الطلاب لما بيكون بيعرف حد من إدارة المدرسة أو من بتوع الوزارة بتلاقي معاه نسختين من كل كتاب .. ليه بقى ؟؟!!

عشان يسيب نسخة في درج الفصل .. مكسل كل يوم يشيل الكتب معاه رايح جاي ...

ونسخة تبقى معاه في البيت عشان يذاكر ويحل واجباته ...

وايه مصير الكتاب آخر السنة ؟؟!!

أنت تعال أيام امتحانات آخر السنة للمدارس .. المدرسة تبقى مفروووووشة كتب .. خلاص كل الطلبة بعد ما يخلصوا امتحان يرموها ( مفيش أي علاقة وجدانية بين الطالب والكتاب) ... وتعال اتفرج على الكتب .. أغاني وتعليقات ورسووومات وكلام فارغ .. والورق متقطع وحالته حالة !!!

ولو مثلاً قلت لواحد فيهم : حرام شيل الكتاب معاك ... بيتريق عليك .. يا عم أنا ما صدقت اخلص منه وامتحن !!

المفروض فعلاً الخطط دي تتطبق عندنا .. عشان ميبقاش فيه استنزاف للموارد المالية على تعليم فاشل بكل المقاييس !! .. على الأقل تروح الفلوس لحاجه مفيدة ..

ولكن لا حياة لمن تنادي ..

فساد في شيء !!!!

وللأسف هذه النوعية غير موجوده لدينا حيث أن المسئولين عن التعليم عندنا عقولهم خشبت وتيبست ... ويجيبوا فتحي سرور يشيلوا حسين كامل بهاء الدين ... العقول المعفنة هي هي ...

سي السيد .. ما هو محدش أحسن من حد .. يشيلوا أحمد الرشيد ويجيبوا عبد الله العبيد والعقول المعفنة .. هي هي

[se_ Elsyed]

معليش يا محمد إنت وجيجي ... لا نستطيع برضوا أن نتحدث عن الكتاب المدرسي الملموس بدون أن نتحدث عن الحشو ..

فما تقومش الوزارة بطباعة كتب دمها تقيل وشكلها قبيح ومليانة حشو مالوش لازمة .. وتقول للطلاب إحترموها وحافظوا عليها ..

وده كنا بنعاني منه على فكرة أيام الدراسة ... وعايز أسأل سؤال ... هو أحنا ليه كنا بنحافظ على الكُتب الخارجية اللي بنشتريها بفلوسنا وتبقى تتوارثها الأجيال .. في حين إن الكتاب المدرسي بيذهب إلى المحرقة ؟

ما هو عشان كده ...

عشان اللي بيألفوا الكتاب المدرسي بيبقوا قاعدين في البُرج العاجي ومش حسين بالطلاب .

في حين إن الكتاب الخارجي بيركز على المفيد للطُلاب فقط ويبعد عن الحشو الفارغ .

[Folana]

السلام عليكم ورحمة الله ..............

اللى اعرفه ياجماعة ان فى السعودية بيطلبوا تسليم الكتب فى نهاية العام الدراسى ..يعنى لى واحدة قريبتى عايشة هناك وبتحكى لى انهم بياخدوا الكتب تانى وحتى والولاد بيمتحنوا لو حد ساب كتابه بره اللجنة بيلموه على طول ...يمكن بقى مش بيطبقوا النظام ده فى انحاء المملكة ...

كمان هنا فى مصر اصدروا قرار حيطبق من العام المقبل ..يحفز الطلاب على تسليم كتبهم والمحافظة عليها فى مقابل خصم نقدى من مصاريف العام الدراسى ..وركزوا على الكتب اللى مالهاش استخدام وحتفضل نظيفة سواء شاء الطلاب ام أبوا ..مثل كتب الصيانة والتدبير المنزلى والتكنولوجيا ..واعتقد اذا نجحت التجربة حيعمموها على باقى الكتب الدراسية ....

تبقى نقطة هامة ....الحقيقة ان الكتب المدرسية هى اللى مالهاش استخدام دلوقت والضغط كله على الكتاب الخارجى ..مش علشان الشكل بالعكس دى الكتب دلوقت بقت كلها صور وبالالوان كمان :D

لكن الكتاب الخارجى منظم اكتر وبيتناول المواضيع على شكل نقاط وعناوين .ناهيك بقى عن كم اسلة المراجعة الموجودة فى نهاية كل درس والتى يفتقر لها الكتاب المدرسى ...اما كتاب المدرسة فكله سايح على بعضه..ولكن الحقيقة لا غنى عنه برضه علشان بتيجى منه اسئلة الامتحانات ...يعنى اللى بيتوارث دلوقت هو كتاب المدرسة بس مش علشان قيمته الدراسية ولكن علشان نخلص منه ونوزعه بسرعة ..اما الكتاب الخارجى فبيكون مستهَلك وماينفعش حد تانى الا بتاع اللب .......

بس انا راى ان المشكلة مش بتكمن فى تسليم الكتب مرة اخرى او رميها ..المفروض انهم يطوروا الكتب الدراسية ..او يلغوها خالص ويحل محلها الكتاب الخارجى واهو برضه الوزارة حتستفيد من بيع الكتب الخارجية بدل ماندفع مصاريف كتب ونشترى كتب خارجية برضه ......ومن الملاحظ انه بيكون فيه تاخير فى تلسيم الكتب المدرسية ..وفيه اقاويل حول ان الموضوع ده مقصود علشان نشترى الكتب الخارجية الاول نشتغل منها وبعد كده يدونا الكتب اللى حتتشال فى الادراج ..والله اعلم

[Alshiekh]

معليش يا محمد إنت وجيجي ... لا نستطيع برضوا أن نتحدث عن الكتاب المدرسي الملموس بدون أن نتحدث عن الحشو ..

فما تقومش الوزارة بطباعة كتب دمها تقيل وشكلها قبيح ومليانة حشو مالوش لازمة .. وتقول للطلاب إحترموها وحافظوا عليها ..

وعايز أسأل سؤال ... هو أحنا ليه كنا بنحافظ على الكُتب الخارجية اللي بنشتريها بفلوسنا وتبقى تتوارثها الأجيال .

في حين إن الكتاب الخارجي بيركز على المفيد للطُلاب فقط ويبعد عن الحشو الفارغ .

<{POST_SNAPBACK}>

شوف ياأبو السيِد

انا لم اقصد الكتب فيها ايه ومضمونها ايه انما قصدت لماذا لانعلم الطالب ثانوى او حتى طفل ابتدائى ، لماذا لانعلمهم ان يحافظوا على كتبهم وفى نفس الوقت نوفر ماننفقه على الكتاب المدرسى الى الربع او الثلث مثلا ويوجه الى اشياء مفيدة بدلا من بتوع الطعمية.

قد يكون كتاب المدرسة شكله مش عاجب الطالب ، لكن لازم الطالب يتعلم ان يقبله كما هو بل ويحافظ عليه حتى يستفيد منه غيره.

أما لماذا حافظنا على الكتاب الخارجى عاما بعد آخر ، فاعتقد انك وضعت الاجابة على السؤال بنفسك وظللتها انا بالاحمر ، دى فلوسى ياعالم

النقطة الثانية والتى لا يحب ان نغفلها:

الكتاب الخارجى ماهو الا كتاب المدرسة بعد قيام السادة الجهابذة نيابة عن الطلبة بتلخيص محتوياته ، حيث ان الكتاب الخارجى لايضيف مقرر جديد لتوسيع مدارك الطالب ، وانما يختصر له مانسميه نحن حشوا.

والاهم فى الموضوع ياسيد باشا ان الكتاب الوزارى بيساعد الطالب ان يقرأ ويبذل بعض المجهود ويلخلص فهمه للموضوع وفى هذه الحالة ممكن نقول ان الطالب فهم الدرس، اما الاعتماد فقط على الكتاب الخارجى فهو ليس للفهم بل للمجموع ، حيث انك لو قرأت الكتاب الخارجى فلن تجد شيئا تبذل فيه مجهودا لتلخصه ، لانه قد تم تلخيصه واختصاره مقدما.

مش حاطول عليك ، لكن انا افضل ان يكون الكتاب الخارجى فقط لمزيد من الاسئلة لتدريب الطالب على فهم ماوراء الكلمات من خدع وحركات هذا فى المواد الكتابية ، وعلى فهم المزيد من المعادلات رياضية او كيميائية او حتى فى الاحياء.

وعلى فكرة انا لم اعود عيالى ان يعتمدوا فقط على الكتاب الخارجى ، بل كنت احثهم على استخدام الكتابين ، الوزارى والخارجى .

===================================================

الآنسة جى جى

فكرتينى ياجي جى

كانوا بيكتبو على الكتاب من الخلف شوية نصايح منها نصيحة بتقول:

اغسل يديك قبل الاكل وبعده ، فطبعا التلاميذ مكسلين يغسلوا ايديهم قبل الاكل وبعده ، فكانوا بيمسحوا ايديهم قبل الاكل وبعده فى كتاب المدرسة.

===================================================

الاخت فلانة

مع كتب المدرسة كان فيه كتب نماذج الامتحانات كانت الوزارة بتوزعها بمصروفات منفصلة ، واتذكر فى احدى السنوات ثارت ضجة لورود اسئلة غير موجودة بالمنهج ، ولكن فى الحقيقة كانت موجودة فى المنهج وكان هناك نفس السؤال فى كتاب الوزارة لنماذج الامتحانات ، ولذلك كان المدرسين الخصوصيين يوصون الطلبة بحل نماذج امتحانات الوزارة.

حقيقى انا ماعنديش فكرة ماإذا كان معمولا بنفس النظام ام لا.

[صفاء]

على أد قيمة الكتاب عندنا .. على أد اللى نعمله فيه

بعدين يعنى أما نحافظ على الكتب .. أمال نكيس اللب والفول السودانى فى ايه؟

احنا أصلا شعب يحب الأزأزة

نتحرم من اللأزأزة عشان التعليم ؟

[مصرية الهوى]

صباح الخير ...

بصراحة أنا مش فاهمه بتقصدوا ايه بالكتاب الخارجي ...!!

يعني في مصر لازم تشتروا كتاب غير كتاب المدرسة ؟؟!!

بس اللي فهمته إنه يمكن زي الكتب المساعدة اللي عندنا .. يعني مثلاً لما كنت في ثانية وثالثة ثانوي .. كانت كتب الكيمياء بتقرف والله .. حشو وكلام كتير سايح على بعضه .. بس كان فيه أستاذ كيمياء عامل كتب مساعدة .. جايب كتاب الكيمياء وعامله نقاط مرتبة ورسومات شكلها حلو وشكله يفتح النفس .. ومعاه ملحق لأسئلة الوزارة لكذا سنة وحلهم ... كنت بذاكر منه من غير ما أرجع لكتاب المدرسة ...!!

بس المواد التانية لا .. كتاب المدرسة كان يكفي ..

بصراحة الكتب المدرسية دلوقتي وللحق يعني .. شكلها جميل جداً .. وفيها رسومات وألوان وجداول ونقاط مرتبة .. والورق يبقى ورق مصقول.. بس المشكلة في اللي جوا .. وحتى لو كان المضمون حلو وكويس ومفيد وبيزيد معلومات الطالب .. طريقة التدريس تبقى وحشه .. مفيش غير الأسلوب التلقيني الفاشل .. وكمان الغلط في فهم الطلاب للتعليم .. لأنه للأسف 99% من الطلاب فاهم التعليم إنه روح المدرسة الصبح وتعال الظهر وحل الواجبات وذاكر ليلة الامتحان .. اطلع من الامتحان واعمل فورمات لكل حاجه في دماغك .. أهم حاجه تجيب مجموع كويس .. وتدخل كلية كويسة .. بعدين تتخرج وتلاقي وظيفة محترمة وخلاص ...ومش مهم أنت استفدت والا مستفدتش من اللي ذاكرته !!

اللى اعرفه ياجماعة ان فى السعودية بيطلبوا تسليم الكتب فى نهاية العام الدراسى ..يعنى لى واحدة قريبتى عايشة هناك وبتحكى لى انهم بياخدوا الكتب تانى وحتى والولاد بيمتحنوا لو حد ساب كتابه بره اللجنة بيلموه على طول ...يمكن بقى مش بيطبقوا النظام ده فى انحاء المملكة ...

ايوى يا مدام فلانة .. فيه بعض المدارس بتطلب من الطلبة إنهم يرجعوا الكتب آخر السنة ... بس بصراحة مش عارفة بيعملوا بيها ايه ؟؟ .. لأنهم السنة الجاية بيدوا الطلاب كتب جديدة

فما تقومش الوزارة بطباعة كتب دمها تقيل وشكلها قبيح ومليانة حشو مالوش لازمة .. وتقول للطلاب إحترموها وحافظوا عليها ..

أنا معاك يا سي السيد ... إن بعض الكتب دمها تقيل .. بس احنا عايزين نعود أولادنا على النظافة واحترام الكتاب أياً كان محتواه .. !!

معليش بقى يا أساتذة أنا صدعتلكم دماغكم .. ودخلتكوا في كذا متاهة .. بس لأني مفروسة من التعليم الزفت اللي عندنا .. وعشاني كمان مهتمة جداً بشؤون التربية والتعليم .. وبأحلم أبقى أستاذة في المناهج وطرق التدريس

يلا ربنا يقدرنا ونكون إيجابيين في الناحية التربوية والتعليمية .. عشان التربية والتعليم هي أساس نجاح الأمم ..!!

[Folana]

===================================================

الاخت فلانة

مع كتب المرسة كان فيه كتب نماذج الامتحانات كانت الوزارة بتوزعها بمصروفات منفصلة ، واتذكر فى احدى السنوات ثارت ضجة لورود اسئلة غير موجودة بالمنهج ، ولكن فى الحقيقة كانت موجودة فى المنهج وكان هناك نفس السؤال فى كتاب الوزارة لنماذج الامتحانات ، ولذلك كان المرسين الخصوصيين يوصون الطلبة بحل نماذج امتحانات الوزارة.

حقيقى انا ماعنديش فكرة ماإذا كان معمولا بنفس النظامام لا

السلام عليكم ورحمة الله ....

الوزارة بتوزع على الطلبة كتاب لكل مادة اسمه دليل التقويم ..وهو عبارة عن اسئلة مراجعة لكل درس ..يعنى هو فيه مجهود طبعا لكن اسئلة كل درس ماتتعداش صفحتين بس ..وانا مااعرفش اذاكر لولادى الا اذا كان تحت ايدى مرجع اسئلة ..المشكلة ان دليل التقويم ده بيوزع بعد شهرين تقريبا من بدء الدراسة وبنكون خلاص اشترينا الكتب الخارجية ..وهو بيوزع بالمجان او يعنى بيكون ضمن المصاريف الدراسية ...

والحقيقة انا برضه مااعرفش اذاكر لولادى الا من الكتابين معامفتوحين امامى.. يعنى كتاب الوزارة والكتاب الخارجى ان لم يكن كتابين خارجين كمان ..حتى بنتى تتغاظ منى جدا وتقول مامى لما بتذاكر لنا تفضل تقول طب نشوف الكتاب بيقول ايه ..طب والكتاب ده موضح الفكرة ازاى ..وهكذا.. :excl:

مصرية الهوى ..ولو انى كنت مقررة ماردش عليك نظرا للتهديد اللى تلقيته من اخونا الفاضل سكوب ..لكن حارد بس ماتبلغيهوش.. :D ..الكتاب الخارجى ده كتاب بيباع فى المكتبات بره المدرسة وبيشمل المنهج الدراسى ..ممكن يكون ملخص وممكن يكون فى صورة منظمة ..وده بيسبب لنا حيرة عند شراء الكتب ..لانى مش بافضل الكتب الملخصة طبعا ..بيمتاز بقى بالنسبة لى بكم الاسئلة المرفقة بكل درس واللى مش بتسيب صغيرة ولا كبيرة الا لما تضع سؤال عليها بالاضافة الى اسئلة امتحانات السنين السابقة فى جميع محافظات المحروسة ..وطبعا لا يخفى على احد اهمية حل الاسئلة بعد كل درس علشان الولاد يتمرنوا على شكل الاسئلة وعلى الحل النموذجى ...

اما بالنسبة للكتب اللى بتتلم فى السعودية - والعهدة على الراوى- فقريبتى بتقول انهم بيعيدوا طبعها مرة اخرى اعادة تصنيع يعنى ومااعرفش ازاى ..

انا شايفة ان المشكلة برضه مش الكتاب اكتر منها فى طريقة التدريس ...واللى بتعتمد على الحفظ كما انزل ...يعنى مثلا فى كتب الدراسات للمرحلة الابتدائية بالاقى الدرس كله اسئلة واكمل وحاجات كده ...المفروض المدرسة او المدرس يطلب من التلميذ البحث عن الموضوع علشان يكمل درسه لكن اللى بيحصل اننا بنستعين بصديق ..اقصد بنستعين بالكتاب الخارجى لتكملة الدرس فى كتاب الوزارة ....

وكل سنة وانتم طيبين

[Sherief AbdelWahab]

حلو قوي يا أستاذ محمد إننا نتكلم عن شكل الكتاب المدرسي ، ووزن الكتاب المدرسي ، سبق ان احنا اتكلمنا عن المضمون ، وليا فيه كلام ، خصوصاً كتب الكيمياء والفيزياء وطريقة كتابتهما التي تنطوي على كمية ضخمة من التنطع والتذاكي والمرض النفسي ، ولن أخوض فيها هذه الأيام..

نيجي للشكل.. ولنا وقفة ..

فيه مكون عدائي في ثقافتنا نحو "المرفق العام" ، واللي يعتبر كتاب المدرسة جزء منه .. شفت الشخبطة والتكسير والتخريب في مرافق النقل العام ، دة حتى في المنصورة لما اتعملت "باسكتات" للزبالة نظيفة تم تخريبها.. بعد 48 ساعة من تركيبها إن لم يكن أقل ..

من قبلنا كانوا يعتبون على أي طالب "لا يكتب" في كتاب.. "انتوا جيل خايب ما كنتوش بتعرفوا تذاكروا ، لما كنا قدكم كنا بنملا الكتاب هوامش وملاحظات ونقط ، انما الجيل الفقر بتاعكم فرحان قوي بشكل الكتاب وهو فاضي ، بلا وكسة"!

زاد من كدة تخريب التعليم في العهد الفتح سروري ، حتحب ازاي كتاب تقيل على الظهر والمخ ، تخيل إنك عايز تدخل دماغك كتاب مش قادرة إيديك تشيله!.. طب ازاي؟ (مع الاعتذار لسيد العاطفي)..

أضف لدة إن الدروس الخصوصية ألغت أهمية كتاب الوزارة ، رغم إن بعض مدرسي الدروس الخصوصية بيسرقوا مذكراتهم نهاراً جهاراً من كتاب الوزارة!.. المذكرات أصبحت أهم ، وبيتفنن المدرسين بشكل مبالغ فيه ومرضي في إظهارها بأجمل صورة كما لو كانوا هم وزارة التربية والتعليم وكما لو كانت المذكرات كتاب وزارة!

قصر الكلام :غير ان الكتاب مرفق عام ، فانت بتكرهه ، ولازم تخربه.. فهو تافه تافه تافه ومالوش أهمية!..

دة سلوك المعظم ..

فيه ناس في المقابل حظها وحش مع الكتاب ، زيي مثلاً ، سهل الكتاب معايا يتقطع مهما كنت محافظ عليه ، تحسن هذا الحظ معي مع الوقت ..

أختم مرة أخرى بعبارة جميلة لسي السيد تستحق أن تكون قفلة لمداخلتي :

يا عزيزي محمد ... التطوير والنهضة وحل المشكلات يحتاج إلى عقول ناضجة وغير تقليدية ..

وللأسف هذه النوعية غير موجوده لدينا حيث أن المسئولين عن التعليم عندنا عقولهم خشبت وتيبست ... ويجيبوا فتحي سرور يشيلوا حسين كامل بهاء الدين

خلص الكلام