صوتك أمانة ... فتذكر ذلك وبادر بأستخراج بطاقة أنتخابية

[se_ Elsyed]

ده مش كلام إنشا

لكنه محاولة إيجابية للإصلاح

أيوه في امل

انا مش إخواني ولا حزب وطني ولن أنتمى لأي حزب ... لأنني ببساطه أنتمي لمصر ومصر فقط

ولكن ما شاهدناه في الأنتخابات الأخيرة يدل على إن هناك امل

الامل في التكتل والتحرك الجماعي

ولو كان كلامي ده مش صحيح ما كانش الأخوان بتنظيمهم وتفكيرهم قدرو يكتسحوا الإنتخابات ...

إنتو عارفين معناه إيه لما الإخوان ينزلوا انتخابات مجلس الشعب على 113 مقعد ويفوزوا بـ 88 يعني 78 % ..

وهي نسبة خرافيه أمام غول الحزب الوطني

بالنسبة لما حدث لهم من تنكيل واعتقالات وتزوير كامل للجان كثيرة ومنها لجنة مصطفى الفقي اللي بيقولوا عليه مفكر ... ومنها لجنه امال عثمان ... ومنها لجنة احمد شوبير وغيرها وغيرها من عشرات اللجان والدوائر

تخيلوا إن كان في قناصة من الشرطة تقف امام لجان معينه لمنع الناخبين الغير مرغوب فيهم من الأقتراب

تخيلوا إن لجنه معينه وانا قابلت شهود عيان هم إخوتي وأقربائي شاهدوا إخوان يلبسون ما يُسمى بملابس الأستشهاد ويقفون أمام لجان إنتخابيه لكي يقاتلوا ويدلوا بصوتهم بعدما نما إلى علمهم إن في اوامر بمنع الإخوان من الفوز في هذه الدوائر بالذات

ده مش كلام ناس إخوانجيه عشان نشكك فيه

ده كلام أخويا اللي هو كدر من كوادر الحزب الوطني - للأسف هو حر وده تفكيره وأختياره -

لكن انا باقول لكم كلام موثق وموثوق فيه

إذاً من اجل ذلك إذا أردنا التغيير فعلينا بالتعب ..

ما ينفعش أي تغيير من غير تعب .... مش عاوز اقول دم

لكن بتصل في حالات كثيرة لدم

عشان كده مش هايكلفك حاجه أستخراج بطاقة إنتخابية

والباب مفتوح للجميع .. من أول نوفمبر حتى أخر يوم في شهر يناير

لذلك على الجميع ان يبادروا بتسجيل أسماءهم في أقرب قسم شرطة ويستخرجوا بطاقة إنتخابيه

إذا كنا حقاً نُريد التغيير فعلينا أن نغير أنفسنا أولاً

تم تعديل 5 ديسمبر 2009 بواسطة Salwa

[raouf]

ربنا يباركلك يا سى السيد ويارب 10% بس حتى من شعب مصر يفكر بايجابية بدل السلبية اللى طغت على معظم الشعب و مش فى السياسة بس لا وفى كل نواحى الحياة

[se_ Elsyed]

أخي الكريم رؤوف شكراً لردك

للأسف عندما نترك الساحه خاليه للمنافقين والمطبلاتيه ... يبقى خلاص .. لا نلوم إلا انفسنا لما نجد البلد على هذه الحاله

هاقولك حاجه

الحزب الوطني بيتباهى إن عدد اعضاءه يفوق الـ 5 مليون عضو في بر مصر

ومنافق كبي زي أسامه سرايا صفرا بيقول لأ - والله العظيم سمعته بوداني - بيقول لأ .. عدد اعضاء الحزب الوطني 50 مليون

وهو مُحق في ذلك

على اساس إدراج أسامي الموتي من سنة 1900

وإدراج أسماء الأجنه في بطون امهاتهم

والفلاحين في مزارعهم

والعجائز أمام مدافئهم

وجميعنا يعلم إن الحزب الوطني بيلم بطاقات ناس كتيره وبيستخرج بها بطاقات إنتخابيه وبيحتفظوا بها لتبييض أستمارات الترشيح وأتحدى إنهم ينكروا ذلك

[الباشمهندس ياسر]

يا عمنا متشغلش دماغك بالحزب

هي الناس هتفوق و هتقول لآ

عارف ليه

مش حبا ف البلد قد ما هو

خلاااااااااااااااص

الناس مبقتش قادرة

[msayed]

ها أحكى لكم موقف إيجابى حقيقى من ناس مصريين ونجحوا فى تنفيذ هدفهم

فى أحد الدوائر كان مرشح للإخوان واتقفلت اللجان وفاضل حوالى ثلاث ساعات على غلق الباب، وكانت اللجنة دى من أهم اللجان لأنها معقل الخصم الوطنى وبها كثافة عددية كبيرة، وإللى كان بيدخل هم أنصار ومنتفعى الوطنى، ييجى الواحد منهم ومعاه طابور من المنتفعين أو شلته فيرفع إيده فالباشا يدخلهم ورا بعض ويقفل تانى، وبعدين يروح يجيب ناس تانية، وطبعاً كل إللى ممنوعين شباب زى الورد مش كلهم إخوان لكن هم عارفين أى واحد شكله لابس كويس ومتعلم فبيمنعوه لأنهم عارفين رايح ينتخب مين، وبدأ الناس إللىواقفة ساعات فى الإنصراف بيأس.

وبعد أن يأس الشباب من أن الحصار يلين ويسمحوا لهم بالدخول جاءت صلاة العصر وهنا صاح واحد من الإخوان أن الصلاة ستقام امام اللجنة على التراب ولا يذهب احد من المسجد.

والله العظيم الشاب ده صلى بالناس وأخذ يدعو دعاء القنوت والناس تأمن بصوت هادر، وبدأ الناس يأتون من كل مكان، إللى فى البيوت نزلوا وإللى كان متردد وواقف بعيد اقترب وإللى رايح يصلى فى المسجد غير رأيه ونزل صلى فى التراب مع الناس، والناس بدأت تنادى بعضها وتتصل ببعض فى التليفونات وحصلت تعبئة نفسية عارمة، هنا الأمن فتح اللجان لأنه كان بالفعل ممكن أن تحدث كارثة لو أصر على الغلق، ونجح مرشح الإخوان.

[ابو محمود]

يعنى انت شايف ان الناس دى ممكن تتغير اقصد الناس اللى بينتخبو مش الناس لا سمح الله بتوع الحزبوطى

الناس بصراحة ماعندهاش امل لانها بتشاهد تغيير الصناديق عينى عينك وبتوع النيابة غصب عنهم بيسكتو لانهم مش قد البلطجة تعرف ياعزيزى الاقسام البوليسية تترك المسجلين براحتهم يقرفو عباد الله لسبب واحد هو يوم او ايام الانتخابات بيدفعو الثمن لابد من البلطجة على كل من يخالف الحزن الوطنى وسلملى على البط..................اقات طب الغريب بقى ان واحد زى شوبير دة ينجح وكل طنطا كانت بتؤيد بتاع الاخوان رغم ان الصناديق كانت لصالح بتاع الاخوان والادهى بقى انة هينجح المرة القادمة

[osaimi]

فعلا دي أمانه كبيرة كلنا نتحملها .

هل من الممكن استخراج بطاقة انتخابية من السفارة بالرياض ؟ وإذا تم إستخراج البطاقة كيف لجميع المصريون بالخارج ان ينالوا حق التصويت الذى حرموا منه فى الإنتخابات السابقة ؟ أعتقد أنهم لن يسمحوا بذلك بسهولة ..

تم تعديل 6 ديسمبر 2009 بواسطة osaimi

[محمد عبدالعزيز]

هو ده الكلام والإيجابية اللى ممكن تجيب نتيجة وتؤدى إلى التغيير.

كلنا عارفين اللى بيحصل من تزوير وتقفيل صناديق وتزوير نتائج, بس ده مش حله إننا نستسلم ويكون رد فعلنا إننا نسيب الميدان بسهولة.

لو كل اللى انت حتستفيده من الموضوع ده إنك تبقى أديت اللى عليك وضميرك مستريح وتعرف تجاوب أولادك لما يسألوك يا بابا أو يا ماما عملتوا إيه عشان تغيروا الأوضاع السيئة دى, تقدر تقول حاولت على قدر استطاعتى, ولا يكلف الله نفساً إلا وسعها, أعتقد ده لوحده حافز قوى يخليك تقاوم السلبية وتروح تؤدى الأمانة اللى عليك.

ومع ذلك صوتك ممكن ينجح واحد أمين وقلبه على مصلحة البلد, وبكده نكون ضمنا واحد على الأقل ممكن يوقع للدكتور البرادعى عشان يرشح نفسه فى انتخابات الرئاسة القادمة :happy:

[se_ Elsyed]

فعلا دي أمانه كبيرة كلنا نتحملها .

هل من الممكن استخراج بطاقة انتخابية من السفارة بالرياض ؟ وإذا تم إستخراج البطاقة كيف لجميع المصريون بالخارج ان ينالوا حق التصويت الذى حرموا منه فى الإنتخابات السابقة ؟ أعتقد أنهم لن يسمحوا بذلك بسهولة ..

يا عصيمي

يا حبيبي

بيقولك الراجل هايبص بره

مش لما يبص جوه الاول

ههههههههههههه

لما يعرفوا يطلعوا داخل مصر يبقى يفكروا في اللي خارج مصر

للأسف

مصر من الدول اللي في أخر الركب من حيث أشتراك المغتربين في أي إنتخابات

ما تعرفش بقى مقصودة ولا عشوائية ولا إيه

[عصام]

ولكن ما شاهدناه في الأنتخابات الأخيرة يدل على إن هناك امل

صباح الخير يا عمنا ..

الانتخابات الأخيرة كان فيها إشراف قضائى ..

واللى جاية مافيهاش ..

صباحك زى نيتك ..

طيب انت قوى bnd5::