الثالوث المُرعب ( حشيش - أرنوب - نوسه )

[se_ Elsyed]

كلنا طبعاً عارفين الأديب العالمي حشيش ... وهل يخفى الجمر ... وده من خلال كتاباته وإبدعاته الإفتكاسية الكوميدية ...

ولكن

آه من ولكن

ولكن لكل أديب من الأودباتيه .. جوانب خفية مستخبية في حياته ... ومن ضمن تلكمو الجوانب الطقم أو الكاست اللي بيساعده ..

أيوهما همش عشان أديب يبقى هايشيل الليلة لوحده ...

خلينا في موضعنا

حشيش يعتبر هو المُخرج والمنفذ .. ولكن لو أتكلمنا عن مساعدينه .. فممكن نقول إن أهمهم إتنين في حياته الأدبية القصيرة هما :

أرنوب حسين وده سكرتيره الخاص وكاتم أسراره وبمعنى أصح حشيش ممرمطه معاه وهانتكلم عنه بالتفصيل بعدين

نوسه عبد المتجلي ودي سر كبير ومخفي في حياة الأديب .. لدرجة إنه بيسمع الإشاعات تتناثر هنا وهناك حول علاقته بنوسه .. ومع ذلك بيكبر دماغه وبيطنش .. فناس تقول دي حبيبته ... والسي إن إن بيقولوا لأ دي مش حبيبته ولكنها بنته .... و سمعت مرة البي بي سي بيقولوا إنه متبنيها .... ولكن أن شخصياً وعشان قريب من حشيش بأقول إنها ملهمته وسر إبداعاته .. أو بالبلدي كده نوسه دي الفاسوخه اللي بتجيب له الفقر .. قصدي الحظ ..

فتعالو نشوف سوا مواقف مختلفة من حياة حشيش .. ودور هؤلاء المساعدين في حياته

الموقف الأول

حشيش يجلس في غرفتة المظلمة يفتكس كصة من كصاكيصة المروعة وفي حالة إندماج وأنفصال عن الواقع ... وهنا يدخل عليه الحجرة مساعده أرنوب حسين :

أرنوب : مزاء الغير يا استاذ عشيش

حشيش : وعندئذ .. تتأزم الأمور وتتكلكع المسائل .. فيضطر حماده إلى نزع ملابسه .. ويُلقي بنفسة تحت دش المياه الساخنة لكي يُفيق من غفوته .. ولكن يحدث ما لم يكن في الحسبان .. وفجأتون ..

أرنوب : يا أستاذ عشيش ..

حشيش : وفجأتون

أرنوب : يا استاذ عششششششششششششششششششششيشششششششششششششششش

حشيش : إيه يابني أدم إنت ؟ إنت بتنده على واحد ميت ... 20 مرة قلت لأهلك ما تدخلش عليه خلوتي لما أكون مندمج ونازل عليه وحل التأليف .... نعم يا سيدي .. إتفضل .. أدي القصة أهي عشان خاطرك هاولع فيها ... إتفضل ياسي أرنب .. قول أنا سامعك ..

أرنوب : لا مؤخذه يا أستاذ .. أنا ماجبنيش من المطبخ إلا الشديد القوي ..

حشيش : من غير لوكلوك ورغي كثير .. خش في الموضوع وإنجز.

أرنوب : عضرتك عارف إني بقى لي 6 شهور ما قبضتش والحالة ضنك .. وبيتنا مافيهوش عود برسيم يوحد ربنا .. واللي زاد وغطا إني سايب مامي بتولد ومحتاجة مصاريف ..

حشيش : لأ ألف سلامه على أمك ... بس إيه حكاية الوليه دي ؟ دي عامله زي الحنفية اللي من غير جلده ... هي مش لسه والده الشهر اللي فات يالا ؟ آه عندك حق ماهي من فصيلة الأنارب غزيرة الإنتاج...

أرنوب : أمر الله بقى هانعمل إيه ... ها قلت إيه ؟

حشيش : في إيه ؟ يا أرنوب يابني سوق الأدب مضروب اليومين دول .... وأهو على يدك الشهرين تلاتة اللي فاته شطبت كصتين على السريع .... الأولانية " كصة جمال وخديجة " ودي جبت دراف الهايد بارك بيها .... والتانية " الحنين إلى الكرية " ودي ما بعتش منها غير 4 نُسخ وماجبتش حق الحبر حتى الي كتبت به الكصة .

أرنوب : طب أنا أعمل يا أستاذ ؟ أسيب الوليه تموت ويبقى ذنبها في رقبتي ... ما تكلم حد من أصحابك الكبرات اللي داوشنا بهم وبتقول عليهم ياما هنا ياما هناك وأصحاب مناصب وهيلمان وبيلعبوا بالفلوس لعب ..

حشيش : يابني أنا مش مستني تقولي أعمل إيه ... يعلم ربنا إني مش لاقي ثمن السيجارة .... وعشان كده عملت إتصالات على أعلى مستوى .. وكان أولهم إني إتصلت باخويا الكبير الأستاذ عادل أبو زيد وقلت له :

حشيش : مساء الخير يا عادل بك ..

عادل : مساء الخير يا حشيش يا إبني ...

حشيش : أنا عارف إن وقت حضرتك سمين .. وعشان كده هاخش في الموضوع على طول .... أنا محتاج قرشين سلف يا عادل بك لحد ما ربنا يفرجها وابيع الكصص المتلقحة عندي دي وأردهم لك وفوقيهم بوسة ...

عادل : والله يا حشيش يا إبني ونظراً لحالة الحراك السياسي التي تمر بها البلد وتغيير المادة 76 من قانون العقوبات ... ده كان إستهلال لابد منه ...

حشيش : أنا شكلي وقعت في شر أعمالي ... وبعدين يا بيك ؟

عادل : وبعدين إيه ؟ بأقولك حراك وعقوبات وإستهلال .. إيه كلامي مش مفهوم ولا أنا بأتكلم لغة رمادية ؟ ... مصر يا حشيش يا إبني في حالة مخاض ...

حشيش : أيوه عارف .. يعني مخضوضة صح ؟

عادل : مخضوضة ؟ مخاض يا إبني يعني ولاده ... وإنت عارف الولادة دي محتاجة مُغات وفراخ بلدي .. وسبوع وفشار وحلاقتك برجلاتك .. يعني مصاريف .. فللأسف مصر أولى منك ومن أمثالك بالقرشين اللي معايا ...

حشيش : وأنا عيني لمصر .. أنا مستعد تقطعوا من جسمي وتقلوا عشان مصر ... روحي فداكي يا مصر ... مصر مصر .... مصر .

أرنوب : إيه يا عم سعد زغلول .... لاحظ إني كل ده رامي ودني وبأسمع بس ومش شايف نتيجة

حشيش : إستنى يابني أدم .. مانا ماسكتش ورحت رافع السماعة ومتصل على أخويا وحبيبي المترب العاتفي " محمد زُهيري " ..

حشيش : مساء الخير يا فنان

زهيري : يا مسا الجمال والدلال والورد عالغالي .. عالأصل دور .

حشيش : إسمعني كويس يا زهيري وأرحمني من مواويلك ... أخوك مزنوق وفي عرض عقب سجاره ...

زهيري : رقبتي يا حشيش .. إنت عارف غلاوتك عندي .. لكن أصبر عليه شوية لحد ما شريطي الأولاني يدرمغ السوق .. وساعتها عيني ليك .. بالمناسبة الشريط فيه 8 حتت .. عاتفي على وطني على تفاشيح .. مشكل يعني ... ونقيت منهم أجدع أغنية وهاصورها فيديو كليب مع البنات اللي قالعين هدومهم ... وبأقول فيها " حبيني وأخلصي .. وفي قلبي لغوصي و آ

حشيش : إيه يا عم إنت في إيه ... لغوصي إيه وكلام فاضي إيه ؟ إنت بتحب حلة بامية ؟ ... معاك فلوس ناولني ... مامعكش يبقى نقطنا بسكاتك ... جاتكو الغم ... دي معرفة تقصر العمر

يُتبع

[nancy]

ادة ياس س انت داخل على الكصص على طول

الابداع كوى جدا

انا فى انتظار حشيش حيجيب فلوس منين

علشان نستلف منة احنا كمان

ناس مستنية الاعانات فى الامارات

وناس مستنيه تستلف

الحالة دنك خالص

كمل كمل يا س س

[se_ Elsyed]

وعشان العيش والملح والسجاير البلمونت .. ماسكتش يا أرانيبو وقلت أغتت وأغلس وأدور في دفاتري القديمة وأدخل على التقيل وعلى عيال الخليج المريشيين ... بأضرب بعيني كده لقيتهم في المنتدى بيتكلموا عن واحده أميرة إسمها جيجي .. مال إيه وعز إيه ... بيقولوا عندها العمارات بحري بحري .. والجنانين مرويه بالراحة .. والفلوس رُزم رُزم .. وواحد زميلنا الله يكرمه بعتلي رسالة خاصة وقالي إن عندها بيرين بترول في أبقيق .. وبير بنيزن أوكتين 90 في البطحا .... قلت أرمي الهلب عليها يمكن نقلب لنا منها قرشين يفكو أزمتنا :

حشيش : ألو مساء الخير .

كاترين ( دي الشغالة الفلبينية اللي عند جيم جيم ) " موساء النور ... مين ؟

حشيش : كان أي توك تو برينسيس جي جي ؟

كاترين : ثانيه واهد نندهو على السوت هانم .

ج ج : أيوه مين ؟

حشيش : أنا حشيش يا سمو الأميرة .. عارفاني ؟

ج ج : أيوه أيوه .. مش إنت بتاع حوارات المصريين ؟ أفندم يا استاذ حشيش .. أي خدمة ؟

حشيش : والله سموك أنا مش عارف أبدأ إزاي .. إنما ربنا ما يرقد لك جته .. ولا يحوجك لحد .. ويطعمك ما يحرمك قادر يا كريم .

ج ج : بس عرفت إنت عايز إيه .... والله يا استاذ حشيش البورصة اليومين دول مضروبة بالجزمة ... وثروتي كلها متبعترة هنا وهنا ... حتى فضلتوا تنقوا على أم شوية البترول اللي حيلتنا وتقولوا البرميل وصل 75 دولار ... لحد الفلوس مابقاش فيها بركة .

حشيش : أفهم من كده إن مالاقيش مع سموك برملين بترول حتى ؟

ج ج : يا ناس إختشوا بقى وإتملوا وخلوا عندكو دم .. إنتوا فاكرين البراميل دي مركونة في حوش القصر ؟ دا البترول ده له بورصة ومضاربات وتحويلات وشغلانة زرقا .. إسمع يا أخ كوكايين ... قصدي حشيش ... أنا لسه مخرجة فيزا إمبارح .... تحب تيجي تشتغل عندي جنايني وأهو تشتغل بلقمتك ونومتك ...

حشيش : أخص على كده .. بقى بعد الشهرة والمجد والكصص والتأليف أشتغل جنايني .؟ لا يا هانم .. ده أنا أموت من الجوع ولا إني أقبل شغلانه زي دي ..... إنما لو عندك فيزة سواق أنا ممكن أفكر .

أرنوب : يعني كلهم إتخلوا عنك يا عبقري .. وهاضيع أنا في الرجلين ... حسبي الله ونعم الوكيل ...... شكلك فكهاني بؤ وإن أكبر واحد تعرفه هو صميده البقال اللي بنشكك منه السلمون والتونة طول الشهر .

حشيش : إحترم نفسك يا أرنوب بدل ما أقوم أملص لك ودانك ... أنا صديق كل الشخصيات المحترمة في البلد .. وياما جم سهروا عندي في البيت هنا .. بس إنت ماكنتش إتولدت ..

أرنوب : يا عم روح ..... بأمارة إن مافيش حد حن عليك وسلفك ربع جنيه حتى ....

حشيش : أصبر على رزقك مانا جايلك في الكلام يابو الأرانيب ...

[Farida]

كمل يا سى السيد انا معاك على الخط ....

تم تعديل 11 مايو 2006 بواسطة Farida

[yasovinas]

الله على الفن والادب يا س س يا عبقري بس يعني مش عيب صاحبك وصديقك وشريك عمرك شيشو عميد الادب العرفي تفضحه كده وتكشف مكنونات حياتة الشخصيه وتشيل من علية ورقة التوت اللي ساتراه

حقيقي يا جدعان ما تجيش المصايب الا من القرايب

ياسو ابن فيناس عضو جديد في جمعية تهدئة النفوس برياسة الغالي الفنان زوهيري

ابو عمر لو كل غيبة هتجيب وراها شوية انتاج غزي كده

يبقى روح يا شيخ

وتعالى بعد شهر

[se_ Elsyed]

نانسي .. فريده .. ياسو

شكراً لتشجيعكم ..

وعشان خاطركم هاكمل ( وش العندليب من يكون )

------------

وغلاوتك عندي يا أرنب الموضوع كبر في دماغي وقلت يانا يا هما أصحاب الندامة دول اللي إتخلوا عني وقت شدتي .. واللي ياما كانوا بيزمروا ويطبلوا على كصصي اللي إتمتعوا بيها .. ووقت الشدة إدوني بالشلوت .... ماطولش عليك قلت أدخل الحمام أملا الطشت ميه وأنفض دماغي وأفكر في فوكيرة تخرجني من المأزك اللي أنا فيه ... وأثناء مانا بأعوم في الطشت ... طقت فكرة في دماغي وقلت وجدتها وجدتها وطلعت جري على التليفون وقلت أتصل بحبيبي وأخويا الأمير " سي فوود " أمير الجماعة وحامي الحمى :

حشيش : عمت مساءً أيها الأمير ...

سي فوود : وإنت من أهله يا أخ حشيش .

حشيش : أيها الأمير لقد جفت البير .. وهلكت العير ... ودق النفير .... أبوس إيدك شوفلي معاك قد 100 دولار أخوك في أسوء حالاته المعدنية .

سي فوود : يا أخ حشيش .. لقد اغلقت الشيش ... ونتفت الريش ..... من الأخر بوش إبن الـ..... منشفها علينا وما بقناش عارفين ناخد نفسنا ..

حشيش : يعني هاتتخلى عني بعد كل اللي قدمته للجماعة ؟ ده أنا كنت عامل لكو خدي مداس .... وزع منشورات يا أخ حشيش ... حاضر .... أيد الجماعة يا أخ حشيش ... أوكي .... بايع يا أخ حشيش .... داكوور ..... وبعد ده كله تدوني بومبه ؟........ ده أنا أبطح نفسي عليكو ومن بكرة أبقى شيوعي وأحاربكو للصبح .

سي فوود : خسئت وثكلتك مامتك ..... أو من أول ظرفٍ طاريء تبيع مبادئك أيها الرعديد ؟

حشيش : بصراحة آه .... إحنا ناس بتبيع أعضاءها كمان ... مش أحسن ما أبيع هدومي ... انا الديانة بيجروا ورايا دلوقت وقربت أتحبس ... والولا أرنوب كل وداني وبقى له 6 شهور ما قبضش .. وكله كوم والبت نوسه كوم تاني ... فلازمها شوية هدوم على كام جزمة بكعب ... أجيب منين دبرني يا أمير ...

سي فوود : خلاص خلاص .. أتركني فترة كده قد 4 أو 5 شهور وسآتيك بالخبر اليقين .

ودب راح قافل السكة في وشي .

أرنوب : هأ هأ هأ ها عععععععععع .. وعمال تقولي أنا عضو عامل في الجماعة وقائد جناح .. وأمير زلمكه ... ... والقاعدة دول حبايبي ... والشيخ أسامه صاحبي الآنتيخ وكل يوم نسهر مع بعض في تورا بورا ..... تصدق بالله أنا كنت بأحترمك وأقول عليك أعظم أديب أنجبته البشرية في التلات أربع شهور اللي فاتوا و .....

حشيش : أقسم بالله لو كملت كلمة تانية يا أرنب لأكون دابحك وعامل عليك حلة ملوخية النهاردة .. يا ندل يا جبان .. هاتبعني في أول أزمة أتعرض لها ... بكرة كصصي تفرقع والناس تضرب بعض عليها وساعتها أديك فلوسك على الجزمة القديمة .. وادور لي على واحدة فلبينية تبقى سكرتيرتي يا معفن ياللي ما بتسحتماش ..

أرنوب : موت يا حمار .... مانا عمال أسمع الكام بؤ الحمضانين دول من ساعة ما أشتغلت معاك ومافيش صفحة واحدة من كصصك إتباعت .

حشيش : كلام رجالة يا أرنب .. بكرة هايوصلك مني 100 جنية تحت الحساب وعليهم بوسة كمان ... لإني هاتصل بإتنين من أعز اصحابي وأنا واثك مليون المية إنهم مش هايتخلوا عن أخوهم حشيش ...

أرنوب : ماشي ... فات القليل مابقى الا الكتير ... وبكره نقعد على الحيطة ونسمع الزيطة .. ... لكن إعمل حسابك لو الفلوس ماجتنيش بكرة .. يبقى دور لك على أرنوب غيري .

[مصرية الهوى]

يا عيني عليك يا شيشو..

كل حلفائك خانوك يا شيشو ..

فكرني بعادل امام في عريس من جهة امنية لما كان بيكلم أصحابه الضباط .. واحد استقال والتاني اترفد والتالت اتحال على المعاش :P

بس ولا يهمك البرنسيسة ج ج مش هتسيبك .. حتى لو كانت البورصة مضروبة بستين جزمة .. وابار بقيق اللي من ساعات ما س س عرف بحكايتها الارهابيين حطوا عينهم عليها :angry:

انا شايله عندي جركنين كيروسين وطشت جاز هابقى ابعتهوملك :angry: ..

وابقى ولع ارنوب وبالمرة س س معاه بيهم :lol: :P

بيني وبينك يا س س بس متبقاش تقول لحشيش ..

أنا قلت للبت كاترين اول اما تسمع الصوت ده تاني .. تقفل السكة في وشه :P :P

أكمل يا س س .. وحشتنا معلقاتك :angry:

[مصرية يعني مصرية]

جميل أوي يا س س

كمل نفسي أعرف إيه إلي حيحصل :angry:

أصلهم بخلا ....... :angry:

ياعيني عليك ياحشيش يا كاتب العصر...ياخويا :angry:

تم تعديل 11 مايو 2006 بواسطة مصرية يعني مصرية

[حشيش]

كلنا طبعاً عارفين الأديب العالمي حشيش ... وهل يخفى الجمر ... وده من خلال كتاباته وإبدعاته الإفتكاسية الكوميدية ...

ولكن

آه من ولكن

ولكن لكل أديب من الأودباتيه .. جوانب خفية مستخبية في حياته ... ومن ضمن تلكمو الجوانب الطقم أو الكاست اللي بيساعده ..

أيوهما همش عشان أديب يبقى هايشيل الليلة لوحده ...

خلينا في موضعنا

حشيش يعتبر هو المُخرج والمنفذ .. ولكن لو أتكلمنا عن مساعدينه .. فممكن نقول إن أهمهم إتنين في حياته الأدبية القصيرة هما :

نوسه عبد المتجلي ودي سر كبير ومخفي في حياة الأديب .. لدرجة إنه بيسمع الإشاعات تتناثر هنا وهناك حول علاقته بنوسه .. ومع ذلك بيكبر دماغه وبيطنش .. فناس تقول دي حبيبته ... والسي إن إن بيقولوا لأ دي مش حبيبته ولكنها بنته .... و سمعت مرة البي بي سي بيقولوا إنه متبنيها .... ولكن أن شخصياً وعشان قريب من حشيش بأقول إنها ملهمته وسر إبداعاته .. أو بالبلدي كده نوسه دي الفاسوخه اللي بتجيب له الفقر .. قصدي الحظ ..

يُتبع

بتلسن عليا وعلى أبويا ياسى السيد ...... دى آخرتها ..... نسيت أفضال أبويا عليك وكل اللى عمله علشانك ... فاكر لما البوليس كبس عليكم فى (خمارة كوستا) فى بيانكى وأبويا فداك وخد 7 طلقات فى بطنه ..... وفاكر لما المباحث كانوا مراقبينك علشان علاقتك المشبوهة بالرقاصة الجريجية ( لوسيان باظبوظيان ) اللى طلعت عميلة للموساد وأبويا فداك وخد 7 طلقات فى دماغه ... أنا سايبة أبويا فى البيت منهار من كلامك ده ...... قاعد مربع عالأرض ولابس سبح كتير حوالين رقبته ومفيش على لسانه غير كلمة ( ليه كده يا سامبو ... ليه كده يا سامبو ) ..... ودى كانت أول مرة أعرف إن إسمك الحقيقى ( سامبو )

نوسة حشيش

[se_ Elsyed]

فاكر لما البوليس كبس عليكم فى (خمارة كوستا) فى بيانكى وأبويا فداك

فاكر طبعاً دي كانت ليلة سودا .. حتى بالأمارة منقوع البراطيش ليلتها كان كارف على طعم الجاز وحسيت في أخر الليلة إني بابور شرايط ...

وفاكر لما المباحث كانوا مراقبينك علشان علاقتك المشبوهة بالرقاصة الجريجية ( لوسيان باظبوظيان ) اللى طلعت عميلة للموساد

فاكر .. بس ما تقدريش تنكري إن باظبوظيان كانت واقعة في دباديبي .. وياما الجواسيس كانوا بيترموا تحت رجلها وهي على صرخة واحده " ماخدش غير سين سين الداسوس ... ماخدش غير سين سين الداسوس "

بس تعالي هنا

7 طلقات في الخماره

و7 عند بزرميطيان

؟!!!!!!

وكل ده عم عبمتجلي لسه عايش

ليه .. هو أبوكي يا نوسه كان أصله " قميص واقي ضد الرصاص " ؟

وبعدين إنتي عارفه كويس أني كنت في الخماره وعند الرقاصة ليه ؟

مش كله عشان مصر ؟

ولا ناسيه إني كنت عضو عامل في حركة الفدائيين الأبطال وياما كان لينا بطولات في بحري ورشيد وكوم الشقافة أيوووووووه يا جدعان ...

توقيع

س س س

سين سين سامبو الشهير بسامبو ديل الفار

------------------------------------------

------------------------------------------

مصريه يعني مصرية ... ومصرية الهوا وكل المصاروة الأحرار

حاضر من عيني أنا هاكمل ...

بالرغم من التهديدات اللي وصلتني على بريدي الإلكتروني وبتهددني بالنفخ إذا كملت وفتشت أسرار حشيش وأرنوب ونوسه ... هاكمل .

بالرغم من السُعال الديكي هاكمل ....

أنا هاكمل يا حشيش ..... واعلى ما في أرانبك إركبوا ....

[واحد تاني]

فين طبق الكمالة يا عم س س؟

تم تعديل 20 مايو 2006 بواسطة واحد تاني

[se_ Elsyed]

فين طبق الكمالة يا عم س س؟

مش لما تدفع الحساب

ولا عايز تاكل سفلقه ؟ <_<

[واحد تاني]

سفلقه :wub:

هي حصلت لغاية سفلقه :ph34r:

طب نزل انت بس الكمالة وحساب الترابيزة كلها عندي :huh:

وكده كده هنعدي عليك ف الكاشير واحنا طالعين <_<

ولو مدفعتش يا سيدى اهي الصحون موجودة :wub:

سمي بالله وانزل بيها وزودلي بصل لوسمحت :huh: