سواقتك عاملة إيه يا هندزه ؟

[se_ Elsyed]

سبب كتابتي لهذا الموضوع هو إن اخويا الصغير لقيته راجع من عُمره وكان رايح بعربيته هو وزمايله الطايشين اللي زيه ..

فلقيته بيقولي : بارك لي يا آبيه أنا عملت رقم قياسي النهاردة

فقلت له : ليه ؟ أخترعت أبرة بابور جديدة بتشتغل بالمانفله ؟

قال : لأ طبعاً

قلت له : طب إبتكرت سلك مواعين ما بيحتاجش لفيري قاهر الدهون ؟

قال : سلك بوابير إيه وأبر مواعين إيه ؟ إيه التهييس ده يا آبية ...

قلت : اومال عملت إيه يا فالح .. فرحني ؟

قال : جيت من مكه أنا وزمايلي ( حوالي 1000 كم من مكه للرياض ) في 4ساعات ونصف بالتمام والكمال وكنا ماشيين على 240

قلت : زغرطي ياما وبلي الشربات .... المفروض أنا اعمل إيه دلوقت ؟ أتحزم وأرقص عشان اخويا مجنون ؟ ولا أبقى مستني جنب التليفون عشان أسمع خبر إستلام جثتك من مشرحة زينهم ؟

قال : إيه يا عم مانت كنت بتاخد المشوار ده في 7 ساعات

قلت : يابني ده كان ايام الطيش .. وأقسم بالله دلوقت لما بأفتكر أنا كنت باعمل إيه زمان .. نفسي بتغم عليه .. وبأبقى عايز أضرب نفسي 100 قفا على سهوا ...

لكن الحمد لله دلوقت يا جماعة تحت أي ظروف لا أسير أكثر من 140 كم / ساعة ... لإن العُمر مش بعزقه وكمان طولها زي عرضها والواحد لما يمشي بخطوات ثابتة يوصل أسرع من واحد متهور ممكن يصل بهذه الطريقة إلى قبره ...

حكيت لكم على واحد رئيس مجلس إدارة أحد الشركات هنا في السعودية متخصصة في الموبيلات إتوفى في حادث سيارة من عامين تقريباً وهي شركة " الحداد " الراجل من كثر السرعة تكاد تكون جثته إختفت بعد الحادث لإن البيه كان راكب بي إم دبليو أخر موديل ومسافر داخل المملكة على 240 كم/ساعة .... ولا الطيارة ... فطبعاً العربية إختفت معالمها تماماً وهو كان بداخلها فإتفتفت حتت ..

ربنا يعافينا جميعاً

المهم سواقتك عامله إيه يا هندزه ؟

[رمضان]

موضوع مهم جدا يا سي السيد بتاع السرعة ده

اولا ربنا يحفظنا جميعا باذن سبحانه وتعالى

انا كنت في الاول بسوق بجنون واحيانا بعمل حركات اقل ما يقال عنها غبية

وفي يوم وانا مروح شفت حادث مروع عبارة عن سيارة فيها اربع شباب وكانوا ماشيين بسرعة وعدوا من جنبي وعملوا حادثة الطريق كان عبارة عن قطع ادمية وشلال دم

فضلت بعد الحادثة لمدة اسبوع امشي على سرعة 80 لـ 100 ودلوقتي مش بعدي 120 وبقيت بكره السواقة جدا وبخاف جدا من الطريق

[se_ Elsyed]

للاسف يا رمضان دي غفلة أو غلطة يقع فيها ناس كتير

يعني ما يفوقش إلا أما تحصل مصيبة أو يشوف مصيبة قدامه ..

طب ليه ما نستخدمش مخنا من الأول بدون كوارث ؟

[badroora]

يعنى اقولك ايه بس يا س س :blink:

يعنى لاقيت موضوع سواقتك عاملة ايه ياهندزة وس س اللى كتبته قولت ادخل اضحك شوية تلاقيه موضوع دمه خفيف

الاقيه كدا :sad: المفروض تعملونا باب الاحزان ونحط فيهم المواضيع اللى زى كدا . :wub:

نرجع بقي لموضوع السواقة

بليز اولا خلى اخوك ياخد باله ولا يتهور 240 كتير اوى الحمدلله ان ربنا سترها معاه.

انا بقي للاسف مبتعلمش من اخطائي ودا اللى مزعلنى من نفسي وعملى اكتئاب بقالى اسبوعين .

فى بداية سواقتى كنت محافظة جدا ,حزام امان , ترك مسافة مناسبة بينى وبين اللى قدام ,احترم اللى ورايا عند تخير المسار

مكسرش على حد ,احترم الايشارة , غصب عنى لو العربية طبعا مش باحس بها لما السرعه تزيد عن 120 اول ماسامع

الالارم بسرعة اهدي وارجع لل 100كمم. للاسف هذا الحال لن يدوم كثيرا .

بعد ما تمكن وخلاص حسيت ان السواقة كانها جيم ومن اللى يكسب , كسر ايشارات ماعدا ام كاميرا بس اللى احترمها

عملت بلوك للالارم عشان لما ازيد عن ال120 ميصدعنيش :ninja:

تغير مسارات دون مبالاه مين اللى ورايا وعامل حسابة ولا لاء

تهور واستتهترار لدرجة غير ممكنه على الرغم انى انا تعتبت فى عربيتى محدش جيبهالى ولا ابويا مقدمهالى هدية مثلا

ومع ذلك كنت مستهترة

ايه النتيجة عربيتى جديدة لانج فى 3 سنوات عملت فقط 36000 كمم وخسرتها ويا دوب اللى طلعت بها منه سددت البنك

ودفعت مقدم عربية جديدة وبعد ماكنت خلاص قربت اخلص عربيتى وارتاح رجعت للاول من تانى

بسبب الطيش والاهمال ......

يعنى دلوقتى لسه معنديش سيارة واتعقدت لا عاوزة اسوق ولا عاوزة حتى اقعد مع حد بيسوق .....

العربية الجديدة هاستملها ان شاء الله على اول الاسبوع الجاي ومعنديش اى حماس ولا فرحة ولا اى شيء .

والله لولا بس ان هنا مش زي مصر ومايصير الحياة بدون سيارة لا كنت سوقت ولا عاوزة اسوق .

سورى قلبت موضوعك غم بس هو قلب على المواجع ,عماله اتناسى والعب واضحك عشان انسي لكن موضوعك وجهنى

بنفسي واللى عملته .

والله مافيش احسن ان الواحد يسوق على مهله ويسيب اللى يعدي يعدي اللى يكسر عليه يكسر

ومهما يكون الشارع فاضي يلتزم بالسرعة المحددة لمصحلته هو مش لمصحة المرور زى ماكنت فاهمة ان طالما

مافيش مرور يبقي انا حرة اعمل اللى عوزاه ,..

وايه النتيجة خسارة طبعا ......بس الحمدلله ان ربنا بيسترها والخسارة بتكون فى الفلوس بس مش فى الصحة .

بليز خالى بالك اوى من اخوك ومش تخليه يسوق فوق ال100 حتى ولو شوارع السعودية زى ما بنسمع فاضية وواسعة وتساعد ع السرعة .

سورى ع الاطالة

الموضوع دا المفروض يكون فى المواضيع جادة لانه مهم فعلا والمفروض الناس تستفيد من اخطاء الاخرين

تم تعديل 22 أبريل 2008 بواسطة Badria Mekkawy

[أسد]

فيه شاب مصري صعيدي .. يرعى لي حديقة منزلي .. ويرعى حدائق جيراني في المجمع الذي أعيش فيه ..

شاب جميل جداً .. عمره في العشرينيات ..

نشيط .. ومخلص .. ومهذب للغاية .

يوم الجمعة الماضي عمل حادثة كبيرة .. ..

وتوفاه الله ..

والسبب أنه كان يقود السيارة بسرعة كبيرة ..

للأسف الشديد ..

السرعة قاتلة ..

هذه حقيقة ..

ليست المهارة أن تقود السيارة بسرعة كبيرة ..

ولكن المهارة أن تقود سيارتك جيداً .. وتصل سالماً ..

[deemuck]

حمد على سلامة اخوك يا س س

ان جيت للحق خط الرياض- مكة خط طويل وممل ، ولو سوقت في النهار ومسكت الحارة اللي في المنتصف مع قلة عدد السيارات وقلة امن الطرق هتشعر انك مالك الخط. لو سوقت على 100 هتعشر حقيقي اكنك ماشي على رجلك

الطريق حقيقي مغري جدا عكس الطرق المزدحمة مثل جدة - مكة مع كثرة امن الطرق فالسائق مجبرعلى القيادة بسرعات مقبولة.

خط الرياض – مكة ...... مكة – المدينة تقريبا بسوق وبتجنب الفرملة الفجائية الالية عند 180 ك

[هيثم نافع]

أنا آخري 100كم يا باشا و نادرا 120 كم على الطرق السريعة

دا داخل مصر طبعا

و أعتقد أن 120كم داخل مصر تساوي كام بالعملة الخارجية

متهيالي تساوي كتيير

معتقدش انها تقل عن 200 كم في أوروبا و الدول المتقدمة

[مصري أصيل]

أحنا هنا عندنا كاميرات و آخر سرعة مفترضة 120 ك بس طبعاً في الأماكن اللي ما فيهاش كاميرات ممكن أوصل 140 ك ده أخري بس أنا مشكلتي مش في السرعة أنا مشكلتي الحقيقية جداً واللي مش لاقيلها حل أني بأغفل و أنا بسوق و دي بتسببلي مشاكل كتير جداً ولحد دلوقتي ربنا ساترها معايا .

لو حد عنده حل للمشكله دي يعرفني مشكوراً .. أنا سمعت أن فيه جهاز بينبه السائق لو غفل بس هل هوه عملي أو ممكن ألاقيه فين مش عارف؟

[nash]

ان جيت للحق خط الرياض- مكة خط طويل وممل ، ولو سوقت في النهار ومسكت الحارة اللي في المنتصف مع قلة عدد السيارات وقلة امن الطرق هتشعر انك مالك الخط. لو سوقت على 100 هتعشر حقيقي اكنك ماشي على رجلك

بالفعل الطريق ممل وطويل..وطبعا يغري بالسرعه العاليه لإنه رائع...المشكله للاسف في اي ظرف طارق...مثل إنفجار أطار السيارة ..او غيرة...السيطرة هاتكون صعبه جدا ...في هذه الحاله

السواقه ليس لها كبير....والمشكله أن الجميع يتصور ان الحوادث المؤسفه لن تقع له...It’s never happend to me

[Handasah]

لا يا هندزة انا بقى بسوق براحتى وبمزززززززززززززززززاج :sad: :wub: ياعنى معديش ال 120 خالص حتى لو الدنيا كلها بتتسايق جانبى لا ياعم العمر مش بعزقة :ninja: :blink:

[حلواني]

اولا ربنا يسلمكو كلكو من شر الحوادث وشر الطريق

طبعا اللي عمله اخو س س دا ضرب من الجنون انا لا اتخيل هذه السرعه ابدا دا يعتبر نوع من الانتحار وإلقاء النفس في التهلكه

الالتزام بالسرعه المعقوله مش بيضمن لك السلامه بالكامل لان الطرق عليها مجانين كتير لكن علي الافل مش بتكون انت السبب في المشكله

انا شخصيا اول ما سرعتي تزيد عن 120 ترمومتر القلك يجيلي ويفكرني بكل ماهو متوقع او غير متوقع من من حوادث وتلاقي رجلي خفت لوحدها من علي البزين

وكمان معايا عربيه لو سرعتها عدت 140 تعملك فضيحه وصداع من كتر الاصوات اللي بتسمعها والشلل الرعاش اللي بيصبها

اخيرا اتمني السلامه للجميع

[om marawan]

ربنا يسلمكم جميعا من شر الطريق يارب

وحمد لله على سلامة اخو حضرتك

بجد الموضوع فعلا مهم جدا جدا

احنا هنا فى الكويت تقريبا يوميا او على الاقل مرة فى الاسبوع فيه حادثة على الطريق

وطبعا معروف ان فى مصر عدد الناس اللى بتكون ضحايا الحوادث زاد عن عدد ضحايا الحرب

النهارده لفت نظرى برضه فى برنامج لواد اسمه دكتور فيل بيتكلم مع شباب مدمنين سباق سيارات

و استضاف اخو واحدة راحت ضحية حادثة وطبعا جايب صور لشكل عربيتها وهى مهشمة والكرسى بتاعها لأنه كرسى بعجل ( للاحتياجات الخاصة )

ومستضيف الشاب المتسبب فى الحادث

بصراحة كان برنامج يهز جدا وفى نهاية الحلقة الشاب اللى كان بيقول ان عربيته اول ماتتصلح هيرجع تانى للسباق

قال انه عمره ماهيعمل كده تانى

مشكلة السرعة انها بتهدد حياة ناس تانية مش بس حياتنا

وزمان كان لينا زميلة ماتت فى حادثة كان زوجها اللى سايق وهم بيشتروا اخر قطع الاثاث استعدادا للزفاف

انا من زمان سواقتى مش سريع لكن كمان بعد ما بقا عندى أطفال بقيت اهدى ورجلى ماتعرفش تجيب اكتر من 100 على طرق مصر

وبالكتير اوى لما رحنا مطروح والطريق كان فااااضى زودتها ل120 بالعافية

أما على طرق الكويت السريعة كمان ف 90 او 100 حلو اوى وبجد الزيادة مش هتفرق ابداااااااا فى الوقت

أستاذى الفاضل مصرى أصيل

الحل الوحيد لموضوع النوم ان حضرتك تركن وتنام .... بجد والله .. ..... ربنا يسلم طريقك يارب

تم تعديل 22 أبريل 2008 بواسطة om marawan

[AMEIR]

انا عن نفسي داخل البلد 60 كيلو اما خارج البلد على الطرق السيرعة 100 او 120كيلو بالساعة

[deemuck]

لو حد عنده حل للمشكله دي يعرفني مشكوراً .. أنا سمعت أن فيه جهاز بينبه السائق لو غفل بس هل هوه عملي أو ممكن ألاقيه فين مش عارف؟

حاول تقف وتركن وخد قسط من الراحة مش شرط النوم.

احتمال تكون المشكلة عندك ليس التعب أو الارهاق ولكن النوم اثناء القيادة. ممكن اقترح عليك عدم توفير جو يساعد على النوم. طفي مكيف العربية وافتح الشبابيك..أو بدل جهاز الانذار ممكن تستخدم شريط كاسيت يصدر اصوات عاليا او ضجيجا كل 5 دقائق مثلا.

[badroora]

أحنا هنا عندنا كاميرات و آخر سرعة مفترضة 120 ك بس طبعاً في الأماكن اللي ما فيهاش كاميرات ممكن أوصل 140 ك ده أخري بس أنا مشكلتي مش في السرعة أنا مشكلتي الحقيقية جداً واللي مش لاقيلها حل أني بأغفل و أنا بسوق و دي بتسببلي مشاكل كتير جداً ولحد دلوقتي ربنا ساترها معايا .

لو حد عنده حل للمشكله دي يعرفني مشكوراً .. أنا سمعت أن فيه جهاز بينبه السائق لو غفل بس هل هوه عملي أو ممكن ألاقيه فين مش عارف؟

سلام عليكم

استاذ مصري اصيل

الموضوع دا خطير جدا وخصوصا اثناء القيادة.

كنت بس عاوزة اسأل حضرتك سؤال هل النوم اثناء القيادة فقط ام احيانا وانت بتتكلم مع حد فجاءه تغفل لدقائق ؟

لو الغفلة اثناء القيادة بس

حاول تعمل دوشة زى ما الاخ ديم مق اقترح .

وعند السياقة لمسافات طويلة خالى دايما حد معاك تتكلم معاه .ويسليك وخليك فى الحارة اليمين ولا تسرع .

هاقولك حاجة بس بليز لا تنخض مش قصدي اقلقك

من اسبوعين اخت صديقتى نامت فى ايشارة الايشارة دى كبيرة اوى على تقاطع

وبنتها كانت جنبها فبتصحيها عشان تصحصح راحت دايسة بنزين بدون ماتشعر ولبسه فى عربيتين

الحمدلله ان ربنا سترها وهى وبنتها شقوا العربية عشان يطلعوهم بس طلعوهم سالمين الحمدلله

بليز خد بالك وقولى لو مشكلة النوم دي بتجيلك اثناء القيادة فقط ولا لاء

وربنا يعافيك ويعافينا ان شاء الله

[مصري أصيل]

أحنا هنا عندنا كاميرات و آخر سرعة مفترضة 120 ك بس طبعاً في الأماكن اللي ما فيهاش كاميرات ممكن أوصل 140 ك ده أخري بس أنا مشكلتي مش في السرعة أنا مشكلتي الحقيقية جداً واللي مش لاقيلها حل أني بأغفل و أنا بسوق و دي بتسببلي مشاكل كتير جداً ولحد دلوقتي ربنا ساترها معايا .

لو حد عنده حل للمشكله دي يعرفني مشكوراً .. أنا سمعت أن فيه جهاز بينبه السائق لو غفل بس هل هوه عملي أو ممكن ألاقيه فين مش عارف؟

سلام عليكم

استاذ مصري اصيل

الموضوع دا خطير جدا وخصوصا اثناء القيادة.

كنت بس عاوزة اسأل حضرتك سؤال هل النوم اثناء القيادة فقط ام احيانا وانت بتتكلم مع حد فجاءه تغفل لدقائق ؟

لو الغفلة اثناء القيادة بس

حاول تعمل دوشة زى ما الاخ ديم مق اقترح .

وعند السياقة لمسافات طويلة خالى دايما حد معاك تتكلم معاه .ويسليك وخليك فى الحارة اليمين ولا تسرع .

هاقولك حاجة بس بليز لا تنخض مش قصدي اقلقك

من اسبوعين اخت صديقتى نامت فى ايشارة الايشارة دى كبيرة اوى على تقاطع

وبنتها كانت جنبها فبتصحيها عشان تصحصح راحت دايسة بنزين بدون ماتشعر ولبسه فى عربيتين

الحمدلله ان ربنا سترها وهى وبنتها شقوا العربية عشان يطلعوهم بس طلعوهم سالمين الحمدلله

بليز خد بالك وقولى لو مشكلة النوم دي بتجيلك اثناء القيادة فقط ولا لاء

وربنا يعافيك ويعافينا ان شاء الله

أنا أسف أن خرجت بره الموضوع

الأخت أم مروان الأستاذ deemuck الف شكر علي الأهتمام و ربنا يسترها معانا جميعاً

الأخت بدرية المحترمة

لأ أنا بنام و أنا سايق وخصوصاً في المسافات البعيده و ده لما ما بكونش واخد كفايتي في النوم لأن أنا بطبيعتي وحتي قبل ما أتعلم أسوق كنت أي مواصلة حتي لو قصيرة أنام فيها أما أني أكون بكلم حد و أنام دي لأ . هيه حركة العربيه بتخليني أنام .

أما موضوع أن أخلي معايا حد في العربيه في المسافات الطويله ده صعب جداً لأنها كلها بتكون مشاوير شغل وصعب التحكم فيها .

أنا بروح مشوار أعتيادي كل كام يوم علي حدود البلد و بقالي مرتين بأحس أن النوم غلبني تماماً . فا بركن العربيه و أنام حتي لو ربع ساعه بعدها بفوق و أبقي تمام بس المشكله أني ما أقدرش أعمل كده علي طول لأن أحيانا بكون مستعجل .

في مره كنت سايق و ما كانش جانبي أي حاجه . فجأه لقيتني ماشي في وسط رتل دبابات يميني وشمالي و أنا في النص أيام حرب العراق وحاجات كتير مشابهه زي كده بس دي كانت أغربها.

لو عندك علاج قوليلي عليه و انا أخده فوراً ربنا ما ينيمكيش في عربيات.

[se_ Elsyed]

تخيلوا بقى ان على العكس تماماً من السرعة الزائدة ... البطأ القاتل

من سنتين تلاته كده قررت العيلة نروح نقضي يوم في الاسماعيلية ... طب احنا ييجي 10 انفار غير العيال ييجي 8 او 9

وماننفعش ناخد عربياتنا ونمشي في موكب رئاسي وممكن نتوه من بعض

فحمايا اجر ميكروباص وكان موديل السنة

فالمهم اتخانقنا مع السواق لسبب ما اهمه ان كان وشه عكر وطماع

فحب يعاقبنا ورجع بينا من الاسماعيلية على سرعة

60

انا شخصياً كان قرب يجيلي تيبُس انكشاري و شلل رعاش وكنت حاسس اني لو نزلت خدتها مشي هاوصل اسرع منه

----------

زميل سوداني معانا في العمل كان منقول من جده للرياض ومعه سيارة قديمة جداً جداً شاريها بـ 1500 ريال ... بجد

فمن حقه عالشركة انه يشحن سيارته وياخد التكاليف وهو ييجي طيران

لكنه فضل ييجي بسيارته ما اعرفش ليه

انا ماصدقتش الا لما دردشت معاه وعرفت انه اخد الالف كيلو من جده للرياض على سرعة قصوى لا تزيد عن

40 كم / ساعة

ايوه والله

لدرجة وهو بيحكي لي كنت متخيل عم ايوب بتاع مسرحية الجوكر اللي وهو رايح مشوار بيطلعه قبلها بيومين تلاتة

شوفتوا الجبروت ؟

1000 ك على سرعة 40 ؟!!!!!

جببببببببببببببببببببار ... في قسوته جبار

[vipwithyou]

بعد ازنك يا سي السيد طبعا ً

الأول يا اخ مصرى اصيل وحياة اغلى حاجة عندك تخلى بالك وانت سايق علشان بلاش انت لا اسرتك ربنا يخليك ليهم

المهم أكيد العربية بيكون فيها تكييف وأعتقد دة بيكون سبب فى النوم حاول تضغط على نفسك وما تشغلش التكييف وانت سايق

لأن لما تكون حران ومتدايق مش هتنام وانا عندك ان دمك يتحرق من الحر أهون ما تنام وانت سايق

واستحمل مش مشكلة دا الحل المؤقت اللى انا شايفة غير انك تحاول تنظم مواعيد نومك الطبيعية وكمان القيلوله وحاول تدى نفسك 8 ساعات فى اليوم نوم

اما عن السرعة يا سي السيد اولا حمدالله بسلامة اخوك

بس بينى وبينك العربية لو حلوة كامرى مثلا والطريق زى طريق مكة أعتقد محدش هيقدر يقاوم وهتلاقى العربية بتسحب لوحدها

أنا عن نفسة كنت متهور جدا ً حتى داخل المدينة بس ربنا كان ساترها والحمد لله

لغاية لما واحد قصدنى اروح اشد عربيتة وكانت غلطة طبعا ً بس بدل ما نجيب عربية تسحب عربية صاحبى قلنا نروح ونجيبها وخلاص

ورحت يا سيدى وربطت عربيتى بعربيته وكان فى مسافة بين العربيتين حوالى 2 متر للجنزير اللى ربطنا بيه

كويس ..

لا مش كويس ..

جينا يا سيدى نعدى تقاطع طريق

انا طبعا ً قدام بصيت شمال الاول مفيش عربيات

بصيت يمين الطريق فاضى كويس

يلا يا عم تامر شد وهوب عدينا وفى نص الطريق الراجل اللى انا ساحبه شاف عربية بعيد جاية من اليمين

عمل ايه هو بقى

راح مفرمل

وأخوك فى نصف الطريق التقاطع وهوب والله حاجة تابعة للجيش راحة خابطة عربيتى من اليمين لكن الحمد لله النصف الخلفى هو اللى اتأثر بس

ومن يومها

وأخوك بقى بيسوق بالهداوة وآخرى 140 بس دا لو كنت ماشى على الطريق بعد الفجر والجو جميل ومفيش عربيات

بس يا مهندز

[قديم]

عن موضوع السرعــه

حكمـه جميله جدا

ان تصل متأخــر افضل من ان لا تصــل

تم تعديل 23 أبريل 2008 بواسطة قديم

[badroora]

سورى يا س س خروجنا عن الموضوع فى عب الموضوع نفسه ....... :)

الاخ العزيز مصري اصيل ..

انا ليه سالتك عن النوم لان فى مرض اسمة ناركلوبسي (Narcolepsy) بيخلى الانسان وهو بيتكلم وهو بيسوق وهو بيعمل اى حاجة ينام فجاءه بدون مايشعر .

لكن الحمدلله ان حضرتك مش عندك كدا .......

اللى عندك دا شيء طبيعي ناتج عن التعب والارهاق الحل هو النوم الكافي

ممكش تشرب قهوة ولا اى شيء منبه قبل السياقة

موسيقي مزعجة وليكن شعبان عبد الرحيم

اكل لبان الحركة نفسها هتفوقك ..

بلاش تسرح وانت سايق

واهم شيء خالى بالك من نفسك ومتسوقش فى الحارة الشمال خليك دايما فى اليمين ..........

لو حسيت بالنعاس اركن على جنب بعيد عن الطريق ,اكل اى حاجة خفيفة واتمشي شوية ........هتلاقي الاحساس بالنوم

اختفي ,او الحل اللى حضرتك بتعمله انك تنام شوية

بس طبعا اياك والسياقة وانت نعسان الحمدلله ان ربنا سترها لحد دلوقتى ....

تم تعديل 23 أبريل 2008 بواسطة Badria Mekkawy