اطلب اى وصفه على بالك .. تلاقيها قدامك

[bodda]

عارف دى طبعا يا ايناد

بس خارج مصر او بالذات فى امريكا

لا تجدى الكرنب الاملس بتاعنا

بيكون مكور ومكرمش جدا ولازم تشيليها بالراحه

واحده واحده بس طبعا بعد تقوير الجذع منها

شاطرة أيناد

مساء الفل

:wub:

[Reham]

[حلو اوي محشي الكرنب العزابي ده يا عم بودا بيه

وطبعا كل العزاب والمتجوزين اللي مداماتهم مش بتحب تعمله(زيي مثلا) هيسمعوا كلامك

طيب انا لما اجيب الكرنبه واقطعها واسلقها واعمل كمان الخلطه العجيبه يبقي مش فاضل غير عملية الحشو .....ودي بقي انا بعتبرها اسهل عمليه في اعداد الكرنب ده حتي حشو الكرنب اسهل كتير من ورق العنب

بالمناسبه جوزي الغلبان مره جاب لي كرنبه عشان اعملهاله اصله بيحب المحاشي اوي ومين مابيحبش المحشي

وكل يوم يسالني عليها وانا اطمنه انها لسه موجوده

ومره واحده راح ماسكها وراميها من الشباك وقال مش عايز.......

لكن بعمل طبعا بس في العزايم ورمضان

ويجعله عــــــــــــــــــــــامر

بعد اذنك عايزه مقادير وطريقة الكبيبه الشامي

اصلي حاولت معاها كتير اوي ومش راضيه تيجي معايا الظاهر مش عاجباها

وجزاكــــــــــــم الله خــــــــــــــــــــــــيرا

[Osha]

ها ها ها :wub:

ضحكتيني يا ريهام اصلي متخيلة شكل خالد بعد ما يئس من الكرنبة وبيرميها :wub:

عامة قلنا ميت مرة الله يكون في عونه :wub:

بودا

محشي الكرنب العزابنجي بتاعك ده شكله لطيف جدا وعندك حق الكرنب هنا فعلا بيهدر جامد جدا - اصل الكرنباية صغننة اوي يادوب اكبر سنة من الخس الكابوتشي - وطلعت روحي على ما عرفت اطلع منها حاجة

أنا حأعملها - بس انت ذكرت كزبرة خضراء في الحشو - بصراحة ان اطول عمري اسمع عن الشبت والبقدونس بس

ياترى نحطها بنفس كمية باقي الخضرة والايادوب عودين بس

[Osha]

ااه ..مش عارف فية حد كدة كان دايما يطلع زى فرقع لوز ويقول توم اية واكليل جبل اية ,,و ...و ...و

اكيد دلوقتى حيطلع ويقول ..خميرة اية اللى فى العجة دى ... :D

مش عارف بقاله فترة مش بيعلق يعنى لية ...

ماعلينا ،،، ماعلينا

ربنا يجعل كلامنا خفيف عليهم :wub:

<{POST_SNAPBACK}>

آه صحيح

خميرة ايه اللي في العجة دي!!!!!!!!!! :D

ما قلنا بلاش فتي في الأكل يابني :P

وبعدين هو فرقع لوز لسه ماجاش ليه .... :wub:

خير يعني يكونش عيان :wub:

والا تكونش تقصدني انا :D :D

عامة ليك عربية كبده ارد عليك فيها :wub:

[bodda]

العزيزه ريهام

بزمتك سلق ورق الكرنب مشكلة؟؟؟

وبزمتك لخبطة شوية رز على بصله وخضره مشكلة ؟؟؟

المشكله والاستاذية طبعا فى اللف

ما هو فيه ناس تعمل محشى كرنب والصباع قد الدراع

:lol: :lol: :lol:

يبقى بزمتك ايه السهل وايه الصعب؟؟

توكلى على الله واعملى المحشى العزابانجى

بس المره دى انا مش مسئول هايرمى ايه من الشباك

:lol:

و جاهز يا ريهام الكبيبة

الكُبيبة

نقول نص كيلو لحم مفروم وش واحد

وحوالى كوباية رز مغسول ومنقوع نص ساعه

بعد كده تطحن الرز فى الكبه او المطحنه أو تدقه

المهم مايبقاش ناعم اوى ( خشن شوية )

ونخلطه مع اللحم المفروم ومعاهم ملح وفلفل ومبشور جوزة الطيب

المهم يتعجنوا مع بعض كويس اوى

ونغلى حلة ميه عالنار

ونعمل من العجينة كور مندمجة قد الليمونه البلدى

أو نبططها شويه زى الطعميه ( الشكل ما يفرقش)

ونرص فى صينيه على جنب

ولما نخلص الكور نحدفها عالميه المغلية حوالى ربع ساعه غليان

بعد كده ننشلها ونسيبها تبرد شويه

وممكن تتاكل فى المرحلة دى

وتصفى ميتها على ورق او مصفاه

ونسخن زيت أو سمن غزير حسب الرغبه

ونبدأ نقلى الكبيبة لما تحمر

وممكن تتاكل فى المرحلة دى

وممكن بعد كده نسقطها فى دمعه بالتوم تجنن :rolleyes:

وبالف هنا وشفا

مساء الفل

:wub:

تم تعديل 7 يونيو 2005 بواسطة bodda

[bodda]

العزيزه اوشا

ايوه الكسبرة الخضرا

وجربيها مع الشبت والبقدونس وبنفس الكميه

وهاتدعيلى .................. وربنا يستر

:rolleyes:

بجد حلوه جدا وسهله طالما شخصيتك قويه وهاتمنعى التريقه فى البيت

يعنى كله ياكل وهوه ساكت وماحدش يقول امال فين الصوابع ؟؟؟

وهوه المحشى يا ماما على ايامكم كان صوابع واتقلب صوانى ؟؟؟

:lol: :lol: :lol:

صباح الفل

:lol:

تم تعديل 7 يونيو 2005 بواسطة bodda

[Salwa]

bodda...

هو فيه ايه ؟؟؟

دى كفتة ارز ........

دى مش كبيبة شامى !!!!!!!!!!!

الكبيبة الشامى بتتعمل بالبرغل ..

تنقع كوب من البرغل بعد نخالته ....

نحضر كيلو لحم مفروم ...

نعصج نصف اللحم ..((.نحمر البصل المفروم فرم خشن فى زيت زيتون ..او اى زيت يعجبكم او زبدة يعنى حسب الرغبة وعندما يصفر لونه نضيف له اللحم ونقلب ثم ندعه على نار هادية الى ان ينضج ..ممكن اضافة الصنوبر اليه .

باقى اللحم نضيف له البرغل بعد تصفيته ....ثم نفرم الاثنين معا ..نضع ملح وفلفل اسود ..(( اذا اردت وضع بصلة مفرومة فرم ناعم جدا ..كان بها ..وان لم ترغب ...لايضر..

نبدأ فى تحضير الكبيبة ....

نعملها على هيئة ( البيضة ) يعنى شكلها لا يكون مدور تماما ...ثم نعمل فجوة ونضيف لها اللحم المعصج ونقفلها بحذر ...

نعمل كل الكمية .........ثم نقليها فى الزيت .

وبالهنا والشفا ..

هى دى الكبيبة الشامى اللى طول عمرنا بنعملها ....

فيه ناس تستسهل وتعمل الكبيبة صينية ....

يعنى نفس الطريقة بس بتضع طبقة برغل باللحم ...ثم طبقة عصاج ثم طبقة برغل اخرى ...ثم تغطى بورق الومنيوم وتدخل الفرن وقبل خروجها من الفرن بخمس دقائق نشيل الورقة حتى يحمر الوجه ....

ممكن عمل سلطة طحينة جنبها او سلطة حمص ..او سلطة بابا غنوج ...

[Reham]

السلام عليكم ورحمة الله وبركاته،،

ايه يا عموبودا

انا عايزه بعد اذن حضرتك الكبيبه الشامي....... الظاهر ان حضرتك فهمتني غلط

متهيألي هي طريقة الاخت سلوي

وانا كنت بعملها بنفس الطريقه

بس كانت بتطلع محببه لما بقليهافي الزيت

مع انني بفرم البرغل كويس واحيانا بتتفتفت في الزيت وتفك من بعضها

سألت جارتي الاردنيه قالت لي لازم بعد ماتكوريها احطها شويه في التلاجه او الفريزر علشان تمسك نفسها قوم ايه لما احمرها تطلع صحيحه

ومن ساعتها ماعملتهاش مع انها بتبقي حلوه اوي في رمضان جنب الفطار

بيني وبينك انا بستنطع علي سلفتي واخليها تعملهالي

مش كده اريح من وجع الدماغ!!!!!!!!!!!!!!!!!!!!!

:rolleyes: :lol:

[Salwa]

ريهام ...

انا لما قلت نعمل كل الكمية ثم نبدأ فى القلى ....ما هو ده معناه ان ساعة القلى حاتبدئى باللى عملتيه الأول ؟؟

ومسألة انها بتحبحب منك ده حسب نوع البرغل اولا ...ثم لابد نفرميها جيدا ...او ممكن اسهل تخلطيها وتستعملى خلاط الكبة فحتكون ناعمة جدا ..

وبالهناء والشفاء ...

[bodda]

العزيزه سلوى

العزيزه ريهام

معلش والله العتب عالزهايمر

طبعا كلامك يا سلوى صح 100%

واللى انا وصفتها اسمها الكُبيبة ( الكوبيبة )

وهيه معروفه فى دمياط والمنصورة

انما الكبيبة الشامى زى ما وصفتها سلوى

وفعلا لازم باستعمال الكبة للتنعيم

لان فى سوريا بيستعملوا الدق للتنعيم ( الطريقة الاصلية )

ووضعها فى التلاجه هايفيد برضه فى عدم التفكيك

او تتساب فتره كافية بعد التصنيع وقبل التحمير

معلش تانى ...... الزهايمر الله يخرب بيته

:) :lol: :lol:

مساء الفل

:wub:

[bodda]

مش لاقى طلبات النهارده

قلت اكتب لكم طاجن يجنن وخفيف اوى عالمعدة

:lol: :wub: :lol:

طاجن الباميه باللحمه الضانى

الأول لازم يكون فيه طاجن فخار :)

لان صدقونى بيفرق فى الطعم جدا جدا

وتجيبى كيلو لحم ضانى من الفخذ مقطع لقطع صغيرة

ويتسلق مع مستكه وحبهان وبصلة كبيره

وملح وفلفل ومبشور جوزة الطيب

بعد السلق هانطلع اللحمه ....امال يعنى نوديها فين ؟؟؟ :lol:

ونجيب الباميه نحط نصها فى البرام و بعدين اللحمه ونكمل بباقى الباميه

نشوح مبشور بصله و 5 تومات فى حله ونطشه بعد ما يصفر mfb:

بكوبايتين شوربه ومعلقتين كبار صلصة وبهارات

وبعدين نصبها على مخلوط الباميه واللحم :o

ونحط على الوش ملعقة كبيره سمن بلدى أو زبده

وتدخل الفرن حتى السوى وهى مغطاه بالالمونيوم فويل

ثم يتم تحمير الوش برفع الالمونيوم فويل

ويعصر الليمون على الطاجن عند التقديم ;)

وبالف هنا وشفا

صباح الفل

:wub:

تم تعديل 9 يونيو 2005 بواسطة bodda

[Salwa]

صباح الخير ...

bodda.....استاذنا ورئيس هذا القسم ..ممكن اقول طريقتى ؟؟؟

طاجن البامية ..(( مش ممكن تسلق اللحم الأول ؟؟ ...ما ينفعش !))..

يعنى شوية شوية لقيت نفسى لازم ادخل وزى ما اقترح بعض الاخوة ....كل واحد يقول طريقته فى طهى الصنف ده...

طريقتى ..

=====.

-- نحضر كيلو لحم ضانى من الفخدة او الكتف ...مقطع و..ننزع منه اى دهون

-- نحضر كيلو باميا .

-- بصلة مفرومة فرم خشن ...ثوم مدقوق ...ملح وفلفل .

-- صلصة طماطم ..

يفضل استعمال البرام ..(( عموما اى نوع من الطعام يجب ان نضعه فى الفرن بيكون افضل استعمال البرام ...واصح...يعطه طعم افضل و يتحمل ويحتفظ بدرجة الحرارة فترة اطول ويعنى حتى عندما نضع البرام على السفرة والى بعد الانتهاء من تناول الطعام يظل ساخنا ))

- نحمر البصل فى بعض السمن وبعضا من زيت الزيتون وعندما يصبح لون البصل ذهبيا بعض الشئ نضع نصف الثوم المدقوق ( كل واحد حسب رغبته فى كمية الثوم )...ثم نضع اللحم ..نغطى البرام الى ان يقترب اللحم من النضج ..كل شوية ممكن نضع كمية مياه بسيطة نصف كوب مثلا ...فقط.

ثم نضع الطماطم ... واول ما تغلى نضع الباميا ثم نضيف باقى الثوم ....طبعا نضع ملح وفلفل ....ثم ندخل البرام الفرن .

نتركه حوالى ساعة الا ربع ...نخرج البرام من الفرن وقت تحضير الطعام ..

وبالهنا والشفا..

[bodda]

العزيزه سلوى

طريقتك صح بس فى حالة واحده

وهو ان يكون لحم ضانى أوزى .. يعنى صغير السن جدا

علشان يلحق يستوى من غير ما الباميه تتهرى

لكن عادة لحم ضانى من عند الجزار بيكون عادى

يعنى يحتاج سوى أكتر من الباميه بكتير

وطريقتك جميله وهايله للى ضامن اللحمه صغيرة السن

وتسلم ايدك

وياريت نشوف طرقك الجميله وده شئ جميل يفيد الاصدقاء

واختلاف طرق الطهى اضافه انا باستفيد منها

فالف شكر ليكى استاذتنا العزيزه

منوره دايما

وصباح الفل

:)

[شاعرالرومانسية]

معلش الظاهر انى دوست على الموضوع مرتين فنزل مرتين فمسحت واحد وسيبت التانى ..

بصوا تحت.......... :)

تم تعديل 8 يونيو 2005 بواسطة شاعرالرومانسية

[شاعرالرومانسية]

انا فعلا اقترحت ان كل واحد يبقى يقول على طريقته فى اعداد اكلبة معينة نتفق عليها ..وبما ان شيفنا العبقرى "بودا " اختارلنا طاجن البامية ونينا "سلوى" (دة مقدما يعنى ... -_- ) قالتلنا كمان طريقة ..فحقولكم انا برضة بعملها ازاى

أصل البامية دى بقى موال لوحدة ... وليها كذا طريقة حقولكوا على طريقة حريفة ( حامية يعنى :lol: ) ومش محتاجة لحمة ( اورديحى يعنى ... :) )

بس لازمن ولابد عن التوم فيها بقى هه :)

انا بحب فى الاول اشوح البامية فى شوية زيت صغيرين جدا مع فص مستكة ورشة قرفة ورشتين كسبرة ناشفة ( حيعجبكوا طعمها قوى ) وبعدين احطها على جنب .

وبعدين نجيب بصلة نخرطها فى معلقة سمنه مع شوية زيت وفصين توم مدقوقين ونشوحهم على النار ومعاهم قرن فلفل او اتنين احمر ( حامى ) بس من غير مانقطعهم عشان لو حبينا نشلهم بعد كدة.. ولما البصل يصفر نقوم ضايفيين الطماطم المبشورة او المضروبة فى الخلاط ونسيبها شوية على النار لحد ما ميتها تنشف شوية ونضيف بعد كدة البامية المتشوحة ونضيف شوية شوربة صغيريين ونجيب كام فص ثوم مدقوقين بشوية كسبرة ناشفة وفلفل اسمر ونضيفهم على البامية قبل السوا بخمس دقائق مع عصر نصف ليمونة ..ومكن بعد تمام النضج اننا نشيل الفلف الاحمر ( عمل اللى علية خلاص mfb: )

وعلى فكرة ممكن نكمل سواها فى طاجن فى الفرن عشان طعم الطاجن اللى بيبقى مميز، فبعد البامية ماتاخد غلوة واحدة على النار نجيبها ونحطها فى طاجن ونضيف التوم واليمون وشرايح طماطم على الوش وندخلها الفرن لمدة عشر دقائق او ربع ساعة وشها يحمر ..كدة يعنى mfb: ..

ومع باذنجان مخلل وطماطم مخللة وتبقى اكلة عجب ..انا دايما بعمل جنبها ارز بريانى (ممكن بقطع لحم او بقطع فراخ )

اما مخلل الباذنجان فممكن نقلى الباذنجان العروس الاسود

فى الزيت ولما نطلعه وهو سخن نشقة ونعصر جواة ليمون بملح وكمون ولما يتشرب نحشية بخلطة من التوم المدقوق والخل والبقدونس والفلفل الاخضر .. و

الله يرحمكوا بعد الاكلة دى .. ( انا عن نفسى ببقى محضر كيس فوار مهضم وسطل عرقسوس متلج :blush: )

ونشوفكوا على الوصفة الجاية ان شاء الله

تم تعديل 8 يونيو 2005 بواسطة شاعرالرومانسية

[bodda]

تسلم ايدك يا شاعرنا

وحياتك انا اكلى كله بالشطة والفلفل الاحمر الجبار

لكن هنا بنعمل حساب الأصدقاء

ومنعا للمشاكل الزوجية وطيران الحلل فى اجواء المنزل

يبقى الطيب احسن

:) :blush: :lol:

وتسلم ايدك

وصباح الفل

mfb:

[aynad]

عايزة اقولك يا بودا تسلم ايدك يا رب علي الاكليييير

جربتها و طلعت خطييييييييييييييييييييرة

بس غلطتي اني عملتها بقمع صغير فمنفعش افتحه و احط الكريمة في نصها روحت حطاها علي وشها بس كانت تحفة

تسلم يا رب :wub: :o

[bodda]

العزيزه أيناد

انتى اللى برافو عليكى حسن التصرف

وبالف هنا وشفا :wub:

وهيه لازم طبعا قمع واسع بحيث لا يقل قطر صباع العجين عن 2 سم

والجايات احلى من الرايحات :o

وصباح الفل

:ninja:

[شاعرالرومانسية]

انا من البداية وانا حاسس ان الاكليير دة حيطلع جنان ... تسلم الايادى يا شيف :angry:

نرجع للحوادق ..طبعا الكل بيحب البوفتيك ..الاسكالوب ... شرائح الاستيك .. كل دى اسامى لطرق اعداد شرائح اللحم .. اية رايكم نبدأ نتكلم عن طرق اعداد البوفتيك او شرائحخ اللحم بوجة عام ..( طبعا مش بس الطرق التقليدية اللى هى بانية،،، ممكن نغير شوية :angry: )

انا عن نفسى لما بزهق من البوفتيك التقليدى بعمل طريقة ظريفة من غير قلى وكنت قلتها فى فيلية الدجاج ،،،، عموما نقول تانى :

نجيب اربع شرائح لحم بس مش رفيعين قوى يعنى نخلى الجزار ما يرققهمش اوى ( سمك 1سم كدة ) ونجيب قد 5 او 6 فصوص ثوم حلوين ونقعهم شرائح ونتبلهن بالملح والفلفل وعليهم ثلاث معالق خل كبار ولو حبينا شطة او اى نوع توابل اخرى ( زعتر ..او روز مارى .... الخ )

ونتبل شرائح اللحم بالخل والتوم المتبل لمدة ساعة..

نجيب صنية او طاسة تيفال ونحط ملعقتين زيت زيتون ونحط التوم اللى فى الخلطة تقلبتين كدة وبعديها نرص شرائح اللحم فوق التوم ونسيبة على النار لحد ما ينزل ميته ونقلبة على الوش التانى وبعدين نحط الاماء المتبقى من التتبيلة ونوطى النار عليها مع تقليبة من ان لاخر وتزويدة بالماء لو احتاج حتى تمام السوا.. ونطلعهة على فرشة من البقدونس وممكن نطلع الصوص المتبقى بالثوم فى طبق جانبى ومع سلطة زبادى بالخيار بيبقى يجنن ،،، وبالهنا والشفا :angry:

[Osha]

بسم الله الرحمن الرحيم

وحشتووووووووووني جدا

طبعا انا متابعة الموضوع من بعيد لبعيد

الأول احب اقول ان ريهام العزيزة في مصر حاليا - من غيري لأول مرة - وعشان كده يمكن تختفي يومين تلاتة لزوم السلامات والزيارات وخلافه

ثانيا

أنا في منتهى السعادة لحصولي على 3 طرق مختلفة لطاجن البامية العزيز جدا - واقرب الطرق لقلبي هي طريقة شاعر الرومانسية لانها من غير لحمة - أصلي ما احبش آكل لحموم حمراء كتير

مشكلتها الوحيدة معايا انها مش حتبقى هي لو عملتها مش حراقة لان حسام - فينسر - جوزي العزيز لو اكل الأكل حامي حابات عند امي في نفس الليلة!!!

طبعا يا بودا الأكلير حلو جدا ..بس انت عارف من زمان ان حظي في عمايل الحلويات غريب شوية مش عارفة ليه ولذا فأنا أفضل أن أي حد من الأخوة اللي عملوه أو بودا شخصيا يعزمني على اكلير عشان اقول رأيي في الوصفة

البفتيك بالتوم عشرة على عشرة وشكله حيتجرب يوم الأربعاء

سؤال بقى

الباذنجان ابو خل وتوم -المسلوق - هل خلطته فيها نعناع وكرفس - والا بقدونس

برجاء الافادة نظرا لحالة الخلاف الشديدة بيني وبين جوزي

وهنيالك يا فاعل الخير والثواب

كمان سؤال

سلطة اللبن وجزاك الله خيرا مقدما يا بودااااااااااااااااااااااااااااااااا