الشرس و الطيب و المنتوف

[أسد]

عملها ....

وعملها هو كمان ...

وعملها معاهم برضه ...

عملوها ...

عملوها الولاد ...

عملوها الأبطال ..

وأخيراً .. ومن ورانا ..

ومن غير ما نعرف .

و خارج اسوار المحاورات ..

سيخرج الي النور خلال أيام قليلة اول كتاب تم تجميع مادته من محاورات المصريين...

بعد غد سيظهر في السوق كتاب " الشرس و الطيب و المنتوف"...

لأعضاء طالما اضحكونا بمواضيعهم الكوميدية ..

سي السيد ...

سكوب ..

حشيش ..

و انا انتهز هذه الفرصة و أتمني لهم كل التوفيق في هذه الخطوة الجميلة .

افرحوا ..

زقططوا ..

هنوهم معايا ...

[shahd]

الف الف مبروووووووووووووووووووك وبالتوفيق دائما ان شاء الله :) :blink:

تم تعديل 31 مارس 2008 بواسطة شهد

[Scorpion]

الف شكر يا اسد علي الموضوع ... و علي الأعلان المجاني ... :)

و شكرآ يا شهد علي تهنئتك الرقيقة ...من بقك لباب السما ...

العملية ابتدت بهزار و بعدين قلبت جد ... و مين عارف

بس علي فكرة الكتاب حيبتدوا يوزعوه بكره ... و حسب ما فهمت حينزل الأول في القاهرة و في الأسكندرية و بعدين المحافظات في الأيام اللي بعدها ...

الف شكر بجد يا اسد :blink:

[Modest]

إيه ده؟ ده بجد؟ :blink:

:happy:

:blink::110::sad:

:sad::110::sad::110:

عايز نسخة بلّوشي و إلا هاطربق الدونيا :)

[Folana]

السلام عليكم ورحمة الله....

الف مبروك ياجماعة.....احنا نهنىء أنفسنا اولا ...ونشعر بالفخر لوجود ثلاثى موهوب بيننا...

وبالفعل من أمتع الموضوعات واللى بتدخل بهجت فى نفسى هى موضوعات

سكوب

سى السيد

حشيش

بأتمنى لكم التوفيق من قلبى....وافتكرونا بحاجة بس ان شالله صفحة الفهرس حتى احنا برضه اللى عملنا لكم الاسم ده ...وكنا من أوائل المشجعين وقمنا بتبنى موهبتكم...

وان شاء الله نقرأ لكم سلسلة أعمال ناجحة....

:blink: :)

[Scorpion]

حبيبي موديست ...

النسخ المجانية التي بحوزتنا تم تقسيمها علي حسب المنطقة ... و حضرتك جغرافيآ تقع في مسئولية سي السيد .. و اللي اول حاجة قالها انه عامل حسابك احسن تاكل وشه في الربع الخالي كله ....

:blink: :)

[أسد]

من زمان واحنا بنستمتع بالقصص الجميلة بتاعة الرجالة دي ...

أخيراً الحلم أصبح حقيقة ...

وحيبقى الكلام ده متاح للكل ..

بكره نفتكر الأيام دي ... ونقول .. الناس دي كانوا بيكتبوا كصصهم في محاورا المصريين ..

قبل مايشتهروا ...

فعلاً ...

البداية هي اللي صعبة ..

لكن بحق .. المعجزات ممكن تتحقق ..

تهنئتي القلبية

[osaimi]

ياريت ينشر عالنت حتي لو ملخص

[Scorpion]

كلالالالالالالالالالا و لااااااااااااااااا

:blink:

باكورة اعمالنا ... البكرية.... ننزلها الصالة تفتح ؟؟؟!!!

قصدي ننزلها النت تتعرض عالكل ...

يا للعاااااار ... يا للشنااااار

فين بتوع حكوك النشر ...

بسسست ...يا استاذ osaimi الكتاب تمنه ما يجيش 3 علب سجاير ... فبلاش تفتح عينين الأعضاء علي موضوع النشر علي الأنترنت ... و حقك محفوظ

يا سي السيد ... اكتب اسم الأستاذ osaimi في لستة الكتب المهداة ....

[Modest]

حبيبي موديست ...

النسخ المجانية التي بحوزتنا تم تقسيمها علي حسب المنطقة ... و حضرتك جغرافيآ تقع في مسئولية سي السيد .. و اللي اول حاجة قالها انه عامل حسابك احسن تاكل وشه في الربع الخالي كله ....

طيب اديني مستني أهو :blink:

ما ينساش الولد ده إني كنت باسهر جنبه طول الليل و هو نازل تأليف تأليف تأليف .. كل شوية أدخل عليه الأوضة ، مرة بينسون و مرة حلبة حصى و مرة بليلة ده غير الكشري و ساندويتشات الحلاوة بالقشطة.

يقوم لما يتشهر ينسى أفضالي عليه :)

[رمضان]

الف مبروك يا جماعة على الكتاب واتمنى لكم توزيع اكبر عدد ممكن من النسخ

وانا دعما لهذا الكتاب سأشتري باذن الله 100 نسخة واوزعهم مجانا على اعضاء المحاورات اللي في الكويت

الجماعة يستاهلوا والله

بس اشتريه منين يا جماعة

[MZohairy]

ممكن تضيفوا فصل في الكتاب من موضوعاتي على تحليل اغاني عبد الوهاب؟

و حشوفكوا بقرشين

[gopy]

[إقتباس(Scorpion @ Mar 31 2008, 01:16 PM)

حبيبي موديست ...

النسخ المجانية التي بحوزتنا تم تقسيمها علي حسب المنطقة ... و حضرتك جغرافيآ تقع في مسئولية سي السيد .. و اللي اول حاجة قالها انه عامل حسابك احسن تاكل وشه في الربع الخالي كله ....

إقتباس

بسسست ...يا استاذ osaimi الكتاب تمنه ما يجيش 3 علب سجاير ... فبلاش تفتح عينين الأعضاء علي موضوع النشر علي الأنترنت ... و حقك محفوظ

يا سي السيد ... اكتب اسم الأستاذ osaimi في لستة الكتب المهداة ....

إحــــم :blink: :)

[nash]

مافيش كلمه تهنئه تفي بالغرض...

حقيقي ...رجال يرفع فيهم الرأس ...ربي يحفظكم واسركم واولادكم....

ألف ألف الف مبروك ....وياااااارب من نجاح إلي نجاح اكبر..

اسكربيون ...سي السيد...حشيش

بالتوفيق إن شاء الله دائما

انا في السعوديه لو حد عنده نسخه زياده..ومش عايزها

[أبو محمد]

الف شكر يا اسد علي الموضوع ... و علي الأعلان المجاني ... :happy:

و شكرآ يا شهد علي تهنئتك الرقيقة ...من بقك لباب السما ...

العملية ابتدت بهزار و بعدين قلبت جد ... و مين عارف

بس علي فكرة الكتاب حيبتدوا يوزعوه بكره ... و حسب ما فهمت حينزل الأول في القاهرة و في الأسكندرية و بعدين المحافظات في الأيام اللي بعدها ...

الف شكر بجد يا اسد :blink:

فى أى مكتبة فى اسكندرية يا سكوب علشان أجند كل شباب العيلة يلموا النسخ اللى حتنزل ؟ أنا متوقع إن فى خلال شهر حيبقى فيه أزمة ولا أزمة العيش ..

ألف مبروك يا سكوب .. ألف مبروك يا سى السيد .. ألف مبروك للغائب الحاضر حشيش :)

[se_ Elsyed]

والله ما عارف أقول إيه

لكن أسد حرق المفاجأة

فكان لابد لنا ان نتحدث ..

في الواكع وفي الحكيكة إن العملية هوايه مش أكتر

لكن أنا مهما كبرت صغير .. ومهما عليت مش فوق .. وإن كبرت على كل الناس وأشتريت الشبح ولبست بدلة وكرافته ومشيت بعربيتي الفور باي فور في الشوارع المليئة بمياة الأمطار وروحت دايس بنيزم جامد ومطرطش على كل الناس .. فعمري ما هاطرطش عليكو

لإنكم كنتم اول ناس إتبنتونا وشجعتونا .. تونا تونا ...

حتى قصصنا كنا بنكتبها لكم .. وبصراحة إحنا إتعلمنا فيكم وياما إستحملتوا قرفنا وتُقل دمنا .. لحد ما الكتاب خرج للنور ...

بس وكتاب الله اللي ما هايشتري الكتاب ويشجعنا ... انا هازعل منه .... ده بخمستاشر جيني .. على رأي سكوربيون .. ثمن 3 علب سجاير كليوباترا من غير مشط كبريت كمان .. واللي ما بيشربش سيجاير .. يبقى بثمن شريط لمحمد حماقي ...

وبإذن الله انا نازل مصر في شهر 8 .. ومعايا مجموعة نُسخ .. وهاكون في مكتبة مدبولي اللي في وسط البلد ... واللي عايز نُسخة موقعة ( صينيه يعني ) أنا تحت أمره ... بس دي بمية جيني ... آه لإن بعد ما أموت الناس هاتموت بعضها ويقولوا : ده أنا عندي نُسخه صينيه من الكاتب الفذ سين سين وينزلوا الكتاب بقى على موقع e-buy دوت كوم

--------------

سكوب .. إنت عمال تزحلق لي الزباين المجانية وقاعد إنت في الناشف وبتنفجر من جيب غيرك ؟

مانت عارف إن البشر كلها جنبي في السعودية .. أينعم هما أصحابي وحبيابي .. لكنهم كتير قوووووووووووي

حراممممممممممممممممم

ولا عشان مانت قاعد في إيطاليا لوحدك زي كوز الدره الناشف وما فيش حتى عضو موقوف عضويته تديله نسخة هدية ؟ وكتاب الله ده ظُلم ...

لكن برضوا دول حبايبي ... والنسخة عشان خاطرهم بخمستاشر ريال من مكتبة جرير بإذن الله عن قريب ..

هو في حد هنا من البحرين جنب حشيش ؟

ده كتاب عابر للقارات .... البحرين السعودية إيطاليا البلد .. مصر ..

مشكر لكم مره أخرى واللي عايز يبعت مُداخلة او تهنئة أو صورة متوقعه مني وأنا بأبتسم وبأولع الغليون ... يبقى يكلم طقم السكرتارية وياخد ميعاد ....

حكيكي الواحد مش عارف يروح فين من المعجبين .. لا بقيت اقدر أنزل أشتري طعمية من جاد زي الأول ..

ولا بقيت قادر أتمشى عالكورنيش وأكل ترمس ودره وأركب فلوكه في عباس العقاد زي زمان ..

صحيح هي دي ضريبة المبيعات .. قصدي ضريبة الشهرة ...

أخوكم الكاتب الكبير ... س س

صاحب سلسة كُتب ( الطيب وزالشرس والمنتوف )

طبعاً من عنوان الكتاب واضح إني أنا الطيب

[واحد تاني]

بجد بجد أول خبر جميل اسمعه من فتره

ربنا يوفقكم يارب ... الف الف مبروك لكم انتم الثلاثة :)

على فكرة انا في داخل النطاق الجغرافي لاتنين منكم يعني عايز نسختين ... بس شرط يكون عليهم اهداء وتوقيع :blink:

[أسد]

حكاية النسخ المجانية دي بصراحة ماتنفعش

الناس صارفة على الموضوع ده من جيبها ... وبعدين لازم نشجعهم ونشتري الكتب .. مش ناخدها هدايا .

علشان لو الكتب فعلاً اتباعت .. وده بيظهر من بيانات وحسابات شركة التوزيع اللي بتعمل ده .. لأنه صحيح الناس انتجت الكتاب وطبعته على حسابهم الخاص لكن اللي بيوزع الكتاب طبعاً شركة توزيع كبيرة .. على ما اذكر الأهرام ..

وطبعاص لما يحبوا ينشروا كتاب تاني أو يطبعوا الطبعة الثانية .. المفروض يروحوا لناشر .. وزي ماانتم عارفين الناشر مش حيوافق بالساهل .. وحيفضل يبيع ويشرتي فيهم .. وزي ماانتم عارفين سي السيد خلقه ضيق .. حيروح مطلع له الورق والإثباتات ان الكتاب بيتباع كويس .. ويوريه تقرير التوزيع بتاع الأهرام ..

علشان كده .. احنا هنا لازم نتكاتف .. وبجد .. وبحق وحقيقي .. ونقف جنب الرجالة دي . ونشتري الكتب ..حتى نؤكد على ان الكتاب بيتوزع كويس ..

المحبة .. والأخوة حتبان وحتظهر دلوقت

مرة تانية ..

مش عارف أقول ايه ..

انا فعلاً مبسوط من الحكاية دي

[عصام]

ايه دا؟

طب وانا؟

مسئول الاتصالات والتظابيط مع دور النشر فى مصر؟

تصدقوا بالله انى غلطان من البداية

خسارة الوقت والمجهود ومكالمات النوبايل

مافيش أى تنويه ..

[osaimi]

ماليش دعوه ... مستني النسخه ... دا سكوب وعدني