كتب كتاب سكوربيون ، حشيش وسين سين

[se_ Elsyed]

سكوب : يا س س الله يهديك او يهدك ,,, الناس كده هاتفتكر اني كتبت كتابي بجد وممكن يروحوا يقولوا لحماتي ودي ست ايدها طارشه .وعلى ما أفهمها إن يا طنط الولد س س كان يقصد بكتب الكتاب يعني writing the book يعني تأليف كتاب عن قصصي ومغامراتي انا وهو وحشيش هاكون استويت ولمت عليه الجيران في روما وجنوه وباليرمو والدول المجاورة واللي ما يشتري يتفرج

س س : يا عم ما تخافش اللي في المحاورات دول اهلك وناسك وعمرهم ما هايضروك بالعكس دول لو إنت اتعريت يكسوك واذا جعت يأكلوك واذا عييت يموتوك قصدي يعالجوك

سكوب : طب اتصلت بحشيش عشان يحضر كتب الكتاب قصدي يحضر الجلسة دي عشان نحط الخطوط العريضة بتاعت المشروع اللي هاندرمغ به سوق الثقافة وسور الأزبكية ؟

س س : اتصلت يا سيدي وروحت له البيت مرتين وكل مره الاقيه طالع لي والصابون على ايده او المشابك في بؤه .. الولد ده اتغير من ساعة ما اتجوز يا سكوب

سكوب : اسكت اسكت اهو جاي اهو وشعره منكوش ووشه زي الكوركوم

س س : ايه يابو السباع ... الجواز عمل فيك ايه ؟

حشيش : ايه ؟ مانا زي الفل اهو ووشي رد وقلوظت أهو

سكوب : الولا ده مطلع عليك اوشاعات يا حشيش وبيقول انك بقيت لهلوبه في شغل البيت

حشيش : الشغل مش عيب يا سكوب .. الشغل مش عيب يا سي سين سين

سكوب : عندك حق انا عن نفسي باشتغل في البيت وباغير البامبرز للعيال وساعات باعمل رز بلبن و و

س س : الصلاة عالنبي عالرجالة .. تعالي ياما شوفي

حشيش : مش عايزين تبكيت وادخل في الموضوع عشان عايز اروح بسرعة

سكوب : بص يا سيدي .. بقى انا والاخ سي سي قررنا اننا نحاول تجميع احلى واجدع قصص من بتوعنا ونطرحهم ارضاً في كتاب ونبيع ونقب على وش الدنيا

حشيش : كل كصصي تحت امركم من اول المنتوف لحددددددددددددددددد ام بدوي لكن المطلوب ايه والقسمه هاتبقى ازاي ؟

س س : قسمه من اولها ؟ يا عم خلينا نجمع الكصص بس وادفع لنا حاجه تحت الحساب عشان نبدأ

حشحش : أدفع ؟ هو انا جاي اقبض ولا ادفع ؟ يعني بعد ما أألف واعصر دماغي لحد ما راسي بقت عامله زي اللمونه المعصورة واتوقع اني الم تقولي ادفع ؟

سكوب : خليك من ادفع يا حشحوش دلوقت ... باقولك ايه تقترح اسم الكتاب يكون ايه ؟

حشحش : طبعاً يبقى " المجانين التلاتة "

س س : مجانين ؟!!!!!!!!!!! يا عم ارحمنا احنا لسه بنربي زبون هنجنن الناس من الأول

سكوب : ايه رأيكم في الإسم ذو البعد الثقافي ده .... وهو " ثالوث الادب الساخر الحديث في خضم الرؤيا المُعاصرة لمتغيرات العولمة في زمن الحداثة " ؟

س س : انا مش هاتكلم وال امد إيدي عليك ... ناوله قلم مخبرين يا حشيش ...... يا عم ده مقال مش عنوان ، طب ايه رأيكم في " ثلاثة كُتاب ... بالصدفة "

حشحش : مبدئياً .. حلو ... مونكن اروح بقى ؟

سكوب : استهدى بالله وإهمد شويه احنا لسه ما خلصناش وما تخافش هاتروح قبل الساعة 12 زي سندريلا .... هاع هاع هاع

س س : كان في موضوع محرج كده كنت عايز اكلمك فيه يا سكوب إنت بالذات و و ما ما

حشيش : انت جاي تمأ مأ هنا ؟ وبعدين انا قرطاس لب قاعد عشان محرج من سكوب بس ؟

س س : معليش يا حشيش اصل كنا لازم نبقى على نور من الاول ...

سكوب : ارغي وهات المصيب اللي عندك لإنك طالما مأ مأت كده يبقى فيه مصيبة

س س : بالنسبة يعني لو الكتاب ضرب واسمنا بقى على كل لسان ... مين هايبقى المتحدث الرسمي في برامج التليفزيون العاشرة مساءً وتسعون دقيقة وخلف القضبان ؟

سكوب : احنا التلاتة طبعاً

س س : مش هاينفع طبعاً .. اسمح لي يعني انت مش واجهه

سكوب : نعمُممممممممممممممممممممممم يا عُمممممممممممممممر .. مش واجهة ؟ اومال انا إيه " ناصية "

س س : مش قصدي والله ... بس يرضيك إنت يا حشيش واحد بالبروفيل ده يطلع في الميديا ويتكلم عن الثقافة والتأليف ... مش عيب والله بس لازم الواجهه الإعلامية يكون هانسم وقطقوط زيي كده ؟

حشيش : آه يرضيني !!! عمر الشكل والمنظر ما كان عيب .... المهم الجوهر والمعدن والراجل ده معدنه اصيل .

سكوب : لأ سيبهولي يا حشيش وكتاب الله مانا سايبك يا هانسم ... حوش يالا الحريم اللي بيترموا تحت رجلك وعايزينك توقع لهم على الأوتوجرافات ..... ولا البنات الصغيرة اللي معلقين صورتك في اوضهم ...

يُتبع

[إيزيس]

طالما مفيش اي دار نشر اتصلت إلى الآن وده من دواعي كسوفي لكن والله العظيم و تلاتة بالله العظيم وحياة النبي أنا بعتت إيميلات وقلت فيكم أحلى كلام

ياللا خلينا نعتمد على أنفسنا مستعدين نعمل اكتتاب لطباعة الكتاب

إيه رأيكم

[Scorpion]

قبل ما تكمل يا سي السيد .. انا بقي اصر ان عنوان الكتاب يكون الكلام الكبير اللي فات ده ... هو كان ايه ... مش فاكر بس هو كلام صح ...

استني لما اروح اجيبه من عالرف ... اهه

" ثالوث الادب الساخر الحديث في خضم الرؤيا المُعاصرة لمتغيرات العولمة في زمن الحداثة "

ماله بقي يا هانسم افندي الأسم ده .. ده حتي عنوان يشد الكاريء و يخليه يدفع بمزاج الأربعين ساغ حق الكتاب ...

لما نشوف آخرتها مع العالم دي ...

[رمضان]

لو عاوزين ترزقوا بجد سموه ( حشيش في زمن البقشيش ) او سين سين في زمن المعلمين او سكوربيون في زمن اي حاجة على الموجة دي وصدقوني احلى نفحة هتطلع لكم من ورا الحكاية دي

واقترح تطبعوه في دولة حشيشتان

[se_ Elsyed]

سكوربيون في زمن اي حاجة

سكوربيون ورحلة المليون

سكوربيون .. لزقة شكيرتون

أو

حشيش في زمن التهميش

حشيش ... ورق حائط من غير كرانيش

حشيش ... في زمن اللي يروح ما يجيش

أو

سين سين في زمن التحسين

سين سين تخين مش سمين ... ( تفرق ممكن واحد يكون تخين تُخن عضلات وقوة .. إنما السمين بيبقبى كل دهون وشحوم )

سيبني اكمل بقى يا رمضان وخلينا أركز في المفيد

[واحد تاني]

حشيش ... في الفكاهة هتعيش

سكوب ... روايات مصرية للجيب

س س ... و الضحك المتين

او ممكن تلخص وتخليها ... روايات (سحس) ... س س / حشيش / سكوربيون

زي روايات (عبير) كده

[se_ Elsyed]

روايات (سحس)

يابني سحس ده بتاع الكشري اللي في ميدان العتبة

أركن على جنب يا واحد دلوقت .. وألقف الجزء التاني

-----------

س س : يا سكوب أنا مخرجين كتير بيبيعوا أفلام بصورتي بس ... ويكفي إننا نحطها عالغلاف وهاتشوف البيع هايبقى إزاي .... حتى بُص

سكوب : وكتاب الله دي لو مش خلقت ربنا انا كنت قلت كلام تاني ... لكن مش عايز أرتكب ذنب .... إمشي من قدامي دلوقت يا سين سين بصورتك دي عشان عايز أرجع

حشيش : ( سامحني يارب ) ... هي الصورة حلوه وكل حاجه يا سين سين بس إنت متأكد إننا لو حطينها على صورة الغلاف هانبيع الكتاب ده ؟ ده على اساس إن إحنا هانوزعه رحمه ونور في تُرب الغفير أو هانوزعه في جمعيات النور والامل ونكون طابعينه بطريقة برايل وبالتالي ماحدش هايشوف حاجه ؟ طب ما تخليك إنت لإهداءات صفحة الوفيات ... أو لو الكتاب سقط يبقى نطلعه في ملحق وكده ؟

س س : حتى انت يا ضفدع بتتريقك ؟

حشيش : على الأقل الضفدع له ملامح ومعروف راسه من رجليه ... يا عم ما تخليناش نغلط في خلقة ربنا وسيب لي شوية الحسنات اللي موجودين عندي ... نرجع للمهم

سكوب : لأ مش هانرجع يا حشيش إلا أما البني أدم ده يعتذر لي ويعرف إني راسه براسي ... بيألف أنا بألف احسن منه وفي حاجه ما كانتش عايز أقولها وهي إني كنت بادخل قصصه أهلل واسقف عشان أرفع من روحه المعدنية ... بس هي ..

حشيش :ياخواننا الخلاف من أولها وحش وشكل أم الكتاب ده مش هايشوف النور .... فيستحسن من دلوقت نوزع الأدوار

سكوب : بمعنى ؟

حشيش : بمعنى إني مثلاً أمثلكم في برنامج العاشرة مساءً ... وإنت يا سكوب في تسعين دقيقة

سكوب : يا سلام ؟!!!! وليه سيادتك تطلع إنت مع منى الشاذلي وتصدر لي انا معتز الدمرداش أبو دم تقيل ؟

حشيش : يا عم عيب كده هو أحنا هانطلع نبصبص

سكوب : بصراحة أنا ما بأثقش فيك ، إنت تعملها وأنا عارفك emotion fragile وممكن تدوب من برنامج واحد ...

س س : اللهم صلي عالنبي ... عمالين تحطوا خريطة البرامج وتقسموا وماحدش عبر أهلي وقالي هاطلع فين ؟

سكوب : إنت تطلع فوق السطوح وترمي نفسك من فوق يا عم الهانسم ..

س س : إحترم نفسك بدل ما أتغابا عليك يا سكوب

حشيش : يا جدعان صلوا عالنبي ... بص يا س س سيبلي أفكر لك في برنامج نضيف تكتشف فيه نفسك وغالباً بأرسم لك على برنامج " القصة وما فيها "

س س : نعم يا خويا .. يعني هاطلع مع رولا خرسا ؟ لأ يا عم دي تاكولني .. أنا باخاف منها

حشيش : طب تخليك إنت للراديوم ونجوم إف إم وصوت العرب وكلام من ده ؟

س س : يا سلاممممممم ... يعني تطلعوا إنتوا في التليفزيون والقنوات الفضائية وتعملوا باي باي لاهاليكو وأصحابكو وأنا أطلع بقفايا في الراديو ؟

سكوب : إيه باي باي وقفايا والكلام البيئة ده ... ده منظر مؤلف ده ولا كاتب على باب محكمة حتى ؟

س س : إسم الله عليك يا عم نجيب يا محفوظ ... حوش يالا جوايز نوبل اللي عمال تلمها ؟

سكوب : يابني روح إسأل عني في إيطاليا وقول بس أنا عايز عنوان سكوب و الكاتب الفحل ألبرتو مورافيا ... هاتلاقي الناس تستغرب إسم ألبرتو وكلهم هايدلوك على قهوة الأدباء اللي بأقعد عليها في روما .

س س : شوف النغع بقى .... وكتاب الله تلاقيك تقصد قهوة السواقين ولا قهوة البورصة في روما .... بقى ماحدش هايعرف ألبرتو مورافيا والكل هايستغرب إسمه .. أما سكوب فنار على علم هناك ؟

يُتبع

[أبو محمد]

بص يا س. س ما تزعلش نفسك ..

أم شفيقة اللى عندنا ساكنة جنب الكوافير اللى بيعمل شعر وائل الإبراشى .. إيه رأيك تطلع فى برنامج "الحكيكة" .. وممكن نكلموه يطلَّع معاك (على الكرسى اللى قصادك) سيادة اللوا ده إللى اسمه ضياء الدين المتحدث الرسمى بتاع الحبيب العادلى .. هه .. قلت إيه ؟ إكتراح فى الجون مش كده ؟

[واحد تاني]

أركن على جنب يا واحد دلوقت .. وألقف الجزء التاني

طيب ... شوط اللي بعده يا هانسم :unsure:

على فكرة ممكن انت تطلع مع جويل في برنامج الصراحة احلى

[إيزيس]

إيه يا جماعة شغل الهواة دة

اسمعوا الكلام المهم

أكل العيش يحب إيه

ردوا يا بهوات ما حدش يعمل لي فيها مشرف دلوقتي

يحب إيـــــــــــــــــــــــــــــــه

الخفية

وكل واحد نجم لميع يلزم له مدير أعمال

لزوم الاتفاقات والبرامج واللقاءات

النسبة 70 في المية وده عشان العشرة والصداقة والغربة اللي جمعتنا بدون سابق إنذار

بلاش كوافير وائل الإبراشي شوف كوافيرة تامر حسني عشان اللوك عليه الرك

الكارت بتاعي هيوصلكوا ع الدي اتش اتش

أول حاجة تعملها نرفع قضية

على مين................ مش مهم.. ممكن نرفع قواضي على بعضينا لزوم الشهرة والذي منه

[Scorpion]

أول حاجة تعملها نرفع قضية

على مين................ مش مهم.. ممكن نرفع قواضي على بعضينا لزوم الشهرة والذي منه

والله العظيم انتي حكاية يا قرنفل ...

شايف الأفكار يا هانسم افندي .....

[إيزيس]

طب والله انت اللي تستاهل كل خير وأول قضية ليك انت يا عم سكوب في الخباثة كدة قبل الاثنين التانيين ما يدخلوا أصل انت حاجة تانية ما تعرفش معزتك عندي يا سكوب يا خويا

خد عندك أول قضية

سي السيد يتعدى على سكوب بألفاظ يعاقب عليها القانون في المحاورات... و الشهود عندي البكرية والواد سمسم آخر العنقود ...

... حوش يالا جوايز نوبل اللي عمال تلمها ؟

ده قذف

سكوربيون .. لزقة شكيرتون

وده سب

وربنا هيكرمنا ان شاء الله

[Scorpion]

معلش يا قرنفل هانم ... بس ايه القضايا السكة دي .. و مين اللي حيهتم بيها من اصله ... و بعدين انتي كده بتتعدي علي الحقوق الفكرية لزهيري باشا مهديء النفوس الأوحد ...

اتعبي معانا يا شابة و فكرلنا في قضية من اللي هما ...

يعني مثلآ ...

نرفع دعوي علي مفيد فوزي انه بيسرق الهبش بتاعنا ...

قضية علي ابلة نظيرة و نطالب بتفريقها عن جوزها لأنها سرقت وصفة خلطة المحشي بتاعت حماتي ...

قضية علي المتحف الأنجليزي علشان نسترد دقن ابو الهول اكمننا معذورين في دقن لقصة جاسوسية جديدة .

قضية علي وكالة ناسا عشان عندنا شك ان المخلوقات اللي سرقوا محفظتي كانو مأجرين منهم سفينة فضاء ...

و كده يعني .... احنا حنعلمكم الصنعة .. ده انتم الستات ملوك التلكيك ....

عايزين اعلانات... جرامافونات .. صحافة .. تليفزيون .. دي .في.دي. ... ام بي ثري و فور و فايف .... دم ...

اتلحلحي يا ماما .. ده انتي لسه قايلاها بعضمة لسانك .. الرزق يحب الخفية و اللي يتكسف من بت عمه ما يشتريش منها كتاكيت ... :unsure:

[إيزيس]

نرفع دعوي علي مفيد فوزي انه بيسرق الهبش بتاعنا ...

قضية علي ابلة نظيرة و نطالب بتفريقها عن جوزها لأنها سرقت وصفة خلطة المحشي بتاعت حماتي ...

قضية علي المتحف الأنجليزي علشان نسترد دقن ابو الهول اكمننا معذورين في دقن لقصة جاسوسية جديدة .

قضية علي وكالة ناسا عشان عندنا شك ان المخلوقات اللي سرقوا محفظتي كانو مأجرين منهم سفينة فضاء ...

و كده يعني .... احنا حنعلمكم الصنعة .. ده انتم الستات ملوك التلكيك

كل القضايا دي مالهاش علاقة بالموضوع القضية لازم تكون حراقة يعني اتنين اصحاب ترعرعتوا في نفس المرعرعات و أكلتوا من ذات نفس حلة المحشي بتاعة حماتك

وكانت صداقتهم أقوى من حديد عز ثم00000000000000يلعب الشطان لعبته

ولسة في تحريض على القتل و هنخطف عمر وشويت تحابيش

انت يا سكوب بتبص تحت رجليك معذور يابني مفيش خبرة

شوف الشغل ده

قبل القضية ما يتحكم فيها هتقف انت في المحكمة وهنشحتلك منديل أمينة رزق وفي مشهد يشيب له الصلعان تقف وتقول

مش ممكن لا لا مش ممكن أشوف صاحبي وعشرة عمري في القفص لا لا خدوني بداله

بكاااااااء

يرد عليك من القفص

سامحني يا سكوب الشهرة لعبت بي أنا ماستاهلش عطفك

وتقتحم الزنزانة وتأخذه إلى حنانك و أحضانك الدافئة

تصفيق حاد من المحكمة

القاضي بأة هيحبسكوا انتوا الاتنين لتضييع وقت العدالة

ولما تخشوا السجن بأة أحلى شغل تكتبوه من داخل المحابس بتاعتكوا

والمظاهرات برة تشتغل والبنات تعيط والستات تلطم

جو يا بابا يحرك الإبداع ويقشعر مشاعير البشر

مش أبو الهول و نظيرة

ابعت لي أول شيك.....شغل ده واللا مش شغل هو زناد فكري اللي ولعت فيه ده مش بفلوس

[رمضان]

انا سمعت بالفعل ان الكتاب اترشح لجائزة نوفل

و855656456 جائزة اوسكار