أكلات سريعة التحضير (المحاوراتيات العاملات بتطبخي و الا مقضياها ديليفرى)

[طبيبة بالخارج]

انا كزوجة عاملة (حاليا واخدة اجازة عشان ابني الصغير) و عندي اربع ابناء و بصراحة لا احب وقفة المطبخ طويلا بحاول اعمل اكلات لا تأخذ وقت طويل في التحضير و حبيت اشارككم بيها و يا ريت كل من عنده افكار اخرى يدخل و يضيفها

انا عندي ميكرووف و ده بيسهل علي امور كتيرة

نقول بسم الله و نبدأ

[طبيبة بالخارج]

الفراخ

الطريقة الأولى: تقطيع شرائح بصل في صينية فرن و وضع قطع الفراخ عليها (أنا بقطع الفراخ لأربعة اجزاء) و نتبلها من فوق و تحت بالملح و الفلفل و اي بهارات موجودة (أنا اكتشفت بالصدفة تابل جديد عليه اسمه مسحوق الليمون الأسود و بيعطي طعم جميل قوي للفراخ) و جنزبيل و عصير ليمون (انا بستخدم عصير ليمون جاهز في زجاجات للطبيخ فقط و ليس للسلطة) . ثم نضع الصينية فوق عين عالية و نغطيها بورق فويل او غطا حلة كبيرة حتى تبدا ميتها تغلي فنضع فصوص حبهان و اعواد قرنفل و قرفة خشب و نضيف كوب ماء و عندما تغلي نهدا النار و نتركها حوالي من نصف ل 3/4 ساعة ثم ندخلها الفرن ليتحمر وجه الفراخ و بالهنا و الشفا

الطريقة الثانية(باستخدام الميكرووف): بشر بصلة كبيرة و خلطها بملح و فلفل و بهارات (خصوصا الكركم) و عصير ليمون و تغطية قطع الفراخ بها و وضعها بصينية بايركس و تغطيتها بورق نايلون ثم وضعها بالميكرووف لمدة 20 دقيقة على قوة 8 ثم وضعها بالفرن العادي للتحمير

الطريقة الثالثة (باستخدام صدور الدجاج المخلية من العظم): نقطع صدور الفراخ لمكعبات صغيرة و نتبلها بالملح والفلفل و البهارات و عصير الليمون ثم نضعها في صينية تحمير بها القليل من زيت الذرة المسخن و نشوحها بسرعة ثم نضع شوية ماء حسب كمية الفراخ و نستنى لما تغلي ثم نهدي النار عليها و يدوبك من ربع لثلث ساعة و نضعها في صينية فرن و معها خضار مقطع مكعبات كبيرة (طماطم و بصل و فلفل و معهم شوية ملح و فلفل) و نضع الصينية بالفرن تحت الشواية فقط لشوي الخضار و بالهناو الشفا

تم تعديل 15 ديسمبر 2010 بواسطة طبيبة بالخارج

[طبيبة بالخارج]

الطريقة الرابعة للفراخ (باستخدام صدور الفراخ المخلية): نجهز صدور الفراخ بقطعها بالطول لسمك حوالي 1سم ثم تتبيلها من أحد الجهات بملح و فلفل و توابل ثم توضع و الجهة المتبلة من الأسفل بصينية تحمير بها القليل من زيت الذرة المسخن و تتبل من الناحية الأخري ثم تقلب (لتثبيت التتبيل على الفراخ) ثم توضع بصينية بايركس و تغطى بورق النايلون و تترك بالميكرووف لمدة 12 دقيقة. اثناء تسوية الفراخ بالميكرووف نحمر فصين ثوم مدقوق بنفس طاسة التحمير ثم نضع شوية عصير ليمون و نتركه حتى يغلي شوية ثم نضعه فوق الفراخ بعد خروجها من الميكرووف ثم نضع الفراخ على اي نوع من الشوايات متوفرة لديكم (انا بستخدم محمر الساندويتشات) لمدة بسيطة لمجرد اعطاء نكهة شوي و بالهنا و الشفا

[م تيمور المراغي]

تسجيل متابعه للموضوع الشهي ده :happy:

انا حاليا عايش لوحدي ولازم اتعلم الامور المهمه دي

شكرا لحضرتك

[طبيبة بالخارج]

تسجيل متابعه للموضوع الشهي ده :happy:

انا حاليا عايش لوحدي ولازم اتعلم الامور المهمه دي

شكرا لحضرتك

أهلا بحضرتك و يا رب تجربها و تعجبك

[طبيبة بالخارج]

صينية بطاطس على السريع: مع اكلات الفراخ قد نسأل و منين نجيب شوربة للطبيخ ؟ أقول بدل ما نستخدم مكعبات الشوربة الجاهزة اللي لا نعرف فيها ايه بالضبط أنا عند تنظيفي للفرخة بقوم اقطع اطراف الاجنحة و جلد الرقبة و مؤخرة الفرخة و اشيلهم في أكياس صغيرة بالفريزر لسرعة تحضير شوربة في اي وقت و صينية البطاطس دي مثال لكده

نحضر صينية فرن و نقطع شرائح بصل فيها و شرائح البطاطس و شوية صلصة طماطم و ملح و فلفل وحبهان و أجزاء الفرخة اللي قلت عليها في الأول ثم نضع ماء مغلي و نغطيها بورق فويل و نتركها على النار حوالي 15 دقيقة ثم ندخلها الفرن بدون الفويل حتى تحمر قطع البطاطس اللي على الوش و بالهنا و الشفا

[طبيبة بالخارج]

بطاطس محمرة: نقطع البطاطس شرائح سميكة (1.5 سم) في حلة و نضع فوقها ماء بملح و عصير ليمون و خل و نتركها لتغلي لمدة 5 دقائق ثم نصفيها من الماء و نحمرها في زيت ساخن

ميزة هذه الطريقة سرعة التحضير و خصوصا لكميات كبيرة و أيضا البطاطس لا بهذه الطريقة لا تمتص زيت كتير مع التحمير و كمان طبعا لذيذة جدا (و تعالوا اسئلوا أولادي بيحبوها قوي) و بالهنا والشفا

ملحوظة: انا بعمل جنبها اي صنف لحوم و سلطة خضراء

[طبيبة بالخارج]

كفتة الفراخ: انا بحب قوي صدور الفراخ المخلية عشان لا تأخذ وقت في التنظيف

الأولاد و ساندويتشات المدرسة عملولي صداع كل واحد منهم عايز صنف و كمان ما يكلوش بس ساندويتشات كفتة الفراخ دي عجبتهم قوي و بطلوا يطلبوا حاجة تانية

نجيب صدور الفراخ و نفرمها(أو مفروم فراخ جاهز) و نخلطها مع مفروم بصل و بقدونس و فصين ثوم و ملح و فلفل و بهارات و جنزبيل و شوية عصير ليمون ثم نعمل أقراص مثل أقراص البرجر (الأفضل تبلي ايدك بماء عشان اللحمة لا تلتصق بيدك) و نكون مجهزين صفار بيضة مضروب مع شوية مية و نمسح بإيدينا سطح قرص الكفتة من الناحيتين ثم نغطسها ببقسماط ناعم و بعدين نحمر في زيت ساخن (لا تحتاج وقت للتحمير) . أنا باجي في يوم فاضية شوية و اعمل كمية و اعملها أقراص جاهزة على التحمير و اشيلها في الفريزر (في اطباق الفوم الأبيض بتاع الجبنة الرومي او اي صنف بعد غسلها طبعا) بس احط بين كل طبقة و التانية ورق نايلون عشان ما يلزقش ببعضه و آجي قبل كل يوم مدرسة بالليل اطلع من الفريزر على قد الحاجة و على الديفريز بالميكروويف و تحمير فطبعا الصبح بعمل الساندويتشات بسرعة و كمان بتنفع زوجي العزيز للفطار

و بالهنا و الشفا

تم تعديل 15 ديسمبر 2010 بواسطة طبيبة بالخارج

[طبيبة بالخارج]

خضار سوتيه: انا هنا في السعودية فيه نوع خضار مجمد عجبني جدا و اسمه نيوزلندي (حتى في الخضار برضه الأجانب اشطر) فيه نوع الخضار المشكل رائع عبارة عن بسلة و فاصوليا خضراء و جزر و ذرة حلوة و الميزة فيه انه بعد الطبخ بيفضل ماسك نفسه (مش زي انواع الخضار المجمدة التانية) المهم نحط الخضار (و هو مجمد) في صينية بايركس و نرش عليه شوية ملح و فلفل و كالعادة نغطيها بورق النايلون و نضعها يالميكروويف لمدة 8 دقائق و بالهنا و الشفا

ملحوظة: بعمل جنبه ارز و اي صنف لحوم

[طبيبة بالخارج]

كيكة عادية: انا بقه ماليش تقل على عمل الحلويات. احبها آه لكن اكسل اعملها و الأولاد بيحبوا يفطروا كيك فتعلمت اعمل كيك

بطريقة سريعة (كوب المعايرة هو المقاس المعتاد لشرب الشاي)

باستخدام خلاط العصير العادي نضع 4 بيضات + ملعقة صغيرة فانيليا + نصف ملعقة صغيرة بيكربونات صوديوم (ممكن الاستغناء عنه)

+ نصف كوب زيت ذرة + 2 كوب سكر + علبتين حليب بالشيكولاتة(افضل المراعي) العلبة حجم150مل + ملعقتين كبيرة بيكنج بودر

نشغل الخلاط حتى تختلط المكونات ثم نصبها في اناء عميق و نضيف كمية الدقيق (افضل ميكس) و هي 2 كوب و لكن تضاف على اربع مرات يعني نصف كوب في المرة و نقلب باليد(بإتجاه واحد) و الأفضل بواسطة مضرب بيض يدوي عشان لو ضربنا الدقيق بسرعة لن تخمر الكيكة كويس بالفرن

نسخن الفرن لدرجة 350 ف (180م) ثم نصب العجينة في صينية فرن مدهونة نقاط زيت و مرشوشة بشوية دقيق ثم نضع الكيكة بالفرن لمدة حوالي 35 الى 40 دقيقة و نتأكد من سواها بوضع سكينة بها فتخرج نظيفة بدون عجين

ملحوظة: لا نفتح باب الفرن عليها قبل مرور نصف ساعة حتى لا تهبط الكيكة

و بالهنا و الشفا

تم تعديل 16 ديسمبر 2010 بواسطة طبيبة بالخارج

[طبيبة بالخارج]

ميلك شيك: اشتريت قريبا الة خلط الطعام بواسطة عصاة (لعمل الشوربات أساسا) و قلت اجرب الميلك شيك

في دورق نضع علبتين حليب (العلبة 200 مل) + حوالي 8 قطع فراولة مجمدة + كوب سكر + موزة كبيرة

ثم نضرب بعصاة الخلاط و يشرب على الفور (لو ترك في الثلاجة لونه و طعمه يتغير)

تم تعديل 16 ديسمبر 2010 بواسطة طبيبة بالخارج

[قلب ابيض]

تسجيل متابعه

وتسلم ايديك

ممكن اشارك بوصفه سريعه جداا ومحببه فى العشا او فى الغدا على سبيل التغيير

والباشمهندس الللى قاعد لوحده ممكن يجربها ومش هايندم

حمص طبيخ مقدار معلقتين تقريبا

بصله مبشوره حسب الرغبه

3 او 4 بيضات

عصير طماطم او بشر طماطم افضل

تنقع الحمص ساعه او للسرعه خدوه غلوه عالنار سريعا

نحمر البصله لحد ماتصفر عالنار فى السمنه او الزيت حسب الرغبه

ونطش بالطماطم ومحط الحمص والملح والفلفل

لحد ماتتسبك وبعدين نفقش البيض على شكل عيون الواحده تلو الاخرى ..حلو تلو الاخرى دى ..

ونغطيها دقيقتين تقريبا

وبالهنا والشفا احلى واسرع واشهى شكشوكه فى الدنيا

مغذيه وسريعه وغير مكلفه

[SoSo R]

تسجيل متابعة انا كمان

وماعنديش حاجة ممكن اضيفها

اصل الأكلات السريعة بتبقى اختراعات غالبا...

ممكن سمك فيليه نقطعه مكعبات و نتبله ملح و فلفل و كمون وكارى و بعدين شوية صويا صوص

و يتشوحوا مع شوية زيت و بصل جوانح و فلفل رومى حلقات

لحد ما يستوى ممكن نضيف مية شوية بشوية

وكفاية عليكم اختراعات

سلام

[arkan]

اسرع حاجة بجد التونة

لأ بجد اقولكم وصفة سهلة جدا

كبدة شرائح نعصر عليها نص ليمونة وملح وفلفل وتتقلي في الزيت

ولا أطعم

[طبيبة بالخارج]

تسلم ايديكم جميعا و شكرا على سرعة الاختراعات

و طبعا arkan

ستظل التونة فوق قمة الأكلات السريعة انا شخصيا عندي دائما و الاولاد اتعلموا دلوقتي يفتحوا العلبة و يرشوا عليها الملح و الليمون و يأكلوها بالملعقة من العلبة مباشرة و هي مفيدة جدا عشان الزيت بتاعها مليان اوميجا3

[mohamed abd el hamid]

انا كزوجة عاملة (حاليا واخدة اجازة عشان ابني الصغير) و عندي اربع ابناء و بصراحة لا احب وقفة المطبخ طويلا بحاول اعمل اكلات لا تأخذ وقت طويل في التحضير و حبيت اشارككم بيها و يا ريت كل من عنده افكار اخرى يدخل و يضيفها

انا عندي ميكرووف و ده بيسهل علي امور كتيرة

نقول بسم الله و نبدأ

وانا كعاذب وعلى وش سفر وبهدله .... وكمان الوقفه بقى فى المطبخ الى بموووووووت فيها ... بالرغم من انى مش بعرف اعمل غير الاكلات العاديه يهنى ... زى بطاطس فى الفرن و الملوخية - بس من غير شهقه - و طاجن البامية باللحمة المفرومه وطاجن الكوسه بالباشاميل والرز والمكرونه .........وشويه حلويات كه

احب احيى حضرتك على المعلومات دى الى اكيد هاستفيد منها جدااا فى المستقبل القريب بإذن الله .. وربنا يخلى لحضرتك ال 4 ملائكة دول...آمين

[طبيبة بالخارج]

حشوة سمبوسة: الصراحة دي اختراع زوجي العزيز و الميزة فيها سرعة تحضيرها و كمان خفيفة خصوصا للافطار برمضان (اللحمة بتكون ثقيلة قوي مع باقي الأصناف) ممكن بكميات و تتشال بالفريزر أنا في رمضان بعمل منها كمية محشية و اشيلها بالفربزر عشان قبل الافطار احمرها على طول

نجيب جبنة رومي و لانشون (هنا في السعودية بفضل لانشون الفراخ لكن في مصر ممنوع أساسا ليطلع لحم خنزير او فيران) و طماطم (منزوعة البذور) و فلفل أخضر و زيتون أخضر

نقطع كل المكونات لقطع صغيرة و نخلطها كويس

و ........ بالهنا و الشفا

ملحوظة: لمن بالسعودية افضل نوعية سمبوسة "سويتز" عشان رقيقة و لا تشرب زيت كتير

تم تعديل 18 ديسمبر 2010 بواسطة طبيبة بالخارج

[طبيبة بالخارج]

انا كزوجة عاملة (حاليا واخدة اجازة عشان ابني الصغير) و عندي اربع ابناء و بصراحة لا احب وقفة المطبخ طويلا بحاول اعمل اكلات لا تأخذ وقت طويل في التحضير و حبيت اشارككم بيها و يا ريت كل من عنده افكار اخرى يدخل و يضيفها

انا عندي ميكرووف و ده بيسهل علي امور كتيرة

نقول بسم الله و نبدأ

وانا كعاذب وعلى وش سفر وبهدله .... وكمان الوقفه بقى فى المطبخ الى بموووووووت فيها ... بالرغم من انى مش بعرف اعمل غير الاكلات العاديه يهنى ... زى بطاطس فى الفرن و الملوخية - بس من غير شهقه - و طاجن البامية باللحمة المفرومه وطاجن الكوسه بالباشاميل والرز والمكرونه .........وشويه حلويات كه

احب احيى حضرتك على المعلومات دى الى اكيد هاستفيد منها جدااا فى المستقبل القريب بإذن الله .. وربنا يخلى لحضرتك ال 4 ملائكة دول...آمين

شكرا جزيلا لحضرتك و عقبال ملاااااااائكتك بإذن الله

لكن ده حضرتك اللي نتعلم منك اصل الطواجن دي مش اي حد يعملها. ما شاء الله من غير حسد و متهيئلي العروسة حتفرح قوي و لا ناوي تداري عنها هههه

ربنا يكرمك ان شاء الله في سفرك

[لونا]

تسلم إيدك على الوصفات الجميلة

الطريقة الثانية(باستخدام الميكرووف): بشر بصلة كبيرة و خلطها بملح و فلفل و بهارات (خصوصا الكركم) و عصير ليمون و تغطية قطع الفراخ بها و وضعها بصينية بايركس و تغطيتها بورق نايلون ثم وضعها بالميكرووف لمدة 20 دقيقة على قوة 8 ثم وضعها بالفرن العادي للتحمير

الوصفة دي أنا باعملها دايمًا في الميكروويف لما أكون مستعجلة

وفعلًا باحب معاها الليمون أو الخل .. و كمان الكركم بيدي طعم و لون ظريف ..

بس باضيف ليها زبادي .. جربوه و حيعجبكم جدًا

بيدي طراوة للفراخ .. و الصوص كمان طعمه رائع

[mohamed abd el hamid]

شكرا جزيلا لحضرتك و عقبال ملاااااااائكتك بإذن الله

لكن ده حضرتك اللي نتعلم منك اصل الطواجن دي مش اي حد يعملها. ما شاء الله من غير حسد و متهيئلي العروسة حتفرح قوي و لا ناوي تداري عنها هههه

ربنا يكرمك ان شاء الله في سفرك

بخصوص موضوع الملائكة ده, فأنا اشك .. لان انا حاسس ان انا هاخلف شياطين حمر .. قصدى بيض لان انا زملكاوى بصراحة

اما بقى موضوع الطواجن ده ..... انا بعملهم فعلا من زمان ..وبحب المطبخ فعلا .... بس يافندم اظل انا اتحدث من على مقعد الهواه ........ واترك لحضراتكم ميكروفون المحترفين mc(:

بالنسبه بقى لخطيبتى .... فا للاسف ... عرفت بموضوع المطبخ ده ...... انتوا مافيش حاجه بتستخبى عليكم ..... او انا بقى الى خيبه وماعرفتش اخبى ........ :Head:

بس هيا فعلا فرحت موووووت ان انا ليا فى المطبخ ... ده على امل ان انا يوم من الايام هاساعدها فيه .... هه ..... ده بعدها :yahoo: