يابني إحنا بنشتري خط

[se_ Elsyed]

هذه الكصة مستوحاة من موضوع للرفيق زُهيري .. وبهذه المناسبة أود ان اُهديها إلى روحه الطاهرة التي تُرفرف فوق المكان ..

بجد بجد ... أود أن أسجل إعتراف وشهادة حق .. وهو إن زُهيري من الناس القلائل اللي عرفتهم عن طريق النت ويتمتعون بخفة دم ما حصلتش ..

ولإن الشيء بالشيء يُذكر فإن من هؤلاء الناس اللي تعلمت منهم وأستوحيت منهم كثيراً من أفكار موضوعاتي المتواضعة .. عشان تبقى شهادة أمام التاريخ والجغرافيا كمان :

1- حشيش ..................... أستاذ بلا منازع .. وممكن يبقى قنبلة كوميدية إحترافية متفجرة .. ( بس آه لو يبعد عن الشطحات الهلامية بتاعته ويفلتر كلامه شويه ) أقسم بالله يبقى ولا بلال فضل أو فيصل ندا

2- سكوربيون ............ مصيبة سودا وكوميديا نابعة من اعماق معاميق الشعب المصري ( بس لو ما يمارسش هوايته القديمة كغطاس فني ويروح بالسنة ويقول عدوا لي .. كنا لمينا من وراه ياما )

3- زُهيري .... كوميديان مش عارف قيمة نفسة ودافن نفسه في الزيت والبترول وخام برنت ويكتفي بالتعليقات القصيرة الساخرة اللي عامله زي طلقات الرصاص ... مع إن عنده كتير ونتنمنى مشاهدته في ثوب التأليف وإحنا راضيين يألف علينا بس نشوف له كرامه .

4- RMG ... عضو المحاورات السابق وكتير هنا دلوقت ما يعرفهوش لإنه منقطع بدون أن نعرف الأسباب وبجد كان مالوش حل ... إرجع يا أر بي جي بابا وماما في إنتظارك .

5- مدام زيزيتا ............... بما إن الفن السنيمائي في إنحدار من بعد الفنانة زينات صدقي ... أنا بأقولها بالفوم المليان إن زيزيتا دي من اخف الدموم – جمع دم – النسائية اللي شوفتها في حياتي وأنا سخصياً أستمتع بقراءة مواضيعها .. أستمري يا زيزي قلبي وربي راضيين عنك .

نرجع مرجوعنا لقصقوصتنا اللي أخترت لها عنوان " يابني إحنا بنشتري خط "

فكما قلت إستوحيت الموضوع ده من الصورة اللي جابها لنا زُهيري وصورها بنفسه بعد أن حضر احد الأفراح الهندية ودهسته أقدام الفيلة ووقع تحت وطأة التدافع الهائل في الفرح اللي تم في أحد الاحياء الشعبية القديمة لمدينة بنجر أباد بولاية مدراس بمحافظة بومباي

....

يتأهب الشاب بطل القصة سنجر شاه ويستعد للذهاب إلى بيت محبوبته الحسناء صرما شان التي ظل يحبها لمدة 36 عاماً حباً عُذرياً صامتاً ليس له أيةً ملامح ولا تفاصيل .. وفضل أن يكون في الظل نظراً لضيق ذات اليد ولكن أخيراً ربنا كرمه وسافر السعودية ليعمل هناك بوظيفة عامل شحن وتفريغ وبعد عمل أستمر 5 سنوات متواصلة لم يذق فيها طعم النوم ولا اللحمة ، عاد إلى مسقط رأسه في بنجر أباد ليطلب يد حبيبته من والدها وأستجمع قواة ويذهب إلى بيتهم :

سنجر : يا عمي أنا يشرفني إني أطلب إيدك كريمتكم صرما شان .

زعتر كان ( والد العروس ) : أيوه يا إبني .. بس إنت فاجئتني ... وصرما لسه صغيرة

سنجر : صغيرة ؟؟!!!!!!!!!!!!!!!!!! ليه مقاسها كام ؟ يا عم دي بتلعب في الـ 42 سنة .. خليها على الله وخليني ساكت .

زعتر : طب كلمني عن نفسك شوية ... أنا كل اللي أعرفه عنك إنك من 5 سنين كنت شاب معفن ومش لاقي السبارس وبتجري ورا عربيات الرش في بنجر أباد .

سنجر : لأ عربيات رش إيه وسبارس إيه ؟ ده كان زمان .. إحنا بنشربو بلمونت دلوقت .... وأنا جاي وناوي إني أسعد صرما واخليها أسعد وِليه في الدنيا .. ومستعد أقدم لها انضفها عدة موبيل وأحلاها خط ...

زعتر : إنت كده جبت من الأخر ... إنت كده تُشكر عالأخر .... حاكم أنا طول عُمري أؤمن بالمقولة الهندية القديمة التي قالها الحكيم الهندي كوم فوشيوس خان .. لما قال " الراجل ما يعيبوش غير محموله " .. يعني معاك عدة نضيفة ... وخط محترم ... يبقى تفوت في الحديد وتروح تطلب ستات الستات يلفوها لك ويوصلوها لك لحد البيت بشنطة هدومها ... من الاخر " يابني إحنا بنشتري خط " .... فيا ترى ممكن تقدم إيه لصرما ؟

سنجر : يا عمي انا مستعد أقدم لها عيني .

زعتر : أيوه بس إحنا بطلنا نلعب بلي .

سنجر : طب رقبتي

زعتر : انا نباتي وما بأكلش لحمة الراس ... إنجز وأوجز .

سنجر : يا عمي انا هادفع في صرما عدة موتورلا ستة تمانيتين .. وخط اتصالات مدفوع مسبقاً ... قول حلال عليك يا سنجر وسمع الفاتحة يا زعزع ,,

زعتر : ياك فتح دماغك ..... فاتحة إيه يا معفن يابو موتورولا شبشبين إنت ؟ .... ده الأسبوع اللي فات جاني واد شغال إستورجي من دلهي وحط لي فيها عالترابيزة حته نوكيا إن 95

سنجر : ان 95 ؟!!!!! ليه يابا جاي يتجوز ليلى علوي ؟ يا عم زعتر كشكشها وما تعرضهاش ما أنا عارف البير وغطاه .

زعتر : طب علي الطلاق الواد جاني على مالا وشه ومعاه الحتة النضيفة دي بس للامانة كانت مستعملة إستعمال خفيف وشاريها من شارع عبعزيز لكن ام صرما رفضت لإن ام الولا ده وليه منفسنه ويتفات لها بلاد وهاتبهدل البت .

يُتبع

[Scorpion]

حمدلله عالسلامة يا بوص.....

بس معلهش عشان انا مش هندي ..... فين سندوشتات الوز و البط اللي بيقولوا عليها ....

و بعدين هندي ايه ده يا خويا اللي من سيدي بشر

إحنا بنشربو بلمونت دلوقت

بيفكرني بنجيب الريحاني في سلامة في خير ....عالعموم كله يهون في سبيل ست الحسن الأنسة صرما .. بصراحة حتة بنت انما ايه .. بانص ...

مستنيين ال يتبع :lol:

[se_ Elsyed]

فين سندوشتات الوز و البط اللي بيقولوا عليها

ما هو الأفترا له ناسه !!!!!

ما زهقتش من البط والوز والحمام اللي كانت الحاجة ام سكوب عمال تزغطهم لك وإنت في مصر من كام يوم ؟

ولا عايز تاكلنا وتحلي بهدومنا ؟

إتقي الله إخواتك في الصومال مش لاقيين ريشة بطايه يعملوا عليها مرقه

و بعدين هندي ايه ده يا خويا اللي من سيدي بشر

إنت روحت الهند قبل كده ؟

يابني بنجر أباد دي موجود على ساحل المحيط الأدرياتيكي ... وأهلها بيتكلموا لغة سواحلية أقرب للإسكندرانية .... إفهموا وإدرسوا أنثربولوجي بقى حرام عليكو

[واحد تاني]

و بعدين هندي ايه ده يا خويا اللي من سيدي بشر

إنت روحت الهند قبل كده ؟

يابني بنجر أباد دي موجود على ساحل المحيط الأدرياتيكي ... وأهلها بيتكلموا لغة سواحلية أقرب للإسكندرانية .... إفهموا وإدرسوا أنثربولوجي بقى حرام عليكو

حصل يا سكوب ... على يدي ...

أنا زرت بنجر أباد الصيف اللي فات ... والكلام اللي بيقوله الباشمهندس ده مظبوط

وبيقولوا كمان ايووه

كمل ... كمل ياباشمهندس الله لا يسيئك :lol:

[se_ Elsyed]

فين سندوشتات الوز و البط اللي بيقولوا عليها

ما هو الأفترا له ناسه !!!!!

ما زهقتش من البط والوز والحمام اللي كانت الحاجة ام سكوب عمال تزغطهم لك وإنت في مصر من كام يوم ؟

ولا عايز تاكلنا وتحلي بهدومنا ؟

إتقي الله إخواتك في الصومال مش لاقيين ريشة بطايه يعملوا عليها مرقه

و بعدين هندي ايه ده يا خويا اللي من سيدي بشر

إنت روحت الهند قبل كده ؟

يابني بنجر أباد دي موجودة على ساحل المحيط الأدرياتيكي ... وأهلها بيتكلموا لغة سواحلية أقرب للإسكندرانية .... إفهموا وإدرسوا أنثربولوجي بقى حرام عليكو

[Scorpion]

طب فهمني جناب حضرتك عايز تقول ايه بالمداخلة اللي فاتت دي.. واخد كام اقتبساية و عملتلي بيهم مداخلة ....يا حلاوة... و العدادة تعد و سي السيد و العشرتلاف مداخلة.. فين يا عم بقية حكاية الصرما الواحد رباطه اتفك من الانتظار ...

[se_ Elsyed]

طب فهمني جناب حضرتك عايز تقول ايه بالمداخلة اللي فاتت دي.. واخد كام اقتبساية و عملتلي بيهم مداخلة ....يا حلاوة... و العدادة تعد و سي السيد و العشرتلاف مداخلة.. فين يا عم بقية حكاية الصرما الواحد رباطه اتفك من الانتظار ...

تصدق بالله أنا ما عملتش أي حاجه ولا أقتبست ولا يحزنون ؟!!!!

في حد غريب بيننا يا رجالة

[nash]

مش عارفه عندي أحساس أن فيه ديناصور هايعدي من ورا الكرسي...

[se_ Elsyed]

مش عارفه عندي أحساس أن فيه ديناصور هايعدي من ورا الكرسي...

طالما موضوع عن الهند ... يبقى توقعي أي حاجه

[MZohairy]

هذه الكصة مستوحاة من موضوع للرفيق زُهيري .. وبهذه المناسبة أود ان اُهديها إلى روحه الطاهرة التي تُرفرف فوق المكان ..

بجد بجد ... أود أن أسجل إعتراف وشهادة حق .. وهو إن زُهيري من الناس القلائل اللي عرفتهم عن طريق النت ويتمتعون بخفة دم ما حصلتش ..

ولغن الشيء بالشيء يُكر فإن من هؤلاء الناس اللي تعلمت منهم وأستوحيت منهم كثيراً من أفكار موضوعاتي المتواضعة .. عشان تبقى شهادة أمام التاريخ والجغرافيا كمان :

3- زُهيري .... كوميديان مش عارف قيمة نفسة ودافن نفسه في الزيت والبترول وخام برنت ويكتفي بالتعليقات القصيرة الساخرة اللي عامله زي طلقات الرصاص ... مع إن عنده كتير ونتنمنى مشاهته في ثوب التأيف وغحنا راضيين يألف علينا بس نشوف له كرامه .

4

أخي الحبيب سين سين أتشا كياهال هيه

والله ما ياخدني عنك غير الشديد القوي :lol:

انا بس كنت معزوم على فرح واحد زميلنا هندي في الشغل اسمه امتياز سوراج خان و عروسته سوسن حسين ابو طالب و صورتهم و جيت على طول اهه

[Scorpion]

يا عم يا بتاع الخطوط ... هو ايه اصله ده ؟

يكونش ده مسلسل اسبوعي بيتذاع مرة واحد كل اسبوع ... و انا مش واخد بالي ... اقطع دراعي انك بديت المسلسل ده ن غير ما يكون ليه اي ملامح في نافوخك ....

الحق عليا انا اللي بقرالك .. لأ و ايه الفكرة جايبها من مين ... من زهيري .... يا اختششششي بلا وكسة

العروسة اسمها صرما و العريس حافي .....

[shahd]

.. لأ و ايه الفكرة جايبها من مين ... من زهيري .... يا اختششششي بلا وكسة

العروسة اسمها صرما و العريس حافي .....

العروسة اسمها صرما و العريس حافي ..... :lol: :) ضحكتني يا عمو كامل الله يفرح قلبك

[DARWEEN]

العروسة اسمها صرما و العريس حافي .....

يا سكوب شغل دماغك شويه ... دي كده الكصه بقت واكعيه صحيح ...

أمال هو العريس ضحى بالجهاز والخط ليه ... مش علشان يرحم رجله اللي أشتكى منها الأسفلت

[Modest]

زُهيري .... كوميديان مش عارف قيمة نفسة ودافن نفسه في الزيت والبترول وخام برنت ويكتفي بالتعليقات القصيرة الساخرة اللي عامله زي طلقات الرصاص ... مع إن عنده كتير ونتنمنى مشاهدته في ثوب التأليف وإحنا راضيين يألف علينا بس نشوف له كرامه .

لا اتفق معك يا سيادة الكاتب الكبير (في السن) سين سين في إن السيد زوهيري كوميديان

بل إنني أبحث عن مقالاته الجادة كل صباح لتكون نبراساً و درساً عميقاً (حوالي متر و نص) لي و لأولادي من بعدي.

باي باي

تم تعديل 29 يناير 2008 بواسطة Modest

[se_ Elsyed]

الإبن العزيز سكوب كتب

يا عم يا بتاع الخطوط ... هو ايه اصله ده ؟

يكونش ده مسلسل اسبوعي بيتذاع مرة واحد كل اسبوع

إنت عارف يا سكوب المود بتاع الكُتاب - مش الكتاب بتاع تعليم القرآن اللي كان زمان - لكن أقصد اللي بيحاول يكتب حاجه كوميدي هايبقى دمه تقيل لو كتب حاجه وهو مش متظبط فهاتبقى دمها برضوا تقيل حتى لو عمل قص ولزق من اللي كاتبه ..

لكن أوعدك أفنش الحتة دي النهاردة بإذن الله

عشان عندي لك مفاجأتون وهو إني في إيدي حتتين باخلصهم دلوقت :

1- أول حته تُعتبر تجربة جديدة بالنسبة لي في مجال القصة العواطفية وسميتها " الحُب في زمن القُراع " وعايزكو تقفوا جنبي في أول تجربة عاطفية ليه ... مش تقفوا جنبي يعني تتلموا حواليه واللي ما يشتري يتفرج ... لكن تقفوا تشجعوني يعني ... وبإذن الله فاضل لي كام يوم وأظبطها وأدرمغ بيها السوق .

- الحتة التانية هاتبقى قنبلة 2008 ودي مش هاقبل منك أقل من 100 يورو يا سكوب من اللي مرسوم على ورقهم الملكة فاكتوريا عشان إنت من ابطال القصة الدرامية دي ولسه الفكرة طقا في دماغي من 3 أيام فقط وإن شاء الله تعجبكو ... وسمتها " قصة الصراع الدامي بين قبيلتي الحشايشة والسكايبة "

الحشايشة : نسبة إلى قبيل بني حشيش وكبيرهم هو ده >>>>>>>>

- السكايبة : نسبة إلى قبيلة أولاد سكوب وكبيرهم هو هادوكا السخص >>>>>>

[se_ Elsyed]

سنجر : أيوه يا عمي ... بس أنا بأحب صرما وقلبي إتشعلق فيها من أول رنه ومش هاخبي عليك بقى وعلى بلاطه .. في بيننا ميسدات يامه وبصراحة اللي هاياخد صرما مني هاشوه وشه بمية نار وهانتف صرما على دماغه وفي الأخير هاموت نفسي ..

زعتر : ميسدات ؟!!! رنات ؟!!!!! شرفي ..... سُمعتي ؟ ده انا راجل ماحيلتيش غيرهم .... – ثم يصيح منادياً بت يا صرما بت يا صرما

وتدخل صرما مهرولةً إلى الغرفة التي كانت تتلصص من خرم الباب على الموجودين وتدعو الله أن يجمع شملها بحبيبها سنجر

صرما : نعمين يا بابا ... أطشا كا هي ... الفيل صديقي ( بالعربي ... يعني لبيك أبي .... أؤمر وأنا أنفذ يا سيد المعلمين وكلامك يمشي على رقبتي زي السيف .. وما عاشت ولا كانت صرما لو كسرت كلام أبوها حتى لو قال لها إرمى نفسك في نهر الامازون الذي يجري في الأراضي الهندية من الشرق إلى الغرب ويتفرع إلى روافد صغيرة .... مش وقت شرحها دلوقت )

زعتر : هل حصل بينك وبين الولا الرمه ده ميسدات وحركات ؟

صرما : في الحقيقة يا بابا الواد ده غرر بيه ... وكان قبل ما يسافر كل يوم ييجي يقف تحت شباك عشتنا ويشغل والعياذ بالله البلوتوث ويقعد يبعت لي رنات بتدوب قلبي دوب زي " الليلة دي سيبني أعيش وأحب فيك " أو اخاصمك آه .. أصالحك لا ... وأخر مره بعت لي رنة من بتوع تامر حُسني " يا بنت الإيه " وبعدها بيومين سافر وماش وفتش خلقته

زعتر : آه يا ذئب يا بشري .... تستغل سذاجة البنت وإنت عارف ان أكتر حاجه مسكتها هي علبة الزبادي اللي اخرها حبل وكانت بتعمل نفسها بتتكلم في التليفون ـ تقوم إنت تروح مره واحده باعت لها نغمات بالبلوتوث ... خسئت ... والله لأقطعن فرطك ولأهشمنك رأسك ولأجرجرن شعرك

سنجر : إيه يا عم حيلك .... إنت هاتعملي فيها يوسف وهبي ... ده اللي يسمعك كده يفتكر إني إتجوزتها عُرفي ومخلف منها عيلين ... يابا كل الحكاية لم تتعدى الميسدات والرنات ... ومع ذلك يا سيدي انا جاي أصلح غلطتي ... قلت إيه ؟

وهنا تتدخل أم صرما تدخل الحموات الذي يُفشل الكثير من الزيجات ... ويشتت العديد من الأُسرات ....

أم صرما : أيوه بس بنتنا مش هاتبقى أقل من بنت خالتها " صابوه خاتون " اللي إتجوزت ديك النهار وعريسها جاب لها حته أريسكون 6101 ومعاها خط سوبر دردشة .

سنجر : يا طنط أم صرما أنا شاب لسه في بداية حياتي وبنيت نفسي بنفسي وبديت الطريق من الصفر بل من تحت الصفر وفي بداية حياتي ما بنكرش ان كان معايا عدة ماركة " كوز السلمون المخروم " وكنت بأعتمد على تحويل الرصيد من البقالات والأكشاك إيشي بخمسة روبية و إيشي بعشرة روبية .... لكن أنا أوعدك إني هاشيل صرما في عنيه – ده إيه القرف ده – وليكي عليه يا ستي أجيب لها حتة موتورولا أستعمال نضيف في حدود 200 روبية مع خط إتصالات أوبشن كمان ( مزايا الخط ومميزات الكرت ) وهدية مني وعشان إثبات حُسن النية هاكتب لها مؤخر 100 رسالة MMS وفي حالة الطلاق بمشيئة الله هاتنازل لها عن العدة ومش هابقى معفن ونجرجر بعض في محاكم الأُسرة .. وهأمن لها مستقبلها بشاحن منزل نوكيا أصلي وشاحن سيارة كمان مع إني عارف عن اكبر حاجه صرما شافتها في حياتها هي التوك توك لكن اهو برضوا حاجه لها وللأولاد ...... سمعينا بقى زغروطة يا طنط ام صرما ... وقول خد صرما يا عم زعتر .

تمت

[Scorpion]

تمت .... :wub:

تمت ؟؟؟؟؟!!!!

هو ايه اللي تم يا استاااذ ؟؟ ايه نظام الكروتة ده ... و كيس اللب النص كيلو اللي في ايدي ده اعمل بيه ايه دلوقتي؟؟

يا عمي ده انت ابتديت الجزء التاني عسل و خصوصآ حتة الترجمة ... و منينا نفسنا بحاجات من بتوع زمان ...

تقوم تعمل زي اللي طبت عليه كبسة و رمي كله و جري ...

كلا

كلا و الف كلا ...

اللي تم هو الجزء الأول بس ... مش كده يا افندينا ؟؟

يرضيك عضو المحاورات يبقي كده من تحت راسك

[jasmin hamed]

للرفع حقيقى يا استاذ احمد حضرتك فنان