استفسار عن السيارات في كندا

[mohamedadel]

السلام عليكم ورحمة الله وبركاته

معلش ياجماعة أخوكم جديد في موضوع الهجره دي

وعايز حد يساعده من إخواننا أو أخواتنا ألي في كندا ...

ياترى هل يجوز اني اصدر سيارتي إلى كندا ؟ اكيد موضوع المواصفات حيفرق !! مش عارف !!

عموما هيه سياره Mazda CX9 2008 ..

السؤال التاني بالنسبه لكرسي الأطفال ألي بيتحط في السياره ياترى بيكون أجباري لغاية سن كام؟؟

عموما بعد الأستفسار أعرفكم بنفسي أكتر

انا محاسب متزوج وعندي 3 أطفال

أعمل بالأمارات

للأسف لم اعرف هذا المنتدى العظيم إلا من حوالي شهرين بس !!! تخيلواا !!

لما خبرنا المحامي في شهر 3 علشان نعمل الميديكال ... هنا جاء موعدي مع هذا المنتدى الرائع عندما كنت اول مره اعمل سيرش

على السكن في كندا.. تصدقوا طلعلي ايه ؟؟؟؟ !!!!!

طلعلي موضوع حبيب الكل ..... مييين .... الشامي ..... في موضوعه الشهير" الشامي رجع من كندا يارجاله ".... ومن هنا ابتديت تقريبا كل

يوم لازم زياره بعون الله لصفحات هذا المنتدى العظيم بأعضائه ...

ثم اطلبت مننا الجوازات من حوالي 5 ايام علشان الفيزه .. وان شاء الله بكره حنبعتهم وربنا يسهل ...

طبعا انا مهما حوصف مش حقدر أوفي الناس هنا حقها بصراحة.. ناس زوق زوق زوق والله هيه دي الحقيقه

استفدت كمية معلومات ربنا يجعلها في ميزان حسناتكم ...

وآسف للأطاله ...

[mohamedadel]

أنا قولت أبارك للنادي الأهلي فوزه بالدوري طلما محدش رد عليا

عموما انا النهارده ارسلت الجوزات ... وسألت على موضوع العربيه قلولي مينفعش خالص لأنها مواصفات خليجيه

وللأسف حضطر أبيعها :blink: بس ده ان شاء الله لما أنوي استقر في كندا .. وده قدامه شويه

أما الكرسي ... فأنا منتظر لسه الأجابه .. برغم اني أعتقد انه اجباري لغاية 6 سنوات .. بس حبيت أتأكد

وشكرا

[MZohairy]

بيع يا عم و تعالى اشتري من هنا

العربيات المستعمله النضيفه رخيصه جدا

اما الكرسي فحسب المقاطعه

بس عموما لازم كرسي لغاية ما يكون عمره 9 سنين او

طوله 145 سنتي

او وزنه 36 كيلو

[MZohairy]

و ده اللينك

http://www.securijeunescanada.ca/SKCForPar...amp;sssID=11569

[mohamedadel]

ألف شكر يا أستاذ زوهيري ...

وربنا يوفقك للي فيه الخير دائما

[Mercedes]

السلام عليكم و رحمة الله و بركاته

الخ الفاضل , انا ان شالله مقدم على هجرة فيدرال لكندا و من ضمن الحاجات اللى كنت باخد فكرة عنها كانت السيارات و هى فعلا رخيصة فى كندا لكن الغريب جدا انها ارخص بكتيييييير فى أمريكا و دة اللى خلانى أفكر , طاب لمل احتاج عربية , ليه ماخطفش رجلى الى أميركا عشان أشتريها و خصوصا أنه على حسب معلوماتى الضئيلة جدا أنه لا توجد جمارك باهظة بين أميركا و كندا و بدأت بحث على النت و لقيت بعض المواقع المفيدة , ربنا يجعال فيها الفايدة ليك و خصوصا ان سيارتك ما شالله غالية و شكلك اشتريتها زيرو و ممكن لى جيت تبيعها تخسر فيها كتير و بالذلت فى دولة ذى الأمارات و خصوصا أنك لو معاك أسرة , اكيد فى الجو البرد بتاع كندا ضرورى هتشترى و كمان سفن الشحن من الدمام الى أميركا الشمالية مفيش أكتر منها.

http://www.tc.gc.ca/roadsafety/importation/menu.htm

بالتوفيق ان شالله

[أحمد سيف]

حضرتك متأكد من المعلومه بتاعت عدم امكانية شحن السيارات الى كندا ... يا ريت تقولنا مصدرها

أنا لسه شاري سياره جديدة من كام شهر كيا أوبيروس ... وكنت ناوي أشحنها كندا لما آجي أهاجر

خساره كبيره إن الواحد يبيع سياره جديدة بعد سنه ولا اثنين من استعمالها ويروح يشتري من أول وجديد

بس بصراحه انت من حقك تزعل أكثر لإن سيارتك روعه ... بسم الله ما شاء الله

[Mercedes]

السلام عليكم و رحمة الله و بركاته

أنا آسف جدا على الأخطاء الاملائية لأنى مستعجل حبتين

الموقع دة تحت التصليح لكن لأن الكنديين ناس محترمين و مفيش حاجة تفوت عليهم بالساهل فهم و ضعوا اللينكات دى عشان كل ما يخص السيارات فى كندا و الشروط اللازمة لاستيراد السيارات الى داخل كندا سواء من الولايات المتحدة أو من غير الولايات المتحدة و أنا أعتقد أنه بما أنك ملتزم بالشروط اللى المطلوبة منك يبقى مفيش مشكلة تستورد سيارة ان شالله من بلاد الواق واق

http://www.tc.gc.ca/roadsafety/importation/menu.htm

و شكرا على من تحمل اخطائى الاملائية ولم يتذمر

و ربنا يوفق الجميع انشالله

[أحمد سيف]

شكرا للأخ مرسيدس على المعلومات القيمة

تم تعديل 25 مايو 2009 بواسطة أحمد سيف

[mohamedadel]

الف ألف شكر للأستاذ مرسيدس على المعلومات القيمه ... ربنا يبارك لك ... صحيح اسم على مسمى :lol:

اما استاذ سيف .. بصراحة الي قالي على موضوع انه مش حينفع اني اصدرها هو المحامي :D

قالي ان المواصفات بتختلف علشان السياره تتحمل درجات الحراره المنخفضه جدا ... هو ده كلامه ... والله أعلم

وياسيدي متزعلش انا برده عندي كيا زي الفل بروح بيها الشغل كل يوم .. اما المازدا مع المدام ياسيدي ..

عموما قدر الله وما شاء فعل لو عرفنا نصدرها اوكى ... ولو معرفناش أكيد حنبعها هنا وحنخسر فيها كتير بس ارحم 100 مره من اني انزلها مصر وأدفع 3 أضعاف تمنها جمرك

سلام

[أحمد سيف]

الف ألف شكر للأستاذ مرسيدس على المعلومات القيمه ... ربنا يبارك لك ... صحيح اسم على مسمى :)

اما استاذ سيف .. بصراحة الي قالي على موضوع انه مش حينفع اني اصدرها هو المحامي :o

قالي ان المواصفات بتختلف علشان السياره تتحمل درجات الحراره المنخفضه جدا ... هو ده كلامه ... والله أعلم

وياسيدي متزعلش انا برده عندي كيا زي الفل بروح بيها الشغل كل يوم .. اما المازدا مع المدام ياسيدي ..

عموما قدر الله وما شاء فعل لو عرفنا نصدرها اوكى ... ولو معرفناش أكيد حنبعها هنا وحنخسر فيها كتير بس ارحم 100 مره من اني انزلها مصر وأدفع 3 أضعاف تمنها جمرك

سلام

لأ مصر مين يا أستاذي ... أنا عندي أرميها في البحر أحسن ... دي 3800 سي سي يا باشا