اطلب اى وصفه على بالك .. تلاقيها قدامك

[Osha]

صباحه جميل يا بودا

شكرا يا باشا على أحى صينية بطاطس - والله انا كنت فاكراها باللحمة العصاج!! :D

الجهل نور برضه :)

أما عن البفتيك اللي جوه ورق العنب فهو - والكلام موجه كمان للي غاويين يصطادوا في المية العكرة بدون ذكر أسماء!! :excl:

امي ربنا يخليها كانت لما تيجي تعمل ورق العنب كانت بتحط بين الطبقات بتاعته شرائح بفتيك بتلو وكان طعمها جميل جداااا

مشكلتي اني مش عارفة كانت بتعمل ايه فيها في الأول - هل بتشوحها الأول أم بتسويها نصف سوا

بفتيك لحمة ياللي انت عارف نفسك - سمعت عن البفتيك اصلا!! :D

[bodda]

العزيزه اوشا

كده المحكمة اتنورت :D

اصل البفتيك ده شرائح اللحمه المتبله ومتحمره بالبقسماط

لكن بطريقة الوالده ممكن طبعا

بس هاتجيبى لحمه بتلو شرائح رقيقة

وتتبل بعصير البصل والملح والفلفل وتتشوح عالسريع

يعنى خمس دقايق فى طاسه واسعه بالزيت

وممكن بعد كده تترص بين طبقات ورق العنب

وبجد جديده عليه ... بس متخيلها هاتبقى حلوه

والمتداول هو ورق العنب بالكوارع :excl:

بنجيب الكوارع وتتخلى بعد السلق ونقطع لحمها صغير

وتتبادل مع محشى ورق العنب فى الحله

وتتسقى بشوربة الكوارع :)

ويتعصر عليها ليمون اول ما تنزل من على النار

وبتبقى تحفة

بالف هنا وشفا

:D

[Osha]

كوارع!!!!!!!!!

يااااااااااااااااع

الحقيقة ماقدرتش آكلها نهائي ولا بتعجبني ريحتها - حتى لو نظيفة بتبقى ريحتها تقييييييييييلة اوي :D

طيب جرب البفتيك ده على ضمانة أمي العزيزة جدا

:happy: عندي مشكلة في كفتة الرز

النهارده نزلت اجيب شبت وخلافه لزوم الكفتة - مالقيتش

وبعدين افتكرت اني لما كنت ف السعودية - الشبت كان بيختفي تماما من الأسواق في الصيف!!

وخايفة يحصل ده هنا كمان

الا لو حصل ممكن اطنش الشبت في الخلطة وامشيها بقدونس وكزبرة بس!!

والا لازم الشبت ضروري

والله اتصدمت جدا :excl:

كمان لقيت بطاطس قد كرة البنج بونج - لكنها مدورة جدا فخفت اجيبها وماعرفش افرغها!! مش عاوزة تريقة لو سمحت

اعتقد البطاطس يكون طويل شوية ويتقسم نصين افضل. :o

المهم اني بعد ما طلعت اللحمة المفرومة عشان الكفتة والبطاطس - طبعا الاتنين فشلوا - رحت معصجة اللحمة كلها وحاعمل مكرونة بشاميل وبولونيز وخلاص. :D

بمناسبة البولونيز : عاوزة بس أتأكد من الطريقة..ممكن :)

تم تعديل 1 يونيو 2005 بواسطة Osha

[bodda]

الكوارع .. يععععععع ؟؟؟؟؟؟؟؟؟

ماشى :o

اما وصفة ماما فى البفتيك فانا قلت لك شكلها حلو وهاجربها

اما موضوع الشبت فأشك انه يختفى فى امريكا

لان دى قارة فيها كل الاجواء يعنى اكيد موجود بس يمكن خلص ساعتها

:)

لكن برضه ماهواش اللوح المحفوظ .. يعنى ممكن طبعا من غيره

اما البطاطس المكورة الصغيرة فدى خاصة لاكلات تانية

وماتنفعش فى الحشو .. او هاتطلع عينك

:excl: :D :D

فمشيها انصاص احسن بس استصغرى برضه

وواضح ان الرساله جاتلى بعد ما عملتى المكرونة البولونيز

ففرصه توصفيها وبعدين نتكلم

صباح الفل

:happy:

[aynad]

للعزيزه ايناد الشوكلات موس

ودى وصفة من وصفات الامواس علشان سى السيد يحلق كويس

موس الشيكولاتة

ربع كيلو شيكولاتة خام و3 معالق كبيرة كاكاو

وتلات بيضات ( نفصل الصفار لوحده )

كوبايتين كريم شانتى وطبعا ممكن الجاهز

ونص كوباية لبن :D

ربع كوباية سكر بودره للتحلية وورق نعناع للتجميل

ندوب الشيكولاتة الخام على حمام ماء لغاية ما تدوب تمام :)

نقلب الشيكولاته لما حرارتها تهدأ شوية

ونضيف اللبن والكاكاو والسكر ونقلب بزمة :D

نضرب بياض البيض جدا لغاية ما يتماسك ونخلطه بالكريم شانتى

ونروح مقلبينهم مع الشيكولاتة باللبن تقليب يدوى بضمير :excl:

ونصبه فى اى كاسات او كوبايات ويجمل بالنعناع ويبرد

وبالف هنا وشفا

<{POST_SNAPBACK}>

اولا انا اسفة جدا جدا جدا علشان اتأخرت اصلي توهت اللينك الليعطتهولي رشروش ضاااااااااع و مفيش رسايل تنبيه بتجيلي من المنتدي علشان ادخل فأخدت اللينك تاني ن اوشا ربنا يكرمها يا رب

ثانيا الف الف الف شكر لبودا علي الشوكولات موس الرائعة دي

حعملها يا بودا بس لو جوزي حدفها في وشي حاجي امسك في زمارة رقبتك ههههههههههههه بس تسلم ايدك يا رب

ممكن بأة علشان الرزالة اعرف طريقة الاكلييير

ربنا يخليك يا رب يا بودا

تم تعديل 1 يونيو 2005 بواسطة aynad

[mnman]

طيب فين الكبدة الاسكندراني!!!

كل ما احاول اعملها مش ممكن تطلع زي كبدة المحلات في مصر!!

ياريت تدلوني علي الطريق والاجر والثواب علي الله!!

منمان محروم كبدة اسكندراني!!

تم تعديل 4 يونيو 2005 بواسطة mnman

[bodda]

العزيزه أيناد حمدالله عالسلامة

وانشاء الله تعجبكم حفاظا على زمارة رقبتى

ومعلش هانشوف طلب الصديق منمان علشان زبون جديد

واسكندرانى كمان ... وعشق اسكندريه له واجب

بس والنبى الاول يا منمان بلاش الاجر والصواب دى :rolleyes:

وخليها الثواب :rolleyes:

نيجى بقى لــ ........

الكبدة الاسكندرانى

نص كيلو كبده

وبصله كبيره شرايح رفيعه وفصين توم شرايح محترمين

وفلفل أخضر حامى شرايح رفيعه

وطاسه واسعه فيها نص كوباية صغيره زيت

الاول نشوح البصل لما يدبل خفيف ( 3 دقايق تقليب)

ونرمى الفلفل ووراه الكبده واضافة الملح والفلفل ومع التقليب

وهنا لو الطاسه ناشفه نزود الزيت شوية

ونقلب لغاية سوى الكبدة وتلاقى الريحه بتناديك

نكون محضرين شوية سلطة طحينة تقيلة ، وبقدونس مفرى

وممكن عيش شامى نفتحه وشين

ونرش شوية بقدونس وعليهم شوية طحينه وحبة خلطة كبده

ونلفه كويس وبالف هنا وشفا

مساء الفل

تم تعديل 1 يونيو 2005 بواسطة bodda

[aynad]

الكبدة الاسكندرانى

نص كيلو كبده

وبصله كبيره شرايح رفيعه

ايه دة يا بودة الكبدة الاسكندراني مش بيطحتلها بصل خالص :rolleyes:

انا اسكندرانية ابا عن ام :wub:

احنا بنعملوها زي ما انت قلت ماعدا البصل خالص

اسئلوني اناااا مشيطاها مرتيييين هههههههههههه :rolleyes:

تم تعديل 1 يونيو 2005 بواسطة aynad

[bodda]

العزيزه ايناد

والاعز لانك من اسكندريه

عارف انها بتتعمل بالتوم بس :rolleyes:

بس جربيها مع شرايح بصل وتوم

وهاتدعيلى :rolleyes:

[aynad]

حجربها يا بودا بس متأكد اني حدعيلك ههههههههه :rolleyes: :wub:

بهزر معاك اوعي تزعل :rolleyes:

[Osha]

اخيرا وصلت يا نودا

دا انا كنت حابعت العيال يدوروا عليكي ويقولوا عضوة تايهة يا ولاد الحلال !!

المهم انك وصلتي بالسلامة :D

الكبده الاسكندراني انا باعملها فعلا من غير بصل لكن بما ان الريس بودا قال كلمته يبقى لازم كلمتنا تنزل المرة دي!! :rolleyes:

بالنسبة للشبت يا بودا - فالمسألة عندي تندرج تحت بند الوسواس في الأكل - لو حاجة نقصت من المقادير بأفقد الرغبة في عمل الشئ أصلا!! ربنا يشفي :wub:

البطاطس المدورة بقى - انت اللي جبته لنفسك !!اعترف وقول اي ايه هي الاكلات التانية دي!

انت فاكر ان الكلمة حتعدي كده من غير ضريبة!! لاااااااااا انت بتحلم :rolleyes:

[Osha]

لا تكون بتحلم!!

تم تعديل 1 يونيو 2005 بواسطة Osha

[Salwa]

مساء الخير ..

بيتهيألى بقى مفروض دلوقت نقول لكم طريقة الكبدة الاسكندرانى الاصلية..

- شرائح كبدة مقطعة رفيع ..ثم تقطبع الشرائح بالعرض شرائح رفيعة ايضا .وللسهولة ممكن تقطيعها بمقص المطبخ او بسكين مسنون جيدا .

- كمون وعصير ليمون وملح وفلفل اسود .

- ثوم مفروم ...فلفل اخضر حامى ( قبارى مش يهودى ...الاسكندرانية حايفهمونى ..لأن الفلفل اليهودى حامى جدا جدا ومؤذى فعلا ) مقطع شرائح رفيعة ...بفدونس حسب الرغبة ( مقطع او مفروم فرم كبير )...

- نخلط الكبدة بالثوم المدقوق والملح والفلفل الاسود ونضع عليها عصير الليمون ونتركها بعض الوقت ..حوالى عشر دقائق مثلا ..

- نضع زيت حسب رغبة كل واحد ....يعنى فيه ناس تفضل زيت الزيتون وناس تانية تفضل زيت الذرة ..

- عندما يبدأ الزيت يسخن قليلا بدون ان يقدح تماما نضع الكبدة ونقلبها جيدا وعندما تبدأ تستوى نضع البقدونس والفلفل الأخضر ونقلبها كذا مرة ....

نهدى النار خمس دقائق ..

وبالهنا والشفاء ....

[محمد شلبى]

:rolleyes: :rolleyes: :wub: :D ;)

لاااااااااااااااااااحرام عليكم .

ايه اللى بتعملوه ده يا جدعان,بالراحة شوية احنا مش قد الكلام ده.

بس بجد التوبك ده هايل والواحد كده شكله هيتعلم منه كتير قوى وبلاها طب,ماله الشيف محمد شلبى :P ؟ واهو الواحد يبقى لقى حل اخيرا لموضوع المشروع(بس مش عربية كبده ,سامعنى يا سى السيد؟)

نبتدى الاسئلة؟

السؤال الاول:بما ان الساعة داخلة على واحد بالليل واخوكم هيموت من الجوع حد يقولى على طريقة عمل البيض المقلى ويا حبذا لو بالبسطرمة؟

السؤال الثانى

ليه دايما المايونيز بيبوظ منى ومش بيربط؟

السؤال الثالث

طريق عما الخروف المحشى بط المحشية فراخ المحشية سمان المحشى مكسرات؟

كفاية كده النهارده.

تصبحوا على خير.

[شاعرالرومانسية]

اية دة انتوا بتتكلموا على الكبدة الاسكندرانى ...

شوفوا الصدف السعيدة ..انا لسه متغدى منها ..بس اية بقى معاها سجق شرقى تمام ..بيبقى جميل مع سندوتشات الكبدة ..

بصوا ياشباتب انا بعمل الاتنين مع بعض فى اكلة واحدة وتبقى ليلة :wub:

السجق الشرقى

نجيب نص كيلو سجق بلدى من عند الجزار ونقطعة مكعبات ونكون مجهزين معاه طماطتين كبار متقطعين مكعبات وكذلك فلفتين رومى على واحد احمر حامى وكله مكعبات

نجيب اربع فصوص ثوم مقطع صغير ونحطه فى شوية زيت ونشوحهم شوية وبعدين نضيف الفلفل الاحمر وبعدية الرومى وشوية ونضيف السجق ونقلب شوية لحد ما لونة يغير وبعدية مكعبات الطماطم والتوابل ( ملح وكمون وفلفل اسمر ) ونقلب على نار هادية عشان ما ينشفش وما نطرش نضيف مية..بس لو حسينا انه عاوز مية ممكن نضيف شوية صغننة جدا

ممكن للى بيحب البصل اكتر من الثوم ( دة مش تراجع عن مبدأى ولكنة ارضاء لجميع الازواق ليس للا ... :rolleyes: ) يحط بصلة مقطعة مع فصين ثوم ..

كذلك ممكن نضيف ملعقة صلصة لو حنضيف مياة

وبنفس طرقة العزيز بوددا فى عمل السندوتشات بالطحينة ( طبعا عارفين تعملوها ازاى :D )

واديها المشطشط :rolleyes:

[bodda]

العزيزه ايناد

العزيزه سلوى

يا عالم انا قلت الكبده الاسكندرانى تقبل الاتنين

يعنى ممكن توم لوحده وممكن معاها شريحتين بصل

وشكرا سلوى لوصفها طريقة التقطيع لانى نسيت اكتبها

:D

والاكل يحب التغيير

وانا عن نفسى نادرا ما طبخ مره زى التانيه

احب دايما اغير صنف توابل او اضافة شئ منعا للزهق

فجربوا ومش هاتخسروا غير اتنين كيلو كبده

:rolleyes: :wub: :rolleyes:

تم تعديل 2 يونيو 2005 بواسطة bodda

[bodda]

العزيز محمد شلبى

منور المطبخ وما حوله يا دكتور

ولو حطيت فى دماغك موضوع عربية الكبده هاتلاقيها أكسب

:rolleyes: :wub: :D

بجد سعيد بوجودك رغم السؤال عن البيض المقلى

:rolleyes:

أما موضوع المايونيز فاهكتبهولك بس افضى خمس دقايق

وكمان البط المحشى بصدور الحمام ....

صباح الفل

;)

[محمد شلبى]

شكرا يا بودا واهلا وسهلا بيك معانا فى محاورات المصريين :rolleyes:

بالنسبة للبيض المقلى ما تاخدش فى بالك دى كانت تخاريف ما قبل النوم :rolleyes:

لكن اللى فعلا عايزه منك طريقة عمل العيش الفينو فى البيت .

[bodda]

العزيز محمد شلبى

ياباشا ولا يهمك واحلى صباح

العيش الفينو

3 كوبايات دقيق أبيض محترم

كوباية حليب دافى :rolleyes:

ربع كوباية سكر ومعلقة شاى خميره جافة

معلقة شاى من البيكنج باودر و زيها ملح

3 معالق كبيرة زيت

نحط اللبن عالسكر عالخميره ونسيبه ربع ساعه

وبعدين نخلط نص الدقيق بالملح والبيكنج باودر كويس اوى

نخلط مخلوط اللبن مع الدقيق مع الزيت فى العجانه

على الاقل عشر دقايق ونوقف العجانه ونضيف باقى الدقيق مع العجن

لغاية مايسيب الايدين ويبقى زى القطن :rolleyes:

نسيبه متغطى بحتة قماش نص ساعة فى مكان دافى

بعد كده نقطع العجينة صوابع بنصف الحجم النهائى المطلوب

على سطح مرشوش دقيق

ونغطيها تانى ونسيبها فى مكان دافى ساعة :wub:

بعد كده ندخلها فرن حامى (350 درجة ) حوالى 7-10 دقايق

وبالهنا والشفا

:D

تم تعديل 2 يونيو 2005 بواسطة bodda

[bodda]

العزيزه أوشا

البطاطس المكورة وصغننه اسمها

Baby potatos

ودى أحلى استعمال ليها انك تسلقيها

وبعد كده تتقشر وتتحمر فى زيت عميق وبعد ما تخرج تسيبيها تبرد

ولما تحبى تاكليها تتشوح فى معلقتين زبده وتترش ملح وفلفل

وتكونى مجهزة نص كوباية زيت وزيها عصير ليمون مضروبين بالمضرب جامد

وده الصوص اللى هايستعمل معاها فى الاكل

بالهنا والشفا

:rolleyes:

تم تعديل 2 يونيو 2005 بواسطة bodda