اطلب اى وصفه على بالك .. تلاقيها قدامك

[bodda]

للعزيزه ايناد الشوكلات موس

ودى وصفة من وصفات الامواس علشان سى السيد يحلق كويس

موس الشيكولاتة

ربع كيلو شيكولاتة خام و3 معالق كبيرة كاكاو

وتلات بيضات ( نفصل الصفار لوحده )

كوبايتين كريم شانتى وطبعا ممكن الجاهز

ونص كوباية لبن :D

ربع كوباية سكر بودره للتحلية وورق نعناع للتجميل

ندوب الشيكولاتة الخام على حمام ماء لغاية ما تدوب تمام :sad:

نقلب الشيكولاته لما حرارتها تهدأ شوية

ونضيف اللبن والكاكاو والسكر ونقلب بزمة :D

نضرب بياض البيض جدا لغاية ما يتماسك ونخلطه بالكريم شانتى

ونروح مقلبينهم مع الشيكولاتة باللبن تقليب يدوى بضمير :lol:

ونصبه فى اى كاسات او كوبايات ويجمل بالنعناع ويبرد

وبالف هنا وشفا

تم تعديل 27 مايو 2005 بواسطة bodda

[Fencer]

بودا

انت صهينت على الرز البخاري و الا ايه?

[شاعرالرومانسية]

اختى الكريمة اوشا ..

انا جيت هنا مخصوص عشان ماحرمك من خنقتى ...( قصدى طلعتى .. :D )

شيفنا العظيم بودا...

يا ريس الحق يقال ...وكل بيقول .. وماذا اقول بعد كل ما قيل ..

هو انا كنت حقول اية... B)

ياباشا ..الاصل ان انت الاستاذ واحنا التلامذة..ودة شرف لينا طبعا

والا نسيت لقب مساعد شيف بتاعى والا اية،،، :D

وبعد اذن حضرتك وبما انى عينت نفسى مساعد شيف حقوم انا بالطلعة بتاعة الارز البخارى..وربنا يسترها بقى :unsure:

طبعا الرز من اشهى الاكلات زى ما تفضل اخونا بودا وقال وطرقى كتير ولو السفرة معليهاش ارز تبقى ....... مش سفرة اساسا

طبعا ...الارز البخارى اجمل حاجة فية انه يستوى مع اللحوم فاحنا نتكل على المولى ونفك الكيس ونجيبلنا قد كيلو كيلو ونص لحمة وياريت بعظمها (عشان البخار يبقى دسم :) ) ونحضرالمكونات التالية

2 كوب ارز ( يفضل البسمتى طبعا )

2 ملعقة صغيرة بهارات مشكلة

2 ملعقة صغيرة ملح

4/1 ملعقة صغيرة فلفل اسود

1 ملعقة صغيرة حبهان مطحون طبعا

4/1 ملعقة صغيرة قرنفل ، مطحون برضة

1 ملعقة صغيرة كزبرة ..شرحة

2/1 ملعقة صغيرة قرفة

4 ملعقة كبيرة زيت او سمن

كام فص ثوم سمان كدة متقطعين شرايح

6 – 8 حبة قرنفل ، صحيح

2 حبة متوسطة بصل ، مقطع شرائح

2 حبة متوسطة جزر، مقطع شرائح

1 حبة صغيرة جزر ، مبشور خشن

حبيتين طماطم حمراء، مقشرة، مفرومة

ربع كوباية صلصة طماطم...تقيلة

ورقتين لورى

تلت اربع عيدان قرفة

شوية مكسرات مشكلة ( ايشى بندق على لوز على زبيب .. ونحمرهم فى شوية سمنه)

حضرنا المقادير ..نخش على العمايل ;)

نغسل الأرز وننقعة في ماء دافئ مملح 20 – 25 دقيقة.

في طبق صغير نحط البهارات، الملح، الفلفل، الحبهان ،القرنفل، الكزبرة و القرفة ونديها تقليب حتى ان تختلط البهارات مع بعضها ، ونحطها فوق قطع اللحم ، ونقلب الى ان تتوزع تماما، ونسبها شوية تتبل .

الزيت في طاسة واسعة، ونسخنة على نار متوسطة، ونضيف البصل ونقلب الى ان يصبح لونه ذهبي غامق ، وبعدين شرائح الثوم ونقلب الى ان تذبل.

نضيف اللحم المبهر الى الطاسة ونقلبة مع البصل الى ان أن يتحمر اللحم قليلا ويكتسب نكهة البهارات .

نضيف الجزر المبشور والشرائح ونقلب الى ان يذبل ، نضيف الطماطم، والصلصة التقيلة (ولو معرفناش نشيلها نجيب البواب يساعدنا مش مشكلة :D ) وورق الغار وعيدان القرفة، ونضيف 6 أكواب من الماء، ونقلب كيويس

نسيب اللحم على نار متوسطة الى ان يبدأ بالغليان ونخفف النار، نغطي القدر ونسيب اللحم على نار متوسطة 30 – 40 دقيقة الى ان ينضج . بس نراعى ان يتبقى مع اللحم حوالي 2 كوب من المرق السميك، عشان كدة اذا جف المرق أثناء سلق اللحم نضيف مزيد من الماء (ذلك يتوقف على نوع اللحم المستعمل وحجم القطع واسالو الشيف بودا فى الموضوع دة ;) ) .

نصفي الأرز من ماء النقع، ونوزعة على سطح اللحم ، ونضيف بعض الماء الى ان يتغطى سطح الأرز بالماء ( يتوقف احتياجنا للماء على حسب كمية المرق المتبقية ، فالاحسن نحط الأرز اولا ثم نحدد مدى احتياجنا للماء، يجب ان يتم تغطية سطح الأرز بطبقة خفيفة من المرق).

نسيب الأرز على نار متوسطة الى ان يغلي لمدة 1 دقيقة، ثم نغطي القدر ونتركة على نار هادئة جدا الى ان ينضج الأرز تماما ، 20 – 25 دقيقة.

نحط الأرز واللحم في طبق التقديم، ونزينه بشرائح الجزر،، ونوزع المكسرات المقلية على سطحه ..

وبايدينا بقى نديها ....

والا بالمعالق عشان الشكل العام :rolleyes:

و...

بالف هنا وشفا.. وممكن نعزم صحابنا ،،،،

مش يكلوا،،،

لاء يكلو ويتفرجوا كمان.. B)

تم تعديل 28 مايو 2005 بواسطة شاعرالرومانسية

[bodda]

العزيز فنسر

والله ما طنشت ولا حاجه بس سفر يومين اخرنى عنك شوية

وادى يا عم وصفة سهلة للرز البخارى التمام

الرز البخارى

نحط نص كوباية زيت فى الحله ونسخنها اوى :D

نحط نص كيلو لحم مقطع حتت صغيرة ونشوحه مع فصين مستكة

نضيف بصلتين مقطعين شرايح رقيقة ونقلب 5 دقايق

نحط عليهم 3 طماطمايات مبشورين ونقلب 5 دقايق

بعد كده 3 كوبايات ميه سخنه وملح وفلفل ونسيبه عالنار لسوى اللحم

نضيف جزراية مقطعه شرايح رفيعه و ربع معلقة صغيرة قرنفل مطحون

بعد كده نضيف 3 كوبايات رز ونضبط كمية المية :rolleyes:

ونسيبه على نار هاديه خالص لغاية السوى

وبالف هنا وشفا

مساء الفل

:unsure:

[bodda]

شاعرنا الجميل

والله انا ما شفت ردك الا بعد ما نزلت الرد بتاعى

لانى فاتح الشاشة عالرد بقالها ييجى تلات ساعات

ومستنى اى فرصة علشان اكتبها

وادى يا سيدى بدل الوصفة وصفتين :D

عاشان تعرفوا ان شاعرنا الجميل شيف وتقيل كمان

صباح الفل

:rolleyes:

[se_ Elsyed]

إيه يا جدعان ما تفهمونا الفوله ؟

هو احنا مشرفين أي كلام ولا إيه .. إنتوا جايين من منتدى أبله نظيرة ولا إيه نظامكم ؟... لإني مش شايف لكم مداخلات تقريباً إلا في المطبخ لحد ما باقي الزملاء اللي حرقين دمهم في باب السياسة والإنتخابات والذي منه بقوا يحقدوا عليكم والبعض قال عنكم " آه يابا إحنا عمالين نجاهد ونحاول نصلح في البلد ودول حطين على قلبهم مراوح وشغالين في المحاشي والرز البخاري والرز المعمر وأمواس الشيكولاتة"

وأنا من هنا بأقولهم " يا إخواني إن لكل دوره في المجتمع .. فعندما نقوم بالثورة مش هانبقى على لحم بطننا ولازم ولابد من وجود ناس تغذينا خصوصاً لو الحكومة فرضت علينا حصار إقتصادي ...ودول ممكن نسميهم قسم الإمداد والتميون في الثورة المباركة "

بودا ، أوشا ، فينسر وباقي الشلة إلحقوا خزنوا لنا شوية رز على شوالين بصل على زلعتين مش ده أحنا داخلين على أيام أسود من شعر مارينجوس الأول المصبوغ بصبغة " ألمع ورنيش ألمع "

[Osha]

شاعر الرومانسية

الف شكر على الخنقة...قصدي على الوصفة يا سيدي!!! :D

ودايما منورنا وخانقنا ..قصدي مشرفنا!! B)

اذا كان حسام عاجبه وصفة حضرتك يعملها لكن انا بقى ماليش دعوة بيها وحاعمل وصفة بودا - توم ايه يابني اللي في الرز البخاري!! :)

وبعدين مقاديرك محتاجة اوناسيس يصرف عليها ...دا احنا حنعمل جمعية عشان نجيب حتتين اللحمة نعمل بيهم الرز :unsure:

بعد كده اقتصد في المقادير لو سمحت او تجيب المقادير من عندك هدية :rolleyes:

بودا العزيز

شيف من النوع التقيل يعني كام كيلو كده !!! B)

نديها بقى حبه فوسفور لو سمحت - اصلي سمعت عن واحد هنا -بدون ذكر أسماء - بيقول انه محترف سمك واكيد أخره طبعا حوض السمك يتفرج عليه!! عاوزة اكلة سمك مش مقلي ولا طاجن في الفرن ويكون فيليه لو سمحت عشان ماليش في التنظيف

ولو مش عاجبك - ياللي انت عارف نفسك - تعال نظف السمك بنفسك

[se_ Elsyed]

نديها بقى حبه فوسفور لو سمحت - اصلي سمعت عن واحد هنا -بدون ذكر أسماء - بيقول انه محترف سمك واكيد أخره طبعا حوض السمك يتفرج عليه!! عاوزة اكلة سمك مش مقلي ولا طاجن في الفرن ويكون فيليه لو سمحت عشان ماليش في التنظيف

ولو مش عاجبك - ياللي انت عارف نفسك - تعال نظف السمك بنفسك

<{POST_SNAPBACK}>

آيوه الله يخليكي يا أوشا يا أُختي أنا بطني نشفت من السمك يا المقلي يا المشوي .. حيث إننا قاهريين فده سلو بلدنا وزوجتي لا تعرف في الدنيا غير هاتان الطريقتان.. لكن لما بأتعزم عند إخواننا الشوام بالذات بأشوف طُرق سمك تهبل بصراحة وبأبقى عايز أعيط من اللي أنا فيه...

فلو سمحت يا حضرة الشيف أبوحمد تقولنا على كام طريقة سمك من اللي وصى عليهم داود في التذكرة .. ويا ريت تقولي كمان على الطريقة اللي بتبقى فيها السمكة بحالها في الصينية وبيبقى عليها حاجات من فوق - عارفها طبعاً - ....

ودي رسالة مُعطره بكل روائح الطبخ الشرقي والغربي لشيفنا العزيز بودا ... أخي العزيز بودا تحيه طيبة وبعد ، بهذا أُفيد سعادتكم بأنني لم أُعلق على أي وصفة طعام كتبتها لإني حسيت بالضآلة أما وصفاتكم الجهنمية .. وأكتشفت حقيقة مُرة بعد 25 سنة خدمة في المطابخ وهي إني " كُفتجي " وإن كل اللي عملته طيلة هذه المدة كان عبارة عن عجن وتلييس .

ومرحباً بالشيف شاعر الورمانسية وعايزك توصفي لي أكلة تحبب زوجتي فيه ، ده بمناسبة الرومانسية وخلافه ... يعني حاجة كده زي حجاب المحبة والشبشبة والحاجات دي ...

[شاعرالرومانسية]

اولا .. عزيزى بودا

ولايهمك يا عمنا تعددت الطرق والارز واحد B)

المهم الاكيلة

ثانيا الاخت اوشا ...

اية الحكاية يا استاذة ... وصفة اية اللى محتاجة اوناسيس علشان يصرف عليها..شكللك اتخطيتى من حجم المقادير وماقرأتيش الوصفة كويس :D

يا ستى المقادير كلها ( بخلاف الارز واللحم )عبارة عن تحبيشة توابل ..وتوابل عادية كمان ( قرفة وكسبرة حبهان ...الخ ) يعنى حاجات ماتكملشى اتنين تلاتة جنية من عند العطار

ولو على شوية المكسرات اللى فى الاخر،،، بلاها ياستى .. نخليهم شوية زبيب على سودانى..بزمتك مين فينا الخنيقة B)

وبعدين لوكنتى دققتى شوية كنتى اكتشفتى ان الطريقتين زى بعض اساسا الا من بعض الاختلافات الغير جوهرية..وبعدين بتقولى " توم اية يابنى اللى فى الارز البخارى " .....!!!!؟؟؟

لو جربتية مش حتقولى كدة ...( شكللك مابتكليش كرانشى والا اية حكايتك :unsure: )

اما بخصوص السمك ..فدة بقى لعبة الشيف العظيم بودا ( اصل فية معزة خاصة وعلاقة عاطفية حميمة :rolleyes: بينة وبين السمك )

ثالثا الاستاذ سى السيد

لاء دة ماينفعش يترد علية هنا دة عاوز رد مستقل

فالى هناك :)

[شاعرالرومانسية]

استاذنا العزيز se_ Elsyed

"إيه يا جدعان ما تفهمونا الفوله ؟

هو احنا مشرفين أي كلام ولا إيه .. إنتوا جايين من منتدى أبله نظيرة ولا إيه نظامكم ؟"

ياسيدى الفاضل مفيش نظام والا مؤامرة ولا تنظيم ولا حاجة لاقدر الله ،، دى اولى مشاركاتى معاكم فى هذا المنتدى الجميل وباقى الاخوة برضة اعتقد ان انضمامهم جديد ولسة مالحقوش عشان يتهموا واياى اننا جايين من منتدى ابلة نظيرة ( الا هو فية منتدى بالاسم دة بجد .. احيات ابوك لو فيى ابعتلى اللينك عشان اشترك فية :) )

" لإني مش شايف لكم مداخلات تقريباً إلا في المطبخ لحد ما باقي الزملاء اللي حرقين دمهم في باب السياسة والإنتخابات والذي منه بقوا يحقدوا عليكم والبعض قال عنكم " آه يابا إحنا عمالين نجاهد ونحاول نصلح في البلد ودول حطين على قلبهم مراوح وشغالين في المحاشي والرز البخاري والرز المعمر وأمواس الشيكولاتة" "

والله يا أخى الكريم انا لا أعتقد ان لوائح وشروط الانضمام للمنتدى ، فيها اى بند يجرم اقتصار مشاركة عضو فى قسم دون الاخر( دة لو كان فية اقتصار زى ما بتقول ) ولا يلزم بتساوى مشاركات الاعضاء بين الاقسام.. وبعدين مش معنى المشاركة بهذا القسم والاهتمام به ان الناس حاطة على قلبها مراوح ..دة بس منفس الواحد بيمارس فيه هوايته بدل ما يطق ويموت لاقدر الله :unsure:

"وأنا من هنا بأقولهم " يا إخواني إن لكل دوره في المجتمع .. فعندما نقوم بالثورة مش هانبقى على لحم بطننا ولازم ولابد من وجود ناس تغذينا خصوصاً لو الحكومة فرضت علينا حصار إقتصادي ...ودول ممكن نسميهم قسم الإمداد والتميون في الثورة المباركة " "

انت كمان يا عزيزى خططت و قمت بالثورة وكمان وزعت الادوار .. وكمان اديتنا شرف الاشراف على تغذية اعضاء الحركة ..والله شىء لطيف

بس ياعم مالقتش غير اسم الثورة المباركة...؟؟؟ ماتشوف اسم غير دة الله يعمر بيتك ..هو حيبقى ورانا ورانا

اما بخصوص اكلة السمك الغير تقليدية اللى عاوزها فدى نخليها لايام الحصار الاقتصادى،، :rolleyes:

.

.

.

.

.

.

.

والا اقوللك ..اكيد وقتاها مش حيبقى فية سمك ... :D

خلاص نقولها دلوقتى وامرنا لله ...

هى طريقة هايلة لعمل صنية سمك بالبطاطس .....( طبعا اكيد فية واحد من الاعضاء لا داعى لذكر اسمة B) حيقول بطاطس اية اللى على السمك دى..اية اللخبطيطة دى ... بس أكيد هو برضة مابيكلشى كرانشى ) .... ونتقابل بعد الفاصل B)

تم تعديل 28 مايو 2005 بواسطة شاعرالرومانسية

[Salwa]

شاعر الرومانسية ..

اول شئ ...اهلا بيكم معانا ..

على فكرة سى السيد سعيد بيكم جدا جدا ..وانتم لما تطولوا معانا شوية حاتكتشفوا انه بيحب السخرية من كل الأوضاع اللى بقت ...( طبيعية ) ..واما موضوعكم فكان فعلا فعلا نسمة جميلة فى وسط كل هذا ( القيظ المنبعث من الغيظ ) ...

و....ياسى السيد ...احنا مش اتفقنا ان العقل السليم فى الجسم السليم ؟؟؟

بعد الأكل حانبدأ كلنا الشغل ....

ومتنساش اننا مفروض بنتناول ثلاث وجبات ....يعنى هروب اكيد على هنا ثلاث مرات فى اليوم ....

وبصراحة كدة اتحلت مشكلة (( تاكلوا ايه بكرة ؟ ))

فى انتظار صينية السمك بالبطاطس ...

حاتعمل دنيس والا قاروس ؟؟؟

(( اوعى تنسى تقطيع البطاطس حلقات رقيقة ))...

لما اشوف بتعملها زيى والا لأ ؟؟

سلام مؤقت ....

[bodda]

الاخ العزيز سى السيد

والاخت العزيزه اوشا

طبعا شاعر الرومانسية قال وزاد وعاد

وانا عن نفسى عايش كل اللى بتقوله

وباهرب منه العشر دقايق اللى بنفس فيهم عن نفسى هنا

فمعلش ... خلينى احسن فى الامداد والتموين :D

بالنسبة لاخوانا الشوام مع حبى العظيم ليهم

همه اساتذه فى اللحوم .... لكن السمك :D اسمحلى بقى :unsure:

اما عن طلبك لوصفة سمك فى الفرن فطبعا خد دى :

سمك سنجارى

نجيب سمكة بورى كبيرة أو بلطى أو فيلية ممكن

لو سمكه يبقى هانفتحها من ضهرها ونسيب البطن ملتصقة

يعنى هاتبقى مفتوحة نصين ملتصقين من ناحية البطن

وتتنضف وتتغسل ونركنها

ولو فيليه يبقى نستعمله بحجمه دون تقطيع مايقلش عن حجم الكف

ونحضر خلطة من الاتى :rolleyes:

بصل حلقات و بقدونس وكسبرة خضرا مفرومة وتوم مفرى

طماطماية مفرومة و ملح وفلفل وكمون وشطة

ندعك الخلطة دى كلها مع بعض بخفة ودلع B)

ندهن الصينية بشوية زيت

نقطع بطاطساية كبيرة ترانشات ونحطها فرشه فى الصينية

نحط السمكه على ضهرها يعنى وشها لفوق أو نرص الفيليه الكبير

نجيب الخلطة ونغطى بيها السمك ونرش عليها نقط زيت

ونحدفها عالفرن نص ساعه عالارضيه وبعدين خمس دقايق تحمير فوق

ونقابلها وهيه خاجه من الفرن بعصير تلات لامونات مفتريين :)

وبالف هنا وشفا مع رز ابيض

مساء الفل

B)

[bodda]

العزيزه سلوى

شكرا لردك الجميل واللى شوفته بعد ما كتبت وصفة السمك السنجارى

لكن لو عايزه احلى صينية سمك بالبطاطس اهى

صينية السمك بالبطاطس

اولا احلى سمك ونسميه الملك هوه القاروص

لانه يصلح لاى طريقة سواء فرن او شوى او مقلى او شوربة او .....

نجيب سمكه قاروص كبيرة وتقطع ترانشات سمكها حوالة صباعين

ونحضر خلطه من البطاطس مكعبات :unsure:

ومفروم الشبت والبقدونس والكسبرة الخضراوالطماطم والتوم وحلقات بصل

وطبعا الملح والفلفل والكمون والشطة ونقلب كله مع بعض :D

نحط نص الخلطة فى الصينية ونرص ترانشات السمك

ونغطيه بباقى الخلطة ونقطع طماطميتين ترانشات ونرصهم عالوش

ونحضر كوباية ميه ومعلقة ملح ونصبها من جنب الصينية

نغطى الصينية بالفويل وعالفرن نص ساعه عالارضية

نكشفها ونتاكد من سوى البطاطس

ونرفعها عالرف الفوقانى للتحمير B)

وبرضه نقابلها وهيه خارجه من الفرن بالليمون :rolleyes:

وبالف هنا وشفا

مساء الفل

:)

[Osha]

يا عم بودا

ايه السمك الخطير ده

كده انت حتمسح ناس من على وش الأرض مسح - يارب يا مسهل

وانامعاك برضه ان الأخوة الشوام لهم أكلهم المميز - لكن السمك تخصص مصري

تم تعديل 28 مايو 2005 بواسطة Osha

[Osha]

سي السيد

لو عاوز تاخد نهال انا موافقة من دلوقت وكمان محمد هدية مجانية :rolleyes:

شفت الكرم الانساني اللي انا فيه :unsure:

علىفكرة انا كمان طباخة شاطرة - واللي مش عاجبه يروح ياكل كرانشي - سامع يا شاعر الرومانسية يا بتاع التوم :D

تم تعديل 28 مايو 2005 بواسطة Osha

[Osha]

شوف يا عم يا بتاع الكرانشي :unsure:

انا طول عمري باكل كرانشي :rolleyes:

وبعدين انا مابحبش المكسرات خالص ولا الزبيب - طيب اموت نفسي B)

ثم انت مش لسه قايلي انك عامل عزومة سمك على طريقة فيثاغورث!راحت فين - والا ده كلام ابن عم حديت :D

باين عليك ماكلتش كرانشي مؤخرا!!! :)

[Fencer]

إيه يا جدعان ما تفهمونا الفوله ؟

هو احنا مشرفين أي كلام ولا إيه ..

<{POST_SNAPBACK}>

الاخ العزيز سي السيد

هما كلمتين .....و بس

تاني.....مشرفين?!

ما تاخدش في بالك أصل دي قصة طويلة مع المشرفين و كانت قضية خسرانة بسبب التوحد في الرأي و امتلاك السلطة ( ليست الخضراء)بما اننا في المطبخ :)

كما قال الاخ شاعر الرومانسية انه لا يوجد ما يمنع من المشاركة في قاعة واحدة فقط - ان كان هذا يحدث بالفعل- عن نفسي انا شاركت في عدة قاعات و ان لسة مشترك جديد يعني باسخن :D

هل الاعضاء الغير مشاركين في المطبخ مطلوب منهم المشاركة في المطبخ? ام انهم عايشين جعانين في نضالهم الثورجي و لا حاجة لهم في الاكل .... اما ان الثورة المزمع القيام بها ستكون بالاضراب عن الطعام

قاعة المطبخ دي مزاج و واحة نلجأ اليها بعد عناء كل منا في مجاله عشر دقايق كده و لعلمك احنا بقينا نطبخ من وصفات بودا و نسينا اي حاجة تانية غير اننا اصبحنا اصدقاء على الرغم من ان واحد في الشرق و واحد في الغرب

ثم ان قاعة المطبخ قاعة مميزة تشع منها الروائح الجذابة التي تذهب العقل و تجري اللعاب و تشرح الصدر خصوصا بمشاركات الاعضاء اللي دمهم خفيف و انت اولهم :unsure:

و بعدين احنا سألنا عن كيفية تنزيل الصور و انت رديت علينا :rolleyes:

مش كده و الا ايه

[bodda]

الله يخليكى يا اوشا ... بس انا مش عارف تقصدى مين ؟؟؟

لكن لو على وصفات السمك اطلبى ولا يهمك

وادى واحده عالطاير وسهله وجديدة

سمك بالطحينة

الاول تعملى سلطة طحينة بالتوم والخل والملح ... عادى

بس كترى الكميه فى حاجه غويطه :rolleyes:

وبعدين تجيبى السمك الفيلية تقطعيه حتت

قد نص علبة السجاير بتاعة حسام :)

وتتبلى السمك عادى بالتوم والكمون والملح وتسيبيه ساعه

وبعد كده تقلى السمك بالدقيق عادى برضه

نيجى بقى للحدث التاريخى

:D :unsure:

نطلع السمك من الطاسه لما يتحمر ويقرمش سِنه :D

ونحدفه فى سلطانية الطحينة يطش ويشرب منها

ونطلعه منها بعد دقيقتين ونرصه على فرشة بقدونس

ويكون الرز سخن وجاهز B)

وسلطة طماطم بلدى

وهجوووووووووووووووووم

صباح الفل

B)

تم تعديل 29 مايو 2005 بواسطة bodda

[bodda]

العزيز فنسر

خللى بالك ان سى السيد واضح انه ذواق وله فى المطبخ

بس نفسه يجر رجلنا للقاعات التانيه

ومش واخد باله اننا هنا بنجهز اكلات اقوى من الديناميت

:D :rolleyes: :unsure:

و الف شكر على كلامك الجميل

وياريت وصفات السمك الجديدة تعجبكم

بس المهم بعدها الشاى وسيجارتين واحلى نومة فى السطل

:) B) B)

صباح الفل

:D

[se_ Elsyed]

شاعر الرومانسية ..

اول شئ ...اهلا بيكم معانا ..

على فكرة سى السيد سعيد بيكم جدا جدا ..وانتم لما تطولوا معانا شوية حاتكتشفوا انه بيحب السخرية من كل الأوضاع اللى بقت ...( طبيعية ) ..

<{POST_SNAPBACK}>

لأ معليش إستني يا مدام سلوى .. ولو سمحتي خليكي بره المطبخ دلوقت عشان في حلل هاتطير وأطباق صيني هاتتكسر والسمنة البلدي هاتبكى للرُكب ...

ليه سوء الظن ده يا عم شاعر الرومانسية .. وإيه الوش اللي إديتهوني ده ؟

على العموم ربنا يسامحك وإنت عشان من طرف فينسر وإوشا فإكرامك واجب علينا وهانشيلك فوق دماغنا ....

وأنا اللي كنت محضر لكم مفاجأة وهانتنازل لكم عن باب المطبخ بيع وشرا ..

لكن في النهاية برضوا قلب الب عمره ما يعرف الأساوة .. روح يا شاعر يابني قلبي غضبان عليك لحد ما توصف لنا أكله تفتح النفس زي أكلات بودا .. ساعتها هاقولك إن دمي ودموعي وأبتساماتي راضيين عنك ...