فن إدارة الأزمات ؟

[se_ Elsyed]

أسف يعني إذا كنت بأجرح إحساس الحكومة وبأقول " فن الإدارة "

ما قصدش حاجه وحشه كفلنا الشر

أصلهم بيعد عنكم لا عندهم فن ... ولا عندهم إدارة

هاخد مثالين لا اكثر

- موضوع المعديات اللي في الوجه البحري واللي زيها زي التوك توك والميكروباصات ..... بتداري عورة الحكومة ... وبيني وبينكم الحكومة كلها عوره يعني ما قدرش أقول فوق الرُكبة أو تحت الركبة .. لأ .. حكومات مبارك كلها عورة وفيها العِبر ... تلك الوسائل التي تساهم حقيقة في حل مشكلة التنقل للمواطن الغلبان .. غارقه في العشوائية ... وإذا قولنا إن الميكروباص اللي ماشي على الأرض مثلاً فُرص إنه يعرض الناس للخطر 10 %

ففرص المعديات دي تزيد عن 50 % لإن تحتك المياه وخلاص أي حاجه تحصل بتلاقي نفسك بتلعب مع القراميط ...

فبعد أن تكررت نفس المآسويات في نفس المنطقة ... ونتيجة إن في مواسم المدارس والاعياد - زي بنجلاديش بالظبط - تلاقي المعدية اللي هي عبارة عن لنش صغير حمولتها 25 فرد .. بتاخد طبعاً 50 و 60 .. سردين كله فوق بعضه ...

وفعلاً أحترمت مُلاك تلك الوسائل بجد ...

تخيلوا يا جماعه أجرة الفرد في المعيدة 25 قرش ؟؟؟؟ ربع جنيه وأطفال المدارس بينقلوهم مجاناً ..

طب يا بعيد إنت وهو يا عديم الدم والإحترام ... ما تساعد الناس دي في إخفاء عورتك وسيبهم يكسبوا بشكل قانوني وخفض لهم رسوم الترخيص وما إلى ذلك وأعمل لهم تسهيلات لكن أشترط عليهم إنك هاتحاسبهم حساب عسير إذا تهاونوا ؟

لأ إزاي

ده أحنا ما نبقاش في عصر مبارك ...

يبقى عندنا مسئول والعياذ بالله بيفكر ؟؟؟؟

يادي العيبه .. ده الناس تاكل وشنا

أخيراً وبعد الكارثة الأخيرة التي لن تكون الاخيرة ... إكتشفوا إن المعديات دي كلها غير مرخصة ... شوف إزاي ؟؟؟

أصلها لابسه طاقية الأخفا وبتشتغل تحت الميه

طب يا عمل الحلو ... أعتقلهم وأحرق المراكب ؟ ..

طب بس إفتكر إبني لنا كوبري هنا

من عشرات السنين والناس هناك صوتها أتنبح ... يقول لك الميزانية لا تسمح

طب شغل إنت وسائل نقل بحري بتاعتك ؟

هههههههههه في فعلاً ... بس عاملينها هناك قاعات أفراح وليالي ملاح ويولع الناس اللي عاوزه تروح اشغالها بجاز ...

ولا عزاء للفقرا ومن يفرطون في حقهم سواء فقراء وأغنياء

------------------

مثال أخر

فوجئت أمبارح في بعض برامج التوك شو وكثير من الجرايد ... إن التتار - قصدي الحكومة - نزلوا على منطقة الكيلو 4.5 في مدينة نصر - للي مش عارفها دي في شارع مصطفى النحاس بمدينة نصر وأنت متجه غرباً في الأخر خالصصصصصصص لحد ما يبقاش في عمار ... وكان بيسموها عزية الهجانة ... وعزبة الحرامية .. لإن كان في ومازال هناك عشش للحرامية ...

أنا دايس المنطقة اللي هناك دي وعارفها كويس جداً

فوجئنا من سنوات قليلة بناطحات سحاب طالعه شيطاني كده وماحدش قال لهم رايحين فين ..

وفوجئنا إن الأسعار هناك مضروبة بالنار ... والله كنت ساعات بأحسب إن الناس دي بيبيعوا under cost

وكله على عينك يا تاجر ...

وفجأة خير اللهم أجعله خير المحافظة صحيت ... ونزلت أمبارح تهدم 250 برج

يا حلاوه ........

والناس صرخت : جاموستي يا عُمده .. جاموستي يا عُمده !!

ولا حياة لمن تنادي

وبصراحة أول ما باعرف إن المسئول في الحي او المحافظة هو لواء شرطة أو جيش .. باطمئن وباعرف إنها هاتخرب زي ما البلد خربت على يد العسكر

السيد المسئول أمس كان ملء السمع والبصر في البرامج التليفزيونية ..

وبكل أريحيه قال : هل سُرقت طبنجته الميري ؟

نعم سُرقت

هل سُرقت سيارته

نعم سُرقت

هل سُرقت شقته

نعم سرقت

فاكرين فيلم محمد صبحي ده ؟

اعترف السيد المسئول إن حي مدنية نصر كان مقصر وما سألش الناس دي إنتو بتبنوا إزاي ولا فين أوراقكم عشان كده حولناهم للتحقيق ...

هع هع هع هع

حولهم للتحقيق بعد ما أتبنى مئات الأبراج هناك واتباعت وسكنت والناس خلفوا فيها عيال

جاي يحولهم للتحقيق دلوقت .. بس في نفس الوقت يطربق العماير على دماغ أصحابها ..

وأضاف سيادة اللواء ... ولقد حركنا دعاوى قضائية ضد أصحاب تلك الأبراج المخالفة ... وكمان الهد والدمار هايكون على حسابهم

هأ هأ هأ

طب والناس اللي دفعوا دم قلبهم يا سيادة اللوز وأشتروا شقق ؟

دول ربنا يتولاهم والقانون لا يحمي ......... لا مؤخذه المغفلين

أصل يا فندم - على لسان حضرته بالنص - الأبراج دي أثبتت الدراسات إنها ليست آمنه وأيلة للسقوط ولا تتمتع بأشترطات الامن ولاسلامه والحركات

كمان أهم حاجه ( خش عالتقيل وإوعى وشك )

أرتفاعتها تخالف أشتراطات هيئة الطيران المدني

شوف إزاي ؟

وأنا شايف وحافظ وأقول لكم على أوصاف عماير هناك مترخصه أرتفاعتها أكبر من أرتفاعات العماير اللي هاتتهد دي

بس بيتهيألي الطيارات عندنا متبرمجه بحيث تتفادى العمارة الطويلة المترخصة وتلبس في اللي مش مترخصه

وبالتالي بتلاقيها ماشيه كدهو وهي رايحه مطار القاهرة وتعمل شقلبظات وغُرز

تماماً زي القانون اللي طلعوه إن أي عماير جديدة في مدينة نصر - يمكن بقى لهم 5 سنين - ما تزيدش عن 5 أدوار عشان الطيران برضوا ( فين الوش اللي بيخبط راسه ي أقرب حيطه )

طب يا أغبيا ... ياللي أكبر واحد فيكو معاه إبتدائية .. وهي مدينة نصر جديدة لسه ؟ ولا فيها أبراج عالية بالفعل ... وبالتالي لا فائدة من تلك القوانين القراقوشية ...

فلد خرسيس .. سيب قُله .. أشرب من الزير .... ما تاكلش ملوخيه عشان حرام .. وإلا ضربتك بالكرباج

[ابو محمود]

رغم انك مش بترد على مداخلاتى فى مواضيعك لكنى صاحب روح رياضية وهرد علشان انا اهلاوى وما بزعلش من اى اهلوى حتى المش بيرد ههههههه

واقعة كتلك تعنى وجود مصالح يعنى فساد

عزيزى العبد للة خدمكتب فى منطقة وسط البلد (تجارية ) سعر المتر ارضى يتعدى 180الف لحلوح من بتوع التسعينات بما يعنى ان المتر اعلى يقل ويصل الى 25الف

وبعدين كان بجواره معبد يهودى اوم الولاد المسجلين كانو بيشيلو بمب وصواريخ العيد جواة اوم علشان الدور اللى انا فية الثالت قوم يريحو نفسهم ويغلقو الدور لانة بيوصل الى السطح بتاع المعبد المهجور او يتم محاصراتنا بكل انواع الفساد من تراخيس تم الغائها الى امن صناعى الى المهم يتم غلق الدور المصيبة بقى لما رحت الحى وكلمت المختص انة ازاى يتم ترخيص المبنى من اعلى ويترك الأرضى وما فوقة وكأن البناية ادوارها السفلى لابسة طاقية الاخفى قام قلى خليك فى نفسك فقط (فرق تسد)

المهم تم التعامل مع الامر بالفساد المضاد وانتهى الموضوع بعد دفع لحاليح من كل مكتب فى الدور 16 مكتب فى 16 الف وسلملى على الأدارة وسكان العمارة

[se_ Elsyed]

رغم انك مش بترد على مداخلاتى فى مواضيعك لكنى صاحب روح رياضية وهرد علشان انا اهلاوى وما بزعلش من اى اهلوى حتى المش بيرد ههههههه

لأ والله يابو حنفي

مش هارد عليك ليه يعني ... كلكم اولادي وكلكم معزه واحده وإنت عارف

[sherifhfm]

والله يا استاذ سى السيد انا كل ما اقرأ موضوعاتك عن مصر ببقى مش عارف اضحك ولا ابكى

اضحك على اسلوبك الهايل فى الكتابة - والله تنفع كاتب اكثر من كتير من الموجودين على الساحة -

ولا ابكى على الوضع الى اصبحت فيه مصر

ولما اعقد مع نفسى علشان افكر طاب ايه الحل الاقى نفسى قربت اضرب دماغى فى الحيط ويقولوا الراجل ده اتجنن خلاص الغريبة ان نفس الكلمة قالها لى الكثر من اصدقائى فى مصر احنا بطلنا نفكر فى حل علشان منتجننش

وانا مش عارف دلوقتى اعمل ايه انا مش عاروز افضل طول عمرى بره مصر ولكن برضه مش حقدر ارجع فى ظل الظروف المنيله دى طاب ايه احل يعنى الواحد حيفضل طول عمره سواح فى البلاد بالشكل ده ولا خلاص يستقر فى بلد تانى وينسى انه ممكن يرجع مصر مره تانيه ؟

تحياتى لك ولجميع الاخوة

[se_ Elsyed]

والله يا استاذ سى السيد انا كل ما اقرأ موضوعاتك عن مصر ببقى مش عارف اضحك ولا ابكى

اضحك على اسلوبك الهايل فى الكتابة - والله تنفع كاتب اكثر من كتير من الموجودين على الساحة -

يا عم الله يكرمك ..

بالعكس أنا بأعتبر نفسي أقل واحد يقدر يعبر عما بداخله ..

--------------------

ومن عجائب الإدارة أيها الساده ما يحدث الأن من مهازل في موضوع الضرائب العقارية الخنازيرية ...

أصل حاسس إنها عامله زي أنفلونزا الخنازير ... ماحدش فاهم حاجه في أي حاجه والكل بيعجن

يعني أنا عندي شقة تحت التشطيب ... هاتدخل تحت المقصلة ولا لأ ؟

- طب اللي عنه بيت ورث ؟

- طب عندي خالتي ساكنه في دور كامل بفيلا قديمة في حدائق القبة إيجارها الشهري ... 15 ج ... يا ترى دي هايعدموها ونستلم الجثة أمتى ؟

- طب اللي عنده حتت أرض فاضية ؟

- طب المحلات ؟

- طب المصانع ؟

طب حد يسمعنا صلاة النبي

أول مره في حياتي أشوف ناس عاوزه تدفع للدولة فلوس ومع ذلك المسئولين ماسكين كرابيج وبيجلدوهم وبيذيقوهم الأمرين

أتفرجوا على اللي يجرؤ بس ويروح يقدم الأقرار دلوقت وشوفوا بيتبهدل ويتعطل قد إيه ...

ولأنني أُعيد وأكرر بإننا في دولة ليست لها رئيس أو مسئول ... فلقد قام معظم موظفي مصلحة الجبايه ببيع النماذج العقارية المجانية لشوية صيع قدام كل مصلحه .. وبيبيعوا النموذج بعشرة جنيه

اللهم صلي عالنبي .. سبوبه ولقمة عيش أكتر من الضرايب نفسها ..

شاهدت أحد المواطنين بيقول إنه راح لقى الموظفين قافلين المصلحة ومش راضيين لا يعطوا لهم أستمارات ولا يقبلوا منهم الأستمارات اللي ملوها .. ولما عاتب الموظف قال له " عندك الوزير روح أشتكي له "

والله برافو عليه .. موظف فاهم هو شغال فين وعارف مين وزيره ومين رئيسه وعارف حقوقه كويس ومتأكد إنها يغمه وهيصه واللي ما يشتري يتفرج ..

وبعد ده كله المواطن المصري الغلبان المجلود والمسحول في منهم ناس يروحوا ينتخبوا مبارك أو حد من الحزب الوثني ....

بصراحه يستاهلوا اللي يجرا لهم

------------

نموذج أخر وليس أخيراً وهو تفاصيل أكتر عن موضوع عماير الكيلو 4.5 اللي بيجيبوها عالارض دلوقت

طب يا حكومة ياللي شاطرة في الخراب ... عملتي إيه لحماية الناس اللي أشترت ؟

وليه دايماً الناس اللي تدفع الثمن من ايام شركات توظيف الاموال ... فاكرين ؟

والناس الغلابة اللي دفعت دم قلبها أستفادت إيه من تحويل هوامير الاحياء إلى التحقيق ؟

وليه ما يحجزوش على الأقل على الأرض بتاعت العمارة ويبيعوها لصالح الغلابة ويقولوا لهم حقكوا علينا إحنا سيبناكم فريسة للنصابين اللي بنوا عامير في سنين تحت سمع وبصر الحكومة ومع ذلك كانوا مظبطين نفسهم ومأكلين الهوامير ؟

والله يا جماعه أول ما بأسمع إن موقع ميعن فيه لواء شرطة او جيش بأعرف إنها مخروبة .... إذا كان بيحكمنا لوا ولا فريق وخارب البلد .. ما بالك بأي مصلحه ولا هيئة ؟

وبعدين تعالوا نحسبها بالعقل

هو وظيفة الشرطة والجيش إيه ؟

وظيفتهم إنهم يخرجوا لواءات أو رُتب يبقوا محافظين أو رؤساء شركات قطاع عام أو الصوامع والغلال أو قناة السويس او رؤساء أحياء اللي معظمهم لواءات وسكرتير الحي لوا ومش عارف مدير إدارة إيه لوا .... ؟

يا سلام

هي دي وظيفة الشرطة والجيش ؟

ولا ريسنا بيجامل الناس دي ويكسب ولائهم على قفانا وعلى حساب مصلحة الشعب وإن شالله تولع بجاز ؟

بالمناسبة .... ما لا يعرفه الكثيرون ومش واخدين بالهم منه إن الجيش والشرطة حتى الأن موقفهم غامض من إحتمال تولي شخص مدني رئاسة الدولة ...وبالتالي ايغمه والسبهلله اللي عايشين فيها مش عارفين مصيرها إيه ... آه حد عارف الأراضي اللي بيحصل عليها رجال المخابرات عندنا .. حد عنده فكره ؟ طب حد سمع عن اراضي الحزام الأخضر في 6 اكتور أو فلل وأراضي جمعية الطلئع في العبور ؟

حد عارف الناس دي واخدينها بكام وباعوها بكام ؟

أصل دي من سمات الدول المتخلفة اللي بتفضل محلك سر إن لم تكن بتيجي ورا ..

شوفوا الجزائر أو تركيا اللي عامله زي اللي رقصت على السلالم

الجيش هناك أقوى من رئيس الجمهورية نفسه

وشافطين البلد خصوصاً الجزائر اللي هي عضو في أوبك ومع كده نسبة الفقر والهجرة للخارج عاليه جداً هناك ومافيش خير ظاهر على أهل البلد نتيجة تسلط العسكر على كل مقاليد الحياة هناك ...

[رضوي]

السلام عليكم ورحمة الله وبركاته

فعلاً الموضوع اكثر من خطير وجاي اوي علي الجرح

لكن المشكلة ياسيدي الفاضل تكمن فينا نحن المواطنين

دايماً ساكتيين ومستنين قوي خارقة تيجي تاخد لنا حقنا ولانأخذ موقف ايجابي في أي قرار غشيم يضر بمصلحتنا ............ هي دي المشكلة بجد نجحوا انهم يشغلونا بهمومنا ويبقي المواطن مابيفكرش غير ازاي هيكمل بقيت الشهر او ازاي ممكن يشتري سخان بالتقسيط ........ الخ

ونجحت سياسة تهميش الشباب وتدمير عقولهم وصرفهم بمجموعة من التفاهات فان لم يكن فمجموعة من المشكلات حتي تغيب المشاركة المجتمعية والبلد تفضالهم

وأصبح شعارهم وهدفهم اليوم هو ( هم لكل مواطن )حتي ينشغل عن الحياه العامة بالحياه الشخصية .

أرجو تقبل مشاركتي

تحياتي

[se_ Elsyed]

وديع : مساء الخير يا معالي الباشا ... منور الدنيا والله .... بالنسبة حضرتك للمباني الجديدة اللي في سينا ... حضرتك في حاجه إسمها مخرات سيول أو مجرى سيل ... فممنوع نبني فيها عشان لو حصل ما لا تحمد عقباه

تهامي : وأخر سيل حصل إمتى يا وديع ؟

وديع : من 30 سنننننننننننننننننه

تهامي : خلاص خليها على الله وخلي الناس تبني وتهيص يا وديع

---------

وبعد 30 سنة

وديع : مصيبة يا تهامي باشا ... مصيبة

تهامي : إيه ..... الراجل الكبير مات ؟

وديع : يا ريته مات وريحنا .... السيول يا باشا دمرت سينا والعريش والمباني اللي معاليك أمرت ببناها في مجرى السيل بقت قوالب طوب والسيل شالها ورماها البحر

تهامي : ياه يا وديع ... دايماً تهول المسائل كده ... يا عم السيل خد الشر وراح ... ولعله خير ... خلي المقاولين يشتغلوا وعجلة البُنا ترجع تدور من تاني ...

----------------------

مشهد ثاني

تهامي : إيه الورق ده كله يا وديع ؟؟؟

وديع : دي تحذيرات سعادتك من هيئة الأرصاد ...؟

تهامي : الأرصاص اللي هي إيه لا مؤخذه ؟

وديع : لأ... أرصاد يا باشا يعني الطأس والجو وكلام من ده

تهامي : آآآآآآآآآآآآآآآآآآآآآه ... طب أرغي ولخص

وديع : بيقولوا إحنا في شهر 6 2009 دلوقت وفي تحذير من سيول جامده هاتحصل في الشتا كمان 6 شهور

تهامي : 6 شهووووووووووووووووووووور .... مين يعيش يا دودو .... روح نام واتغطا وشغل التكييف إحنا لسه في الحر والواحد مش طايق عدومه وإنت جاي تكلمني عن الشتا ..... إنت ما سمعتش الست بتقول " كلمني عن أمبارح وسيبك من بكره ؟ "

وديع : طالما الست قالت كده .. يبقى هاروح اخد دش وأشد السيفون .... باشششششششا .. والله باششششا ... أموووه

----------------

مشهد ثالث .. سنة 1990

وديع : معالي الباشا المقاول الكبير .. باني الحضارة الفرعونية واللي مطول راسنا بين الامم ... وعظيمة يا مصر .. يا أرض اللوا

تهامي : هأ هأ .. البؤين دول وراهم مصيبة يا وديع ... خش في الموضوع من غير نفاق ... إنت عارفني ما بحبش النفخه الكدابة دي ..

وديع : بالنوسبة لسبوبة معهد الأورام ... إنت عارف معاليك إنه هايبقى 13 دور ... فكان المعلم حنفي المقاول بيقول .. قصدي يعني .. بيقترح .. قصدي رأيه إن

تهامي : وديع .... وديع يا حبيبي .. إنت عارف إن أقصر طريق بين نقطتين هو طريق المحور .... أمسك الطريق وهات من الأخر عشان أحبك

وديع : أبداً .. هو بيقول إن في لقمة عيش حلوه في المون اللي هاننتع بيهم الـ 13 دور ... والعملية دي ممكن نوفر فيها قد 10 أرانب مصححين ... وطبعاً أنا عارف إن معاليك بتموت فيها بالملوخية

تهامي : هع هع هع هع طول عمرك هارش مزاجي يا وديع ... بس .. بس أ

وديع : خير يا باشا .. بس إيه ؟

تهامي : بس مش ممكن المبنى يتطربق على دماغ العيانين بعد كده يا دودو ؟

وديع : يا باشا الأعمار بيد الله .. ودول ميتين ميتين ... وبعدين حلني .. بعد 10 سنين معاليك وانا هانكون فين ... أهم حاجه نهبش الأنارب . ونكُت ... ونشرب وراها فوار عشان نهضم ...

تهامي : طب ناولني ورك من عندك وحبتين فوار .... وأديني الأوراق أختمها لك ..

وديع : باششششششششششششششششا

[miramikhail]

بصراحة أسلوبك ساخر جدا و أن قاعدة أضحك يعنى شر البالية ما يضحك فعلا.

عمتا كل ده و أن دل على شئ (حلو العربى بتاعى ده) يدل على التسيب و عدم الألتزام اللى بقينا فية و ده بدأ من العيل الصغير لحد أكبر مسئول فى الدولة محتاجين أنضباط و السؤال لية ده ماكانش بيحصل فى الستينات و أوائل السبعينات؟؟

لأن اللى كان بيعمل كده كان بياخد على دماغة لكن دلوقتى ولا حاجة أية يتحاكم شوية و يخرج لعدم كفاية الأدلة ولا خطأ فى الأجراءت بعد ما يكون هبر هبره كبييييييييييييرة وخلاص .وبعدين ده لو واحد مرتشى فى منصب حكومى أو سلوكة أى كلام ده بيبقى معروف حتى للفراشين مش حقولك الموظفين فهل معقول الأجهزة الرقابية مش عارفة؟؟؟

تم تعديل 23 يناير 2010 بواسطة miramikhail