كندا التي رأيتها :)

[moheltohamy]

بسم الله ... نستفتح بالذي هو خير.

أحب أكلمكم شوية عن حكايتي مع كندا... من وجهة نظري طبعاً.

هاتكلم عن ما شاهدته ولمسته خلال هذه التجربة ، التي لم تتح للكثير منا. وكلها بالطبع اعتبارات شخصية ؛ كنت كاتبها كهاند أوفر لإنسان عزيز على قلبي جداً جداً جداً.

مقدمه لا بد منها... مضطر أشرحلكم ، ومضطرين - آسفين - تسمعوا ، يعني إيه هاند أوفر؟

أنا كنت طبيب في شركة حفر عن البترول ، والبريمة بتاعتي كانت في الصحراء الغربية (200 كم جنوب العلمين). وكان نظام الشغل هناك أسبوعين شغل وأسبوعين أجازة. وبالنسبة للعيادة فليها 2 أطباء أنا (محمد سعد التهامي) وزميلي ده (أحمد مراد).

مسئوليتنا الأساسية التدخل في حالات الطوارئ أو الكوارث لا قدر الله ؛ واحد جاتله سكتة قلبية - استاندات المواسير وقعت على واحد كسرت ترقوته وضلوعه - واحد إيديه الموتور لفها واتكسرت - واحد اتحرق - واحد جاله اختناق من تصاعد غاز كبريتيد الهيدروجين - واحد قرصه عقرب أو تعبان ... إلخ. وعلى فكرة معظم اللي مكتوب ده حدث بالفعل!

مسئولية تانية طبعاً أقل أهمية ؛ الحالات الطبية البسيطة التي تحدث من يوم للتاني ؛ دور برد - لوز - إسهال - حساسية - شد عضلي - آلام بأسفل الظهر - آلام بالمفاصل - حمى - جرح قطعي يلزم له غرزتين - ضغط - سكر ... إلخ. وهيه دي بقى الصداع اللي بجد!

شوية تحابيش تانية...

التفتيش ع الأكل والإشراف على أداء شركة التغذية (الكامبوس مديرهم - الشيف - الطباخين - المساعدين - الحلواني - عمال الحوض - عامل المغسلة - الروم بويز) ، وده صداع تاني لوحده ، ألعن م الأولاني!

وبالمرة - طالما الدكتور ده قاعد فاضي - نشيله شغل السيفتي (الأمن الصناعي) ، وأدي كورسات السيفتي للناس اللي ف البريمة ، وأمتحنهم فيها ، وأطبع لهم الشهادات ، (وانضفهم ، واحميهم وانيمهم في سيريريييرهم)!

ومع انتهاء الهيتش بتاعي (فترة الشغل في موقع البريمة - الأسبوعين) ، بييجي أتوبيس الشركة معاه الكرو اللي خلصت أجازته (الوردية اللي بتبدلنا) ، وفيها طبعاً زميلي وبديلي ف العيادة. يا دوب هوه الوقت الكافي لنزول دول وركوب دول وربع ساعة السواق يتغدا ف الميس (المشوار من القاهرة للبريمة كان بياخد له أحياناً 8 ساعات!

وبيستلم زميلي الشغل في العيادة من لحظة وصوله. وبامشي أنا ، وهيييييه ، أجازة!

مين بقى ممكن يصطاد ف الميه العكرة ، ويستغل الفرصه دي؟ الكامبوس (مشرف شركة التغذية). والتعليمات اللي نبهته عليها ، يطنشها مثلاً مع الدكتور الجديد ، ماهو مش عارف اللي حصل الأسبوع اللي فات!

مضطر أديكو أمثلة عشان االمعنى يوصل...

- نيجي يوم استلام الطلبية (عربية شركة التغذية بتيجي يوم ف الأسبوع ، وطبعاً مفيش حاجة تنزل منها إلا في وجودي) ، البهوات بعتو الجمبري مش حسب المواصفات! طبعاً لازم يرجع ، ولو كان بايظ باعدمة في الموقع! وأنبه عليه ، تطلب في طلبية الأسبوع اللي جاي ضعف كمية الجمبري. حاضر يا دكتور. ييجي الأسبوع اللي بعده ، ينفض ولا كإننا قلنا حاجه ؛ ما هو عارف إني نازل بعد كام يوم!

الموقف التاني ده هانقله من هاند أوفر قديم كما هو... ويمكن يوصل لكم المعنى!

من كام يوم أولت اتعشّى ف الميس (العَشا التاني بخلاف بتاع الساعة 7م ، حوالي 11 بالليل) ، طلبت فول كامل (مش مضروب ف الخلاط) ، و3 مكعبات زبدة وخل وملح وفلفل وبتاع ، وأعدت ظبّطت الأكلة وتمام التمام ، وكان معايا ع الترابيزة سعيد الكامبوس والشيف بركات. إز بي أفوجأ وإز فجأتَن ألائي سوساية ف الطبأ بتاعي! يا وأْعَة طين ! طبعاً الدنيا اتألَبِت ، والشهود موجودين (وشهد شاهدُن من أهلها) ، أومت على طول يا ريّس أصدرت فرمان بمنع الفول نُهائيّاً من الكامب.

الطباخ بتاع بالليل (خالد وجيه) يحاول يقنعني إنو (طب بُص يا دكتور على كاونتر الفول المضروب ف الخلاط) ، طبعاً مفيش أصر للسوس ماهو بئى عصير! أولتله خلاص الموضوع مُنتهي ، اللي عاوز فول تفتح له فول علب عاجبه عاجبه ، مش عاجبه معندناش غير كده ، واللي يكلمك أوللُه الدكتور مانع الفول! وسعيد الكامبوس يئول لخالد (خلاص يا خالد ، من بكره معُتِّش تعمل غير فول علب) ، بيصيع سياتُّه ، أولتله يعني الناس هيتعشو م الفول ده وهيفطرو منُّه كمان؟ آللي ماهو الفول زي الفُل ومافيهوش حاجة ومحدش هيلائي فيه حاجة . أولتله همه هياكلو عشان ما يعرفوش إنو سوّس ، لكن انا عارف ؛ يبئى ازّاي اسكت؟!

أوم إيه؟ تاني يوم ع الساعة 11 بالليل كده كنت باعدّي ع الميس ، و وئفت ع الكاونتر بائول للواد الاستيوارد اللي ع الحوض (النضافة مش كويسة يا محمد) ، إز بي أُفوجأ إن الخلاط ع الحوض مستني يتغسل ، والفول عليه من بره ومن جوه! أنا يا احمد ياخويا شفت المنظر ده وسخنت ، وأولتله روح صحيلي الكامبوس. جاني سعيد وعنيه حمرا وزي مايكون فاتحها بطفاشة! أولتله إيه ده يا أستاز سعيد؟ حاجة من اتنين ؛ يا الشيف بيشتغل من وراك يانتو الـــ 2 بتشتغلو من ورايا ، والـــ 2 اوسخ من بعض! (الأولانية معناها ان الكامبوس طيشة ومالوش لزمة إزا ما كانش عارف كل صغيّرة وكبيرة عن الرجالة بتوعه ، والتانية معناها انهم الـــ 2 خانو الثقة ما بيني وما بينهم)!

خليته رمى الكاونتر كله ف الزبالة أدامي ، وأومت مكمّل على سعيد (اتفضل أدامي يا أستاز سعيد ع المخزن وريني الفول اللي عندك لسه) وطلعنا ع المخزن كان فيه 3 تكياس (بتاع 15 كيلو) ، أولتله هاتهوملي العيادة بكرة هاعدمهم! أعد يحلفلي إنو هيعمل لهم ارتجاع مع عربية الطلبية لما تيجي ، بدل ما تتخصم عليه ، أولت لنفسي (خلاص ، تنزل المرَّادي ، لكن المرة الجاية لا مُمكن تنزل الأرض أَبَداً)!

خلى بالك م الموضوع ده ، عشان محدش منهم يستعبط فيها ويئول الدكتور الجديد ما يعرفش الحكاية ، فرصتنا ناخد راحتنا! الفول العلب العرة اللي بيجيبوها دي (مش عارف قها ولا إدفينا) بتلائي لونه أغمأ وريحته فاءعة شوية من المواد الحافظة اللي محطوطة عليه. كلها شهر كده ولا شهرين على ما الفول الجديد ينزل السوء ، نضمن إنو مفيهوش سوس.

ورد أحمد عليا ف الهاند أوفر اللي بعده :

بالنسبة للفول أول ما دخلت المخزن لقيت كيسين والثالث مفتوح .. قلت لسعيد ايه ده انت منزل فول تاني ولا ايه ؟؟ .. قاللي لا خلاص يا بيه ده هيرتجع ان شاء الله .. قلت له اوعي ؟؟ قاللي عيب ياباشا دي ثقة .. قلت له آه ثقة زي بتاعة الدكتور محمد وتاني يوم نزل ؟؟ .. قاللي ثواني اجيب لك التايم شيت وشوف اتخصم عليهم قد ايه ؟؟ .. قلت له خلاص وبرضه الصايع لقيته جايب فول في الطلبيه على اساس ان الدكتور الجديد ممكن يبقى قرطاس أو يطنش .. رحت مديهم له .. قاللي يا دكتور طيب اكشف عليه ولو فيه حاجة رجعه .. قلت له أولا الدكتور محمد قال مفيش فول غير المعلبات .. يبقي مفيش .. ثانيا انا مش هاقعد أنقي الفول حباية حباية سيادتك .. ورجعه مع القديم طبعا .. والطلبية اللي بعدها اتأكدت ان مفيش فول وطبعا الحمد لله مكنش فيه .

فبالمنظر ده ، لا بد من هاند أوفر ، فايل بنكتبه ع الوورد ، وييجي البديل يقراه أول حاجة ، يبقى عنده فكرة عن الدنيا ماشية ازاي ف البريمة.

معلش ، اتكلمت كتير عن الموضوع ده... بس هيه كانت مقدمة لمعني كلمة هاند أوفر ، ويمكن عشان الكلام ده بيفكرني بفترة عزيزة من حياتي ، فرغيت فيها شوية معلش!

وأساساً ، أنا كنت باكتب لأحمد الهاند أوفر واحنا بنبدل بعض على بريمة الصحراء الغربية ، ولما سبت الشركة بتاعتي في مصر ، ورحت على شركة تانية ف السعودية ، برضه كتبت له هاند أوفر من البريمة البحرية الجديدة. ولما رحت كندا كمهاجر جديد ، بدأت أكتب له هاند أوفر برضه عن انطباعاتي عن الحياة في كندا!

أصبح بيننا ما يسمى بأدب الهاند أوفر clp:: لدرجة إني كنت بافكر أعمل توبيك جديد عن الهاند أوفرز دول. بس أعتقد محدش أصلاً هيهتم إنو يقراهم!

عموماً ، نبدأ الهاند أوفر شوية شوية ... والهاند أوفر ده إسمه :

65. مسلسل الهاند أوفرز ما زال مستمراً ترانس أوشن ، عبر الأطلنطي من العالم الجديد ، الله يكرمه كولمبس!

طبعاً ، صعب إن حد يفهم هوه بيتكلم عن إيه من عنوانه ، وعشان كده خليته "كندا التي رأيتها n2&( "

ولو إنو لسه ما خلصش ، بس هاحاول أكتبه معاكم! وبت باي بت :lol:

[حسام يوسف]

بحيي اسلوبك يا دكتو تهامى

واسجل متابعة

ومتتظرين الباقى

[لولا]

بسم الله ... نستفتح بالذي هو خير.

أحب أكلمكم شوية عن حكايتي مع كندا... من وجهة نظري طبعاً.

هاتكلم عن ما شاهدته ولمسته خلال هذه التجربة ، التي لم تتح للكثير منا. وكلها بالطبع اعتبارات شخصية ؛ كنت كاتبها كهاند أوفر لإنسان عزيز على قلبي جداً جداً جداً.

مقدمه لا بد منها... مضطر أشرحلكم ، ومضطرين - آسفين - تسمعوا ، يعني إيه هاند أوفر؟

أنا كنت طبيب في شركة

---------------------------------------------------------------

عموماً ، نبدأ الهاند أوفر شوية شوية ... والهاند أوفر ده إسمه :

65. مسلسل الهاند أوفرز ما زال مستمراً ترانس أوشن ، عبر الأطلنطي من العالم الجديد ، الله يكرمه كولمبس!

طبعاً ، صعب إن حد يفهم هوه بيتكلم عن إيه من عنوانه ، وعشان كده خليته "كندا التي رأيتها :rolleyes: "

ولو إنو لسه ما خلصش ، بس هاحاول أكتبه معاكم! وبت باي بت wst::

تصدق يا دكتور معرفش ليه لقيت نفسي فصلت كده من النص :fool:

واذ بى فجأة الاقى نفسي نسيت انا دخلت فى انى قسم وانى موضوع

واذ بى فجاءة برضه اجد نفسي معجبه باسلوبك الساخر فى سرد الأحداث :lol:

قوم ايييييييييييييه . قلت ادخل احيك واقولك استمر

[moheltohamy]

شكراً حسام ، شكراً لولا على وجودكم معايا (اخواتي المستغربين) :lol:

ودي الحكاية اللي كنت قلتلك عليها يا إيهاب قبل كده ، هيه لسه ما خلصتش ، بس أعمل إيه ، لو ما بدأتش أحكيها ، مش هتخلص! وانا عارف نفسي! كسلان مووووت

بس أستأذن السادة اخواتنا ف المحاورات ...

التوبيك ده عن حكايتي أنا وانطباعاتي عن كندا ، فيا ريت - أرجوكم - اللي مش طايق الفكرة ، أو بيحب مصر لدرجة إنو يكره كندا ، أو شايف إن كندا دي ما تستاهلش إني أكون فرحان بيها للدرجة دي ... بلاش تكتب لي أي تعليقات الله يكرمك.

وأفتكر كلمه كان قالهالي خالي زمان... لما أكون بسألك عن رايك عن بنطلون متعلق في فاترينة محل ، قل لي رأيك حلو ، وحش ، يعني مش أوي ، زي الزفت! بس لما أكون اشتريته خلاص ولابسه ، وباسألك إيه رأيك ، يبقى لازم تقول لي فيه شعر ، مش بس إنو كويس! :rolleyes:

مش هتستفيد حاجة لما تضيع فرحتي باللبس الجديد ، ويمكن أتعقد منه ، وأرميه على جنب! ولا انا استفدت حاجة ، ولا انتا استفدت حاجة باللي عملته فيا

فبعد إذن السادة اللي مستغربين (أكيد فيه ناس تانية غيركم يا حسام انتا ولولا) ، لو شفتو إني معاييش حق في الفرحة ... سيبوني أهبّل مع نفسي ، وبلاش تفوّقوني! wst::

الأسلوب هتلاقوه بالبلدي ، وأئل من البلدي شويتين كمان! و بائول وبدايتن والعلم نورن ، وحاجات زي كده! أنا مزاجي آللي أكتبها كده ، أئول له لأه؟! بيتهيألي ما يصحّش! :fool:

ندخل ع المفيد...

[moheltohamy]

تورونتو ، 9 سبتمبر 2007

أبو مراد...

م الواضح يابو حميد إنها بقت عادة ؛ إني أكتب لك هاند أوفر من كل مصيبة أروح فيها! عموماً ، الله لا يقطعها عادة :lol:

وكان المفروض أبدألك الهاند أوفر ده من أول ما وصلت كندا في التاريخ اللي فوء ده وأول بأول ، لكن زي مانتا عارف اخوك بأه ومش جديدة عليك ... كسلان مووووت! عموماً ، آهي جات بفايده ، يمكن هاكتبلك معلومات أفيَد وأدق بعد مرتين ليَّا هناك.

مش عارف أبدألك منين الحكاوي عن البلد دي ، هاحاول المرَّادي الهاند أوفر يكون كاتيجورايزد ، بحيس يبئى عندك فكرة عن كل جانب من جوانب الحياه الكندية ، كما لمستها...

أكلمك بدايَتن عن خطوط الطيران اللي اتعاملت معاها ف المرتين اللي رحت فيهم كندا ، والفرء بينهم وبين الخطوط بتاعتنا ف الميدِل إيست اللي اتعاملت معاهم بطبيعة شغلي مع سنتافي ، ونخليها بالتسلسل الزمني...

طبعاً كانت أول مرة أركب طيارة في حياتي ، وأرتفع عن سطح الأرض ، ومفيش تحتي غير الهوا كانت أول ما رُحت ع الكوميت (برّيمة ترانس أوشن) في مايو 2007 ، من جابكو في راس شقير (البحر الأحمر) ، تبع خدمات البترول الجوية (P.A.S.) .

والناس اللي كانو معايا (الكرو بتاع الكوميت) عارفين إني أول مرة أركب طيارة ، فآلولي إمشي ورانا واعمل زي ما هنعمل بالظبط ، لأن الطيار لو خد بالُه إنك أول مرة تركب طيارة وما اخدتش كورس الهيويت (Helicopter Underwater Escape Training) ، هتبئى مُشكلة ، وهيرفض إنك تركب الطيارة م الأساس!

المهم ، مشيت معاهم ، وإدوني موجز عن اللي هيتعَمَل بالظبط (الإير بلاجز عشان الدوشة جوه الهيليكوبتر ، تلبس اللايف چاكيت ، تدخل جوه الطيارة ، تربط السيفتي بِلت) ، وتخلّي عينك علينا وتعمل زينا بالظبط. طبعاً أنا كنت باستكشف الحاجات دي لأول مرة (لا كُنا بنستعمل الإير بلاجز في 92 ف الصحرا ، ولا شفنا اللايف چاكيت هناك طبعاً مانتا مش هتغرأ في بحر رمال هناك وحتى لو حصل مش هيعمل لك حاجة ، ولا حتى شفنا طيارة)!

الناس كانو بيربطو معايا اللايف چاكيت ، ولما قعدت جوه الطيارة آجي يا عم الحاج أحط الحزام – وفاكره زي الحزام المعتاد بتاع العربية – ألائي يا خويا البتاع شكله غريب ومش فاهملُه طريقة أوسّعُه بيها ، ومفيش عندي الرفاهية إني آخد وأْتي واستكشف هوه بيتنيّل ازاي! طبعاً الناس اللي معايا اتكفلو بالمشوار كله ، وانا آعِد زي البطيخة ولا فاهم حاجة ف أي حاجة!

وبعد ما خلص المشوار ده كله ، أتاري الطيار كان عينيه عليّا ، وبيشاورلي "تعالى"! يا وأعة سودة ، أخوك اتأفش! ، و زي ما في شاهد ما شافش حاجة : "أنا الوحيد اللي آل لُه طلّع البطاقة"! وباحضر نفسي اتهزّأ وأومت من مكاني ، ومنتظر بأه "إمسك حرامي" ، او ألائي الطيار بيئول لهم – زي محمد سعد (رياض بيه المنفلوطي) ف اللي بالي بالك – "هاتولي الكلب ده"! أتاري البيه كان عاوزني أقعد في الكنبة المُقابلة (ضهري لُه) عشان اتزان الطيارة ، وتوزيع الأوزان وكده! ده طبعاً بعد ما مفاصلي سابِت!

واحنا ف الطيارة يا ريس ، الرعب اللي تئدر تتخيّلُه ؛ خصوصاً مع واحد عندُه مُشكله مع الارتفاعات (أكروفوبيا)!

دانا فضلت أتجنب كوبري أُكتوبر رِدحٌ من الزمان عشان الوصلة المُعَلَّقة بتاعت غمرة! إحساسي إن الكوبري وعربيتي طبعاً مافيش صاپُّورت تحته ، ولا حاجة شايلاه غير شوية الحبال المعدنية دول!

لدرجت إني كنت بالاحظ إيدي بتتشنج ع الدريكسيون ، وعينيّا بتتجمد ع الطريئ ، ولو كان فيه حوار شغال ف الحتة دي بزّات إنسى إني اتكلم ف أي حاجة ، وباحدف أوتوماتيك ناحية منتصف الكوبري ولا ليه دعوة بالعربيات اللي ماشية ولا حد بيديني كلاكسات ولا الهوا ؛ يمكن كنت باحس إن ممكن الكوبري يتلوح شوية ، والعربيات اللي ع الحافة تُؤَع!

أو ممكن لو سرحت سانية أخبط في الحاجز المعدني اللي على حافة الكوبري ، والعربية تئلب طيارة م الارتفاع ده ؛ طيارة بنزينها خلص ، وموتورها وئف ، وجناحاتها وئعت! إنسى يا ريس إنك تقنعني بأي حاجة غير كده!

واحد بالشكل ده تحطه ف طيارة ، حتى شوية الحبال المعدنية مش موجودين؟! لأ وعشان الرعب يكمل - ماهي ناءصة أصلها - ألائي بيبان الطيارة بتتهز واحنا فوء!

يا نهار أزرأ ؛ هيه الطيارة دي سايبة ومفككة من بعضها ولاَّ إيه؟! طب لو الموتور وئف أو عطل لأي سبب م الأسباب؟! زلطة و وِئعت من فوء؟! ودئيئتين يا ريّس والائي معظم اللي ف الطيارة إدوها إخ وراحو ف سابع نومة ، ولا كإننا ف أتوبيس پريسيچن وطالعين ع البريمة! العالم دي باردة؟ ما بيحسُّوش؟ ما فيش دم؟ نايمين ازاي ف الوضع الزفت اللي احنا فيه ده؟! ما ارتحتش وروحي ردّت غير لما وصلنا الكوميت.

تم تعديل 10 يوليو 2008 بواسطة moheltohamy

[ابو الخير]

حاسس ان اخويا بيحكي لي عن خبراته

انا مستمتع

كمل بقى علي ما اروح اخلص شوية باطنه

[لولا]

دكتور تهامى

واضح انك مريت بتجارب قاسيه قوى فى حياتك :fool:

عشان كده يابنى انت محتاج تشرفنا انا وحسام :lol:

فى قهوة مستغرب وتفك عن نفسك شويه بكام استغراب هناك :rolleyes:

[yassir]

أولا كتير مننا قام بقياس البنطلون قبل كده و طلع مقاسنا و أخر شياكه و اللى ضيق عليه و خانقه المحلات يامه و البنطلونات كتييييييييييير.

ثانيا خف شويه فى موضوع الجمبرى ...أنت عارف موضوع أرتفاع الأسعار ...يعنى بدل الأعدام مشيها أكلات شاقه مشبعه .

ثالثا حتعمل ايه لو أشتغلت هنا فى مقاطعه فوق ....فى الركن البعيد الهادىء ... و لازم تروح بالهليكوبتر حنقضيها مناطيد و لا ايه ....

كمل المسيره ....كمل ....شكلها كده حيغيروا اسم الباب ده الى ساخرون فى المهجر.... :blush2: :lol: :lol:

[samehelassad]

حبيبي محمد التهامي باشا اية الجمال دة اسجل اعجابي الشديد واقولك دوس ياريس مستنيين التكملة

[حسام يوسف]

بجد اسلوبك رائع يا دكتور تهامى

تحياتى

[Papetti]

وبعد ما خلص المشوار ده كله ، أتاري الطيار كان عينيه عليّا ، وبيشاورلي "تعالى"! يا وأعة سودة ، أخوك اتأفش! ، و زي ما في شاهد ما شافش حاجة : "أنا الوحيد اللي آل لُه طلّع البطاقة"! وباحضر نفسي اتهزّأ وأومت من مكاني ، ومنتظر بأه "إمسك حرامي" ، او ألائي الطيار بيئول لهم – زي محمد سعد (رياض بيه المنفلوطي) ف اللي بالي بالك – "هاتولي الكلب ده"! أتاري البيه كان عاوزني أقعد في الكنبة المُقابلة (ضهري لُه) عشان اتزان الطيارة ، وتوزيع الأوزان وكده! ده طبعاً بعد ما مفاصلي سابِت!

ههههههههههههههههههههههههههه

حلوة صياغة الفقرة دي

[moheltohamy]

د. أبو الخير...

يسعدني وجودك معي ، وآهي حواديت تكسر بيها سفالة الباطنة! الله لا يرجعها أيام يا راجل!

د. قناوي ... نورتنا بوجودك. والزبد جاية بس أدام شوية po::

العزيزة لولا ، والعزيز حسام اللي بجد بدأت أخاف عليهم... (مانتو بئيتو دويتو ف المنتدى ده)

من حيس آسية ، هيه آسية... أما الأهوة بتاعتكو ، لا يا ستي ، الله الغني! أنا خفيت والحمد لله ، أو يمكن من كتر الضرب نحست ، وما بئيتش باستغرب عؤبال ما تشطبو على المشاريب اللي فيها وتأفّلوها انتي وحسام!

الأخت مهاجرة ... أشكرك على تواجدك معانا. بس اسمحيلي أسألك سؤال برئ جداً

مهاجرة مهاجرة؟ ولا مهاجرة تماحيك؟ باهزر طبعاً

أصلك فكرتيني بأخونا هشام الكندي ، اللي لسه السفارة ما فتحوش الملف بتاعه م الأصل ، وعنده اعتزاز بالقومية الكندية ، أكتر من أي حد شفته (يمكن بخلاف إيهاب)

سامح باشا هنا؟ يا مرحبا يا مرحبا ... آهو دول الناس اللي يتقال لهم بيتكم ومطرحكم (زي برضه د. قناوي ، ود. أبو الخير). طيورنا المهاجرة قريباً إن شاء الله.

يا ريس الكلام ده هتشوفه بنفسك عن قريب ، وساعتها هتفتكرني وتقول أبو حميد آل الكلام ده من كام شهر. بس ابئى افتكرني ساعتها ، واتصل بيا اعزمني على واحد كابوتشينو بالفرينش فانيللا من عمك تيم هورتونز ، من أبو دولار ونص bv:-

Papetti ...

فيه افيهات في السينما والأفلام والمسرحيات بصفة عامة ما بتقدرش تنساها ، ويحصل معاك الموقف من دول ، على طول تفتكر إحدى الكلمات دي.

واللي بالي بالك ده حفظته ، وكل مرة أشوفة أستمتع يمكن بنفس درجة أول مرة! واللي زيه ... إحم ... الملك الأسد وحياة حشرة المدبلجين بالعربي (كارتون)! أعمل إيه بس؟ باموت فيهم

تم تعديل 11 يوليو 2008 بواسطة moheltohamy

[لولا]

طيب يا استاذ تهامى باشا

انا خلاص سيب القهوه خلاص

امبارح بس انت مكنتش هناك ساعتها.

وبصراحه بصفتك بقيت خبير فى المواضيع الجاده po::

انا بفكر افتح موضوع جديد زيك كده اسميه( ملحمه وطنيه) .

وهو طبعا موضوع جاد جدا بيعبر عن الملحمه الوطنيه بينى وبين حماتى bv:-

بس مش عارفه انزله فى انى قسم ؟

قلت اخد رايك بصفتك صديق خاض التجربه الدنماركيه قبلى

ايه رايك فى الموضوع

[moheltohamy]

والله يا لولا إنتي الواحد ما بقاش عارف لك الجد م الهزار!

بس لو بتتكلمي جد ، يبقى بلاش أحسن لك ، إنتي لسه مستجده ، قصدي عروسة جديدة. وجوزك معاه اللابتوب ، وما تضمنيش ، يمكن يكون مسمي نفسه moheltohamy!

الواحد ما يآمنش لأي حاجة ع النت ياختي اليومين دول

[moheltohamy]

ثانيا خف شويه فى موضوع الجمبرى ...أنت عارف موضوع أرتفاع الأسعار ...يعنى بدل الأعدام مشيها أكلات شاقه مشبعه .

معلش يا ياسر باشا... خليتك للآخر. أصلك فكرتني بموقف لسه معمول الهيتش اللي فات. قلت لازم أحكيه

البوت Boat جايب طلبية الأكل في كونتينر مبرّد ، واتأخر شوية ف المينا ، يمكن بسبب إجراءات خايبانة مع أرامكو السعودية ، الخلاصة إنو اتأخر! ونما إلى علمنا - شوية بالنحوي بأه - إنو ما كانش حد بيوصل له باور (كهربا يعني) ، وف الحر ده ، إنسى إنك تحافظ على درجة التبريد المطلوبة!

طبعاً القرار إتُّخِذ مسبقاً بإعدام كافة محتويات الكونتينر ، بدون حتى الكشف عليها.

الإعدام هنا بيختلف عن الصحرا. ف الصحراء كنا بنحفر حفرة (اللودر) ، ونرمي فيها الأغذية اللي هتُعدَم ، وشوية جاز عليها و ولّع يا ريس ، وبعدين إردم الحفرة ، وكأن شيئاً لم يكن. أو نسلمها لشركة الإنتاج (التابعة للهيئة العامة للبترول) ، وهمه يتخلصو منه بمعرفتهم.

هنا بقى ، عندنا مفرمة... حاجة كده أد الغسالة الكهربا بتاعة زمان ، تحط فيها المواد الغذائية اللي بتتخلص منها (سواء بتعدمها ، أو بقايا الأكل اليومي) ، وتتفرم فتافيت ، وتنزل ع البحر ، وبألف هنا وشفا لجيراننا اللي تحت

مش محتاج أقول لك إن فيه قروش موجودة حوالينا! لدرجة إن عم عمر اللحام (Welder) إصطاد قبل كده قرش صغير (Baby Shark) ، والبيبي ده أد كده بالصلاتو ع النبي من طراطيف صوابعك لكتف سعادتك! بس إوعى ، أطعم أكلة بحرية ممكن تدوقها في حياتك ، لحمته خفييييفة مووووت ، وطعمها يشبة إلى حد كبير طعم رجلين الكابوريا!

تيجي تشوف بعد كل وجبة من الأربع وجبات اللي بتتقدم ع البريمة هنا:

5-7 ص 11ص-1 ظ

5-7 م 11م-1ص

والكيتشين بوي رايح يفرم بواقي الأكل ، السمك قاعد تحت ومستني ، وجعان! السمك حفظ مواعيد الميس po::

وطبعاً من منطلق إن السمك بيتجمع هنا بمختلف أشكاله وأحجامه ، يبقى ده مخزن تموين لأسماك القرش.

بخلاف إن القرش اللي اصطاده عم عمر ما كانش قرش أنابيب ولا قرش مستنسخ ولا قرش لاقيينه مرمي على باب جامع... فأكيد أبوه وأمه شغالين لف تحت ، عمالين يبرمو ويسألو ع الواد إبنهم ، ويا ويله اللي هيؤَع من البريمة ف الميّه!

نرجع لموضوعنا... لما وصل الكونتينر ، لقينا التبريد جوه ما شاء الله ، ماهو البهوات بيصيعو ، وموصيين قبطان البوت يوصل الباور للكونتينر على ما يوصل لنا البريمة (6 ساعات) ، بس على مين؟!

وطبعاً الكم مُبالغ فيه ، يمكن حوالي 200 كجم لحوم ، 300 كجم فراخ ، 50 كجم أسماك ، وبتاع 30-40 كجم جمبري! بخلاف منتجات الألبان ، والتالف من الفواكه والخضروات ، واحتفظنا بالحاجات المعلبة ، أو اللي لم يظهر عليها البوظان.

كل ده بيتفرم ، أدامي وعلى يدّي. وحواليّا مجموعة من الناس اللي معانا ف البريمة ، اللي في وقت الراحة بتاعهم عمالين يتفرجو ع اللي بيحصل!

الفرم شغال يا ريس ، وعينك ما تشوف الا النووور... مظاهرة شغالة تحت... إنتفاضة... هجوم! كم غير طبيعي من الأسماك بأشكال مختلفة ، ونظام ... إلحقو يا جدعان ، الناس اللي فوء دول عاملين عزومة! وتلاقي أسماك الحتة عازمين أرايبهم واصحابهم وجيرانهم ، ماهو الخير كتير ، والموجود يسد

اللذيذ إن كل الحدووووتة الطويلة العريضة دي مش مهمة ، المهم ، اللي كتبتلك المقدمة دي كلها عشان أوصّلهولك ، إن كان فيه مهندس بترول مصري ، تبع شلمبرجيه موجود معانا بيعمل جوب!

الراجل ده كان قلبه بيهفهف ع الجمبري وهوه بيتفرم! وقاعد يقوللي ، يا دكتور بالذمة ده كلام ، جمبري بالمنظر ده والحجم ده ، ويتعمل فيه كده؟ دا الجمبري زي الفل مفيهوش ولا كلمة! يا سيدي حتى لو بايظ ، سيبنا ناكله واللي يحصل يحصل ، وآخرها حبتين إنتوسيد من بتوع الإسهال ، وخلص الموضوع على كده!

ثالثا حتعمل ايه لو أشتغلت هنا فى مقاطعه فوق ....فى الركن البعيد الهادىء ... و لازم تروح بالهليكوبتر حنقضيها مناطيد و لا ايه ....

يا راجل مانا خفيت ، يعني المشوار ده كل شهر ، وهافضل عيان بذمتك؟

آهو أنا اليومين دول بقى بقيت زي الكرو بتاع الكوميت ... bv:-

بانام وأصحى واحنا داخلين ع البريمة بتاعتي (Main Pass 1).

[moheltohamy]

نرجع بقى لموضوعنا الرئيسي ، ونخش ع التوبيك اللي بعده... خطوط الطيران ، وطبعاً أول تجاربي كانت مع خير بدء ؛ طيران بلدنا ... مصر للطيران

نيجي لأول مرة ركبت فيها طيارة ركاب م العاديين دول.

كان الكلام ده يوم الخميس 14/6/2007 ، وكانت خطوط مصر للطيران (Egypt Air) اللي طالعة دبي وكنت انا ورمزي ، وزي ما بيئولو أول القصيدة كُفر!

الطيارة كان ميعادها 7م. ومن مُنطلق إن دي كانت أول مرة ليّا ؛ كنت الساعة 3م ف المطار ، ورمزي جه الساعة 4م.

خلصنا إجراءاتنا ، وفضلنا مستنيين إن حد ييجي يعبرنا ؛ ولا الهوا! bv:-

جينا ع الساعة 8م رحنا نسأل ممثل شركة مصر للطيران ف المطار إيه الوضع؟ "أصل الطيارة بتاعتكم فيها شوية صيانة" ، هيخلصو إمتى؟ مش عارفين. بعد شوية جالنا يبلغنا "الطيارة اللي كانت هتاخدكم لدُبي طلعت شرم الشيخ" ، يا سلام ، كيداهوه؟ طيب ، وإيه الوضع دلوأتي؟ "هنحاول نشوفلكو طيارة تانية". طيب!

ع الساعة 10م كنا خلاص استوينا ، رحنالُه ، "هوه المفروض هنطلّع لكم طيارة تانية" ، طيب يا سيدي وبعدين؟ "بصراحة مش عارف"! وإمتى الطيارة التانية هتيجي عشان نعرف راسنا من رجلينا طيب؟ "بصراحة مش عارف" ، طيب ممكن المدير المسئول نتكلم معاه؟ "ماهو أنا المدير المتواجد حالياً"!

حلو أوي ، آهي كده ظاطت! الكلام بالمنظر ده ما عادش منّه رجا. po::

رجعنا على صالة الانتظار ؛ وربنا يلطف بعبيده بأه! شوية ولئيناهم جايين يوزعو علينا وجبة! ما تعرفش بأه صعبنا عليهم ، ولاَّ آلولك نلهيهم بحاجة على ما ندبّر نفسنا!

المهم ، شافولنا طيارة صغيرة على أد الركاب الموجودين ، وع الساعة 11م كنا جواها! ودي كانت الانطباعات الأولى للطيران المدني بالنسبالي!

الميزة الوحيدة ف المره دي إن عددنا كان قليل ، وبالتالي كان ممكن تؤعُد ف الحتة اللي على مزاجك ؛ طبعاً جمب الشباك هوه المكان المُفضَّل!

وطبعاً المشكلة مع الطيران العادي ده بالنسبالي ع الأقل - كانت ولا تزال حتى الآن - فترتي الإقلاع والهبوط! بافضل مش على بعضي لغايت ما الطيارة تتعدل ؛ سواء فوء ف السما أو على أرض المطار! يمكن اللي رحمني شوية ف المرة دي إني كنت تعبان فـــ ... نمت

والمُلاحَظ في مصر للطيران ، المضيفات بتوعها ، زي ما يكونو بيجيبو بنات معاهم دابلون (دبلوم صنايع مسلاً) ، ويكونو م الشرابية أو بولاء أو إمبابة (حد هنا م الشرابية؟ أجدع ناس!) ، وتشوف اليونيفورم بتاعهم مش ف الفورمة خالص ، والماكياچ اللي حاطّينُه بغباء (نظام ... هبلة ومسّكوها طبلة)!

والوجبة اللي بتتقدم لك ف الطيارة ... محدش هيسألك تحب تاكُل إيه ؛ هيه أوپشن واحد ؛ ولاّ انتا فاكر نفسك في مطعم؟! دا كُبَّايات الميَّه يا عم الحاج زي كبايات سوانكو البلاستيك البيضه دي ، اللي ما شفتهاش في أي خطوط طيران غير مصر للطيران!

تم تعديل 11 يوليو 2008 بواسطة moheltohamy

[moheltohamy]

نخش ع اللي بعده...

طيران الخليج (Gulf Air) ودي ركبتها وانا راجع لأول مرة من بريمة سنتافي (المين پاس وَن) ، وبنركبها من مطار البحرين ف المنامة.

والمُلاحَظ إن البحرين دي كلها على بعضها تتلف ف ساعة ، دا يمكن القاهرة تكون أكبر من دولة البحرين كلها(20 كم أفقي ، و40 كم رأسي)! لكن البلد دي روعة ، والطرق بتاعتها والمباني ، زي دبي كده ، ويمكن أحلى!

وبصراحة يابو حميد ؛ المطار بتاعهم أكتر من رائع ، والسوق الحرة هناك تحفة ، هيه يمكن الأسعار هناك مش واو أوي ؛ بس الحاجات اللي هناك هاي كواليتي ، وكزلك اللي بيبيعولك. عندك مسلاً ، جناح العطور ؛ متنوّع بشكل غير طبيعي ، والبنات اللي متواجدين ف المنطقة دي ، خبراء بجد. phn:

أقول لها عاوز بارفان زي هيپنوتيك پويزون بتاع كريستيان ديور ، يعني نفس النظام بس عاوز حتت اختلاف ؛ ما هو مش هنأضّي حيانتا كلها پويزون! شممتني واحد ، لأ يا ستي ده فائع حبتين ، التاني ، لأ برضه ، ده هادي خالص ، وهوه التالت يا ريس ، أيوااااه ، هوه ده! i*:

همة شكلهم من جنوب شرق آسيا ، بس اللغة الانجليزي أستازة ، وأسلوب الحوار راقي ، ولبسهم شيك واستايل بصراحة. تحس إنك إنسان محترم وانتا هناك. والدهب اللي هناك يمكن غالي شوية مش أوي ، بس الفن ف الإخراج والفينيش يا مُعلّم ، و22 قيراط.

ومضيفات الخطوط دي معظمهم من جنوب شرق آسيا ، ومنهم أوروبيات م اللي (أتصور جمبه والنبي يابا) ، وشياكة إيه ، وطعامة إيه. ولابسين مش آدر أئول حجاب ؛ هوه الكاب الكحلي ، وإيشارب ساتان مايص ، وتسريحة الشعر ملموم على ورا وعلى فوء وملفوف كحكة (التسريحة دي باحبها بصراحة)

وقابلت منهم واحدة مصرية ، بسكوتة من مصر الجديدة ، ومقيمة ف المنامة ف البحرين معظم الوقت. بس خفة دم ورِقّة وعاجبني جداً نطقها ف الانجليزي (على فكرة ؛ بتفرئ أوي لما تكون متربي ف مدارس لغات من صُغرك وبتئول "ثانك يو" عن اللي درسُه في مدارسنا اللي انتا عارفها و"سانك يووه"!). دانا يا راجل لسه فاكر لما بنت خالتي سمعتني بائول "باكتيريال بَطرِيفاكشِن" ؛ كان هاين عليها تتف ف وشّي "إسمها پيوتريفاكشن"! وانا إيش عرّفني يا منى؟ ماهو بتاع الدايچيستيف ف الفيسيولوچي هوه اللي كان بينطأهالنا كده ف المحاضرة! عاهااااااات!

وفي أيام الصيف (عودة المصريين) ؛ حصل موقف من المواقف الزبالة ...

نلائي الكابتن بيزيع إنو معلش يا جماعة إحنا جاهزين للإقلاع بس فيه 2 ركاب ماجوش ، هنستناهم 10 دئايئ! شوية كمان ، معلش 5 دئايئ كمان! شوية تانيين ، هنمشي ونسيبهم خلاص ، ننتظر على ما الناس يفرزوا الشنط بتاعتهم من بطن الطيارة ، ونتلطع يا عمنا كمان 10 دئايئ! تلائيك ف الآخر متأخر نُص ساعة عشان فيه بهوات بيتدلعو! :winner:

واللي يخلي الواحد يفرفر – وأكيد انتا لمستها بنفسك – إن التكييف بتاع الطيارة بيشتغل لما الطيارة تكون أولريدي ف الجو! تبئى انتا متأخر ، وهتفطس كمان! الله يرحم أتوبيس 92 اللي لو اتأخر 5 دئايئ ، كانو الناس بيعملوها كارسة! :110:

تم تعديل 11 يوليو 2008 بواسطة moheltohamy

[ايهاب سالم]

(على فكرة ؛ بتفرئ أوي لما تكون متربي ف مدارس لغات من صُغرك وبتئول "ثانك يو" عن اللي درسُه في مدارسنا اللي انتا عارفها و"سانك يووه"!). دانا يا راجل لسه فاكر لما بنت خالتي سمعتني بائول "باكتيريال بَطرِيفاكشِن" ؛ كان هاين عليها تتف ف وشّي "إسمها پيوتريفاكشن"! وانا إيش عرّفني يا منى؟ ماهو بتاع الدايچيستيف ف الفيسيولوچي هوه اللي كان بينطأهالنا كده ف المحاضرة!

يا محمد يا اخويا أحب أقول لحضرتك إني أصبحت بأحاول متكلمش إنجليزي أمام أولادي اللي مشرفين كندا من شهور فقط

عشان شكلي ميبقاش وحش

[مهاجرة]

الأخت مهاجرة ... أشكرك على تواجدك معانا. بس اسمحيلي أسألك سؤال برئ جداً :unsure:

مهاجرة مهاجرة؟ ولا مهاجرة تماحيك؟ باهزر طبعاً :blink:

أصلك فكرتيني بأخونا هشام الكندي ، اللي لسه السفارة ما فتحوش الملف بتاعه م الأصل ، وعنده اعتزاز بالقومية الكندية ، أكتر من أي حد شفته (يمكن بخلاف إيهاب)

ههههههههههههههههههههههه

ولو طبعا ما فهمت معنى كلمة تماحيك اذا كانت الكلمة هاي مصرية فأنا مش مصرية اعذرني , بالنسبة لأختياري لأسم مهاجرة مجرد تفاؤل لا اكثر ولا اقل والهجرة بالنسبة لي خليتها على ربنا اذا شاء فخير واذا لم يشأ فهو ايضا خير والحمد لله على كل حال .

[moheltohamy]

الخطوط السعودية (Saudi Arabian Airlines) ودي ركبتها بعد مده من تعاملنا مع البحرين وطيران الخليج. هيه عموماً مش وحشة ، وأحسن من مصر للطيران بالتأكيد ، بس باقي الخطوط أحسن منها.

وف الطيارة طبعاً لك أن تتوقع إيه اللي بيعرضوهولك ع المونيتور ، مناظر طبيعية من السعودية وتتأمل في جمال الصحرا وطعامتها وخرير المياه ف الحتت اللي فيها المياه ، لكن لا أفلام ولا موسيقى ولا أغاني ، وطبعاً المضيفات محجبات بضمير. وكتير م المضيفين رجّالة! مش سكتي خالص ، مانتا فاهم .. هيهيهيهيهيهي :rolleyes:

بس الناس فريندلي بجد لما اتكلمت معاهم (قصدي الرجالة).

وفيها طيارات كبيرة وطبعاً فخمة (مسلاً فيها كاميرا Bird's eye اللي هيه تحت الطيارة تخلّيك تعيش جوجل إيرث لايف) ، وفيها طيارات أصغر وأقل فخامة (وعلى فكرة ، كل إير لاينز عندها فيه كده وفيه كده "الناحية التانية").

تم تعديل 12 يوليو 2008 بواسطة moheltohamy