واحد تاني

قمت يوم الاتنين من بدري ... روحت على 777 Bay @ College Street دخلت اخدت رقم واستنيت دوري لغاية ما جه ... الموظفة سألتني عاوز ايه ... قلت لها انا الفاشل بتاع يوم الجمعة ... قالت لي ايوة دا احنا كنا منتظرينك ... هات 10 دولار اخدت 10 دولار وطبعت لي استمارة صفرا جديدة وقالت انت عارف طبعا هتروح فين هزيت راسي ومشيت في اتجاه الاودة بتاعة شباك 42 وأنا شايف الناس كلها بتراقب تحركاتي وسامع في الخلفية موسيقى وصوت احمد زكي عمال يقول لي ... اتقدم اتقدم وأحلف مش راح تتندم ... لا لا لا لا ... للشمس ... للنور ... مش هيعطلنا سور ... طول ما الدنيا بتدور ... أنا م الدنيا هتعلم وفجأة الموسيقى وقفت وملاقيتش أحمد زكي ... ولقيت ست الحاجة بتديني ورقة واحدة بس قلت لها ... الله ... مش كانوا ورقتين المرة اللي فاتت؟ قالت لي ما أنت نجحت في اختبار الاشارات المرة اللي فاتت انت نسيت انك جبت 17 من 20 قلت لها يا سلام!!! هو اللي انجح في يبقى خلاص كده ... والله انتوا الناس طيبين أوي قعدت جاوبت على اسئلة القواعد ... سلمت الورقة وقعدت استنى النتيجة ... كل شوية ابص عليها كده القيها بتصلح في الورقة وتبص لي شوية ... وعنيها ترغرغ بالدموع كده وتبص لي ترجع تاني تصلح في الورقة والدموع عمالة تسح منها وتبص لي دقايق مرت عليا كأنها سنين ... مستقبلي يا ناس بيمر قدام عينيا ... دا ال G1 مش هزار يعني وفجأة ... قامت وقفت وهيا بتهز راسها يمين وشمال كده وكأنها مش مسدقة نفسها وقعدت تسقف ... وكل اللي موجودين بدأوا يسقفوا زيها ... ويسقفوا ... وأنا مش فاهم في ايه قالت لي "واحد تاني" يا ابني ... الف مبروك ... انت اخدت المركز الأول ... 20 من 20 (بصرخة كده) وسقف الأودة بقى فضل ينزل منه شرايط ملونة ... وورق مفضض ...وبالونات ... وطلعوا بنات من وراها بزمامير ... وناس جت قعدت تضرب العاب نارية ... وفرقة خيول استعراضية راكبها عساكر لابسين بدل احمر في اسود وبيلعبوا بعصيان ميتال كده في الهوا ... وبعدين جه المحافظ وسلمني شهادة تقدير وعلبة عصير وساندويتشين... وهي طبعت لي ورقة عبارة عن رخصة ال G1 مؤقتة وقالت لي ان الرخصة الأصلية هتيجي في البريد بعد 3 اسابيع كده ...واديتني ورقه فيها عناوين وتليفونات المراكز اللي ممكن اتصل بيها علشان احدد معاد ال Road test علشان رخصة ال Full G وعنها ... صحيت من النوم وأنا على كلمة واحدة ... سواقة يا هانم ... سواقة حمدلله ع السلامة

مشيت وأنا مش شايف قدامي ... وحاسس ان أنا فاشل وساقط قواعد ... والدنيا كلها من حواليا اسودت... والمستقبل بقى غامض كده وملامحة مش باينة بوضوح وفجأة صوت العقل ناداني ... قمت لبيت قال لي مش فاكر زمان لما كنت بتكره مواد مدني؟ وكنت هتشيل خرسانة؟ قلت له آه ... وانت ايش عرفك؟ قال لي مش انت لحقت نفسك وذاكرت Steel ونجحت في الاتنين؟ قلت له آه ... وانت ايش عرفك؟ قال لي روح ذاكر يا لمبي ... وماتبيعش ساندويتش الكبده بأكتر من 75 قرش روحت وأنا مقرر أنا من بكرة هكون انسان تاني ... من بكرة هكون "واحد تاني" من بكره هاخد العيال ونروح نتفسح ... بلا وجع قلب تاني يوم كان السبت اخدت الفاموليا وطلعنا على Lakefront Promenade Park وسيبتهم يلعبوا مع البط وقعدت انا مكان الاستاذة دي اذاكر واشوف مستقبلي... واليوم اللي بعده كمان اللي هو الأحد ... أخدتهم وطلعنا على ال Toronto Zoo وده مكان يتكتب فيه مجلدات عشان توصف روعته ... وسيبت عمر يلعب مع اصدقاءة وقعدت أنا اعمل مراجعة ليلة الامتحان ... خلص اليوم ... وروحنا ... كنت حليت امتحانات المحافظات كلها ... شربت اللبن ... ونمت بدري علشان ابقى مركز بكره في الامتحان يتبع

نرجع بقى لموظف Service Ontario بياخد منك الاوراق دي وانت واقف ... ويدخل بياناتك وانت واقف ... ويعملك كشف نظر وانت واقف ... و يصورك وانت واقف ... وتدفع الرسوم وانت واقف ... الرسوم 85 دولار عبارة عن 75 دولار قيمة الرخصة و10 دولار قيمة الامتحان ... وبعدين يديلك الاستمارة الصفرا ويقولك اتفضل عند الحاجة اللي جوه في شباك 42 علشان تمتحن. تدخل عند الحاجة اللي في شباك 42 تحط الاستمارة الصفرا قدامها وتستنى لما تنده عليك ... هتنده عليك وتديلك ورقتين كل ورقة وش وظهر ... فيها 10 اسئلة في كل جانب ... ورقة منهم عن اشارات المرور (20 سؤال) والورقة التانية عن قواعد المرور (20 سؤال) ... المفروض حضرتك ما تغلطش اكتر من 4 غلطات في كل امتحان علشان تنجح ... يعني تجاوب 16 سؤال صح على الاقل في كل امتحان من الاتنين ... ندهت عليا طنط الحاجة قلت لها نعم ... قالت لي نعم الله عليك... اتفضل جاوب دول ... قلتها الوالدة بتسلم عليكي وبتسألك الامتحان ده ساهل والا لأ؟ قالت لي مش انت مذاكر؟ قلت لها أنا اشتريت الكتابين ماطولش عليكم ... مسكت الورق ... طاك ... طاخ ... دوم ... تش ... تراك ... ترن ... جاوبت الاشارات ببص على ورق القواعد لقيته بيسألني لو انت معاك رخصة G2 لازم تبقى مش شارب اكتر من كام كاس؟ والمشكلة ان أنا مش بشرب اصلا هجاوب ازاي ... و لو انت معاك G1 لازم اللي قاعد جنبك يكون اسمه ايه ؟ وفي أول يناير اللي جاي يبقى عنده كام سنه؟ وأنا محدش بيقعد جنبي غير مراتي وبصراحة ماكونتش عاوز اقول له على اسمها ولا سنها ... عندنا في البلد يطير فيها رجاب... وتقدر تركب معاك يوم الخميس كام واحد عنده 19 سنه ويوم التلات كام طفل بيرضع؟ ولو رايح تصلي الفجر ومعاك رخصة G1 ينفع تروح بالعربية والا لأ؟ ... ولازم حد كبير ييجي معاك والا تعرف تروح لوحدك؟ وعربية التلج لمبتها لونها ايه؟ وسواق الاسعاف بيقبض كام؟ ... ولو عديت جنب مدرسة بسرعة هيتخصملك كام نقطة من مرتبك؟ وهتتوقف عن العمل كام شهر لو كسرت اشارة؟ وأشياء من هاذوها القبيل ... أسكت أنا ؟ رحت طاك ... طاخ ... طوخ ... دوم ... تش ... تراك ... ترن ... جاوبت القواعد وقمت لطنط الحاجة اديتلها الورق وقعدت استنى ... مسكت الورق تصلحة ... وبقت كل شوية تصلح ... وتبص لي بصة كده كلها صعبانيات حزايني وتتحسر ... وترجع تصلح الورق تاني ... وتبص لي تاني بنفس الصعبانيات حزايني وتمصمص شفايفها ... وفي الاخر ندهت عليا ... قالت لي شوف يابني انت جبت 17 من 20 في الاشارات... وكان نفسي يبقى في درجات رأفت في القواعد علشان كان فاضل لك درجتين وتنجح... للاسف انت جبت 14 من 20 في القواعد ... وهتضطر تعيد الامتحان تاني ... وفضلت تعيط ... تعيط ... تعيط قلت لها خلاص مش مشكلة ... وهي تقول أنا اسفة انك مش هتقدر تعيد الامتحان تاني النهاردة هنا لأن ماينفعش تمتحن مرتين في نفس المركز في نفس اليوم واقعدت تعيط ... تعيط ... تعيط وانا اقولها يا حاجة ماتعمليش في نفسك كده ... قدر الله وماشاء فعل رجعت تقول لي كمان مش هتقدر تروح اي مركز تاني دلوقتي تمتحن فيه لأن الساعة بقت 5 وكلهم هيقفلوا وقفلت الدنيا في وشي واقعدت تعيط ... تعيط ... تعيط وأنا اقولها يا ست الكل خلاص انا مش عاوز اطلع رخصة وهي تقول ده كمان المشكلة ان النهاردة الجمعة يعني بكرة وبعده اجازة وانت مضطر تفضل كده من غير رخصة G1 طول الويك اند ورجعت تاني تعيط ... تعيط ... تعيط والناس اتلمت ... وفضلنا نصالح فيها ... وجبنا لها ساندوتشات جبنة بيضا بالزاتون ... فييين على ما اقتنعت ان انا ما عنديش مشكلة اني آجي يوم الاتنين امتحن تاني وخلاص يتبع

انتي جاية اشتغلي ايه؟ ******** سواقة يا هانم سواقة ... صحيت من النوم وانا بقول كده ... اصل خير اللهم اجعله خير ... جاني هاتف في المنام ... قال لي قوم يا "واحد تاني" اعمل رخصة السواقة ... طول عمري اكره مقولة "العلم في الراس مش في الكراس" ... علشان عارف ان العلم عمره ما هييجي في الراس ... من غير ما تقراه من الكراس ... المهم ماطولش عليكم ...سألت ولاد الحلال قلت لهم اللي عاوز يطلع رخصة سواقة يعمل ايه؟ ودلوني ... قالولي يجيب الكتاب ويذاكر علشان ينجح في امتحان ال G1 وياخد دروس مع مدرب علشان ينجح في امتحان ال Road test ...قمت جبت بدل الكتاب اتنين ... جبت ده وتقدروا تشتروه من هنا أو من اي مركز اختبارات قيادة ... أنا لقيته بيتباع في في الفرع ده من سوبر ماركت LOBLAWS وتمنه 14.99 دولار ... قمت جبته ... وجبت معاه كمان كراسة الأول للمراجعة النهائية وامتحانات السودان ودي عبارة عن كتاب ملخص للكتاب السابق وفيه كمان 201 سؤال من بتوع الامتحانات وتمنه 15.99 دولار لغاية هنا وتمام أوي ... بعد ما جبت الكتب دي قلت لنفسي يعني انت بقالك 100 سنة بتسوق ... والامتحان ال G1 ده اصلا عبارة عن شوية اسئلة في الاشارات والقواعد ... انت لسه هتضيع وقتك وتقعد تذاكر!!! يابني العلم في الراس مش في الكراس آدي انت عملت اللي عليك واشتريت الكتب ... سيب الباقي على ربنا بقى وتوكل على الله وروح امتحن ... وقد كان ... توكلت على الله ونزلت على 777 Bay & College Street وده عنوان فرع Service Ontario اللي انا اخترته علشان اطلع من رخصة ال G1 وصلت واخدت رقم وانتظرت دوري لغاية ما جه ... رحت للموظف طلب مني الباسبور وورقة اللاندنج ... طبعا في اللحظة الحرجة دي من حياتك انت محتاج تثبت لهم انك بتسوق من زمان ... علشان تقدر بعد ما تنجح في امتحان G1 تدخل امتحان ال Full G مباشرة ... وده هتعمله بأنك تقدم لهم رخصة السواقة بتاعتك اللي من مصر للاطلاع عليها وصورتها مع الترجمة المعتمدة من داخل كندا للاحتفاظ بها في ملفك اللي بيتفتح دلوقتي حالا ... بالاضافة لده بتقدم شهادة المرور اللي تكون حضرتك جايبها معاك من مصر بتوضح من امتى حضرتك بتسوق وكمان تكون مترجمة ترجمة معتمدة من داخل كندا ... طيب فين الترجمة المعتمدة دي؟ أنا ترجمت في المكان ده http://www.ammtranslation.com/translation.htm ولو رحت هناك سلم لي على الباشمهندس ماجد لو سمحت ... ترجموا ليا الرخصة والشهادة ب 50 دولار ... يتبع ...

شكرا VIralMind تحياتي :) شكرا Dr Dina Abdalla تحياتي :)

حمدالله على السلامة والف مبروك ربنا يتقبل وحج مبرور وذنب مغفور باذن الله ربنا يكتبهالنا السنة الجاية يارب دعواتك لينا يا حاجة :)

سجل مدني تورونتو ******** أول حاجة عملتها لما صحيت من النوم في تورونتو ... قلت اروح اطلع بطاقة منين ؟ من سجل مدني تورونتو طبعا ... البطاقة دي هي بطاقة تحمل رقم الضمان الاجتماعي الخاص بك ... ودي بتسخدمها في حاجات كتير في حياتك الكندية ده شكلها وعلشان تحصل عليها محتاج انك تشوف الفرع الاقرب لك من فروع SERVICE CANADA الفروع دي هتلاقيها هنا http://www.servicecanada.gc.ca/cgi-bin/hr-search.cgi?cmd=lst&pv=on&ln=eng وتتأكد ان خدمة اصدار ال SIN موجودة عند الفرع اللي انت اختارته وتتوكل على الله تنزل تروح لهم بيكون معاك باسبورك واوراق اللاندنج وبيحتاجوا كمان عنوانك البريدي اللي هيوصل لك عليه الكارت. لما تروح هتاخد رقم وتنتظر دورك وهيطلبوا منك في خلال انتظارك تملا FORM فيها اسمك وتاريخ ميلادك واسم الأم واسم عائلة الأم واسم عائلة الاب اذا كان الاسم مختلف عن ما هو موجود باسمك. الموظف بيدخل البيانات دي على الكمبيوتر ويطبع ورقة فيها مؤقتا ال SIN بتاعك لحين استلامك الكارت بالبريد بعد مدة زمنية هيقولك عليها الموظف. (طبعا الكلام ده بينطبق على كل فرد من افراد الاسرة) حاجة مهمة انك تراجع جميع البيانات الموجودة في الورقة المطبوعة وانت لسه موجود، لأن انا كان عندي حرف واحد خطأ في الاسم في ورقة ابني اكتشفتها تاني يوم واضطريت اني ارجع تاني علشان اصلحها. وحمدلله ع السلامة ...

ازيك يا Damo الله يسلمك ... انا على فكرة كنت متابع موضوعك بتاع اسرة حول العالم :) يارب الاسرة دي تكون استقرت وارتاحت في المحطة دي تفتحي صفحة جديدة مع توزونتو ليه؟ هي عملت ايه في الصفحة القديمة؟ احكيلي :blink: حقيقي شكرا على النصايح المفيدة دي ومن فضلك تابعي معايا باستمرار هنا اكيد هيكون ليكي اضافات انا وغيري هيحتاجها وبالنسبة للاولاد هما Nursery وما دون ذلك ... باباهم ومامتهم هما اللي هيكملوا تعليمهم وهيدخولوا الجامعة من تاني :) يعني هنبقى زمايل ... تحياتنا

العفو يا دكتورة ... وتحت امرك 1- من قال لا اعلم فقد افتى ... مش عاوز اقولك معلومة غلط 2- انا حجزت بعد حصولي على الفيزا بحوالي شهر ونص كده 3- احنا طلبوا مننا الميديكال في شهر 9 وطلبوا الباسبورات للتاشيرة في شهر 2 اتمنى لحضرتك التوفيق

شكرا جزيلا يافندم انا كنت مقدم فيدرال وبالنسبة للتواريخ موجودة في بداية الموضوع ده تحياتي

شكرا مدام سلوى تعرفي ... لما بتكلم مع حضرتك او مع استاذي العزيز (أبو محمد) ربنا يديله الصحة بحس اني شايف البحر وشامم هواه ورزازه بيجي على وشي كده اكيد حضرتك عارفة الاحساس ده ومجرباه تحياتي

شكرا يافندم على متابعتك ودعواتك هجاوب حضرتك بالتفصيل باذن الله في المداخلات الجاية تحياتي

احنا بتوع الاوتوبيس ******** وصلنا الحمد لله ... استلمنا شنطنا ... طلعنا بره باب المطار ... وها نحن ذا يا تورونتو ... كانت حاجة كويسة جدا من الفندق اللي نازلين فيه ان عنده خدمة التوصيل من .. .والى المطار ... كنت اتصلت بالفندق قبل السفر علشان اعرف ازاي هلاقي الشاتل بتاعهم ... وطلبوا مني اني لما استلم الشنط اتصل بالفندق ... والسواق هيجيلي على رقم الباركنج اللي هيبلغوني بيه لما اكلمهم. وقد كان ... ودي حاجة كانت مريحة انك تبقى مطمن لوجود حد لاستقبالك وتوصيلك للفندق اللي انت اكيد مش عارف مكانه ... وخصوصا بعد رحلة طيران طويلة زي دي. وصلنا الفندق والحمد لله ...وبعد اهلا وسهلا ... وحمدلله ع السلامة ... عملنا Check in في دقايق ... وتوجهنا فورا للبحث عن السرير. كنا مرهقين ونمنا من الساعة 2 الظهر ما حسيناش الا الساعة 10 باليل ... صحينا اتعشينا وكملنا نوم للصبح ...(اسرة نشيطة جدا الصراحة ) الصبح وبعد الفطار والذي منه ... رحت على الاستاذ جوجل وقلت له ... يا حضرة الجوجل قول لي ... منين يروحوا السيتي هول قال لي امدح نبينا وصلي عليه (طب اللهم صلي عليه) ... قال لي همشي من الفندق في اي اتجاه ... وكام دقيقة مشي ... وهركب باص رقم كام ... واتجاهه ايه ... اللي هيوصل الساعة كام (بالدقيقة) ... وهنزل منه فين ... وبعد كام دقيقة (وكام محطة كمان) ... وهركب subway اسمه ايه ... اللي اتجاهه ايه ... وهيوصل الساعة كام ... وهنزل منه في محطة اسمها ايه ... وبعد كام دقيقة ... وهمشي من المحطة دي في اي اتجاه ... وكام دقيقة ... علشان الاقي نفسي في المكان المطلوب ... حاجة بصراحة ابهرتني من الترتيب والنظام وهنا عايز اقول تفصيلة لاي واحد زي حالاتي ... أول يوم في البلد ... ومش مأجر عربية ... وهيجرب يستخدم المواصلات العامة. - بتقف على المحطة ... في الغالب بيكون رقم الباص مكتوب على عمود جنب المحطة ... وعلى نفس العمود في الغالب برضه جدول مواعيد الباص ... يعني هيجي الساعة كام وكام وهكذا ... واذا كان بيختلف باختلاف ايام الاسبوع كل ده هيكون موجود في الجدول ... - جوه المحطة هتكون موجودة الخريطة دي http://www3.ttc.ca/images/fixedImages/TTCRideGuide.pdf ودي بتعرف منها كل الشوارع في GTA من منين بيتراح لفين ... وازاي - بيوصل الباص بيشوفك السواق بيقف ...و لو معاك سترولر ... الباص بينزل لحضرة الطفل اللي معاك ... بتركب - لازم يكون معاك الاجرة بالزبط ... السواق مش بيشيل معاه فكة ... وانت مش بتدفع له اصلا انت بتركب بتحط الاجرة في المكان المخصص لها جنب السواق. - الاجرة 3 دولار للشخص الكبير و 0.75 دولار للاطفال اكبر من 3 سنين ... بتاخد منه ورقة (transfer) زي ده ودي فايدتها ان لو هتركب حاجة تانية بعد ما تنزل من الباص (في نفس الاتجاه ومن نفس المحطة وسواء كان اللي هتركبه باص او حاجة تانية تابعة لل TTC) يكفي انك تظهرها. - وانت في الباص الشاشة الصغيرة فوق السواق بتعرض اسماء المحطات التالية وبيتقال اسم المحطة التالية مباشرة بعد التحرك من المحطة الحالية واسمها عند الوصول اليها. - طيب اذا انت نازل المحطة اللي جاية ... هتحتاج تنبه السواق ... ازاي ؟ في مصر والدول المتقدمة هتقول له المحطة الجاية والنبي يا هندزة ... هنا لأ ... هتدوس على الزرار ... أو تشد السلك ... على العمود اللي انت ماسك فيه لو كنت واقف زرار احمر دوس عليه لما تسمع اسم محطتك عشان الباص يقف عندها ... ولو كنت قاعد في مدرجات الدرجة التالته هتلاقي فوقك وجنب الشباك سلك ماشي بطول الباص تشده هيحصل المراد من رب العباد. - طيب نزلت وهتركب باص تاني ... اشرب ماونتن ديو ...قوي قلبك ... اركب بقلب جامد ... ولا يهمك ... وري له ال transfer - طيب ... هتركب subway؟ ... بقول لك استك منه فيه ... ما يهمكش ... وري له ال transfer وعدي من البوابه. - طيب ... ركبت ال subway ... نفس القصة ... نفس الست اللي بتقول اسامي المحطات هتلاقيها راكبه معاك. - طاااايب ... نزلت من ال subway والشيطان وزك ... ومشوارك لسه فيه ركوب تاني ... تروح على ماكنة ال transfer دي وتخدم نفسك بنفسك وتاخد ورقتك وتتوكل على الله. - طيب النهاردة طلع السبت او الأحد ؟ يبقى اليوم يومك يا عمده ... من اول شباك تذاكر في اول محطة sub way وتشتري لك day pass زي ده تمنه 10 دولار وهتركب بيه انت والاسرة كلها (في الويك اند) طول اليوم وحتى مطلع الفجر ... بدون حد للمرات او الاتجاهات... ينفع طبعا باقي ايام الاسبوع ولكن للكل فرد واحد. - في طريقة كمان للدفع علشان تركب اي حاجة من الحاجت اللي فوق دي ... وهي ال tokens ودي بتكون كل 4 وحدات منها ب 10 دولار والواحدة منها بتكون اجرة ...و بتحل محل 3 دولار وبتحطها في مكان الفلوس لما تركب. - وانت في محطة ال sub way ماتنساش تطلب ال ttc map دي - في الخريطة دي هتعرف منها محطات ال subway اللي فيها اسانسيرات عشان لو معاك سترولر. - في الخريطة دي كمان هتعرف منها ارقام الباصات اللي ممكن تسيب في مقدمتها البسكلته بتاعتك لو كان معاك بسكلته. - انتهت التفصيلة واحنا وصلنا ال سيتي هول. حمدلله ع السلامة

لحظات الوصول الأولى ********* بتزل حضرتك من الطيارة وتفضل ماشي ماشي ... ماشي ماشي ... ماشي ... ماشي ماشي؟ وبعدين توصل على صالة شبه دي تستنى دورك ولما تصل للكاونتر الاستاذ او الاستاذة هيشوفوا الباسبورات والتأشيرة وياخدوا الكروت اللي مليتوها على الطيارة ويشخبطوا عليها بالماركر ويقولولكم اتفضلوا ... تتفضلوا للممر اللي وراهم ... يصطادكم حد يسألكم ... جداد؟ لو قلتوا آه ... تدخولوا اوضة الجداد ... وتستنوا دوركم كمان ... بعدين على الكاونتر الاستاذة هتطلب الباسبورات واوراق اللاندنج وتطلب تنتظروا شوية على الكراسي اللي هناك دي لغاية ما تخلص هي شغلها. بعد كده هتنده عليكم علشان تمضوا على اوراق اللاندنج وتديلكم منها نسخة وتسألكم معاكم فلوس كاش؟ كام؟ في عنوان؟ لو مفيش عنوان هتديلكم ورقة ممكن تملوها بعدين وتكتبوا فيها العنوان وتبعتوها بالفاكس او تدخلوا على النت على الصفحة المذكورة في الورقة دي وتضيفوا العنوان او تتصلوا برقم التليفون الموجود بالورقة كذلك وتبلغوهم بالعنوان. وهتقول لكم بالكندي ان الورقة دي لازم تحافظوا عليها زي عنيكم لان هتستخدموها في كل حاجة من لحظة الوصول وحتى الجنسية. وتقولكم كمان ان الاوراق دي مش للسفر ولو سافرتم ماتقدروش ترجعوا بيها تاني (لازم تعمل travel document لو كنت بره ومعندكش PR card ) وان علشان اقامتكم في كندا تستمر لازم تقضوا على الاقل سنتين خلال الخمس سنين القادمين داخل كندا. بعدين هتطلب منكم تروحوا عند طنط اللي لابسة احمر هناك دي ...(الناحية التانية ... مش ناحية الكراسي) هتروحوا ... هتديلكم اوراق وكتيبات وملازم ومحاضرات ... تبقوا تذاكروها بعدين كويس عشان تعرفوا ايه فين بيتعمل منين ... وازاي وامتى وليه ... في اول ايام لكم في كندا وتقول لكم لو احتاجتم تسئلوا عن اي حاجة تتصلوا على 211 هيجاوبوا على كل اسئلتكم. وبتشوف معاكم اطفال اد ايه وتديلكم اوراق ال child benefit وكمان بتديلكم اوراق الرعاية الصحية وشنطة ازرق في اسود عشان تحطوا فيها كل الكلام ده. (بعد كده لما تشوفوا اي واحد ماشي في الشارع شايل الشنطة دي هتعرفوا انه جديد زي حالتنا) تطلعوا من عند طنط اللي لابسة احمر تكونوا مجهزين دولارين عشان تاخدوا التروللي اللي هتحطوا عليه شنطكم. تستلموا الشنط وتروحوا طالعين على الجمارك... وهنا لنا وقفة ... 1- ورقة ال B4 بتاعة الحاجات اللي معاكم في الشنط مهمة لان لو معاكم مش هتضطروا تفتحوا شنطكم ... احنا لاننا كنا مجهزينها شنطنا والحمدلله ما اتفتحتش ... الكاونتر اللي جنبنا ... دققوا معاهم في كل حاجة وطلعوا كل اللي في شنطهم ... لان تقريبا مكانش معاهم الورقة دي ... وهنا لازم اشكر أم عمر (المدام يعني) على تجهيزها الورق ده والعناية بترتيبه هو وورق الحاجات اللي هتشحنوها بعد كده (لو هتشحنوا) 2- ورقة ال B4 للحاجات اللي هتشحنوها بعد كده مهم جدا انكم تكتبوا فيها كل حاجة عندكم ... كل حاجة واي حاجة ... اثاث ... اجهزة كهربائية ... مفروشات ... ادوات مطبخ ... سجاد ... تحف ... تابلوهات ... فوط ... ملايات ... لعب الاطفال ... كل حاجة عندكم ... مع قيمتها بالدولار ومجموع الكلام ده كام ... كل ده هيكون معفي من الجمارك بعدين. ليه بقى لان مش هتخسروا حاجة لو عملتوا كده ... وممكن لما تروحوا تلاقوا ا انتوا فعلا محتاجين تشحنوا حاجات من ممتلكاتكم دي ... او تشحنوها كلها ... يبقى نعمل كده احسن مانقول أخ خ خ ... ياريتنى مليت ورقة ال B4 وهنا تاني لازم اشكر أم عمر لانها قامت بالمهمة الانتحارية دي ومليت الاوراق دي كلها. 3- الدهب والمجوهرات بقى دول لازم يتصورا وكل حاجة يتحط تحتها قيمتها بالدولار والمجموع في الاخر... والموظفة بتسأل اذا كان معاكم دلوقتي والا لأ ... وممكن تطلب تشوفه 4- تبقوا عاملين نسختين من الاوراق دي. بعد كده الاوراق بتتختم وبتستلموا معاها ورقة فيها البيانات واجمالي قيمة الحاجات اللي معفية من الجمارك هتحتفظوا بيهم لوقت الحاجة ليها. وبس كده... Welcome Home وتبقوا وصلتوا كندا بالسلامة.

في الهوا ... سوا على الطيارة وقبل الوصول بيوزعوا على حضراتكم Declaration Card ممكن تشوفوه هنا http://www.cbsa.gc.ca/publications/forms-formulaires/e311-eng.pdf بيكون مطلوب من حضراتكم تملوه وتسلموه في المطار لما تنزلوا بالسلامة. الكارت الواحد بيكفى لاسرة من 4 افراد بيكتبوا فيه الاسم وتاريخ الميلاد والجنسية والعنوان ورقم الرحلة واسم خطوط الطيران القادم عليها واختيارات للمكان اللي حضرتك جاي منه. واختيارات بنعم ولا ل اذا كان معاك اسلحة او بضائع او لحوم او فلوس كاش اكتر من 10000 دولار واذا كنت شحنت حاجات هتوصل بعد كده او اذا كنت جاي من مزرعة او رايح مزرعة في كندا. في الاخر كل واحد من حضراتكم اكبر من 16 سنة بيمضي وتكتبوا التاريخ وخلاص... *******