إحنا وعيالنا .... مين بيربي مين ؟

[se_ Elsyed]

الموضوع ده هاخصصه لعرض التجارب الاولية المعملية في تربية الذُرية لنعرض فيه أساليب التربية من غير كلكعه ولا مصطلحات علمية

وهابدأ بنفسي وأقر وأعترف أمامكم والله على ما أقول شهيد إني إتربيت من أول جديد من إبني البكري عُمر - ما أسمهوش بكري ولكن البكري يعني باكورة الإنتاج –

وإن اللي عملته مع أبويا وامي وأنا صغير .. بيطلع عل جتتي أجوازاً وأفراد ... بالرغم من إني ما كنتش واد مُدمر او مغلبهم لكن كان ليه حركات زبالة برضوا ... الامر ما يسلمش ...

والحق يُقال إن الواد عمر برضوا إستحمل - ومازال – معانا كتير لإننا أنا وامه لم يكن لدينا تجارب ... يعني أنا لا أتجوزت ولا خلفت قبل كده ولا هي طبعاً فمعندناش خبره .. فعملنا الولا فار تجارب ... بالرغم إن انا ومامته كنا أدبي ... وشوفوا إنتوا بقى لما واحد أدبي يدخل المعمل وسط القوارير والسبرتايات – جمع سبرتايه البتاعة اللي بيعبوها سبرتوا ويولعوها تحت انابيب الإختبار – ووسط ثاني أكسيد المنجنيز كعامل مساعد مع سلفات البوتاسيوم وأخلط ده كله وولع تحته تلت ساعة وشوف هايطلع لك إيه يا معلم .

وللأسف مالحقتش أقول لأبويا قبل ما يموت : حجك عليه يابا ... وأدي راسك احب عليها .. انا كنت طفل معفن وغلبتك ... سامحني يابا والنبي وخلي جلبك يرضى عني ... لإنه أتوفى والواد عمر عنده سنتين فمكنتش لحق أتظبط واتكحرت .....

ربنا يرحمه برحمته

أما الحاجه .... – يعني نينا بالإنجليزي - فربنا يديها طولت العُمر ... فمن بعد اللي شوفته من عمر أفندي – قبل ما يتباع - فما بقتش أبمبك معاها ولا أفتح حنكي بأي كلمة ... ولا مؤخذه لو قلعت أبو ورده وضربتني على نافوخي وأنا كبير زي الشحط كده .. هاقولها : هذا ما جنيته وانا صغير ... إديني جوزين إقلام كمان عشان اكفر عن ذنوبي ( في سري طبعاً )

فالولا ده خلاني عامل زي اللي بيمشي عالحبل وكل حركه او لفظ محسوبين عليه وبالأقي حواليه رقيب وعتيد وبيبقى ناقص يمدني على رجلي لو غلطت قدامه في حاجه وكإن الدنيا ماشية بضهرها وهو اللي بيربيني مش انا اللي بأربيه ...

فعشان كده قررت إني أستحضر كل قوى الشر الطفولية وكل أساليب الصياعة الشبابية وقلت : والله العظيم يا عمر يابن سين سين إذا كنت إنت عيل فانا هاكون أعيل منك وهاوريك القرد مخبي إبنه فين وتجيلي يمين هاجيلك شمال واحطها لك لوب من فوقك زي الإجوان بتاعت أبو تريكه وخصوصاً الجون الاخراني في مرمى كامين الكاميروني ..

وبالفعل بإستخدم الإسلوب ده معاه تقريباً من ساعة ما أتعلم اللماضة وبقى يدخل معايا في مجادلات ومناقشات على طريقة الند للند ... لدرجة ساعات لما أقعد ألعب معاه بلاي إستيشن وأخمه عشان أعرف اكسبه حيث انه من الجبابرة المعتقين في اللعب – اخ أمه يعني خاله ... تيمتارا لا لالم .. لملم لمم – ألاقيه إتعصب وزنجر ويقولي : ولا إنت بتخم ياض إنت ومش هالعبك معايا تاني وقوم أمشي من هنا ... فمباقدرش امسك نفسي وبأضحك لإننا وقت لعب .. لكن وقت الجد لو قال كده فبكل حنان الأب وحنينه المحنن هاروح لاطشه على قفاه 100 قفا على سهوه ...

وإذا كان المثل بيقول " الولد سر أبيه " او " من شابه أباه فما ظلم "

فأنا لا أعتقد إن الناس دي كانوا يقصدوا الشبة الشكلي فقط يعني الواد يطلع شكل أبوه أو شعره زي شعره وهكذا ..

لكن أعتقد إنهم يقصدوا إنه بياخد بعض طباعه

طب إذا كانت الطباع دي ظاهرة ومازالت في الأب ... فده سهل وعادي لإن الواد بيقلد أبوه وقديماً قال الشعر الجاهلي السح الدح إمبوه إدي الواد لأبوه ... نخلي بالنا كويس ... يعني لا قال أمه ولا خالته حتى ....

فما بالنا بالطباع الخفيه التي ماتت واندفنت ويمكن ما حدش يعرف عنها حاجه ... ومع ذلك فجأة تشوفها في الواد إبنك ؟ وكأن الماضي يعود يوماً ( دي مش قصه لإحسان عبقدوس )

- على سببيل المثال ... السنة اللي فاتت عُمر كان في كي جي تو وكان بيمتحن بقى إمتحانات أخر السنة والبيت متكهرب والواد في شهادة ووطي التليفزيون وممنوع الزيارات وهات الملخصات والحركات وأتلقى تعلميات الباب العالي : روح إشتري لنا 5 أرغفة فينو وعلبة مربى فراولة قطع مش مهروسة مع شوية جِبن على عصاير وما تنساش الشكولاته يا سين سين .. حاكم الإمتحانات بتحب الشوكولاته ( يا نهار مش فايت ده أنا كنت بأكل طعمياية حاف ونص شقة فول وأدخل إمتحان الثانوية العامة بصدري وأجيب مجموع يدخلني طب كمان ... فكل الليسته دي عشان عيل معفن في كي جي تو ؟ ... نصحى مع بعض كل ده في سري اللي مش مسرور وبأقول يا واد وطي للريح وعدي أيام الإمتحانات المفترجة دي عشان الولا لو سقط أو جاب مُلحق هاتيجي الست هانم تقولك : اهو شوفت تقصيرك عمل إيه ؟ ما هو لو كنت جبت المربى والشوكولاته من سكات كان زمان الواد فلح دلوقت ... يالله بقى طلعه من المدرسة وشغله صبي ميكانيكي ولا حلاق -

فكفى الله المؤمنين القتال وبأنزل معايا اللستة دي اللي غالباً بأصمم لها ملف باور بوينت بيعرض سلايدز ورا بعضها وباحط كل طلب في سلايد مميز عشان مانساش حاجه وانا في البقالة وأُجبر على الرجوع مرة أخرى وممكن يكون الليل ليل او السماء تُمطر ... ما علينا ...

- مامته جاءت لي ذات مساء لتطلب طلب بكل أدب وتقول : ممكن بدل مانت عمال تضيع وقتك في الفرجة عالماتشات او الدخول على النت والسهر حتى الصباح مع ضُرتي ( اللاب توب ) تذاكر للواد شويه قرآن عشان عنده إمتحان بكره ؟

ولإنني تعلمت من تجاربي الطويلة في الحياة ومن خلال قراءاتي المتعددة إن رجل السياسة المُحنك يعرف متى يُهاجم ومتى يدافع ومتي يلعب بطريقة حسن شحاته .... المهم يوصل لهدفه وتعدي الأمور على خير ..الله يرحمك يا هتلر وكفاحي بقى و الغاية تبرر الوسيلة وميكافيلي وصحبته الحلوه ... هييييه أيام وناس زي الفل مش هاتتعوض وكتاب الله .

فقلتلها : اكيد ملعون ابو الماتشات يحرم عليه نهائي الدوري بتاع 6/1 ... وأدي اللاب توب اهو وممكن أكسره قدامك حتتين بس ما تزعليش نفسك ... البيت محتاجلك ومصلحة الواد ومستقبله فوق الجميع وفوق الأهلي كمان اللي هو أساساً فوق الجميع .... وروحت مزعق على الواد ... يا وادددددددددددد يا عمر ... دور نفسك مكتب يالا وهات المصحف وتعالى يا مولانا ...

وبدأنا : يالله يا شيخ عمر ربنا يفتح عليك ... سخن كده وأضرب لك كوباية ينسون تجلي بها صوتك وإقرأ ما تيسر لك من سورة " الإخلاص " : يقوم الأستاذ بادئها بداية غير مطمئنة بالمرة وقايل – والله العظيم زي ما بأحكي لكم كده - " أعوذ بالله من الشيطان الرجيم المعفن " أنا صُعقت ومسكت نفسي لإني كنت هالطشه ... فقلت له إنت بتستبهل في أمها ... إيه البداية الزبالة دي ؟ حد يقول كده يا عُمر ؟ مش كده حرام عشان ده القرآن يعني كلام ربنا ولازم نحترمه ؟

فيرد البيه ويقول : مش إنت وماما قولتوا لي إن الشيطان هو اللي بيوسوس لنا ويخلينا نعمل الحاجات الوحشة ؟

فقلت له : أينعم يا شيخ عُمر

فقال لي : خلاص يبقى معفن

فقلت له : أيوه يا حبيبي هو معفن وإين صرما كمان ... بس لما نيجي نقرأ قرآن ما يصحش نقول الكلام الوحش ده ونلتزم باللي مكتوب في المُصحف فقط من غير زيادة ولا نقص ولا إفتكاسات من عنديات سيادتك .

كل ده وانا شريط الذكريات عمال يجري قدام عيني زي ما أكون قاعد قدام الشاشة بتاعت أسعار البورصة وعمال أشوف أسعار القطن وهي بتجري زي الفريرة قدامي ورجعت 22 سنة بالتمام والكمال لورا وأنا عندي 14 سنة وتحديداً في سنة تالتة إعدادي وبالتحديد في حصة الدين وأستاذ إبراهيم عمال يشرح لنا أساليب الشيطان في الوسوسة للإنسان وكيف يوقعه في الخطأ ويقوم عيل طايش – 14 سنة وعيل ... ده كان زمان بيفتح بيت من بابه يا عم الحاج ؟ - وقايل : كل ده الشيطان بيعمله ؟ ... تصدق بالله يا أستاذ إن الشيطان ده إبن بوبي ...

ويروح العيال في الفصل واقعين على الأرض من الضحك والأستاذ جاي بكل حنيه ومعاه الخرزانه اللي كلنا عارفينها ومطرقع لي ييجي 5 عصيان على كفوفي عشان قلة الأدب دي ...

فقلت قشطه اللي عملناه في الناس اهو بيطلع على جتتنا بعد ربع قرن يا معلم ... بالرغم طبعاً إن ماحدش يعرف القصة دي أساساً ومش معقول هاقول لعمر ذات مره إن أبوك إتطرقع له زمان يا عمر عشان كذا وكذا

موقف أخر من الماضي تكرر فقعدت إسبوع أضرب أخماس في أسداس لما حصل

- البيه من حوالي شهرين تلاته لقيته جاي يكلمني في موضوع جاد جداً ويقولي : بابا ...

-

- أنا : نعم يا عمر ... قصر وإنجز

- عمر : ممكن لما حد يقولي إسمك إيه أقوله عمر كذا بس وبإختصار ( كذا ده إسم العيله ... العيلة مش إسمها كذا ولكن إسم عيلتنا إلى حد ما مميز ) فبالتالي الأفندي عايز يعمل شورت كت فيلغى إسم أبوه اللي هو أنا وإسم جده اللي هو أبويا اللي يرحمه

فقلت له وأنا أكظم غيظي : ليه يا عمر يا حبيبي بتستعر من إسم أبوك ؟ إشحال إن ما كنش إسمي احمد وده إسم لسه شغال لحد دلوقت وما أتلغاش مع الدفعة اللي الحكومة لغيتها سنة 92 يعني أومال يالا لو كان إسمي توتو ولا سوسو ؟ وبعدين مالو إسم جدو برضوا ؟ ... خلاص أسامينا أنا وجدك بقوا شنطة سفر مش قادر تشيلها ؟

فقال لي : يا عم ما هو اللي بييجي يسألني إسمك إيه ؟ لسه هاقوله عمر احمد كذا كذا كذا كذا ... كتير قوي يا بابا ... وكمان لما أجي اكتب إسمي في الكراسات والكتب بيبقى إسم طويل وكمان الإستيكر مش بياخد الإسم الطويل ده كله ؟

فقلت له : يا سلام ... وعشان أم المصانع بتاعت الإستيكرات بتعمل إستيكر صغير تقوم تدفن اهلي بالحياه وتلغيني ؟ بأقولك يا عمر ... ما تطلع لي شهادة وفاة أحسن وروح إجري على أوراق إعلام الوراثة وهات من الأخر ؟

وقلت الموضوع سكت على كده ... لكن يا سادة لما حضرت معاه أول إجتماع أولياء أمور ... لقيت الأساتذة حتى الاجانب منهم بيندهوا للبيه بإسم العيله فقط ولغوا كل اللي جابونا وكاتبين إسمه كده في الكشوفات والتقارير بتاعتهم ... ولغوا تاريخي وكفاحي ونضالي على مر العصور من أول حرب طرواده إلى حرب خليج نعمه ، والبيه كان معايا فجزيت له على سناني في ما معناه : والله العظيم لما نروح البيت لأوريك يا عُمر وأبسط حاجه هعملها فيك إن هاعلقك مكان النجفة على الأقل نوفر فاتورة الكهربا اللي بتيجي مولعه كل شهر من كتر لعبك عالبلاي ستيشن وفرجتك عالتليفزيون وفتحك وقفلك في الكمبيوتر كل شويه ... أنا اتعب وأخلف وأقف على باب أوضة العمليات بتاعت الولاده والقلق هايكولني زي بتوع الأفلام زمان عشان سيادتك تيجي الدنيا في الأخر تلغي إسمي وتمحيني من على وجه البسيطة !!!! .

وقد كان يا سادة ورجعت بالذاكرة لأكثر من 25 سنة المرة دي بقى لما لقيت ماما جايه تفاتحني في موضوع وتقولي : يا احمد يابني أبوك زعلان ومش راضي يكلمك في موضوع كده إنت عملته ولسه بتعمله ومتضايق منك ؟

قلت لها : خير يا ست الحبايب ...إستني ... الأول ... إذهبي إلى المطبخ وأفتحي دُرج النملية اللي عاليمين ثم احضري سكيناً من السكاكين التلمة وأطعنيني في خدي الأيمن بس ما تقوليليش إن سيد الناس زعلان مني ... ما عاش ولا كان سين سين عشان يزعل الحاج الكبير

فقالت لي : هو ملاحظ إن إنت لما حد بيسألك على إسمك بتروح قايل إسمك إنت وبعدين لازق فيه إسم العيلة وناسي أبوك خالص حتى كراريسك وكُتبك بتعمل نفس الشيء وحتى زمايلك بيندهولك بإسمك بس او إسم العيلة والراجل خلف وربى وصرف وتعب فمن حقه يفرح بإبنه اللي شايل إسمه ، وديك النهار لما راح يسأل عنك أبلة إحتشام – زوجة الفنان الراحل حسن عابدين كانوا جيراننا وهي كانت مُدرستي في إبتدائي – فبيقولها أنا والد احمد ... فقالت له احمد مين ما هم كتير ؟ : فقالها إسمك وإسمه فقالت له ما أعرفوش .. ولما قالها إسم سيادتك وإسم العيله عرفتك وقالت له : لا مؤخذه يا حاج أول مره أعرف إن إسمه احمد كذا كذا كذا ؟

الموقف ده حصل بحذافيره ... فقلت في عقلي الباطن : أشرب يا معلم سين سين اللي كلته بط بط بيطلع عليك وز وز أستلم يا معلم إنفلونزا طيور من اللي قلبك يحبها .

وإلى اللقاء في يوميات اخرى لأب في كي جي ون

[nash]

أنا حاجزة المكان ده للرد بس بعد ما ألطش الموضوع

محدش يقربله

[vipwithyou]

موضوع رائع فعلا يا سين سين

وفعلا ما تفعلة انت وانت صغير يُفعل بك وانت كبير

وتأكيد لكلام الأخت نانو فعلا الأولاد بيلقطوا الكلام وبيسجلوا بالحرف

فخلوا بالكم فعلا فى كلامكم قدام اولادكم

انا لسة ما دخلتش الدنيا الحلوة دى بس كويس كدة اتمرن فيكوا وربنا يستر بقى على ولادى لا يطلعوا عينى زى ما طلعت عين ابويا

أذكر ان طفله لقريبه لى عمرها 3 سنوات كانت تأكل جيلى وطبعاً مش عارفة تاكله لكن عاندة وماسكة المعلقة وبتضعها فى الطبق وهوب ورا ظهرها كانها باسكت بترمى فيه

يعنى ماكانتش بتاكل لكن محدش قدر ياخد منها المعلقة وكانت تعليقها على الكل

( يعنى ما اكلسى يعنى .. ماكبرسى يعنى )

موضوعك رائع فعلا ومضمونه جميل وذات قيمة نتعلم منها جميعاً

تم تعديل 12 فبراير 2008 بواسطة vipwithyou

[نانو]

وبعدين في الليله ديه ....هاتفضلي معلاقانا كده يا ناش ولا ايه ؟؟؟ :blink:

هه :lol:

طيب ميرسي :)

حاجه كده علي الماشي يا س س في فن تربيه العيال الصغيرين

الحكمه الأولي خلي بالكوا من كلامكوا أدام عيالكوا :)

من فتره كان فيه موجه برد شديد جدا و زي كل يوم بنلبس السويتر و الايس كاب فوق لبس المدرسه ...ردت بنتي البكريه رولا (أخت البكري عمر).....في إباء شديد جدا ....انا النهارده مش هالبس يا مامي السويتر :wub: ....ليه يا حبيبتي خير... هو النهارده ايه يا مامي .....صانداي يا حبيبتي ... ردت في لهجه حاده مع هزه في الكتفين وقرف في الشفتين .... يعني يوم الشمس ....وانامش باحب الحر ..باي يا مامي الباص خلاص هايمشي.....

تم تعديل 12 فبراير 2008 بواسطة نانو

[nash]

نانننننننننننو بحذرك ..اي حاجه تخص حكاوي العيال تلاقيني مسنطرة وقاعده وحاجزة اول صف

والنبي ياسي السيد ماتقول أتقلبت شات والله فرحانه بس بنانو..

[أسد]

أنا بقى حالي حال .....

إبني الحيلة .... الحيلة يعني العيل اللي حيلتي ..

إبني الحيلة في سنة أولى .. Grade 1

الحقيقة إننا معذبينه أنا وأمه ... آخدين الموضوع معاه بجد حبتين , ومديينها معاه علام في علام .. وتعليم وتدريب وحاجات كتير ...

بصراحة الواد ما بيوربش .. معندوش فرصة ... وبالرغم من إني باشفق عليه أيما إشفاق إلا أنني معجب بتلك الخطة الجهنمية التي إتفقنا أنا وأمه عليها في إننا نشغل له وقته كله كله .. بدون أن نترك له وقت فاضي لحسن الوقت الفاضي ممكن يشتغلنا إحنا فيه ...

فهو غير المدرسة .. بياخذ كذا كورس .. واحد اسمه UC MAS وده برنامج تعليمي للأطفال لتنمية قدراتهم الذهنية والعقلية وتعليمهم طرق متطورة لإنجاز العمليات الحسابية المعقدة ذهنياً ...

وبيتعلم موسيقى .. وبيتعلم رسم .. وبيتدرب تايكوندو .. وبيحفظ قرآن .. يعني بالعربي كده .. كل يوم يرجع من المدرسة عنده برنامج مركز حتى النوم بما فيه اللعب على البلاي استيشن .. والـ PSP بيلعب بيه في العربية وهو رايح المدرسة وهو راجع من المدرسة ...

طبعاً أنا باعلمه كل الحاجات اللي أنا فشلت في إني أتعلمها وانا صغير .. أو لم تحن لي الفرصة في تعلمها ....

ولكنه لا يفوت أي فرصة في إنه يتنطط علي ... ويتفزلك علي ..

إمبارح باقوله ممكن تديني البتاع ده ألعب دور (قصدي على الـ PSP اللي هو زي البلاي استيشن بص صغير يحمله معه في كل مكان وزمان علشان مابيقدرش يغمض عنيه) .

رد علي الواد بكل عنطزة .. قالي لأ .. دي صعبه عليك ..

ده بخلاف لما ألعب معاه بلاي استيشن ويغلبني كالعادة (بصراحة أنا اللي فاشل في اللعب) ... يتنطط علي آخر تنطيط ويبهدلني وينادي أمه ويقولها على فكره بابا ده مابيعرفش يلعب ..

ومرة قالها .. فيه حد يتجوز واحد مابيعرفش يلعب كده ...

آه ياسي السيد ياخويا .. جيت لي على الوجيعة

[إيزيس]

أولادنا دول مدرسة فن ولعب وهندسة وبدون مقدمات خد عندك

الدرس الأول

لا تكذبي

- ررررررررررررن ده تلفوني

- -ألو

- أيوه مين ( رقم مدرسة بسلامته ابني ولما باشوف الرقم قلبي بيقع في رجليه من الخبرة الطويله مع حضرته تعبان ... كسر رجله......... فتح دماغه وهكذا أحداث مريعة وفظيعة)

- ابن حضرتك بيوزع برشام في المدرسة

- نعم حضرتك يمكن غلطانة ابني في صف ثالث ابتدائي

- أيوة يا فندم هو -------------------

- أيوه هو (عارفين توم وجيري لما واحد يضرب التاني على دماغه ؟ عارفينهم؟ شفتوا العصافير اللي بتلف ؟ أنا شفتهم والله شفتهم )- :wub:

و انتي ازاى الدوا يكون في متناول الأطفال و ------وعي--- و------حرص-----و---متعلمة---------- :) :)

- وخد عندك ربع ساعة من الردح المنفرد من النيرس وأنا قد بلعت لساني ولم أنبس ببنت شفة

مشهد نهار في البيت الأم تنهب الأرض رايحة ........جاية......... رايح......... جاية

:blink:

أنا على أحر من الجمر في انتظار اسم النبي حارسة وأكاد أموت من الهم والغم والغيظ ونفسي أفهم كيف استحال هذا الطفل الجميل الوديع إلى تاجر مخدرات و مالقاش غير المدرسة يروج فيها .... غبي

ورجع الإمبراطور من المدرسة عادي خالص

- عملت إيه النهاردة يا حبيبي

- كويس يا ماما الميس خلت الأولاد يسقفوا لي أنا أكتر واحد جاوبت النهاردة وأحسن واحد سمعت القرآن ( ووجهه يقطر براءة ) :lol:

- شاطر ( ده أنا ) قرآن يا ظالم هتروح فين من عذاب الضمير ده أنا هافترسك بس استنى علي لما تخلص طبقك (دي نفسي الأمارة بالسوء)

- و ما حصلش حاجة تاني يا سمسم

- لأ يا ماما حصل

- اعترف يا جبان (دي نفسي الأمارة بالسوء)

- بس أحمد صاحبي ضيع اللانش بوكس بتاعه

- اللانش بوكس واللا الجرعة يا معتاد الإجرام يا بشاير سجن أبو زعبل (دي نفسي الأمارة بالسوء)

وراح يأكل في هدوء .... كلمة ..........طب كلمة ............. ولا نص كلمة

وبعد الغدا وفي أبعد غرفة عن السلم ( علشان الصوت بيضرب برا)

- وزعت إيه في المدرسة النهاردة يا زفت ؟؟؟ ( و قد سمعها القاصي والداني والراكب والماشي و كل ذات كبد في محيط المدينة وضواحيها وعلى السادة المقيمين خارجها أن يحمدوا ربنا )

- الدوا بتاع القوة يا ماما اللي بتدهولي الصبح ( واقي من حساسية الصدر كان يأخذه لمدة شهرين لأنه كان يعاني من نوبات الحساسية والحمد لله خف ما تخافوش) مش انتي قولتلي بيقوي وكان عندنا ماتش مع صف رابع أخذت خمسة واحدات بس يا ماما عشان أصحابي ( منشطات يعني) عايزين نبقى أقوى منهم يا ماما وانهمرت الدموع صفا صفا

- وأخدوهم

- مهاب بس أخد نص علشان أنا قسمتهم أنصاص علشان يكفي الفريق لكن النيرس شافتنا وأخدت الباقي كله

- وليه ماقلتش الحكاية أول ما رجعت من المدرسة

وزغر لي زغرة أعرف مغزاها وعواقبها جيدا وقال في غيظ

مش انتي العصفورة كل يوم بتقوللك؟؟؟؟بس أنا ما شفتش ولا عصفورة النهاردة في المدرسة مين قاللك يا ماما

وهنا تعلمت الدرس

لا تكذبي

تم تعديل 12 فبراير 2008 بواسطة قرنفل

[ابو محمود]

يا بختكو عنكو عيال صغيرة ياةةةةة

انتو لسة فى كيجى 1 ربنا معاك يا سين سين ومعاك يا ملك الغابة

انا بقى مريت بكل دة بس بصراحة الحمد للة عقبال ماتشوفو ولادكم اللى ف كجى 1 فى ثانوى عام وتحسو بالطيخ طاخ وطرقعة الحلل فى النفوخ وكفاية حرام أى واللة انا سعات بقول لية مانعملش مظاهرات زى كفاية

ونقول كفاية حرام بس أرجع وأقول دى نعمة وبكرة تشوفو فرحتكم بيهم وهما متفوقين أن شاء اللة

رغم مصاريف الدروس والذى منة ؟؟

المهم بعد ما تصرفو عليهم تعليم خالو بالكم البداية بتكون بعد التخرج يعنى جواز والذى منة يامعين

صباحكم عسل

[vipwithyou]

الله عليكم ولادكم كلكم زى العسل ( عارف هتقولوا عسل اسود )

بس ربنا يخليهم لكم ويكونوا بررة بيكم وتشوفوهم فعلا لما يكبروا ويكونوا سعداء ومتفوقين وانت تفرحوا بيهم

[إيزيس]

الدرس الثاني

لا شورتات بعد اليوم

هارجع معاكم لورا ............سنة ...لأ أكتر سنتين.... لا لا لا ورا ورا ..............بس إمسك هاند بريك 7 سنين

اسم النبي حارسه رايح يعمل انترفيو علشان يدخل ك جي وان و طول الليل نحفظ الأسئلة المحتملة والتوقعات المرئية ونعمل بروفات مسجلة

وفي الصباح اللي مش باكر أوي لبست بسلامته زي أي طفل في سنه شورت وتي شيرت وياللا يا بطل

وفتح البطل نافورة الدموع الجاهزة وبدأ بصراخ يقطع أوصال القلب

-إيه يا حبيبي مالك ( دي أنا بحنية و عطف وحب ممزوج بالخوف على مستقبله اللي احتمال يضيع لو ما حضرش الإنترفيو اللي بذلنا كل نفيس في سبيله لأن حضرته سنه أصغر من العادي )

- مفيش حد بيروح المدرسة بالشورت ده لبس اللعب

- لأ يا حبيبي هتروح كده ( دي أنا بكل قوة وحزم ما أنا مش سهلة يعني)

- لأ يا ماما مش كده

- لأ كده

وزغر لي زغرة لم أكن وقتها أعرف مغزاها ولا أدرك عواقبها ولأن راسي أنشف من راس أمه انتصرت عليه ورحنا بالشورت ( هو بس طبعا)

و طول الطريق والولد يضم شفتيه مثل حرف الأو ولا ينبس ببنت شفة وأنا جامدة جدا ولا يهمني :)

و دخلنا على المدير

- إسمك إيه يا بطل ( ده المدير)

-----------------

- معقول ما تعرفش اسمك ؟

- ------------------------

- طب أختك اسمها إيه؟

- ---------------------------

- طب اسم ماما

- ----------------------

- إنت خايف؟

- ------------------------

- مش عايز تتدخل المدرسة ؟

- ----------------------

كلمة.......طب كلمة ...و لا نص كلمة

- رد يا سمسم (دي أنا ) ( رد يا كلب ده مفيش أطول من لسانك والله لادمرك النهاردة ) ( دي نفسي الأمراة بالسوء ) وهنا زغرت له زغرة يعرف مغزاها ويدرك عواقبها

و انفجرت ماسورة الدموع و انطلق لسانه المعقود

- لا باحب المدرسة بس ما باحبش ماما دي وحشة ما بتحبنيش ما حدش يروح مدرسة بالشورت أختي بتلبس بنطلون وصاحبها أيمن كمان.. الأولاد كلها هتضحك علي

ونظرت للمدير نظرة استعطاف واسترحام و توسمت أن يسك الولد وينهي مشكلة الشورت لكن للأسف المدير هدى النفوس

- أيوة عندك حق ليه يا ماما كده ده ولد كبير لازم يلبس بنطلون طويل

و مسح دموعه بحركة سريعة وانتفخت أوداجه وزغر لي زغرة صرت أعرف معناها وأدرك عواقبها ونظر للمدير نظرة إعجاب وامتنان

وتقوقعت أنا على نفسي ولم أنطق ببنت شفة

- ياللا يا بطل سمعنا سورة البلد

- لا دي كبيرة علي دي سورة أختي

- طب حافظ التين والزيتون

- لا أختي حافظاها أقوللك نكتة عليها

انطلق لسانه المجرم بالنكات والضحكات وبين الفينة والأخرى يزغر لي الزغرة إياها والمصيبة إنه حافظ

و بعد أن أبرز كل مواهبه جاء دوري وأقسمت للمدير بأغلظ الإيمان إنه حافظ والله العظيم حافظ

و عدت والحمد لله وقبل بالمدرسة

وأنا طول الطريق أفكر في طريقة مبتكرة للعقاب فأنا لا أحب الضرب لكن تمنيت لو أصفعه قلمين لكن حرام وشه صغير جميل حبيب أمه

ولما وصلنا البيت وانقفل علي أنا وهو باب البيت فإذا به يصرخ

-أنا عارف هتعاقبيني أنا عايز أكلم بابا ويييييييييييييييييييييييييي ( بكاء) :baby:

- أنا مش هاعاقبك بس عايزة أعرف ليه عملت كده

- يا ماما مش قادر أجاوب على الأسئلة الشورت يا ماما وحش ما خلانيش أفهم

ووضع كفه الصغيرة على وجهي وقال

- مفيش ماما تضرب ابنها صح .... بحبك يا ماما الشورت وحش

عايزين تعرفوا عملت إيه

حضنته ونمنا نوم عميييييييييييييييييق

و تعلمت

الشورت وحش....... قصدي كل واحد يلبس اللي يعجبه

تم تعديل 13 فبراير 2008 بواسطة قرنفل

[إيزيس]

إيه ده هو مفيش غيري هنا ... طيب آخد راحتي يعني أحكي لكم ع البكرية

تعلمت من البكرية أول درس يتعلمه الآباء من العيال

امسك لسانك

كانت بنوتتي الحلوة زماااان منذ أكثر عشر سنوات أمورة وكتكوتة وأكبر أصغر فتانة في التاريخ

- نفسي ألعب معاكي لكن ماما قالت عليكي مش نضيفة ( دي بنوتتي بتكلم بنت الجيران )

- :blink: أزيك أنا بحبك أوي كمان ماما وبابا قالوا إنك طيب وشبه الفيل ( دي بنوتتي بتكلم ابن الجيران وهي في حديقة البيت بالإمارات وهو على سطح بيتهم بيفرجها على الارانب يعني فضيحة بالأرانب)

أما الفتنة الكبرى لما كانت واحدة من المعارف تصر أن تناديها عروسة ابني و في يوم من الأيام بعد أن غادرت منزلنا العامر قال أبوها والله يبقى مقلب لو فعلا ده حصل دي عيلة غلسة ولم ننتبه لودان حضرتها اللي مشرعاها ع البحري

و مع أول مقابلة مع تلك الأم و أول ما قالت لها كلمتها المعتادة ( عروسة ابني ) انبرت لها بسلامتها تصحح لها المعلومة بكل ثقة

-لا يا تانت بابا قال لأ علشان انتوا غلسين

و كانت الست من ذوات العقل الغير منفتح وعينك ما تشوف إلا النور

:blink: :blink:

و تعلمنا الدرس

قبل ما تقول كلمة في بيتك بص شمال ويمين و فوق وتحت ووطي صوتك ولو لقيت ودان مرمية هنا واللا هنا ...إقطع النفس

تم تعديل 13 فبراير 2008 بواسطة قرنفل

[aimen]

اللهم احرسهم لكم يارب وما تحرمنا من كلماتكم و حكاياتكم الجميلة دى يارب

[عصام أبوالفتح]

فى برنامج مميز على ال mpc4 اسمه نانى .. وسوبر نانى باتابعه مش بانتظام .. ممتاز جدا

بنتى الكبيرة نسخة مؤنثة منى .. وانا فى منتهى السعادة بكده .. كل الحركات والكلام ولدغة الراء اللى هاتروح منها فى سن السادسة .. ارى نفسى فى الماضى واستمتع استمتاع غير طبيعى بذلك .. تفاجئنى ردودها دائما ومنطقها فى الرد .. ويتطور الحديث بيننا دائما الى افاق تبهرنى وتجعلنى انسى كل ما يحيط بى .. ليلى تمثل جهاز الرقابة فى البيت عند اى اعلان او حدوث اى خرق للقوانين او الاعراف الدولية او المنزلية من كبير او صغير تبادر بالاستنكار وبيان الصح والغلط وتتابع تصحيح الغلط ايضا .. تعلمت ان تصلح اخطائها بنفسها وان تتحمل مسئوليات نجاحها او فشلها فى اى نشاط جاد او لعب .. الصغيرة تقلدها فى كل شئ مع بعض الجينات من مامتها فالشخصية مختلفة .. لكن التعب الحقيقى مع الابن او البنت الاولى بيريح جدا مع باقى العيال .

كلا البنتين يرسمان ببراعة وان كانت مرمر الصغرى أبرع لانها بدأت مبكرا اكثر .. واكثر ما احرص عليه معهما هو حفظ القران وانا ضد تعلم اكثر من لغة فى الصغر وان كنا نخصص بعض الايام لا نتكلم فيها فى البيت الا بالانجليزية لذا يتعلمان بعض المفردات لكن بدون مسح للمخ كما يحدث فى مدارس الانترناشونال .. صحيح مبيفهموش اى حاجة وردود ليلى تكون غاليا يس يس والصغرى كذلك يرددون ترديد الببغاء لكنها حصص لا تخلو من المرح خصوصا اذا وجدت تفاعل اذا فهموا حاجة .

اللهم احفظهم وبارك فيهم واولادكم جميعا

[إيزيس]

يارب بارك فيهم و نشوف عيالهم بيربوهم وينتقموا لنا

[إيزيس]

العيال شافت الموضوع وشكلي داخلة على بهدلة جامدة

الحقوووووووووووووووووووووني

[aimen]

انتوا اللى جبتوه لنفسكم مش عارفين ان كل شئ انكشفن وبان ويا عينى ياعينى على الولد

[إيزيس]

إخواني وأخواتي

هدووووووووووووووء من فضلكم أحب أولا أشكر كل الوفود من محافظات الوجهين القبلي والبحري ومن قاهرة المعز الذين شرفونا كوسيط محايد لحل الأزمة مع

العيال ولاد اللذين اللي عملوا اعتصام في البلكونة والحمام 0000000000000 ولأننا نظام ديمقراطي لايؤمن بالقمع ويؤكد على أحقية كل عيل في التعبير عن

رأيه 00000000000000 إليكم نتيجة المحادثات الساخنة التي امتدت على مدى 14 ساعة

دي البكرية

-_-

وده آخر العنقود

:unsure:

وده أبوهم ساب البيت وطفش

:)

ودي أنا باسجل لحظة الانتصار العظيمة

[Iskandrany]

هاهاههاهااها

أضحك الله سنكم جميعا ......

ما ان بدأت قراءه الموضوع حتي انفلت بالضحك .

ايه ده...........ده مهرجان :angry: :angry: :wub: :angry: wst:: :angry: wst:: :wub: wst::

طبعا انا بضحك لاني لم أتزوج بعد والحمد لله ............ ألطف بينا يا رب

تقبلوا مروري

[حلواني]

اسعدكم الله بابنائكم وجعلهم ابناء صالحين

انا معاكو عندي 3 لليهم من الموقف الكثير الكثير

لكن انا معرفش اكتب باسلوبكم الرائع دا

ومعنديش القدره الادبيه الفذه دي عند الاخ س س والاخت قرنفله

لكن حبيت ابدي اعجابي بالموضوع وبكاتبه والردود عليه

تحياتي للجميع

تم تعديل 15 يونيو 2008 بواسطة حلواني

[ELSHAMY]

ودى واحدة جامدة لسه حاصلة طازة الاسبوع اللى فات:

ابن أختى 4 سنين اسمه هادى (على غبر مسمى) عبقرى فى التعامل مع الكمبيوتر....دايما عينيه نص مفتحة حتى اخواته مسميينه المسطول....المهم صديقنا هادى راح المدرسة عشان يعمل انترفيو لدخول KG1 ودار الحوار الأتى مع المديرة:

المديرة: قل لى بقى ياهادى السمك بيكون فين ؟

هادى: فى البيت

المديرة: لأ يا حبيبى فكر شوية...السمك برضه فى البيت

هادى: أيوه حتى أسألى بابا...... (كانوا قبلها بيوم متغديين سمك.... :)

المديرة وقد أسقط فى يدها: طيب بلاش السمك...الأسد بيعيش فين ؟

هادى: فى السيرك

المديرة: لأ يا هادى أنا قصدى بيته يعنى....انت عارف ان احنا ما نقدرش نعيش مع الحيوانات

هادى: بس أنا شفت الست معاه جوه القفص...(قصده على مروضة الأسود)

....فى النهاية فشل هادى فى الالتحاق ب KG1

....ما تخافوش القصة لم تنتهى...أخدوا ميعاد لأعادة المقابلة تانى يوم..... و سهرت أمه تحفظه طول الليل:

"يعيش السمك فى الماء"..... و "يعيش الأسد فى الغابة"...

والولد أبو عينين نص مغمضة لا يعيرها اهتماما و ساعات يردد بالعكس " يعيش السمك فى الغابة و يعيش الأسد فى الماء"

تانى يوم نفس الأسئلة و ينجح هادى باقتدار....