محمد عبدالعزيز

إنا لله وإنا إليه راجعون البقاء لله يا أستاذ محمد ربنا يرحم الفقيدة ويغفر لها ويجعل مثواها الجنة

أشك بصراحة إن شفيق لو نجح ممكن يعمل مذبحة للإخوان, الإخوان رتبوا أوراقهم مع الأمريكان وكلنا سمعنا وشفنا المقابلات فى مصر وفى أمريكا. وده يعنى إن الإخوان دخلوا طرف فى معادلة السلطة فى مصربالنسبة للأمريكان وحيبقوا سمن على عسل مع شفيق حتى وإن حصلت شوية مناوشات زى مسرحية سحب الثقة من الحكومة. أنا لا أستبعد الآن إن مرسى دخل الانتخابات لتفتيت اصوات الثورة وقطع الطريق على أبو الفتوح أو حمدين. الثورة إما ترجع للميدان أو نقرأ عليها الفاتحة سواء نجح شفيق أو مرسى. أنا مقتنع تماماً بالمقاطعة.

حضرتك مستغرب عدم تقدم الإخوان بطعون ؟ طيب إيه قول حضرتك في الخبر الساخر ده : ؟ .."الرئاسيه" تنظر طعون شفيق وصباحي وموسي والعوا علي الانتخابات شفيق الظاهر بيعترض على كونه لم يحصل على المرتبه الأولى .. عاوز يتبادل الأدوار مع مرسي باين و لا إيه !!!! أيوه مستغرب عشان شايف إن كده بنلبس رئيس ممسوك عليه ذلة زى البرلمان كده ماهو ممسوك عليه حكم المحكمة الدستورية, ويبقى يقدر يقول لا فى أى حاجة بقى.

ليس كل من يرفض مرسى يقبل بشفيق ومنهم ناس شايفين العملية كلها مسرحية عشان نلبس شفيق فى الآخر وكله بالديمقراطية, ودول منتظرينكم فى الميدان لما تعلن النتيجة النهائية. مش عارف ليه حتى الآن لم نسمع عن مشاركة الإخوان فى الطعون على التزوير اللى حصل؟ فى حد يعرف هل قدموا طعون ولا لأ؟ هل الإخوان لم يشاهدوا ولم يروا أى تزوير أم أنهم شاهدوا ويريدون أن يتغاضوا عنه خوفاً من تأجيلات أو إطالة الفترة الانتقالية كما يبررون سكوتهم دائماً على كل التجاوزات والأخطاء التى حدثت؟ كما أنهم بتصرفاتهم وردود أفعالهم بعد ظهور مؤشرات النتيجة النهائية جعلوا البعض ممن أعلن تأييده لهم فعلاً يتشكك فى كونهم يريدون إنجاح مرشحهم بالفعل.

أعتقد إن الاعتذار عشان لسه مفيش إعلان رسمى للنتيجة وفى كلام إن صباحى ممكن يكون هو التانى مش التالت

هو الكلام عن الوقوف مع الثورة وكلنا مع بعض ولازم نقف كلنا مع مرشح الثورة ينفع مع مرسى ومع حمدين لا؟ عشان بس ماحدش يلوم على اللى بيقول مقاطع ومش عايز يختار بين شفيق ومرسى. ولو عايزين نحسبها بالعقل يبقى نقول لا الإخوان يقدروا ينجحوا مرشحهم لوحدهم ولا السلفيين قدروا يدخلوا مرشحهم الإعادة وهما كمان مش لوحدهم اللى أيدوه.

لجنة الانتخابات الرئاسية هتقول مش قانوني، حتى لو كان قانوني. أنا كمان شايف كده وقلت قبل كده اللى رجع شفيق بعد استبعاده ووصله للإعادة مش حيسيبه يسقط ومفيش ثورة بتستلم السلطة بالانتخابات. بس خلينا نشوف الطريق ده لآخره حيوصلنا لإيه مادام الأغلبية نفسها تجرب.

هل الكلام ده جائز قانوناً؟ لو جائز قانوناً يبقى اقتراح ممتاز بصراحة منطقيا يجوز، لكنك تعرف ان الاخوان لو فكروا ينفذوا الموضوع ده، حيكون في الوقت الضايع وربما بعد فوات الأوان ماهو عشان كده أنا باسأل هل يجوز قانوناً دلوقتى ولا خلاص فات الآوان. بصراحة الاقتراح ده ممتاز للخروج من المزنق اللى احنا فيه دلوقتى وحيسهل على ناس كتير المشاركة والحشد, ده بفرض حسن النية وإن النتيجة ستعكس اللى فى الصندوق فعلاً.

هل الكلام ده جائز قانوناً؟ لو جائز قانوناً يبقى اقتراح ممتاز بصراحة

اختى العزيزة انا ادعوا الى المقاطعة وانا كدة محايد جدااااا حرام على انى اقاطع تاييد قارون ومش حرام عليكم تايد وزير الداخلية قاتل الثوار؟؟ مش حرام عليكم وصف الثوار بالبلطجية؟ مش حرام عليكم التخازل فى محمد محمود والجرى وراء الكراسى؟ انا لن انزل لكى تتبجحون بتاييدكم من ملايين الشعب لكى تكمموا صوت الشعب كما فعلتوا فى مجلس الشعب انا هنا أدعوا كل مؤيد للاخوان ان ينزل يرشح المرسى وكل مؤيد لشفيق ان ينزل يرشح شفيق وكل واحد فيهم يعرف حجمه الحقيقى ومن لا يؤيد الاخوان وضد شفيق يقاطع الانتخابات ونشوف نسبة المشاركة ونحكم على حجمكم انتم الاتنين ايه اذا كانت من غير مؤيدى التنين قاطع وكل واحد يحارب معركته أنا من رأيى ننتظر ونشوف رد فعل الإخوان على المبادرات والأراء المطروحة للتوحد من تانى تحت مظلة الثورة. والله رجعوا لعقلهم وعرفوا إن الله حق وشالوا من دماغهم حكاية احنا أغلبية ونعمل اللى احنا عاوزينه دى, يبقى كلنا إيد واحدة تاني ونرجع نمشى فى مسار الثورة بجد. ركبوا دماغهم وعاندوا يبقى مع نفسهم بقى.

يا رب وفقهم لما فيه الخير ... يا رب لا تمكن المجرمين واجعل كيدهم في نحورهم يا رب واضح ان الناس رافضة الإخوان واضح تماماً .... ولذلك ..هذا الحل لن يقنع الناس المصريون قرروا أنهم لا يردوا أن يحكموا بواسطة الإخوان ياريت الإخوان يفهموا كده إختاروا النار ... علشان ما يروحوش للإخوان هذه محاولة للضحك على الشعب مرة أخرى لا أعتقد أنها ستنطلي على المصريين وعلشان محدش يقول إن المصريين ضيعوا الثورة بتصويتهم لشفيق أقول إن الإخوان هم من ضيعوا الثورة باعتقادهم أنهم الأولى بالحكم ... وإصرارهم عليه الأخ الفاضل و الزميل المحترم أسد أستطيع أن أفهم خوف الناس من الإخوان و أستطيع أن أفهم رفض الناس للإخوان في وجود أي بديل ثوري أفضل منهم و قد ألتمس العذر حتى لمن يرفض الإخوان و يختار أي بديل ثوري آخر حتى لو كان أسوء منهم لكن حقاً ما عجز عقلي البسيط عن فهمه هو أن نرفض الإخوان فنختار النظام السابق بكل فساده و فجره و طغيانه و دمويته و جشعه و سرقته العيان للوطن و مقدراته أو حتى أن ننسحب من المشهد و نحرم الوضع الراهن من - ولو - مجرد جرام زائد في كفة الإخوان لا معنى له اليوم إلا أنه جرام ناقص من كفة النظام السابق هذا التوجه هو عجيب حقاً بدرجه تستعصي على الفهم كيف يمكن لنا أن نـُـعمـِـل عقولنا لوهله فنرمي بأنفسنا في النار تفضيلاً على أن نترك الفرصه لطرف ما أياً كان هذا الطرف في أن يكفينا مغبة العوده للنظام السابق و أن يكفينا مغبة أن نصبح نكتة يلوكها العالم كله يا أخي الفاضل . . . إن كانت مساوئ الإخوان لا حسر لها فما زالت لديهم (( بالمقارنه مع بدائلهم من الفلول )) بعض الإيجابيات التي يمكننا أن نستثمرها و يكفي أنهم مازالوا في عداد القوى التي يمكن لنا أن نتصدى لها ثورياً عندما لا يعجبنا حالهم أما من يعتقد أن في فلول النظام السابق رمق من أمل يمكن إستثماره لصالح الوطن أو الشعب فهو واهم و من يعتقد أن الثوره التي قمنا بها قد تكون رادعا لفلول النظام السابق عن العوده لسابق عهدهم بعد أن يروا كيف إنتهت بعودتهم هكذا فهو واهم و من يعتقد أن الإنسحاب اليوم و المقاطعه و عدم مؤازرة المتاح من الحلول حتى و لو كان أحلى الأمَرين لن يصب و بثقل في كفة الفلول و عودة النظام السابق فهو واهم و إن إعتقدتُ أنا الآن أنك لا تعرف كل ما أسلفت أنا ذكره الآن لحضرتك فأنا واهمه ما أستغربه حقا هو تفسير موقفك و تفسير موقف كل من يقف هذا الموقف معك إن كانت هذه هي المعطيات الآن .. و هذا هو و بكل أسف الواقع .. و أسفنا لن يغير هذا الواقع للأفضل و لا رفضنا سيلغيه و لا سلبيتنا ستزيده إلا سوءاً فما تفسير هذه المواقف ؟؟؟ هل من الحلال بعد كل ما مررنا به جميعا أن نهدم المعبد على من به و نقول لسنا نحن من ضيعنا الثوره .. إنهم الإخوان .. فقط لنعاقبهم ؟ هل يملك أحدنا الحق في أن نحول مبدأ ((عليَّ و على أعدائي)) .. إلى ((على أعدائي و على الوطن )) ؟؟؟ يا أخي الفاضل .. الإخوان و هم ليسوا أبداً أفضل ما تمنيت للثوره .. لا يمكن النظر إليهم اليوم بنفس صفتهم القديمه و قد يكون من أبلغ ما سمعت و أود نقله إليك هو هذه العباره : محمد مرسي اليوم لم يعد مرشح الإخوان في مقابل أي مرشح للدوله المدنيه محمد مرسي الآن أصبح مرشح الثوره الوحيد في مواجهة مرشح الثوره المضاده فأيهما تختار للوطن ؟ و أيهما ترضى لنفسك الوقوف في صفه؟ و هلى ترضى أن تصبح محسوباً على مرشح الثوره المضاده لمجرد أنك رفضت مؤازرة مرشح الثوره ؟؟ افتكرى حضرتك قصة الولد اللى كان كل شوية يعمل نفسه بيغرق والناس تيجى تنقذه تلاقيه بيضحك عليهم وهو مش بيغرق ولا حاجة, وعمل كده مرة واتنين وتلاتة. وبعدين فى مرة كان بيغرق بجد وقعد يستنجد بالناس عشان تنقذه والناس سابته يغرق لأنهم فاهمين إنه زى كل مرة بيضحك عليهم السر هو فى "عدم الثقة"

شفيق وعمر موسى عاملين لوحدهم 36% 64% الباقيين متقسمين بين صباحي ومرسي وابو الفتوح فين بقى مرشح الثورة في الثلاثة دول؟ حمدين؟ والا ابو الفتوح؟ بالطبع مش مرسي!!! نزول مرسي كان أكبر غلطة عملها الاخوان لان ناس كتير كانوا مؤيدين لابو الفتوح وهو يعتبر اخف الضررين لان الناس مش عايزة الاخوان يسيطروا على كل حاجة في البلد علشان ميبقاش حزب وطني بوجه جيني. استاذى الفاضل الكل مخطئ اخوان وابو الفتوح وحمدين كلهم لم يكونوا على قدر المسؤلية واستهانوا بالخصم الذى يخوض اخر معركة لة وكان من المتوقع انة سوف يحشد كل ما لدية وسوف يسخدم كل ما فى جعبتة, قبل الانتخابات بفترة كبيرة صرخ كثير من العقلاء بتوحيد مرشح الثورة ولكن لم يحدث كل واحد ظن نفسة يمكنة الحسم والفوز بمفردة وقد حدث المكروة، فهل نجلس نولول ونبكى ام نتعامل مع الحدث فيما يحقق اكبر فائدة ممكنة واقل خسارة لنا وللثورة لو عاوزين نتكلم عن الأخطاء فأنا مش شايف من الخطأ إن أى حد شايف إنه يصلح لمنصب ما يترشح له والناس تختار الخطأ كان فى المسار بتاع الثورة من الأساس, ومن ضمن الأخطاء عدم عزل الفلول بالقانون زى أى ثورة لو كان الكل اتفق على عزل الفلول كان بقى عندنا انتخابات كل المرشحين فيها مفيش منهم خوف والشعب يختار بحرية.

الخوف ليقولوا كله فدا مصر :closedeyes: أنا استخدمت الطريقة دى من نفسى و قدرت فعلاً أغير قناعة والدتى اللى كانت ناوية تصوت لصالح شفيق عنداً فى الإخوان مع إنها صوتت للحرية والعدالة فى مجلس الشعب. قلت لو شفيق نجح حتبقى تزورينى فى السجن بقى لأنهم كانوا بيصورونا فى المظاهرات وأكيد حيلمونا كلنا لما شفيق يبقى الرئيس. والكلام ده كان بيحصل فعلاً على فكرة مش اشتغالة ولا حاجة.

اللى رجع شفيق بعد استبعاده, يبقى عبيط واهبل لو سابه يسقط فى الإعادة حتى لو ماخدش غير صوته, الثورة لا يمكن تنجح بانتخابات يديرها من قامت الثورة ضدهم.

اللى حصل من وجهة نظرى إننا طردنا الخبرات اللى عندها رؤية وفاهمة يعنى إيه ثورة وفاهمة يعنى إيه إجراءات ما بعد الثورة عشان الثورة تحقق أهدافها وقلنا عليهم عاوزين يركبوا على السلطة وخلاص. وقمنا ضحكنا على نفسنا وسلمنا الثورة للب النظام اللى قامت الثورة ضده وقلنا هم دول اللى هيحققوا أهداف الثورة اللى هى من ضمن أهدافها التخلص من سيطرتهم على الحكم. باختصار يعنى مشينا بمنهجية الفهلوة بتاعتنا المعتادة ورفضنا نتحرك وفق منهج وأسلوب علمى عشان ده كلام مكتوب فى الكتب بس بناخد به شهادات أكاديمية ونطلع نقوله فى التلفزيون عشان الناس تصفق لنا وتقول علينا نخبة وخلاص, إنما نننفذه ونطبقه فى حياتنا لا عيب طبعاً. نعمل إيه بقى؟ بصراحة مش عارف دلوقتى, الواحد لسه حاسس إنه فى كابوس ومش قادر أفكر. وللأسف الاختيارات مفيهاش حاجة تسر القلب كده, لأن مشكلة مصر الحقيقية هى سيطرة العسكر على الحكم, ومن وجهة نظرى لا شفيق ولا مرسى ممكن يمشوا فى طريق تقليص سلطات العسكر حتى التخلص منهم.