cup cake

وحشتونى و هتوحشونى مسافره اخر الشهر طبعا مش مبسوطه لانى نازله مصر و مش عارفه هنرجع ولالا و اهلى كلهم هنا و اخواتى والوالد و الوالده يعنى عندى اكتئاب جامد جدا قلت اسلم قبل ما انشغل فى العفش و التجهيز للسفر بجد محتاجه دعواتكم لان الوضع صعب عليا لانه جه فجاه ولان مليش حد فى مصر حد محتاج حاجه من مصر ؟؟ دكتورة ياسو مش عارفه الاسم كده صح ولا غلط بخصوص السفر للكويت و الفرق بينه و بين الامارات الكويت ممكن تقولى عليها بين السعوديه و الامارات فى المصاريف و مستوى المعيشه يعنى الامارات غاليه فى الايجارات و مصاريفها المعيشيه كتير اما الكويت فمعقوله مستوى معيشى و مادى كويس يعنى تعيشى كويس و كمان تحوشى اما عن الشغل هنا فالخاص فترتين يعنى 4 ساعات و بريك و العصر 4 ساعات تانيين اما الحكومه فبيبقى فترة واحده على بعض و ممكن يبقى فى نبطشيات على حسب المؤهل يعنى مسجل ولا مسجل اول ولا اخصائى الاستشاريين هناغير مرغوب فيهم بمعنى تانى مش مطلوبين لان شغلهم بيقى اقل و مرتبهم عالى بالماجيستير ممكن توصلى بالمرتب 1500 دينار و ممكن اقل حسب المكان طبعا المصاريف بتبقى حسب عدد افراد الاسرة و اذا فى مدارس ولالا يارب اكون افدتك اه نسيت اقولك اسالى على المكان كويس قبل ما توقعى لان فى مستشفيات هنا خصوصا فى الخاص سمعتها مش حلوه فى التعامل مع الاطباء و كمان قبل ما تمضى اى عقد اسالى الجماعه هنا فى المحاورات و هما اكيد هيفيدوكى لان ممكن يبقى فى اى بند يضايقك فى المستقبل ربنا معاكى

زى ما حصل معايا بالضبط يا اختى اهاااات الروح جوزى برضو العرق الصعيدى نقح عليه يعنى مطلعتش لوحدى ده انا زعلت منه جدا امبارح لان كان نفسى اشوفكم ودى كانت فرصه بالنسبالى و خصوصا بوسى كان نفسى اشوفها و اتعرف عليها عالطبيعه الا هى راحت امبارح ولالا اما بقى بخصوص نص الكوبايه الفاضى و المليان فمليش فيه انا عن نفسى لما بشوف حاجه غلط بقولها كنوع من لفت النظر لاننا مش هنحسن من نفسنا لو معرفناش اخطائنا و فضلنا نخاف على مظهرنا عالعموم ده راى و انا بحترم طبعا الى له راى تانى لاننا ننتمى دلوقتى لبلد ديمقراطى ولا ايه؟ :egyflag: الا صحيح يا جماعه لو كنتوا فى مصر دلوقتى كنتوا هتقولوا نعم ولالا ؟ انا كنت هقول نعم مع انى كنت عايزة الدستور كله يتغير بس البلد فى ظرف صعب و مش هتستحمل انتظار للدستور الجديد ومع انه ضرورة الا ان مصلحة البلد ابدى و لازم الحياه ترجع تانى ولا انتوا رايكم ايه؟ بس محدش يدخل فيا شمال و النبى bsh:)

بجد كان يوم جميل جدا امبارح و طبعا كان هيبقى اجمل لو كنت قابلتكم بس كان فى سوء تنظيم لاننا كمصريين لسه مش متعودين على النظام و الى كان غايظنى قوى لما واحده تبقى قاعده و معاها اكتر من كرسى فوق بعض و تسيبك واقف ولا مقعده ابنها الصغير و سايبه الناس واقفه منتهى الانانيه غير كده كنت مبسوطه جدا بالجو المصرى الى كنت مفتقداه بجد مصر وحشتنى اما بقى الراجل الى كان بيغنى فصدعنى جدا و بعدين ايه اغنيه 3 سلامات يا واحشنى دى ايه يا عم الحج اغنيه مش وقتها ولا مكانها بس برضو ارجع و اقول كان الجو العام لذيذ و عقبال السنه الجايه

معاكم طبعا يا باشا هجهز المعلوم و هشد الرحال بس المهم حددت ساعه الصفر؟ :partytime: سيبك انت البنطلون الاحمر جامد اخر حاجه وده الطبيعى من عمورتى يعنى هننتظر ايه من ملك ملوك الهنود الحمر و سلاحف النينجاو محمر الكنتاكى بس امانه و النبى لو معمر اتنحى او اى حاجه تانيه (اصل الراجل ده متعرفش هيتعمل فيه ايه gjy:: ) انا عينى من البنطلون الاحمر و الشمسيه انا حجزتهم خلاص مش كفايه مطلعناش بحاجه من حسنى hypr:

لالالالا ايه يا استاذ تامر الافكار الوحشه دى زنجا و نمس لالالا عمورتى مينفعش يبقى نمس ده اخرة جرذ و بعدين دول بس رفقا و مريم كانت بتحاول تعالجه من حاله الهزيان و الهياج المستعصية الى بتجيله bsh:) ربنا يشفه و يشفى الجميع و يجعله عامر :P

ايوه كده يا وديع ....... ايه الحلاوة دى الناس رجعت تانى للديوانيه بعد ما كانت بتنش احمدك يا رب :110: امبارح و انا بقرأ الجرنال لقيت اعلان اللقاء بتاع يوم الجمعه و مكتوب فى اخر الاعلان ان الدخول ب 2دينار و 15 لعبه مجانا فقلت اعرفكم طبعا انا مبسوطه جدا ان فى ناس لبت النداء و يارب نتجمع على خير اما عن ميعاد اللقاء فعندى اقتراح اما يبقى بعد صلاه الجمعه يعنى الساعه 2 مثلا او الساعه 4 بعد ما نصلى العصر لان الجو بيبقى جميل و الشمس بتخف حدتها شويه عالعموم اختاروا و عرفونا و ياريت الكل يقدر يحضر لانى نفسى اتعرف على الجميع اما بخصوص الغدا :FN: فكله يتغدى فى بيته ...اه ده هيبقى فى دينارين دخول يعنى هيبقى دخول و غدا ده كتير الا بقى اذا ماما قلب ابيض اتكفلت بموضوع الغدا يبقى كتر خيرها :waving: انا بهزر بوسى انتى فين يا حبيبتى محدش سامعلك صوت من مده ولا رونا ولا اريج و امل حياتى ناس كتير اختفت و الكاشف كمان من ساعه ما جه لا حس ولا خبر مش تطمنا عليك يا اخى بشمهندس محمد مبروك الفيزا يلا ياعم هانت و تنورنا المهم تسمع كلام الوالده و تركز فى السبورة كويس اما السكن فمتقلقش احنا لما جينا اجرنا بالباسبور عادى بس الاحسن لو تشترك فى السكن مع حد و لو فترة مؤقته لحد ما تظبط امورك و و اكيد الشركه ان شاء الله هتوفرلك سكن لحد ما تستقر امورك بس خلى بالك الجو هنا حر يعنى تيشرتك ...كابك و متكترش هدوم لان الهدوم هنا احسن و ارخص و لو احتجت اى حاجه او اى استفسار احنا فى الخدمه :sos:

كنت عايزة اسال لو حد يقدر يفيدنى انا ابنى هيتم ال3 سنوات الشهر الجاى يعنى على بدايه السنه الدراسيه هيكون عنده 3 سنوات و 5 شهور فهل ممكن يدخل مدرسه ولا لازم يتم 3و نص او اربعه؟ و ايه الفرق بين المدارس الامريكية و ثنائيه اللغه وايه احسن مدرسة فى السالميه او حولى ممكن اوديه فيها ياريت يا جماعه الى عنده فكرة يعرفنى و ياسلام بقى لو تعرفوا كمان مصاريف المدارس دى كام تبقوا ريحتونى من اللف و المشورة و شكرا مقدما على جنب بقى سؤال للمدامات و الانسات حد يعرف محل لبيع العبايات بس تكون حلوة و شيك احسن انا مليش فى اللف و عايزة اشترى واحده لمامتى فى عيد الام (كل سنه و كل الامهات بخير و انا اولهم :wub: )

بصى يا سيدى الخبر جاى فى موقع السفارة المصرية هيعملوا يوم للمصريين زى كل سنه بعنوان (فى حب مصر و الكويت ) يوم الجمعه الجاية فى منتزة الشعب الترفيهى بعد صلاة الجمعه و فى عروض للاطفال و فرق شعبية و مسابقات بعد صلاه العصر انا لقيتها فرصه لتغيير الجو و كمان نحس اننا فى مصر و على فكرة انا كمان الحديقة جنبى ان شاء الله انا و جوزى و الاولاد هنروح و ياريت تكون فرصه يتجمع فيها المحاوراتيه http://www.egkw.com/ArticleDetail.aspx?id=9750 ده رابط الخبر

وحشتونى وحشتونى وحشتونننى اخباركم ايه كلكم ايوه كده يا ماما قلب ابيض رجعتى الحياه لديوانيه تانى اخبارك ايه يا بوسى محدش بيشوفك ليه لعل المانع خير سمعتوا عن التجمع الى هيبقى يوم الجمعه الجايه 18 -3 فى منتزة الشعب الترفيهى للمصريين انا عن نفسى هروح انتوا بقى هتروحوا ولا لا هيبقى فى العاب و جوايز و اهم حاجه ان هيبقى فى اغانى وطنيه :egyflag: يعنى هيبقى تجمع ظريف والاولاد هينبسطوا تيجى بالسلامه يا استاذ محمد بس المهم اقرا عقدك كويس و حلل فى اى معمل خاص قبل ما تيجى و ان شاء الله تنبسط هنا قوى

ههههههههههههههههههه فكرتنى بالذى مضى والدى متخصص شوى و كنا دايما بنتفرج عليه و هو بيشوى بس عمرى ما جربت و كنت حاسه الموضوع سهل قوى و بعد ما اتجوزت واحده صحبتى ربنا يسامحها قالتلى انى ممكن اشوى جوه الشقه فى المطبخ و افتح الشفاط و كله هيبقى تمام و لان والدى كان مسافر و كنا فى العيد و كان نفسى اشوى قوى قلت لجوزى انى هشوى فى المطبخ و هو يحاول معايا يهديكى يرضيكى و انا ابدا هشوى يعنى هشوى وحصل و شويت و رقدت 3 ايام العيد فى السرير اعانى من عمى مؤقت و ضيق فى التنفس و الشقه ريحتها كلها دخان كأن كان فيها حريقة و كان عيد لا ينسى اما عن الطريقه الصحيحه للشوى فهى كالاتى المكان يكون مفتوح و ميكنش فى رياح شديده علشان الدخان ميرجعش عليك و انت بتشوى الفحم يكون كتير و يكون فى قاع الشوايه رمل كعازل علشان الشوايه متتخرقش من الحرارة علشان نولع محتاجين علبه حليب نيدو فارغه كبيرة و نفتحها من الجهتين و نملاها فحم و نحط عليه الجاز او مكعبات الاشعال كل ده طبعا جوا الشوايه نولع و نسيب الفحم لحد ما يصفى يعنى يحمر و بعدها نشيل العلبه و نفرد الفحم للشوى الفراخ لازم متكنش قطع كبيرة و لازم التقليب المستمر و علشان تعرف استوت ولالا اغرس فيها سكينه لو نزلت دم او ميه تبقى لسه نيه المهم تقلبها كل دقيقتين علشان متتحروقش لترتيب الشوى الفراخ او الريش الاول لانهم بيحتاجوا نار حاميه و الكفته فى الاخر لانها بتحتاج تستوى على رواق طبعا لازم تهو على الفحم طول الشوى والا هينطفى وزى ما قلت لازم الفحم يكون كتير و بالهنا و الشفه

الف الف الف مبروك للجميع اللووووووووووولوووووووولى الواحد مش مصدق نفسه و الله وعملوها الرجاله يارب تكون دى نهايه الفساد فى مصر و تبقى بلدنا احسن و اجمل و اقوى و اعظم بلد فى كل الدنيا انا اول ما سمعت الخبر جرى على شارع الخليج العربى و زمامير بقى و اعلام و الله كانت ليله جميله و الناس كانت فرحانه قوى معلش انا مش مركزه شويه بس عندى اقتراح ايه رايكم نتجمع كلنا يوم الجمعه الجايه و نعمل احتفاليه كبيرة بالمناسبه الحلوة دى فكروا و عرفونى

http://www.youtube.com/watch?v=XShgjTNt7co http://www.shorouknews.com/ContentData.aspx?id=386070 مع انه كان عندنا فى الصحافة ماده اسمها اخلاقيات العمل الصحفى الا ان الاعلام المصرى له وجهات نظر اخرى بجد بزعل لما بلاقى ناس زى دى ماسكه قلم او ميكروفون الكلمه امانه بس هنقول ايه لا تعليق

بسم الله الرحمن الرحيم الاخ عبد المطلب فى البدايه انا مش معاك فى بعض النقاط الى حضرتك ذكرتها اولا صلى بينا على النبى (عليه الصلاة و السلام )الثورة او المظاهرة الى قامت اى كان اسمها الغرض منها هو التغيير للافضل و اعتقد ان حضرتك متفق معايا فى كده المشكله فينا احنا المصريين هو نفسنا القصير و حب الحياه بمعنى اى مطالب للتغيير بتحتاج لوقت طويل و لضغوط كتير علشان تحصل (لو فعلا عايزين تغيير) يعنى مش يوم او اتنين و كمان لازم هيبقى فيها تضحيات سواء بالنفس او المال او الامان و راحة البال حضرتك بتقول ان الناس تعبت اه تعبت و هتتعب كمان دلوقتى علشان ترتاح بكرة و تبقى مطمنه ان اولادها هيعيشوا فى بلد حر محدش ينضرب فيه على قفاه او يتاخد حقه و بعدين ربنا خلقنا فى كبد و مفيش راحه الا فى القبر يعنى مخلقناش علشان ناكل و ننام فمفيهاش حاجه لو الناس جاعت يومين او سهرت فى سبيل انها ترتاح العمر كله فبلاش نبص تحت رجلينا نبص على الامور الماديه و ننسى الغرض الى ربنا خلقنا ليه الى هو تعمير الارض , رفض الظلم , اقامه العدل لانك لو سكت عن الظلم و قلت و انا مالى تبقى بتشارك فيه و تبقى بتساعد المفسدين فى الارض حكايه ان الرئيس حقق المطالب فدى اكبر كدبه و كل يوم بتتضح كدبها يعنى حاليا بدأ يقبض على المتظاهرين و حقوق الانسان و اى حد ممكن يعمل مظاهرة بعد كده طبعا قانون الطوارئ هيفضل موجود و بفضله ممكن يقبض و يسحل و يعذب اى حد حضرتك مش مصدق ان الناس البلطجيه مبعوتين من الرئيس , الرئيس طلب التعامل الفورى مع المتظاهرين و الداخليه هى دى الطريقه الوحيده الى بتعرف تتعامل بيها فى الظروف دى و مكنش ممكن يسيبوا المتظاهرين يزيدوا فكان لازم يخوفوهم باى تمن علشان الى بيحب الحياة و خايف على نفسه يروح و هى دى سياسه الداخليه و الطريقه الوحيده الى بتعرفها لحل الازمان العصا و الكرباج و لو حضرتك مش مصدقنى ادخل عالنت و شوف فيديوهات التعذيب فى الداخليه لازم نقول للناس الى خايفه على رزقها ان ربنا الى بيرزق مش الرئيس و ان الى يفرط فى كرامته علشان لقمه العيش يبقى ميستاهلش يعيش لان هيبقى زيه زى الدواب (اعزكم الله) يا جماعه الدنيا فانيه فياريت لو هنعيشها نعيشها بشرف و كرامه و نعلم اولادنا الكرامه و حب الغير مش زى ممثله طلعت فى التلفزيون و بتقول ان احفادها بيبكوا علشان من قادرين ياكلوا بيتزا و كباب؟ انا افتكرت انهم بيبكوا على الشباب و الاطفال الى ماتوا هو ده الى بنعلمه لاولادنا حب النفس و الانانيه و حب الدنيا بدل ما نعملمهم اننا عايشين علشان نرفع بلدنا لفوق و علشان نحس بغيرنا فى الاخر الاقتصاد احنا الى بنبنيه و البلد احنا الى هنخاف عليها مش واحد فضل يخرب فيها هو و اعوانه 30 سنه فبلاش نبقى زى النعام و بلاش تغرنا الدنيا و نفكر اننا هنكون بين يدى الله و يسالك عملت ايه لبلدك

معلش يا جماعه انا مش عايزة حد يزعل منى بس انا لي راى مخالف مع انى بحب الاخوة المسيحيين الا انى استغربت موقفهم من المظاهرة يعنى الى يشوفهم يوم تفجيرات راس السنه و سخطهم على مبارك و نظامه يقول دول هينزلوا فى المظاهرة معانا لاننا بنطالب بحقنا و حقهم لكن هم اثروا السلامه و قالوا ملناش دعوة و كانها مش بلدهم مع ان من البدايه المظاهرة سلميه و مكنش حد عارف ان ان هيبقى فى بلطجيه لكن هما سابوها علينا لو نفعت خير و بركه منفعتش يبقى هما مخسروش حاجه انا شايفه ان هما كمصريين كان لازم ينزلوا كلهم لانها بلدنا زى ما هى بلدهم ولانهم زى ما بيقولوا مظلومين و مضطهدين فكان لازم يتظاهروا علشان ياخدوا حقهم