se_ Elsyed

البقاء لله يا أستاذ محمد .... الهمكم الله الصبر والسلوان .. وأسكن زوجتكم الغالية فسيح جناته . نسأل الله أن يرحمها برحمته ويجعل مثواها الجنة بإذن الله .

ويا بخت من بات مظلوم ولا باتش ظالم وهنيالك با فاعل الخير والثواب وفعلاً أهم حاجه إننا مع بعض ومدفيين بعض في عز شهر أيلول الأسود

ليه يا أحمد .. وهو أبو رجل مسلوخه محتاج حد يهدد به ولا هو أصلاً المادة الخام بتاعت التهديد ؟ اما الإبتزاز .. فالحق لله هو ما يحدث الأن من بعض القوى او الأشخاص اللي كتير منهم لا له لون ولا طعم يعني لا مؤخذه مين رفعت السعيد عشان يفرض شروط ..ولا أيمن نور وبالله عليك ماذا يملكون من أصوات او حتى قوة سياسية عشان يتشرطوا ؟ فلما تسمع حاجات من عينة : 1- إذا أراد الاخوان أن نؤيدهم .. فعليهم أن يتنازلوا لحمدين صباحي ... هههههههههههههههههه وهو لو مرسي إتنازل لصباحي .. يبقى كده بيأيدوا مُرسي ؟ وأساساً إفتكاسات تنازل الأول للتالت دي ضحكت علينا العالم وخلتنا مُسخه ... أنا أعرف إن الاول يتنازل للتاني وبالتالي التاني يفوز بالتزكية .. لكن الاول يتنازل للتالت عشان عنده كحه ومش قادر يكمل .. دي جديدة دي ؟ 2- على الاخوان ان يحلوا جماعة الاخون المسلمين .... طب تاني يوم بنفس المجموعة هاعمل لك جماعة واسميها .. الكتاكيت الشرسة ... هاتقدر بقى تتكلم ساعتها ؟ 3- أه لازم تختار حماده إبن طنط عدلات نائب أول ... وسمسم إبن عمو شوكت نائب ثاني .. ساعتها ممكن نفكر عارف الموضوع عامل زي إيه ؟ زي اهل العروسة اللي بيكتفوا العريس بقايمة عفش بمية الف جنية .. ومؤخر صداق بربع مليون جنية .. وهما فاكرين إنهم كده بيأمنوا مستقبل بنتهم .. وأساساً اللي في طبعه الغدر .. الله الوكيل لما يكون ماضي شيكات بمية مليون جنية ولا بيهمه ساعة لما يعمل الناقصة ...

شفيق مجرد فرد يمكن الثورة ضده او خلعه و اذا فشل فبعد اربع سنوات سيرحل و لكن مرسي وراءه مرشد و شاطر و مكتب ارشاد و تنظيم دولي و اذا فشل او انحرف عن طريق المدنية و الديمقراطية لن يخلع ولا بالطبل البلدي بيتهيألك مرسي وراه حزب ممكن لو ما نزلناش إحنا يطلع له حزب معارض يبهدله وياخد منه الاغلبية تاني .. وانا شخصياً لو أيدتهم في إنتخابات الاعادة . فهاكون أول واحد يعارضهم لو ما حققوش أهداف الثورة ... لكن شفشق هو مبارك اللي وراه أمن الدولة والشرطة العسكرية والمخابرات والشرطة اللي كل دول مراكزهم اتهزت ولسه زي ما هما لابدين ومستخبيين وعاملين نفسهم تابوا وأنابوا ومتحينين فرصة الأنقضاض على الشعب مرة اخرى عشان يعلمونا غزاي نتطاول على سيادنا طب حاجه بسيطة ... سألت نفسك راح فين إقتراح هيكلة جهاز الشرطة ؟ جاوب وأنت هاتعرف راح فين وليه المطمطة والتأخير في عمل أي إصلاحات او هيكلة لأجهزة أذاقت الشعب سوء العذاب والثورة قامت ضدها

خد النقاط و القهوة كمان و رجع لي عمري اللي كان :blink: قصدي اني خلاص حانضم للفنانات التائبات بيدي لا بيد مرسي :sad: ههههههههههههههههههه .. ياللي أتحرمتوا من التصويت .. الفرصة لسه قدامكم .. من غير لا شكوى ولا تبكيت .. شفيقنا هو مرشحكم

في إقتراح دلوقت من أختي الصغيرة عبير رفيقة الكبدة وشندوشتات تالتة أول في إنها تتنازل لي عن نقطاها .. مقابل إني ما أفتح قهوة جنبها وازاحمها في اكل عيشها ... انا بصراحة بأدرس الأقتراح ده برواقه

والله عالى.. بقى الدكتور ياسر يقف دلوقت على أرض صلبة ويفتح توبيكات تهنئة لى أساس إنه بقى من ذوي الأملاك ماشي ماشي شكراً يا دوك وام سلمى تستاهل ..... ربنا يبارك في قلمك يا فندم عبير ... ياسر خد منك التوكيل ... الحقي نفسك

يا حبيبي إنت واخدها مسألة شخصية ليه ؟ إنتوا فهمتوا الموضوع إزاي أصلاً ؟ ليه وهو مرشح الاخوان خسر عشان اتغروا وأعجبتهم قوتهم ؟ ولا أحنا كلنا اللي أتهزمنا بما فيهم اللي مش إسلامي زي حمدين صباحي .. او معتدل زي أبو الفتوح .. أو الاخ اللي إنت أنتخبته عمرو موسى ؟ وهل الأخوان أستعطفونا عشان نأيدهم في الاعادة ؟.. ولا إحنا بنؤيد إستمرار الثورة بالرغم من إن شباب الثورة هما أول من بيقفوا حتى الان في وجه الاخوان وينتقدوهم لكن مع شفشق .. مش هاتقدر تغمض عنيك .. لأنك مش هاتلاقي راسك أساساً

غضب ربنا بيكون بين الكاف والنون .. والأرض ممكن تنشق وتبلعنا .. أو ييجي تسونامي يطيرنا كلنا ... لكن اللي بيحصل الأن كله خير .. ودروس وعِبر اللي بيوصل لهدفه بعد معاناة وصراع .. بيعرف قيمة هدفه وبيعض عليه بإيديه وسنانه ... غير اللي بيلاقي كل حاجه جت له على الجاهز .. يا راجل بُص على مثلاً يعني حالات الطلاق وشوف اكتر حالات طلاق بتحصل فين ؟ بالتأكيد بين اللي بابا وماما بيجهزوهم ويصرفوا عليهم من الالف الى الياء .. إنما اللي طفح الدم وبناها طوبة طوبة .. هايبقى سهل عليه يهد ده كله في لحظة ؟ بعيداً عن الثورة ودوشتها بقى .. إسمع كده تفتكر يا حكيم .. مش ربنا سبحانة وتعالى كان ممكن بعث سيدنا محمد بالرسالة ..وشرح قلب الناس في لمح البصر .. وفضل الرسول 30 او 40 سنة بينهم يعلمهم دينهم بلا حروب بلا ضحايا بلا تضحيات بلا مؤامرات وصلت للعديد من المحاولات لقتل الرسول الكريم سواء في الحرب او في الحياة العادية لدرجة التأمر بتسميمه ؟ .. مش كان ممكن ده يحصل ؟ طب .. قولنا خلاص والرسول أكمل مهمته والناس اهدت والحمد لله وبقى عندنا نواة لمجتمع صالح مؤمن ممكن ينطلقوا منه لهداية الناس اجمعين .... ما شوفنا إلا بعد أيام بسيطة من وفاته .. إلا وحصلت أحداث الردة ... وبدأت الحروب تاني تفتكر ليه ده كله ؟ ما خلاص الدين اهو والدعوة اكتملت .. ليه حروب مالهاش أي لازمه يروح فيها معظم حافظي القرأن والناس اللي كانوا أشبة بالملائكة في سلوكهم ؟ بالتأكيد عشان حكمة ربنا .... وعشان ربنا يبين لنا قد إيه الرسالة دي غالية ووصلت لنا على اكتاف وأرواح ناس ضحوا بالغالي والرخيص وبدمهم وبحياتهم عشان الواحد مننا دلوقت يمسك الريموت كنترول بتاع التليفزيون .. ويلاقي قنوات قرأن كريم وأحاديث ودروس و و و و .. ويسمع وهو بيشرب الشاي او بيتغدا لكن لو ظن في يوم من الأيام إنها سهله ووصلت له بسهولة ... فهايبقى من السهل عليه إنه يفرط فيها لأنه ما قدرش ولا عرف ولا قرأ عن تضحيات الأولين ------------- نرجع بقى للثورة تصور لو كنا خرجنا وبخينا في المخلوع .. ومن أول يوم قال لنا حاضر هاسمع الكلام وراح ماشي ... تفتكر كان هايبقى لها طعم ؟ قصدي تفتكر كانت الناس هاتحس الإحساس اللي جالنا بعد الـ 18 يوم والضحايا والشهداء والمصابين وكانت معنوياتنا في السما إننا أتخلصنا من المحتلين المختلين الغاصبين .. وحسينا إننا ممكن نشيل الجبال دي شيل لكن ربنا عشان يعطينا دروس ويعرفنا إن الصراع بين الخير والشر .. بين النظافة والقذارة اللي في ناس بيحنوا لها ومتكيفين من ريحتها ومش طايقين الجوالنضيف أبداً وعاوزين يرجعوا لقديمة ... ربنا عاوز يعرفنا ويعلمنا إن السماء لا تُمطر ذهباً ولا فضة .. وإن الطريق طويل .. ولازم تمشية خطوة خطوة ويكون لك في كل خطوة إنجاز والا تبقى بتتسكع مش بتمشي مش مفيد وجاد ... تخيل بعد كام سنة اللي بعدنا لما يقرأوا عن الدماء اللي سالت في التحرير وفي كل ميادين مصر ... او عيون زهور ورجالة مصر اللي ضاعت عشان إحنا نشوف ... او البنات ... تخيل .. البنات اللي اتسحلوا وأتعروا عشان باقي البنات تعيش في شرف وعفة .... هل بعد ده كله يفرطوا في مكتسبات الثورة ويحنوا لعصور الظلام ؟ وهل لو عملوا كده ... يستاهلوا يبقوا بني ادمين ويتصنفوا من ضمن البشر ؟ ما تقلقش يا عزيزي ... الثورة دي غربال كبيرررررررررررررررررررررررررر ... فَأَمَّا الزَّبَدُ فَيَذْهَبُ جُفَاءً وَأَمَّا مَا يَنْفَعُ النَّاسَ فَيَمْكُثُ فِي الأَرْضِ وكل اللي أنت شايفه ده زبد .. رغاوي على السطح مالهاش عُمر ولا حياة .. ومن اول نفخة هاتطير ما تقلقش ... لكن الخير هو اللي بيبقى ... والحق والعدل هو اللي بينتصر في النهاية .. دي سُنة الله في الأرض .... ودايماً لو بتغربل أو زي ما بنقول بالبلدي بتنخل حاجه رز او عدس او فول .. بتلاقي الهيش والريش والكلام الفاضي اللي كان متجمع جنب بعضه وفاكر نفسه قوة .. ده أول حاجه بتطير والهوا بياخدها بعيد في أي مصيبة .. لكن اللي بيفضل هو الحاجة اللي بتنفع وبتفلح . تصدق بالله ؟ حتى لو ظبطوها لشفيق وأفتكروا أنهم انتصروا علينا ... برضوا هانكمل ... لانها مش هوجه وخلصت ... دي رسالة وقضية فإما ان تؤمن بها حتى النهاية ولا تهدأ حتى تنتصر مهما كانت التضحيات .. او تريح وتأنتخ وتنتظرك دورط في طابور الدبح

مين قال لك كده ؟ بس جاوب بس على الأسئلة وأنت هاتعرف كل حاجه هل لو مبارك خرج براءة ... يبقى مالناس إلا الظاهر .. والراجل يطلع طاهر وطول عمره طاهر حتى بالامارة حلف بالطلاق إنه ما عندوش ولا مليم في أي بنك ... وسويسرا وأنجلترا عملوا معانا الواجب وهايبعتوا لنا أرصدتة المتلتلة هناك .. ده غير جرائم اخرى بشعة خلال 30 سنة ؟ هل لما كلفتوها لسوزان وطلعت للشعب لسانها .. هل سوزان شريفة عفيفة وكانت بتخاف على مصلحة البلد زي ما بتخاف على مجوهراتها ؟ المثال بتاع محمد إبراهيم سليمان ومن قبلة يوسف والي ... هل بالنسبة لك دول كانوا أيام ما حفظوا التحقيق معاهم .. حل دول ناس مالناس إلا الظاهر وفوق مستوى الشبهات ؟ هناك المعايير الأخلاقية والإجتماعية يا عزيزي اللي أقوى من مليون قانونومليون قضاء .. وإلا كمان أقنعني إن بوش الأب والأبن ما بيفارقوش السجادة هما كمان عشان ما أثبتناش عليهم دبح الملايين من البشر ... على فكرة ... فريد الضبع وشلة أكلي الجيف اللي معاه بيلعبوا على النقطة دي .. والقانون والقضاء لعبتهم .. وبيطلعوا الواحد من أي مصيبة زي الشعرة من الضفيرة

القضاء والقانون مش كل حاجه ليه وهو عبد الناصر بجبروته وطاغوته .. أتثبت عليه حاجه ؟ والإعتقالات والقتل أيامها .. أتثبت عليه حاجه ؟ يبقى على كده كلنا نطلع في الميادين ونقول لمبارك إحنا أسفين يا مخلوع لو ما أتثبتش عليه حاجه ونطلع إحنا اللي غلطانين ولم نعدل ولم نقترب من التقوى وبالمرة نروح نحب على راس الحيزبون سوزان ونقول لها حقك علينا عشان ما أتثبتش عليكي حاجه ... أه على فكرة يا طارق ... محمد إبراهيم سليمان أيام مبارك لم يثبت عليه حاجه .. تخيل الحرامي الفاسد ده .. ما أثبتوش عليه حاجه ؟ وبنفس الورق والمستندات اللي اتحركت بعد الثورة لا زادت ورقة ولا نقصت ورقة .. إتسجن وأتحبس ؟ كفايه حكم الناس على كلامه وتهديدة ووعيده وهو لسه عالبر .. ما بالك لا قدر الله لو أترستق ؟.... اما من ناحية الإقناع .. فهاينفع بإذن الله .. لأننا لا نريد إلا الإصلاح .. ولا نريد إعادة النظام الفاسد بكامل هيئتة مرة أخرى .... ومش عاوزين إلا مصلحة الناس .. وبنفهم اللي فاكر إنها ما تنفعش الا بالعسكر وبالحديد والنار ...

مصدر آخر نكته أنا يا أبله أنا يا ابلة http://www.egyptiantalks.org/invb/index.php?showtopic=135983

يا عم محمد الموضوع مش كده خالص انا هاتجنن .. من ساعة إعلان النتائج في اللجان الفرعية وأنا باتصل باهلي في مصر .. وتحديداً في دائرتي تخيل يطلع فيها الثاني ؟ وفي محافظة الشرقية حيث مسقط رأسي يكتسح بـ 110 الف صوت فرق عن مرسي ؟ وبقيت اشك في إخواتي وأصحابي وأهلي في البلد وقرايبي إنهم باعوا القضية وصوتوا للقاتل الفاسد أقسم بالله ولا واحد فيهم فكر فيه أصلاً ... طب تخيل ما يعرفوش ولا قعدوا ولا سمعوا عن حد إنتخب شفيق ولا عدى من جنبهم حتى أيوه مش لازم الواحد يعرف أسامي 5 مليون بني أدم او يعدي على كل بيت وكل قهوة ويسأل الناس .. لكن على الأقل من الجانب الإجتماعي وحيث إن الناس هجرت الفرجة على المسلسلات التركي ولاميس ومهند والناس دي وما بقوش يتكلموا إلا في الإنتخابات .. فالواحد بيبقى عارف كل اللي حواليه إنتخبوا مين وكل واحد بيفتخر إنه شارك في الحدث ده ... وأزيدك من الشعر بيت ... في الشغل هنا .. وفي محيط الأصدقاء .. والزملاء .. و و و .. ولا واحد أعطى صوته لشفيق .. فدي الغُربة وأنا عارف نتيجة السعودية ومتأكد كانت هاتبقى إزاي ... يعني بإختصار كل اهلي وقرايبي وأصحابي في مصر أنقسموا ما بين مرسي وابو الفتوح وحمدين صباحي .. وفي الأيام الاخيرة القليلة قبل الإنتخابات حمدين فرق كتير قوي .. وعيال أخواتي الجامعيين سواء بنات او صبيان كانوا عاملين ثورجية ومجمعين الاف الأصوات من أصحابهم ومن زمايلهم المقتنعين بالراجل الغريبة انهم أقنعوا أهاليهم .. ولقيت كل عيل مفعوص من دول ههههههههه واخد أبوه وأمه وجيرانه ورايح لحمدين يبقى الشفشق ده جه منين ؟ أنا باتكلم جد مش هزار والله