انشاء شركة تقنية معلومات جديدة (اتحاد مبرمجين)

[Amr Radwan]

السلام عليكم

لاحظت ان نسبة كبيرة من اعضاء المنتدي من العاملين بمجال تكنولوجيا المعلومات بختلف اقسامة من ادارة مشاريع و برمجة ويب و تطبيقات دسكتوب و كمان نتوركنج ..

و لاحظت برده ان معظمنا بيفكر في انه يفتح شركة و يستقر في مصر او حتي برا مصر بس المهم يعمل له كيان يضع فيه كل اماله و تطلعاته و يوظف فيها كل خبرته التي اضاع فيها عمره .

ايضا .. وجدت الكثير من الاراء الجيدة بل و الممتازة و التي تفيد اقامة شركة سوفتوير حتي و لو كان صاحب الرأي يعمل في مجال بعيد عن البرمجيات .

وقلت ليه لا ما نتجمعش زي ما البشمهندس اشرف محمد جمع الناس في "اتحاد الملاك" في مدينة الشروق ..

و الفكرة حتي لو مش كلنا هنفتح شركة مع بعض ممكن كل مجموعة تستريح لبعضها و تحس بتقارب في الفكر و التنفيذ تتجمع و تكون شركة فعليه حتي و لو كانت مبدايا موقع علي الانترنت و كل فريقه منتشر علي مستوي العالم اللي في مصر و اللي في كندا و اللي في السعودية و اللي في الكويت ..

اية المشكلة لو اننا كلنا تشاركنا في خبراتنا .. و كملنا بعضنا .. اكيد ده هيكون الافضل .. و الاكسب و الانجح ..

فيه ناس كتيرة شاطرة في الكودنج و ناس تانية شاطرة في ادارة المشاريع و ناس في تسويق السوفتوير و ناس في ادارة شركات السوفتوير .. لو اتجمع الناس دي مع بعض في كيان واحد اكيد افضل من اكل واحد يفتح لوحده و يبدأ الطريق من الاول

ممكن تبقا شركة لكل مجموعة او لكل واحد و يكون فيه تعاون بين كل شركة و التانية ..

تعالوا نتجمع و نحط ايدينا في ايد بعض و نفكر بصوت عالي ..

[محمد عبدالعزيز]

أنا بشجع الفكرة من حيث المبدأ على رأى بتوع مجلس الشعب.

ولكنها محتاجة مناقشات وشرح للتفاصيل أكتر, ولو فى مقابلات وجهاً لوجه يكون أفضل طبعاً.

الأول نشوف كام واحد(ة) متحمس للفكرة وبعدين نشوف ممكن نعمل إيه.

[Amr Radwan]

فعلا .. ممكن نشوف بس مين اللي مشجع الفكرة و نحدد موعد للقاء ممكن يكون لقاء في القاهرة و التاني في الرياض و الثالث في حته تانية حتي لو كان علي اسكايبي

[myusername]

السلام عليكم,

هى فكرة رائعة طبعا, و لكن هتحتاج الكثير من التنظيم... و لكن بما اننا شغالين فى المجال, يبقى اكيد دماغنا هتبقى متبرمجة توماتيكى توماتيكى.

بس عموما مش شرط اننا نشتغل كلنا فى الشركة... و لكن عالاقل نعمل شبكة علاقات بيننا و بين بعضيتنا... عشان انا مثلا واحد من الناس اللى بشتغل "بالحتة"... او فريلانسر بمعنى اصح.. يعنى لو حد عايزنى فى ابليكيشن معينة, اقوم عاملهاله... و طبعا ممكن نعمل فكرة اننا لو نشتغل مع بعضيتنا يبقى نعمل لبعض تخفيض... و لو حد جاب للتانى شغل يبقى ياخد كوميشن او نسبة.. زى ما السوق كله شغال.

يعنى انا مطور مواقع.. و ساعات بيجيلى شغل تصميم و جرافيك ديزاين... بقوم باعته لحد من اصحابى اللى شغالين فيه عشان يعمله, و باخد اللى فيه النصيب... و هكذا..

و ربنا يكرم باذن الله.

[Ambitious]

والله هى الفكرة جميلة بس أنا معنديش تصور معين للموضوع خصوصا انى أعتبر من حديثى التخرج وفعلا مخطط انى ابقى صاحب شركة فى يوم من الأيام .. عموما متابع :unsure:

[عنبو]

فكره ممتازه يا عمووووووووووووور

[raouf]

فكرة رائعة و ياريت لو حد مسنعد نبدأ الخطوات و المناقشات العامة وانا اول واحد عندى استعداد للمشاركة

[hOuSsAm]

جميل جدا يا عمرو

ومع انى مش مبرمج بس معجب بالفكرة جدا

[ريمون]

فكره حلوه

بس انصح ان الناس اللى هتشارك يتعرفوا على بعض شخصيا و يستريحوا لبعض و يكونوا عايشين فى نفس المدينه. ده اهم سبب و را نجاح اى start up

الكلام ده سمعته من ناس فتحت شركات كتير.

الحاجه التانيه المهمه هى Exit strategy يعنى ايه الهدف من الشركه. هل انها تطور منتج معين و بعد كده الشركه كلها تستحوذ عليها شركه كبيره؟ و اللا يفضلوا شغالين فيها طول عمرهم؟

[myusername]

فكره حلوه

بس انصح ان الناس اللى هتشارك يتعرفوا على بعض شخصيا و يستريحوا لبعض و يكونوا عايشين فى نفس المدينه. ده اهم سبب و را نجاح اى start up

الكلام ده سمعته من ناس فتحت شركات كتير.

الحاجه التانيه المهمه هى Exit strategy يعنى ايه الهدف من الشركه. هل انها تطور منتج معين و بعد كده الشركه كلها تستحوذ عليها شركه كبيره؟ و اللا يفضلوا شغالين فيها طول عمرهم؟

واضح جدا من كلام حضرتك انك قريت كتير عن السيليكون فالى... و ما أدراك ما السيليكون فالى..

اقصد يعنى قريت عن النظام فى أمريكا ماشى ازاى...

[سكر]

متابع باهتمام

وعلى بركة الله

[justme]

الفكرة كويسة جدا

بس بحصوص وجها لوجه دي عندنا برامج نقدر نعمل بيها

video conference

التخصصات المطلوبة ممكن تبقى حسب المشاريع المطلوبة وتبقى فرق عمل صغيرة

[raouf]

عندك اول واخد ومستعد ان شاء الله مكانى السغودية لو ماوين مبدأ خطوات فعلية تنوكل على الله

[kelkholy]

فكرة ممتازة وانا على استعدا للمشاركة

[عطر الجنة]

فكرة حلوة ان تتواجد شركة فيها مجموعة من العقول الخلاقة

وده ممكن يساهم فى عملية اكتساب خبرات اكثر

فمعظم البرامج الموجودة على الساحة فهى نتيجة انصهار تيم وورك من المبرمجين و مصممى الجرافيك و الشبكات و ما الى ذلك

فمعنى تكوين فريق عمل اى افكار جديدة لبرامج لم تكن موجودة من قبل

فمستوى نجاح الشركات الان يقاس بابتكاراتها الجديدة التى لم تكن موجودة من قبل و هذا يترجم الى مدخول مادى نتيجة هذا السبق

و نجد دول كثيرة حققت مدخول مادى كبير نتيجة بيع البرامج

لكن لى اقتراح بسيط ياليت ان تكون هذه الشركة متعددة الانشطة اى تكون فيها جزء بيع اجهزة و جزء تدريبى و جزء عمل برامج و تسويقها

و تبدأ فى مدينة جديدة لم يبدا فيها هذا النشاط بعد

تحياتى

[Amr Radwan]

السلام عليكم و رحمة الله و بركاته ..

اشكركم جميعا علي المشاركة و التفاعل مع الفكرة و خاصة من يعمل خارج المجال لانه لم يبخل بوقته ان يضع رد اما للتشجيع او اثراء الفكرة ..

نخش في المهم ..

الفكرة الاساسية اننا ننتجمع مش لازم كلنا في نفس المركب ممكن كل مجموعة في مركب ..

ممكن نبدا بالتعارف ..

و اتوقع ان البيانات التالية هتكون مهمة للتجمع ..

الاسم

مجال التخصص

بلد و مدينة التواجد

المواعيد و الايام المناسبة للقاء (بتوقيت مصر)

البريد الالكتروني

رقم الجوال

حسابك علي سكايب

ممكن تبعتوها ليا بسالة علي الخاص و هحاول اراسل الجميع بالميل و نتفق علي موعد ان شاء الله او نعلنه هنا عشان اللي عاوز يشترك جديد ..

شكرا لكم -_-

تم تعديل 25 يناير 2010 بواسطة Amr Radwan

[hgalal]

من حيث الفكره جميله جداً، لكن من حيث التنفيذ، اكيد محتاجه كثير من التنظيم والإداره والإداره والإداره والإداره والإداره والإداره والإداره والإداره

لآنه على حسب خبرتي المتواضعه الكثير من مشاريع الأصدقاء والمعارف ورغم ان اصحابها على درجه مهنيه واحترافيه عاليه جداً من الممكن جدا الا يكتب لها النجاح فقط بسبب سؤء الإداره

وعلى العكس من الممكن جداً انك تجد شخص وانت تعلم مثلاً بقله خبرته في مجاله ولكنه وصل الى نجاحات متتاليه. (وهذا طبعاً بعد توفيق الله سبحانه وتعالى).

فطبعاً ما اجمل ان تجد الإحترافيه والتنظيم والإداره الناجحه.

وطبعا انا مع الجميع في اي اقتراح.

اخوكم /

جلال / مصمم جرافيك/

السعوديه

[justme]

طيب ممكن اضيف على فكرتك حاجة ونوسع الموضوع

احنا ممكن نفكر ندخل الجماعة بتوع الالكترونيات ويبقى عندنا منتج ونعمله برنامج

وكمان ممكن بتوع التسويق يخشوا ونعمله دعاية

وفي الاخر وده الاهم نعمل نوع من العصف الذهني بخصوص الافكار التي يحتاجها السوق

انا شايف احتياج جامد من وجهة نظري لمحركات ال tts

ودي قصة طويلة بس تطبيقتها كتيرة وممكن تكون نواة للبداية لبرامج متعددة

طبعا انا بتكلم عن العربي هنا

حد مهتم

[sayed_ossman]

بصراحة الفكرة رائعه ومعظمنا فى الرياض الحمد لله اصحاب خبرات متعددة - وكان نفسى تتنفذ حاجه ذى دى من زمان - انا ليه اقتراح ان الشركة متبقاش بس مقتصرة على نشاط واحد وهو software - الحمد لله انا اشتغلت فى مشاريع مع شركات عالمية وبصراحة ملقيتش فيهم الشىء الصعب علينا - من الناحية الفنيه- ولكن بالفعل الناحية الادارية والدخول فى مناقصات لمشارع IT هى التى تنقصنا - كنت بسال نفسى دايما ليه الشركات الهندية بتفوز بمناقصات للنوع ده من المشاريع فى السعوديه - ولية مصر ملهاش الحجم ده نفسه من المشاركة - هل من نقص فى امكانيات شباب مصر فى IT ولقيت ابدا الولاد الهنود اللى بيجو هنا وبصراحة تامه - نمتلك نحن المصريين العديد من المهارات عنهم من الناحية الفنيه

ارجع تانى للشركة واقترح ان يكون نشاطها يشمل الاتى

OSS ( Operation support Service )

BSS( Business support service )

IT Infrastructure and Security

فهناك برامج عالمية معروفه تغطى هذة المجالات - فلماذا لا يكون عندنا فرق متخصصه فى تنفيذ هاذ النوع من المشارع

وفريق لادارة المشاريع - وليس هناك شرط بالنسبة لحجم فريق العمل - فالنبدا بعدد صغير - ولنوسع حجم واعمال الشركة مع الوقت

ويمكننى فى مداخلات قادمه الدخول فى مزيد من التفاصيل عن الحلول التى تندرج تحت كل قسم من الاقسام التى ذكرتها بعالية

ومش شرط يبقى الفريق اللى بينفذ موجود باستمرار هنا - الهند معظم شغل development بيبقى من شركات هناك وبيتعمله customization عند العميل

كنت دايما بسال نفسى هى مصر لية مش تجمع الشباب الواعد ده فى شركة عملاقة وتدخل بيهم مناقصات الخليج حتى فى اوربا وامريكا - لية بندرب الشباب بتاعنا وتتكلف الدوله ملايين فى التدريب ذى معهد ITI وبعدين ميلاقوش شغل وتتخطفهم الشركات الخليجية والاوربية والامريكية - ايه الخيبة دى يا بلد

ولكن ربما جاءت الفرصه لنثبت للعالم اننا قادرون على الوصول لمصاف الشركات العملاقه بفريق عملنا وليس بالوعود التى لا تتحقق وبجودة خدمتنا التى تميزنا عن غيرنا من الشركات الهندية

بحلم ؟ وايه يعنى كل الانجازات العظيمه كانت احلام فى مخيلة اصحابها وخصوصا فى مجال IT

تحياتى

تم تعديل 25 يناير 2010 بواسطة sayed_ossman

[hyoussif]

خبرتى فى المجال المالى والادارى ومهتم جدا بهذه الفكرة ومستعد فورا لتكوين شركة للدعاية من خلال الانترنت مقرها القاهرة ولمناقشة التفاصيل يفضل المقابلة الشخصية ولنتواصل