قصة السُلطان مارينجوس .. وإبنه الأمير الننوس

[se_ Elsyed]

من سلسلة حكايات بعد النوم

كان يا ما كان يا سعد يا إكرام ..ولا يحلى الكلام إلا بذكر النبي عليه الصلاة والسلام ..

كان في دولة صغيرة أهلها ناس طيبين وإسمها " جمهورية بامبوزيا وجُزر الموز العُظمى " وكان يحكمها سلطان ديكتاتور إسمه " مارينجوس " وظل هذا المارينجوس كابساً على مراوح أهلها إلى أن بلغ من العُمر عتياً .. فأستدعى زوجته السلطانة " أم الننوس " ليستشيرها في الأمر :

مارينجوس : بأقولك يا أم الننوس .. أنا تعبت من الحكم وبلاويه وبأفكر أريح العضمتين بقى .. ده الموظف بيطلع معاش لما يبقى عنده 65 سنة .. وانا عديت السن ده بمراحل ... إيه رأيك ؟

أم الننوس ( وهي تخبط على صدرها بقوة ) : يا لهوي يا رينجو .. إنت أتخبلت يا راجل .. بقى عايز تسيب المُلك والحُكم والهيلمان وتقعد على قهوة المعاشات وترجع لي أخر النهار على النوم وأكل الزبادي ؟

رينجو : يا وليه مش قصدي .. حُكم إيه اللي أسيبه .. ده على جُثتي – وقالها بالانجليزي over my dead body .. انا بأقول بس ممكن أجيب الواد ننوس يساعدني في الحُكم بدل ما هو قاعد على القهوة مع شلة المقاطيع أصحابه طول النهار ..

أم ننوس : والله عين العقل .. ده كإنك دخلت جوه نخاشيش أفكاري .. أنا كنت بأقول كده برضوا .

رينجو : طب تفتكري يُحكم معايا بصفة إيه ؟

أم الننوس : بصفتة ولي العهد ..

رينجو : ولي عهد إيه يا وليه يا مخبولة .. إحنا في جمهورية .. ومافيش ولاية عهد ..

أم الننوس : خلاص .. نفكر سوا ونفتكس له أيه إفتكاسة تفصيل كده على ذوقك ..

رينجو وهو يصيح بأعلى صوته : مش هايجيب قرار الموضوع ده إلأ الولا كرشه .... واد يا كرشه .... واد يا كرشه ... هاتوا لي الواد كرشة العفريت هنا .. هو اللي هايحلها الفقري ..

كرشه مهرولاً وكرشه يتدحرج أمامه ككرة الثلج في شهر تشرين : نعمين يا فخامة جناب الإمبراطور .

رينجو موجهاً حديثه إلى أم الننوس : تعرفي يا أم الننوس .. أهو كرشه ده يقول للشيطان قوم وأنا ألبد مطرحك ... ويُعتبر فقري من الفقريين الكُبار .

كرشه : تربيتك يا إمبو ( إمبراطور يعني ) .... وأنا خدام تراب جنينة سعادتك .

رينجو : شوف يا كرشه يابني ومن الأخر كده .. أنا قررت أنا والست حرمنا السلطانة أم الننوس .. إننا نقلوظ مركز وبريستيج مُحترم لإبني الننوس . مانت عارفه ... بحيث واحده واحده وبعد عمرٍ – طويل – يبقى هو السلطان .. إيه رأيك ؟

كرشه : بعد الشر عنك يا باشا .. ده أنا أقطع من عمري وأديك ... ده أنا أسلخ من كرشي وأغذيك .. ده أنا رقبتي فداك يا باشا .

رينجو : بلاش أم الرقبة دي .. لحسن جسمي بيضرس لما بأسمعها .. اصل واحد صاحبنا زمان فضل يقول رقبتي رقبتي لحد ما حط راسنا في الطين ..

كرشه : طب بأقولك يا إمبو .. إيه رأيك نفصل له منصب وليكُن " رئيس عام شِلة الإفتكاسات " ؟

رينجو : طب ودول هايعملوا إيه ؟ أو هاتكون وظيفتهم إيه ؟

كرشه : إسم الله على مقامك يا إمبو .. دول هاتبقى مُهمتهم إفتكاس أي إفتكاسات جديدة سيادتك تحب تفتكسها .

رينجو : آه صح ... طب .. طلع لي بقى قرار ديكتاتوري رقم 1403 بتعيين إبننا الننوس إبن مارينجوس " رئيساً للجنة الإفتكاسات " على أن يكون له مُطلق الحرية في إختيار أعضاء اللجنة المُفتكسين والمُفتكسات ...

و هنا نعق الغُراب ... وأذن بحلول الخراب ...

نلتقي بعد الفاصل

[مسافر زاده الخيال]

ايه ده ياسي السيد

دنت كاتب كوميدي نمبر ون :D

بصراحة الشعب المصري بيخلق الكوميديا من الهوا :sad:

مش عارف ايه السر :) مش متصور ان فيه اي شعب في العالم كله عنده الكوميديا وخفة الدم ومش عارف ازاي السينما الكوميدية تشهد ازمه والشعب المصري لا زال يتمتع بالصحة الكوميدية :D

بصراحة انا ضحكت كتير (من زمان مضحكتش)

قصة رمزية كوميديه بامتياز :wub:

[daktara]

اصطفصار بصيط يا سس

هو المهروش رئيص لجنه الافتكاسات ولا رئيص شله البتاعه دى وقول لنا اللجنه دى فين قى مجلص المنبوزين مش كدة

اه ماهو لازم توضح للشعب المضروب غلى قفاه ( المغلوب على امره يعنى)

[se_ Elsyed]

بصراحة الشعب المصري بيخلق الكوميديا من الهوا 

مش عارف ايه السر

السر في الشارع يا أخ مسافر ..

يعني إنت لو قعدت لمدة شهر على قهوة من قهاوي مصر ... ممكن تعرف القرد بيخبي إبنه فين ؟

ده الشارع المصري ده أجدع من جامعة هارفارد نفسها .. واللي بيتعلموا فيه صح بيخرجوا ومعاهم درجة الدكتوراة الفخرية .

اه ماهو لازم توضح للشعب المضروب اللى قفاه

أصبر بس عليه يا دكترة مانا بأكمل القصة ..

[الرافعي]

بصراحة الشعب المصري بيخلق الكوميديا من الهوا 

مش عارف ايه السر

السر في الشارع يا أخ مسافر ..

يعني إنت لو قعدت لمدة شهر على قهوة من قهاوي مصر ... ممكن تعرف القرد بيخبي إبنه فين ؟

ده الشارع المصري ده أجدع من جامعة هارفارد نفسها .. واللي بيتعلموا فيه صح بيخرجوا ومعاهم درجة الدكتوراة الفخرية .

اه ماهو لازم توضح للشعب المضروب اللى قفاه

أصبر بس عليه يا دكترة مانا بأكمل القصة ..

<{POST_SNAPBACK}>

الله لا يسيئك يا أخويا يا س.س

ما تنساش عسكراني (ياور مارينجوس) اللي كان دايماً يقول له (طويل العمل يطول عمره ويزهزه عصره، وينصره على مين يعاديه .. هاي هيء)

ممكن برضه قرني في مسرحية سكة السلامة، فهذه النماذج حول مارينجوس لا تفارقه، وإن كان الننوس لجنة الافتكاسات مش عاجبهم

تم تعديل 24 نوفمبر 2005 بواسطة حلاوة العنتبلي

[Alshiekh]

مارينجوس .... مارينجوس ..... مارينجوس

أنا بيتهيألى سمعت الاسم ده قبل كده

عنده عيال تانية والا هو ننوس واحد بس؟

أصل اللى انا سمعت عنه كان عنده اثنين ، واحد كان بيشتغل فى البسبس ، والثانى برضه اشتغل بالبسبس قبل ماباباه مافتحله دكانه للشباب علشان يمرن العيال لحد ماربنا فتح عليه وفتحله دكانة الانتكاسات.

والنبى نورنا ياسى السيد الله يخليك

[Diab]

جري أيه يا س س ده أنت غلبت بلال فضل و أحمد البيه والعالم دي بص أنت تحاول تكمل القصة دي وتحولها فيلم يعني تجيب سعيد حامد و حسن حسني( ده أساسي زي ختم النسر)

علي ميكنج في روتانا سينما و بت دلوعة من بتاعة الإعلانات و عيش بقي في الأساتك والأرانب يااااااه كنت حنسي تمويل الفيلم بص أطلع علي العدل جروب بقين حلوين فيهم حينتجولك الفيلم بس إستني أبوس إيدك بلاش سامي العدل يمثل فيه

أرجوووووووووووك

[se_ Elsyed]

أعزائي مُحبي فن الكرابيج الكوميديا .. أشكركم على حُسن الإستقبال .. بس أنا ماليش دعوة ... في أخر القصة هاتلاقي البوكس واقف بره باب الإبتسام وبيلم الناس اللي قرأت الموضوع وخصوصاً اللي شجعوا الكاتب ( دول بقى هايكلوا ضرب ماكلوش كمال الشاذلي لو الناس لقيته ماشي في العتبة لوحده )

فالكاتب والإدارة غير مسئولة عن العواقب الوخيمة .. وغير مسئولة عن أي تشابه مع شخصيات حقيقية موجودة بيننا في الحياة العامة ( واخدينلي بالكوا .. وخصوصاً إنت يا محمد شكلك مناكف وغاوي معتقلات )

----

من غير رغي ولت وعجن .. نكمل الجزء الثاني من القصة

----

منظر داخلي .. ليلي .. قاعة الطعام في القصر الإمبراطوري بجُزر الموز ... والعائلة الكريهة .. قصدي الكريمة مُلتفة حول الطعام وتأكل بنهم وشراسة وكأنهم قادمون من الصومال :

أم الننوس : مالك يا نونوس .. ما بتاكولش ليه يا عين أمك ؟ مع إني عامله لك طبق الإستاكوزا بالكافيار اللي بتحبه .. أما الحلو فمفاجأة .... حلة شوربة الجمبري بالفياجرا اللي متعود تقربعها كل يوم .

ننوس : أنا متضايق ومفنسق نفسياً يا مامي وماليش نفس للدنيا كلها .

أم الننوس : ليه بعد الشر .. إن شالله الشعب هو اللي تتسد نفسه ... مالك يا كبد أُمك ؟

ننوس : العيال في الشارع عمالين يعايروني في الرايحة والجاية ويقولوا لي .... بيقولوا لي ....

رينجو : بيقولوا لك إيه ولاد الـ....... – تووووت حتة رقابة – إنطق يا واد بيقولوا لك ؟

ننوس : بيقولوا لي يابن يابن .... الديكتاتور .

وهنا يرمي رينجو دكر الإستاكوزا التي كان يهم بإلتهامه ويصيح : ديكتاتور ؟!!! أدي أخرة دلعي فيهم .. أنا استاهل ... فضلتوا تقولوا لي ديمقراطية .. وتصليحات .. وعدل الطرطور .. عدل الطرطور ( الدستور يعني ) وأول الرعاع ما يشموا نفسهم يقوموا عضين الإيد اللي إتمد لهم .... إندهوا لي الواد عسكراني ... ولا يا عسكراني ...

عسكراني يأتي مهرولاً ممسكاً بسيفة الخشبي ومرتدياً خوزته البلاستيطية : نعمين يا سيد المعلمين ... أُأمر تُطاع ...

رينجو : جهز لي يالا الطيارة الهليكوبتر الفوشيا .. وحط لي فيها قد 4 أو 5 براميل جاز ... أنا نويت أولع في الشعب .. عشان يتأدبوا وكل ما يشوفوا نفسهم وهما محروقين حروق بجميع الدرجات يبقى يحترموا نفسهم .

أم الننوس : صلي عالنبي يا رينجو وبلاش إندفاع الشيخوخة المتأخرة ده ..

رينجو : أعمل يه يا أم الننوس النار قايدة في صدري .. والواد اللي حيلتنا هايروح مني وهايبقى مُعقد نفسياً .

أم الننوس : مانا زيك يا حبيبي نفسي أولع في اللي خلفوهم .. بس لازم نفكر بحكمة .. ونخطط إزاي نرد عليهم بعملية نضيفة 100 %

رينجو : مافيش غير الولا كرشه هو اللي هايلحها .. حد يروح يندهوا من المسمط اللي على أول الشارع .

ننوس : بعد إذن الإمبراطور ... سيب لي أنا الطلعة دي وأنا أوريك هانعمل فيهم إيه .. بس إديني يومين ... أروح منتجع رمش العين .. وأضرب لي حجرين .. وأرجع أبشرك بما يسُر العين .

رينجو : وأنا موافق وبأقولك نعمين .

يُتبع

[se_ Elsyed]

ويستدعي الننوس أعضاء شلة الإفتكاسات ويذهبوا إلى منتجع رمش العين مصطحبين معهم ما لذ وطاب من الطعام والشراب ..

ننوس : أنا جمعتكم النهاردة يا شباب عشان نضع النقط فوق الحروف ... ونأكل لحم الجمل والخروف ...

عضوإفتكاسي رقم 1 : أأمرنا يا حبيب الملايين والألوف .

ننوس : زي مانتوا عارفين الراجل الكبير بقى رجل بره ورجل جوه .. ويالله حُسن الخِتام .. وللأسف ملموم عليه شلة من أرباب المعاشات من نفس سِنه وواكلين دماغه وبيلعبوا في نفوخه البخت ... والأكادة بقى إن معظم الناس دي إكسبيرد وميتين قبل كده ... أما احنا فنُمثل جيل الطلائع .. يعني الشباب .. يعني الروشنة ... يعني العيال الكووول ... يعني بنات وسط البلد ...

عضو 2 : يسلم فُمك يا ننوس باشا .. وإحنا كلنا من إيدك دي لإيدك دي ... وإعتبرنا كلنا فِرد شراب في رجلك ... ودوس بينا مطرح ما تحب .. هاتلاقينا نقولك .. جو أون يا مان .... ويصيح الجميع هاتفين " يا ننوس يا ننوس .. إلبسنا في رجلك .. يالله ودوس "

ننوس : عفارم عفارم .. وهو ده المتوقع منكم ... أنا بقى فكرت وتكتكت ورسمت خطة مرحلية لشقلطة الراجل الكبير وسحب السجادة من تحته لحد فجأتون ما يلاقي نفسه على الحديدة وما فيش في إيده حاجة يعملها ...

عضو 3 : قول يا باشا وإشجينا ... ده أحنا كنا عطشه وإنت بس اللي بتروينا .

ننوس : أنا هاقنعه إننا نعمل إفتكاسات ... ( كده وكده يعين ) بحيث أرشحكوا كلكوا وتبقوا رجالتي في البرطمان ... هو طبعاً هايصمم يرشح أصحابه القدام – بتوع المعاشات اللي كلمتكم عنهم – أنا ساعتها هاكون محضر له خطة مضادة .. وهو إني أولع فيهم بجاز .. وانزلهم يفتكسوا في بلاد غير بلادهم .. بحيث أكشفهم وأعريهم ... في حين إني شخصياً هاكون واقف وراكوا بكل قوة وبكل الطُرق .. عشان نحط إيدنا على إيه ؟

الجميع في صوت واحد : على البرطمان يابو البشابيش ...

ننوس : عليكوا نور .... سيبوني بقى أكمل نفسين البانجو دول وأمخمخ إزاي هافتح معاه الموضوع .

يُتبع

[se_ Elsyed]

ويعود الأمير الننوس من رحلة الصيد ويستقبله والداه بالترحاب

أم الننوس : نسانيسو .. حبيبت أُمها ياخواتي بأحبها ..

ننوس : ماما ... ماما .. وحشتيني يا ماما ..

رينجو : هــا يا نونوس .. إن شالله تكون إتبطست في المنتجع؟

ننوس : والله يا بابا كانت رحلة هايلة .. وأخدت الشلة كمان وطلعنا اصطدنا سمك وحاجات حلوه ... بصوا أنا جايب لكم معايا إيه في القُفة دي ؟

أم الننوس : يا ما جاب الغراب لأمه .. ياختي إسم الله والحارس الله ... سمك بلطي .. تونه ... سردين .... وده إيه البُرص ده ؟.. جمبري ...

رينجو : هأ هأ هييييء .. آه يا عفريت . ده أنت أصطدت كمان طحينة ورز صيادية ...

أم الننوس : بس بقى يا رينجو ما تكسفش الواد ... مش بدل ما كان يدخل علينا بإيده فاضية .

ننوس : زي ما وعدتك يا والدي أنا فكرت في فكرة جهنمية نُرد فيها على الشعب ولاد المُفترية .

أم الننوس : قول يا عين أُمك .. إسمع يا رنجو .. الواد باين عليه عمل دماغ عاليه هناك .

رينجو : قل وأشجيني ... ميل وإسقيني ...إكبش وإديني ..

ننوس : إذا كان اللي ما يتسموا اللي هما الشعب يعني .. بيتهمونا كلنا بالديكتاتورية .. ليه ما نتبعش معاهم المثل السوفاج اللي بيقول " من دقنه وإفت له "

رينجو : أوضح يا فتي .. إنت عارف أبوك بيفهمها وهي طايرة ..

ننوس : يعني نقولهم إحنا هانعمل إفتكاسات .. بالقُرعة .. وإنت وحظك ... وبختك يابو بخيت ... وعلى عينك يا تاجر .. وقرب قرب خش إتفرج ... عندنا نزاهة ... ونظاكه .. وشفافية .... ومهلبية ... إحنا بنلعب على المكشوف ....

وفي نفس الوقت نكون إحنا مظبطين المسائل ومقلوظين المواضيع ومستفين الرجالة بتوعنا وكل واحد عارف هو هايعمل إيه .

رينجو : وطبعاً هاتقولي نختار العيال زمايلك بتوع شلة الإفتكاسات ؟

ننوس : العفو يابويا ... هو في إختيار بعد إختيارك ... أنا بس عايز كام كُرسي كده ليهم .. إن شالله تكون كراسي حمام حتى عشان التشكيلة تكمل يعني ...

رينجو : وأنا موافق ... لم الولا عسكراني ... والواد العفريت كرشه ... على مسرور السياف .... ومدير عموم العسس ... والولا أبو طبلة وزمارة بتاع الإعلان .... وروش المسائل وإعملوا الإفتكاسات تحت رعايتي ... وقولوا إنها نفحة مني ديمقراطيتي ... وشلحه من حريتي ... وسلخه من طيبتي .. وفرسخ من ...

أم الننوس : ما خلاص بقى يا رينجو إنت هاتعملهم علينا .. ماحنا دفنينه سوا يا عبعال ... يالله قوموا بسم الله ناكل السمك قبل ما يبرد ...

رينجو : على رأيك ... هو الواحد واخد منها إيه غير اللقمه الحلوه ... والهدمه النضيفة ... والعشوا الخفيفة ...

يُتبع