اطلب اى وصفه على بالك .. تلاقيها قدامك

[bodda]

العزيزه فلانه هانم

عليه الوصفه وعليكى التمثيلية

:)

الشركسية

نص كيلو صدور فراخ نسلقها مع بصل وملح وفلفل ونقطعها مكعبات صغيرة

نص كوباية جوز عين جمل مفروم .. ( خراب بيوت معلش )

حباية فلفل أحمر بارد نقطعها حتت صغيرة

وتلات فصوص توم مهروسين ناعم ومعلقة كسبرة ناشفة مطحونه

معلقتين سمن وندعة زيت و 5-7 حتت توست ناشف مكسر من غير حواف !!

:happy:

نجيب شوربة الفراخ وممكن ندعمها بماجى + الفلفل + التوتست المكسر

ونضربهم فى الخلاط ضرب مبرح للاستغاثة :)

ونحطهم عالنار ومعاهم قطع الفراخ المسلوقة عشر دقايق بعد الغليان

على نار هادية

ونقلبهم فى سرفيس التقديم B)

وبعد كده نحمر التوم مع الكسبره للاصفرار وندلقهم فوقهم

وبالف هنا وشفا

مساء الفل

B)

[شاعرالرومانسية]

اهلا وسهلا بالاخت الجديدة ( بس شكلها صاحبة بيت B) ) الاخت فولانه

وصفاتك السابقة تدل انك صاحبة مزاج ونفس فى الاكل :) ... واكيد حتكونى اضافة جيدة لمطبخنا العامر.... :)

اهلا بيكى دائما.. وتقبلى منى خالص تحياتى :happy:

[شاعرالرومانسية]

وللافادة اختنا فولانة .. اليكى رقم صفحة الارز البخارى ...(5)

حتلاقى طريقتين .. مخمخلنا بقى كدة وضيفى حاجات من عندك واعمللنا طريقة تالتة :happy:

[Folana]

العزيزه فلانه هانم

عليه الوصفه وعليكى التمثيلية

B)

الشركسية

نص كيلو صدور فراخ نسلقها مع بصل وملح وفلفل ونقطعها مكعبات صغيرة

نص كوباية جوز عين جمل مفروم .. ( خراب بيوت معلش )

حباية فلفل أحمر بارد نقطعها حتت صغيرة

وتلات فصوص توم مهروسين ناعم ومعلقة كسبرة ناشفة مطحونه

معلقتين سمن وندعة زيت و 5-7 حتت توست ناشف مكسر من غير حواف !!

:happy:

نجيب شوربة الفراخ وممكن ندعمها بماجى + الفلفل + التوتست المكسر

ونضربهم فى الخلاط ضرب مبرح للاستغاثة B)

ونحطهم عالنار ومعاهم قطع الفراخ المسلوقة عشر دقايق بعد الغليان

على نار هادية

ونقلبهم فى سرفيس التقديم :D

وبعد كده نحمر التوم مع الكسبره للاصفرار وندلقهم فوقهم

وبالف هنا وشفا

مساء الفل

:)

<{POST_SNAPBACK}>

صباح الفل المفلفل يابودا ..ايه ده يابنى ده ..حتى الشركسية بتعملها ...طب بس هى طعمها حلو يعنى ولا ايه ؟...على العموم حاجرب ولو انى عارفة ان الحاجة الوحيدة اللى حافلح فيها هى حكاية الضرب دى ..وبعدين موضوع عين الجمل ده عايز شوية تفكير ..طب حاجيب عينه منين .؟......ينفع عين فرخة؟؟؟؟ :)

[Folana]

الاخ العزيز شاعر الرومانسية ..متشكرة جدا على رسالة الترحيب الجميلة دى ..والحقيقة انا اللى سعيدة جدا بوجودى فى وسطكم وشاعرة انى بين ناس باعرفهم من زمان ....ربنا يكرمك ويجازيك خير انشاء الله ...

بودا..بالنسبة لمشكلة عين الجمل اتحلت تقريبا لانى اتصلت بزوجى العزيز وقلت له عايزة عين جمل قالى من عينيه الاتنين ..قلت له تسلملى عيونك ياجملى : : :) كده انا ضمنت عين الجمل خلالالالالالالالالالالاص.....

عندى مشكلة عويصة جدا دلوقت ....زوجى العزيز برضه-انا مصرة على موقفى منه- بعت لى شنطة فيها رجلة...ايوه رجلة..وقال عايزنى اطبخها ....طب ازاى بقى ....قلت مافيش غير انى استعين بصديق ....بودا ..اوشا ..شاعر الرومانسية ..الاخوة والاخوات اللى عنده فكرة عن موضوع الرجلة ده يلحقنى به وله الاجر والثواب ......(بس بينى وبينكم انا خايفة اهاوده فى موضوع الرجلة ده احسن المرة الجاية الاقى الشنطة فيها برسيم ويكون من نصيبى انا :happy: )

[Folana]

ههه....ههه...هههه...استنوا اما اخد نفسى شوية ...عمالة الف على الصفحات من الصبح لما نفسى اتقطع ....ايه ده ياجماعة ده انتم مش سايبين حاجة ماشاء الله عليكم ....انا وصلت للصفحة السادسة بس نفسى اتقطع منى فقلت اقعد اخده غرزيتين وفى الوقت ده اسالك عن طريقة عمل شوربه فواكه البحر تكون بطريقة جديدة غير اللى باعملها ..وماحدش يسالنى باعملها ازاى ...ربنا ستار ...كمان طريقة عمل الكاليمارى المحشى ..سامعنى يابودا ولا اعلى صوتى شوية .....انا شايفة برضه ان الاخ شاعر الرومانسية ...شاعر كمان فى الطبخ ..ومش عارفة بيقولوا عليك خنيقه ليه ..هه؟ B)

بالنسبة للموضوعات السياسة ...او كما يطلقون عليه المطبخ السياسى ..واهو كله طبيخ ...نفسى الحقيقة اشارك فيه بس خايفة يكون كمين ..انتم عارفين الواحد اليومين دول لازم يمشى جنب الحيطة ومش عايزة افسر بقى ........... :happy: :)

[Folana]

ايه ياجماعة خير انشاء الله !!لا اقفل الله لكم مطبخا...هو المطبخ اجازة يوم الاربعاء ولا ايه ؟

[bodda]

ابدا والله بس لظروف العمل باجى من حين لاخر

اما موضوع الرجله فده حكايه

لانه بيتعمل زى الملوخيه بالضبط

يعنى نفصل الورق عن العروق ( ده أفضل بكتير )

وبعدين يتسلق مع بصله وميه قليله لان كلها ميه

وفيه ناس تحب تسلق معاها كسبره خضرا وشبت

ينفع برضه :D

المهم بعد السلق كان زمان يستعمل المفراك ومش وقت شرحه

:wub:

لكن ممكن طبعا تنضرب فى الخلاط وتتصفى من مصفاه واسعه شويه

وبعد كده تقلية الملوخية العاديه بالتوم والكسبرة الناشفه

ونطشها وغلوه عالسريع .... واديها ما ترحميهاش

مساء الفل

:wub:

تم تعديل 20 يوليو 2005 بواسطة bodda

[شاعرالرومانسية]

اية دة يا عم بودا ...والله حلوة حكاية الرجلة دى ..

تسلملنا بنات ...................افكارك ;)

ااختنا فولانة ... اولا ياستى ربنا يكرمك على كلامك الجميل دة ..وبخصوص موضوع خنيقة فدى كلمة عضوة عزيزة مكنش عاجبها العجب والا الصيام فى رجب... بس دلوقتى الحمد لله بيقنا زى العسل على البتنجان الاسود .. :D ...لدرجة اننا بقالنا كتيرررررررررررررررررررررررر ما شفنهاش :D

ماعلينا .... نرجع لموضوع شوربة فواكة البحر... انا حقوللك على طريقتى لعملها وانتى حرة بقى لو تحبى تجربيها

انا بستخدم بجانب الجمبرى والكابوريا .."بكلويز " اللى هو محار :wub: وكمان بجيب سمك قاروص او وقار او شعور ( حسب الميزانية :wub: ونقطعه جزل ونستخدم الراس طبعا فى الشوربة B)

المهم نجيب ملعقتين زبدة ونسيحهم مع فصين مستكة ونحط كمية من البصل المقطع مكعبات وعيدان الكرفس الافرنجى المقطع مكعبات برضة وفصين تلاتة ثوم مقطع ونقلب حتى ذبول البصل دون اصفرارة واثناء التقليب ممكن نضيف ملعقة كبيرة دقيق ( حيديها لون فاتح جميل ) ونستمر فى التقليب بعد اضافة السمك والفواكة

وبعغدين نضيف المياة الباردة ( حتى يبدا غليانها من نقطة الصفر والشوربة يبقى فيها الخلاصة ;) )

واثناء الغليان ممكن نضيف التوابل من ملح وفلفل وورق لورا حتى تمام سواء السمك وقبل النهاية بخمس دقائق نضيف اوراق الكرفس

(ملحوظة : ممكن نغلى الكابوريا لوحدها غلوة قبل اضافتها للشوربة للتخلص من زفارتها)

نشيل الشوربة من على النار .. ونصفيها من محتوياتها ونحط المحتويات فى طبق غويط وممكن ننظف السمك من الشوك برفق

لو عاوزين قوام الشوربة غليظ بعض الشىء نجيب معلقة دقيق ونقلبها فى معلقة زبدة ونقلب كويس ونضيف الشوربة المصفاة ونستمر فى التقليب حتى القوام المطلوب ونغرف بقى اطباق الشوربة ونحط فى كل طبق جزلة سمك حلوة كدة من غير شوك وكذلك الجمبرى والمحار وماننساش الليمون والعيش المحمص ...

اما الكابوريا بقى فنحطها فى صنية كبيرة جانبية ونديها ..... ومساء القزقزة ;)

[Osha]

بودا

حتىالشركسية عارفها ....اموت واعرف بتعرف الحاجات دي منين??

حسن الرومانسية

بلاش سيرة الخنقة عشان اناساكتةبقالي كتير ومافيش داعي نعيد التاريخ من اوله!!!

فولانة

والله القلوب عند بعضها !! ربنا يكرمك

وبعدين انت طلعت استاذةوكمان دمك خفيف جدا

طمنيني على قصة عين الجمل واخبار عين جملك ايه ??

[bodda]

الغالى شاعرنا الجميل

ايوه كده عايزين شوربات الصيف والقزقزة الجميلة

طبعا شوربة فواكه البحر لها طرق كتير

وطريقتك من أحلاهم بس برضه نقولهم على طريقه اسهل شويه

وحسب وقتهم بقى :wub:

وعندك حق فى موضوع العزيزه أوشا واختفائها الغريب

طبعا يا اوشا هاتقولى اختفاء ايه مانا لسه فى الرد اللى قبلك على طول

على العموم مش بيقدر عليكى غير حسن أبو على

:wub:

وللعزيزة فلانه ففعلا خفة الدم تنطق بالكثير

ومستنيين نعرف عملتى ايه مع الجمل...

يوووه ... اقصد مع عين الجمل

:D

نيجى بقى للشغل

كالامارى محشى

وده من احلى طرق عمل الكالامارى واتعلمتها فى اليونان

نجيب كيلو كالامارى من النوع الطويل اللى لونه قرنفلى

وده تنضيفه سهل اوى ونرمى الراس وهانشتغل بالجسم بس

اللى عامل زى القرطاس ;)

الاول نحضر خلطة الحشو كوباية رز مغسول

و ربطة كسبرة خضرا وشبت مفريين ناعم

و بصلاية مبشورة وتلات فصوص توم مفريين وملح وكمون (بسيط) وشطة

و نص كيلو جمبرى مقشر من النوع اللى لحمه أبيض ( مهم )

نقلب كل ده على بعضه يبقى الحشو جاهز

ونحط حلة كبيرة عالنار نصها ميه علشان تغلى على ما نخلص حشو

ونحط فيها ملح عادى وعودين كرفس وبصله

نجيب بقى كل كالامارييايه ونحشى نصها

ونقفل الفتحه بغرزتين اتنين بس بالخيط والابرة.. لازم تكون فيها فتحات

وبعد مانخلص كل الكميه نسقطها فى الميه اللى بتغلى

ونسيبها حوالى نص ساعه بعد الغليان وبعدين نطلعها على جنب

ونرمى مية السلق

ودى المرحله الاولى

B) :D ;)

نحضر طاسه غويطه بزيت عميق ونحمر الكالامارى المحشى

لدرجة اللون الذهبى الجميل

ووحياتكم هاتلاقوها احلى من الحمام وتحفه

وبالهنا والشفا

صباح الفل

;)

[Folana]

اعزائى وزملاء الكفاح .....بودا.....متشكرة جدا على طريقة الرجلة بس انت اتاخرت على فكان لازم اعملها بس عملتها زى السبانخ يعنى سويت اللحمة فى الطماطم وخرطت الرجلة برجلها بكله ...امال اسمها رجلة ليه لازمن ولابد الرجلين بتاعتها بتتاكل ..وسويت حمص طبيخ مع اللحمة وبعدين ضفت الرجلة وعملت لها تقلية زى السبانخ ..بس الحقيقة مااعرفش طلع طعمها ايه بس قالوا حلوة ...اللى انا متاكدة منه ان شوال الرجلة ده حيعاود الزيارة تانى ابقى اعملها بطريقتك ..بس ايه المفركة دى؟نورنى ..اهى لو مانفعتش فى الطبيخ تنفع فى غيره ..خاصة ايام امتحانات ولادى......بالنسبة للكالمارى ..شكله شهى فعلا ..انا باعمله من غير جمبرى ..الصراحة باقول ناكل الجمبرى كجمبرى احسن اهو العيال تعرف طعمه ايه ..كمان بارصها فى صينية وارشها بعصير طماطم ..وادخلها الفرن ..بس بتتفتح منى ..حاجرب طريقتك اليونانية ..انا عملت الرز البخارى طلع يجنن ودعت لك ربنا مايحرمك مننا ابدا.....

العزيز شاعر الومانسية ...الوصفة بتاعتك تجنن ...اجمل مافيها ان مش حيكون فيها ريحة ولا طعم زفراة ...بس لازم اشيل منها الكابوريا؟ولا ممكن اقدمها كده وهم بقى ينزلوا يغطسوا فى الطبق بحثا عن فواكه البحر؟....

اوشا حبيبتى وحشتينى ...شفتى ياستى حتى الشركسية طلع يعرفها والرجلة نعمل ايه بقى تانى ....بس اصبرى حافكر له فى اكلة جديدة خالص......بالنسبة لموضوع عين الجمل ...مش عارفة اقولك ايه ولا ايه ...زوجى العزيز اشترى نفسه ولاقيته راجع وجارر جمل وراه :D

[bodda]

العزيزه فلانه

طلعتى شاطره واتصرفتى

:D

واى اكله تحسى انها خرفت منك حطى معلقتين شطه

ومش هايحسوا باى طعم خالص

:wub: :wub: B)

مساء الفل

:D

[Folana]

والله يابودا فعلا عندك حق فى موضوع الشطة ده ..انا كل ماالاكل يخرف منى اقول لجوزى انه من بلد كذا ..يعنى لو طلع حراق اقوله عماله لك اكلة هندى ماحصلتش ..ولو طلع ماسخ اقوله اكلة صينى .....ومرة اتحرق منى قلت له دى بقى اكلة سودانى ...............

كنت عايزة اسال سؤال فى اصول الاتيكيت ..بقى انا بقى لسه ناقلة الشيخ زايد جديد ...والحقيقة المفروض ان فيه حفلات تعارف بتم بينى وبين الجيران بصفتى زبون جديد عندهم ...وغالبا بتكون حفلة عشا ..فمش عارفة ايه انسب انواع الاكلات اللى تناسب الحفلات دى ؟؟...انا فكرت اعمل لهم مفاجاة واعزمهم على اكلة اوريجنيال خالص واديها ساندويشات فول وطعمية بس كلام بينى وبينكم لاقيتهم ناس هاى وعللّوىى قوى قوى فقلت مافيش داعى ابداها كده معاهم ...ياترى اعمل بوفيه مكون من ايه ....ياريت اللى عنده خبرة يساعدنى ......

[Osha]

ازيكم كلكم

وسعوا كلكم عشان محدش يتعور :excl:

بقى حسن اللي بيقدر عليا - طيب انت وحسن متعاقبين حتى اشعار آخر وعلى كل واحد أن يدلي بخمسةأصناف جديدة لنج :wub:

فولانة

ضحكتيني جداعلى قصة الأكل السوداني المحروق!!! عامة حلوة الحجة دي نبقى نتعلمها

مشكلتي في الشطة لو حسام اكل منها حيبقى آخر يوم بينا - وبودا عارف الموضوع دا وكل أكلة يفضل يغيظ فيا ويقولي شطة ..فلفل اسود ..فلفل حامي ...وصاية من الأصلي

بالنسبة للبوفية - اعملي لحمة باردة وكنابيه (طبعا انا باقترح أسامي - لو عاوزة وصفات عليكي وعلى أخونا بودا المسكين ) شوية سلطة تونة

خليها نواشف - طبعا مش نواشف لدرجة البتاو مثلا ..لكن ساليزون - باتية

وبعدين كبري دماغك ووفري فلوسك وفلوس الجمل

بالمناسبة وانا صغيرة كنت فاكرةانها فعلا عين الجمل وخلعوها ونشفوها ..وده سبب رئيسي من اسباب اني مش بآكل المكسرات - وسبب تاني اقتصادي طبعا

اشوفكم لما اصحى الصبح ان شاء الله

سلام وتحية لأجدع مطبخجية

[bodda]

بغض النظر عن فتونة اوشا وزوجها العزيز

علشان انا ماحبش اتعور عالصبح

:wub:

بص يا فلانه ...المهم فى المواضيع دى نعرف حاجات معينة

يعنى انتى قولتى بيكون عشا .. فهل مبكر يعنى 8-9 مساء ؟؟

ولا عشا بسهره يعنى من 9 - 12 او اكتر طبعا ؟؟؟

لو مبكر يبقى ممكن لحوم بارده وتونه وسيمون وسلطات

لو متأخر يبقى لازم أصناف سخنه :excl:

كباب حله .. رز بسمتى بالخلطة .. بانيه ..ديك رومى محترم

محاشى خفيفه ( لا كرنب ولا فلفل )

وسلطات منوعه من خضر مسلوقه منفرده بالصوص

( فاصوليا بيضا - بطاطس - كوسه - جزر ..الخ)

وممكن باذنجان و كوسه بطاطس محمره

مع الطحينه والبابا غنوج والسلطة الخضرا اليونانية

والحلو يفضل الايام دى يكون فاكهه أو تورتة آيس كريم

وسيبك من اوشا عايزه تفضحك فى الحتة

بس فضيحة زى العسل

:lol: :lol: :lol:

صباح الفل

:wub:

[شاعرالرومانسية]

ماشى كلام الشيف...

نديهم وصفات سهلة يا عزيزى بودا :D

وبعدين انا عملت فيك حاجة وحشة...؟

دبستك فى عزومة مثلا وخلعت...؟

اديتك معاد لاسمح الله ولطعتك ومجتش ...؟

اية مابقدرش عليكى غير حسن دى ...لاء واكدتها وقلت " ابو على " كمااااان :lol:

طب يلا عم ...شوف الغرامة اللى على الصبح دى ...........عييييييييييييييييييش ياريس :lol:

هات ودنك ( اختك اوشا فكراها غرامة وعقوبه ....مش عارفة انها مصلحة ;) )

العزيزززززززززززززة اوشا ... حمدالله على السلالالالالالالالامة يا حاااجة

لسه جايب سيرتك مع بودا والله .....بالخير طبعا يافندم :wub:

اختنا فولانه...( مش عارف حتفضلى فولانة كدة لحد امتى :excl: )

شكللك كدة كنتى مستعجلة ومقرأتيش اخر سطر ..

انا كنت قايل نصفى الشوربة ونحط فى كل سلطانية جزلة سمك حلوة كدة من غير شوك وممكن نقشر الجمبرى ونحطة معاها ..

اما القشريات الاخرى ( محار وكابوريا ) فدول لازمن ولابد فى صنية واسعة كدة ونديها قزقزة :lol:

ومن غير عوم وسباحة ولا عوم ولا بهدلة يا ست الكل ;) وبالهنا والشفا

بالنسبة للعزومة بقى فزى ما قال العزيز بودا ...التوقيت مهم جدا

وعموما حقولك وصفة حلوة قوى لسة مجربها بعد ما كلتها برة وفضلت وراها لحد ما عرفت طريقتها وجربتها ...فجربيها وعلى ضمانتى :D

طريقة "الكولدن بلو"،،،،،،

ونلتقى بعد الفاصل :wub:

[شاعرالرومانسية]

بصوا بقى انا اكلت الاكلة دى برا كتير وكنت عايز اعملها وفضلت وراها لحد ما عرفت طريقتها وجربتها ,,واليكم الطريقة النهائية بعد التجربة على افراد الاسرة الكريمة :wub:

نجيب عدد من شرائح البوفتيك ( بس نخلى الجزار يقطعه رقيقه وكبيرة على شكل مستطيل)

نجيب شرائح جبنة ( لافج كيرى مثلا ) وشرائح سلامى

نجيب شرائح اللحم ونفردها ونتبله من النحيتين كويس بالملح والفلفل الاسمر ونسيبها ساعة كدة،

بعد كدة نجيب كل قطعة ونحط علي نصها شريحة جبنة وعليها شريحتين سلامى جنب بعض وعليهم شريحة جبنة كمان ونقفل عليهم بنص شريحة الحم التانى ( تبقى زى السندوتش كدة ) ونكون محضرين مقدار من الدقيق وعلية تلت معاق نشا ( مهم عشان تمسك ) بعد ما نقفل اللحم ونضغط علية بالراحة كدة نحطة فى الدقيق بالنشا ونضغط علية برفق وعلى الحروف كويس وبعدين نشيلى نحطة فى البيض المربوب وبعدين البقسماط ونرص فى طبق واسع او صنية لحد ما نخلص المقدار

نشيلها فى الفريزر لفترة مش اقل من تثلاث ساعات ، او نعملها بالليل لتانى يوم

ونحمرها فى زيت غزير ...عشان مانقلبهاش كتير :lol:

الوصفة متهيألى سهلة قوى ..بس المهم نقفلها كويس ونضغط على الحروف كويس عشان ماتفتحش بعد كدة .. وبالهنا والشفا

العزيزة أوشا...اعتبريها واحدة من ال.............خمس وصفات :excl:

تم تعديل 22 يوليو 2005 بواسطة شاعرالرومانسية

[bodda]

تسلم ايدك يا ابو على

الكوردون بلو من الاصناف المحتاجه حرفنه فى المطبخ

واستعراض لست البيت على الضيوف الغلابه

مساء الفل

:excl:

[شاعرالرومانسية]

تسلم ايدك يا ابو على

الكوردون بلو من الاصناف المحتاجه حرفنه فى المطبخ

واستعراض لست البيت على الضيوف الغلابه

مساء الفل

:excl:

<{POST_SNAPBACK}>

يا بودا انا الدغ... بقولها كولدن بلو ... مش كوردن بلو

وبعدين على فكرة كوردن بلو دة فى المطاعم ...

اما لما تعمله فى مطبخنا يبقى اسمة " كولدن بلو "

وبرضة بالهنا والشفا :wub: