اطلب اى وصفه على بالك .. تلاقيها قدامك

[se_ Elsyed]

حسام كتب

الاخ العزيز سي السيد

هما كلمتين .....و بس

تاني.....مشرفين?!

حسام خلاص ما العصفورة قالتلي عالفولة ... وإنتوا هنا في حمايتي يا رجالة واللي يرشكوا بالميه حتى ولو عشان يجيب طراوه أرشة بالصلصة ...

راحت أوشه رده عليه وكتبت

سي السيد

لو عاوز تاخد نهال انا موافقة من دلوقت وكمان محمد هدية مجانية 

شفت الكرم الانساني اللي انا فيه

ماشي واللي يرجع يبقى عيل ... بس لو سمحتي إدينا نهال بس وبلاش محمد عندي منه كثير ....

[Osha]

بودا

طبعا قصدي بالناس اللي حتتمسح ناس عارفة نفسها وخنيقة ومابتكلش كرانشي واول حرف من اسمه شاعر الرومانسية ومش حاوضح اكتر من كده ...خلي الكلام بالمداري!!!

شكرا على السمك الفيليه بالطحينة - حاجربه طبعا

سي السيد

ارجوك ماتخليش معرفة شاعر الرومانسية بينا تحوشك عن اصابته بأي شئ من ادوات المطبخ الطائرة - صدقني حتخدمنا كتير .. أنا كمان حاقف جنبك واحدفه باللي ربنا يقدرني عليه............

انت اخترت تاخد نهال لوحدها - صدقني حتاخد الطرف المتعب جدا ..انا بس كنت حاملة هم انها لا تشعر بوحدة من غير اخوها ..فكر في العرض تاني

نيجي بقى للجد الجديد

ناوية الأسبوع ده اعزم احد الأصدقاء الحريف في المطبخ - وطبعا كأي مائدة مصرية عتيدة لازم يكون فيه محشي

المشكلة دلوقتي اني ناوية اعمل ورق عنب وكوسة - وقد سمعت من زوجته انه بيقول ان الشبت لا يوضع سوى مع حشوة الكرنب والممبار

طول عمر امي ربنا يخليها بتحط الشبت على كل المحاشي

عاوز رأي يحسم الموضوع ده بشكل نهائي عشان لما آجي اعمل المحشي أحط بقدونس لوحده وانا مرتاحة البال والاأحط بقدونس وشبت زي ما طول عمرنا بنعمل

على فكرة يا بودا ..الممبار اختفى تاني مش عارفة اجيبه منين وانا زعلانة جدا!كان نفسي احط ممبار كمان على السفرة، على الأقل ألاقي حجة لوضع الشبت!!

[Osha]

بمناسبة الحديث عن المأكولات البحرية أقدم لكم طريقة عمل طاجن المأكولات البحرية الشديد جدا وهو اسكندراني أصلا

المقادير:

عدد 3 شرائح سمك فيلية متوسطة الحجم ومقطعة الى مكعبات متوسطة

2/1 كيلو كالاماري منظف ومقطع الى مربعات حوالي 2سم*2سم

4/1 كيلو جمبري متوسط مقشر

1 بصلة كبيرة مفرومة

10 فصوص ثوم من الكبير

2 حبة فلفل رومي مبشورة

حزمة بقدونس مع كزبرة خضراء مفرومة

كوب عصير طماطم

كوب صلصة

الطريقة:

فقط السمك يشوح في ملعقة زيت ثم يوضح مع الكالاماري والجمبري في الطاجن

يقدح الزيت جيدا ثم يوضع البصل ويقلب حتى يصير بنى ثم يضاف الفلفل الرومي والثوم المفري معا الى البصل ويقلب الى ان يجف ماء الفلفل

يضاف البقدونس والكزبرة الى الخليط السابق ويقلب حتى يختفي ماؤهم

يضاف عصير الطماطم والصلصة معا ويبهر الخليط ببهارات السمك والملح والكمون والفلفل والكزبرة الناشفة

يغلي قليلا ثم يصب فوق السمك والكالاماري والجمبري ويدخل الفرن وبالهنا والشفا

[se_ Elsyed]

عاوز رأي يحسم الموضوع ده بشكل نهائي عشان لما آجي اعمل المحشي أحط بقدونس لوحده وانا مرتاحة البال والاأحط بقدونس وشبت زي ما طول عمرنا بنعمل

<{POST_SNAPBACK}>

لازم أُدلي بدلوي عشان أثبت لهم إني راجل مطبخجي قديم

لأ في دي إطمني يا أوشا أنا الحاجات دي باشتريها بنفسي لمراتي من السوبر ماركو إتوكلي على الله الخلطة تتكون من شبت وبقدونس وتخرطيهم صغنن صغنن وجو أهيد .

بالنسبة للأوفر بتاع نهال .. طب ما تشجعينا وتدينا عليها رجيحة هدية ... مسدس ميه .. كده يعني من الحاجات اللي تشجع دي ...

أما شاعر الرومانسية فخلاص أنا قلبي أبيض من البفتا وسامحته وقلبي وربي راضيين عليه ...

[bodda]

طبعا نا معاكى فى ان الشبت اساسى فى المحاشى

لكن طبعا دى اذواق ... والضيف دايما على حق

الممبار

نجيب الممبار وأهم حاجه غسيله عن طريق قلبه بسيخ

يعنى يبقى الداخلى بتعه من بره ثم نقلبه تانى بعد التنضيف

بعد كده نقطعه حتت حوالى شبر ( 20 سم )

ونشق 3 سم من الطرف من جهه واحده لتسهيل الحشو

نركب خلطة الحشو من رز مغسول :wub:

وبقدونس وشبت وبصل وتوم مفرى وممكن مفروم طماطمايه

وطبعا ملح وفلفل وبهارات

نقلب الرز مع باقى المكونات ونحشى القطع السابقة

بحيث يكون الحشو مبطط جواها يعنى يملأ التلت فقط :excl:

نجيب حلة فيها مية تغلى عالنار بالملح والفلفل وبصله

ونسقط الممبار المحشى فى الماء المغلى

هاتلاقى اطرافه تنكمش وتقفل عالحشو ويمكن يسقط بعضه

عادى :D

وياخد عالنار حوالى نص ساعه للسوى

بعد كده نشيله من الميه ويبرد ثم يحمر فى الزيت

وبألف هنا وشفا

مساء الفل

[شاعرالرومانسية]

الاخت سلوى ..

اهلا بيك وشكرا على ترحيبك .،،

وماحصلشى حاجة يا ست الكل ..دى كانت زوبعة فى فنجان B) وتم السيطرة عليها :D

اما بخصوص الاخ سى السيد ... فمن غير ما تقولى ..واضح انه سعيد جداااااا بوجودنا ( دة بجد والله مش تريقة :) ) واحنا بالفعل -او انا عن نفسى - سعيد بوجودى بينكم جدا

وبخصوص صنية السمك بالبطاطس ... الريس بتاعى سبقنى وقاللها ..بس ولا يهمك انا برضة حقول طريقتى ( اللى بالثوم ...عندا فى اللى بالى :P ) وحقولها فى ختام الموضوع

اخى العزيز بودا .. ماشى ياعم نشوف موضوع الامداد والتموين دة ..( مش برضة لو قبضوا على حركة المقاومة ..بتوع الامداد والتموين دول بياخدوا براءة :excl: )

وبعدين تعالى هنا ياحاج ...كل دة ومش عارف أختنا العزيزة اوشا تقصد مين .....( دى قالتلك اول حرف من اسمة يارااااااجل) لمع النظارة كدة كويس وولعلك سيجارة وانت تعرف B)

نيجى بقى للاستاذة المبجلة اوشا،،،

على راى الاخ محمد فؤاد لما غنى وقال " هو انا جيت جنبك "

حد جاب سيرتك والا داسلك على طرف .. انا قلت انك مابتكليش كرانشى ..والا هو اللى على راسة بطحه :D

وبعدين انا عارف ان العزيز حسام ايدة فرطه وكريم وهاريك كرانشى وشيبسى وليون وكل انواع البطاطس ... مش كدة والا اية ياعم حسام :wub:

أخونا الفاضل ,... سى السيد

انا مش حتكلم والا حفتح بقى خااااااااااااااالص

انا بس حرد عليك بصنية السمك بالبطاطس اللى وعدتك بيها واللى كلها رومانسية ( عشان خاطر المدام بس والله ;) )

ونتقابل بعد هذا الاعلان B)

[Fencer]

وبعدين انا عارف ان العزيز حسام ايدة فرطه وكريم وهاريك كرانشى وشيبسى وليون وكل انواع البطاطس ... مش كدة والا اية ياعم حسام :excl:

الاخ العزيز شاعرنا الرومانسي

انا سعيد جدا بمعرفتك و متشكر انك جنت سيرة ايدي الفرطة اللي ضيعت بيها فلوسي كلها على الكرانشي و الشبسي و ما شابه مش ناقص غير تخطف من العيال و هما بياكلوه

العيل من دول لو عرف يتلايم على كيس كرانشي يخش اودته و يقفل عليه و يحط الكومودينو وراء الباب عشان يعرف يكمل الكيس

انا عاجباني وصفاتك اللي بالتوم و اديها توم اد ما تقدر و سيبك من الاعداء قصدي الناس اللي مش عاجبها... يا عم من خاف سلم ...انا امشي قبل ما يبقى لا توم و لا غيره و تنشف من كل حاجة

بس انا معاك في التوم

[شاعرالرومانسية]

ايوة يا شباب ..خلص الاعلان ورجعنلكوا بعد الفاصل ..وكالعادة وبكل سعادة ومن غير كتر كلام ولا حديت.. عشان محدش بس يقول فين وما فنشى

صنية السمك بالبطاطس (2)،،،،عشان مانتلخبطش بطريقة شيفنا العزيز بودا B)

نجيب عدد 3 بطاطس كبيرةونقطعة شرائه سميكة نوعا ما ( دة اول اختلاف معاكى يا اختنا سلوى :wub: )

ونصف كيلو جزر شرائح برضة وننقعهم قليلا فى الماء

نجيب راسين توم ( :) ) ونقطعم حتت صغيرة مش مفروم يعنى ومعاهم حزمة كرفس افرنجى مكعبات وقرنين فلفل احمر حامى ونتبلهم بالملح والفلفل ونعمل خلطة كدة محترمة ..واللى مش بيحب الحامى مالوش دعوة بالوصفة دى عشات دى لازم تتاكل كدة :excl:

وفى صنية كبيرة مستطيلة ( عشان حنحط السمكة سليمة وبالطول عشان خاطر عمنا سى السيد :P ) ونحط معلقتين زيت زيتون ( مش اى زيت تانى ) ونحط نصف كمية خلطة التوم بالكرفس بالفلفل الاحمر ونقلبهم فى زيت الزيتون على البارد وننشل البطاطس والجزر من المياة ونقلبهم بالخلطة دى لحد البطاطس ما تتغطى بالخلطة دى من جميع الجهات وبعدين نرصها فى الصنية جنب بعضها .

نجيب بقى سمكة كبيرة قد اتنين كيلوواساس الوصفة هو السمك القاروص لانه وزى ماقال بودا ه احلى نوع سمك ( وعشان محدش يتنفض ويقول حرام عليكوا دة اغلى نوع سمك حتخربوا بيوتنا.. انا جربت الطريقة بسمك تانى كبير برضة انما لذيذ جدا اسمه شعور وهو مش غالى ...صبرنى يا رب :D )

نخليها السمكة سليمة ونفتحها بالطول من عند الظهرونخلى السمكة من الشوك وسلسلة الظهر ( وممكن نطلب كدة من السماك واحنا بنشتريها ) ونحطها فوق فرشة البطاطس والجزر ونحط باقى الخلطة فوق السمكة ونفرشها عليها كويس ونقطع ترنشات ليمون وكمان تشكيلة فلفل رومى شرائح طولية الوان ( اخضر واحمر واصفر ... بيدى شكل يجنن على فكرة ويدى شوية رومانسية وخلافة ..واخدلى بالك يا سى السيد :D ) ونرشة ملعقتين زيت زيتون فى الاخر على الوش.. كدة ممكن تاكلوها نية ....من شكلها وريحة الكرفس مع زيت الزيتون والفلفل تجنن B)

ونحطها فى الفرن من تحت لحد ما نسمع صوت شكشكة الزيت ونرفعها فى الرف الاوسط لحد ما تستوى ..

على فكرة السمك مش بياخد سوا احنا بعد 20 دقيقة نطلعها ونشوف البطاطس بطرف الشوكة لو استوت خلاص

احيات ابوكوا محدش يتفلحص ويتفلسف ويقولى البطاطس حتستوى ازاى يا فالح من غير سائل ... انا جربتها مية مرة واخرها من يومين وبتستوى وزى الفل .. لان السمك بينزل السائل بتاعة وبتستوى فية البطاطس ودة اللى بيديها طعم حلو .. جربوها بس الاول

...انا قلت" محدش" اهو ماقلتش اسامى .. ماشى يا اللى بتكلو كرانشى B) ;)

[شاعرالرومانسية]

[

الاخ العزيز شاعرنا الرومانسي

انا سعيد جدا بمعرفتك و متشكر انك جنت سيرة ايدي الفرطة اللي ضيعت بيها فلوسي كلها على الكرانشي و الشبسي و ما شابه مش ناقص غير تخطف من العيال و هما بياكلوه

العيل من دول لو عرف يتلايم على كيس كرانشي يخش اودته و يقفل عليه و يحط الكومودينو وراء الباب عشان يعرف يكمل الكيس

انا عاجباني وصفاتك اللي بالتوم و اديها توم اد ما تقدر و سيبك من الاعداء قصدي الناس اللي مش عاجبها... يا عم من خاف سلم ...انا امشي قبل ما يبقى لا توم و لا غيره و تنشف من كل حاجة

بس انا معاك في التوم

<{POST_SNAPBACK}>

أنا اسعد والله يا باشا وربنا يخلى يارب وتجيبلهم الدنيا كلها ..

بالمناسبة وانت بتحكى على اللى بيعملوه ..كأنك بتحكى عن ندى ونور بالظبط

اه .. نور وندى دول اولادى على فكرة :excl:

اسيبك بقى وارجعلك بطبق يستاهل بقك :D

[شاعرالرومانسية]

الاخهت العزيزة اوشا ... الوصفة الجاية ( طاجن جمبرى بالسبيط ) دى مخصوص عشانك..قصدى عشان العزيز حسام ..اللى لو عملتيهاله حيقوللك اية لعب العيال اللى كنتى عملهونا دة ( حيقولها فى سرة طبعا ... B) )

ماعلينا

الوصفة دى اساسها التوم( :wub: ...انا اخدت تصريح خلاص من حسام باشا ) والفلفل الاحمر الحامى وزيت الزيتون

احنا نجيب تلت تربع كيلو جمبرى مقشر ونص كيلوسبيط ( كليمارى) مقطع شرايح ونحط ملعقتين زيت زيتون ومعاهم راس توم مقطع وفلفل احمر حامى ونشوحهم فى طاسة تيفال مع رشتين فلفل اسمر حلوين وملح ( وبالمناسبة دة اعلان مدفوع الاجر :excl: ) لحد ما ريحة التوم تطلع وتلم عليكوا الولايات كلها B)

وفى طاسة تانية ( تيفال برضة :) ) نحط ملعقتين زيت زيتون ونحط ملعقتين من الثوم المفرى وفلفلتين رومى اخضر مقطه مكعبات وبصلة مفرية وطماطماية مكعبات وملعقتين صلصة وبشر ليمونة كبيرة ( ونراعى الترتيب السابق ...) ونقلب شوية وبعدين نحط حزمتين كسبرة خضراء مفرية فى الاخر خالص

نجيب الطاجن المتين ونحط نصف التخديعة السابقة وبعدين نصب الجمبرى بالسبيط ونكمل على الوش بباقى الخلطة وندخله الفرن فترة مش كبيرة قد ربع ساعة لحد ما يتشرب ...

وابقى قابلينى لو الاستاذ حسام نسى الطعم دة والا الريحة دى :D

اى خدمة يا حسام بيه،،، انت تأمر بس B)

[Osha]

الأخوة الأفاضل رواد الموضوع ده

للعلم والاحاطة وعدم اتخاذ اللازم :D

الأستاذ حسام زوجي العزيز الشهير ب فينسر - محروم من العشا لمدة 3 ايام قابلة للتجديد بمنتهى السهولة تاني وذلك جزاءا وفاقا لما اقترفه من ذنب تجاه حرمه المصون - اللي هي أنا طبعا - وقال عليا اني باخلص فلوسه على الشيبسي وخلافه

محدش يتدخل ويحاول يترجاني اراجع نفسي في القرار ده حرصا على العلاقات الاجتماعية بيننا. :wub:

أما انت يا ابو ندي ونور خليك ماشي ورا حسام وحط توم كمان وكمان ولا يهمك!!! :excl:

والطاجن بتاعي احلى من بتاعك - ولعلمك حاجربه وحاخلي حسام صاحبك بنفسه يرد ويقول عليه ان طعمه وحش ... عاوز ايه بقى!!

بودااااا انت فييييييييييييين الحقني - اتلموا عليا :)

سي السيد انت مش قلت اللي يزعلكم حتموته - اهم زعلوني ...تعال خلص عليهم الجوز B)

[bodda]

ولا يهمك يا اوشا

مش انتى برضه اللى هاتخشى المطبخ وتعملى الكلام ده ؟؟؟

يعنى الدفه فى ايدك :excl:

وممكن بقى تتصرفى ومش هاشرح اكتر من كده

لكن قرار من غير عشا تلات ايام ده صعب شوية

طب نمشيها زبادى وبقسماط وكوباية شاى من غير سكر

والحلو كرانشى

:D :wub: :)

مساء الفل

B)

[Fencer]

الحبيب شاعر الرومانسية

المثل الشعبي المنقذ بيقول: ان كان حبيبك بيغرق اضرب بلانس و انزل وراه ,

و ان كان هايغرقك دوس على رقبته و غرقه

و انا باغرق يا حبيبي فسامحني تلات ايام ده انا اروح فيها ، معلش بقى انا قررت ان التوم ما يخشش عندنا البيت تاني يا باشا

و ان كان و لابد يبقي في تقلية الملوخية و ان كان هايضر بلاش من التقلية نهائي و صباحه عسل

[Fencer]

طب نمشيها زبادى وبقسماط وكوباية شاى من غير سكر

والحلو كرانشى

:excl: [/ALIGN]

<{POST_SNAPBACK}>

بودا

الحقني ، انا هاروح فيها، ايه اللي انا هببته ده ايه الحل

الحقني بوصفة صلح يكون قوامها الحلو المزوق بالكريمة او حتى بالكرانشي خلي الريح تعدي على خير و نهارك عسل

[شاعرالرومانسية]

الحبيب شاعر الرومانسية

المثل الشعبي المنقذ بيقول: ان كان حبيبك بيغرق اضرب بلانس و انزل وراه ,

و ان كان هايغرقك دوس على رقبته و غرقه

و انا باغرق يا حبيبي فسامحني تلات ايام ده انا اروح فيها ، معلش بقى انا قررت ان التوم ما يخشش عندنا البيت تاني يا باشا

و ان كان و لابد يبقي في تقلية الملوخية و ان كان هايضر بلاش من التقلية نهائي و صباحه عسل

<{POST_SNAPBACK}>

ياسلام ..هو التوم يعنى هو اللى حيوقع الناس فى بعضها ،،طب وعلى اية بلالالالالالالالاها توم .. وبلالالالالالالالالالاها سمك وبلالالالالالالالالالالالالالالاها طواجن

واهو الرجيم حلو برضة والزبادى مع البقسماط بيبقى يجنن

وبالمناسبة دى حقولكوا على وصفة هايلة للجسم والحيوية وتجديد النشاط ,,,, وكمان بتأخر ظهور التجاعيد ( طبعا كل الانسات والسيدات هنا حيجروا ويجيبوا قلم وورقة :excl: )

هى عبارة عن كوب زبادى بلدى + موزتين كبار محترمتين ونهرسهم + ملعقة كبيرة عسل ابيض خام ( مش مغشوش ) + رشة قرفة ناعة

ونخلط كله على بعضة وبالمعلقة كدة و.مستنى رأيكم

اه نسيت اهم حاجة فى الوصفة ....

انها تنفع فى ايام الحرمان من العشا :D ..لانها بتحسس بالشبع

وبالف هنا وشفا

[bodda]

هيه حرب التوم اشتغلت ؟؟؟

بلاش كده لان الراجل دايما خسران فى اى حرب نسائية

واسألواالمجرب

:excl: :D :wub:

صباح الفل

:)

[Osha]

طول عمري باقول عليك عاقل يا بودا

اديك جبت المفيد

خلينا في الأهم بقى

عاوزة البطاطس المحشوة باللحم المفروم بطريقة سهلة وبسيطة

ومن غير مكسرات لو سمحت

وياريت كمان طريقة بفيتك اللحمة اللي بيبقى جوه ورق العنب

وشكرا مقدما

[bodda]

العزيزه اوشا

ايوه كده نرجع للمطبخ وبلاش مناوشات

البطاطس المحشية

طبعا كل ما جبتى بطاطس صغيرة يبقى افض

ولو مافيش الا كبيره :excl:

يبقى نجيب الرفيعه بقدر الامكان وتقسم نصفين ويقور كل منهم

ولو صغيره تتقور عادى

المهم فى كل الحالات الشطارة فى تقليل سمك لحم البطاطس بعد التقوير

أما الحشو فهو عبارة عن عصاج عادى ( بصل ولحم وملح وفلفل)

وممكن يضاف له اشياء كتير :)

وبلاش المكسرات علشان اوشا

ممكن البرغل المنقوع ليله يتخلط مع الحشو

ممكن الرز البسمتى المنقوع برضه

و من الجميل اضافة قليل جدا من القرنفل للحشو :D

بعد كده نفرش ناتج حفر البطاطس فى الصينية

ونرص عليه البطاطس المحشية

ونصب الصلصة لغاية تلتين البطاطس

صلصة من مضروب الطماطم بالملح والفلفل

وعالفرن حوالى نص ساعه او لغاية السوى وتحمير الوش

بالف هنا

صباح الفل

:D

تم تعديل 31 مايو 2005 بواسطة bodda

[bodda]

بصراحه مافهمتش موضوع

البفتيك اللى جوه ورق العنب ده

:) :excl: :D

صباح الفل

[شاعرالرومانسية]

بصراحه مافهمتش موضوع

البفتيك اللى جوه ورق العنب ده

:)  :excl:  :D

صباح الفل

<{POST_SNAPBACK}>

اية ياشيف حد ما يعرفش "البفيتك اللى جوة ورق العنب".. برضة ؟ :o

لاء كدة زعلتنى منك خاااااالص... :happy:

شغل الجمجمة يا صاحبى :D

بس احيات والدك لما تعرف هو اية ،،ابقى قولى :D

وتسلم ايدك على احلى صنية بطاطس محشية ،،،وبالهنا وبالهعنا والشفا لاخونا فنسر ;)