بمناسبة وصول عدد مستخدمي الموبيل إلى 2 مليار مشترك ... ماذا يُمثل لك الموبيل ؟

[se_ Elsyed]

كان في إحتفالية عالمية الأسبوع الماضي تحت رعايه الهيئة الدولية للإتصالات بوصول عدد مستخدمي الموبيل إلى 2 مليار بيني آدم على مستوى العالم ... والمعدل دلوقت ماشي بـ 1000 مشترك كل دقيقة .... تخيلوا ؟

يا نهار أبيض ده تلاقي في ضرب نار على مكاتب فوده فون وأم نبيل والناس بتقطع بعض

ندخل في الجد ..

يا ترى ماذا يُمثل لك المحلول .. قصدي المحمول في حياتك ؟

أيوه يعني حاجه حلوه ولا شينه - انظر موضوع منين يا بلدينا وبلدكو إيه ؟ -

--------

بما إني صاحب الليله .. فهاجاوب عالسؤال

ج : ترجع علاقتي بالموبيل إلى سنة 98 أو 99 تقريباً ... فالموبيل دخل السعودية تقريباً في 95 ... ولسه فاكر كان الخط بـ 3000 ريال .... والعدة الموتورلا اللي شبه الشبشب بس بإيريال وعايزه 5 على كفالتك يشيلوها لك كانت بـ 7 الاف ريال ...

طبعاً في شباب صغير هايقولوا : ياه يا اونكل س س .. بقى الخط اللي بنجيبه من البقالة هدية على علب السمنة دلوقت كان بالسعر ده ؟

وكمان العده اللي مستعمله إستعمال طبيب وبنخلص فيها بـ 300 جنيه وقسط كمان كانت بـ 7 الاف ؟

أقول لهم : أيون ... إنتو جيتوا أيام العز والرخاء ... أما إحنا فحضرنا فحت البحر ... وضحينا عشان إنتو تعيشوا وتركبوا محاليل

أيام بقى ما صرفوا لي محلول .. كنت ولا ملك زماني وعامل زي القروي الساذج الذي بهرته ضوضاء المدينة ... وما كنتش بانام إلا والمحمول في حضني .. وبأغطيه معايا بنفس الغطا أحسن يستهوا ... وكنت بأتنشق على حد يديني ميسد ... وما كنتش بأرد من أول رنه إلا وأمة لا إله إلا الله تكون سمعت الجرس المزعج عشان يعرفوا إني إنسان من ذوي المحمول ...

ولما كنت أتكلم كنت اعلي صوتي عشان أسمع البشر كلها ...

أصل ابو مين اللي كان مركب عده ساعتها ...

أينعم ما كانش في بنات هنا في السعودية أتمنظر قدامهم

إنما كنت باعمل كده في مصر ... حتى لو ما فيش مكالمة جيالي .. كنت باعمل أي منظر وخلاص .. وما يحلاليش الكلام إلا في الأماكن العامه .. وأعمل نفسي رجل اعمال وبأخلص في صفقات بالملايين من خلال محلولي ..

فاكرين طبعاً الـ 688 وايامه السودا .. وقد إيه الواحد كان دراعه بيتخدل وهو شايله ..

ويا سلام يوم ما غيرته بالسامسونج الألوان أبو إشعاع بيخلي شاشة الكمبيوتر ترقص قدامي ... ده بالذات كان له معزه خاصه عندي

لكن حصل لي موقف وأنا صغير خلاني أقعد أتعالج سنتين نفسياً عند الدكتور عُقده أخصائي الطب النفسي وطب الطفولة من تاثير المحمول ..

فيا سادة يا كرام نظراً لإن الخطوط كانت أسعارها غاليه والعدد كمان ... فكانت الخطوط بيتم تداولها بيننا ...

بمعنى .. اللي معاه خط .. وركب الحلزونه في الشركة .. فغيره بياخد الخط .. يورثه يعني

المهم جه حظي الإسود في الطابور إني عندنا واحد مدير مشاريع خارجية ترك العمل .. والراجل ده كان ماسك مشروعين مهمين

واحد في هونج كونج

والتاني في لندن ..

وتزامن حصولي على المحلول في أول جوزاي تقريباً ..

ونزلت بقى لنسايبي لا أتفقت على شبكه ولا عفش ولا شقة إيجار جديد ..

إييييييييييييه .. واحد مركب محمول وماحدش قده ...

وحمايا قالها لي بالفم المليان : يا بني إحنا بنشتري عده ..

فتزوجت يا سادة زي إي بني أدم ما بيتجوز ..

وكان فرح له العجب .. لسه الصور معايا لحد دلوقت ...

وإحنا قاعدين في الكوشة على 3 كراسي

المحمول وبعدين أنا وجنبي العروسة ..

وكل واحد كان جاي يسلم .. لازم يلعب في زراير المحمول ويبوس البوردا بتاعته عشان تحصل له البركه

وسافرنا لشهر العسل .. واخدت المحمول معايا قبل العروسة ..

بيني وبينكم الفلوس كانت قصرت معايا وفكرت نطلع نقضي شهر العسل أنا والمحمول واسيب المدام في مصر وأرجع أحكيلها عن ذكريات شهر العسل .. إنما صعبت عليه ..

وعاديكم عاللي حصل وربنا لا يوريهالكو ولا يوريها لعيالكو ..

عرسان بقى وليلنا نهار ونهارنا ليل واللي يحبنا ما يضربش نار ..

والفرق بينا وبين كونج كونج 8 ساعات وهما اللي سابقين .. لكن بريطانيا مؤدبين وإحنا اللي سابقينهم

وإذا بي يا سادة أكره المحلول واللي حلله واللي جابوه ..

والله هذا حصل ..

اكون نايم مثلاً على وش الفجر ... ومافيش نص ساعة ولسه النوم بيداعب جفوني إلا وألاقي بعيد عن السامعين جرس يصحي الميتين ..

ما كانش بقى في زمان نغمات .. لا حبيبي ولا على باله شوقي إليه .. ولا أنا مش بتاعت الكلام ده .... ولا النغمات الروشه دي ... كان في حاجات أشبه بقرع طبول الحرب عند الوغى ..

فكنت أتفزع وأقوم أحسس لحد ما أوصل لمصدر قرع الطبول ... وأرد .. مانا لازم أدر

والبيه اللي بيتصل من كينج كونج الساعة عنده 12 الضهر وعلى ما قام من النوم وأتشطف وشرب الشاي الأنجليزي قال أما اعمل بلقمتي وأتصل بالخلق ... والساعة عندنا في باب الخلق 4 الفجر ..

وهذا مثال لإتصال هُلامي

أنا : مين ؟

الطرف الثاني بلكنة إنجليزية متلغوصه صيني : i'm Dong Shay Dong Mr. Folan

أنا : عايز إيه يا دونج يابن الــ ـــــ تووووووت ... وإيه اللي جابك الساعة دي ؟ قصدي إنت عرفت مكاني إزاي ؟ ومافيش عند يور مازر دم يعني .. حد ييجي لعرسان الساعة4 الصبح يابن الـش اي ... إيه ده خد هنا يالا .. صحيح أنا مش مستر فولان ؟ إنت عايز مين ؟

هو : r u Mr. Foln who's working in KSA ?

أنا : قولي كده .... !!!!!!!! لأ مش أنا .. أيوه أيوه ييس ييس اي ريميبر Mr. Folan has ride Elhalazona

هو : what did u mean by Halazona ?

أنا : i meant Eltaftaf

هو : Shit u r a crazy guy

أنا : هاتلبخ يالا .. i swear by the soul of your mother ممكن أجيلك أديلك 100 pens على ur back .. قفاك يعني ... يا بن الـ.... إنت يالا don't etesl another time بدل ما clean the floor by you

وأتكررت يا سادة المكالمات دي كذا مره إيشي دونج شاي دونج ... على هو شي منه ... على ماوتسي تونج... وكل مره تقلب بغم وأشتمهم .. وأنا ما بأتوبش ومش هاين عليه أقفل المحروق أحسن بروبا حد يتصل ...... وأهو عشان كمان المحلول ما يصديش ...

وتطورت بقى علاقتي بالمحاليل ... وبقيت مجنون المحلول

على فكرة

من كام يوم روحت أبدل الشريحة بواحده 3 G فالراجل بص لي بأستغراب وقال لي : إيه ده بقى لك 11 سنة ما غيرتش الشريحه ؟ !!!!!!!!!!!!!

فقلت له : ايوه .. يعني هو أنا بأقطم منها كل ما أكون جعان ..؟!!!

-----------------------------------

إنت بقى علاقتك إيه بالمحلول يابن عمي ؟

[عنبو]

اولا السلام عليكم ورحمة الله وبركاته بجد موضوع جميل وياريت برضه مش ننسى فى موضوعنا الكمبيوتر والاب توب وخصوصا الاب توب

انا ليس من عشاق المحمول يعنى تقريبا من بتوع اى عده بتقول الو وخلاص لكن طبعا عمرى ماهنسى اول عده موبيل شلتها وهى كانت بتعت والدى الله يرحمه وكانت ايامها طفره كنت فى اولى ثانوى ايامها وطبعا كانت مشكله يعنى كنت باخده لفه من والدى يعنى الف بيه شويه فى البلد وانا ماشى ابقى عاوز ارفعه واذا وقفت مع واحد فى الشارع وحسيت انه مخدش باله منه تبقى مشكله تلاقينى سبت كلامه خالص واروح رافع ايدى واقعد العب فى الموبيل واعمل انى بتصل واقوله معلش بس معايا تليفون وهو طبعا من الانبهار كان مضطر يستنى علشان يسألنى ايه البتاع اللى معاك ده ؟؟؟

وطبعا مافيش صوره ماكنش فيها المحمول لدرجة انى مره كنت بتصور مع صحابى وبعدين طالع فى الصوره وانا مادد ايدى اقدام الكل علشان المحمول يظهر فى الصوره وطبعا كل واحد فينا اتصور بيه وهو ماسكه مره علشان ياخد البركه ؟؟؟؟

ويسلام بقى وانا رايح الدرس ولما يكون والدى راضى عنى واقعد اقوله انا فى الصيف مش هسيبك هخلص امتحانات وتانى يوم معاك فى الشغل يامعلم بس ابوس ايدك ادينى المحمول اروح بيه الدرس وانا راكب بقى فى الميكروباص ولا حاجه والاقى الموبيل بيرن وطبعا البنات بيبقوا راكبين معانا بتبقى حاجه عجب وبيحس باحساس غريب انى كده خلاص ؟؟؟ زى احساس مجدى عبد الغنى لما جاب جول فى كاس العالم

وفى الدرس بقى يقعد المدرس يبص على المحمول ومش يعرف يشرح وكانه ناقص يقولى هات العب فيه شويه

ومواقف بقى من اللى اقلبك يحبها وايام مع الموبيل بس معرفش ليه محبتش الموبيل

طبعا انا اول موبيل شيلته كان 5110 وتقريبا العده اللى شايلها اليومين دول مش تفرق عنها الا انها الوان بس مش بيقولكم مش بحب الموبيلات

لكن طبعا الكمبيوتر ده كان طفره ولما بقى جبت اول كمبيوتر فى حياتى كانت ايام وليالى

وشكرا

[صبح]

للأسف الشديد

لو بتسأل عن الخط والعدة فهما لا يمثلان لي أي شيء ذو أهمية

أما لو أنك تسأل عن المحمول في حد ذاته فهو بالنسبة لي إبتلاء من الله سبحانه وتعالى ولن أزيد في التفصيل حتى لا أغير من إتجاه الموضوع االخفيف ولكنك ضغطت على الجرح فأردت أن أعلق فقط

[elfakhrany]

موضوع جامد جدااااا ... جيت على الجرح يا سى السيد بما ان المحلول كان مجال عملى فى مصر على مدار سنتين فأقدر أقولك ان حصل حاجات منسهاش أبدا.. بالنسبة للشعب المصرى ممكن ياكل مرة واحدة فى اليوم بس مش ممكن يعيش من غير محلول .. وكذا مرة تكرر قدامى ان الزبون واللهى بدون مبالغة يفضل يقلب نفسه و يطلع كل اللى فى جيبه عشان يشترى كارت شحن ب10 او يشحن على الهوا ب 5 جنيه !!! طب خد دى كمان واحدة دخلت تقولى انا عايزة اعمل كتكوت قلتلها حضرتك هنا مركز لصيانة المحمول ومعندناش فراخ ولا كتاكيت وبعد مازهقتنى أكتشفت انها تقصد الكول تون وكانت عايزة تحط أغنية العنب عشان لما حد يتصل عليها ياكل شوية وفى مرة كان فى اتنين واقفين فى المحل ودار بينهم حديث على الأجهزة المستعملة وانت تشترى .. طب تبيع بكام .. طب أشوف الجهاز .. المهم ان الزبون الاول خد التليفون من الزبون التانى على اساس انه يتفرج عليه وهووووب قام حول لنفسه 5 جنيه من الرصيد بدون التانى مايعرف وبعدين رجعله التليفون وقاله شكرا ولما التانى خد التليفون هووب جاتله رسالة تقوله ان تمت العملية بنجاح وتم تحويل 5 جنيه طبعا مسك الزبون الأول من قفاه وازاى انه يتجرأ وينصب عليه وخده برة المحل يتخانق معاه وفى الاخر الناس الطيبين اتدخلو و الاول جاب كارت شحن ب 10 مقابل عدم ابلاغ الشرطة :blink: طب خد دى كمان مرة زبون سرق التليفون من فرعنا الثانى ولحسن الحظ كان عليه لوك كود وطبعا جيه الفرع الأول عشان ينزل سوفت وير ويفك الكود مش قادر أقولكم ان الشعب بتاعنا بيخدم أوى لما تقول بس كلمة حرامى gt: كفاية كده عشان هروح اصلى الظهر

تم تعديل 1 يونيو 2009 بواسطة elfakhrany

[وليد أهلاوى مصراوى]

كان في إحتفالية عالمية الأسبوع الماضي تحت رعايه الهيئة الدولية للإتصالات بوصول عدد مستخدمي الموبيل إلى 2 مليار بيني آدم على مستوى العالم ... والمعدل دلوقت ماشي بـ 1000 مشترك كل دقيقة .... تخيلوا ؟

تلاقي في ضرب نار على مكاتب فوده فون وأم نبيل والناس بتقطع بعض

ندخل في الجد ..

.................................

فعلا حضرتك لازم تتجه للأدب الساخر .... حسيت أنى بقرأ "تحتمس بشرطه" لأحمد بهجت ... وكات شكلى وحش أوى قدام الأجانب لما دخل دلوقتى

project manager ولقانى بضحك كده لوحدى فى المكتب

ببساطه .... المحمول يمثلى أكل عيش.....لأن أحنا بأه اللى بناخد فلوس المكالمات اللى بتتكلمها فى المحلول

[زعلان]

لعنة لا استطيع الاستغناء عنها

الامضاء مهندس اتصالات سابقا بائع ترمس متجول حاليا

[Alrefaey]

من عشرة سنوات كان ليس له وجود, حاليا وجودة اصبح ضرورة من ضرورات حياتنا اليومية

[مسافر زاده الخيال]

الموبايل وانا

تبدا علاقتي مع الموبايل من اخر سنة دراسية في كلية الاتصالات سنة 1995 حينما سمعنا بالموبايل لأول مرة نحن والمدربين على حد سواء وكنا نتخيل بان الموبايل هي هي عدة التلفون العادي مركبة في شنطه مع هوائي antenna

كما نشاهد في بعض افلام جمس بوند والاتصالات التي كنا ندرسها حتى ذلك الوقت معتمده على انظمة الراديو التماثلية وكوابل المحورية وبعض نظريات الاتصال الرقمي

وحتى ذلك الوقت لانعلم ماهو اللاب توب وبالكاد بدأنا دراسة وندوز3.1.1

عموما بعد التخرج يشاء الله ان نتدرب في الشركة الاميركية التي ستحدث شبكة الاتصالات بكاملها ومن ضمنها انشاء شبكة محمول (جوال كما نطلق عليها) وحتى ذلك الوقت كان مجرد تقديم الخدمة ب عشرة الاف ريال وتنتظر بعدها ربما 6اشهر لاخذ الشريحة

وفي الشركة وجدت عالم اخر غير الذي اعرفه فلاول مرة اعرف ان الهنود والباكستانيين مهندسين ومبرمجين غير نظرتنا القاصرة قبل ذلك

ومعهم ومع غيرهم من المدراء التنفيذيون بدأنا نرى الموبايل رأي العين

لكن لا نعرف كيف يستخدم وشخصيا لم اشعر برغبة عارمة لاقتناءه او التعرف عليه الى عام 1997 عندما ترقيت لفني اول اقوم وحدي لبرمجة المحطات وتربيط الدوائر في القرى والدن البعيدة والصحراوية

عندها اقتنيت جهاز المحمول وكان سيمنز ذو الشاشة الملونة ومن حينها لم استخدم لوحة عربية في الموبايل

وكنت من اوائل المستخدمين لهذا الجهاز السحري في العائلة وكان رقمى اشهر من نار على علم بل كنت اعير جهازي لافراد عائلتي

طبعا لم نكن نعرف ال اس ام اس و ال ام ام اس

ومرت الايام حتى اصبح عملي هو الموبايل ولم اتصور انني سارتبط بهذا الجهاز

ورغم ان هذا الجهاز سهل عملية الاتصال بالعالم الا انه شكل مصدر ازعاج شبه دائم لي وكم اتوق للحظات التي لا يكون معي فيها

فقد كنت مشرف مركز صيانة في احدى شركات الاتصالات وكان من ضمن عملي التبليغ عن الاعطال المفاجئة وكم جاءني اتصال في الثالثه صباحا او الرابعة!!!وكم جاءني اتصال في وقت الصلاه

وكم جائتني اتصالات خاطئة من اناس لا اعرفهم ال...خ

بل من المواقف الطريفة انني كنت بصدد برمجة محطة ريفية في احدى قرى الجوف وعندما انتهيت في حوالى 12ليلا فقفلت راجعا الى سكاكا حوالى 60 كيلو وقبل ان اصل بحوالى 10 كيلو تذكرت انني نسيت موبايل العمل في المحطة الريفية في العراء!!!!ورجعت مذعورا خوفا من ان يسرق وعدت ةالحمدلله الجهاز كما هو لم يمسسه سوء

ومرة سرق موبايلي من داخل فندق كنت به!!!!!والحمدلله ان السارق لم ينتبه لجهاز اللاب توب الذي يحوى معلومات وصور

وقصص وذكريات كثيرة مع جهاز الموبايل ربما ليس هذا وقت تذكرها

.........................

[HDarwish]

الدنيا أحلى من غيره

على فكرة النهاردة نسيته في البيت وبصراحه حسيت إني كده أروق بكثير

تم تعديل 1 يونيو 2009 بواسطة HDarwish

[se_ Elsyed]

لا حول ولا قوة إلا بالله

لقد قطعتم نياط قلبي - يعني إيه نياط ؟ -

طب إيه رأيكم نعمل مصحه لضحايا المحمول

بلاش ضحايا

لمدمني المحمول

ونسميها " مصحة الأمل المأمول لمدمني المحمول "

وهانتبع فيها العلاج التصادمي

يعني المصحة هاتبقى على شكل محطة تقوية

والسراير على شكل كيبورد

والدوا

3 ميسدات قبل الأكل

ومكالمتين غلط مع شتيمه من المتصل بعد الأكل

ومش هانسمع موسيقى .. لا الطريقة دي قديمة

هانتعالج على نغمات رنات الموسيقى

الكورس ده هايقعد 3 شهور ... وعلى أخر الكورس هاتبقى أعراض الادمان أنسحبت من جسمنا

ومش هانلاقي واحد بيشم في محمول غيره ..

او ماسك إيريال الجهاز وبيعمل نفسه كانه بيضرب حقنه في العضل عشان يخف ..

او جايب كروت الشحن وعاملها زي ورق البفرا وعمال يلفها كإنه سمسون او زغروف .

ههههههههههههه

انا عن نفسي مس هادخل معاكو المصحة ... هاتفرج عليكو من بعيد

عارفين اكتر واحد متخيل منظره وهو في حالة هياج ؟

مسافر زاده الخيال

ههههه

وهو عمال يجري في المستشفى ورا الممرضه ويقول لها : إديني ميسد .. أرجوكي هاموت .. ميسد واحده .. طب إس إم أس أنا حاسس إن مناخيري بتاكلني ..

أيها المدمنين والمدمنات

أسعد الله أوقاتكم بكل خير

كان معكم مراسلكم

إس ... إس من غير ام

من أمام كشك التقوية الخاص بمستشفى الأمل المأمول .. لضحايا المحمول

[واحد تاني]

اكون نايم مثلاً على وش الفجر ...

آه ... ليه بقى نايم وش الفجر ؟؟؟ :D

إنت بقى علاقتك إيه بالمحلول يابن عمي ؟

الموبيل يعني

صدااااع

بكرهه ... وعندي 7 خطوط عاملة

:rolleyes:

[pink rose]

لا حول ولا قوة إلا بالله

لقد قطعتم نياط قلبي - يعني إيه نياط ؟ -

طب إيه رأيكم نعمل مصحه لضحايا المحمول

بلاش ضحايا

لمدمني المحمول

ونسميها " مصحة الأمل المأمول لمدمني المحمول "

وهانتبع فيها العلاج التصادمي

يعني المصحة هاتبقى على شكل محطة تقوية

والسراير على شكل كيبورد

والدوا

3 ميسدات قبل الأكل

ومكالمتين غلط مع شتيمه من المتصل بعد الأكل

ومش هانسمع موسيقى .. لا الطريقة دي قديمة

هانتعالج على نغمات رنات الموسيقى

الكورس ده هايقعد 3 شهور ... وعلى أخر الكورس هاتبقى أعراض الادمان أنسحبت من جسمنا

ومش هانلاقي واحد بيشم في محمول غيره ..

او ماسك إيريال الجهاز وبيعمل نفسه كانه بيضرب حقنه في العضل عشان يخف ..

او جايب كروت الشحن وعاملها زي ورق البفرا وعمال يلفها كإنه سمسون او زغروف .

ههههههههههههه

انا عن نفسي مس هادخل معاكو المصحة ... هاتفرج عليكو من بعيد

عارفين اكتر واحد متخيل منظره وهو في حالة هياج ؟

مسافر زاده الخيال

ههههه

وهو عمال يجري في المستشفى ورا الممرضه ويقول لها : إديني ميسد .. أرجوكي هاموت .. ميسد واحده .. طب إس إم أس أنا حاسس إن مناخيري بتاكلني ..

أيها المدمنين والمدمنات

أسعد الله أوقاتكم بكل خير

كان معكم مراسلكم

إس ... إس من غير ام

من أمام كشك التقوية الخاص بمستشفى الأمل المأمول .. لضحايا المحمول

:D :rolleyes: :P :lol: :sad:

[Falcon Crest]

المحمول بالنسبه لي صداع بس شر لابد منه

لاني في الشغل under call و كل شويه في بلد

باختصرت كل sim الي كانت معايه في 2 بس و احده مصريه و التانيه

sim4travel اشترتها من لندن علشان شغاله في 280 دوله و اسعاره كويسه

ارخص من الثريا و التجوال

[مسافر زاده الخيال]

اليوم نسيت جهاز المحمول في العمل ومستورة الى الان

اما بالنسبةللاخ س س ياريت تكون لي الجرأة اني اتكلم مع ممرضة فضلا اني اطلب منها حقنة المسد

الا فلا زلت اذكر جلسات الحقن في الايد وانا 4سنين

والى الان اكره المستشفيات ورائحتها

[metwallly]

باختصرت كل sim الي كانت معايه في 2 بس و احده مصريه و التانيه

sim4travel اشترتها من لندن علشان شغاله في 280 دوله و اسعاره كويسه

ارخص من الثريا و التجوال

موضوع شيق وله مواقف كتير بس أكتر حاجة شدت إنتباهىsim4travel ياريت الآخ الفاضل يدينا

معلومات أكتر عنها وسعرها ونظامها وهأنرجعولكو تانى بحكاية الموبايل

[Nassarlink]

انا علاقتي بالمحمول علاقه زي ما تقولوا كده اثنين متخاصمين

او تقدروا تقولوا زي علاقه النجار بمشرط الجراحه

اولا انا آخر واحد في مصر شال محمول ولا فخر

لاني اعتقد ان الطفل بيتولد وماسك في ايده محمول دلوقتي

وبدل ما بصرخ ويقول واء واء بيقول

جات جات جات جات رساله جات رساله

عموما انا اول اول مره اشيل محمول كان يوم 6 فبراير 2009

لما اسفاره اتصلت بزوجتي علي غير ميعاد بيستفسروا منها علي معلومه ناقصه في الملف بتاعي وهي الحمد لله قالت كلام ربنا يسترها معانا

ومن يومها شايله في جيبي وانا مش متعود عليه

ولو شلته من جيبي انسي انا تركته فين

وفي النهايه لقيت ان الحل اربطه بسلسله زي بتاعة النظاره

او زي السلسله بتاعت الساعه الي بكاتينا بتاعت زمان

ودي كانت حكايتي مع المحمول

[النجم الثاقب]

بصراحة يمثل لى الكثير .. بل لقد اصبح من صميم حياتى و لا اتخيل حياتى بدونه

الموبيل بالنسبة لى فضلا عن كونه جهاز من المفروض انه يستخدم للإتصال فى الأصل .. الا ان استخدامى ليه فى الاتصال نسبته قليله جدا بالنسبة للإستخدامات الأخرى مثل استخدامه كـ ساعة ( من ساعة ما شيلت موبايل بطلت البس ساعات ، Mp3 player ، قاموس ، منبه ، تقويم ، تذكير ، مؤذن ، متصفح انترنت فى بعض الحالات و اهم شيء بالنسبة لى الكاميرا و اللى عشانها اشتريت سونى اريكسون سايبر شوت ، ايضا ستوب واتش ، بعض الالعاب عند الشعور بالملل .. و برامج اخرى كثيرة كنت مثبتها على جهازى السابق النوكيا لكن السونى اريكسون قلما تجد برنامج جيد يتوافق معه .. يعنى باختصار الموبايل بالنسبة لى حياة :) و برغم تلك المميزات منه وجهة نظرى .. لا أحبه و لا اكرهه .. يمكن لأن اتصالاتى مش كتير غير الناس اللى مفيش دقيقة تمر بدون ما يرن جرس تليفونهم لظروف العمل او أى اسباب اخرى .

[se_ Elsyed]

ايه يا ستاتنا انتو وبناتنا ... محسسني انكو قاعدين في فرح واحد محروق ؟

يعني معقول ولا مشاركه نسائية الا مدام ريمو جطت لنا صورة ناس بتتشقلب على قفاها من الضحك وجريت

والله رجعت لعنوان الموضوع وقلت يمكن انا قلت مثلاً ان ده صالون رجالي .. مزين يعني

يعني معقول ما فيش واحده تبع نون النسوة معاها محلول ؟

اومال مين بيدفع فواتير كل شهرين وضهره بيتقطم وبيبات دمعته على خده ؟

ومين بيمسك المحمول ويتكلم بالساعات ( عفواً في حالة استقبالهن للمكالمات ... يعني بسم الله من جيب لافندي )

اما في الارسال .. فهو يادوب ميسد اشبه بالقفا اللي على سهوا عشان البيه هو اللي يتكلم ويدفع الفاتورة ... وبرضوا بيدفع ديكهيا ...

هاعتبر دي مشاركات سلبية في الحياة المحمولية من الجماعات النسائية ..

طب تحب افتح لكو موضوع اسميه مثلاً " سوالف حريم "

او دردشة نسائية في الامور الموبايلية

وقولوا لي بس ايه يرضيكن عشان انا حطيت صوابعي الاتناشر منكن في الشق

اوووووووووف مليتو البلد

[pink rose]

و لا تزعل نفسك يا س س

السنة اللي قبل اللي فاتت قبل ما انزل مصر اشتريت موبايل جديد اللي هو 6111 موبايل امور اوي كان و صغنن و بنانيتي خالص

نزلت مصر و فرحانه بيه اوي لانه بجد كان موبايل رقيق اوي :D :wub:

المهم كانت اختي لسا والدة بنوته كاميلة عقبال عندكم و كانت مامتي بتحمي النونو في بانيو صغنن و طلعت من الحمام

تقوم بقى الست هانم اللي انا مخلفاها تسحب الموبايل بالراحة خالص و تحطه في البانيو قال ايه.... بتحميه

طبعا مش عاوزة اقولكم اللي حصل هي حطيته في المايا من هنا و الموبايل بقى يفرقع من هنا

جت تجري تقولي الحقي يا مامي الموبايل بيعمل صوت بم بم كده

قومت جريت لقيت المسكين غرق في البانيو

غرق .... غرق .... اه و الله غرق :blink:

بابا خده بسرعه و نزل بيه عشان نعمله اي اسعافات اولية :amb:

لكن على ما وصل لمحل الموبايلات اللي جنب البيت كان الموبايل فارق الحياة

و كانت ديه نهاية الموبايل بتاعي الجميل الله يرحمه و يحسن عليه في مصر

و جيبته هنا معايا على امل ان العلاج يكون افضل في التوكيل ويتصلح و فعلا اتصلح لكن مع عاهه بسيطة جدا

تقوم مريم تسيبه بقى عايش ابدا تقريبا كانت عاملة نذر انها تعمله تصفية جسدية :lol:

و في يوم من ايام الرياض الهنية سمعت صوت خبطة قوية

اتاري المسكين اترزع رزعة محترمة في الارض ما حطش منطق بعدها بقى خالص :sad:

و اهو جثته مشرفه المكتبة عندي ما قدرتش ارميه لانه جمييييييييييييييييييييل

و ربنا يحفظ موبايلاتكم كلكم يا رب :)

قولوا آمين

[se_ Elsyed]

ام مريم

باقترح عليكي نخرط لك واحد او نصبه عند الحداد ...

وبكده مريم مش هاتعرف تتعامل معاه

اخويا الصغير قالها لي حكمه

قال لي يا بني لا تأمن لست ... حتى لو كانت مامتك

ولا تشتري موبيل غالي لست .. حتى لو كانت مراتك

موبيل مراتي كل يوم يا اطلعه من المايكرويف

او الاقيه في حلة البامية

او عيل من الاشاكيف اللي عندي بيلعب بيه البخت

وصلح يا معلم س س

والله العظيم روحت به التوكيل اول امبارح عشان باظ مع انه جديد وفي الضمان ... الواد بتاع الصيانه بص لي وقال لي : شد حيلك

آه والله

فمشيت اكلم نفسي واقول

العربية اللي حيلتي باظت باظت

وناس عماله تتريق ويقولوا : ياما نصحناه يجيب 688 ... حد قاله هات حاجه غاليه

الحمد لله انا الموبيل بالنسبة لي زي الميه والنسكافيه

ماقدرش استغني عنه

وبأحفاظ عليه زي عيني