اطلب اى وصفه على بالك .. تلاقيها قدامك

[bodda]

العزيز سى السيد

طبعا منورنا و منور المنطقة وضواحيها

واشكرلى ماما على سلامها وربنا يخليها

بس صدقنى مش فاهم تقصد ايه ؟؟؟؟؟

الموضوع انا عامله للطلبات

فالصديق اللى طلب المكرونه اقولا ايه ؟؟

واللى طلب النجرسكو اقوله ايه ؟؟؟

فزى مانت شايف انا باكتب هنا طلبات الاصدقاء

وعلى قد فهمى انك عايز اشكال سلطات ودى سهله و هاتكون جاهزه

ولو عايز سلطه معينه قولى برضه :D

واطلب يا حبيبى التقيل وجربنى

ومساء الفل

تم تعديل 23 مايو 2005 بواسطة bodda

[se_ Elsyed]

ولو عايز سلطه معينه قولى برضه  <_<

<{POST_SNAPBACK}>

يا فندم مانا لو أعرف كنت أتكلمت ..

إنت عارف يا بودا أنا جيت الدنيا مالقيتش بابا ( أصله كان شغال في وردية بالليل ) :angry:

قصدي يعني إحنا فتحنا عنينا لقينا كل اللي حوالينا بياكلوا سلطة خضار وما يعرفوش غيرها ... كل يوم خس وجزر خس وجزر ..

فعايزينك تروشا وتكحرتنا .. وتقولنا شوية شوية سلطات كده على مزاج الشيف ... شغل المعلم لإبنه .. إشي روسي وإشي يوناني ... وعيش

[bodda]

حاضر يا سى السيد

السلطة اليونانية

خسايه كابوتشى تيجى كيلو ناخد نصها ونفرمه بالسكينه كويس

3 طماطم وسط و جامده تقطع نصين وترانشات لكل نص

خيارتين ييجى 15 سم تتقشر وتتقطع نصين وترانشات

حوالى 100 جرام زيتون مخلى ترانشات

حوالى 100 جرام جبن بلدى يتفرول بالايد ( مش بالسكينه ) :angry:

كل ده يتحط فى حاجه غويطه ويتقلب بخفة ودلع :angry: (من غير عجن )

نجهز الصوص نص كوباية زيت زيتون وربع كوباية عصير ليمون

وعليهم ملح وفلفل ونضربهم كويس لغاية الامتزاج

ونصب الخلطة دى عالسلطة السابقة وتقليب خفيف

الكميه دى تكفى 6 انفار عاديين أو اتنين جعانين :angry: <_<

وبالف هنا وشفا

مساء الفل

تم تعديل 23 مايو 2005 بواسطة bodda

[bodda]

سلطة البطاطس بالمايونيز

نسلق نص كيلو بطاطس لوحده ولما يبرد يقطع مكعبات صغيرة

نسلق ربع كيلو بسله لوحده

نسلق ربع كيلو جزر مقطع قد البسله لوحده

المهم السلق مايبقاش لدرجة السوى النهائى علشان مايعجنش

نحضر مايونيز بصفار 3 بيضات نضربهم فى العجانه 3 دقايق عالسريع

وبعدين نضيف لهم كوباية زيت ذره بالمعلقة الصغيرة

بلاش استعجال :angry: <_<

ولما تخلص كمية الزيت هاتلاقى الخلطة بقت ماسكه نفسها

يعنى لو نكشتها بالشوكه تفضل العلامة .. واضح ؟؟ :angry:

تحط معلقتين كبار خل عنب وملح وفلفل

وتضرب تانى ييجى دقيقة

بعد كده نخفف سمك المايونيز بالخل لو حبيت

نحط خليط الخضروات فى حاجه غويطه وعليهم المايونيز

ونقلب بخفة ودلع :angry: حتى التجانس التام

وبألف هنا وشفا

مساء الفل

تم تعديل 23 مايو 2005 بواسطة bodda

[Osha]

على ما أخلص اللي في ايدي ، قولي طريقة الرز باللبن من غير ما نعجن الرزو بلاش المستكة عشان ما باحبهاش

تم تعديل 23 مايو 2005 بواسطة Osha

[Fencer]

الحبيب بودا

لحد ما انت كتبت عن الرز فانا كنت فاكر ان ارزة و رزة هو المفلفل و العتب على العلام من الاول ... نعيش و نتعلم

اولا: في الارياف بيعملوا رز معمر و في الحقيقة انا عمري ما كلته و لا شفته و نفسي اجربه فهل من وصفة?

ثانيا: المدام بتسأل عن الرز باللبن أرجوك تركز كويس في كيفية عدم تعجين الرز - طبعا هي ما بتعجنوش نهائيا - <_< واخد بالك معايا انما انا خايف يحصل لخبطة في اختلاف مدارس الطبخ يقوم يعجن

اما السلطات فأنا مع الاخ سي السيد في اننا نحب نعرف شويه سلطات من اللي بتتقدم في المطاعم اشي بالتونة و اللي بالبيض المسلوق

و تحياتي

تم تعديل 23 مايو 2005 بواسطة Fencer

[Osha]

الحمد لله خلصت اللي ورايا

طبعا متشكرين على القرنبيط وبعدين موضوع الرز ده انا مظلومة فيه والله - دا انا باعمل رز اللي هو رزة ورزة جميل جدا وباحمر نص الكمية مش ربعها والناس بتقول عليا مملة عشان باحمر كميات من الرز

لكن الطعم الجميل محتاج شوية تعب طبعاااا

وبعدين الطبخ مايحلاش من غير تخبيط في الحلل!!!

مش كده برضه

وبعدين فيه سؤال بالنسبة لكفتة الرز عمل معايا مشكلة - اصلي ماكانش عندي وقت اروح اشتري رز مصري - فعملت بالرز بتاع "انكل سام" ونقعته بس للأسف فضل برضه مكلكع في العجينة - يعنى معنى كده ان الرز الوحيد اللي ينفع هو الرز الجميل بتاعنا??

السلطات بقى دي قصة تانية

فيه هنا صوص ابيض طعمه جميل بياكلوه مع بسكوت الجبنة

وكمان صلصة مكسيكي جمييييييلة اوي وحراقة بتتاكل مع الشيبس

اصل الصيف والحر محتاجين ضروري سلطات مش طبيخ

مش كده والنبي يا أستاذنا

وبعدين أخدت بالك من التريقة على الرز باللبن من زوجي العزيز <_<

طبعا زي ما هو قال انا استاذة واكيد انت كمان شايف اني كده :angry: :angry:

لكن مافيش مانع برضه من التأكيد على وصفة الرز باللبن - ممكن تقول اني باختبرك فيها :D :angry:

[bodda]

الأخ الحبيب فنسر

طبعا المدام استاذة ورئيسة قسم وعارفه كل حاجه

وبلاش الابتسامة الخبيثة اللى شايفها على وشك دى

خللى اليوم يعدى

وهاكتبلك الرز المعمر الفلاحى اللى ما حصلش

بس الاول نقول

الرز بلبن

نقول هانعمل اتنين كيلو لبن

يبقى يحتاجوا كوباية رز

نسلق الرز فى كوبايتين ونص ميه لغاية نص سوى

ونغلى اللبن ونحليه بالسكر والفانيليا ( وبلاش المستكة)

وبعدين ندلق الرز بميته عاللبن ويغلى مع التقليب المستمر

لغاية درجة التماسك اللى تقبل الغرف والصب

ولو حصل تاخير فى التماسك

يبقى ممكن معلقتين كبار نشا فى نص كوباية ميه بارده

ونحطهم عالخلطة مع التقليب السريع

ندلقه فى صينية بايركس وتجمل بجوز الهند والزبيب والفستق

وممكن تجمل بالقرفه

وطبعا ممكن يكون الغرف فى سلاطين الشوربة الصغيره

او تتاكل من الحله على طول لو مستعجلين

:angry: <_< :angry:

وصباح الفل

تم تعديل 24 مايو 2005 بواسطة bodda

[bodda]

الاخ الحبيب فنسر

الرز المعمر

طبعا ده نوعين معمر حلو ومعمر حادق

وده غير معمر القذافى <_<

المعمر الحلو بيبقى رز ولبن وزبدة وسكر

والمعمر الحادق بيبقى الملح بدل السكر وكمان لحم او حمام

فانت عايز انهى نوع منهم ؟؟؟؟

صباح الفل

:angry:

[se_ Elsyed]

بصراحة التوبيك ده أكثر من رائع .. بجد وجديد وحق وحقيق وده بفضل الراجل السُكره اللي هبط علينا من السماء " بودا "

إنت مين يا بودا ؟ إوعى تكون الشيف أسامه السيد بس مستخفي .. أو الشيف رمزي اللبناني بس عامل فيها مصري ؟

على العموم ما بتفرقش معانا الأسماء أهم حاجة إنك مُنتج .. وأنا هاسميك " مصباح علا ء الدين " اللي الواحد أول ما يفركه يطلع منه مارد يأكله كل اللي نفسه فيه ... ولقد خلعنا عليك لقب " كبير الطباخين في محاورات المصريين "

إطلع لي بقى من ورا التلاجة وخد الكام سؤال العويصين دول ...

السؤال الأول : أُذكر طريقة للكنافة غير بتاعتنا في مصر أم شربات ومكسرات يعني عايزها تكون حادقة .... مزيداً من التوضيح .. يعني ينفع أحشي الكنافة جبنة مثلاً ( غير النابلسية جربناها هنا والنتائج كانت مزرية للغاية وكنت هابعت زوجتي عند أهلها في اليوم ده ) .... أصل أخوك س س مالوش تُقل على الحلويات وبيبقى الود ودي أكل الحاجة من غير سكر ( كان بيحصل في مصر في القطايف والكنافة ) ؟ يالله جاوب ...

السؤال الثاني : ليه الكفته المصرية اللي أختنا أوشا بتتكلم عنها كل ما أكلها تحصلي حموضه فظيعة وبتبقى في نار جايده في صدري يا ولدي ؟ فهل العيب مني ولا من الكفته ؟ مع العلم إن ده بيحصل مع الكفتة الجاهز بتاعت أمريكانا والكلام ده .. إنما خالتك أم س س ساعات لما تكون راضيه عني بتبعت لي نفحات من مصر .. وأوقات كثيرة بتبعت لي الكفته متصبعة ومتحمرة جاهزة ( شوفت العز اللي حريمنا فيها .. ناقص كمان تبعتها لي متاكله ) مع الكفتة البيتي بقى ما بيحصلش أي أعراض جانبية ولا متاعب صحية ؟

السؤال الثالث : أذكر طريقة عمل سلطة الكرنب المشهور بها كنتاكي أعتقد إسمها ( كول سول ) البتاعة دي الواحد عشانها بيسيب الفراخ ويفضل ينزل حتتك بتتك فيها لحد ما يشبع ؟

كل سؤال من دول عليه 10 درجات وكله إجباري .. يعني لو جاوبت عليهم كلهم هاتضمن إنك تدخل كلية الإقتصاد والتدبير المنزلي ...

[se_ Elsyed]

وبعدين أخدت بالك من التريقة على الرز باللبن من زوجي العزيز  <_<

طبعا زي ما هو قال انا استاذة واكيد انت كمان شايف اني كده  :angry:  :angry:

لكن مافيش مانع برضه من التأكيد على وصفة الرز باللبن - ممكن تقول اني باختبرك فيها  :D  :angry:

حسام .. إسمح لي أنا مش معاك في أسلوب التريقه ده .. يا عم كل وإنت ساكت ماحنا ياما أكلنا ..

لكن إنتي برضوا يا أوشه مالكيش حق تعجني الرز وطبعاً لما تقدميه في أطباق بيتحول إلى كائن فضائي تاني خالص ممكن نسميه فنكوش باللين أو شمبرلاح بالدندرمة ...

عامة إحنا جايين نهدي النفوس وبإذن الله سحابة رز بلبن وتعدي .. والبيوت ياما بيحصل فيها ..

[Fencer]

العزيز بودا

انا عارف و متاكد من ان المدام استاذة طبخ و عمري ماكلت طبيخ احلى من كده و ده موضوع غير قابل للحوار

و شكرا على الرز باللبن و منتظرين الرز المعمر الحادق و يا سلام لو تقترح يتعمل جنبه ايه عشان تتمم جميلك

صباحه جميل

[Fencer]

حسام .. إسمح لي أنا مش معاك في أسلوب التريقه ده .. يا عم كل وإنت ساكت ماحنا ياما أكلنا ..

<{POST_SNAPBACK}>

سي السيد

انت مش واخد بالك انا ماباتريقش عليها يا راجل انت هاتودينا ابو زعبل و الا ايه عاد

انا بأقول ان اختلاف مدارس الطبخ ممكن يلخبط بس

انما سيبك انت انا سعيد بيك جدا و بدمك الخفيف و على فكرة انا لسة واكل كفتة رز امبارح و مافيش حرقان في صدري و لا حموضة و لا الاعراض اللي انت بتقول عليها خالص

عمايل المدام يا سي السيد واخد بالك انت

و انا على فكرة عشت احلى ايام في تبوك في الشمالية الغربية احلى ايام حياتي و كنت باروح الرياض كتير و الشرقيةو في رأيي ان الحياة في السعودية جميلة جدا خصوصا لما تنزل تميل على اي منجف تاخد اتنين نفر رز و دجاج و يكون رز بخاري - بمناسبة فيضان الرز في الحوارات - و يا ريت بودا يقرأ الرد ده و يقول لنا كيفية عمل الرز البخاري و التحويجة بتاعته خاصة السلطة الحارة اللي معمولة بالطماطم

سلامي للسعودية كتير السلام

صباحه جميل

[Fencer]

- و يا ريت بودا يقرأ الرد ده و يقول لنا كيفية عمل الرز البخاري و التحويجة بتاعته خاصة السلطة الحارة اللي معمولة بالطماطم

سلامي للسعودية كتير السلام

صباحه جميل

<{POST_SNAPBACK}>

بودا الحريف

يا ترى يا هل ترى ليك في البخاري و السلطة الحارة و التحويج بتاعها و عمايل الرز البخاري و البرياني و السليق ?

اتمنى ان تكون الاجابة بنعم عشان انا مشتاق للرز ده طالما المزاج اليومين دول رز يبقى بجملة الرز يا بودا قولنا على البخاري

يخليك لينا يا رب

صباحه جميل

[bentmasria]

:) :D :ph34r: :blink:

شيف بودا

انا شايفه الموضوع ده كويس ومفيد ولهذا قررت اتفق معاك

انا حشتغل معاك بلية والوصفه بخمسه جنيه والحسابه بتحسب

وطبعا موش حتسدد بيها ديون مصر

محمد ابنى النص وانت النص

وعلى فكرة

ماتنساش والنبى سلطات المايونيز والحاجات اللى بتخن والسيزر سلاد وكده يعنى

وعلى انا البنجر وورق العنب وشوية مشاوى

يللى ان شاء الله ما حد حوش

بجد

ماشاء الله عليك ربنا يحفظك بتفكرنى بوصفات جدتى

سى السيد

قللوا الثوم فى دمعة الكفته وخلطتها وزود البقدونس معدتك ما تتعبش

ربنا يسعدكم

ام محمد

عقليه راسمالية فذه

[Osha]

الأخ الحبيب فنسر

طبعا المدام استاذة ورئيسة قسم وعارفه كل حاجه

:o  :sad:  :D

<{POST_SNAPBACK}>

شكرا على ذكر تلك الحقيقة يا صديقي الفاضل :)

وكمان شكرا علىالرز باللبن

بس فين السلطات اللي قلت عليها ;)

والا هي ناس وناس ....طبعا ماهومصلحة زيك !!!

:ph34r: :D ;) :blink: [/ALIGN][/align[/align]]

تم تعديل 25 مايو 2005 بواسطة Osha

[Osha]

حسام العزيز

انت زوج عاقل وعارف مصلحتك فين و لاتستمع لنصائح الآخرين الشريرة

الأخ سي السيد

على فكرة حسام بيعمل رز أحسن مني ساعات - أمالرز باللبن فحظي معاه غريب - هومش بيعجن لكن قوامه بيبقى غامض - وانا حاجرب طريقة بودا لاني جربت كلامه في حاجات كتير

كفتة الرز بتاعة أمريكانا أنا فاكرة طعهما - كانت حلوة بس من 5 سنين لما سبت تبوك ماكانتش بتعمل حموضة - يمكن غيروا في المقادير بتاعتها

بس مقادير كفتة بودا عشرة على عشرة - وكفاية انك عارف كل حاجة محطوطة في العجينة ايه

عاوز نصيحة كمان - قول له يقول لك على طريقة عجينة الطعمية وادعي لي

[shawshank]

طب بجد أنا عايز أعرف طريقة عمل عجينة الطعمية ... ممكن يا شيف Bodda ؟ :)

[se_ Elsyed]

قول له يقول لك على طريقة عجينة الطعمية وادعي لي

ب بجد أنا عايز أعرف طريقة عمل عجينة الطعمية ... ممكن يا شيف Booda

لأ لحد هنا وبودا يركن على جنب .. لإن لو حضرتك مذاكره المنتدى كويس صفحة 3 قسم مواضيع شخصية هاتعرفي إني اللي قدامك ده عفريت فول وطعمية وقعدت أكثر من 10 سنوات شغال في مطعم ملكنا ... لكن للأسف ما عرفش مقادير طعمياية أو أتنين لإن شغلنا كله كان بيبقى بالجمله ...

بس عامةً المكونات هي " فول مدشوش ويكون منقوع في المياه مدة لا تقل تقريباً عن 10 ساعات ، كرات ، بقدونس ، بصل ، ثوم ، بهارات )

وصراحة عمري ما جربت الخلطة دي بكميات صغيرة أو أضربها في الخلاط مثلاً ، عشان كده بأشتري العجينة هنا جاهزة وبأعيش معاها في البيت وأظبطها بمعرفتي ... لكن بمناسبة العجينة .. كله كوم وعجينة الطعمية أم حمض بتاعت السوريين كوم تاني .. بأكرهها موت وبأحس إنب بأكل طعميه بلاستيك .

[shawshank]

أيوه ... ماهو المشكلة إن كل عجاين الطعمية اللي هنا هي اللي بالحمص دي. أول ما جيت فرحت و افتكرتها طعمية بجد ... لكن ماحبيهاش خالص لما دقتها .. عشان كده بسأل على عجينة الطعمية بتاعتنا .... هو صحيح ليه مش بنصدر العجينة دي ... مع إن هنا فيه ملوخية و بسلة و عصاير و غيره مستوردة من مصر؟

عموما شكرا جدا يا سيييييي السيد على الوصفة ... هشوف و أقولك

تم تعديل 25 مايو 2005 بواسطة shawshank