هل نحن فعلاً شعوبٌ جادة

[se_ Elsyed]

ما دفعني للتحدث عن هذا الموضوع هو 3 أشياء :

1- أثناء دعبستي في النت لفت نظري موقع لأخبار الفن وهو أشبة بالمنتدى وضمنه عشرات المنتديات لكل مطرب ولكل راقصة منتدى لمحبيهم ومشجعيهم ... وذُهلت فعلاً من عدد المشتركين في المنتدى واللي كثير منهم نُشطاء .. فتصوروا إن عدد أعضاء المنتدى 50 ألأف عضو من الوطن العربي كله !!!!!

2- الأخبار التي تُحاصرنا عن النسخة أو الجيل الثالث من برنامج " ستار أكاديمي " أو زي ما زميل لنا أطلق عليه " حمار أكاديمي " وهذا التحفز لمناصرة المشتركين من كل بلد وحالة الإستنفار في شركات الهواتف للإستعداد لتلقي ملايين المكالمات للتصويت للمرشحين ويكفي أن نعرف بإن النسخة الأولى من البرنامج قد تلقت حوالي 20 مليون مكالمة تليفونية من مختلف الدول العربية لمؤازرة المشتركين الأشاوس ناهيك عن الدخل والملايين التي تجنيها القنوات التليفزيونية المنظمة لتلك المسابقات الهلس والتي تؤجر خطوط الهاتف بمبالغ ثابتة في كل بلد وتجني هي الفرق في التكاليف ولو إفترضنا إن متوسط المكالمة 5 دولارات يبقى إحنا بنتكلم في حوالي 100 مليون دولار دخل ولو دفعت منها 10 مليون كحد أقصى لأستئجار الخطوط لأني أعرف كويس الخط بيتأجر بكام في السعودية مثلاً ( وهي خطوط الـ 700 0 أو في مصر 900 0 ) يبقى داخل في جيبهم 90 مليون دولار ده غير الحفلات الغنائية اللي بينظموها للمشتركين .. واليوم قرأت خبر يقول بإن شركة الموبيل الثانية في السعودية " موبايلي " قد منعت مشتركيها من الإتصال بتلك الأرقام بعد أن صدرت فتوى دينية بتحريم هذا السفه ومضيعة الأموال وقالت أنها تُفضل أن تُضحي بتلك الأرباح العائدة من هذا العبث على أن تتورط في تلك الأمور المشبوهة ..

3- هذا الجنون المحموم والتهافت على شراء شريط عمرو دياب الجديد وكأنه يوزع مجاناً أو هدية مع إن سعره ممكن يتعدي 20 ج - بصراحة مش متأكد ويمكن أكثر كمانفي مصر فأخويا بيقولي أول ما بينزل الشريط بيوصل 35 ج ... يعني ثمن 3 فرخات أوثمن كيلو لحمة وشوية خُضار مع طبقين رُز وممكن ناكل تاني يوم على حس شوية الشوربة اللي بيفضلوا في حلة اللحمة - وده بقى الخبر اللي بجد اصابني بالقرف بعد ما قرأت عدة رسائل لشباب من مختلف الوطن العربي بيحكوا فيها عن مغامراتهم والصعاب التي لاقوها عشان يحجزوا نسخ من الشريط لهم ولأصحابهم لدرجة في مدينة زي الإسكندرية نشبت خناقات ومعارك طاحنة أمام محال بيع الكاسيت عشان يفوزوا بشريط عموره .. وهذا شاب أخر من عمان - الأردن .. يحكي بكل أسى إنه لم يستطع إلا أن يحصل على نسخة واحده فقط - يا عين أمه - وعندما عاد لأصدقاؤه مُحمل بأكاليل الغار وماسكاً الشريط بيد واليد الأخرى تُشير بعلامة النصر .. أصر أصداقؤة على أن يصطحبهم مرة أخر للمحل ولكن للأسف الخونة عملاء الموساد والإمبريالين الأوغاد خلصوا على النسخ كلها وكسروا بخاطر هؤلاء الشباب اللي في عمر الزهور .. وأضطروا في الأخر يخمسوا في النسخة اللي مع صاحبهم الأولاني ... مساكين هؤلا الشباب .... وأنا هنا أتسأل لماذا لا يتم طرح مثل هذه القضايا الشائكة في إجتماعات الجامعة العربية أو البرلمان العربي الوليد .. ويمنحوا دعماً معقولاً لشرايط كاسيت عمرو دياب عشان الشباب قلبهم ما يتكسرش ويضيعوا مننا ؟

-----

وسبحان الله لو أستغلينا تلك الحماسة والتشجيع والإقدام في التفكير قضاينا الشاكة لكان حالنا تغير وأصبحنا نقود الأمم .. بدلاً من أن تقودنا هي ...

ولا نُطالب الشعوب كلها بألا تفعل شيء غير الصلاة والصوم والجدية طوال اليوم ... ولكن على الأقل دعونا في هذه المرحلة نُعطي للجد نصف ما نُعطية للهلس .... أو كما يقولون بالبلدي " يا أخي ساعة لقلبك وساعة لربك " وفي الأخر تلاقي الساعة بتاعت القلب دي إمتدت لـ 24 ساعة .. أما ساعة الله والعلم والعمل فيُمكن تأجيلها لحين ميسرة ولو صفصفت على دقيقة يبقى نعمة ورضا ..

وكما قلت من قبل في عديد من مداخلاتي بإننا نُقلد الغرب تقليداً نُحسد عليه في لهوهم وعبثهم في الويك إند .. أما الخمسة أيام اللي المفروض نتعلم ونعمل فيها .. فمعليش أُعذرني وأشوفك بعدين ...

وحينما ننظر لحال معظم شبابنا هذه الأيام .. بجد بيصعبوا علينا من كمية الإحباط اللي عندهم من كل شيء .. وبالتالي فمنهم من يقررر إنه يعيش بدماغ فاضية ومطرح ما ترسي دق لها ويجري وراء كل ما يلهي لعله ينسى التفكير في المستقبل المُظلم الذي رسمته لنا حوكامتنا الظالمة الديكتاتورية ..

[shawshank]

وكما قلت من قبل في عديد من مداخلاتي بإننا نُقلد الغرب تقليداً نُحسد عليه في لهوهم وعبثهم في الويك إند .. أما الخمسة أيام اللي المفروض نتعلم ونعمل فيها .. فمعليش أُعذرني وأشوفك بعدين ...

<{POST_SNAPBACK}>

مظبوط ...

لكن حتى الغرب لو كان لديهم الاختيار لاختاروا اللهو و اللعب 24 ساعة ... لكن الفرق أن لديهم نظام إدارة على مستوى الدولة كفيل باجباره على الالتزام بالعمل الجاد .

هل النظام وحده السبب أم أن سلوك الأفراد له دور ؟

سلوك الأفراد بني عبر عشرات (و ربما مئات) السنين ، فليس وليد اليوم أو البارحة . فمجتمع الغرب بني على المادة و الأخذ التام بالأسباب و الإيمان التام بها . ما نود أن نكون عليه أن نعمل بنفس الجد مع الإيمان بالله و ليس بالأسباب .

كيف يتم التغيير ؟ هل من القمة (الإدارة و القيادة) أم من القاع (الأفراد و المجتمع) ؟ سؤال مفتوح ...

[أسد]

هل نحن فعلاً شعوبٌ جادة

باختصار ....

وبصراحة ..

وبشكل مباشر ..

لأ .. لسنا شعوب جادة ..

نحن شعوب يجري الهزل في عروقنا .. والسلبية سر حياتنا ... والإستسهال هو ينبوع الماء المتدفق لأنهارنا ..

نحن شعوب كسالى .. لانريد أن نعمل .. لا نجد ولا نكد إلا عندما نتعرض لأقسى الظروف ...

فرق كرة القدم لدينا .. يشاركون في البطولات من أجل التمثيل المشرف .. ولا ينافسون ..

نتباهي بالعباقرة الذين ترونا وتركوا مجتمعاتنا وهجرونا .. ونتفرج عليهم ونصفق لهم .. فهذا العمل أسهل بكثير من أن نعمل ..

ثروات المطربين والراقصات لدينا .. حدث ولا حرج ...

رواتب أساتذة الجامعة ... حدث بمنتهى الحرج ...

كثير وكثير وكثير ...

ولكن ...

ما الحل ...؟؟؟

[se_ Elsyed]

هل نحن فعلاً شعوبٌ جادة

نحن شعوب كسالى .. لانريد أن نعمل .. لا نجد ولا نكد إلا عندما نتعرض لأقسى الظروف ...

<{POST_SNAPBACK}>

دي نقطة مُلاحظة وخطيرة جداً يا اسد وبالذات في مصر ..

ولازم اللي نزل مصر في الإجازة الصيفية يلاحظها ..

فالمقاهي مُكتظة بالرواد حتى الساعات الأولى من الصباح .. والشوارع مزدحمة بالمارة

.. يصبح الصبح .. تلاقي لحد الظهر لسه مافيش نشاط ملحوظ وكإن ده يوم إجازة .. لإن الناس لسه نايمين من السهر بتاع إمبارح ..

وبقى شيء عادي جداً إن واحد من قرايبك يقولك أنا جايلك أزورج الساعة واحدة بعد منتصف الليل ... أو يتتريق عليك لو إتصل بك الساعة 3 الفجر ولقاك نايم ويقولك إنت بتنام بدري زي الفراخ ... يعني المطلوب مني أبقى دكر بط وأسهر للساعة خمسة الصبح عشان أعجب :)

وما حدش يقولي أصل دي أجازة لاصيف بقى والناس مريحه .. فمش معقول كل مصر بقت طلبة أو مغتربين نزلين يقضوا إجازتهم ..

حتى الشباب الصغير إلا من رحم ربي .. بقى قدوته ومثله الأعلى الفنانين ولعيبة الكورة ... وكرس حياته للبحث عن الروشنة والمصطلحات اللغوية الغريبة اللي بتشهد تطور وأبتكارات كل يوم وكإنهم كلهم بقوا أعضاء في المجمع اللغوي الحلمنتيشي ...

وأنا بأتفق معكم إن ده ما حصلش بين يوم وليلة .. ولكنه نتيجة لغرس خبيث تم زراعته والإعتناء به حتى أتى بتلك الثمار المُره التي نقطف ونأكل منها الآن ونحن نعلم بإن فيها هلاكنا ولكننا لا نُبالي .

[أسد]

ولبرهنة وتأكيد كلامنا .. هذا خبر منشور بصحف الجمهورية والمساء اليوم في مصر المحروسة ..

ريكو أفضل مطرب شعبي:

جائزة "حريتي".. وسام علي صدري

حصل المطرب ريكو علي لقب أفضل مطرب شعبي لعام 2005 في الاستفتاء الكبير الذي أجرته مجلة "حريتي" مؤخرا..يتم تكريم النجم الشعبي الواعد في حفل عيد ميلاد حريتي الخامس عشر مع الفائزين في الاستفتاء بجميع المجالات. ويشارك في إحياء الحفل الكبير ويقدم الفقرات عدد من مشاهير الفن والرياضة والإعلام..ريكو يحظي بجماهيرية كبيرة حيث تلقي أغانيه إقبالا من المواطنين وخاصة بعد أغنيته الشهيرة "شبرا" ثم أغنية "خللي الشعب يعيش" في فيلم "صايع بحر". كما تتمتع أغنيته الأخيرة "أنابيب" في فيلم "حاحة وتفاحة" التي تعرضها بعض الفضائيات العربية بإعجاب الناس.

ريكو وجه الشكر لمجلة "حريتي" علي اهتمامها بالفن والطرب خاصة للمطربين الجدد وقال: إن مساندة المجلة للشباب أفضل وسيلة لتشجيعهم علي الإبداع وتقديم الفن الراقي.

أشار إلي أن التكريم هو الأول الذي يلقاه في حياته من مؤسسة صحفية قومية كبري بحجم دار التحرير ومن مجلة تتسم بالتنوع والجاذبية والانتشار مثل مجلة "حريتي".. وأكد أن التكريم وسام علي صدره.

يقام حفل "حريتي" في فندق جي دبليو ماريوت.

عارفين ريكو ... ؟؟؟؟؟

آه .. والله العظيم .. ريكو ...

وإذا أخذنا هذا حجة للإجابة على سؤالك ياسي السيد ... سنقول .. لا .. إحنا شعوب هلاسة ..

الفيلم إسمه .. حاحة وتفاحة ...

والراجل ده كان طالع في فيلم إسمه صايع بحر ..

بالذمة ده إسمه كلام ..

حتيجي منين الجدية بس ..

[KANE]

المشكله الكبرى ياسي السيد

هو اعلامنا القذر الذي جعل من هؤلاء المسوخ ابطالاً ونجوما

كلما أتذكر برامج التليفزيون في رمضان وحشد الكم المهول من "صراصير" المجتمع لكي يذكروا رأيهم في كل كبيره وصغيره في الحياه

ولم يعرض لأي شخصيه اديبه أو علميه أو ثقافيه

لقد تربى هذا الجيل من أمثال عطية على ان هؤلاء هم صفوة المجتمع واصبح الحلم بدلاً من أكون دكتور ومهندس وظابط "كما كان حلم جيلي" اصبح الحلم هو أن أكون مطرب، ممثل ، لاعب

وهذا هو الحصاد المر

لماذ مثلاً يُحارب شخص مثل عمرو خالد ؟

لأنه كسر حاجز ان يكون رجل الدين هو شخصيه مكعبله شيخ بعمه وكبير في السن وله دقن كبيره ويتكلم بالفصحى المكعبله

والهدف كان لابد من وجود حاجزاً بينهم وبين الدين

وعلى هذا قس الحواجز الأخرى للعلماء والمثقفين وأصحاب الفكر

[سيزيف]

اعتقد ان المشكله المصريه ليست مشكله جديه قدر ما هى مشكله اخلاق

و من العجيب انك لو قلت هذا لاى شخص سيتبادر الى ذهنه للوهله الاولى الاخلاق بمفهومها الجنسى و للاسف هذا كل ما يعنينا فى الاخلاق

اما عن باقى الاخلاق فحدث ولا حرج

تفشت الاخلاق الرديئه فى المجتمع

فلم يصبح الكذب عيبا او نقيصه اجتماعيه و انما اصبح من المقبول لدى الافراد ان يكذبوا دون لوم من المجتمع

الرشوه اصبحت لها مسميات كثيره و لم نعد نستنكرها و الحديث عن هذا لا طائل منه فكلنا نعلمه

عدم الامانه فى اداء العمل اصبح سلوكا عاما لا يقتصر على فئه بعينها ابتداءا من الطبيب الذى لا يهتم بمرضاه قدر اهتمامه بارضاء شركات الادويه و مرورا بالموظف صاحب عباره " فوت علينا بكره " و انتهاءا بالسباك و النقاش الذين لا تستطيع ان تاتمنهم على العمل الا لو كنت واقف " فوق دماغهم "

و للحديث بقيه

[ابو فسيلة]

إخوتي الاعزاء،

ماذا تتوقع بعد استمرار نظام العسكر في مصر ما يزيد عن 50 عاما.

عند تفضيل أهل الثقة على أهل الخبرة والعلم لمدة تقترب من جيلين، تنعدم الكفاءات أو تضمر.

عند اختفاء النخب الحقيقية تضيع البوصلة لدي الأجيال الجديدة والأمل من الأجيال القديمة.

عندما نهزم في جميع الميادين عدا التاريخ والجغرافيا، مع وجود من يعتقد بهزيمتنا في التاريخ أيضا.

عند تفشي التواكل والإسراف في الغيبيات.

عند غياب قيمة الحوار.

هذا بعض مما دار في خاطري.

مع ذلك لا أظن إننا شعوب غير جادة، ولكننا شعوب متخلفة في جوانب كثيرة.

ودمتم.

[khedr]

الاخوه جميعا الموضوع خطير وكلنا نعاني منه

لكن تعالوا نبحث عن

الحـــــــــــــــــــــــــــــــــــــــــــــــــــــــــــــــــــــــل

ونحاول ان نناقشها ونبتدي مع بعضنا علي ان ننشرها

[مصرى]

أجد فى كل مداخلة مما سبق كشف لجانب جديد من هذه الظاهرة التى أثارها صديقنا

وأضيف

أنها تكشف عن احتكار السفهاء للثروة والاعلام والسلطة فى العالم العربى

بينما غالبية الشعب والشباب مطحونين فقدوا القدرة على توصيل صوتهم أو المشاركة فى النت أو فرض أولوياتهم ومطالبهم

[الشبح الغاضب]

السلام عليكم جميعا ...

انا اعتقد ان المشكلة في الآفراد و المجتمع ...و بصراحة هما دول اساس كل مشكلة ...و هي الشعب المصري او المجتمع المصري ....و صدقني الموضوع مش نظام حكم او اي شيء من هذا الكلام الفارغ ! الموضوع هي نابعه من الشعب .... الآيمان بالله و العقيدة اصبح صفر .... لآن يا باش مهندس الناس المفروض تراعي الله في العمل و المعامله من غير اذن الحاكم او صاحب السلطة !! و الناس مش مستنيه الديمقرطيه عشان تعرف الله حق المعرفة و تراعيه حدود الله ....بالعكس انا اعتقد ان الشعب المصري حيفجر لو اعطيت له الديمقرطيه حاليا لآنه غير مؤهل حاليا..... عامل زي اللي حيبني عشرين دور علي عماره دورين و كمان مغشوشة مونة و اساستها متستحملش دور واحد !!

شيء بشع !!!!!!

اجمل ارض علي كوكب الآرض شوية ناس خلتها ملوثة و غير نظيفة و قذرة !!

تلويث جوي بحري ارضي ....!! القذارة في كل مكان ...نهايك عن اسلوب معاملة البشر الفريد من نوعه في العالم كله !!! و الذي الشر منه موجه الي ابن البلد قبل اي شيء !! والله لولا استحالت الفكرة لقلت ان في حد زء علي مصر 60 مليون عميل لتدمير هذه البلد !!!

تدمير مورد الرزق لهذه البلد و تظهر للعين المجردة علي الطرق المحورية التي تخترق الآرضي الزراعيه مثل عندما تذهب الي 6 اكتوبر من ميدان لبنان !! و تري كيف فعل الهمج و البربر والقدم الهمجية في اجود اراضي و اخصبها علي الآطلاق !!! غابات من الطوب الاحمر و الآسمنت كئيبة و سخيفة و تجعلك تشعر بالغيثان و تتحسر علي الخير الذي راح !!! و اللي انت حتشوفه ده نقطة في بحر من ملايين الآفدنة التي ذهبت هباء من غير راجعه ...لماذا !!! ده اسرائيل عمرها ماكانت تقدر تخسر مصر خسائر المنظر ده لو اتشلت و اتحطت مكانها !!

موقف يذكرني و كأننا انضربنا بالنووي !! اكل مسرطن ! مياه ملوثة !!!ملايين الآرضي الزراعيه دمرت !!تشوهات خلقيه في الموليد تشبه الذي حدث في هيروشيما !!حاله من الفوضة العرمة تعم شوارع العاصمة !!!

والله لو حتي في حرب المفروض الحال ميكونش للدرجة ديه !!

انا عارف ان فيه ناس حدافع عن ابناء مصر و تقول زي مافي وحش في كويس !! و العملية مش للدرجة ديه !!

صدقني لولا الفئة الكويسه الموجدة ديه و اللي هي مش اكتر من 5% من اجمالي السكان لكان الله اطبق علي مصر ديه في ثواني و جعلها عبرة لآمم القادمة و منها الآجيال المصرية القادمة و اللي انا ممكن اكون مستبشر خير بيها !! لكن مش الجيل ده ولا اللي بعديه انا بتكلم في 100 او 200 سنة بعد عمليه غسيل المعده اللي مفروض تتعمل !!يعني مش في حياتك ولا حياتي ! :)

[الأفوكاتو]

عزيزى الشبح الغاضب,

لقد ذكرت سيادتكم الآتى:

الموضوع مش نظام حكم او اي شيء من هذا الكلام الفارغ

أى أن سيادتكم قد قررتم أن كل من كتب فى هذا الموضوع يقول " كلام فارغ"

و لن أدافع عن الشعب المصرى, و لكنى أود أن أذكرك أن مصر " كانت أم الدنيا" , ثم أصبحت, كما وصفتها :

اجمل ارض علي كوكب الآرض شوية ناس خلتها ملوثة و غير نظيفة و قذرة !!

تلويث جوي بحري ارضي ....!! القذارة في كل مكان ...نهايك عن اسلوب معاملة البشر الفريد من نوعه في العالم كله !!! و الذي الشر منه موجه الي ابن البلد قبل اي شيء !! والله لولا استحالت الفكرة لقلت ان في حد زء علي مصر 60 مليون عميل لتدمير هذه البلد !!!

تدمير مورد الرزق لهذه البلد و تظهر للعين المجردة علي الطرق المحورية التي تخترق الآرضي الزراعيه مثل عندما تذهب الي 6 اكتوبر من ميدان لبنان !! و تري كيف فعل الهمج و البربر والقدم الهمجية في اجود اراضي و اخصبها علي الآطلاق !!! غابات من الطوب الاحمر و الآسمنت كئيبة و سخيفة و تجعلك تشعر بالغيثان و تتحسر علي الخير الذي راح !!! و اللي انت حتشوفه ده نقطة في بحر من ملايين الآفدنة التي ذهبت هباء من غير راجعه ...لماذا !!! ده اسرائيل عمرها ماكانت تقدر تخسر مصر خسائر المنظر ده لو اتشلت و اتحطت مكانها !!

و لأن مصر لم تستورد ناس من الخارج خلال الخمسين سنة الماضية لكى يفسدوها, أليس من المنطقى أن نعزوا هذا الفساد و التدنى للنظام الفاشى الحاكم؟

تقبل تحياتى .

تم تعديل 28 ديسمبر 2005 بواسطة الأفوكاتو

[مصرى]

انا اعتقد ان الشعب المصري حيفجر لو اعطيت له الديمقرطيه حاليا لآنه غير مؤهل حاليا

الحكومة بتقول كده برضه :) لكن المريب أن الحال دائما فى النازل .. يعنى ضرورى تبدو كأننا شعب من البرابرة غير قابل للتعلم علشان الحاكم يعيش .. استبدادى كما هو .. حتى الانتخابات الأخيرة .. شجعوا البلطجة حتى يعطوا هذه الرسالة "شعب غير مؤهل" :)

موقف يذكرني و كأننا انضربنا بالنووي !! اكل مسرطن ! مياه ملوثة !!!ملايين الآرضي الزراعيه دمرت !!تشوهات خلقيه في الموليد تشبه الذي حدث في هيروشيما !!حاله من الفوضة العرمة تعم شوارع العاصمة !!!

تعبير جيد .. هذا هو الواقع فعلا نتيجة فشل نظام ادارة المجتمع

تصور أفضل فرقة موسيقية فى العالم .. اعتلى أعضاءها المسرح وكل منهم يحمل آلته الموسيقية ثم أخذ فى العزف من النوتة التى وضعها أفضل الموسيقيين فى حين كان المايسترو يرتدى أجمل حلة ويقف أمامهم مشغولا بحساب الايرادات ومراقبة أداء النشالين الذى أطلقهم على الجمهور فى القاعة .. أعتقد أن النتيجة حالة فوضى عارمة لن تختلف عما ذكرت

[shawshank]

فيه عنصر كمان ... تخدير الشعب

المعادلة الصعبة أمام نظام دكتاتوري إن كان في نفس الوقت يريد انتاجا :

كيف أقوم بتخدير الشعب و في نفس الوقت أحثه على العمل .

معادلة صعبة بفرض أن النظام الحاكم يهتم بوجود شعب منتج عامل ، و هو ما أشك فيه ، لكن بفرض ذلك.

أريد أن أقول أن تخدير الشعب ، في صورة ما سبق ذكره من فساد إعلامي و غيره ، تسبب في ثقافة الاهمال و الكسل و سلوك الأفراد الحالي .

[se_ Elsyed]

.... لآن يا باش مهندس الناس المفروض تراعي الله في العمل و المعامله من غير اذن الحاكم او صاحب السلطة !! و الناس مش مستنيه الديمقرطيه عشان تعرف الله حق المعرفة و تراعيه حدود الله

<{POST_SNAPBACK}>

وهل تعتقد إن أي موظف لسه متخرج جديد وبيبقى مُفعم بالحيوية وكل إقبال على الحياة ما بيعملش كده ؟

إنما طبعاً تلك الحيوية والنشاط بتخبو بعد فترة بسيطة جداً بعد ما يلاقي الظروف كلها بتبقى ضده ..

هاوضج لسيادتك بمثال عملي ...

في الأجازة الماضية إتعاملت مع أحد مكاتب الشهر العقاري أكثرة من مرة .. لعمل توكيلات وما إلى ذلك ... طبعاً دي هيئة ما شاء الله دخلهم المادي اليومي مش بطال .. وللأسف أيضاً إنه كان مكتب لسة متأسس جديد ... تصور ؟ يعني المفروض كل حاجة لسه بشوكها

- شوف بقى مدى القذارة والأجواء المُحبطة بكل المقاييس الموجودة ... فهل ده جو عمل ؟ فهل مطلوب من الموظف إنه يمسك مقشة وجردل وينضف صالات إنتظار الجمهور والمكاتب إذا ما كانتش الحكومة موفره لهم عامل لذلك ؟ .

ولما نكون في عز الصيف والرطوبة وتلاقي ما فيش حتى مروحه تجيب نسمة هوا للموظفين ---- بلاش للجمهور ... يبقى ده جو جدية وعمل ؟

ولما يكون مكتب طويل عريض ومليان موظفين في الغرف المختلفة وما يكونش فيه مطبخ صغير حتى ... يبقى ده جو عمل ؟

والله العظيم يا أخي الكريم .. دخلت على مدير المكتب وهو معرفه .. لقيته حاطط سبرتايه ( موقد نار صغير لعمل الشاي والقهوة لزوم المزاج ) جنب الملفات اللي فيها توقيعات المتعاملين ومشغله على براد بشوية شاي يستهلوا بؤك ... فبالله عليك ده جو عمل ؟

المهم سألته هو مين المسئول عن عمل التوكيل بتاعي .. فقال لي مدام فاطمة .. فقولت له طب هي فين ؟ قالي طلعت البلكون عشان تفطر ... عشان تفطر دي فيها أكثر من نص ساعة .. وأنا ورايا 100 موعد و100 حاجة لازم أعملها .. فقولت له ما تخلص إنت الموضوع يا أستاذ سيد هو حضرتك مش المدير ؟.. فقالي ممنوع منعاً باتاً لازم الموظف يعمل التوكيل وأنا أوقع بعده - دبل تشيك يعني - عشان حالات التزوير والبلاوي اللي بتحصل في موضوعات التوكيلات .

كل ده وأنا قاعد وشامم ريحة الفول والطعمية والبصل اللي معبأها المكان ولا أجدعها - أير ريفريشر -

فين وفين مدام فاطمة خرجت من الحمام .. قصدي من البلكونة .. وعرفت كده لما سمعت صوت طرقعة شبشب جاي من بعيد .. تصوروا لابسه شبشب حمام في مكان العمل .. ولحسن الحظ كان معايا أخويا وصديق أخر .. فبشرعة طرقت لنا فكرة تكوين كورال للأطفال بقيادة المايسترو سليم سحاب ... وقولنا نعملها مفاجأة ونغني لها " يا خارجة من باب الحمام وكل خد عليه خوخه ... وهما كانوا بيردوا ورانا .. خوخه خوخه خوخه خوخه "

وأثناء بقى إنتظارنا كان في مندوب من الوزارة للتفتيش على غرفة الميكروفيلم ... اللي هي أخطر مكان في الإدارة كلها .. تصور المفتش ده كان بيعيط بالدموع .. لإن موظف الميكروفيلم كان غايب وهو الوحيد اللي معاه مفتاح الأوضه .. فأقترح المدير إنه يوفر على الراجل المشوار ويكسروا الباب ويقوم هو بشغله ...

فعايز أقولك .. إزاي بنطالب الناس بالجدية وأولي الأمر سايبنها تضرب تقلب ...إزاي أطالبهم بالجدية وأنا مش موفر لهم أدنى درجات الحياة الكريمة ... إزاي أطالبهم بالجدية في العمل وكل واحد عنده 50 جبهة بيحارب فيها غير العمل من أول زحمة المواصلات الصبح لحد الدروس الخصوصية بتاعت عياله ... إزاي أطالب مدرس ومُعلم أجيال بالجدية وهو يدرس لفصل فيه 80 طالب ويتقاضى ملاليم لا تكفيه العيش الحاف ... وإزاي أطالب واحد بيدافع عن وطنه بالجدية .. وأخر من ملائكة الرحمة ويعمل في أسمى مهنة خلقها الله وهي الطب وبعد ما أتمرمط في التعليم وسهر الليالي وجد وأجتهد يُفاجأ إن راتبه ما يجيش 1 على ألف من النقطة اللي بتحصل عليها الراقصة في أحد ليالي هز الوسط .. أو بلاش كده ، ده الـ 150 ج اللي بيقبضهم كأول تعيين يساووا ثمن 5 شرايط لعمرو دياب .. تصور ؟

لو بنطالب الناس بالجدية والإخلاص في العمل في ظل هذا الجو العفن اللي لا تتوانى حكومة العسكر عن تهيئته لنا .. يبقى كأننا بنقولهم " حاربوا طواحين الهواء "

-------------------

وميدو بيسأل عن الحـــــــــــــــــــــــــــل

وأجابه أستاذنا "مصري " اللي بيغيب يغيب ويجيب التايهة فقال

تصور أفضل فرقة موسيقية فى العالم .. اعتلى أعضاءها المسرح وكل منهم يحمل آلته الموسيقية ثم أخذ فى العزف من النوتة التى وضعها أفضل الموسيقيين فى حين كان المايسترو يرتدى أجمل حلة ويقف أمامهم مشغولا بحساب الايرادات ومراقبة أداء النشالين الذى أطلقهم على الجمهور فى القاعة .. أعتقد أن النتيجة حالة فوضى عارمة لن تختلف عما ذكرت

يعني تصوروا عامل في مصنع ويمتلك من المهارة الكثير ولديه العديد من الزملاء من نفس عينته ... ويتفانون في عملهم .. ولكن الإدارة عبارة عن شوية حرامية وبيغشوا في المواصفات وبيحاولوا يطلعوا الشركة خسرانه عشان يخصخصوها ويبيعوها وياخدوا عمولتهم ... يبقى هل الجدية لازم تبدأ من قمة الهرم أم من قاعدتة ؟

طب مثال تاني :

هو ليه لو بصينا في وقت الحروب عندنا بنلاقي الناس كلها جد وإن معدلات الجرائم المعتادة تكاد تنعدم والكل بيبقى عنده هدف واحد فقط يسعى لتحقيقه ؟

بمنتهى البساطة .. عشان المايسترو خلق لهم هدفاً وبالتالي الكل يعمل في نفس المنظومة ويستنفر طاقات الجدية الداخلية لديه وهو يعلم إنه لو نشز هايبقى مكشوف وسط الجميع ..

أما لو كل السيمفونية نشاز فحتى لو نهق ماحدش هاياخد باله .. لإن الكل بيعجن ..

[khedr]

[quote name=se_ Elsyed' date='Dec 28 2005, 09:26 A

بمنتهى البساطة .. عشان المايسترو خلق لهم هدفاً وبالتالي الكل يعمل في نفس المنظومة ويستنفر طاقات الجدية الداخلية لديه وهو يعلم إنه لو نشز هايبقى مكشوف وسط الجميع ..

أما لو كل السيمفونية نشاز فحتى لو نهق ماحدش هاياخد باله .. لإن الكل بيعجن ..

الاخ العزيز...لمست جوهر الموضوع ....المايسترو

ببساطه وبسرعه....بلدتنا او مدينتنا او المنطقه اللي احنا فيها

ربنا كرمنا بمسؤل ونعم البني ادمييين وخلال فتره عام واحد يعني سنه واحده تغيرت البلد

نظافه...مشاريع ...نظام ...والاحلي والافيد مشاركه الناس وتفاهمهم مع الراجل ده.....

عموما سنه لا تتخيلوا ما حدث فيها...فعلا كان حلم...

.لكن انتم عارفين الاداره في مصر والقائمين عليها

من كل ما سبق عايز اوصل فعلا ...المايسترو... القدوه...المسؤل...له دور كبير جدا جدا في الاصلاح وتغيير الحال...

مثلا ...مهاتير محمد ...مش كان في نفس السنه بتاعه (....) وفين ماليزيا الان واحنا فين

خلينا هنا في مصر ..

.محمد عبد السلام المحجوب في الاسكندريه....

عادل لبيب في قنا ..واللي احنا سمعينه عنها واللي شفناه فيها

اعتقد ان المسؤل له دور كبير وسريع في التغيير وليس كما نتصور الموضوع ياخد وقت طويل ....

لان فعلا اللي حصل عندنا في سنه شئ لا يصدقه عقل

لدرجه مره كان الراجل ده مسافر اجازه قصيره..والناس بدون اي ترتيب ولا اي

شئ كلنا عارفينه طلعوا انتظروه واستقبلوه استقبال لا يوصف

الاخوه الاعزاء ........ القدوه مطلوبه وفعلا تغير الكثير...

ومصر بلدنا بخيـــــــــــــــــــــــــــــــــــــــــــــــــــــــــــــــــــــــــر

[الشبح الغاضب]

شكرا للآخ الفاضل سي السيد علي توضيح هذه النقطة و هو فعلا عنده حق فيها !!

اجواء العمل في مصر كفيله بقتل اي موهبه او تفاني في العمل و هذا فعلا صحيح

الاخ الذي يقول مصر بخير !! مع احترامي لك .....انت قصدك مصر اللي احنا فيها دي فعلا ولا ديه نكته !!!!

مصر ليس بخير ....اطلاقا! كيف !! حنضحك علي نفسنا ....طيب علي العالم الخارجي اوكي بس علي نفسنا لآ طبعا !! مصر مصابة و مريضة و يجب العلاج فورا !

او ....الآحتضار و الموت !

يا جماعة اول طريقة صحيحه للعلاج المبكر تشخيص المرض صح و و مبكرا !

لكن حنمشيها صباح الفل و أديها ده الناس لبعضيها و كبر كبر يا عم الحج فابشر مصر بمستقبل اسود و منيل و مريع !

ده الامبراطوريه اليابانيه العظيمة بعد الهزيمة في الحرب العالميه قاله علي نفسهم احنا متخلفين و جهله و عايزين الحرق كمان و نستهله !!! احنا هزمنا من المعامل و لازم نبتدي من المعامل و اصبحت اليابان كما نراها الآن !! مفيش أغاني وطنيه كاذبه و مخدرة مفيش نرجسيه فاضيه !!!

مفيش مصمصة شفاه فارغة علي ماضي و حضارة لم نستطيع حتي الحفاظ عليها او حتي علي النيل الذي كانوا يقدسوه !

انا اري ان مصر امتلكت فرصه ذهبيه للتألق و الصعود علي قمة المنطقة الشرق الاوسطيه و الآفريقيه و علي الخريطه العالميه ..و لكن بغباء ولادها اضاعت الكثير من الفرص و الله أعلم في ايه في الآيام الجايه ...!!!!؟

شكرا لكم اخواتي الاعزاء

[khedr]

الاخ الذي يقول مصر بخير !! مع احترامي لك .....انت قصدك مص اللي احنا فيها ديهر فعلا ولا ديه نكته !!!!

<{POST_SNAPBACK}>

الاخ الكريم الشبح الغاضب...

يااخي الموضوع محتاج فعلا مجهود ..

.لكن قبل كل شئ...لازم يكون هناك الامل والثقه في امكانيتنا.....

اننا فعلا عندنا الاساس ولكن من يحرك ذلك الشعب والناس

وضربت لك امثله وهي من مصر في الداخل علي الارض

لم نتكلم عن زويل او مجدي يعقوب...لان هنا المقارنه مختلفه ولكنهم مصريين ووجدوا المناخ المناسب

الاخ العزيز...

الامل ...

الثقه في النفس..

العمـــــــــــــــــــــــــــــــــــل

الروح الجماعيه....

نفتش عن الجانب المضئ في المشاكل ونأخذ البدايه من ذلك الجانب

اخي انا واجهتني صعوبات كبيره خلال العمل ويمكن سيادتك لو لك تجارب مع الاداريات والمسؤلين اللي هم في المواقع الهامه اليومين دول هتعرف الوضع ماشي باي طريقه ....

.لكن كل ذلك لن ...ولا يفقدنا الثقه في قدراتنا وفي امكانياتنا ...

ولقد ضربت لسيلدتك الامثله والتي حتي الان مستمره هنا علي ارض مصر.....

اخي العزيز ...هذا الوطن وطني ووطنك..ووطن ابائنا ...ووطن ابنائنا...حقه علينا كبير

الاخ العزيز ...دائما ننظر الي النصف الملئ من الكوب لا ننظر الي الفارغ

مصربخير...بنا نحن ...بك ..وبي..وبكل الشرفاء الباقيين ...بلدنا بخير ولا نريد ان نفشل او نيأس....مصر بخير....طالما الشرفاء لايركعون ولا ييئسون...مصر بخير..طالما اولادها لن ولا يستسلموا لاي فرد في الداخل قبل الخارج....

الاخ العزيز...

اطلت ....لكنها بلدي ووطني ...وعرضي وشرفي ....وستبقي ما بقيت......

ومعا جميعا سنصل ... مهما طال الليل ...او ضاق علينا القيد

فلابد لليل ان ينجلي وللقيد ان ينكسر

[ATHENA]

هل نحن فعلاً شعوبٌ جادة

[se_ Elsyed]

إوعى من قدام الجدية

حفلات رأس السنة "نار" .. والسبب "روبي" و"هيفاء" .. والأسعار!

الخميس، 29 ديسمبر 2005 - 14:24

بقلم: نور الهدى رضوان

أين ستحتفل بليلة رأس السنة هذا العام؟ .. هل ستغامر وتنفق ما يزيد على الألف جنيه لكي تشاهد جسد روبي أو شعر عمرو دياب .. والذي منه؟ أم ستفضل الاحتفال أمام دقات الساعة التقليدية على شاشات التليفزيون المصري؟ .. أم ستفضل اللجوء إلى "جزيرة القطن" - السرير - للاستمتاع بالدفء في ظل هذا الطقس شديد البرودة؟!

ربما يكون الحلان الثاني والثالث هما الأقرب بالنسبة لقطاع كبير من المصريين ، والأرجح لأسباب مادية ، فليس من السهل أن تجد في زمننا هذا شخصا على استعداد لتحمل قيمة تذكرة رأس السنة في الهيلتون أو الشيراتون أو الفور سيزونز ، أو حتى في أي قهوة بلدي!

فإذا طالعنا قائمة أسعار الحفلات وأسعار النجوم لعلمنا بالفعل أهمية "جزيرة القطن" بالنسبة للمصريين ، شريطة ألا تكون هي الأخرى بتذاكر في العام القادم!

وقد أدى ارتفاع أسعار حفلات رأس السنة هذا العام بشكل ملحوظ إلى عزوف العديد من الشركات الكبرى عن تنظيم الحفلات الصاخبة أصلا.

فقد وصل سعر حفل كل من عمرو دياب والراقصة دينا والفنانة اللبنانية نيكول سابا في أحد فنادق الـ6 نجوم بالقاهرة إلى 1600 جنيه للتذكرة ، بينما تراوح سعر "الترابيزة" في حفل يجمع بين هيفاء وهبي وشيرين وتامر حسني وخالد سليم في فندق آخر إلى 1200 جنيه ، في الوقت الذي يحيي فيه الفنان هشام عباس مع روبي حفلا ثانيا في فندق كبير آخر في وسط البلد بـ350 جنيه للتذكرة! .. يا بلاش!

وكما اعتاد النجم الكبير محمد منير أن يحيي حفل رأس السنة بدار الأوبرا المصرية ، وهو الحفل الذي يقبل عليه عشرات الآلاف من الشباب سنويا منذ خمسة أعوام ، احتراما منهم لفن منير المميز ، فإن السبب الرئيسي وراء اهتمامهم بالحضور هو أن سعر الحفل يبلغ 35 جنيها فقط!

كما وصلت أسعار حفلات رأس السنة والتي تعرض فقط الـ"دي.جي" ، والـ"شو" الروسي في بعض الأماكن إلى 245 جنيه ، مع الوضع في الاعتبار أن هناك إقبالا كبيرا من المصريين والعرب على الشو الروسي نظرا لسخونته الشديدة!

ومن جانبه يؤكد أحمد شريف أحد المسئولين عن تنظيم حفل عمرو دياب أنه على الرغم من ارتفاع الأسعار هذا العام ، فإن الحقيقة المؤكدة هي أن أغلب تذاكر الحفل تم بيعها بالفعل ، مشيرا إلى أن هناك نسبة عالية من العرب والأجانب تحرص على الحضور لأهمية الاحتفال بهذا اليوم بالنسبة لهم ، وقال إن هناك في هذا الحفل : 60 إسبانياً و35 أمريكياً و200 لبنانياً.

وقال أيضا إن حفل هذا العام شهد عددا أكبر من الأجانب عن الأعوام الماضية ، وأشار أيضا إلى أن حفل عمرو دياب دائما ما يكون هو الأغلى بين أسعار باقي حفلات رأس السنة في مصر.

يــــاه .. تصوروا الـ 1600 ج دول يشتروا كام بطانية أو جاكت أو شراب حتى للفقراء اللي بيتجمدوا من البرد في مصر ؟

ويا ترى الناس دي حد أفتى لها فتوى بتقول إن ربنا - أستغفر الله العظيم - بيكون غايب في هذا اليوم .. وبالتالي من حقهم يسكروا ويعربدوا ويبعتروا في فلوسهم .. اللي هي مش ملكهم أساساً .. فالمال مال الله يعطيه من يشاء ويمنعه عمن يشاء ؟

واحد صاحبي لسه راجع من زيارة سريعة لمصر أستغرقت 3 أيام .. فبيقولي وهو هناك إتصل به زميل عمل لبناني .. هنا في الرياض .. وقاله .. أمانة عليك يا شيخ تشتري لي كيلو " بطارخ " من عندك .. لإن راس السنة ما تحلاش إلا بالبطارخ - أنا أساساً مش عارف يعني إيه بطارخ .. أو ممكن أكون شفتها في السمكة من جوه بس بأرميها على اساس إنها كماليات - المهم بيقولي أخدت بعضي ونزلت وسط البلد على محل وصفوه لي وقولت له كيلو البطارخ بكام ؟

الراجل قال له 650 ج :huh: :) :D

أحب شادر السمك .. يعني ثمن حوالي 25 كيلو لحمة ... أو ثمن خروف أوزي وسط كده ..

فقال وماله .. عدس بترابه وكله بحسابه .. وطالما الزيون هايدفع

فقال له إقطع لي كيلو لو سمحت ..

فقاله إيه يا سيد هي سايبه .. حضرتك تحجز الأول وتدفع داون بايمنت وتيجي كمان كام يوم تستلم بطاريخك ..

فقاله يا عم حرام عليك ده أنا مسافر كمان شويه ومستحيل أأجل رحلتي ..

فقاله طب فتح مخك معايا .. قاله من عيني يا ريس ..

فقال للواد الصبي .. إفتح التلاجة وهات الربع كيلو اللي عندك بتاع مش عارف مين باشا ..

فقال له ربع كيلو بس .. الراجل قال له إحمد ربنا ده غيرك بيتنشق علي جرام

فبيقولي فتح التلاجة بصيت لقيت لففف لفف وكل واحده مكتوب عليها إسم سعيد الحظ اللي الدنيا ضحكت له وهايبطرخ البطارخ ليلة راس السنة .

.......

قلت : حقاً إنه عالم بطارخ .. بطارخ .. بطارخ .

وأنا فعلاً شايف إن راس السنة ما تتعدلش إلا بالبطارخ .. ونصيحة بقى كل واحد يروح عند الراجل ده ياخد له جرام بطارخ في العضل .. وهايشوف سنة 2006 هاتعمل معاه إيه ..