استفسارات حول الهجرة - 1

[az3rina]

السلام عليكم ورحمه الله وبركاته ....

اخواني واخواتي لقد وصلت لمنتداكم يوم امس فقط خلال تصفحي الانترنت وبحثي عن كل مايخص كندا لان نيتي ان شاء الله الهجره لكندا ...

اولا سأحكي لكم عن كل ظروفي ووضعي الحالي ثم سأتبع ذلك ببعض الاسئله الهامه لي ان اعرف اجابتها ويجزيكم الله كل خير

انا مصري عمري 30 سنه اعمل محاسب بالامارات وعندي دبلومه سنتين في الكمبيوتر وبحب كل مايخص الكمبيوتر جدا ومميز فيه لكني غير مرتاح بالمره في عملي وللاسف يرجع ذلك لزملاء مصريين مش هقول عليهم غير الله يهديهم

متزوج والحمد لله وزوجتي مؤهلها اداب قسم لغه انجليزيه ولدينا طفل حليوة كده اسمه محمد وعمره 10 شهور وكام يوم وخمس ست ساعات

احنا ان شاء الله نوينا نهاجر لكندا .. احنا هاردوركر جدا وبنحب الشغل لكن اكيد كمان عايزين نكون مرتاحين ونحس بتقدير ولو ع الاقل معنوي ونعيش عيشه انسانيه

خصوصا اننا مش لاقيين الاستقرار هنا خالص وكل يوم على كف الرحمن ومش عارفين اذا كنا قاعدين لبكره او لا

عندي اسئله كتير جدا

انا وزوجتي دخلنا امتحان الموجود على سايت كندا وكانت النتيجه اني خصلت على 90من 100 وزوجتي حصلت على 90من 100

هاسال بعض الاسئله وياريت الاقي الرد وعشان مش اتلخبط هرقم الاسئله :

1 هل يجب اني انا وزوجتي ندخل اجراءات الهجره كل منا على حده ولا ممكن مثلا هيا تدخل الاجراءات لوحدها او انا لوحدي توفيرا للنفقات للشخص التاني ولما ان شاء الله تيجي الموافقه هنسافر كلنا طبعا بس هيبقى اسمنا وفرنا رسوم تخص واحد مننا على الاقل يعني احنا عايزين نشوف مين فينا فرصه قبوله اعلى ونخليه يقدم ايه رايكم

2 لو ده ممكن ومثلا حصل انها زوجتي خلصت الاجراءات وسافرنا سوا هيكون موقفي ايه مهاجر ولا عشان زوجتي بس هنالك

3 لو نجحنا وربنا وفقنا ووصلنا كندا انا عرفت اننا لازم نقعد ف كندا 1000 يوم هل دول متواصلين ولا بينهم اقدر انزل مصر ولو اجازه بسيطه؟

4 لو حصل انه لاقدر الله صاحب الموافقه مقدرش يكمل 1000 يوم بينما شريك حياته استمر بالغربه كمثال حدوث اي ظروف مش طبيعيه للاهل ف مصر لا سمح الله (الله لا يقدر) كده هتتلغي العمليه كلها ولا ممكن الطرف التاني يكمل ؟

5 كام هو الحد الادني اللي ممكن اسافر بيه كمصاريف شخصيه لاسرتي كام الف دولار يكفونا لحين بدأ العمل الرسمي واخد مرتب يكفيني ؟

6 تفتكرو في حاله زي حالتي وربنا سهل ووصلت لكندا للهجره ايه هيا نسبه نجاحي في كندا وايه هيا نسبه الفشل وانا عارف طبعا ان كله بتساهيل ربنا لكن اكيد فيه نسب شخصيه ليكم تعتمد على خبرتكم هناك

7 لو حصل اني مسكت الباسبور الكندي هل ممكن ارجع الخليج للعمل هنا ويكون المردود احسن ليا ولا ايه بالظبط يعني عقده الخواجه اللي في الخليج هنا دي ممكن تفيدني ؟

ده جزء من اسالتي وانا مش عايز اطول عليكم اكتر من كده لكن ارجوكم الردود هيتوقف عليها خطوات كتير بعدها

ربنا يجعلكم ممن يفيدون اخوانهم امين

اسف للكتابه بالفصحي الغريبه دي لكن مش عارف ليه اصلي لسه صاحي من النوم وبقالي 4 ايام قبلهم مانمتش عشان بفكر ف الموضوع ده ... انا لو عازب كنت عملتها بدون تفكير بس انا دلوقتي رب اسره وانتم طبعا فاهمين احساسي

مشكورين

ملاحظه : دخولي لمنتداكم غير كتير جدا عن نظرتي للمصريين ف الغربه لان ماوجدته هنا من الاخوان المصريين كفيل بانه يخليني اكره كل المصريين لكن اللي وجدته منكم من حب لبعض رجعلي ثقتي بالمصريين جدا وانا بحب الجدعنه لاني اساسا شبراوي واتمنى اكون ف خدمه اي حد من الاخوه وربنا يديم المعروف

ازعرينا

[الأفوكاتو]

عزيزى الأخ أزعرينا,

أرحب بك معنا,

و رغم أنى لن أستطيع إفادتك بشأن هجرتك إلى كندا, إلا أنى على يقين أنك ستجد, و فى أسرع وقت, من يقدمون لك المساعدة الواجبة.

تحياتى لك و لإسرتك المحترمة.

[az3rina]

اخويا الافوكاتو

شكرا جزيلا لدخولك الموضوع اللي كتبته وشكرا اكثر لردك الجميل والذي ان دل يدل على كرم اخلاق نادره

وكفايه ذوقك في الرد

شكرا مره اخرى وفي انتظار الاخوه اللي ممكن يساعدوني وانا عارف انهم كتير بس مشغولين والله يكون في العون

[ENG. BEHAIRY]

الأخ الفاضل / أزعرينا

أهــلاً ومرحبًا بك ، ولا تقلق فقلَ أن تجد إنســانًا مُميزًا إلا وجــدت له أعـداء

يزيدون بمقدار النجاح وحجم الطموح ، ولأنهم لا يحملون مؤهـــلات النجاح

ولا مؤهلات الأدب فسلعتهم الوحيدة هو الطعن والدسيسة ، وقد يضيق صـدر

المــــرء فلا يقبل مجرد رؤية هذه النوعية أمامه ، وأحــيانًا ألتمس لهم العذر

فقد حُرمواالتنشئة السوية فى البيوت ، وحرموها فى المدرســة ومنابر النور

محــجورعليها ، فإنا لله وإنا إليه راجــعون ..

بخصـــــوص رغبتك الهجـــرة إلى كنـــــدا أنصحك مراجـــعة الجـــزء الخاص

(المغتربين المصريين) بهذا المنتدى ، خاصة هذا الرابط :

ما تريد أن تعرفه عن كندا

ومعنا مجموعة من الإخوة الأفاضل بكندا لن يتأخروا عنك فى بذل المساعدة

وتقديم النصح والتوجيه .. ولا تتعجل بالسفر قبل الإلمام بالإجراءت..

كما لعله من المناســـب مراجعة السفارة الكندية بالإمارات وطلب مساعدتهم

فلديهم الإجـــراءات المطلوبة والقواعد والإشتراطات حتى تكون على بينة.

أمر آخــر أجـــد أنه من المناســب ســفرك لوحدك أولا ..فالرجـــل أقدر على

مواجهة الصعاب التى لا بد وأنك ستواجهها فى البداية ، وكذلك لاختصــــار

النفقات ، أما العكس ( بأن تذهب أسرتك أولاً ) فلا أراه لمخالفته الشرعية ..

حاول تدوين كافة المعلومات وعناوين وأرقام ووسائل الاتصال ، كما يمكنك

من الآن إعداد السيرة الذاتية لك ولزوجتك ، ومراسلة مكاتب التوظيف عبر

الإنترنت وهذه قد تسهل عليك الأمور وتختصر النفقات والإجراءات .

الاسـتشارة والإستخارة من نعــــم الله علينا ، وهى من الأســـباب التى أمرنا

الله ، ولأن العبـــد مهما أوتى من علم ومعــرفة فهو عاجز ، ولن يُضيع الله

عبــدًا إلتجأ إليه ورجاه ، ونســــعد بك أخًا عزيزًا وإنســـانًا طموحًا ، وتذكر

قوله تعالى ( هُوَ الَّذِي جَعَلَ لَكُمُ الأَرْضَ ذَلُولاً فَامْشُوا فِي مَنَاكِـبِهَا وَكُلُوا مِن

رِّزْقِهِ وَإِلَيْهِ النُّشُـــورُ ) الملك15

تمنياتى لك ولأســرتك الكـــريمة ولكــل مخلص طموح كل توفيق ، وسيأتى

اليوم الذى نحتضن فيه جواهرنا ولا نبددها بإذن الله تعالى ..

تم تعديل 30 أغسطس 2005 بواسطة ENG. BEHAIRY

[az3rina]

اخويا الصادق الانسان المهندس بحيري

متشكر جدا جدا على الرد الجميل وانا حاسس انه نصيحه لوجه الله تعالى وهي نصيحه صادقه

طبعا متشكر على الوصله اللي كتبتها لي وفعلا مفيده جدا

واكيد مفيش اي خطوات الا باستخاره الله العليم الرزاق

واحب اقولك ان للاسف (البارتيته) اللى وقعت فيها هنا حاجه تجنن واستغفر الله العظيم وادعولهم بالهدايه والحمد لله انا قدرت اقاومهم 5 سنين والحمد لله وده انا شايفه معيار شخصي للنجاح وسط ظروف صعبه بس انا دلوقتي عندي بيبي صغير وبتمنى له يبقى احسن مني وعايز اامن له حياه كريمه ف بلد كريم وده اللي شجعني ع الهجره ونيتها وخصوصا لكندا

كمان احب اوضح اني اكيد هسافر لوحدي لو وفقت في الحصول على الموافقه للهجره باسمي

بس انا كنت اقصد لو زوجتي اخدت الموافقه قبلي موقفي هيكون ايه ؟؟؟ مهاجر بالتبعيه ؟؟ طبعا انا مش حابب كده ولا هكون مهاجر لان اسرتي بمافيها انا وزوجتي وابني تمت الموافقه لينا بالهجره؟

ده كان استفساري وحبيت اصحح الفاظي لزياده التوضيح

اخيرا انا متشكر جدا على صعه الصدر اللي لاقيها من حضرتك ومن الاخ افوكاتو وانا كنت حاسس اني لما هسال اي سؤال في المنتدى هنا الاجابه هتكون متأخره لكن ما شاء الله جاني ردين في يوم واحد ولسه انا عشمان كل المنتدى يبقو اصحابي وممكن نبقى نسايب (اصل محمد ابني بقى حلو قوي وخايف عليه من الفتنه وعايز اخطب له بدري بدري)

[wagdi]

الفاضل أزعرينا...

أولاً أرحب بك وسوف أحاول أن أرد على أسئلتك...

اصلي لسه صاحي من النوم وبقالي 4 ايام قبلهم مانمتش عشان بفكر ف الموضوع ده

<{POST_SNAPBACK}>

شوف ياسيدي....أولاً لازم تعرف إن الموضوع حياخد وقت طويل...يعني لو أبتديت في الإجراءات انهاردة وكل حاجة مشيت تمام بدون مشاكل لاقدر الله ممكن تكون في كندا بعد سنة ونص أو سنتين...مش قبل كدة...فحاول أن تحافظ على هدوئك وصبرك لأن السكة طويلة...

انا وزوجتي دخلنا امتحان الموجود على سايت كندا وكانت النتيجه اني خصلت على 90من 100 وزوجتي حصلت على 90من 100

<{POST_SNAPBACK}>

شوف... مهم أوي أنك تحط في إعتبارك إن هذا الأمتحان لا يؤكد قبول أوراقك... يعني لا تنظم حياتك على أساس أنك ستهاجر قبل أن تحصل على الموافقة...يعني قدم أوراقك وأنسى...وأمض في حياتك طبيعي...

1 هل يجب اني انا وزوجتي ندخل اجراءات الهجره كل منا على حده ولا ممكن مثلا هيا تدخل الاجراءات لوحدها او انا لوحدي توفيرا للنفقات للشخص التاني ولما ان شاء الله تيجي الموافقه هنسافر كلنا طبعا بس هيبقى اسمنا وفرنا رسوم تخص واحد مننا على الاقل يعني احنا عايزين نشوف مين فينا فرصه قبوله اعلى ونخليه يقدم    ايه رايكم

<{POST_SNAPBACK}>

أعتقد أن الأفضل أن تقدموا كعائلة...فتكون أنت العائل الأساسي وزوجتك وأطفالك تابعين لك... ولا أعتقد أنك ستوفر أي شئ لو دخلت الاجراءات وحدك بل قد يزيد الموضوع تعقيداً...

3 لو نجحنا وربنا وفقنا ووصلنا كندا انا عرفت اننا لازم نقعد ف كندا 1000 يوم هل دول متواصلين ولا بينهم اقدر انزل مصر ولو اجازه بسيطه؟

4 لو حصل انه لاقدر الله صاحب الموافقه مقدرش يكمل 1000 يوم بينما شريك حياته استمر بالغربه كمثال حدوث اي ظروف مش طبيعيه للاهل ف مصر لا سمح الله (الله لا يقدر) كده هتتلغي العمليه كلها ولا ممكن الطرف التاني يكمل ؟

<{POST_SNAPBACK}>

علشان تاخد الجنسية لازم تبقى موجود ثلاثة سنوات في أخر أربعة سنوات قبل التقديم على الجنسية...أما علشان تحافظ على الإقامة فلازم تبقى موجود على الأقل سنتين في كل خمسة سنوات...

راجع هذا الموقع: http://www.cic.gc.ca/english/index.html

6 تفتكرو في حاله زي حالتي وربنا سهل ووصلت لكندا للهجره ايه هيا نسبه نجاحي في كندا وايه هيا نسبه الفشل وانا عارف طبعا ان كله بتساهيل ربنا لكن اكيد فيه نسب شخصيه ليكم تعتمد على خبرتكم هناك

ده جزء من اسالتي وانا مش عايز اطول عليكم اكتر من كده لكن ارجوكم الردود هيتوقف عليها خطوات كتير بعدها

ربنا يجعلكم ممن يفيدون اخوانهم    امين

<{POST_SNAPBACK}>

هو زي ما انت قلت كله بتساهيل ربنا...بس أنا عايز أنبهك لحاجة مهمة..معظم المهن هنا لا تستطيع ممارستها إلا إذا كنت معتمداً من نقابة المهنة هنا أو عندك معادلة لشهاداتك...أنا لا أعرف صراحة ظروف مهنة المحاسبة ولكني أعتقد انه سيكون عليك ان تقوم بنوع من المعادلة أو ما شابه قبل ان تستطيع العمل كمحاسب...وهذا الرابط قد يفيدك في مقارنة شهاداتك بالمطلوب هنا....: http://www.cic.gc.ca/english/skilled/work-1.html

الحصول على عمل هنا ليس بالأمر السهل...وعادة يستغرق الأمر من شهرين حتى ستة أشهر حتى تجد عملاً مناسباً...

أرجو إني أكون قدمت أي شئ مفيد واتمنى لك التوفيق...

[az3rina]

السلام عليكم ورحمه الله وبركاته

الاخ الكريم وجدي انت كفيت ووفيت

شكرا جزيلا على ردودك الكريمه واللى فعلا اضافت لي الكثير

بصراحه انا حاسس اني وسط اهلي واصحابي هنا في المنتدى الممتاز ده

شكرا جزيلا

وكل عام وانتم جميعا بخير بمناسبه ذكرى الاسراء والمعراج اعاده الله عليكم وانتم في اتم صحه واحسن حال

[NOOR]

اولا السلام عليكم

انا عايشه في كندا من 9 سنين

ب النسبه لمجالك

مطلوب بصراحه

بس

عاوزين تعرف النظام الكندي

في المحاسبه

ممكن تاخد certificate in accounting

وتعادل موادك من مصر

المهم انك قبل متيجي كندا تجيب معاك

على الاقل عشر نسخ شهادات اصليه وتبقى جوا ظرف ومقفله

شهاده انك درست ب الانجليزي لو كنت بتدرس محاسبه انجليزي مثلا

وكمان نسخ من الديسكربشن بتاع الكورسات اللي بيتجي في الكتلوج بتاع الكليه

المهم

بعد متاخد الشهاده دي وغالبا الشهاده بس بتبقى سنه لكن لو موادك اتعادلو تقدر بس تاخد نص سنه بس وتتخرج ب الشهاده

وتلاقي شغل ان شاء الله لان المحاسبين مطلوبين اوي :angry:

ومتسئلش ليه بس ماشاء الله فيه ناس بتعتبر المحاسبه صعبه جدا ومفيش ناس كتير بيدخلوها هنا يعني

اغلب اللي في تجاره متخصصين اداره

انا بشتغل من سنتين وتعبت على ملقيت شغل 6 شهور مع اني متخرجه من هنا

وفي الشغل فيه ناس عنصريين جدا وفيه ناس عسل وطيبين موت

وامشي عدل يحتار عدوك فيك

انا ماشيه عدل والحمدلله مش لاقيين عليا خرم ابره يدخلولي منه مع ان نفسهم

يعني

وفيه ناس كتير طيبين بس برضه هتحس بفرق يعني عشان احنا علينا العين ديما ا لواحد بيتعب اوي ولو قصر بتبقى مشكله كبيره

مع ان لو واحد تاني قصر من الكنديين بتبقى عادي

وبما انك في كندا وهتقعد هنا 3 سننين ممكن تكمل البكالريوس وانا انصحك تقدم على الجامعات قبل متيجي لكندا

وب النسبه ل الخليج هيفرق اوي ان عندك شهاده كنديه هتبقى خبير كندي والله اعرف بنت هنا كانت درجاتها متواضعه

ودلوقتي بقت خبيره كنديه

:blink:

وصلي استخاره وربنا يعمل اللي فيه الخير

أختك نور :blink:

[NOOR]

فيه برضه شهاده اسمها سي ايه

تبقى شارترد اكاونتنت

دي تخليك تاخد مرتبات عاليه اوي

[desert_rock70]

أولاً : انا هحاول أحدد النقط اللى مش فاهمها

1 - يتم دفع 550 دولار processing fees بالدولار الكندى تمام طيب أبعتهم إزاى كل اللى مكتوب اسم المستلم General receiver for Canada طيب على أى فرع واى بنك هبعت عليه وعنوان مين ؟

2 - فى 490 دولار مذكورين بتوع Right of permenet residence دول هيروحوا مع 550 دولار ولا بعدين هم هيطلبوهم ؟

3 - Family Members المقصود بيهم مين زوجة وأبن ولا إيه ؟ أنا مش متزوج ولا عندى أولاد طيب هكتب مين ؟

4 - الطلب كله 3 ورقات وبيقولول مش عايزين غير الطلب والرسوم يعنى انا أبعت صور شخصية ولا ملوش لزمة؟

الورقة الأخيرة بتاعت أفراد العائلة دى مش فاهم منها حاجة يعنى أكتب أبويا وأمى وأخواتى ؟

شكراً على المساعدة .. وجزاكم الله كل خير .

يلا سلام بقى.

[sniper3g]

الهجرة الي كندا ولا كيبيك؟

[الحازم حسن]

لو الهجرة الى غير كيبيك تبقى الاجابة كالآتي

أولاً : انا هحاول أحدد النقط اللى مش فاهمها

1 - يتم دفع 550 دولار processing fees بالدولار الكندى تمام طيب أبعتهم إزاى كل اللى مكتوب اسم المستلم General receiver for Canada طيب على أى فرع واى بنك هبعت عليه وعنوان مين ؟

لو حضرتك في مصر اتصل بالسفارة وهمه حيبلغوك باسم البنك

2 - فى 490 دولار مذكورين بتوع Right of permenet residence دول هيروحوا مع 550 دولار ولا بعدين هم هيطلبوهم ؟

لا دول لما يتم الموافقة على طلبك باذن الله بتدفعهم والمبلغ ده قابل للاسترداد لو قررت تتراجع عن الهجرة لكن الـ 550 لأ :closedeyes:

3 - Family Members المقصود بيهم مين زوجة وأبن ولا إيه ؟ أنا مش متزوج ولا عندى أولاد طيب هكتب مين ؟

لو حضرتك معندكش أولا وغير متزوج يبقى اكتب في الخانات دي وكل خانة لا ينطبق وضعك عليها Not Applicable

4 - الطلب كله 3 ورقات وبيقولول مش عايزين غير الطلب والرسوم يعنى انا أبعت صور شخصية ولا ملوش لزمة؟

لا ترسل أي شيء زائد عن التلات ورقات همه بعدين حيدرسوا الطلب ويرسلوا لك قائمة بكل المستندات المطلوبة

الورقة الأخيرة بتاعت أفراد العائلة دى مش فاهم منها حاجة يعنى أكتب أبويا وأمى وأخواتى ؟

شكراً على المساعدة .. وجزاكم الله كل خير .

يلا سلام بقى.

دي مش عارفها خليها للأستاذ هادي او الاستاذ ايهاب

تم تعديل 10 فبراير 2007 بواسطة الحازم حسن

[اسكندرية تانى]

اخى الفاضل

اعتقد انك فى الامارات العربية المتحدة و لذلك انا اعتقد انك سوف تقدم على الهجرة كمقيم فى دول الخليج و لهم مكتب خاص فى لندن و هذا هو عنوانة

Immigration and Medical Services Division

High Commission of Canada

38 Grosvenor Street

London

W1K 4AA

United Kingdom

كما فى هذا الرابط الذى يحتوى كل التفاصيل

http://www.canada.org.uk/visa-info/immig/e_immig.htm

بالنسبة لمبلغ ال550 دولار فالدفع يكون عن طريق حوالة بنكية BANK DRAFT عن طريق اى شركة صرافة كبيرة عندك فى الامارات الى حساب General receiver for Canada

اما اذا كنت ستقدم الى الهجرة من مصر فكل التفاصيل بالحرف موجودة على موقع السفارة الكندية بالقاهرة و هذا هو رابط الصفحة التى تحوى التفاصيل

http://www.dfait-maeci.gc.ca/cairo/cic-en.asp

و بالتوفيق لكل الاخوة كما اعتذر للاخوة هادى و ايهاب لانى تعديت على حقوق النشر و الطبع المحاوراتية فى كندا

[اسكندرية تانى]

واى خدمة :closedeyes:

تم تعديل 10 فبراير 2007 بواسطة اسكندرية تانى

[HAMD]

MERCI

[desert_rock70]

أنا شاكر ليكم جداً .. جزاكم الله كل خير أنا فعلاً فى الإمارات وبعت على مكتب لندن وبعتولى الورق وفيه المعلومات والحمد لله أنتوا قمتوا بالواجب يبقى خلاص البنوك هنا كتير هبعت الحوالة تصرف بالإسم اللى هم كاتبينه وكمان أكتب N/A فى أى خانة خاصة بالعائلة .تمام كدة صح؟

[الحازم حسن]

طيب ما تعمل معانا دقة جدعنة وتقول لنا على الورق اللي طلبوه منك :wub:

[desert_rock70]

[سلام عليكم .. الصراحة الجدعنة عملها ناس قبلى كتير ربنا يبارك لهم بغض النظر عن الأسامى بس اللى هضيفه أن أنا أتبعت الخطوات اللى قالو عليها وقريت كل كلمة كتبوها بتركيز بالإضافة أنى عملت برنت لكل ورقة متعلقة بالهجرة وأبتديت أول حاجة بخطاب تعريف زى ما أشار واحد من ولاد النيل الجدعان فى كلامه وأسمه أستاذ هادى على ما أذكر وبعته أيميل وبريد عادى وسألونى على الأيميل على العنوان وبعتهلهم وقاموا بعتولى الورق اللى كان كالتالى ( ورقة عن الرسوم ) و ( دليل إرشادى ) و ( 3 ورقات تكتب فيهم معلومات عنك ) لسه مكتبتش فيهم حاجة .

[الرافعي]

اخى الفاضل

اعتقد انك فى الامارات العربية المتحدة و لذلك انا اعتقد انك سوف تقدم على الهجرة كمقيم فى دول الخليج و لهم مكتب خاص فى لندن و هذا هو عنوانة

Immigration and Medical Services Division

High Commission of Canada

38 Grosvenor Street

London

W1K 4AA

United Kingdom

الأخ العزيز إسكندرية تاني

أنا كنت بعثت رسالة إلى لندن كما قال لي أخي وصديقي هادي وقتها ، لكنهم أرسلوا لي صورة من إعلان يقول إن المقيمين في الإمارات يقدموا في سفارة كندا في أبو ظبي.

وقد راسلت السفارة في أبوظبي وقد أكدوا هذه المعلومة ... فما الرأي النهائي ؟

وشكرا

[الحازم حسن]

[سلام عليكم .. الصراحة الجدعنة عملها ناس قبلى كتير ربنا يبارك لهم بغض النظر عن الأسامى بس اللى هضيفه أن أنا أتبعت الخطوات اللى قالو عليها وقريت كل كلمة كتبوها بتركيز بالإضافة أنى عملت برنت لكل ورقة متعلقة بالهجرة وأبتديت أول حاجة بخطاب تعريف زى ما أشار واحد من ولاد النيل الجدعان فى كلامه وأسمه أستاذ هادى على ما أذكر وبعته أيميل وبريد عادى وسألونى على الأيميل على العنوان وبعتهلهم وقاموا بعتولى الورق اللى كان كالتالى ( ورقة عن الرسوم ) و ( دليل إرشادى ) و ( 3 ورقات تكتب فيهم معلومات عنك ) لسه مكتبتش فيهم حاجة .

سوء تفاهم

حضرتك قولت انهم ردوا عليك انا افتكرتهم بعتوا لك قايمة بالورق المطلوب

انا كنت اقصد الورق اللي حيطلبوه منك لبدء تقييم الملف يعني زي الشهادات الدراسية والفيش والتشبيه وشهادات الخبرة .... الخ ايه تاني حيطلبوه غير متوقع أو انك مش عامل حسابك عليه ؟؟؟؟