أُريد زوجة / أُريد زوجاً

[se_ Elsyed]

مما لا شك في إن قضية العنوسة وزيادة نسبة الطلاق وتأخر سن الزواج هي من القضايا التي لابد أن تهم المجتمع ككل ... فالمجتمع السليم القائم على أُسس وقواعد سليمة لابد أن يكون أفرادة مستقرين نفسياً ، وبالتالي صعب أجد مجتمع تنتشر فيه مسألة التفكك الأُسري أو الأمراض النفسية وأجده متقدماً ، مع تسليمنا إن موضوع بناء الأسرة في الغرب لا يشغل بالهم كثيراً طالما هناك قنوات أخرى يستطيع فيها الشاب والفتاة أن يعوض تلبية حاجاته الغريزية المتعلقة بالجنس وبلا أي متاعب او مصاعب مادية ، لكننا والحمد لله كمجتمع شرقي عربي مُسلم لم ولن نصل إلى هذه الدرجة ، فتكوين الأُسرة والأستقرار النفسي الشرعي والحلال هو هدف ينشدة الشاب والفتاة من المراحل الأولى في حياته .

لكن مع ذلك هذا ليس تسليماً بإن كل شيء تماما وكل شيء مضبوط والأمور تسير على ما يرام ..

فعندما نعلم إن نسبة الطلاق في المجتمع السعودي هي 25 % وفي دول الخليج بشكل عام تصل إلى 38 % ... فلابد للمجتمع السعودي والخليجي أن ينزعجوا من ذلك ... تخيل هذه النسبة ؟!!!! يعني لو الواحد حضر 100 فرح في الشهر ... فأخر الشهر نفسه مثلاً ممكن يلاقي 25 عروسة وعريس جُدد رجعوا بيوت اهاليهم بشُنط هدومهم مُطلقين ... ولو أستمروا مع بعض شويه ممكن العلاقة القصيرة دي تخلف أولاد يدفعوا الثمن من التشتت وعدم الإستقرار النفسي ، ناهيك بقى عن نظرة مجتمعاتنا العربية الجميلة للمطلقة المنبوذة سهلة المنال والتي ممكن أن ترضى بالفُتات او بعريس أي كلام إن شالله لو أكبر منها بعشرين سنة أو عنده أولاد وكل هدفه يتجوز واحده واقعه ما يكونش لها طلبات عشان تربي له الأولاد .... إلخ من ثقافات وعادات خاطئة زُرعت فينا وهي بعيدة كل البعد عن الإسلام ...

وسبحان الله كما قال الأمام محمد عبده عندما عاد من أحد جولاته العلمية الاوروبية " في الغرب وجدت إسلام بلا مسلمين ... وفي الشرق وجدت مسلمين بلا إسلام "

يعني هل الإسلام يدعونا إلى حشر انوفنا فيما لا يعنيا ؟

أبداً والله .... لإن الرسول عليه الصلاة والسلام قال " من حُسن إسلام المرء تركه ما لا يعنيه "

يعني شيء ما يخصكش لو واحده جارتك أو قريبتك أو في الحي عندك مُطلقة او تأخر بها سن الزواج .. يا أخي وإنت مالك خليك في حالك ومش مطلوب منك يا سيدي تشيل همها ..

طيب نرجع بقى لفكرة موضوعنا الأساسية ... في الأسبوع الماضي وجدت أحد أصدقائي بيقولي : إتفرجت على قناة مش عارف مين بتاعت الزواج ؟ فقلت له لأ والله هي حتى لو موجودة ومتاحه أتفرج عليها ليه وانا مش عايز أشتري ؟ يعني محل زحمه بيبيع سجاير بأسعار مُخفضه أروح أتزاحم ليه وأنا ما بأدخنش أساساً .. أو ما بأغيرش نوع السبارس اللي بأشربها ؟

فقالي : الله يخليك إتفرج معايا نص ساعة بس وقولي رأيك

أولاً : القنوات دي متاحه على قمر النايل سات وبأسماء مختلفة وبقت سبوبة نضيفة قوي قوي بيدخلوا منها دخل جامد عن طريق إعلانات الزواج عن طريق الرسائل الصغيرة اللي بتبقى بأسعار مرتفعه عن أسعار الرسائل العادية

ثانياً : معظمهم إن لم يكن كلها قنوات خليجية .. لكن ما فيش مانع بتلاقي فيها إعلانات كتيرة لناس من دول عربية اخرى

ثالثاً : هالني وازعجني الأسلوب المتدني في عرض الفتيات أو السيدات لأنفسهم وكذلك الشباب .... فهذا والله ليس بزواجاً أبداًً ولكنه قلة حياء وقلة أدب فتجد مثلاً إن شاشة القناة مقسومة قسمين علوي وسُفلي ... القسم العلوي لطالبات الزواج .... والسُفلي لطالبي الزواج .... وكل طلب أمامه رقم ولو عجبك او عجبِِك طلب فبيقوم الطالب بإرسال رسالة قصيرة برقم الطلب فيجيله رقم تليفونه أو تليفونها برسالة وعلى حسابك والعداد بيعد

فوجدت العديد من الإعلانات بصراحة مش عارف أسميها إيه .... مثل " مُطلقة ... 24 سنة ... تمتلك ثروة وبيت .... تطلب أي نوع من الزواج ( شرعي عُرفي مسيار ) ، جسمي مثل الزبدة ، أجيد الرقص الشرقي وأُجيد جميع فنون إمتاع الرجل ، محتاجة للزواج جداً جداً "

ده مش إعلان واحد فقط وإلا ما كانش الواحد كلف نفسه وأثار الموضوع ... ولكن موضوع وصف الجسد وإجادة الرقص الشرقي والمواهب الأخرى والكلام ده متكرر في كثير من الإعلانات ..

فتخيلوا شاب يبحث عن الزواج بأي نوع من انواعه ولو إني لا أعترف إلا بالزواج الشرعي فقط مهما حلل العلماء بقية أنواعه ... فهذا الشاب راح لأسرة الفتاة صاحبة الطلب رقم كذا وقعد مع أبوها وقال له :

العريس : يا عمي انا يشرفني إني أطلب إيد بنتك ؟

الأب : انهي واحده فيهم يابني ما هم كتير ؟

العريس : يا عمي اللي جسمها مثل الزبدة ؟

الأب : زبدة ؟ !!! زبدة إيه يابني وجبنة رومي إيه ؟!! إنت في بيت محترم مش في قسم منتجات الألبان في كارفور

العريس : يا سيدي انا اقصد بنتك اللي فشر تحية كاريوكا في الرقص وعندها مواهب أخرى دفينه

----------------

ينفع كده يا جماعة ؟ وهل مش هو ده هايبقى تفكير وإحساس المُتلقي من الشباب بالذات ؟

وهل هكذا تُبنى الأُسر والبيوت حتى ولو وضعنا إعتبار البحث عن إشباع الغريزة بشكل حلال وشرعي هو هدف هؤلاء ؟

مع العلم بإن في إعلانات كتير لرجالة عايزة تدخل الموضوع بالهدوم اللي عليها بس ومش عايز يتكلف لا بيت ولا فلوس ولا حاجه ابداً وبيطلب عروسه كامله من مجاميعه والمصيبة الكُبرى في عيال منهم بيطلبوا مرتبات !!!!

آه والله العظيم عايز مرتب شهري عشان يشتغل في وظيفة عريس بعد الضُهر ..... ما تستعجبوش لإنه بيلاقي وبعروض كويسة كمان وبيفضل يدرس بقى ويختار إيه ويسيب إيه وأوقات كتير بيشيل أربع حتت وبيدخل له 4 مرتبات .. ولا شغل بقى ومدير غلس يعكنن عليه ولا إصابة عمل ولا ترقيات ولا دياوله ...

لذا أنا بأستغرب وبأسأل .. فين رجال الدين اللي بيسيبوا الناس تتخبط في ظلمات الجهل والتفكك والإنحلال الأخلاقي وشاغلين نفسهم بالإفتاء في قضايا قد لا تهم الكثير من المسلمين وسايبين قضايا إجتماعية من اخطر ما يُمكن ؟

تخيلوا يا جماعة إن إعلانات كثيرة جداً بتلاقي صاحبتها طبيبة أو سيدة اعمال في مركز مرموق ولكنها قاربت على سن الأربعين أو تخطته وما فيش حد بيرضى يتقدم لها لا لشيء إلا لإنها طبيبة أو ممرضة وده معروف بشكل خاص في دول الخليج على أساس إنها ساعات بتضطر للسهر بالليل خارج المنزل في نوبات عمل بالمستشفى او للسب الاخطر والأهم عند الرجال الباحثين عن الزواج والذين لا يرغبون هذا النوع من الفتيات وهي إنهم بيكشفوا على رجاله وممكن يشوفوا العورات ... فتبقى ما تلزمنيش لإنها قلية الحيا .... ده فكر الكثيرين وإحنا في القرن الواحد والعشرين

ونكمل بعدين

[رمضان]

والله يا سي السيد انت بجد كالعادة اثرت موضوع شديد الأهمية

لقد عادت بنا هذه القنوات الى أيام سوق النخاسة بتاع زمان وزمن الجواري

يعني مش بعيد تكون ماشي في الشارع بعد كده وتلاقي واحد بينادي على جواري ( هنا الجواري الحسان هنا جواري زمان ) ده اللي هيحصل بعدين واللي يبيع نفسه هيلاقي اللي يبيعه ويشتريه

وسلم لي على زمن العولمة

[amrhoras]

صباح الصباح يافتاح ياعليم على الاخبار المهينه لإعلامنا اولا وثانيا وثالثا

الزواج عرض وطلب خاص جدا بيكون بين طرفين فقط مش طرف ومليون طرف فى الناحية التانيه

بجد شيء مقلق لما يُفعل بنا كعرب

مجموعه من الفتيات الفضيات (جمع فاضي) وشباب من الخنافس (جمع خنفس) يعرضون لبدانهم لليشترى قصدى لليتجوز ويقولو فى الاخر طالبين الحلال

طب انا نفسي افهم بس ده سؤال شخصى مين من الرجاله المحترمين اللى يرضى على نفسه يتجوز واحده كانت معروضه بطريقه مش ولا بد بس حكايه زبده ورقاصه دى حاجه كلمة استفزاز لا تكفيها دى قلة أدب

اتعجب لادارة هذه القنوات هل هم فعلا اشخاص مثلنا يعنى فى دم؟؟؟؟

سي السيد ربنا يخليك لينا بتجيب موضوعات فعلا مهمه جدا لم اجد سوى طريقه واحده لن تعجب الكثير لحل هذه المشكلة

شومه و سلسلة حديدا وكرباج وتتكسر القنوات دى على اصحابها وسلمولى على الديمقراطيه والثقافه والعولمه

شكرا

[se_ Elsyed]

طب انا نفسي افهم بس ده سؤال شخصى مين من الرجاله المحترمين اللى يرضى على نفسه يتجوز واحده كانت معروضه بطريقه مش ولا بد بس حكايه زبده ورقاصه دى حاجه كلمة استفزاز لا تكفيها دى قلة أدب

لازم نفرق يا عمرو بين حاجتين :

1- رجالة محترمة ... طبعاً ما حدش فيهم هايقبل كده ... والراجل المحترم لما ييجي يتجوز يبقى لازم يرفع راسه وسط الناس وما يخافش من حد ويبقى له القوامة ويبقى بيدور على الإستقرار ويبقى قاعد مع زوجته ومش خايف من أي كبسة ممكن تحصل ... أعرف واحد هنا متجوز مسيار وداخل الجمعية دي بمجهودة فقط ولما زوجته بيجيلها أصحابها أو قريباتها يسهروا معاها بياخد سكه هو يطلع يقعد في غرفة السائق خارج الفيلا ويفضل كده بالمنظر ده لحد ما يمشوا ... آه والله .... حاجه تكسف .... بالإضافة إلى إنه أصبح ملطشة لزملاءه اللي بيحبوه وكل ما حد يتغاظ منه يهدده إنه هايقول لأم عياله اللي سايبها في بلده وواقفه زي الراجل بتربي العيال عشان تطلعهم رجاله يقوم هو يتجوز مسيار من وراها ويروق نفسه هنا وهي تتفلق هناك ... وبقى شكله عامل زي التيس اللي متأجر يقضي غرض معين وبعد كده ياخد شلوت ويترمي في الشارع .... وسلم لي عالجواز ..

2- رجالة مش محترمين .. أو هما شايفين نفسهم محترمين ... ودول هايقبلوا ونص كمان وهايقفوا طوابير وبالضرب للي يحجز الأول ... وهما بيشوفوا إنه بدل ما يتورط في علاقة مُحرمة ويغضب ربنا .. لأ .. يروح يتجوز واحده بتعرف ترقص ويادوب يزورها مرتين تلاتة في الإسبوع لإن عندها بيت وفلوس .. وما فيش مانع كمان يبقى متزوج شرعي من واحده تانية بس مغترب إما من خارج البلد زي ما أعرف ناس عاملين كده يبقى متجوز في بلده وييجي هنا يمشي حاله بجوازه سُقع زي دي .. أو شخص من أبناء البلد لكن عمله يقتضي إنه يكون في مدينة تانية ... فبدل ما يقعد حاطط إديه على خده فبيتجوز بالطريقة دي ... وجميعهم طبعاً يفعلون ذلك في الخباثة ومن غير ما حد يعرف عشان أم العيال ما تقطعوش .... علماً بإن الرسول الكريم قال " الإثم ما حاك في الصدر وخشيت أن يطلع عليه الناس ) فهو لو إنسان محترم وشايف إن الزواج ده محترم ما كانش فعل أي حاجه في السر ...

اللي عايز اقول له لك إن بعض هذه القنوات وللأسف وحسبنا الله ونعم الوكيل بيبقى مديرها شيخ وعايز يوفق راسين ...... في الحلال وكل واحد ونيته

[Diab]

يا أبو عمر المشكلة ان الموضوع ده عامل زي المتوالية الهندسية بيزيد بطريقة سرطانية

النهاردة اعلان زواج

بكرة اعلانات friends

في مواقع عربية مشهورة جدا علي النت للزواج يتم عرض الفتيات فيها بطريقة فجة

كل واحدة عاوزة تتجوز تعمل اشتراك مجاني وتحط لها كام صورة شخصية ليها

آلاف آلاف و من كل شكل وملة

وبعد كدة نبكي ع الأخلاق

اروح اتغدي واجيلك

[doda]

اهده كله اهده كله...مال لما اجي انا اتجوز هيحصل ايه... دانا لسالي على الاقل 5-6 سنين على ما ادخل سن الجواز. ربنا يستر... :lol: :ninja:

[zizetta]

إيه رأيكم برضة في قناة ميلودي تريكس .. اللي بتعلن عن أنك لو جاوبت سؤالهم الهايف حتكسب فلوس كتير ..مرة طحن ومرة ملة ومرة ......

حاجة تكسف .. وألفاظ مشينة تقال علي الملآ ..والا طريقة البنات وهم بيطلبوا أنك تتصل وتبعت اس ام اس ...

بالنسبة لموضوع الأخلاق بقى .. شاهدت مرة برنامج لهالة سرحان كانت مستضيفة فيه بعض الناس ومنهم هشام سليم .. الذي قال عن العرى .. كل واحدة حرة تلبس اللي يعجبها .. واللي مش عاجبة ما يبصش ..

رحمنا الله

زيزيتا

[Alshiekh]

فتخيلوا شاب يبحث عن الزواج بأي نوع من انواعه ولو إني لا أعترف إلا بالزواج الشرعي فقط مهما حلل العلماء بقية أنواعه ... فهذا الشاب راح لأسرة الفتاة صاحبة الطلب رقم كذا وقعد مع أبوها وقال له :

أبو مين ياحاج واسرة مين؟؟

[yasser6666]

أخونا سي السيد..اسمحلي اشارك في موضوع الحيوي قوي بتاع الجواز ده

أنا شايف ان فيه قاعدة مهمة دائما تفرض نفسها في مواضيع الجواز وهي

(الطيبين للطيبات والخبيثين للخبيثات)

وحتي لا ننفر الناس من الجواز عن طريق هذه القنوات الفضائية او اي وسيلة أخري حديثة غير تقليدية

احب اقول انني اعرف ممن تقدم للزواج بهذه الطريقة وعندما تحدد موعد (للرؤية الشرعية) كما يسمونها يعني يتقابل الطرفين وجها لوجه كانت المقابلة في وجود مسئول والكلام والأسئلة لبعضهم كلها امامه وفي وجوده

واعتقد ان هذه هي نوعية الزواج اللي لازم نشجعه ونتمني انه ينتشر ويزيد ليحل مشكلة العنوسة في العالم العربي وبين الشباب المسلم والمسيحي كمان

انما طبعا موضوع الزبدة البلدي والعشرة البلدي (يعني الرقص الشرقي) دي قلة أدب ومسخرة

وعادة بتكون من ناس فاضية ومش بتدور علي جواز حقيقي انما وراء معاشرة جنسية تتستر تحت اسم الزواج

واكيد ان لو واحد طيب وابن حلال وصادق مع نفسه ويبحث عن عروسة طيبة تشبهه اكيد حيلاقي

انما لو شخص وسخ (للأسف) وخبيث وبيستخدم الاعلانات دي للمتعة المؤقتة وليس لبناء أسرة وحياة كريمة فهو برضه حيلاقي طلبه من خبيثة مثله من بتوع الزبدة وهز الوسط

واخيرا شكرا علي موضوعك ياعزيزي