se_ Elsyed بتاريخ: 14 يونيو 2008 تقديم بلاغ مشاركة بتاريخ: 14 يونيو 2008 أكثر ما يُثير جنوني في تربية الأولاد هو أن أرى عيل قليل الأدب أمامي وأهله كإنهم ألواح تلج .. لا بيقولوا له عيب ولا غلط ولا إتأدب يا ولد .. على اساس يعني إنه لسه طفل صغير وبُكره يكبر ويعرف الصح من الغلط خلو بالكو .. بتتقال كده بالظبط " بكره يعرف الصح من الغلط " وكإن وحي من السماء هاينزل عليه لما يكبر يعرفه الصح والغلط كل ده والطفل يقوم بإرتكاب تلك الأفعال الخاطئة على مرآى ومسمع من والديه .. وهما ولا هنا ... بل قد تتعدى الامور لتصل إلى إنه يبهدلهم سواء باللفظ أو بالفعل وبيبقى على قلبهم زي العسل .. انا اتحدث هنا عن أطفال صغار ممكن يكونوا 3 سنوات أو 6 سنوات ... ومع ذلك يرى هؤلاء الأباء إن دي مش سن يتعلموا فيها الصح والغلط .. وإن ده سن الدلع واللعب فقط .. وبالتالي لما يكبر شويه ويدخل المدرسة بالذات هايعرف كل حاجه ما دفعني إلى كتابة هذا الموضوع إني كنت قاعد بأتغدا أنا واخويا الصغير بالأمس فجاله تليفون وأعتذر وقال لي لازم أنزل حالاً حيث إن إبن صديق له وقع وسنانه إتكسرت .. فقلت له خير ؟ قال لي : ده عيل قليل الأدب ... وابوه كمان قليل الأدب ... وامه ست ما بتعرفش تربي .. الولد عنده 3 سنوات ... من إسبوعين تلاته وقدام أبوه وامه ... تسلق المكتبة اللي فيها التليفزيون وراح واقع من فوقيها إتكسرت شظية القدم عنده وإتفتفتت حتت وراحوا جبسوها وكانت شغلانه إمبارح وبرضوا قدم أبوه وأمه يتسلق نفس المكتبة ويقع على سنانه تروح سنانه متدغدغه ... وقال لي إنه بيكون عند صديقه ده وقاعد في امان الله .. ييجي الولا يقوم لازق أبوه بالقفا زي ما المخبر بيعمل في أي حرامي كده والقفا يطرقع .. وأبوه يضحك ويقول ده عيل ... الولا له أخ أكبر منه ييجي بسنتين ... بقوا الإتنين يبهدلوا بعض ضرب ... وشتيمه بألفاظ مش كويسه ... وبرضوا أبوه وأمه ولا هو هنا ... وبيضحكوا ويقولوا عيال ... تكمل المصيبة بقى لما عيلة زي دي يروحوا يزوروا حد ... وتبقى انت قاعد وشايف المقروص من دول عمال يخرب في النيش أو يفكك ريموت التليفزيون أو يتنطط فوق الأنتريه أو يدلق العصير على السجادة الغالية ... وبتبقى هاتفرقع من جوه ونفسك تمسك الواد وابوه وأمه وترميهم من الدور السابع ... بس أدب الضيافة بيحوشك وبتبقى تنظر للساعة وعايز اللحظات تعدي وينكشحوا من عندك ... شوفت نموذج زي ده ... بس الحمد له بتيجي في أخويا الكبير فعديله - زوج اخت مراته - عقيد في الجيش وراجل المفروض إنه بتاع ظبط وربط وحزم ... لكن مع عياله ... عبارة عن ديب فريزر 24 قدم ببابين .... ولو العيل جاب قنبلة عنقودية وفجرها في البيت قدامه .. ولا بيقوله عيب ولا غلط وقد كان ... كانوا معزومين عند حماتهم وعيل من المقاريص كان عنده 4 سنوات .... راح لم الجزم بتاعتهم وداخل المطبخ مدعبس على الكبريت وراح مولع في جزمهم وخلاهم يروحوا حافيين .. أخويا دمه حامي مثلي .. فأنتظر إن أبوه يمسك الواد يعلقه بدل النجفة ... راح بكل بروووووووووووووود جايب الولد وقايل له ... عيب يا بابا .. إنت لما تلعب في الكبريت كده ممكن إيدك تتلسع وتعمل لك يح .... ولإن اللي بيزرع شيء بيحصده سريعاً ... فما فيش كام شهر ... ونفس الواد .. وبنفس الكبريت ... راح داخل جوه عربية أبوه اللي راكنها قدام البيت ... ومولع له فيها وجايبها له على الصاج ... بس نجي منها العفريت والعربية هي اللي راحت في الوبا ... وبرضوا أبوه لسه ساقع وكإنه من القطب الشمالي ... ويا سلام سلم .. لو تجرأت إنت وشخطت في ولد من دول قدام الأبوين الحلوين ... تبقى شغلانه ويعملوها قضية وممكن يقاطعوك لإن إنت جرحت سلوك مشاعر الننوس .... العيب بقى إن فعل يُدلل باللغة الإنجليزية واللي إسمه Spoil هو نفسه يأتي بمعنى يُفسد لكن إحنا في احيان كثيرة تلاقي الدلع بيختلط عندنا بالإفساد بالتدليل ... وفي الأخير يطلع لك كوكتيل عجب ... وممكن تلاقي نماذج لأباء وامهات طبعاً من كتر تدليعهم في أبناءهم تلاقي الولا عامل زي الشحط وعنده 5 أو 6 سنوات ولسه لا يعرف كيف يقضي حاجته بنفسه .. وبالتالي ممكن تلاقيه لسه بيلبس بامبرز ... وبأشوف عيال والله بيبقى عندهم 4 أو 5 سنوات ويكاد يكون طولي .. ولسه ماسك بزازة في إيده وعمال يرضع حليب ... أينعم دمي بيغلي .. بس أرجع وأقول أنا مالي إن شالله يتحرق ... فالخُلاصة من وجهة نظري إن الوسط حلو ... يعني لا عنف غير مبرر مع الاطفال عشان ما يطلعوش معقدين وعدوانيين ... ولا سبهلله وتدليل وقلة أدب من الصغر مع الأطفال عشان أول أشخاص هايتطاول علهيم العيل من دول هو أبوه وأمه ... لإنهم هما اللي قدامه .. وبالتالي هانخرج عيل زبالة للمجتمع ويبقى مصدر أذى للجميع ... الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
~Heba~ بتاريخ: 14 يونيو 2008 تقديم بلاغ مشاركة بتاريخ: 14 يونيو 2008 gt: :) :blink: اضحك الله سنكيا سى السيد و الله ضحكت من قلبى على مواقف الاطفال دى بس لو جزمتى انا اللى اتحرقت مش هتضحك طبعا :blink: فما بالك العربية الاطفال دول من نوعيه الاطفال اللى عندهم شقاوة زائدة فرط فى النشاط دول لما بيكبروا بيبقوا شباب متهورين من نوعية اللى بيحبوا يعملوا الحاجات الخطرة شفت مرة فى المسلسل الاجنبىdesperate housewives ان واحدة عندها توأم من النوع ده :blink: راحت للدكتور و كتبلها دوا يقلل من نشاطهم الزائد و مكنتش بتأكلهم حاجة حلوة عشان السكر بيديهم الطاقة و و ميناموشو يفضلوا بقى و يكسروا الدنيا براحتهم الغريب ببقى انها بقت تاخد الدوا بتاعهم كمنبه و يديها النشاط عشان تقدر تقومبأعباء البيت لانه الدوا بيعمل المفعول العكسى مع البالغين اللى مش مصابين بالمرض بيتاع فرط النشاط ده صراحة دا كلام مسلسلات مش عارفة صح و الا لأ أقلل عتابك فالبقاء قليل...و الدهر يعدل تارة و يميل رابط هذا التعليق شارك المزيد من خيارات المشاركة
aimen بتاريخ: 14 يونيو 2008 تقديم بلاغ مشاركة بتاريخ: 14 يونيو 2008 سى السيد فكرتنى بابن خالى سامح ؟ كنت اعتقد انه اكثر اطفال الأرض شيطنة ؟؟؟ تخيل لما الطفل يبقى عارف ان الحاجه دى غلط ويعملها علشان يعرف رد فعلك ايه ؟؟؟؟ اهو الولد دا كان كده المصيبة انه بقى فيه اتحاد بينه وبين اخته الأصغر منه ونحن الضحايا رابط هذا التعليق شارك المزيد من خيارات المشاركة
ELSHAMY بتاريخ: 14 يونيو 2008 تقديم بلاغ مشاركة بتاريخ: 14 يونيو 2008 أخى س س أمال تعمل ايه لو اتحطيت فى الموقف الأتى: بعد سنين غربة نزلت مرة اجازة و كان لى ضابط شرطة صاحبى ما شفتوش من سنين و عرفت انه اتجوز و خلف فرحت أزوره....و بعد شوية دخل المحروس ابنه....و من كتر فخره بيه قعد يعدد لى مواهب الولد ابو 3 سنين و كان أن ختمها بقوله : تف على عمو يا حبيبى... و الولد عملها وسط ضحكات الأب المدوية و فرحته بعلامات الصياعة المبكرة اللى عند الولد.... حاجة تفقع المرارة... كن كما قال رسول الله صلى الله عليه وسلم : ان لله عبادا أختصهم بقضاء حوائج الناس حببهم في الخير وحبب الخير اليهم انهم الامنون من عذاب الله يوم القيامة ) رابط هذا التعليق شارك المزيد من خيارات المشاركة
~Heba~ بتاريخ: 14 يونيو 2008 تقديم بلاغ مشاركة بتاريخ: 14 يونيو 2008 أخى س سأمال تعمل ايه لو اتحطيت فى الموقف الأتى: بعد سنين غربة نزلت مرة اجازة و كان لى ضابط شرطة صاحبى ما شفتوش من سنين و عرفت انه اتجوز و خلف فرحت أزوره....و بعد شوية دخل المحروس ابنه....و من كتر فخره بيه قعد يعدد لى مواهب الولد ابو 3 سنين و كان أن ختمها بقوله : تف على عمو يا حبيبى... و الولد عملها وسط ضحكات الأب المدوية و فرحته بعلامات الصياعة المبكرة اللى عند الولد.... حاجة تفقع المرارة... gt: :) :blink: كان الله فى عونك يا دكتور الشامى و فى عون الشعب......الولد ده هيطلع ضابط شرطة زى ابوه أقلل عتابك فالبقاء قليل...و الدهر يعدل تارة و يميل رابط هذا التعليق شارك المزيد من خيارات المشاركة
النجم الثاقب بتاريخ: 14 يونيو 2008 تقديم بلاغ مشاركة بتاريخ: 14 يونيو 2008 (معدل) الفاضل س س .. شكرا على الموضوع الجميل . الموضوع ده كان عاملى قلق بس دلوقتى بقول وانا مالى انا نصحت و خلاص و اللى بيشيل قربه مخرومه ... ياما كلمت ناس اولادهم بيعملوا حاجات غلط يقولولى دول لسه صغيرين ، يعنى لما يكون العيل عنده اربع خمس سنين و ميعرفش الصح من الغلط يبقى هيعرف إمتى !!؟؟ انا لاحظت إن معظم الناس دى أصلا بيتمتعوا بلا مبالاه رهيبه فى حياتهم عموما ، لاحظت كمان إنهم فاكرين إنهم مستريحن عشان مش واجعين دماغهم بمشاكل العيال و كل واحد بيعمل اللى هو عايزه و ميعرفوش إنهم هيتعبوا قوى لما ولادهم يكبروا و هيندموا فى وقت لا يفيد فى الندم و لن يغير شىء . و من كتر فخره بيه قعد يعدد لى مواهب الولد ابو 3 سنين و كان أن ختمها بقوله : تف على عمو يا حبيبى... و الولد عملها وسط ضحكات الأب المدوية و فرحته بعلامات الصياعة المبكرة اللى عند الولد....حاجة تفقع المرارة... فعلا مواهب فذه !! تم تعديل 14 يونيو 2008 بواسطة النجم الثاقب كيف اصطباري وما في العمر متسع...!! رابط هذا التعليق شارك المزيد من خيارات المشاركة
مصري أصيل بتاريخ: 14 يونيو 2008 تقديم بلاغ مشاركة بتاريخ: 14 يونيو 2008 الأسبوع اللي فات شفت ولد حوالي 6 سنوات و أبوه في أحد المجمعات التجارية . و للأسف الولد ماسك أبوه تلطيش بالأقلام و ضرب بالرجل و ابوه كل اللي عامله أنه عمال يراضي في الولد و الولد فرج علي أبوه أمة لا الله الا الله . والله كان هاين عليا اروح ارزع الواد قلمين بالنيابه عن ابوه من كتر غيظي . و أعرف ناس كمان عندهم أطفال تحتار فيهم الشياطين بس أول ما الأب يدخل البيت ما تسمعش نفس واحد فيهم . عموما أكيد الأعتدال حلو يعني لا الواحد يكون عنيف مع أطفاله و لا يدلع فيه لغاية ما يفسده. من أقوال الشيخ الشعراوي رحمه الله الثائر الحق من يثور ليهدم الفساد ثم يهدأ ليبني الأمجاد رابط هذا التعليق شارك المزيد من خيارات المشاركة
MZohairy بتاريخ: 14 يونيو 2008 تقديم بلاغ مشاركة بتاريخ: 14 يونيو 2008 حصلت معايا يا احمد اول ما جيت السعوديه و كنت لسه انا و مراتي بس و معندناش اولاد و بدأت زيارات الأسر المصريه لينا للتهنئه منهم اسره فيها طفلان (5 و 7 سنوات) و اسماؤهم : هادي و مهدي :huh: المهم هادي دخل ورا التليفزيون و قعد يزق فيه من ورا لغاية ما وقعه على الأرض و كسر الشاشه و مهدي رمى حاجات كتير من الشباك المهم ابوهم و امهم (واللي لم يحركوا ساكنا طول الزياره) قالولي بإبتسامه عريضه احنا آسفين و عيال بقى حتعمل ايه ؟ عقبال ما تشوفوا ولادكم تاني يوم طلبت من هذا الزميل ان تقتصر علاقتنا على العمل فقط و الحمدلله لم أراه هو و زوجته و اولاده منذ هذا الوقت و الحمد لله لم أرى اولادي مثل اولاده ابدا Vouloir, c'est pouvoir اذا كنت لا تقرأ الا ما يعجبك فقط فإنك لن تتعلم ابدا Merry Chris 2 all Orthodox brothers Still songs r possible رابط هذا التعليق شارك المزيد من خيارات المشاركة
se_ Elsyed بتاريخ: 14 يونيو 2008 كاتب الموضوع تقديم بلاغ مشاركة بتاريخ: 14 يونيو 2008 المهم هادي دخل ورا التليفزيون و قعد يزق فيه من ورا لغاية ما وقعه على الأرض و كسر الشاشه و مهدي رمى حاجات كتير من الشباك المهم ابوهم و امهم (واللي لم يحركوا ساكنا طول الزياره) قالولي بإبتسامه عريضه احنا آسفين و عيال بقى حتعمل ايه ؟ عقبال ما تشوفوا ولادكم تاني يوم طلبت من هذا الزميل ان تقتصر علاقتنا على العمل فقط هادي ومهدي ؟!!!!!! أومال عفريت وعفركوش يطلعوا إيه ؟ وبعدين يكسروا لي التليفزيون الـ 29 بوصه اللي حيلتي ويقول لي عيال ... طب يالله يابن ... إنت ومراتك وعيالك بدل أما ولع فيكو في لاشقة أو أحبسكوا جوه قفص خشب وتسلوني وتضحكوني بدل التليفزيون ... يا هدوء أعصابك وآنتختك يا زهيري .. بقى إتحمشنت وجمعت قواك العصبية وقلت له : علاقتنا تقتصر على العمل ؟ لأ براوا عليك --------- دكتور شامي مش عارف حسيت ليه بعد ما الواد عمل كده إنك خفت من أبوه عشان ظابط ؟ بقى لو كنت جبت مجموع ودخلت شُرطة بدل الطب .. ما كنتش رديتها له وريحت قلبي اللي ولع عشانك ؟ الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
النسر المصري بتاريخ: 14 يونيو 2008 تقديم بلاغ مشاركة بتاريخ: 14 يونيو 2008 انا بقى قريت الكلام وماضحكتش.....دمي غلي واتحرق وفار فوران....وافتكرت عشرات العائلات والأولاد (الرزله)..وقلالاة الأدب اللي كنا بنزورهم...(ولسه في بعضهم)....وحتة ابوين زي قمة ايفريست كده.....تلج طول السنه..جتهم القرف تعال بق ياعم السين وقس ذلك على الأزواج والزوجات اللي بيرموا بعض بكلام سافل وكانه هزار عن حاجات بتحصل في بيتهم...وتلاقي الزوج ال.....(مش عارف الصراحة ايه الكلمه المناسبه اللي ممكن تتحط مكان النقاط...لكن بالتاكيد هي ماتنفعش عشان الرقابه)...المهم تلاقي الزوج مبتسم ابتسامه صفرا وسخيف ومعفنه وهو متقبل كلام مراته اللي بتهزأ سعادته قدام البشريه وقدام عياله....ونفس الكلمه بالظبط بتاعت الافندي البارد اللي بتتكلم عنه (عادي يا ام العيال..على راسي يا ام العيال.....براحتك يا دندوون) يارب الرحمه..!! رابط هذا التعليق شارك المزيد من خيارات المشاركة
كوابرية بتاريخ: 23 يونيو 2008 تقديم بلاغ مشاركة بتاريخ: 23 يونيو 2008 ما تستغربش فى ناس كدة باااااااااااااااااردين وكل اللى بيعمله عيالهم عادى خالص .حتى لو ولعوا فى البيت مش الجزم دى بسيطة عندهم لسة عيال بس بجد تربية الاولاد وتعويدهم على السلوكيات الصح ولما يجى يعمل غلط يتعاقب دة بيخلى الطفل من صغره يعرف الصح والغلط علشان لو كان متعود على السلوكيات دى ويجى وهو عنده مثلا 8 او 9 سنين ويعمل نفس الغلط ما تقدرش ساعتها تقوله عيب علشان انتا فضلت فترة كبيرة ساكت وبتضحك على تصرفاته.....تسلم للموضوع رابط هذا التعليق شارك المزيد من خيارات المشاركة
امانى بتاريخ: 23 يونيو 2008 تقديم بلاغ مشاركة بتاريخ: 23 يونيو 2008 انا مش مستغربة من الموضوع دة ياسى السيد قد ما مستغربه من طبيعة الاسر العربية وخصوصا المصرية فى تربية الابناء اول ما يبدا الطفل يتعلم الكلام يقول الاب لابنه تف على عمو . اشتم عمه . ويقول الفاظ نابية ادام الطفل طبعا الطفل يرددها دون فهم لمعناها ولما يكبر شوية يقوله لو حد ضربك اقتله موته من الضرب . لو حد قلك هات حته من الشيكولاتة او البسكوت اوعى تعطيه اوعى حد يغلبك اوعى اوعى الخ يفضلو يشحنوا الطفل بانفعالات عدوانية المصيبة بقى الكبيرة لما يكون الاب والام من النوع الفريزر اللى عايشين علشان ياكلو ويشربو وبس وتلاقى العيال تكسر اى حاجة ويكون ردهم خدت الشر وراحت فداهم الحاجة احنا اللى بنجيب الفلوس وغيره من الكلمات اللى تنقط وبعد كدة يطلع العيل من دول لا عنده صبر ولا ادب وعايز تكون طلباته اوامر ولا يهمه تكسير اى حاجة فى بيته ولا حتى فى بيت غيره طبعا هذا لا ينطبق على كل الاسر فهناك اسر تتمتع اولادها بقمة الادب والاحترام ولا تحس بوجودهم اثناء زيارتك اليهم خير الامور الوسط لا اكون شديدة مع الابناء زيادة عن اللزوم ولا مدللة بزيادة . الطفل بطبيعته زكى بالفطرة ويفهم ويستوعب ما يتلقى من اوامر او تنبيهات . لازم يكافئ ان عمل صنعا جميلا ويعاقب ان فعل فعلا مشينا وكل عقاب حسب سن الطفل وميوله اشكرك يا اخى على هذا الموضوع الحيوى الذى يهم معظم الاسر الصداقة كنز لا يفنى لازم نحافظ عليه رابط هذا التعليق شارك المزيد من خيارات المشاركة
TotaFunny بتاريخ: 10 يوليو 2008 تقديم بلاغ مشاركة بتاريخ: 10 يوليو 2008 السلام عليكم و رحمه الله و بركاته خالص تحياتى لك استاذى / س س كلامك واضح و صريح و بيحصل كتير جدا الاب و الام مسئوليتهم تربيه الاولاد على الادب و السلوك القويم مش دى المسئوليه بس فى التربيه اختيار اصدقاء هذا الطفل فى الصغر مش بس لما يكبر شويه علشان ماينحرفش بعد ما كبر و تعبوا فى تربيته ممكن وهو صغير يتعلم من زملائه فى الحضانه او المدرسه او الجيران او الاقارب و الاصدقاء و يفاجأ الأبوين بتصرفات غريبه من اولادهم مش متوقعه و بعد كده يرد الطفل ذى فلان و تبقى حاجه عاديه السن ده هو سن الاساس لازم يكون سليم علشان تعب الام و الاب لا يذهب هباء و الحزم بالاكثر لازم يكون من جهه الاب شدة مع حب تربيه مع احترام لشخص الاب و الام و التنبيه لان اخطاء الغير مش لازم تتقلد علشان نتعلم منها لأ نتعلم من نتيجه هذا الخطأ مثل حقيقى: بنت وحيده 5 سنيين الام كل حاجه عندها تضرب البنت و تعنفها عل اى خطأ فى حقها او حق الغير و تصرخ كثيرا جدا فى وجهها و الاب طيب حنون لا يقسو عليها بل يحنو عليها النتيجه الان انها تقول لأمها دلوقت امشى البيت ده بتاعى انا و بابا و بس انا زهت منك ايه اللى وصلها لكدة شده الام ولا حنيه الاب و ده صح فى التربيه ان واحد يشد و التانى يرخى الحبل فى التربيه رجاء اعادة نظر من الاباء فى تربيه الابناء و خصوصا الامهات لانها مدرسه الحياه بالنسبه للأولاد على رأيك الوسط حلو و الاحلى هو موضوعك ده :lol: ا السلام عليكم ام احمد دع الايام تفعل ما تشاء و طب نفسا اذا حكم القضاء و لا تجزع لأحداث الليالى فما لحوادث الدنيا بقاء رابط هذا التعليق شارك المزيد من خيارات المشاركة
Recommended Posts
انشئ حساب جديد أو قم بتسجيل دخولك لتتمكن من إضافة تعليق جديد
يجب ان تكون عضوا لدينا لتتمكن من التعليق
انشئ حساب جديد
سجل حسابك الجديد لدينا في الموقع بمنتهي السهوله .
سجل حساب جديدتسجيل دخول
هل تمتلك حساب بالفعل؟ سجل دخولك من هنا.
سجل دخولك الان