كنوز أم وائــل ...وحجاب شهرزاد

[Folana]

السلام عليكم ورحمة الله ......

وأنا باقرأ موضوع صفاء ..ولما وصلت لجملتها اللى بتقول فيها ان المنتدى مسكون...تذكرت واقعة مرت بىّ من يومين وكنت ناوية اعرضها على حضراتكم بس انشغلت ونسيت...

بقى فى احد ليالى رمضان ..جافانى النوم على غير العادة ( لانى باحب انام جدا :))..وقلت اما اشوف التليفزيون اللى انا مقطعاه ده بيقول ايه...

وانا باقلب بغير هدى ولا هدف...شد انتباهى برنامج ..بيقدمه شاب روش..عامل شعره كنيش ولا مااعرف بيسموه ايه ..ولابس طوق ..قصدى سلسلة دهب على رقبته ..ومستضيف سيدة متقدمة فى السن بالرغم من الواناتها اللى فى وشها..

حاحكى لكم عن البرنامج واللى حاولت انقله بالورقة والقلم بسرعة...

لاقيت المذيع بيقول للمتصلة ..ركزى مع ام وائل وشوفى هى حتقول ايه ..

دلوقت انا حاحاول انقل لكم صورة ام وائل..وهى بتبربش بعينيها والاصباغ تعلو وجهها ...السيدة جالسة وعلى يمينها دورق به ماء..وتلقت المكالمة ..المتصلة بتقول الله يخليك يا ام وائل شوف لى حل انا عندى صداع مستمر ..وعايزة اعرف هل انا معمولى عمل ولا حد حسدنى...

ام وائل :...خير باذن الله ..وان شاء الله ...ووضعت كفها على دورق المية وفضلت تتمتم بشفتيها النحيلتين..وبعد كده نظرت للدورق وبدأت تكتب كلام بيبان لها لوحدها على وش الميه ...

ام وائل :..شوفى ياحبيبتى ..باذن الله ..باذن الله وان شاء الله للصداع حتجيبى نعناع اخضر وتدقيه وتلفيه فى شاشة وتربطيه على راسك ..وتقرى بسمالله الرحمن الرحيم (مرة)...ايه الكرسى (مرة) سورة الضحى (مرة) ..وتقولى اسكن ايها الصداع ..اسكن ايها الالم 7 مرات ..حيروح الصداع باذن الله وان شاء الله ..وتكتب الايات دى فى ورقة وتشيلها معاها وحتتجوز بعد شهرين باذن الله وان شاء الله والف الف مبروك جوازك والف الف مبروك شفائك من الصداع ..

مشهد (2)...

الست ام وائل بتتلقى مكالمة تليفونية...الو ..ايوه يا ام وائل انا عايز اشوف لى ولاخى فى موضوع الرزق والعمل

أم وائل :..تضع يدها على دورق المياه وتهمم ببعض الكلمات الغير مسموعة ..وده بيتم فى اقل من ثانية ,,ثم تقرأ من على وش الميه وتكتب فى ورقة امامها ..

أم وائل :...باذن الله وان شاء الله انت معمول لك عمل انت واخوك باذن الله ..وربنا على الظالم والمفترى ..يمهل ولا يهمل ..

هات من عند العطار عين عفريت...كسبرة ناشفة...حبة البركة...بذر البقلة..حرمل..

وتحطهم على البخور اللى عندك ..وعين العفريت ( هى للامانة قالت عين الديك ووصفتها بس انا عارفها عين العفريت دى)...كنت باقول عين العفريت دى تتحط بعدد حروف اسمك وعدد حروف اسم امك...وتبخر بها وتقول

" يارب ابعد شياطين الانس والجن من هذا المكان بحق لا اله الا الله محمد رسول الله وانها تكفى يارب"...سبع مرات بايمان صادق..عرفت علىّ بايمان صادق...وتمسح شقتك وعتبتك بخل وعرق حلاوة ورجلة..

وهات من عند العطار نجمة بحر واقرأ عليها سورة الزلزلة ..مرة.....الفاتحة ..مرة ..ايه الكرسى 21 مرة ..وتعلقها على باب البيت...

اما عن الرزق..فاقرأ كل يوم ...ايه 11 من سورة الطلاق

ايه الكرسى

ايه 16-17 من سورة الكهف

الضحى

الم نشرح لك صدرك

وجعلنا من بين ايديهم سدا ومن خلفهم سدا فأغشيناهم فهم لا يبصرون ....7 مرات ..

.وهكذا يا اخوانى الى اخر البرنامج ..وانا فى حالة ذهول

القناة اسمها كنوز..والبرنامج اظن اسمه لما يدور القدر......

وفضلت اقلب لقيت قناة اسمها شهرزاد مستضيفة شيخ كاجوال ..وبرضه نفس الموضوع.. يانهار اسود بقى ..هو فيه ايه ...بس ده بقى اسمه الشيخ ابو على ...

بياخد الاسم واسم الام..وماتقولش على مشكلتك هو اللى حيقول ..ويعملك حجاب علشان تتجوز...وحجاب علشان تخلف ..وحجاب للسنيورة...

هى دى فتنة المحيا ..ولا لسه فيه فتن تانية حتهل علينا...هو ده التقدم ..اننا نرجع 100 سنة لورا ونبدأ نعمل اعمال ونشوف البخت على الفضائيات ؟.....

ياترى رأيكم ايه ........

تم تعديل 10 أكتوبر 2006 بواسطة folana

[عادل أبوزيد]

لم استجمع أفكارى بعد و قررت أن اعقب حتى لو كان التعقيب غير كامل .... المسألة ببساطة جهل هذا من ناحية المشاهدين الذين يطلبون المشورة .... هل شاهدتى فيلم "البيضة و الحجر " لأحمد زكى و هذا عادى لكن السؤال هو اين "السبوبة" هنا هل الإتصال بهذا البرنامج عن طريق أرقام خاصة تتقاسم المحطة حصيلة المكالمات مع شركة التليفونات ؟

و سؤال يدور بخاطرى هل أصبح إنشاء محطة فضائية مسألة سهلة أو السؤال بصيغة "فجة" هل القائمين على الأمور فى دولة هذه المحطة على قدر كبير من الجهل أو قدر كبير من "اللصوصية" أو قدر كبير من !!!! لا أعرف ....

هل ننتظر أن نجد مثل هذا العبث على التليفون المحمول ؟؟؟ بل ربما موجود فعلا

أنتظر تعقيب الأعضاء الأفاضل ..... لا أعرف إلى ماذا سنصل و لكن واضح أن هناك مغارات و كهوف مجهولة فى القنوات الفضائية و أتذكر تعبير د. نعمات أحمد فؤاد حينما وصفت الصحافة ب " صناعة الجهل"

[Tafshan]

اول مرة اسمع عن القتوات دى :)

بس عموماً الموضوع هو ثقافة شعبية موجوده في حياتنا كلنا بدرجات متفاوته اقلها الهزار و اعلاها ما تفضلت به فولانه .. اما عن القنوات فهى تجارة و ليس هدفها اطلاقاً اي نوع من انواع التثقيق .. اللى ذاكر ذاكر خلاص :P

[نانو]

العمليه في الاول و الاخر تجاره مش اكتر و استغلال لجهل طبقه من الناس ما بتصدق قشه تتعلق فيها و تعلق عليها فشلها

انا حسه انها بالضبط نفس فكره القنوات الكتير اللي بتعرض اغاني الفيديو كليب لمجرد ان الناس تتفرج و تبعت مسجات وتتصل بالتليفونات

دول طبقه الشباب الفاضي و طيب و اهل الشباب الفاضي و سايبين اولادهم بلا هدف لازم كمان يتم استغلالهم بشكل او اخر

و علي فكره ان من اول البرامج اللي روجت للجهل ده و الاسئله اللي مالهاش لازمه هو برنامج المسلمون يتسائلون

و اللي اصبح اهم هدف عنده هو اعلي نسبه مشاهده باي شكل و بالتالي بيلجئوا لمواضيع و قضايا كانت غير مطروحه بشكل كبير في شاشات التليفزيون

عموما اعتقد ان ديه فتره و هتعدي و مش هنفضل في المهزله ديه كتير و اللي بيوقعوا فريسه للبرامج ديه هم اللي غاوين كده و لو البرامج ديه مش موجوده في التليفزيون ...هيروحو و يدوروا بنفسهم علي الدجالين في الشوارع و ما اكثرهم

و الانسان الواعي اللي بيقدر يميز هيقدر لوحده هيختار ايه البرنامج الجدير بالمشاهده و البرنامج التافه اللي بيبحث عن المكسب

[Folana]

السلام عليكم ورحمة الله ............

طبعا شاهدت البيضة والحجر...ومش بأنكر ابدا وجود مثل هذه الاشياء فعلا بينا..ولكن حسب اعتقادى انها تحدث على استحياء ..وكنا بنقرأ فى الجرايد انهم قبضوا على فلان او علانة ( بلاش فلانة دى)....بتهمة الدجل ...

دلوقت اصبح شىء عادى ويذاع على الفضائيات وبيشاهدها ملايين من اناس..يعنى اصبح شىء مسلم به...فى عصرنا ده؟ومع كل التقدم التكنولوجى ده؟.....

انا كمان يا اخ طفشان كنت اول مرة اشوف القنوات دى...وحصل لى شىء غريب جدا..انى بعد البرامج ماخلصت وفضلت اقلب تانى ..لم اجد القناتين دول...انا خفت جدا وقلت سلام قولا من رب رحيم..دول يظهر عفاريت بجد.. :blink:

بس لقيت القناة دى تانى امبارح وشفت الشيخ ابو على على قناة شهرزاد وتقريبا برنامجه القادم حيكون يوم الخميس فى حدود الساعة 8 مساءا...

بيقول ايه ابو على بقى...هو مصر ان اللى بيعمله مش دجل ولا شعوذة ده علم ..واللى بيمارسه لازم يكون معاه دكتوراة...هو بياخد اسم المتصل واسم الام..وفجاءة يتنرفز ويقول ان عندك مشاكل مع زوجتك..يرد المتصل بس انا مش متزوج..يقول وايش دخلى انا متزوج ولا لأ...

للاسف هو بيتكلم بلهجة عراقى فانا مش بافهم كل كلامه...وقال لواحدة ان فيه مشاكل مع بنتها قالت له دى مش بترضى تروح دراستها وساكتة ...راح بص فى الورقة وقالها وهو عاقد الحاجبين..روحى شوفى بنتك مالها...قالت له مش راضية تتكلم...قالها استغفر الله روحى اسأليها وهى حتقولك انا مش عايز اتكلم..

طبعا كلنا فهمنا دلوقت ان البنت عملت كارثة اخلاقية ...يانهار اسود...يعنى ممكن الست دى تروح تقتل بنتها علشان ابو على قالها بنظرة معبرة انا مش عايز اتكلم...

وواحدة متزوجة من عشرين سنة ومش بتنجب..قالها ...انت من عشرين سنة اثناء عقد القران..كان فيه واحد جالس وعاقد اصابع اليدين معا..قالت مين ده؟..قالها لأ مش حاقول انت ماتعرفيهوش...وهو ماكانش يقصد لكن عقدة اصابعه منعت الخلفة...!!!

وقال لها على حجاب تعمله وهى حتخلف...مش عارفة رأيكم ايه بجد..!!

وعلى الجانب الاخر ام وائل لها رأى اخر فى موضوع الانجاب ...حأعرضه بعد الفاصل ....

[نور العبيدي]

السلام عليكم ورحمة الله ............

طبعا شاهدت البيضة والحجر...ومش بأنكر ابدا وجود مثل هذه الاشياء فعلا بينا..ولكن حسب اعتقادى انها تحدث على استحياء ..وكنا بنقرأ فى الجرايد انهم قبضوا على فلان او علانة ( بلاش فلانة دى)....بتهمة الدجل ...

دلوقت اصبح شىء عادى ويذاع على الفضائيات وبيشاهدها ملايين من اناس..يعنى اصبح شىء مسلم به...فى عصرنا ده؟ومع كل التقدم التكنولوجى ده؟.....

انا كمان يا اخ طفشان كنت اول مرة اشوف القنوات دى...وحصل لى شىء غريب جدا..انى بعد البرامج ماخلصت وفضلت اقلب تانى ..لم اجد القناتين دول...انا خفت جدا وقلت سلام قولا من رب رحيم..دول يظهر عفاريت بجد.. :blush:

بس لقيت القناة دى تانى امبارح وشفت الشيخ ابو على على قناة شهرزاد وتقريبا برنامجه القادم حيكون يوم الخميس فى حدود الساعة 8 مساءا...

بيقول ايه ابو على بقى...هو مصر ان اللى بيعمله مش دجل ولا شعوذة ده علم ..واللى بيمارسه لازم يكون معاه دكتوراة...هو بياخد اسم المتصل واسم الام..وفجاءة يتنرفز ويقول ان عندك مشاكل مع زوجتك..يرد المتصل بس انا مش متزوج..يقول وايش دخلى انا متزوج ولا لأ...

للاسف هو بيتكلم بلهجة عراقى فانا مش بافهم كل كلامه...وقال لواحدة ان فيه مشاكل مع بنتها قالت له دى مش بترضى تروح دراستها وساكتة ...راح بص فى الورقة وقالها وهو عاقد الحاجبين..روحى شوفى بنتك مالها...قالت له مش راضية تتكلم...قالها استغفر الله روحى اسأليها وهى حتقولك انا مش عايز اتكلم..

طبعا كلنا فهمنا دلوقت ان البنت عملت كارثة اخلاقية ...يانهار اسود...يعنى ممكن الست دى تروح تقتل بنتها علشان ابو على قالها بنظرة معبرة انا مش عايز اتكلم...

وواحدة متزوجة من عشرين سنة ومش بتنجب..قالها ...انت من عشرين سنة اثناء عقد القران..كان فيه واحد جالس وعاقد اصابع اليدين معا..قالت مين ده؟..قالها لأ مش حاقول انت ماتعرفيهوش...وهو ماكانش يقصد لكن عقدة اصابعه منعت الخلفة...!!!

وقال لها على حجاب تعمله وهى حتخلف...مش عارفة رأيكم ايه بجد..!!

وعلى الجانب الاخر ام وائل لها رأى اخر فى موضوع الانجاب ...حأعرضه بعد الفاصل ....

[Folana]

السلام عليكم ورحمة الله ...

ايوه.....!!!

مافهمتش ايه المقصود ..معذرة...حضرتك نسيت ..تكتب(تكتبى)...الرد

بس برضه ده مايمنعش انى بارحب بك ...او بكِ معانا فى المحاورات ...حضرتك كتبت كلامى تانى بدون تعليق....مش فاهمة!!!

[إيماءات]

قبل أن أبدى برائي بالموضوع ..

سوف أبين الحكم الشرعي والأسلامي تجاه تلكَ القضيه التي بداء زادها ينتشر بين الفضائيات إلي أن أصبحت تتنافس تلكَ الأخرى في جذب أقطار من المشاهدين إليهم ,,ما تقوم بهِ تلك المحطات هو أدعاء علم الغيب .. وعلم الغيب علم لا يعلمه إلا الله .. وهو أمراً خاصاً بالله وحده ..

ويكون أدعاء علم الغيب , من الأنسان بأن يطلب من الجن أستراق السمع في السماء , وبعدها تنبئه بما سيحصل لـ ِ فلان وفلان ..

وهذا شرك بالله العلي العظيم ..وللأسف نجد الأمة الأن تجهل ما أصيبها من فتنه ..

نسأ الله الهداية للجميع ..

إيماءات / السعودية

[bentmasria]

العزيزة فولانة

استميحك عذرا فى توضيح نقطة ما لعضوتنا الجديدة ايماءات

ان رأى الشرع والدين فى مسألة علم الغيب واضح سيدتى وقد تستغربين سيدتى الكريمة ان وجدت ان هذا ليس محل النقاش هنا فى موضوعنا الفكرة كما يتضح من كلام فولانة هى عرض واقع مؤلم وغريب ووجود فئة من الناس تسارع بالمشاركة فى هذا الاثم تحت اى شعار وحقيقة اننا قد يقع احدنا فى شرك تصديق هذه الاشياء تحت اى مسمى فمع اختلاف الثقافات والخبرات ومستويات التعليم فى مجتمعاتنا العربية نجد فئة من الناس عن جهل او عدم وعى تطارد هذه الاشياء وكلهم ثقة فى صدفها او احتمال صدق مدعيها وقد تنتج عنه الكثير من الكوارث لا قدر الله

والدعوة هاهنا تطرح حقائق رأيناها رؤى العين وتطرح قضية تستحق المناقشة فأين نحن مم يحدث وكيف نتخلص من استفادة البعض من اللعب بأوهام ومعتقدات الاقل علما

مرحبا بك ايماءات

على فكرة يافولانه انا شفت البرنامج وتلاه برنامج آخر على قناة الناس يناقش شيخ ادعى زواجه من جنية لمدة عشرين عاما وانجابه الاطفال منها وليتكم شهدتم كيف كانت المناظرة بين علماء الدين وهذا الرجل الذى كلما دفعوه الى مأزق ثار وهاج وماج مدعيا انه يعلم وهم لا يعلمون ورغم خلو حديثه من أى منطق ورفضه الاتيان ببرهان عاى اقواله ظل مصرا عليها ويدعى انه يساعد الناس بهذه العلاقة ويقضى حاجاتهم

لدرجة ان الشيخ العالم طلب منه ان يأتيه ببوش مثلا ويخلص العالم من شروره فقال انه لا يملك ان يفعل هذا وتوه الكلام

لا تفزعى يافلانة

الخوف ليس على من يشاهد وكله يقين بقدرة الله وثقة فى عدله وحكمته ولكن الخوف على ضعاف الايمان والنفوس وسهلى الانقياد اللهم يسر لنا ان نساعدهم فى استيضاح هذه الاشياء وكيفية التعامل معها ومع مدعيها اللهم احفظنا من كل شر

موضوع خطير فعلا يافولانة واتمنى لو اننا نستطيع ان نقدم حلا ما لنشر الوعى

دمتى بكل ود

[Folana]

السلام عليكم ورحمة الله ...

عودة الى كنوز ام وائل...والحقيقة انا كنت نسيت الموضوع الى أن تلقيت رسالة من احدهم يسألنى أو تسألنى عن عنوان السيدة المذكورة " ام وائل"....

بداية احب اذكر انى لا اعرف لها عنوان...انا شاهدت برنامج تليفزيونى ...شدنى اليه هذا الكم الهائل من الاتصالات التليفونية والرسائل ...كما أ ذهلنى اسلوب الاستخفاف بالناس وانقيادهم وراء هذا الدجل

ولم أقصد ابدا الاعلان عن هذه السيدة ولا تربطنى بها اى صلة والحمدلله ...وحاشا لله ان اكون سببا فى انتشار فتنة او فسادا فى الارض....

لذا ارجو المعذرة لعدم ردى على السائل ...

وبالمناسبة....الشيوخ اتغيروا دلوقت..اصبحوا اكثر اناقة وروشنة...ومحطة شهرزاد تابعة لمحطة كنوز ....مش عارفة الجنسية ايه الحقيقة..

لكن الموضوع اصبح بيمثل اهمية للمشاهدين.....لدرجة انهم عايزين حجاب لاى حاجة.....

كنت معتقدة ان الامور دى بتهم البسطاء فقط .....ويذكرنى هنا حديث سمعته من احدى السيدات البسطاء واللى احيانا باتعامل معها لسبب او اخر..

كانت بتحكى لى عن " ست عندهم فى البلد وحشة قوى ....لازم كل ما حد يتجوز فى البلد او يحصل حاجة الناس توديلها فلوس واكل ولحمة..والا تاذيهم ...دى مرة ربطت عرسان علشان مابعتوش لها فلوس ..اه والنبى يا حاجة "

ده انا نفسى انها تموت قبل ما اجوز ولادى...باخاف منها قوى يا حاجة ..

الكلام ده على لسانها بالظبط كده...

ولو جينا نقيس نفس مستوى التفكير بتاع الست البسيطة دى مع الناس المثقفة اللى بتلجأ لام وائل ...متهيالى مش حنلاقى فرق كتير....المستويين بيؤمنوا بالخرافات ...والمستويين بيلجأوا للحماية من الدجاليين اليهم...

يعنى علشان يحموا نفسهم من شرورهم بيلجأوا لهم ...اذن الموضوع مش مستوى ثقافى واجتماعى...ده اكيد هناك شىء اخر وراء هذه الظاهرة...

ومش حنقدر نقول قلة وعى دينى برضه....لعدة اسباب اذكر منها ان الشيوخ اللى شاهدتهم فى الحلقات التليفزيونية دى بيلجأوا للايات القرانية....وده لوحده سبب كافى يخلى الناس تقول "لالالالا ده بيعالج بالقرأن ...يبقى مش حرام "...!!!

اعتقد ان دى حيل ووسائل يستعين بها الانسان لدرء المخاطر والاذى عنه ...أو لتخفيف معاناته وعذابه من امراض معينة...أو لوقايته من ارواح شريرة يتوقع خطرها ولا يستطيع الافلات منها الا عن طريق قوى اخرى تكمن فى تعويذة ..

او حجاب .يقيه من شرور لايعلمها...

ولان معظم الناس لا تحب مواجهة المشاكل او مواجهة نفسها فدائما مانجد قفص اتهام جاهز ....يلقى فيه الناس بمشاكلهم ويعزون تلك المشاكل الى الاعمال والعكوسات...

مرة اخرى انا باعتذر لصاحب الرسالة ...انا ماليش صلة بام وائل ولا وائل نفسه ....

هدانا الله واياكم لما يحب ويرضى

[inas]

اسمحيلي يا مدام فلانه اتكلم معاك في الموضوع ده

للاسف الظاهره دي موجوده بشده وبكثره

رغم كل الي بيتقال ورغم ان كل الناس عرفين ان ده دجل

بس في ناس من ياسهم من المشاكل بيصدقوا اي كلام يتقال ليهم وحده مبتتخطبش

تروح لدجاله تقولها من اول متشوف وشها اشتاتا اشتوت معمولك عمل عديتي على كزا ولا مدفون ليك كزا

وتصدق الغلبانه وتدفع وتجيب

السحر موجود ومذكور في القرآن بس مش الدجالين دول هما الي يقولوا وولا يعرفو يعالجوا من السحر

علاج السحر معروف بالرقيه الشرعيه والقرآن والمواظبه على الصلاه

ومش محتاج لحد عشان يفكلك السحر المصاب هو الوحيد القادر على اشفاء نفسه بمقدرة وارادة الله وحده

الحمد لله على نعمة العقل

واعوذ بالله من مثل تلك البرامج الي معرفش ازاي بيعرضوها

انا بسميها جهل وتخلف

يعني تقدر من صوتي تقولي هجيب عيال ومصيرهم ايه في مكالمه تلفونيه

علم الغيب عند الله وحده

شكرا ليك يا فلانه

[Sherief AbdelWahab]

فكرتيني بالشيخ علي خليفة ..

أول شيخ في العالم لابس سلسلة وفاتح القميص تقوليش جوني برافو بتاع أفلام الكرتون؟ :wub:

خلص الكلام