اطلب اى وصفه على بالك .. تلاقيها قدامك

[abofasad]

جدو ابو فصاد يبعث بتحياته الى كل من ساهم في توبيك (اطلب أي وصفة على بالك)

وعلى رأسهم الشيف اسامة السيد الشهير ب "بودا"

عندي احساس ان بودا هو اسامة السيد وان اسامة السيد هو بودا

واذا كنت غلطان اطلب من الأخ العزيز ابو عمر (س س ) أن يصحح لي هذه المعلومة

لأن الاسم الوحيد اللي عرفته من كل اللي شاركوا في هذا التوبيك كان س س صديق المنتدى القديم والمخلص في صداقته

كل الباقي اخوة جدد انضموا للمنتدى

اهلا ومرحبا بكم جميعا

رجعتونا لبيتي القديم اللي كنت في يوم من الايام مليت منه

ولكن ريحة التقلية وطعم الشوربة خلاني ارجع تاني

اشكركم

ولكم ام فصاد زعلانة منك

لأني امبارح قعدت قدام الشاشة لغاية الساعى ثلاثة الفجر انقل كل هذه الاكلات في ارشيف على وورد، ولما وريتهولها النهاردة الصبح قالتلي اشكرهم بالنيابة

نسيت اقولكم (الزملاء القدامي عارفي) انا في بلاد الفرنجة وازرع الملوخية والبامية في حديقة المنزل

وعاوز من الشيف بودا ان يقوللي على احسا أكلة "ملوخية بالأنارب"

وله كل الشكر من جدو ابو فصاد

[bodda]

العزيز أبو فصاد

انا كنت اتمنى طبعا اكون الشيف اسامه اللى بتقول عليه

لكن للاسف انا مجرد هاوى وغاوى :huh:

وياريت تكون وصفاتى عجبت الحكومه عندك

:wub:

وبرافو عليك زراعة الملوخية والباميه

واى اسئله فى الزراعه ... تخصصى برضه

:wub:

الملوخيه بالارانب ( الأنارب )

أرنب حلو كده مايقلش عن 2 كيلو صاحى

لان اقل من كده يطلع شوربة فول نابت ماتنفعش

ويتسلق مع الحبهان والمستكة والبصل والملح والفلفل

وطبعا المستكه تتسيح الأول مع معلقة سمن بلدى :D

ثم يتشوح فيها الارنب المتقطع 4 ويضاف الماء الساخن وباقى المكونات

ولما يستوى الأرنب نشيله ونصفى الشوربه ويتعمل بيها ملوخيه عادى

وقبل طشة التقليه نحط الارنب فى الملوخيه غلوه سريعه

ثم الطشة الشهيرة ويتساب 10 دقايق

وبالف هنا وشفا

مساء الفل

:P

تم تعديل 10 يوليو 2005 بواسطة bodda

[شاعرالرومانسية]

الله الله الله يا بودا باشا :huh: ... ريحرة التقلية وصلالى لحد عندى ،،، :wub:

تسلم الايادى ياغالى :wub:

وبالنسبة للمرحوم والمأسوف على شبابة الارنب ممكن بعد السلق نعمل خلطة من فصين توم وملعقتين خل وشوية فلفل وكسبرة ناشفة ونتبلة بالخليط دة ونحمرة فى ملعقتين زبدة بيبقى طعمة يجنن :D

[Osha]

الله الله الله يا بودا باشا  :D ... ريحرة التقلية وصلالى لحد عندى ،،، :D

تسلم الايادى ياغالى :D

وبالنسبة للمرحوم والمأسوف على شبابة الارنب ممكن بعد السلق نعمل خلطة من فصين توم وملعقتين خل وشوية فلفل وكسبرة ناشفة ونتبلة بالخليط دة ونحمرة فى ملعقتين زبدة  بيبقى طعمة يجنن :D

<{POST_SNAPBACK}>

ارانب !!! :D

الواحد يحس انه بياكل قطة :D

يالا يا حسن قول اللي في نفسك عليا عشان مش باحب الأرانب!!! :D

[bodda]

والله يا اوشا انتى اللى بتجيبيه لنفسك

معلش

ويا عم حسن ...

فيه ناس تحب الارانب متحمره زى ما وصفت مع الملوخيه

وفيه ناس تحبها غرقانه فى الملوخية وطشتها

وتسلم ايدك يا غالى

مساء الفل

:D

[bodda]

بمناسبة اشاعات تسمم البطيخ بالمبيدات

كنت كتبت قبل كده وصفة للبطيخة المحشية

وفيها بنستبدل لحم البطيخ بالجيلى والمكسرات

متهيألى ده ميعاد حلو تجربوها

البطيخه المحشية

نجيب بطيخة صغيرة حوالى 4-5 كيلو

ونعمل فيها فتحة صغيره من عند العنق حوالى 5 سم ونحتفظ بالقشره

نبدأ بالملعقة نفرغ البطيخه من اللحم الاحمر لغاية ما تفضى خالص

نحضر زبيب ولوز غير مقشور حوالى نص كيلو

ونحضر جيلى أحمر بالطريقة العادية حوالى 8 كوبايات ونخلط معاه المكسرات

ونعبى بالخليط الساخن البطيخه وندخلها التلاجه

وكل ربع ساعه نطلعها ونقلب الخلطه اللى جواها لغاية ما يبدا الجيلى يمسك شويه

ونكمل باقى الفتحه بالجيلى ونحط القشره بتاعتها ( هاتلزق)

ونسيبها فى التلاجه لغاية ما الجيلى يتلج ويجمد خالص

بعد كده نطلع البطيخه ونقطعها شقق فاهتكون نفس شكل شقة البطيخ

بس بدل اللحم تلاقى الجيلى.. وبدل البذور هاتلاقى الزبيب و اللوز

ايه رأيكم ..؟؟؟؟

ومساء الفل

:D

[شاعرالرومانسية]

وجون وجون وجوووووووووووووووووووووووووووون :)

ياعينى على الافكار الجهنمية ... وسلملى بقى على المبيدات :)

(بس ربنا يستر ومايبقاش الجيلى فية مكسبات طعم مسرطنة أوالوان صناعية مسمة .... ;)

احنا نروح نموت احسن بقىىىىىىىىى :P

بس والله تسلم ايدك يا شيف :blush:

[Osha]

المزغودة بنتي اكلت فاهيتا عن ناس اصحابنا

انا بقى عاوزة اعملها في البيت

[bodda]

العزيزه اوشا

فينك من زمان ؟؟؟ اخيرا طلبتى حاجه؟؟

جاهز يا فندم

فراخ الفاهيـــــــــــــتا

كيلو صدور شرايح صوابع

3 حبات فلفل ألوان شرايح و فصين توم محترمين شرايح برضه

بصلتين تلاته شرايح رفيعه وملح وفلفل

حزمة كسبره خضرا مفرية وعصير لمونه محترمه :D

نص معلقة بهار فراخ و نص معلقة سكر وكوباية ميه

معلقتين صلصة مكسيكى ( سبق وصفها ) ;)

نجيب حله ونحط التوم والكسبرة وعصير الليمون والسكر والميه

والملح والفلفل والبهار ونقلب كويس اوى

نحط فيهم شرايح الفراخ ونقلبهم و نسيبهم فى التلاجه ساعتين على الاقل

ويفضل طول الليل :wub:

نصفى الفراخ ونسيب ماء النقع هانحتاجه تانى

ونسخن الزيت ونشوح الفراخ للون البنى الفاتح ونشيلها

وفى نفس الزيت نقلى البصل لغاية ما يدبل بس

وبعديه شرايح الفلفل الملون

نحط الفراخ وماء النقع الاولانى والصلصة ونسيبهم كلهم عالنار

لغاية ماتستوى الفراخ

ويقدم مع ابتسامة ثقة عريضه من غير ما نبين الاسنان

:wub: :wub: :D

وبالف هنا وشفا

صباح الفل

:D

[Osha]

بعد المتشكرين وتسلم ايدك وتكرم عينك والذي منه

بتقول اخيرا طلبت حاجة!!!

يابيه ازاي اطلب وانت مش مخلي حاجة عشان اطلبها

خيرك سابق من غير طلبات

ونورت مطبخي العزيز بكل الأكلات اللي كانت على بالي واللي عمرها ما كانت على بالي كمان

امبارح عملت الكوسة بالبشاميل وقليت الكوسة زي ما انت قلت - لسه لم يتم التجربة - اصلي عازمة صديقات لي على الغداء وحاجربها فيهن

على فكرة هم مش مصريين ولا امريكان

دول تشكيلة تايواني على نيبال

حاقولك آخر أخبار العزومة اول ما ياكلوا ان شاء الله

[bodda]

المهم ماتوصلش لقطع العلاقات

مع دولة نيبال و مملكة تايوان

:D :wub: :wub:

مساء الفل

:wub:

[Osha]

الكوسة طلعت تحفة بالطريقة بتاعتك - القلية زي الباذنجان

المنيو كانت بسيطة جدا

بامية بالموزة

مكرونة بشاميل

كوسة بشاميل

شاورما فراخ عشان اللي من نيبال مش بتاكل لحمة (محدش ياكل لحم الاله بتاعيه - عيب برضه)

وسلطة طبعا

المشكلة انهم عاوزين طريقة الكوسة بالبشاميل

وطبعا انا مش عارفة اوصف العصاج ولا مقادير البشاميل - حاجة تفلق - كان لازم العزاايم من اصله

ما علينا

شكرا على النصائح وحسام كمان عجبته الكوسة في ثوبها الجديد

[bodda]

المهم عدت على خير

وربنا ستر مع الدول الصديقة

واحلى سلام للعزيز حسام

صباح الفل

:D

[Folana]

السلام عليكم ورحمة الله وبركاته يااخ بودا ....انت اللى دلتنى على طريقة ارسال الرسائل ..فتحمل بقى نتيجة الخير اللى ارتكبته:blink:.....وبعدين انا بدات بالسلام علشان لولا سلامى سبق كلامى ....

انا بقى مصرة اعمل رز بخارى ودماغى ركبت شمال ومش حاعمل حاجة تانية الا لما اجرب فى اسرتى المسكينة الرز البخارى ...ممكن بس لو تكرمت تقولى رقم الصفحة لو الطريقة موجودة هنا ...لانى كسولة جدا ومش قادرة الف على المحلات لغاية ماالاقى الصفحة .....ممكن ..هه؟ :D

[Folana]

الكوسة طلعت تحفة بالطريقة بتاعتك - القلية زي الباذنجان

المنيو كانت بسيطة جدا

بامية بالموزة

مكرونة بشاميل

كوسة بشاميل

شاورما فراخ عشان اللي من نيبال مش بتاكل لحمة (محدش ياكل لحم الاله بتاعيه - عيب برضه)

وسلطة طبعا

المشكلة انهم عاوزين طريقة الكوسة بالبشاميل

وطبعا انا مش عارفة اوصف العصاج ولا مقادير البشاميل - حاجة تفلق - كان لازم العزاايم من اصله

ما علينا

شكرا على النصائح وحسام كمان عجبته الكوسة في ثوبها الجديد

<{POST_SNAPBACK}>

فعلا يا رشروش ..المنيو بيسطة جدا وخفيفة جداااااااااااااااااااا

عايزاك تجربى الفراخ البانيه بطريقة جميلة مش عارفة انت عارفاها ولا لأ بس مش حنخسر حاجة لو قلناها ...بصى ياستى انا مااعرفش اقول مقادير يعنى باشتغل كده بالبركة ...انت تغسلى صدور الفراخ كويس طبعا زى مابتعملى ..وتسيبها تصفى الميه بتاعتها وتجهزى التتبيلة ..بصل وثوم (مش كتير يادوب تلات اربع فصوص)وفلفل اسود وبهار ...ومبشور جوزة الطيب علشان الاخ بودا مايزعلشى:D....وتعصرى عليها نص ليمونة صغننة (على فكرة ممكن تتبليها باى طريقة تحبيها ..يعنى ممكن تضيفى برضه زبادى وفلفل رومى اخضر على التتبيلة)..وتتبلى الفراخ ..واذا حتعمليها فى وقتها سيبها بس شوية تشرب التتبيلة ..او تشليها بقى متبلة لوقت العوزة...وبعدين تيجيبى دقيق فى طبق وبيض مربوب فى طبق تانى ..وبعدين تحضرى بقى البقسماط المطحون وتحطى عليه شوية كمون وشوية..بابريكا (وهى الفلفل الاحمر المطحون وفيه منه حامى او بارد زى ماتحبى ...وتحطى كمان سمسم ..كل ده على البقسماط ..وكترى السمسم شوية ..بس

وتحطى صدر الفرخة فى الدقيق وبعد كده فى البيض وبعد كده فى خليط البقسماط والسمسم ده لغاية ماتخلصى الكمية وتشليها فى التلاجة لمده ساعة قبل القلية علشان ماتفكش ...وبعد كده تقليها بقى وبالهنا والشفا ....

باعمل جنبها كمان باتية محشى لحمة مفرومة وده سهل جدا ..لانى باعصج اللحمة المفرومة على النار ..مع البصل والملح والفلفل والبهار ..وكمان بشر جزراية وفلفل رومى وبعد مااللحمة تستوى تخلطى معاها بقدونس مقطع رفيع جدا ..وتطفى عليها ...ممكن حزمة شبت كمان لو تحبى طعمه ..كده عصجنا اللحمة ..نجى بقى للباتيه ..ده بقى سهل جدا ..باشتريه من السوبر ماركت ..عجينة ومقطعة مربعات ..اسيبها لما تفك واحشى كل واحدة واقفلها تبقى زى المثلث وتتنى حروفها علشان مش تفك ..وبعد كده ارصها فى صينيه وادهن الوش بصفار بيض مربوب ..وممكن تضربى البيضة بشوية ميه نونو فى الخلاط وتدهنى الوش وبعد كده ترشى على الوش حبة البركة ..الحبة السودا يعنى وتدخليها على الفرن لغاية ماوشها يحمر والف هنا

ايه رايك يابودا ..يارب اكون قلت حاجة جديدة..

[Osha]

حبيبتي الغالية فولانة

اعملي بحث في الموضوع بالكلمة وحيطلع لك مكان المشاركة

علىفكرة انا باطبع الوصفة ومعقلقاهم في المطبخ

انابارد بالنيابة عن بودا لانه طبقا لجدول شغله - ممكن رده يتاخر شوية - قلت اختصر عليكي السكة

وبعدين قلنا عاوزين طلبات تعقد الراجل اللي عارف كل حاجة دا

انا غلبت فيه بقالي من يناير اللي فات باحاول اعقده ماعرفتش

[Osha]

حلو قوي طريقة العصاج دي - انا طبعا باموت في طعم الشبت - حاجربها طبعا

بالنسبة للبانية انا مش باحط ثوم لكن باعمل الباقي

وباخلط الدقيق على البقسماط في التتبيل جربي كده ومش حتضطري تحطيها في التلاجة - ماتقدرش تفك

وكمان باحط كزبرة ناشفة مع البقسماط - ريحتها في القلية جميلة

ايوه كده منورة يا فولانة

[bodda]

العزيزه فلانه هانم

بصراحه البدايه مبشرة جدا منك

وواضح ان هايكون ليكى معانا جولات شهيه

:blink:

اما من ناحية الكسل فى التدوير على الطلبات :D

ولا يهمك ننزل الوصفة تانى

الرز البخارى

نحط نص كوباية زيت فى الحله ونسخنها اوى

نحط نص كيلو لحم مقطع حتت صغيرة ونشوحه مع فصين مستكة

يفضل اللحم الضانى

:blink:

نضيف بصلتين مقطعين شرايح رقيقة ونقلب 5 دقايق

نحط عليهم 3 طماطمايات مبشورين ونقلب 5 دقايق

بعد كده 3 كوبايات ميه سخنه وملح وفلفل ومبشور ربع جوزه

ونسيبه عالنار لسوى اللحم

نضيف جزراية مقطعه شرايح رفيعه و ربع معلقة صغيرة قرنفل مطحون

بعد كده نضيف 3 كوبايات رز ونضبط كمية المية

ونسيبه على نار هاديه خالص لغاية السوى

وبالف هنا وشفا

مساء الفل

:blink:

[Folana]

ياسلالالالالالالام..انا مش عارفة اشكرك ازاى يابودا انت انقذت الاسرة من المجاعة ...انا بكره حاعمل الرز البخارى انشاء الله ...متهيالى ده يبقى وجبة لوحده ولا لازم اقدم حاجة معاه ....نمشيها حاجة ساقعة بس :)..احسن بيطمعوا فى قوى ...

الا ممكن يعنى طلب تانى رزل حبتين ...ممكن اعرف طريقة عمل الشركسية ؟...ايوه ..تمام هى بتاعة فاتن حمامة وزكى رستم ...نفسى جدا زوجى العزيز يرجع من الشغل ويقولى بصوت جهورى ..طابخة لنا ايه على الغدا النهاردة ياعبده ..اقوم انا ارد عليه بكل فخر واقوله ..عاملة لك شركسية ياستو هانم

...يروح غمزنى بقرشين كده على الماشى ويقولى عفارم عفارم ياعبده فكرتنى بايام الباشوية ...ممكن اعرف كمان الكشك الماظ ده يبقى ايه بالظبط يعنى ...يعنى هو الكشك بتاعنا العادى خالص ده ..ولا التانى بنجيبه من الصاغة ولا ايه .....ارجو مااكونش تقلت عليك .... :happy:

[Folana]

حلو قوي طريقة العصاج دي - انا طبعا باموت في طعم الشبت - حاجربها  طبعا

بالنسبة للبانية انا مش باحط ثوم لكن باعمل الباقي

وباخلط الدقيق على البقسماط في التتبيل جربي كده ومش حتضطري تحطيها في التلاجة - ماتقدرش تفك

وكمان باحط كزبرة ناشفة مع البقسماط - ريحتها في القلية جميلة

ايوه كده منورة يا فولانة

<{POST_SNAPBACK}>

اشوش حبيبتى ...انا مش باجاملك بس بجد والله انت دخلتى قلبى على طول من اول طبخة ..سبحان الله ..واضح ان عندك قبول عند الناس ماشاء الله ..ده من رضا ربنا ...على فكرة مش باجامل والله .....جديدة جدا حكاية الكسبرة دى على البقسماط ..وحياتك لاجربها ..تعرفى انا احب الاختراعات فى الاكل جدا وكل مرة اعمل الاكل بطريقة مختلفة ..لكن فى النهاية بيتاكل برضه ...من جوعهم طبعا ...انا عملت بوصيتيك وطلبت طلب من الاخ العزيز بودا ...بس متهيالى كده من اللى انا شايفاه انه حيعرف برضه الوصفة الصح بالتكات بتاعتها ..على اى حال احنا مستفيدين برضه ..ربنا يديله الصحة ومايقطعش عنه الالهام ابدا .........