إحنا بتوع الاتوبيس - فيلم بوليسي وطني رومانسي أكشن

[se_ Elsyed]

عندما قرأت موضوع أخونا كاتماندو لما كان عايز يسيبنا علشان زعلان وبعدين رد عليه محمد الشهير بإم جرمون وقاله معليش اعتبر أن واحد داس على رجلك من غير مايقصد وانتوا واقفين فى الاتوبيس ....

فمن هنا أصابني فيروس التأليف وقولت أشمعنى انا ما الكل عمال يألف ... وتصورت سيناريو لمشهد كوميدي موجود فيه بعض اعضاء المنتدى فى أتوبيس وحصلت عدة مفارقات مضحكة ...

ملحوظة : قبل ما أبدء احب اعرف هل فيه حد عنده اعتراض على ذلك ... وأنا والله من الأول ماعنديش أي توجه أيديلوجي او أقصد إسقاطات مخفية ولا حاجة من الكلام الكبير ده اللي مش فاهم هو أيه أساساً لإني انسان بسيط واللي في قلبي على لساني ...

في إنتظار ردكم لو حد عنده إعتراض.

[amir]

بصراحـه أنا معترض على أى توجه أيديلوجي أو أى اسقاطات مخفيه

و مش بحب حد يدوس لى على رجلى لأنها بتوجعنى

يعنى من الأخر كده ، عايز قصه رومانسيه فى الاتوبيس

نحـن فى الانتظار بس احدف لنا سندوتشين حواوشى على ما تجمع أفكارك

[White heart]

و انا من فضلك لو سمحت .... عاوز الأوتوبيس يكون من غير أى (شرطه) ( بفتحه على الشين )... حاكم انا عمرى ما فهمت حكايه "الشرطه" دى!!!

لكن ممكن نستثنى الأتوبيس نمرة 108 بشرطه، أهو الواحد برضه ينزل فى "الكوم الأخضر" يرفه عن نفسه شويه ... اللا بالحق هما ليه سموة "الكوم الأخضر"؟؟؟

ياريت الأوتوبيس يكون ليه أبواب و شغاله يعنى بتفتح و تتقفل و كراسيه غير اللى فى الصورة و يحبذا لو كان الأتوبيس بيقف فى المحطات، و من غير كمسارى يعنى السواق هو المحصل فى نفس الوقت علشان الناس تطلع أخيرا من قدام و تنزل من ورا،الأتوبيس يكون مجهز بزرار بجانب كل كرسى يدوس عليه اللى عاوز ينزل فى المحطه اللى جايه (نوع من أنواع مساعدة السائق فى احترام جدوله و المرور فى نفس الوقت)، وسط الأتوبيس يكون فيه مكان فارغ لعربه طفل و كرسى معوق مع مراعاة خاصيه ميل الأتوبيس هيدروليكيا كاملا من ناحيه الأبواب تسهيلا لصعود و نزول هؤلاء، يكون مكيف صيفا و مدفئ شتائا، بما اننى من مشجعى حزب الخضر فأفضل ان يعمل الأوتوبيس بالطاقه الكهربائيه أو على الأقل التأكد (بصفه دوريه) من خلو عادمه من الملوثات الخطيرة على الصحه و البيئه، يمنع منعا باتا الأكل و الشرب و التحدث فى المحمول و التدخين فيه، مع تشديد الرقابه سواء على ما يخالف هذة التعليمات أو من يتهرب من دفع الأشتراك أو التذكرة وتوقيع الغرامات الفوريه عليهم و بلا تمييز، التأكد من نظافه الأتوبيس و غسيله يوميا، و سأكون متساهلا فى عدم تحديد لون الأوتوبيس أو الكرافته بتاعه السواق و زيه!!!!

بس انا خايف ليكون الأوتوبيس اللى بتتكلم عليه يكون من النوع اللى بيوزعوا عليه "عجينه" وانت داخله ... مع الترحيب الملائم ....

زى دة مثلا:

[Lancelot]

ملحوظة : قبل ما أبدء احب اعرف هل فيه حد عنده اعتراض على ذلك ... وأنا والله من الأول ماعنديش أي توجه أيديلوجي او أقصد إسقاطات مخفية ولا حاجة من الكلام الكبير ده اللي مش فاهم هو أيه أساساً لإني انسان بسيط واللي في قلبي على لساني ...

سيبك من الإسقاطات و الكلام ده لأني مش بأفهم الإسقاطات ديه أصلا .....

المهم .. الإنجاز ... يعني مش تكتب كلمتين و تنام سنة ... ما تعملش زي سكوب ... يكتب سطرين و يأخد أجازة ..... أنا ثلاث مشاهد علي الأقل كل يوم ... بص خد أجازة من الشغل ... و لا أقولك إستقيل خالص .... بلا شغل بلا وجع دماغ ... و أنا عليا أنتج الفيلم ده أشد إنتاج .... في شركتي ... لانس للإنتاج الفني و التوزيع .... أو في الفرع الأمريكاني .... لانس برزاز بروداكشن .... هو إحنا عندنا كام سي السيد يعني .... "إتنين طبعا واحد بتاع المنتدي و التاني اللي في الفيلم" ....

[حشيش]

أدينا قاعدين مستنيين لما نشوف أخرتها معاك يا س.س.....عايزين قصة تكسر الدنيا...سكوتتتتتتتتتتتتتتتتتت.....أكششششننننننننن....إحنا على الهوىىىىىىى

[se_ Elsyed]

بسم الله الرحمن الرحيم

فيلم " احنا بتوع الاتوبيس " المنظر الاول كلاكيت

منظر عام نهار خارجي لأتوبيس مكتظ بالركاب ويادوبك لسه طالع من المحطه :

كاتامندو : أي أي حاسب يابني أدم انت فعصت رجلي اليمين ... انت مش واخد بالك ان فيها كالو .

وايت هارت : لو سمحت أنت كده بتعتدي على حريتي الشخصية .. وطالما سيادتك ركبت أوتوبيس عام تبقى تستحمل اللي يجرالك يا عزيزي.

كاتماندو : آه يا زمن ..... منك لله ياللي سرقت مرايات العربية وحوجتني لركوب علبة السردين دي ... آه يا رجلي آه يا كالو ...

وايت هار : فى أوروبا والدول المتقدمة الناس مابيجلهاش كالو .. لأن الحكومات بتحترم أدميتهم وبتوفر لهم وسائل نقل مريحة .

فريده تهمس فى أذن إلهام : شوفتي يا إلهام يأختي جالك كلامي يعني اجوازنا لو كانوا بيدونا مرتب شهري أو مصروف زي أي عيل صغير كنا زماننا راكبين تاكس دلوقت ومتستتين .

إلهام : ما أنا قولتلك يا ام أبراهيم أبدئي اعملي مشروع المحشي البيتي اللي فكرتي فيه وبيعي للجيران وربنا هايفتحها عليكي بعد كده وتفتحي ريستوران كبير وممكن تعملي كمان هوم ديليفري .

فريده : والنبي عندك حق يأختي ، آه منهم الرجالة دول ... مفتريين بعيد عنك .... وعلى رأي المثل " آه يا مأمنا للرجال يامأمنا للميه فى الغربال .

في هذه الأثناء يتوقف الأتوبيس في أحدى المحطات ويصعد آحدى الباعة الجائلين حاملاً على يديه صاج وبدء يهتف

- صلي على رسول الله .... يجعل نهارنا صابح ورابح وينجينا من الفضايح .. أنا بأقول يارب يا هادي عليك إعتمادي ، انا المعلم س س بياع السمين ... معايا الحواشي الطازة يافنديه .... أحنا كنا بنبيع الرغيف ده فى أمريكا بـ 5 ين ... وبعناه فى أيطاليا بـ 10 فرنك .. وعلشان خاطر ولاد بلدنا الباشوات بنبيعه بجوز جنيهات ... مين قال هات ..

نورا : أوووووف أيه الأرف ده ... حاسب يا عم أنت ..

س س : بتقولي حاجة يا قرنفلة ..

نورا : لأ مافيش حاجة .. بعد أذنك الأقي معاك سندوتشات تشيز برجر أو أي حاجة من KFC ...

س س : مين ياختي .... ده دوا كحه ده ولا أيه ؟ ...

سلوى : يا سلام .. اما الشعب المصري ده طيب بشكل .. سبحان الله فجأة أتحول الأتوبيس وبقى زي السوق وبقى فيه مشاعر دافئة بين الركاب .. صحيح عمار يا مصر.

شعنونة تتوجه بالسؤال إلى السواق : قولي يا أسطى باشا لو سمحت هو الأتوبيس ده رايح السلوم ؟

السواق : فين يأختي ؟

شعنونة : قصدي رايح المحطة اللي بيطلع منها اتوبيس السلوم ..

السواق : آأأأه . أيوه أحنا هانقف فى المحطة اللي موجوده على الطريق الدائري .. وزي ما قال شعبان عبد الرحيم " الحلو على الدائري أول ما شافني جري " هاع هاع هاع ....

يتوقف الأتوبيس فى محطة آخرى ويصعد مجموعة من الركاب وبينهم موظف غلبان يرتدي بدلة مقلمة موديل لويس السادس عشر ويمسك بيده بطيخة ويتشبث بها .....

ابن مصر : لو سمحتوا وسعولي يافندية عايز أدخل جوه .. لو سمحتوا ...

الكمساري : العربية فاضية جوه يافنديه أدخلوا شوية السواق بيفرق ميه بسكر جوه .... نساعد بعض يا فندية ..

و يتوقف الاتوبيس بشكل فجائي فيطيح أبن مصر على الأرض وتتطيح معه البطيخ وتنزل على الأرض على هيئة فتات ويبدأ فى الصراخ

- بطيختي .. بطيختي . مستقبل عيالي ... حرام عليكوا يا ناس ده انا مقدم عليها بقالي 3 شهور .. ووعدت الاولاد إني هأحقق لهم امنيتهم وأجيب لهم بطيخه فى يوم من الأيام ... طب أرجع أقول أيه لبنت مصر ؟ ... وإذا هي تفهمت الوضع .. أقول أيه للبنتين ؟ .. خصوصاً البنت الصغيرة دي أيدها تقيلة قوي ... أهيء أهيء

يقترب منه بائع الحواوشي س س ويسأله ..

- س س : عدم اللامؤخذه يافندي هي مين بنت مصر دي ؟

أبن مصر : وانت مال اهلك ...!!!

س س : طب ماتزوقش .. انا كنت هاساعدك واديك ايلي فيه النصيب ... عالعموم أحنا ولاد بلد برضوا وبنفهم فى الأصول خد الاتنين جنية دول هاتلك بيهم بطيخة تانية وأدي كمان رغفين حواوشي اتغدا بيهم انت والاولاد انت باين عليك موظف غلبان ...

يتبع ...

[فــيــروز]

هايلز

المنتدى واضح انه طفح بالمواهب الادبيه ما شاء الله

بس انا من ساعة ما ربنا فتح عليا واشتغلت بطلت اركب اتوبيسات الحمد لله يبقى معنى كده انى مش هاطلع معاكم فى الفيلم عشان امى تشوفنى و تقول البت فيروز بنتى اهه يا رجاله اللى فى التلافازيون دى يعنى طلعونى فى اى مشهد كومبارس حتى عشان خاطر الست الوالده يا اما هاخطف الاتوبيس زى فريد شوقى وامنع صعود بائعى الحواوشى

[White heart]

se_ Elsyed كتب:

كاتامندو : أي أي حاسب يابني أدم انت فعصت رجلي اليمين ... انت مش واخد بالك ان فيها كالو . 

وايت هارت : لو سمحت أنت كده بتعتدي على حريتي الشخصية .. وطالما سيادتك ركبت أوتوبيس عام تبقى تستحمل اللي يجرالك يا عزيزي. 

كاتماندو : آه يا زمن ..... منك لله ياللي سرقت مرايات العربية وحوجتني لركوب علبة السردين دي ... آه يا رجلي آه يا كالو ... 

وايت هار : فى أوروبا والدول المتقدمة الناس مابيجلهاش كالو .. لأن الحكومات بتحترم أدميتهم وبتوفر لهم وسائل نقل مريحة .

هى بدايتها مسك كدة يا س.س؟؟

على فكرة دى سخرية مباشرة و صريحة .....

دورى فى الكليه بتاعه العزيز "سكوربيون" كان أحسن .....

هى الدنيا كدة يوم عسل و يوم بصل .....

بس و ماله طالما اللى فى الأوتوبيس مبسوطين و بيضحكوا ... يبقى أحسن مليون مرة ان الواحد يبقى فى اوتوبيس كله ضحك و فرفشة ..

بدل ما ( يا حفيظ ) نكون فى اوتوبيس من نوع تانى :

[Lancelot]

Posted: Sat Sep 13, 2003 8:05 am

الساعة بدأت تدق أهي ..... عارف لو إتأخرت .... هأعيد قراءة القصة مرتين بس مش أربعة ... مفهوم ....

حلو أوي لحد دلوقتي .... بس أوعي الأتوبيس يتعطل و تطلعني الميكانيكي مثلا .... أنا مش بأفهم أي حاجة في العربيات و هأدخلك الأتوبيس في أول عمود ...

[se_ Elsyed]

ويبدأ بائع الحواوشي فى رفع صوته حيث انه لم يبيع أي رغيف حتى الأن وعندئذ ينادي عليه احد الركاب :

إم اتش إم : من فضلك لو سمحت يا اخ أنت .... الحواوشي ده حلال ولا حرام ؟

س س : مش فاهم يا شيخ إزاي يعني .

إم اتش إم : يعني بالبلدي داخل فيه لحم خنزير او أي مواد مختمرة ...

س س : يا نهار إسود .. لا وعهد الله يا عم ده معمول بلحمه بلدي صافي وبصل وفلفل أخضر ...

إم إتش إم : ما رأيك يا شيخ جرمون ...

جرمون : بما أنه قد حلف فهو يتحمل نتيجة حلفانه .. وقد قال رسول الله ( ص ) : من غشنا فليس منا " فلو كان بيكدب يبقى على جهنم عدل ..

س س : طب الفلكوا رغفين بالصلاة النبي ..

إم إتش إم : لأ يا أبني أتكل على الله أنا كنت بسأل لكي يطمئن قلبي فقط ..

س س : كسبنا صلاة النبي ... يعني كنتوا هاتلبسوني تهمة على قلة فايده ..

وهنا يتدخل الشيخ براود بهدوئة المعتاد : هدي نفسك يا معلم معليش هما مايقصدوش حاجة والله ... بقول لحضرتك أيه أنا سمعت ان فيه مطعم " فاست فوود " فتح جديد فى التحرير .. ماتعرفش هو فين بالظبط ..

س س : أيوه يا بيه في مطعم فول فتح بس ده فى باب اللوق مش فى التحرير ...

براود : لأ فول أيه يا عم .. أسمه فاست فوود يعني سندوتشات هامبورجر وسوسيس وكده ..

س س : أيوه أيوه .لأ والله يا شيخ كل اللي أعرفه أن فيه واحد فارش بعربية كبده فى عابدين أسمه " حسن حينيش " بس عنده شوية كبده وسجق من الأخر حكاية ...

وهنا يلمح بائع الحواووشي شخصين فى الركن الخلفي للأتوبيس وهما جالسان ويدخنان السجاير بشراهة وتتصاعد منهما أعمده الدخان الأزرق فذهب إليهما .

س س : مـــــــــــــــــساء الخـــــــــــــــــــــــير .. صباح الصباح واللي جاي أحسن من اللي راح

حشيش : مساءك زي وشك .. عايز أيه ياله ...

س س : معايا حواوشي يستاهل نفسك ياباشا ...

حشيش : طب قصر ورص رغفين ...

وهنا يتدخل سكوب : لأ يرص أيه يا شيشو ده بيقولك حواوشي ... لف رغفيين هنا يابني ..

س س : صباح السنجفة يا ريس وإستفتاحكوا عسل بإذن الله ... الباشوات مين عدم اللامؤخذه ...

سكوب : ده المعلم حشيش أبو دومه أكبر تاجر هــبو فى نزلة السمان ... وانا المعلم سكوربيون دراعه اليمين ومدير فرع الكوبانية في إيطاليا ..

س س مستغرباً : كوبانية ؟!!!! كوبانية أيه يا باشا أنتوا بتوع مصلحة الميه ..

حشيش : مية أية ومجاري أيه يالا يا خنتريش أنت .... أحنا معلمين كبار وعلى مستوى ومابنشتغلش جهجاهوني يابني أحنا وبلا فخر المعلم حشيش أبود دومه صاحب ومدير كوبانية " جايين الدنيا ما نعرف ليه " للإنتاج والتوزيع .... هارش ..

س س : أيوه يا باشا هارش ... أنا فهمت كده ... ربنا يزيدك ... بس لا مؤخذه يا باشا أنا اعرف ان انتوا أمبراطورية وعندكوا ما شاء الله عربيات تسد عين السمس .. طب راكبين الاتوبيس ليه ؟ ...

سكوب : أنا هأقولك - بس ده اخر سؤال هاجاوبك عليه - المعلم أبو دومه هاينزل صنف جديد فى السوق أسمه " سوق على مهل سوق " وده خصوصي للسواقين والعاملين بقطاع النقل .. فحب يجرب بنفسه مدى تفاعل دخان الشكمانات مع دخان الجوزة وتأثير ده على دماغ الزبون .. واتفضل أمشي قبل النفسين اللي شدهم ما يطيروا من دماغ المعلم ويقوم يلبسك الصاج اللي انت شايله ده ....

يتبع ............

[se_ Elsyed]

وتوقف الأتوبيس فى محطة اخرى وصعد عدة تلاميذ حاملين على ظهورهم شنط المدرسة ...

الكمساري : تذاكر يا بابا .. أيوه أنت يا حبيبي يابو قميص مخطط .

لانسلوت : موديريشن تيم .

الكمساري : مين يا نونس ؟!!!! يعني أيه كوميبنيشن تين .. أمين شرطة أسم الله ولا أيه ؟ ..

عادل أبو زيد يشارو للكمساري من مقدمة الاتوبيس : سيبوا ده تبعي يا ريس .. وخد الربع جنية تمن التذكرة أهو ..

الكمساري : وبعدين أيه اللي انت عامله فى نفسك ده يابني مش عيب عليك كده ... معلق فى صدرك غطى صفيحة سمنه وعاملهولي درع ... وماسكلي فى أيدك عصاية قفص فراخ وعاملها لي سيف .. فاكرلي نفسك ريشتارد قلب الأسد ..

لانسلوت متقمصاً دور الفارس : أنت لا تعلم يا أسطى مشاعر الفلاحين فى المزارع ... العجائز أما مدافئهم ... الأطفال وهما فى دريم بارك .. الستات وهما فى سوق العبور ....

الكمساري : ريتشادر .. ريتشارد ... انت تبحث عن مجد شخصي ... انت تريد أن يقول الناس عنك ريشتارد البطل .. ريتشارد المنقذ .. ريتشارد الذي عاد إلى الهايد بارك ومعه مفاتيح أورشليم ولكن هذا لن يحدث ... لن يحدث وأدخل ياله جوه وبطل غلبه وروح ذاكرلك كلمتين الأعدادية قربت .

الكمساري : تذاكر يا ماما يا أم فيونكة وبلوزه زرقا ..

أيمبوسيبل : من فضلك الاول يا عمو ، الاتوبيس ده بيعدي على بيت الطالبات .. أصل انا من طنطا وداخلة الجامعة جديد و ...

الكمساري : خلاص أنت هاتحكيلي إصة حياتك أيوه بيروح بيت الطالبات وبيت الرعب كمان .. أطلعي بربع جنية ..

إيمبوسيبل : لأ انا معايا إشتراك ...إتفضل

الكمساري : آآآه : إلاشتراك ده ياماما ماينفعش هنا فى مصر ده كبيروا تركبي بيه السوارس بتاع طنطا .... هاتي ربع جنية وخلصي ...

إيمبوسيبل وتكاد الدموع ان تفر من عينيها : حاضر حاضر انا أيه اللي كان جابني هنا ... تعالي شوفيني يا ماما وانا بأتبهدل .

وأقتربت أحدى الفتيات من السائق قائلة له :

فيروز : لو سمحت يا أسطى خلي بالك لو هاتخد طريق صلاح سالم وبعدين العروبة ماتمشيش من نزيه خليفة وأنزل نفق العروبة وبعدين خد يمين على الكيت كات .. كده اسرع وأسهل ..

السواق : والله عال طب ما تيجي تسوقي حضرتك بدالي .. وأقعد انا ورا فى الاتوبيس أسقع قلل ..

فيروز : لأ العفو انا قولت أخلص ضميري واموت وانا مستريحة ... أنت حر .. امشي زي ما انت عايز .

وهنا تتدخل شعنونة فى الموضوع : مساء العسل يا أسطى باشا هدي نفسك .... سيجاره حمرا ...

السواق : صباح الهنا يا جميل .. شكراً .. السلوم واللي منها أحلى مسا ...

شعنونة : إلا قولي يا أسطى أنت بتعمل كام فى الفرده ؟ ..

السواق : والله حسب التساهيل يعني فى الأصطباحة .. ممكن اعملي 15 20 ج ... فى المسا ممكن 12 ج كده يعني .

شعنونة : أصل بيني وبينك بأفكر أسيب الطب وقرفه وأجيب ميكروباص وأشتغل على خط رمسيس - منشية ناصر .

السواق : بس خلي بالك يا مزمازية شغلانة السواقة دي عايزة واحد لبط ومقطع شهادة الميلاد علشان يعرف يسلك مع طايفة عفاريت الأسفلت ..

شعنونة : لأ ماتخافش عليه ده أنا بنت سوق ومايغركش منظري .. ده انا الدنيا خدت مني رقات وأسأل عليه أسواق الخضار وبوابين العماير.

وفي وسط الاتوبيس كان يجلس مجموعة من الأشخاص يرتدون نظارات نظر سميكه ويحملون مجموعة من الكتب والمجلدات وهيئتهم تدل على انهم علماء أو رواد فضاء ..

إيجيبت 5 : تفتكر يا عزيزي محبط ، كلمة حواووشي دي أصلها أيه ؟ يعني هل هي فرعونية أم سيريانية أم ماذا ؟

محبط : انا أقولك .. من خلال مطالعاتي المتعددة أقدر أقول لك أن كلمة حواووشي تتكون من 3 مقاطع " حا " " وا " " وشي " ومعناها في اللغة المسمارية رغيف خبز وفي وسطه لحم مشوي ...

الطفشان ( ربنا يرجعه بالسلامه ) : أنا اؤكد معلومة أخونا محبط وبالفعل من خلال البحث عن طريق جوجل .كوم لقيت معلومات كتير عن الحواوشي وهناك سايت مدعم بالصور عن ذلك وتوجد به صورة رغيف حواووشي معلق بمسمار على جدران احدى المعابد المسمارية مما يدل على ان المسماريين هم اول من أخترعوا الحوواوشي وإليكم الوصلة

www.Hawawshi.com

س س محدثاً نفسه ( إيه الناس الغريبة دي .. ده الواحد ولا اكنه فى برنامج عالم البحار يا جدع )

يتبع ........

[زهــZــرة]

موضوع جميل جدا ياسي السيد

بس انا فين يعني مش شايفاني من ضمن الركاب

ولا فاكرني باركب ميكروبازات بقى وباتعالي على الناس

لا انا الشعب

يعني طبقة كادحة وحاجات من دي يعني

على يمينك يااسطى

[Lighthouse]

قبل ما أبدء احب اعرف هل فيه حد عنده اعتراض على ذلك ... وأنا والله من الأول ماعنديش أي توجه أيديلوجي او أقصد إسقاطات مخفية ولا حاجة من الكلام الكبير ده اللي مش فاهم هو أيه أساساً لإني انسان بسيط واللي في قلبي على لساني ... 

في إنتظار ردكم لو حد عنده إعتراض.

احب اسجل اعتراضي وادانتي الشديدة للاخ س س

لانه لم يسمح لي بركوب الاتوبيس معاهم عملا بمبدأ المساواة بين اعضاء المنتدى في ركوب الاتوبيس اشمعنى انا يعني

اما الاسقاطات والارهاصات والكلمات الكبيرة دي فولايهمك هو احنا بيهمنا الكلام الكبير ده

[بنت شعنونة]

شعنونة تتوجه بالسؤال إلى السواق : قولي يا أسطى باشا لو سمحت هو الأتوبيس ده رايح السلوم ؟ 

السواق : فين يأختي ؟ 

شعنونة : قصدي رايح المحطة اللي بيطلع منها اتوبيس السلوم .. 

ها احووووووووووووووووول

ها احووووووووووووووووووووووووووووول من السلووووووووووووووووم

اما رحت ليبيا وجيبتلكم الرجل الأخضرررررررررررر

ماشي ماشي

[se_ Elsyed]

موضوع جميل جدا ياسي السيد

بس انا فين يعني مش شايفاني من ضمن الركاب

ولا فاكرني باركب ميكروبازات بقى وباتعالي على الناس

لا انا الشعب 

يعني طبقة كادحة وحاجات من دي يعني

على يمينك يااسطى

لايت هاوس كتبت

احب اسجل اعتراضي وادانتي الشديدة للاخ س س 

لانه لم يسمح لي بركوب الاتوبيس معاهم عملا بمبدأ المساواة بين اعضاء المنتدى في ركوب الاتوبيس  اشمعنى انا يعني 

اما الاسقاطات والارهاصات والكلمات الكبيرة دي فولايهمك هو احنا بيهمنا الكلام الكبير ده

السادة الركاب كل واحد دوره جاي ... الاتوبيس فاضي وهايسعنا كلنا ... والمحطات كتير ... واحد واحد يا زباين ....

شعنونة كتبت

ها احووووووووووووووووول 

ها احووووووووووووووووووووووووووووول 

ماشي ماشي

( أنا ألحق اجري قبل ما شعنونة تتحول وتبقى بيونك وومان )

شعنونة ده وعد إني هاظبطلك دورك فى الرواية دي وهاعمل منك نجمة ولا فاتن حمامه فى زمانها ....

بس بذمتك أيه رأيك فى الدور لحد دلوقتي ؟

[Farida]

الأستاذ السينارست الرائع س.س. (بتفكرنى بفيلم الخطايا)

المهم انا اى نعم دورى صغير بس كويس و الله انك افتكرتنى و على فكره انا مش محتاجه مصروف شهرى انا و لله الحمد مهندسه قد الدنيا و باخد 600 ملطوش كل اول شهر بس متهيألى المحشى بيكسب اكتر ....و ايه حكايه ام ابراهيم دى .... انت افتكرتنى بابيع محشى بحق و حقيق ولا ايه ؟

[فــيــروز]

خطايا ايه يا فريده

ده بيفكرنى بالمخرج اللى كان فى الفيلم اللى فيه اسماعيل يس فى مستشفى المجانين و بيمثل مع مجموعه من عنبر العقلاء و خاله مجرم خطير .. حتى بعد ما قبضوا عليه قال لهم جملته الشهيره : هاتولنا بقى محمود المليجى الصراحه سى السيد فى هذه الملحمه تفوق على نفسه و اقترح ياخد جايزة بولى استر -اخت جايزة بوليتزر الصحفيه- العالميه عن جداره

[Farida]

فى فيلم الخطايا وقت الإنتخابات كان فيه ناس بتهتف س.س. (لناديه لطفى) و ناس بتهتف ح.م (لعبد الحليم حافظ ) ....

[فــيــروز]

ايوه صحيح

وكمان ماجده فى فيلم بنات اليوم كانت بتكتب قصص باسم س.س

[se_ Elsyed]

فيروز ... فريده

اتريقوا براحتكوا ... السيناريو لسه ماخلصش .. وبالعند فيكوا هاطلعكوا انتوا الاتنين فى اخر الفيلم كنتوا راكبين الأتوبيس تفليته وهربانين من الكمساري وبعدين الراجل أكتشف ده وخدكوا على قسم النزهة ( وماحدش يسألني أشمعنى قسم النزهة ... يمكن علشان نظيف شوية )