اطلب اى وصفه على بالك .. تلاقيها قدامك

[se_ Elsyed]

-  ..لأن الفلفل اليهودى حامى جدا جدا ومؤذى فعلا

<{POST_SNAPBACK}>

ربنا يحرقهم بجاز ... حتى في الفلفل مؤذيين ...

ده إيه ده ؟!!!

[se_ Elsyed]

قرار جمهوري رقم 415 تقسم ش

" بسم الله الرحمن الرحيم

بهذا قرننا نحن س س ملك شارع مصر والسودان ( على فكرة القصر بتاعي جنب محلات مصر والسودان بتاعت السجق ) قررنا التنازل عن هذا التوبيك بيع وشراء ومتوثق في الشعر العأري لصالح السيد بودا محمد بودا ومساعده شيف الأكلات المفترية السيد / شاعر الرومانسية ، وذلك مقابل وجبات مُدعمه وبسعر التكلفة لجميع أعضاء المحاورات .

رُفعت الجلسة ...

"

[bodda]

طب بس قولى يا سى السيد

هوه فين الشهر العآرى ده ويروحوله منين

المهم فيها مسئولية ؟؟؟؟

:) :lol: :lol:

مساء الفل

:wub:

[شاعرالرومانسية]

يا اخ سى السيد بيع اية وشرا اية .. ولا انا ولا بودا حيليتنا ابيض ولا اسود

من الاخر يعنى ..مدعومة زى دعم الحكومة،، :lol: والا مدعومة بحق وحقيقى :)

عموما ..احنا فى خدمة جميع اعضاء المحاورات ..بس أأمروا :lol:

[Reham]

العزيز بودا

السلام عليكم ورحمة الله وبركاته،،

الف شكر علي الوصفات الهايله دي ......حقيقي تفتح النفس مع اني عامله ريجيم ومقرطاها علي نفسي اوي

المهم يا شيفي العزيز انا عايزه اكله ماتاكلتش قبل كده اصل انا زهقت فعلا من كل انواع الاكل .....اصلي عايزه اغير للراجل والعيال ،،،،،،،

كمان زهقنا من الاكل من بره ..... مستنيه منك اكله محصلتش وهدعيلك والله اختك ريهام :)

[Osha]

ما شاء الله

ما شاء الله

حضراتكم بتبيعوا لبعض وانا خارج الصورة!!!

فيها لاخفيها وانتم عارفين اني شرانية واعملها :lol: :lol:

بودا شكراعلىالبطاطس الصغيرة

لو مافيهاش غلاسة

انت نسيت صوص البولونيز

اوع تفتكر اني حاقول انا باعملها ازاي عشان اسمع تريقة للركب من ناس اشرار :wub:

الأخت سلوى

شكرا على الكبده الاسكندراني

بس انا مافهمتش برض الفرق بين الفلفل بتاع اخوانا البعدا والفلفل التاني :)

وانامتضامنة معاكي كليا وجزئيا في عدم وضع التوم علىالكبده

السجق البلدي بقىياشاعر الرومانسية العزيز مش كده وبلاش لو سمحت فتاوي :wub:

لما ارجع من الصلاة حاحطلك طريقته اللي امي بتعملها وهي جميلة جدا

ريهام

اخيرا وصلت هنا - انا كنت خايفة اروح اجيبك من قاعة السياسة وانت رايحة تسألي تاكلو ايه بكره :lol:

والله خالد والعيال مساكين معاك

يالا ربنا يعينهم علىما بلاهم

[شاعرالرومانسية]

الاخت ريهام،،،

حمدا الله على السلامة واهلا بيكى فى مطبخنا الغير تقليدى ..ان شاء الله :wub:

يا استاذتنا اوشا

انتى لازم يعنى تنتقدى عمال على بطال ومن غير ماتجربى كمان

احيات ابوكى فية كبدة تتعمل من غير توم ... :)

وطبعا حتعملى السجق كمان من غيرة ..

أأقوللك اية رايك تعملى ملوخية من غير توم هى كمان :lol:

بس دى بقى تحطيها للعضو الجديد فى اسرتكوا السعيدة ..بدل اللبن يعنى ( وتحضريلة شربة بعدها .... :lol: )

اسيبكوا بقى واروح اشوب بوددا غطسان فين وسايبنى كدة مع الناس اللى مابتكلشى كرانشى دى......... :lol:

[Reham]

شكرا يا شاعرنا يا كبير اوي اوي علي الترحيب المسبك ده..... مع اني مش بحب عمايل الاكل....اسال اوشا عني هتقولك انا تخصص ايه...........

بس انا متاكده اني هلاقي معاكم حاجات جديده ماعرفهاش....

واهو برده نتبادل خبرات ..........

ده انا عندي وصفة كنافه بالمهلبيه اوعي وشك تلوح وتدوخ.....ياسلاااااااام

ولا البسكوتنج اللي كنت بعمله قبل ماعمل الريجيم اسالوا اوشا عليه كنت بعملهولها مخصوصى والله .هي صينيه وانا صينيه ونقعد ناكل باه ونطنش اجوازاتنا والعيال ..ياسلاااااااااام ياولاد......الله يخرب بيت كل الريجيمات اللي في الدنيا ........مع اني يا جماعه مش تخينه ولا حاجه لحسن تكونوا افتكرتوا اني هفرقع من التخن......لا انابلعب في اتنيت تلاته كيلو طالع نازل مجنني والنبي ومن نبي النبي نبي الله يخليكم حد يقولي علي ريجيم يدخل فيه الشيكولاته لانني مدمنة شيكولاته

وشكرا ليس له حدود للي رحب بيه وشكرا برده للي مارحبش وجزاكم اله خيرا وجعله في ميزان حسناتكم

اختكم في الله ريهام

[Osha]

يابني لكل جواد كبوة !!

يعني انا كان قصدي مافيش بصل في الكبده واللي عاوز يفهم صح حيفهم - واللي عاوز يتلكك بقى ....هو عارف نفسه بيعمل ايه

وبعدين اذا كنت بتتكلم عن العضو الجديد في العائلة فاحب اقولك انه بياكل اكل جاهز مش اكل البيت

انت فاكر تربية القطط دي لعبة ...انت بتحلم

اسأل ريهام عن قططي وبياكلوا ايه وهي حتقولك

ريهام العزيزة

بلاش سيرة البسكوتنج عشان انا باحاول اعمل ريجيم - وكمان كنافة بالمهلبية !!! وانتعارفة ان حسام مالوش في المهلبية ..انتحرة اتفاهمي معاه براحتك.

وبعدين لا تعتمدي على وصفات شاعر الرومانسية!!دا معرفة قديمة وبيحب يفت في الأكل.

بودااااااااااااااااا

انت فين ???

سايب الصبي بتاعك بيتريق علينا وياريته بيقول حاجة عدلة ...الا وصفات ما يعلم بيها الا ربنا

[شاعرالرومانسية]

يا بنتى جواد اية ..وكبوة اية بس

انتى قلتى بالحرف الواحد المسجل والمعتمد والمدون وزالمعشمع بالشمع الاحمر وبجميع الالوان -_-

"الأخت سلوى

شكرا على الكبده الاسكندراني

بس انا مافهمتش برض الفرق بين الفلفل بتاع اخوانا البعدا والفلفل التاني

وانامتضامنة معاكي كليا وجزئيا في عدم وضع التوم علىالكبده "

مع ان الاخت سلوى قالت توم ..ومفروم كمااااااان :D

وترجعى تقولى انا اللى بفتى فى الاكل :D

طب بالعند فيكى بقى انا حوصف لريهام اكلات رجيم تحببها فى الرجيم كمان

" اصلى كنت بعمل رجيم من شهر كدة وحولت على المطبخ الصينى :D "

بصى يا ست ريهام .. اهم حاجة فى الرجيم تعملى طعم كدة وريحة وشكل يحببك فى الاكل اللى ممكن تكونى مش واخدة علية ..

عشان كدة مهم قوى تهتمى بالمكونات ...وخدى شوية النصائح دى للتغلب على متاعب الرجيم والوصول لنتائج مرضية ( من الرضا ..مش من المرض لحسن حد يفهم غلط :blink: )

* حضري قائمة بالمشتريات قبل البدء بالريجيم حتى يكون لديك كل الاغذية المطلوبة.

* اذا شعرت بالجوع بين وجبات الطعام ، تناولي خضار خضراء بقدر رغبتك( طماطم ، خيار، فلفل ،خس، كرنب وغيرها...)..وفية وصفة جميلة قوى لحرق الدهون مصنوعة من شوربة الخضار والكرنب حبقى اقولهالكوا بعدين

* من المهم شرب 8 أكواب ماء على الاقل يومياً. كذلك بامكانك شرب مشروبات الدايت أو الشاي او القهوة، لكن التقليل من الكافيين محبذ، ممنوع اضافة السكر لكن يمكن استعمال بدائل السكر الاصطناعية اذا رغبتِ وقليل من الحليب بدون دسم.

* عند طهي اللحوم والخضار، استعملي البهارات والتوابل والثوم والبقدونس والنعنع وعصير الحامض والخردل والخل بحسب رغبتك ودون تحديد ، ممنوع القلي!!

* اختاري وجبات متنوعة يومياً ، تتضمن كل الاغذية المطلوبة (نشويات، بروتين، خضار، فواكه وغيرها). لا تأكلي أكثر من بيضه واحدة يومياً (3-4 مرات اسبوعياً) ، واهتمي بشرب الحليب او تناول الالبان يومياً...

كذلك يفضل تناول السمك المشوي بدل اللحوم .

* بامكانك استعمال ملعقة كبيرة واحدة من زيت الزيتون يومياً.

* حاولي ان تكون وجبتك قريبة من وجبة أهل البيت، فإذا اعددت اليخنى او المشاوي لهم، اختاري وجبة مشابهة لك ولكن حضريها بدون قلي وبدون دهن.

* بإمكانك تناول اي نوع من الخضار (عند اختيار الشوربة او الخضار المطبوخة او المشوية او السلطة) ما عدا البازيلا ، البطاطا ، والذرة. لانها تحتوي على نسبة عالية من النشويات

* حاولي ان لا تؤخري وجبة العشاء اكثر من الساعة 7 مساءاً.

اذا جعت قبل النوم تناولي بعض الخضار الخضراء مع كوب حليب بدون دسم.

* واخيراً، تذكري ان الريجيم قد يبدو سهلاً عند قراءته, ولكن الالتزام به سيكون صعباً ومتعباً. حاولي ان تقنعي صديقة او جارة او قريبة بالبدء بالريجيم معك ( بس بلاش اللى بالى بالك ..لحسن دى عندها افكار ممكن تودى فى داهية :) )

والى مزيد من اكلات الصحة والرجيم ..نلتقى بعد الفاصل ;)

تم تعديل 3 يونيو 2005 بواسطة شاعرالرومانسية

[شاعرالرومانسية]

شوربه الخضار والكرنب ( لحرق الدهون )

المقادير :

- 6 بصل اخضر ( إذا لم يتواجد فيمكن استخدام البصل العادي )

- 2 فلفل أخضر

- علبه أو علبتين من معجون الطماطم

- حزمة كرفس أو بقدونس أو كزبره

- حبه كبيره من الكرنب

- عبوة مرقة دجاج

- الملح و الفلفل و البهارات حسب الرغبة

الطريقة :

- يتم تقطيع الخضراوات إلى قطع و يتم وضعها على النار بعد ان يضاف اليها الماء حتى يغطيها ثم يضاف إلى المقدار كيس من المرقة و البهارات و الملح حسب الرغبة .

- تغلى الشوربه لمدة 10 دقائق على نار عاليه ثم تخفض الحراره إلى نار هادئة حتى تصبح الخضراوات طريه.

يمكن أكل هذا المزيج في أية لحظه تشعر بها في الجوع خلال فترة الرجيم

هذه الشوربه لا تضيف سعرات كلما تشربون أكثر تفقدون أكثر ، وإذا شربت الشوربه بدون أي شيء قد يؤدي إلى سوء التغذيه لذا لا ينصح بذلك ، يجب أن تكون هناك أشياء أخرى مع الشوربه.

دى طبعا وصفة متجربة وللأمانة المطبخية مش من تأليفى طبعا

بس متجربة ومتعلم عليها :blink:

تم تعديل 4 يونيو 2005 بواسطة شاعرالرومانسية

[شاعرالرومانسية]

وادى كمان وصفة تمام لصدور فراخ مشوية بالاعشاب الشهية :blink:

المقادير

2 ملعقة طعام بقدونس، مفروم

2 ملعقة صغيرة اكليل الجبل طازج، مفروم

2 ملعقة صغيرة زعتر أخضر ورق طازج، مفروم

1 ملعقة صغيرة ميرامية ناشفة

3 فصوص ثوم، مفروم

1/4 كوب زيت زيتون

1/4 كوب خل

ملح وفلفل أسود بحسب الرغبة

3/4 الكيلو صدور فراخ منزوعة الجلد

خدى بالك ان من الاعشاب المنصوح بيها للرجيم ( اكليل الجبل ..الميرامية ..والبقدونس )

نجيب المقادير السابقة فيما عدا الفراخ ونخلطها مع بعضيها فى الخلاط "البقدونس، اكليل الجبل، الزعتر، الميرامية، الثوم، زيت الزيتون، الخل والملح والفلفل الأسود "

.نحط الفراخ المخليو في صحن زجاج (بايركس مثلا) ونضيف اليه الخليط السابق. ونغطى الصحن ويترك لينقع في الثلاجة من ساعتين وحتى 48 ساعة حسب الرغبة.

نسوى الفراخ تحت الشواية بعد التخلص من السائل الذي نقعنا فيه الدجاج لمدة 10 دقائق لكل جهة أو حتى يستوي، أونغطيها بورق فويل ونسويه في فرن حرارته متوسطة في الطبقة الوسطى من الفرن لمدة 40 دقيقة ..

وعلى فرشة بقدونس ومع ترنشات طماطم وجنبها طبق خضار سوتية مع طبق شوربة من اللى قلناها قبل كدة ....ودوسى ولا يهمك :D

[Osha]

لا مؤاخذة مين اكليل الجبل ده!!!

انجليزي دا يا مرسي!!

طيب بذمتك انت عارف ايه اكليل الجبل ده?

ريهام اوعي تسمعي كلامه بلا رجيم بلا اكليل الجبل - انت كويسة ومش محتاجة حاجة من دي خالص

خليكي في الوصفات المجربة

آل اكيل الجبل آل

وبعدين وصفة شوربة الخضار بالكرنب

نحط معجون الطماطم امتى

والا احنا جايبينه بركه بس معانا

يا بودا حتسيبنا كده لغاية امتى الصبيان يجربوا فينا

تم تعديل 4 يونيو 2005 بواسطة Osha

[aynad]

:blink: :D انا عايزة اتعارك مع بودا فيييييين يا بوداطريقة الاكليييير حلقتلي لييييه يا عم :D :D

[Fencer]

احبائي كل مرتادي المطبخ

عدت بعد الحبس الانفرادي و الحرمان من العشاء :D اللي اتحكم عليا بيه من حرمنا المصون :blink: و نور العيون ;) و أحد اسرار الكون -_- الست اوشا و ليها بدل السلام مليون!!!

يعني اغيب شوية ارجع الاقي الدنيا تضرب تقلب و اعضاء جدد و منهم الست ريهام :P صديقة اوشا المدام و ليها مني احلى سلام و خالد جوزها الهمام :D يسجل في المنتدى النهارده قبل ما ينام و الا مصيره يكون الموت الزؤام :D ، لا بلاش حرام!! :)

مرحبا بريهام و انا شايف وصفات موصوفة لريهام و احب اقول لكل الناس انها طباخة محترمة انا دقت اكلها بنفسي و اشهد لها بالحرفنة و احلى حاجة بتعملها ورق العنب الجميل اللي كان بيخلص قبل ما ينزل الترابيزة :D

انا كنت مشغول شوية و قدامي يومين فاضي عايز اشوف فيهم وصفات و اكلات و حركات عشان في عندنا عزومات في الويك اندات :D

تم تعديل 4 يونيو 2005 بواسطة Fencer

[bodda]

العزيزه أيناد

معلش والله كنت مسافر ولسه جاى بالليل

وادى احلى طريقة للاكلير يا رب تعجبك

الأكلير

كوباية دقيق ونص كوباية زبدة وشوية ميه

معلقة سكر وأربع بيضات وذرة ملح و فانيليا

نحط الزبده مع الميه عالنار لغاية الغليان ودوبان الزبده

ننزله من عالنار ونحط الدقيق ونقلب فى اتجاه واحد بمعلقة خشب

نرجعه على نار هاديه مع استمرار التقليب

لغاية ما العجينه تسيب قاع الحله وننزلها تهدأ

نحط السكر والبيض واحده واحده مع التقليب الشديد

هاتلاقى العجينة بقت ناعمه وجميله :D

نشكل العجينه بقمع مشرشر واسع على شكل صوابع 10 سم

فى صينية مدهونه و تدخل الفرن هاتلاقيها نفشت وانتفخت

لغاية اللون الذهبى ونخرجها تتشق بسكين حامى ونشيل اللباب

ونحشيها بالكريمه دى : :blink:

كوباية سكر وتلات معالق كبيره دقيق وبيضه ومعلقة زبده

وفانيليا ومعلقتين كاكاو

يخلط نصف كوب لبن بارد مع البيضة والسكر والكاكاو والدقيق

ويقلب المقدار حتي يتجانس ويتآنس :D

يسخن باقي اللبن ويرفع الخليط السابق علي النار ويقلب ويضاف اللبن ساخناً مع الاستمرار في التقليب حتي يغلظ القوام

ننزله من عالنار ونحط الزبده ونقلبه ونسيبه للحشو

وممكن طبعا نزوق وش الاكلير بالشيكولاتة الخام المتسيحه :D

وتبرد بالتلاجه ساعه وبالف هنا وشفا

صباح الفل

[bodda]

العزيز شاعرنا الجميل

هايله وصفات تسييح الدهن والشحم دى

:D :D :D

بس ما قلتش ؟؟؟ مش اسهل 3 ساعات عالنار وخلاص ؟؟؟

-_- :blink: :)

العزيزه أوشا

بالراحة عالراجل شويه

ده مموت نفسه علشان يخسسكم وتخشوا مسابقة الجمال الجايه

;) :D :P

العزيز فنسر

الف مبروك فك الحصار وعودة المأكولات الشهية

وايه حكاية المهلبية دى ؟؟؟

:D

صباح الفل

[bodda]

العزيزه ريهام

منوره المكان وما حوله وضواحيه

وليكى وصفة شديدة هايشكرك عليها الراجل والعيال

بطة محشية مفترية

تجيبى دكر بط محترم ( 4-5 كيلو )

ويتنضف طبعا ونشيل الرقبه

نحضر الحشو بمبشور نص كيلو بصل

وندعكه بالملح والفلفل الأسود ومبشور جوزة الطيب

وكوباية رز مغسول ومنقوع ساعتين فى الميه

ونقطع الكبده والقونصه والكلاوى حتت صغيره :blink:

نخلط كله مع بعضه ونحشى البطه بحيث ان الحشو يملا نص الفراغ

نخيط حجر البطه بغرزتين خيط بس :D

بحيث يكون فيه فتحات واضحه لدخول ماء السلق

ونغز جنبين البطه بالسكين لتسهيل تبادل السائل مع الفراغ

نغلى ميه فيها ملح وفلفل ومبشور جوزة الطيب

ونسقط فيها البطه المحشية بحيث الماء يغطيها

ونسيبها حتى السوى التام أو الموت الزؤام :D

نشيل البطايه تهدا شويه ونحطها فى صينيه الفرن

ونحدفها عالفرن تتحمر مع دهان صدرها كل شويه بدسم الشوربه

وتطلع من الفرن مه حلة ملوخيه أو اى خضار تحبوه

وماتنسوش الرز بالشعريه اللى يجنن معاها

وصباح الفل

:D

تم تعديل 4 يونيو 2005 بواسطة bodda

[aynad]

اولا الف الف الف حمدلله علي سلامتك يا بودا :blink: :D

ثانيا الف الف الف مليوم ميرسي علي الاكلير دي سهلة اوي حجربها وحبقي اقولك علي العك اللي عكيتوا :D

[شاعرالرومانسية]

لا مؤاخذة مين اكليل الجبل ده!!!

انجليزي دا يا مرسي!!

طيب بذمتك انت عارف ايه اكليل الجبل ده?

ريهام اوعي تسمعي كلامه بلا رجيم بلا اكليل الجبل - انت كويسة ومش محتاجة حاجة من دي خالص

خليكي في الوصفات المجربة

آل اكيل الجبل آل

<{POST_SNAPBACK}>

والله يا ستى مش ذنبى انك ماتعرفيش اكليل الجبل اللى موجود فى السوبرماركت زى الزعتر الاخضر والبردقوش والميرامية ( اللى مسالتيش عنها وكانك تعرفيها ..وتلاقيكى برضة ماخبرهاش :D ) وزى رجل الاسد ..عوووووووووووووو اللى عند العطار

وكل الحاجات دى من اهم الوصفات للرجيم يا ستنا الحاجة

وعلى فكرة لو كنتى بتكلى كرانشى ..(قصدى مهتمية بالحاجات دى ...) كنتى تعرفية وهو بيطلق علية بالبلدى "حصى البان" :D

وبعدين وصفة شوربة الخضار بالكرنب

نحط معجون الطماطم امتى

والا احنا جايبينه بركه بس معانا

<{POST_SNAPBACK}>

ماهو لو الواحد مش قاعد للسقطة واللقطة ، كان حيفهم من المضمون ان المحتويات كلها بتتحط على بعضها وتتساب على النار ..وبعدين بالسنس كدة يا استاذتنا الفاضلة معجون الطماطم دة واضح جدا انه مش شىء اساسى فى الطريقة ويمكن الاستغناء عنه حسب الرغبة ..(فى ناس مثلا مابتحبش مزازة الطماطم فى الشوربة )

......الله يكون فى عونك ياللى فى بالى.... :blink: (ماتردش ياعم بدل ما تدخل فى فترة حرمان تانى -_-

يا بودا حتسيبنا كده لغاية امتى الصبيان يجربوا فينا

<{POST_SNAPBACK}>

مش حرد على ديه....

الله يسمحك :D