تم بحمد الله إفتتاح صالون سين سين للقيافه والتزيين

[se_ Elsyed]

بُشرى سارة لرواد صالون المحاورات الشقيق .. يُسعدني ويُشنف أذاني أن أزف إليكم نبأ إفتتاح " صالون الأسطى سين سين للقيافة والتزيين "

لصاحبه ( راضي عفو الخلاق .. الأسطى سين سين الحلاق )

--

طب إيه الجديد في كده ما الحلاقين ماليين البلد من أول قرفص لحد محمد الصغير ؟

سؤال وجيه مُمكن يدور في خُلد اي زبون .. قصدي أي زميل

الجديد أيها السادة هو إني وبعون الله إستفدت من دراستي لبرامج الإكسل والوورد والباور بوينت في إستخراع أله حلاقة حديثة بالكمبيوتر ..

هي مش إله يعني زي ماكينة الحلاقة الصغيرة سواء جيليت أم أمواس أو الماكينة أم كهرباء المشهورة والمتعارف عليها

ولكنها ماكينة عجيبة وأخر ما توصل إليه العلم الحديث في مجال الحلاقة .. وفكرتها بإختصار إننا ندخل الزبون فيها من ناحيه مع بياناته الشخصية وهوياته وكل حاجة عنه وده سميته Input ونسيب إيدينا .. وفي خلال دقيقتين يطلع من الناحية التانية محلوق له الحلقه اللي عمره ما كان يحلم بيها وسميت ده Output

مش هاطول عليكو ( حد يقولي طول بسرعه قبل ما أزعل )

ولقد أستلهمت فكرة تلك الألة العجيبة من خلال تجوالي في موقع وكالة ناسا ومحطة مير الفضائية وقنوات النايل سات التليفزيونية .. ده أساسي .. بالإضافة إلى رؤيتي لعم عبدو الفرارجي وهو بينضف الفراخ من خلال ألة التنضيف اللي في المحل اللي كلنا عارفينها وشوفناها ومرت علينا مرور الكرام بدون أن تُثير فينا أي نوع من أنواع حُب الإبتكار .. لكن مش معايا لا مؤخذه .. المهم فقد قُمت بالمزج بين الإتنين .. يعني تكنولوجيا ناسا وتكنولوجيا عم عبدو

وأخيراً ربنا قدرني وطلعت الألة بالشكل ده

آه قبل ما أوريكوا الألة .. أنا أطلقت عليها إسم " حلقولوز "

وعشان العيش والملح والعشرة الطيبة اللي بيننا .. فهابدأ التجارب المخبرية على أصحابي وحبايبي وزملائي في المنتدى ...

وكل واحد هايحلق يعني هايحلق ..بالزوق بالعافية .. يعني الموضوع مش أوبشينال ..

وأول شمه .. قصدي حلقه هاتبقى مجاناً .. كدووم - هدية بالفرنساوي - من المحل يعني .. وبيناتكو بالطبع كلها عندي وجبتها من الكنترول بمساعدة السادة المُشرفين - هايحلقوا هما كمان وهاتبقى ليلة -

فأرجو إنكو تساعدوني وماحدش يفلفص أو يرفص أو يتحرك كتير عشان السكاكين بتاعت الماكينة لسه حاميه ومش عايزين حد يتعور من أولها

بالمناسبة

الصالون لحد دلوقت رجالي بس .. وعندي كرسي عالي علي جنب وعليه عربية بتنور وتطفي عشان الأطفال ..

بس أوعدكو لو شجعتوني والبليه لعبت .. فمستقبلاً هافتح قسم حريمي وللمحجبات كمان وهاتبقى ليلة ...

نلتقي بعد الفاصل مع أول زبون

( ده أحنا هانلم لم )

يُتبع

هات يابني أول زبون من التلاجة

[واحد تاني]

احم احم

من فضلك يا اوسطى ... لو (الحلقولوز ماشين) دي هنجت وانا جوه

نعمل ري-ستارت عادي... والا انا هكون لوست-داتا خلاص؟ :wub:

[se_ Elsyed]

احم احم

من فضلك يا اوسطى ... لو (الحلقولوز ماشين) دي هنجت وانا جوه

نعمل ري-ستارت عادي... والا انا هكون لوست-داتا خلاص؟ :wub:

زي ما يكون قلبك حاسس يا واحد يا بني .. لإن إنت من الناس اللي وأنا بأدخل بياناتهم واللي كنت متأكد من صحتها ودقتها بالشعرة .. طلع لي مخرجات output غريبة ..

لكن إطمنئن أنا ماسبتش حاجة للظروف

فبفضل برنامج المايكروسوفت سيرفر .. عملت حاجة جديدة ومبتكرة وتعتبر قفزة في عالم الفن وسميتها

الـ

recovery system

وتعتمد على إن لو حدث خطأ أثناء الأوبيريشن ... فبألم اللي فاضل من الزبون وأدخله في ماكينة الـ Assembly ماشين ودي حاجة كده زي النملية ... ونحط الكُبس ونسيب الزبون جوه قد 4 أو 5 ساعات حسب حجمه ... وبعون الله يرجع زي الفُل وأحسن من الأول كمان .

--------------------------

مش عايز أسأله كتير .. كله هايدخل الماكينة وهايشوف بنفسه مدى توفر معايير الامن والنضافة فيها قد إيه ..

------------

ولا يا فتله

يا واد يا فتله

نادي على المتهم .. قصدي الزبون الأولاني

فتله : أ / عادل أبو زيد ... أ / عادل أبو زيددددددددددددد

الأُسطى س س : أهلاً عادل بيه ... مش هاسألك طبعاً الأسئلة التقليدية وأقولك شعر ولا دقن أو تحب القصة تبقى ليس ولا كاريه . ..الحاجات دي موضه وبطلت من أكثر من ربع قرن .... لإن الداتا بيز بتاعتك موجوده في الحلقلوز وهي هاتقوم بكل شيء

عادل : بس أنا غرضي أقولك أ

س س : يا عادل بيك .. من فضلك ... سيلفو بليه ... سيب لي نفسك خالص وخليك ليراكس وكل شيء هايبقى تمام التمام .. وهاتدعيلي لما تشوف نفسك في المرايا بعد الحلقه اللي هاترجعك 35 سنة لورا

-----

بسم الله الهادي .. اتكلنا على الله :

الأسم : عادل أبو زيد

السن : فوق الـ 60 بشويتين

المهنة : صاحب ومدير صالون المحاورات

الهوايات : قراءة الجرايد المُستقلة على الريق ..

صوت ميانيكي صادر من الحلقلوز : من فضلك دخل الزبون وبعدين دوس enter

بسم الله هووووووووووبا

صلي عالحبيب وقرب على البضاعة الأصلية

( ملحوظة ... أنا كل تركيزي هايكون على قصة الشعر ... والمحل غير مسئول عن شكل الزبون النوهائي.. كتعبيرات الوجه أو الفينيش بشكل عام .... آه اللي أوله شرط أخره نور .. واللي دفعتوه تعالوا خدوه .. مش هاتبقى حلاقه وبحلقه كمان )

تقدر تنكر بقى إن دي كانت هيئتك وصورتك إبان العقد الخامس من القرن العشرين ؟

أنا عايز 5 يكتفوني .. وأسمع بقى سقفه جامده بالصلاتو عالنبي

[maksoof]

مكسوف بعد زيارة " صالون الأسطى سين سين للقيافة والتزيين " :wub:

[se_ Elsyed]

مكسوف بعد زيارة " صالون الأسطى سين سين للقيافة والتزيين " :blink:

يا حبيب قلبي ما تستعجلش

والله العظيم عملت لك حتت تدريجه .. إنما إيه إممممممممم أخر قيافه ... وهاخليك تقول : لا تقولي تزغيط ولا تسمين .. أنا مش حالق إلا عند سين سين ..

----------

نادي يا فتلة عالزبون الثاني خلينا نخلص

فتله : أحمد بك محمود الشهير بـ ( إبن مين في مصر )

أحمد : سون سون حبيب قلبي .. والله العظيم أنا طرت من الفرح أول ما قالولي إنك سيبت قعدة الرصيف وطلق قرفص بالتالتة وفتحت محل مِلك ...لدرجة إني سيبت حجر المعسل اللي في إيدي وجت أبارك طيران .

س س : القلوب عند بعضها وربنا يديم المحبة يابو اشرقت .. ولا يا فتله كتفو ياه

أحمد : لأ إنت فهمتيني غلط أنا جاي أبارك بس

س س : عارف عارف كلهم كانوا بيقولوا كده .

أحمد : طب أقولك .. طب إسمعني .. طب بتقلعني القميص ليه .. لأ لأ .. طب ممكن قبل ما تحطني في القمع بتاع الكائن الغريب ده تبنجني بنج كُلي .. أو بلاش .. إديني مخدر موضعي في شعري عشان ماحسش بالمعاناة والألم ..

س س : أظن عيب عليك تبقى مشرف أزرق طول بعرض بإرتفاع وتعيط كده قدام الناس ... وبعدين بنج إيه وتخدير إيه؟ هما قالوا لك عليه حلاق صحة .. أدلق معايا يالا فتله في القمع خلينا نخلص

------

بيانات قطعة الشغل

الأسم : أحمد محمود محمد محمود

السن : 40 وإنت طالع

الإرتفاع : 186 سنتي

المهنة : على باب الله

الهوايات : شورب مية الطُرشي ولعب الحجلة .

حلقلوز : تم التعرف على بيانات القطعة وجاري التعامل مع الهدف ... من فضلك سمي بإسم الله ودوس على الرابع

هووووووووووبا زووووو زوووووو زوووووو

طششششششششششششششش

وسع وصلي عالنبي

تعالى شوف ياخويا ياللي عملت فضيحة وكإننا كنا هانقطع منك ونقلي

بالله عليك مش الصورة أحلى من الأصل ؟ طب أنا راضي ذمة بنت مصر

---------

تعرفوا أنا بأفكر في إيه دلوقت ؟

بأفكر إني أعمل بعض التعديلات على الحلقلوز بحيث بدل القُمع اللي فوق ده واللي بياخد زبون واحد بس .. اركب 3 أقماع بحيث أشطب 3 حتت في نفس الوقت .. وده هايبقى إنجاز هايتكلم عنه العالم كله أكثر ما أتكلموا عن خريطة الجنيات المتوارثة .. بس الحتة المعصلجة معايا في معادلة البرمجة إن إزاي الحلقلوز يعرف إن الحلقة دي بتاعت الزبون ده ..

يعني إش ضمنني مثلاً إن لو حطينا شريف وكان طالب كاريه .. ووليد وطالب كابوريا مع عصام اللي طالب كنيش .. إش ضمنني إن شريف ما يبقاش كابوريا .. ووليد كنيش .. وعصام يلبس الكاريه ... هاتجنن ودماغي قربت تفرقع ...

بس هاحلها بإذن الله

وياريت لو حد من زمايلنا له في الفيجول سي يوضح لي بالرسم البياني أمشي إزاي وأبدأ منين وأنتهي فين

وله حلقه ببلاش

[nancy]

احمد ربنا انى مش راجل

وربنا يعين الرجالة

وبعدين مين حيحلقلك انت يا س س

[se_ Elsyed]

وبعدين مين حيحلقلك انت يا س س

ماهو ده الإعجاز يا نانسي ياختشي

يعني لو كانت الحلاقة لسه كما كانت من قرن مضى بالمقص والموس والكلام من ده .. ماكانش فعلاً أقدر أحلق لنفسي

ولكن مع الحلقلوز ... Just إني أدخل بياناتي وأقوله ظبطني يا معلم .. وهووووب أروح مدلوق في القمع .. شويه وأطلع من الناحية التانية على سنجة 10 ....

صبرك عليه لما أفتح المحل الحريمي وعنيه ليكي .. إن ماخليت لك إسكندرية كلها تقول إن نانسي رجعت 45 سنة ورا من غير لا عمليات تجميل ولا بوتكس ولا سفر لباريس ولا نيس .. مابقاش أنا سين سين عجيب بتاع كله

[khedr]

وسع ياجدع منك له

والله ما ها سيب سي السيد ده اللي عايز يوقف حالنا

مش كفايه المحليات والهبيشه ....هيخترع كمان حلاقه كمبيوتر

قرفص ( ملك الرصيف )

[se_ Elsyed]

--------------

القائمة مازالت طويلة ( ويانا يانتو )

هات يا فتله الزبون اللي بعده من تحت الدُش يابني قبل ما نروح زمانه باش من الميه .. ربنا يجعل ختامها مسك

فتله : وليد الكمنجاتي الشهير بـ " فايولين "

وليد : مثاء الخير يا عمو ثين ثين .. أرجوك تثمعني لمدة دقيقتين فقط لإن وضعي حثاث للغاية

س س : إيه هاتغني ولا هاتصدع دماغي زي كل مره ؟

وليد : لا ده ولا ده ... زي ما حضرتك عارف إني فنان مُرهف الأحاثيث.. ولي معجبين ومعجبات كثير . وبالتالي لازم يبقى اللوك بتاعي جديد في جديد ... فالله يخليك لو الجهاز العجيب ده هايبوظ خلقتي .. يبقى أنا أثف ما تعملش حثابي .

س س : بث يا وليد قصدي بُص يا وليد .. إنت مش بتثق في أونكل ثين ثين ؟

وليد : لأ طبعاً .

س س : عظيم جداً .. ولا يهمني .. أنا هاعمل منك فنان كبير كبيييير كبيرررر .. شفت يوسف وهبه كان كبير قد إيه ؟

وليد : آه .. ده تقريباً مات وهو عنده 95 ثنة ..

س س : الله ينور عليك ... أنا هاخلي الناس تنسى يوسف مع وهبه وتفتكر وليد بس ...

شيله من إيديه ورجليه يا فتله وكُبه في الجهاز .. بس على مهلك عليه أحسن تفعصه في إيدك

-------

الإسم : وليد الكمنجاتي

السن : 19 سنة وشهرين

الهواية : ضرب العود والودع وقراءة الفنجال

-----

حلقلقوز : من فضلك سمعني أغنية بودعك .. ثم إضغط زر النجمة ....

زوووووووو زوووووووووو كررررررررركرررررررررررررر

هـــــا يابا ؟

لا تقولي جورج مايكل ولا جيري أدمز

دلوقت تقدر تدخل إمتحان الإبتدائية وإنت متظبط يا ريس ومش محتاج تذاكر كمان .. لإن كل الداتا اللي في الحلقلوز لإتعلمها كوبي وبثت قصدي بيست في دماغك وبقت ولا البينتيوم فوور

---------------------------

وسع ياجدع منك له

والله ما ها سيب سي السيد ده اللي عايز يوقف حالنا

مش كفايه المحليات والهبيشه ....هيخترع كمان حلاقه كمبيوتر

قرفص ( ملك الرصيف )

آه لو يعرف الاوت بوت بتاعه كان شكله إيه ... يالله .. قال يا حلقه بفلوس بكره تبقى ببلاش ...

[se_ Elsyed]

فتله : شُفيتم يا أسطي سين

س س : مالكش دعوة .. وبعدين إيه يالا أُسطى سين دي ؟ أومال فين السين التانية ؟

فتله : في إتنين أفندية نضاف شكلهم دكاترة سنان جم سألوا على حضرتكم فقلت لهم في الحمام .. فقعدوا منتظرين حوالين ساعتين ولما أتأخرت جوه خدوا بعضهم ومشيوا وسابوا لحضرتك شوية الورد دول

س س : أفنديه .. دكاتره سنان ؟!!! إوعى يكونوا حكومه يالا ؟

فتله : لأ يا أسطى .. وهي الحكومة بتجيب ورد للناس ... إلا طبعاً لما تطلع عليهم القرافة .

س س : طب وراحوا فين يالا ؟

فتله : أنا شوفتهم ماشيين ناحية محطة الأتوبيس وطبعاً ممكن يقفوا لبكره لحد ما الأتوبيس يعدي .

س س : طب فوريره تاخد 3 صعايده من على القهوة وتروح تجيبهم قصراً

فتله : حمامه يا أسطى ...

---

فتله : أهم يا أسطى .. ألقينا القبض عليهم متلبسين بمحاولة ركوب أتوبيس في الشارع العام

موديست : كده يا سين سين .. دي أخرة الصحوبيه .. تبعت رجالتك يجرجروني أنا وأخويا إكسلنس في الشارع ويخلوا العيال الصغيرة تحدفنا بالطوب وتقول الحراميه أهم الحراميه أهم ؟

س س : ما عاش ولا كان ... الله يخرب بيتك يا فتله ويخرب بيت أفكارك السودا ...دول أصحابي يالا يا مدهول .. أنا اسف يا موديست ... حقك عليه يا إكس لانس .. وأدي راسكم أحلقها . قصدي أبوسها

إكس : عامة إحنا كنا جايين نبارك لك بمناسبة فتح المحل ... يالله يا موديست .

س س : يالله ؟ يالله على فين ؟ طب علي الطلبات مانتو متحركين من هنا إلا لما تاخدوا واجبكو ونتعشى مع بعض كباب وكفته ونيفه .

موديست : معليش يا س س .. إنت عارف إني ماليش غير في الزبادي .

س س : والله ما يحصل .. روح يالا يا فتله هات كُرسي .

إكس : لأ مش هانقدر نقد والله .. عشان إحنا أتأخرنا وماما ممكن تستعوقنا وتقلق علينا .. الساعة دلوقت داخله على تسعة .

س س : لأ ماهو الكُرسي مش عشان تقعدوا .. ده عشان تقفوا عليه وتجربوا المكنه الألماني الجديدة بتاعتي " الحلقلوز "

موديست : مكنه إيه ؟ .. انا مش شايف قدامي غير خلاطة بتاعت أسمنت .

س س : إيه يا موديست جرا لك إيه ..وأنا اللي بأقول عليك بتفهم في المكن ... إنت مش عندك لاب توب بنتيوم تو وواجع دماغي به وتقولي ده رفيق عمري وما بأنامش غير وهو في حضني ؟

موديست : آه .. بس إيه علاقة اللاب توب بالخلاط ده ؟

س س : يا بيه ما هما الإتنين نفس الفكرة .. إنت لما تجربه هاتعرف .

موديست : أيوه يعني أجربوا إزاي.. أخدوا لفه في الشارع رايح جاي ؟

س س : إسم الله على مقامك .. لأ طبعاً .. أنا هاجيب الكُرسي دلوقت .. وتطلع إنت وإكس تدخلوا جواه .. أروح أنا بكبسة زر مشغل الخلاط .. قصدي الحلقلوز .. وأدخل بيناتكوا إنتوا الإتنين .. هوووب 5 دقايق تطلعوا من الناحية التانية متظبطين ومعملوكوا تدريجة 10/10

إكس : على جثتي .... لأ يا عم القميص يتكرمش

موديست : القميص يتكرمش .. ده لو بقى فينا قميص أساساً ... الراجل بيقولك حلقلوز وكبسة زر وخلاط بيدور .. يعني هانبقى كُفته .. وإنت عارف إن ماليش غير في الزبادي .

س س : بص يا موديست ... شايف الرجالة اللي هناك دول ...

موديست : آه

س س : أنا ممكن أخليهم يكتفوك إنت وإكس ونقوم حادفينكو هيلا بيلا في المكنه وولا من شاف ولا من دري.. فأطلع بالذوق أحسن لك

إكس : على جثتي ..

موديست : إنت وعدتني 5 دقايق بس يا س س ... الله يخليك ما تسيبناش جوه أحسن نتحمص ...

----------

البيانات

الأسم : الأخين الحلوين ... موديس وإكس لانس رمش العين .

السن : واحد أكبر من التاني بـ 3 سنين .

الإنتماءات : موديست زملكاوي .. وده مش عايزينه ... إكس أهلاوي صميم وهاظبطه في المكنه ولا حلقة حسام حسن بعد ما كبر .

حلقلوز : تم التعرف على الجثتين ..... وللعلم موديست سيمكث 4 ساعات داخل الحلقلوز حتى يقول حقي برقبتي أنا أهلاوي أنا أهلاوي .. عاش صالح سليم زعيم الاُمة .... .. أما إكس فسيُكتفى بتخفيف شعره نمره واحد

زووووووو زوووووووووووووو

هوببببببببا

صورة موديست بعد خروجه من الحلقلوز

( على فكره بقى الصورة دي قريبه جداً من موديست بس صداغ الراجل اللي في الصورة متختخه شويه .. ده لو حد من إخواننا في المباحث هنا وعايز خدمه جليلة يعني )

ودي صورة إكس لانس بعد التدريجة

[Modest]

عمو س س :happy:

بابا من ساعة ما رجع من عند حضرتك و هو قافل على نفسه الأوضة و بيعيط بصوت عالي و يقول كلام مش مفهوم منه إلا: "أنا اللي جبت ده كله لنفسي ... أنا اللي جبت ده كله لنفسي "

اخواتي بيقولوا لي إن حضرتك ركّبته حاجة اسمها "حّلق حوش" زي الرولر كوستر بتاعت الملاهي و هو بيترعب منها

ممكن يا عمو نسيب بابا في الأوضة و نيجي نلعب أنا و اخواتي؟

كريم موديست

[se_ Elsyed]

كريم موديست

إنت تشرف يا كريم

وكلامك ده أنا هاعتبره وسام على صدري

وهايديني دفعه للأمام عشان استخرع جهاز جديد أسميه " ميني حلقلوز " وده هايبقى لحلاقة وتزيين الأطفال