هانى السعداوى

أستاذ زهيرى .. بما ان انت بتتقل علينا فى امتاعنا بتحليلك الرائع .. فقلت أسلى نفسى و استمتع بقراءة الموضوع من الأول (للمرة العاشرة تقريبا :happy: ).. وتوقفت عند تحليلك الرائع لقصيدة ( الكرنك ) .. و كان ليه عندك سؤال و ملاحظة و رجاء (الطمع وحش برده :closedeyes: ) .. السؤال هو ان فعلا من متابعتى لتحليل القصيدة من المتخصيين .. كلهم اجمعوا على ابتكار عبد الوهاب للمقام المستخدم فى مقطع (أين يا أطلال) .. و روعة الموسيقى الممهدة له .. بس انا سمعت عن ان هذا المقطع هو من مقام ( الهزام ) .. وبما انى لا أفقه شئ فى علم المقامات قلت اسألك .. هو (هزام) ولا (سيكا) .. ولا الاتنين هما نفس المقام؟ بالمناسبة .. انا عندى ملفات صوتية تتضمن التاريخ الغنائى لعبد الوهاب بتقديم و تعليق الدكتور يوسف شوقى .. وهية الحقيقة ممتعة جدا .. حاول تسمعها .. أو قوللى و انا ابعتهالك الملاحظة بقى .. فيه غلطة صغيرة فى تحليلك .. مقطع (انا هيمان و يا طول هيامى ) هو من نفس القصيدة ( الكرنك ) .. وليس فى قصيدة ( كليوباترة ) .. دى ملاحظة فقط للتصحيح .. bv:- فاضل الرجاء .. رجاء ماتغيبش علينا أوى كدة فى الموضوع ده .. أنا عارف ان الثورة واخداك مننا .. بس يعنى لو تعدى هنا مرة كل أسبوع كدة يبقى تمام :) .. ويا سيدى كله بثوابه تحياتى

أستاذنا زهيرى .. دايما تتحفنا بمعلومات قيمة .. أنا بعد اما قريت ردك سمعت قصيدة (الام الخلف) .. و فعلا لاحظت ما كان يخفى على .. حقيقى موسيقار الأجيال كان عبقرى .. بس غريبة .. ده التحول فى السلم الموسيقى ظهر فجأة و بدون أى تمهيد .. فعلا ابن حريفة :) فيه كمان أغنية من أجمل الأغانى اللى اتغنت لثورة 25 يناير وهى أغنية ( يا مصر هانت ) .. أشعار المبدع تميم البرغوثى و لحن و غناء مصطفى سعيد .. مصطفى سعيد فى الأغنية دى تنقل ما بين كم من المقامات غير عادى .. فكرنا بألحان زمان .. واستعمل السلم الخماسى ببراعة فى كوبليه ( ده حكم أسرة ولا خوفو ولا خفرع ) .. لو ماكنتوش سمعتوه لازم تسمعوه .. لان مصطفى سعيد ده بعتبره أول مكسب من مكاسب الثورة تحياتى http://www.youtube.com/watch?v=B2rqOJmpHl4

معلومات قيمة مشكور عليها bv:- .. الا ان ملحن الأغنية هو الراحل منير مراد بدون شك .. وليس محمد الموجى كما ذكرت .. ولقد قرأت ان الفنانة الكبيرة شادية طلبت من منير مراد تلحين هذه الأغنية من السلم الخماسى خصيصا لتغنيها فى السودان

الى الأستاذ زهيرى .. كنت عاوز أبعتلك أهنيك على الأغانى الرائعة اللى بتمتعنا بيها .. وأشكر شباب و شعب مصر اللى فتحوا نفسك و خلوك تعملنا الحاجات الحلوة دى .. ودى أكيد من أهم ثمار ثورة 25 يناير :) المهم كنت عاوز أبعتلك التهنئة فى رسالة .. بس لقيت ان افضل مكان اوجهلك فيه التهنئة هو الموضوع ده .. لان زى ما اتعلمنا من عبد الوهاب ان الفن هو فى خدمة المجتمع و تعبير حقيقى عن الشعب .. فأغنياتك اللى انت عملتها هى بالفعل لسان حال الثورة .. يعنى مثلا بعد أما سمعت طنط عفاف وكلامها الخايب فى التليفزيون .. قعدت كاتم فى نفسى و متنكد ومطرشق و مش عارف أقول ايه .. أول ما سمعت أغنيتك استريحت يا أخى .. وحسيت ان الأغنية بتاعتك بتتكلم بلسانى .. بالمناسبة انا أول حد سمعنى أغنيتك على النت كانت مراتى .. و بعد ما سمعتها قعدت أحلفلها ميت يمين انى فيه مابينا سابق معرفة الكترونية .. مصدقتنيش .. كانت فاكرانى بهجص .. وقعدت تقوللى ايش جاب لجاب .. ده راجل عازف تقيل و فنان معتبر .. هيعبرك و يتناقش معاك بمناسبة ايه .. لغاية ما حلفتلها بالطلاق انى أعرفك :) تانى أهم ثمرة من ثمار الثورة هى اعادة اكتشاف أغانى عبد الوهاب الوطنية .. اللى بصراحة ماكنتش من مستمعيها أوى .. لغاية أما سمعت ( يا نسمة الحرية ) .. اللى تحس ان عبد الوهاب غناها يوم 12 فبراير بعد أما خلعنا المخلوع .. كان عبد الوهاب بيوصف حالنا فعلا دلوقت مش عارف حضرتك عندك و قت تتابع الموضوع ده ولا لأ .. بس مادام حضرتك جبت سيرة ( أغنية عربية ) .. فمقدرش أفوت فرصة قراءة تحليلك لهذه الأغنية الرائعة .. طبعا الأغنية دى بمناسبة الوحدة بين مصر و سوريا سنة 1958 .. و كلمات كامل الشناوى .. و فيها النشيد الشهير ( عرف الشعب طريقه .. وحد الشعب بلاده ) اللى كان الهتاف الرسمى للشعب طيلة سنوات الوحدة .. بس الجزء اللى بستمتع بيه بجد فى هذه الرائعة أما الكورال بيقول ( عربا كنا و نبقى عربا ) .. و بعدين يخش عبده فى جملة شرقية صميمة و بديعة ( لم يكن أيهما بالأمس وحده ) .. حاجة تقشعر والله .. و أدى الأغنية .. و مستنى تحليلك .. بس عاوز منك وعد .. بعديها على طول نتكلم على أغنية ( كل أخ عربى أخى ) .. لانى بصراحة بعشق الأغنية دى http://www.youtube.com/watch?v=9gZ1sJsBHvY

فى رأيى المتواضع دى أفضل أغنية اتقدمت لشهداء الثورة المجيدة رغم ان محمد فؤاد من الناس اللى دافعت عن الرئيس السابق .. الا ان يشفعله صدق احساسه الواضح فى الأغنية .. اسمعوا معايا و قولوا رأيكم http://www.youtube.com/watch?v=d9EDfqjDjmI&feature=related

أخى الكريم .. لك جزيل الشكر على ترحيبك .. و يشرفنى انضمامى لأى نادى انت عضو فيه .. حتى لو كان نادى محبى ابو الليف :) .. فما بالك بنادى السميعة اللى بنسمتع فيه بالتحليل الجميل لأخونا المايسترو و النغمات الساحرة لموسيقار الأجيال تحياتى

:) طلباتك أوامر http://www.youtube.com/watch?v=98JPeoCZ0d4&feature=related

طبعا مستنيين بفارغ الصبر تكملة كلامك عن مجنون ليلى .. الأوبريت اللى جمهور عبد الوهاب قعد مستنى يلحنه كامل لمدة كبيرة دون جدوى .. و يقال انه بالفعل كان مكتمل لكن مانزلوش مش عارف ليه أما بالنسبة لقصيدة ( مضناك جفاه ) .. فدى بالنسبة لى من أحلى ما غنى محمد عبد الوهاب لشوقى ( بالاضافة الى مقادير من جفنيك bv:- ) .. القصيدة دى بجانب ان فيها لحن من أجمل ألحان عبد الوهاب .. الا انها كمان بتبين قد ايه كان شوقى عبقرى .. مع العلم ان القصيدة دى شوقى عارض فيها قصيدة قديمة و شهيرة للقيروانى مطلعها ( يا ليل الصب متى غده .. أقيام الساعة موعده ) .. و اللى تفوق فيها شوقى بمراحل اللى بيشدنى في القصيدة دى جدا هوة الفاصل الموسيقى اللى عبد الوهاب أبدع فيه قبل البيت ( جحدت عيناك زكى دمى ) .. جملة موسيقية شرقية أصيلة فى منتهى الجمال و بما اننا بنتكلم عن القصائد .. و هنتفرج على التحليل الرائع لمجنون ليلى قريب .. عاوز أعرف رأيك فى قصيدة لعبد الوهاب .. مش كتير يعرفها .. لكنها بالنسبة لى أكتر قصيدة بستمتع بيها بموسيقى و صوت عبد الوهاب .. و هية قصيدة ( قالت ) .. اللى أعتقد كانت فى الأربعينيات بس بذمتك .. فيه أروع من المقدمة الموسيقية للقصيدة دى .. ولا صوت عبد الوهاب اللى كان فى قمته و أوج جماله .. اسمعه و هوة بيقول جملة ( قالت تخليت ) .. حاجة تعقد .. قمة فى الروعة و الجمال و طبعا الجملة الموسيقية اللى قبل البيت ( قالت سررت الأعداء ) .. موسيقى فى منتهى الجمال .. بتهيألى الموسيقى دى كانت بتتقال فى تتر برنامج تليفزيونى .. بس مش قادر أفتكره بالظبط .. و لا و هوة بيعيد فى جملة ( قالت سررت الأعداء ) .. يا نهار ابيض .. انا مبفهمش فى التنقل بين المقامات و الكلام ده .. بس انا متأكد ان عبده فى الجملة دى بالذات كان بيعمل معجزة :) .. بالنسبة لى على الأقل رأيك فى القصيدة دى يهمنى فعلا .. لانى بصراحة موهوم بيها .. بس مش كتير يعرفوها .. وانا مستغرب من الموضوع ده

بصراحة كل مرة بحاول أكمل كلامى.. معرفش ..لان أوجه العبقرية فى أعمال عبد الوهاب لا نهائية .. سواء فى الألحان العبقرية او صوته العذب الدافى الغريب .. ده غير انه كان بيحافظ على صحته :) :) .. ودى أهم حاجة .. فمش عارف اتكلم عن ايه ولا عن ايه فهتكلم عن تجربنى الشخصية .. الغريب ان مدخلى لعالم عبد الوهاب كان من خلال القصائد .. طبعا البداية كانت مع الرائعة ( النهر الخالد ) .. اللى لو قعدت أوصف فيها سنة .. مش هقدر أعبر عن جمال المزيكا واللحن .. ولا عن روعة الكلمات .. بس أعتقد ان فيها جملة موسيقية من الجمل الموسيقية الخالدة فى الموسيقا العربية و هية لحن أخر كوبليه ( سمعت فى شطك الجميل ما قالت الريح للنخيل .. يسبح الطير أم يغنى و يشرح الحب للخميل .. و أغصن تلك أم صبايا شربن من خمرة الأصيل ) .. ايه الجمال ده :) :) .. و يقال انها من أطول الجمل اللحنية اللى عملها عبده ده طبعا غير المقدمة الرائعة .. والفاصل قبل الكوبليه الأخير اللى نفذه عبد الوهاب على العود .. حاجة تخخبل بجد طبعا بعد أما فقت من انبهارى باللحن .. لقيت ان الكلمات لا تقل روعة و جمال .. طبعا القصيدة من كلمات ( محمود حسن اسماعيل ) .. فدورت على أعمال عبد الوهاب بكلمات الشاعر ده .. فاكتشفت الكارثة الأنقح و هية ( دعاء الشرق ) .. اللى فعلا عبد الوهاب أبدع فيها ابداع غريب .. يكفى انك تسمع النغمة اللى بتتعزف على القانون فى مقدمة القصيدة عشان تعيش مع صوت عبد الوهاب فى عالم تانى وهلم جرة بقى .. طبعا مش هتكلم عن فلسطين ( أخى جاوز الظالمون المدى ) .. ولا الكرنك ولا مضناك جفاه .. و أساسا كل دول كوم و قصيدة ( الجندول ) دى كوم تانى .. و اعتقد الأخ زهيرى ماخلاش كلام تانى ممكن نقوله بعده .. اللى يا ريت يبطل كسل شوية و يمتعنا بتحليلاته القيمة طبعا بعد القصائد ابتديت أسمع أغانى عبد الوهاب (وخصوصا اغانى الخمسينات ) .. بس دى محتاجة يوم تانى هسيبكوا مع قصيدة فلسطين .. اللى طبعا وطننا الحبيب مانع اذاعتها تماما .. واضح ان كلام عبد الوهاب ( اللى اتعمل سنة 48 ) جاى على الجرح .. ومخلى منظرهم مش ولا بد http://www.youtube.com/watch?v=wg84UzOIFWA

هدية منى ليكم بقى .. معشوقى الأول والأخير عبد الوهاب فى أغنية مفيش بعد كدة الأغنية هى ( فين طريقك فين ) .. كلمات حسين السيد .. الأغنية دى من اروع اغانى الخمسينات لعبد الوهاب .. وبالذات اسمعوا الكوبليه الأخير .. وازاى عبده بيعبر عن معنى الكلمات والحرقة اللى فيها بالمزيكا .. حاجة تخبل http://www.youtube.com/watch?v=6YwKWT7qd2g

معرفش هل من حقى انى أرد على الموضوع الأكثر من رائع ده .. و هل فيه أمل انو يعود للحياة تانى و نستمتع بالتحليل الهايل للأستاذ زهيرى ولا لأ .. بس انبهارى بالموضوع القيم ده خلانى مجبر انى أضيف ليه .. وطبعا هتكون اضافة لا تذكر بعد الاضافات القيمة من الأستاذ زهيرى و الأخوة الأعضاء هنا .. و بما انى كمان غير متخصص ولا افهم شئ فى علم المقامات و الموسيقى .. العلم اللى فى رأيى علم الذرة اسهل منه مليون مرة .. فيكفى ان واحد قدامك بقوللك كلمتين من نوعية ( راست - أودليب - حجاز كار - النواأثر - الهزام ) لتقتنع ان العلم ده يستعصى على محدودى العقل أمثالى .. بس مش معقول نقعد ساكتين يعنى .. اهو نكتب كلمتين كدة اى كلام علشان نسلى وقتنا الحقيقة ان مجرد كلمة شكر لن تكفى .. و لكن انت لو عرفت قد ايه السميعة بيستمتعوا بموضوعك ده .. كنت ستمتلئ فخرا بجد .. ومش عارف تفتكر ولا لأ .. بس من فترة كبيرة كنت كتبتلك رد على موضوعك الجميل عن أم كلثوم .. وهربت بعد كدة طبعا الكلام عن محمد عبد الوهاب يحتاج لحوالى 7 منتديات تقريبا .. والكلام مش هيخلص ابدا .. انا فى رأيى ان عبد الوهاب هو أسطورة الشرق بلا منازع .. و عملة نادرة قلما توجد ليس فى عالمنا العربى وحده .. وانما فى العالم أجمع .. بل وأجزم انه موجود فى الصورة مع بيتهوفن و موزارت .. ولولا اعتماد الموسيقى العربية على الأغنية واللغة العربية فى انتشارها .. لكان عبد الوهاب ملئ السمع فى الدنيا بحالها .. وان كان موضوع العالمية ده لا يعنينى كثيرا عبد الوهاب بلا جدال هو من شكل وجدان الموسيقى العربية .. والمؤسس صاحب التأثير الأكبر .. طبعا البداية كانت مع سيد درويش .. لكن العمر لم يمهله .. بينما عمر عبد الوهاب المديد اتاح له انه يمتعنا بأعذب الألحان .. و يجرب أنماط و أشكال كتيرة .. ولا أبالغ عندما أقول ان معظم ما يبدعه عبد الوهاب يعد بمثابة براءة اختراع باسمه بصراحة دخلت الى عالم عبدالوهاب من خلال ام كلثوم .. طبعا كنت استمتع ب (انت عمرى - فكرونى - أمل حياتى ) .. وكانت بهرانى الموسيقى .. لكنى كنت فى الوقت ده مشدود للأداء أكتر .. بعد كدة سمعت اغنية ( انت الحب ) .. وانبهرت باللحن تماما .. بالذات حتة ( وعمرى ما اشكى من حبك مهما غرامك لوعنى ) .. عمال افكر ازاى الملحن قدر يطوع الكلام ويخرج منه جملة لحنية بالروعة دى .. و بعد كدة استمعت الى الرائعة ( ودارت الأيام ) .. و ماقدرتش استنى أكتر من كدة .. انبهارى بالمقدمة الموسيقية واللحن جعلنى أصمم على دخول عالم موسيقار الأجيال .. ولقيت عالم ساحر .. وتاريخ كبير صعب حصره وللحديث بقية

والله أخجلتم تواضعنا يا أخ زهيرى .. و بالنسبة للذوق العام أنا عارف اللى هقوله ده كلام مستهلك .. بس فعلا الفن مرآة المجتمع .. و ظاهرة أم الليف دى مش غريبة على مجتمع فيه انحطاط فى الأخلاق و فى الذوق العام .. المصيبة هوة ان أبو الليف ده طالع فى برامج حوارية و يفتخر بصوته .. و يغنيلك مقاطع من أغانى عبد المطلب .. و تسمعه تحس بنشاذ منقطع النظير .. و فعلا تتضايق من مدى التشويه اللى عمله فى الأغنية .. و بعد أما يخلص وصلة الطرب (أو الطرش) بتاعته يقوللك الحجة المعتادة .. ان عنده برد و ارهاق .. وكان هيعتذر عن البرنامج لولا انه مايقدرش يخلف معاده مع جمهوره :lol: :lol: و المصيبة الأكبر هوة الاعلام اللى بيستضيف الناس دى و يحسسهم انهم عبد الوهاب زمانهم .. تقدر تقوللى فى كام برناج تثقيفى بيتناول السيرة الذاتية لعمالقة الطرب .. أو يتناول التحليل النقدى لألحانهم - اللهم الا محاولات فردية من الشريعى .. و أيضا نصير شمة اللى للأسف برنامجه يحتوى على أخطاء فادحة .. شوف كام قناة عربية بتذيع حفلات أم كلثوم .. و على العكس كام قناة بتذيع كليبات هيفا .. للأسف هوة ده الزمن اللى احنا عايشين فيه .. ولازم نستحمله .. أنا شاب عندى 27 سنة .. ولك ان تتخيل مدى الاستغراب و الدهشة اللى بقابلها أما حد يعرف انى بسمع أم كلثوم و عبد الوهاب .. كانهم لا ينتمون لثقافتنا العربية من الأصل .. و يصبح من الجنون الاستماع لهؤلاء العمالقة .. فى حين انه يكون من العقل الاستماع لمطرب ميزته الأساسيه هوة انه ( بيلعب جيم - و بيعمل عشرة ضغط فى الكليب بتاعه ) .. و مطرب زميل انجازه الحقيقى هو التزوير و الهروب من التجنيد ..

منقدرش نتكلم عن تترات المسلسلات .. الا ولازم نقدم تحية محبة للشاعر الكبير سيد حجاب .. اللى قدملنا أجمل الأشعار فى تترات المسلسلات .. و هوة الى اداها الرونق والجمال .. و عمل اضافة مهمة جدا للدراما المصرية .. و بالمناسبة سيد حجاب كتب أغنية من أحلى الأغانى اللى اتغنت فى الدراما (المرة دى فيلم مش مسلسل) .. وهية أغنية (أراجوز) اللى أداها الممثل العالمى عمر الشريف فى فيلم يحمل نفس الاسم .. بالنسبة للموسيقى و الألحان .. فطبعا رائد المجال ده هوة الأستاذ عمار الشريعى (رأفت الهجان - أرابيسك - أم كلثوم - وغيرهم كتير ) .. و معاه طبعا الموسيقار ميشيل المصرى (ليالى الحلمية - مين اللى مايحبش فاطمة) و ياسر عبد الرحمن (المال و البنون - الضوء الشارد - التوأم - فارس بلا جواد - لما التعلب فات) بس بالنسبة للتتر المفضل .. فى المقدمة بلا نقاش تتر ليالى الحلمية ( كلمات سيد حجاب - ألحان ميشيل المصرى - غناء محمد الحلو ) منين بيجي الشجن.. من اختلاف الزمن ومنين بيجي الهوى.. من ائتلاف الهوى ومنين بيجي السواد.. من الطمع والعناد ومنين بيجي الرضا ..من الايمان بالقضا من انكسار الروح في دوح الوطن يجي احتضار الشوق في سجن البدن من اختمار الحلم يجي النهار يعود غريب الدار لـ أهل وسكن ليه يا زمان ما سبتناش أبرياء وواخدنا ليه في طريق ما منوش رجوع أقسى همومنا يفجر السخرية وأصفى ضحكة تتوه في بحر الدموع ولفين ياخدنا الأنين لليالي ما الهاش عينين ولفين ياخدنا الحنين لواحة الحيرانين ما تسرسبيش يا سنيننا من بين ايدينا ولا تنتهيش ده احنا يا دوب ابتدينا واللى له أول بكرة حيبان له آخر وبكرة تفرج مهما ضاقت علينا و بعد كدة طبعا تتر مسلسل أرابيسك (كلمات سيد حجاب - ألحان عمار الشريعى - غناء حسن فؤاد) اللى كان معبر جدا عن رسالة المسلسل ..

الى الأستاذ mzohairy : الحقيقة موضوع أكثر من رائع .. ولا أعتقد انى هقدر أوفيك حقك بكلمتين .. بس يكفى ان انت تعرف انى قمت بالتسجيل خصيصا فى محاورات المصريين عشان أوصلك شكرى العميق .. أنا قريت الموضوع كله مرتين .. وبجد استمتعت بخبرتك الموسيقية و سردك الساحر .. و لانى من عشاق الست .. فبالنيابة عن كل السميعة .. بوصلك تحياتنا .. و بصراحة مش عارف أقدر أقول ايه على أم كلثوم غير ان سماعها يعتبر متعة من متع الحياة .. واللى مبيسمعهاش بانتظام فعلا فايتهم كتير .. سواء اعمالها مع زكريا احمد أو السنباطى او عبد الوهاب أو بليغ .. وحتى الموجى و سيد مكاوى .. و روعة ام كلثوم كمان انك بتستمتع من حفلة لأخرى حتى و ان كانت نفس الأغنية .. و كأنك بتسمع أغنية مختلفة تماما .. و بالنسبة لذوقى الشخصى .. أكبر متعتى هى فى الاستماع للقصائد التى لحنها السنباطى .. و أغانى عبد الوهاب التى أبدع فيها هذا العملاق .. و خاصة فى المقدمات الموسيقية اللى كانت من أبدع ما سمعت من موسيقا .. بالنسبة لرباعيات الخيام بما ان انت تكرمت و اتكلمت عنها فى أخر الموضوع .. فهى بالنسبة لى من أحلى القصائد التى تغنت بها أم كلثوم .. بجانب الأطلال و ثورة الشك و من أجل عينيك .. و لو اتكلمنا عن لحن الكبير السنباطى .. بيعجبنى أوى لحن الرباعية اللى بتقول (أطفئ لظى القلب بشهد الرضاب .. فانما الأيام مثل السحاب ) .. لو تتكرم و تحلل هذا اللحن يبقى كتر خيرك .. و لى طلب تانى برضه ان أمكن ( الطمع وحش أنا عارف :wub: ) .. تكلمنا عن قصيدة ثورة الشك .. اللى فعلا من أقوى القصائد فى تاريخ الأغنية اطلاقا .. و بالمناسبة اللى فعلا بيعشق أم كلثوم لا يستطيع منع دموعه حين يستمع الى هذه القصيدة .. و خاصة الجزء المؤثر جدا اللى بيقول: كأنى طاف بى ركب الليالى .. يحدث عنك فى الدنيا و عنى على أنى أغالط فيك سمعى .. و تبصر فيك غير الشك عينى وما أنا بالمصدق فيك قولا .. ولكنى شقيت بحسن ظنى و كمان جزء: تعذب فى لهيب الشك روحى .. و تشقى بالظنون و بالتمنى أعتذر لو كنت طولت أو طلبت طلبات كتير .. بس فعلا أنا ما صدقت لقيتك .. و استنى طلباتى التانية فى موضوع موسيقار الأجيال .. بس هستنى الأول أشوف هتعبرنى هنا ولا لأ .. wst:: لك جزيل الشكر مرة أخرى