الاعلام الغربي والقضية العربية والفلسطينية !!!

[شاب مصري]

السلام عليكم ورحمة الله وبركاته

دلووقت الناس بتقول ان الاعلام الغربي متحيز لاسرائيل بشكل واضح

وبيعتبر العرب ارهابيين

طيب ازاي بنشوف ناس اجانب سواء مواطنين بيطلعوا في مظاهرات ضخمة

ويدينوا اسرائيل في كلام واضح لا لبس فيه

وكأنهم بيتفرجوا على قناة الجزيرة

ولكن طبعا هم أكيد بيشوفوا قنوات غربية أمريكية او غيره

ازاي بنقول ان الاعلام الغربي متحيز؟

وفي نفس الوقت الصورة وصلت للمواطنين الغربيين وممثلي الهيئات العالمية وغيرها؟

بالصورة التي أدت الى اشتعال الغضب في كل العالم وخروج مظاهرات في معظم دول العالم؟

ياريت الاخوة في كندا يفسرولنا النقطة دي

ازاي ده بيحصل؟

[شاب مصري]

ايه يا جدعان ؟ محدش بيتفرج على التليفزيون ؟

[د هشام ابراهيم]

لا يا باشا بنتفرج ....مش كل الاعلام الغربي متحيز لاسرائيل

بص يا سيدي كندا زيها ذي الكتير من الدول الغربية ما فيهاش رأي واحد و لا إتجاه واحد .... الأراء كلها موجودة و الاتجاهات كلها موجودة من أقصي اليمين إلي أقصي اليسار

التغطية الأعلامية للصراع العربي الاسرائيلي عامة بتختلف من محطة لاخري و من من صحيفة لاخري ... مثلا في تورنتو ٣ صحف كبري ...التورنتو ستار ... ديه محايدة إلي حد كبير و بتنقل الرأي و الرأي الأخر و قلما ما بتهاجم حد صراحة .... فيه الجلوب اند مايل و ديه جريدة المثقفين و يسارية شوية و عادة ما مواقفها بتميل ناحية العرب و فيه الناشونال بوست و ديه جريدة الأغنياء و يمينية شويتين و مواقفها منحازة لاسرائيل

المحطات التلفزيونية محايدة في الأغلب الاعم و فيه مقدمين برامج زاي ستيف بايكين اللي بيقدم برنامج إسمه الأجندة على قناة TVO في قمة الأحترافية و المحايدة (رغم إنه يهودي !!)

حتي في أمريكا اللي هي أكتر دولة في العالم الغربي متحيزة لاسرائيل برضه فيه الرأي و الرأي الأخر .... يعني فوكس نيوز معروفة انها يمينية و متحيزة لاسرائيل بشكل سافر انما تلاقي CNN محايدة أكتر شوية (مش قوي بس أكيد أرحم من فوكس ) و فيه مقدمين برامج كتير مشهور عنهم الحياد و الموضوعية

العدوان الأخير ضد غزة سافر و سافل لدرجة إن ما فيش حد قادر يدافع عنه اللهم إلا عتاة المتعصبين .... امبارح بس مقدم البرامج جون ستوارت و هو بيقدم برنامج أخبار بطريقة فكاهية إسمه The Daily Show ... بيجيب أخبار و يعلق عليها بطريقة كوميدية و كتير بتبقى كوميديا سوداء .... الراجل خصص الفقرة الأفتتاحية كلها للهجوم علي اسرائيل و علي أمريكا بسبب تحيزها لاسرائيل .... علما بانه يهودي !! ....و ختم البرنامج باستضافة مذيع من ال-NBC بتاع برنامج إسمه Meet the Press و ده من أقوي و أقدم البرامج الأخبارية ...استضافه و تناقشوا في العدوان على غزة و برضه هاجموا اسرائيل

كرستيان أمانبور و ديه كبيرة مراسلي ال-CNN مسكت المتحدث باسم الجيش الأسرائيلي و مسحت بيه البلاط و ما سابتش أي ادعاء زي ملاحقة مطلقي الصواريخ و حق اسرائيل المشروع في الدفاع و الكلام الخايب ده إلا ما فندته و وضحت كذبه .... من غير لا تشنج و لا زعيق

بره أمريكا بقي و بالذات في أوروبا فحدث و لا حرج ...البي بي سي ورلد مثلا بتهاجم اسرائيل عيانا بيانا في حرب غزة الأخيرة ديه .... مراسلة البي بي سي كانت بتنقل الخبار أنبارح و هي مدمعة أصلا و برضه مسكت المتحدثة باسم الخارجية الاسرائيلية و مسحت بيها البلاط و قاطعتها كذا مرة علشان تكدبها

من الملاحظ برضه إن المظاهرات المؤيدة للفلسطينين عمت أوروبا و أمريكا و كندا .....حتي الدانمارك و هي طول عمرها الصراحة مع العرب و الفلسطينيين بالذات ما منعتهاش مناوشات رسوم الكاريكاتير من انها تطلع مظاهرات مناصرة لغزة و ضد اسرائيل

الملخص ...الأعلام الغربي فيه و فيه .... الصورة الكاملة بره موجودة لللي عايز يتعب نفسه و يدور على الحقيقة .... جزء كبير من الصورة السلبية للعرب و المسلمين في الخارج احنا السبب فيه ... احنا ما بنعرفش نتكلم بلغة الناس بره ...مش قصدي لغة بمعني انجليزي و لا فرنساوي قصدي مش عارفين نخاطب عقلية الناس اللي بره ....و النقطة ديه بالذات اسرائيل بتتفوق فيها ..... الأحداث الأخيرة بتاعة غزة ديه مش محتاجة تفكير الناس كلها بره شايفين و فاهمين و اغلبهم مع الفلسطنيين ضد الأسرائيليين

[شاب مصري]

شكرا جزيلا يا هشام باشا

وضحت لي جزء كبير من الغموض ...

[samehelassad]

الله ينور عليك يادكتور هشام جبت من الاخر.

والخلاصة عشان تقدر تاخد حقك والناس تسمعك وتفهمك وتحترمك. لازم يكون ليك لوبي قوي ولية نفوذ زي اليهود. ولازم تقدر تتكلم بلغة يقدر يفهمها عقولهم زي مابيعملو اليهود.

لازم نفكر ونخطط بدل مانقعد نشتم ونعيط. ولا ننسى ان الله لايغير مابقوم حتى يغيروا ما بانفسهم. الناس هناك لا يخاطبو بالعواطف.

[Torontotruk]

مش زى عمرو خالد jdw:: بعد الصور المسيئة سافر الدنمارك وباسلوبة المخاطب للقلوب ماحدش سمعه...لان الناس في اوروبا لازم تخاطب عقولها.

[nizza la bella]

يا شاب مصرى اية الحماس دة انت فاتح مواضيع فى كل حتة :lol:

انت بتجيب الوقت دة منين jdw:: :lol:

[د هشام ابراهيم]

شكرا جزيلا يا هشام باشا وضحت لي جزء كبير من الغموض ...

الله ينور عليك يادكتور هشام جبت من الاخر.

الله يخليكم يا اصدقائي الاعزاء

تكملة علي الموضوع النهارده في برنامج توني هاريس علي ال-CNN جاب ممثل الأمم المتحدة في غزة و خلاه يواجه متحدث رسمي اسرائيلي كان بيبرر قصف المدرسة التابعة لل-UN بوجود أطلاق صواريخ من محيط المدرسة ... الراجل بتاع الامم المتحدة بهدل المتحدث الأسرائيلي و كشف كذبه للعالم كله و زنقه في حكاية "محيط" ديه و انتزع اعتراف منه إن ما فيش حاجة حصلت من داخل المدرسة تبرر العدوان الوحشي اللا انساني

[ghallab]

اغلب الناس فى كندا ملهومش فى السياسه ولا اللى بيحصل بره كندا

[Torontotruk]

اغلب الناس فى كندا ملهومش فى السياسه ولا اللى بيحصل بره كندا

ياعزيزي النشرة الجوية آخرها امريكا و لو جابوا بلدين في اوروبا يبقي كويس...صدق او لا تصدق فيه كندنين مايعرفوش غزة فين ؟كل ايلي يعرفوه في العالم كله افغانستان ..طبعا و امريكا....طب خد دي جاري عنده 48 سنة كندي ابا عن جد لغاية الاسبوع اللي فات فاكر ان الاهرامات في اليونان ...واخيرا في ناس كنديين كتيرة عايشين في كيبيك سيتي عمرهم ماخرجوا منها...حتي ماراحوش مونتريال.

[د هشام ابراهيم]

.......صدق او لا تصدق فيه كندنين مايعرفوش غزة فين ؟......

أصدق طبعا و ده طبيعي جدا ... هو كام واحد في مصر يعرف فين جواتيمالا و لا تاريخ الصراع العسكري بين نيكاراجوا و هندوراس ؟!!!

[ghallab]

.......صدق او لا تصدق فيه كندنين مايعرفوش غزة فين ؟......

أصدق طبعا و ده طبيعي جدا ... هو كام واحد في مصر يعرف فين جواتيمالا و لا تاريخ الصراع العسكري بين نيكاراجوا و هندوراس ؟!!!

انا معاك يا دكتور ان مفيش حد فى مصر يعرف الصراع العسكرى بين نيكاراجوا و هندرواس بس الناس هنا اغلبهم ابيض خالص الناس فى مصر مش اوى كده

[د هشام ابراهيم]

انا معاك يا دكتور ان مفيش حد فى مصر يعرف الصراع العسكرى بين نيكاراجوا و هندرواس بس الناس هنا اغلبهم ابيض خالص الناس فى مصر مش اوى كده

الحقيقة يا سيدي الفاضل أنا مش حاعرف أحكم علي الأغلبية في كندا بتعرف إيه ...بس أنا أقدر أحكم علي محيط عملي المحدود اللي هو المستشفي ...مستشفي فيها أطباء و تمريض و عمال نظافة و موظفين و محاسبين و مهندسين و متطوعين و طلبة و عيانين إلخ ...ما فيش يوم بيعدي من ساعة حرب غزة إلا ما يجي سيرة الشرق الأوسط و فلسطين و اسرائيل .... فيه ناس تعرف تفاصيل كتير و ناس عندها قشور و ناس افكارها غلط انما الموضوع معروف للاغلبية في المستشفي

[Torontotruk]

.......صدق او لا تصدق فيه كندنين مايعرفوش غزة فين ؟......

أصدق طبعا و ده طبيعي جدا ... هو كام واحد في مصر يعرف فين جواتيمالا و لا تاريخ الصراع العسكري بين نيكاراجوا و هندوراس ؟!!!

انا معاك يا دكتور ان مفيش حد فى مصر يعرف الصراع العسكرى بين نيكاراجوا و هندرواس بس الناس هنا اغلبهم ابيض خالص الناس فى مصر مش اوى كده

الشعب المصري مثقف وواسع الافق و مفكر و مكافح...لكن دول عايشين في رفاهية منذ نعومة اظافرهم الحرب اللي شافوها استمرت 12 دقيقة مع الانجليز ومات فيها 9 عساكر عملينلوهم مقبرة فخمة...من 400 سنة...حيشغلوا دماغهم ليه...في كندا هوكى,,,عربيات ,,,بيرة...هي دي المواضيع المهمة اللي بتشغلهم...

[ghallab]

.......صدق او لا تصدق فيه كندنين مايعرفوش غزة فين ؟......

أصدق طبعا و ده طبيعي جدا ... هو كام واحد في مصر يعرف فين جواتيمالا و لا تاريخ الصراع العسكري بين نيكاراجوا و هندوراس ؟!!!

انا معاك يا دكتور ان مفيش حد فى مصر يعرف الصراع العسكرى بين نيكاراجوا و هندرواس بس الناس هنا اغلبهم ابيض خالص الناس فى مصر مش اوى كده

الشعب المصري مثقف وواسع الافق و مفكر و مكافح...لكن دول عايشين في رفاهية منذ نعومة اظافرهم الحرب اللي شافوها استمرت 12 دقيقة مع الانجليز ومات فيها 9 عساكر عملينلوهم مقبرة فخمة...من 400 سنة...حيشغلوا دماغهم ليه...في كندا هوكى,,,عربيات ,,,بيرة...هي دي المواضيع المهمة اللي بتشغلهم...

اتفق معاك و طبعا بيشوفوا المواضيع بصوره مختلفه عنا

[د هشام ابراهيم]

الشعب المصري مثقف وواسع الافق و مفكر و مكافح...لكن دول عايشين في رفاهية منذ نعومة اظافرهم الحرب اللي شافوها استمرت 12 دقيقة مع الانجليز ومات فيها 9 عساكر عملينلوهم مقبرة فخمة...من 400 سنة...حيشغلوا دماغهم ليه...في كندا هوكى,,,عربيات ,,,بيرة...هي دي المواضيع المهمة اللي بتشغلهم...

لا يا maitre ما ينفعش التعميم علي الشعب المصري و لا ينفع التعميم علي الشعب الكندي برضه .... دول فيهم و فيهم و دول برضه فيهم و فيهم .... حكاية احترام ضحايا الحروب ديه سواء تسعة و لا تسعين ديه نقطة حسنة في حقهم

[samehelassad]

الصراحة ياجماعة موضوع الثقافة دة موضوع صعب اوي.

الواحد مش عارف يقول اية ولا اية.

في مصر (واكيد كل الشعوب) تلاقي اللي يقولك الشعب مشغول في الجري ورا لقمة العيش. يجيب منين وقت يفكر اصلا عشان يدور يزود ثقافتة ومعرفتة الفكرية.

والتاني يقولك لو الشعب لقى وقت يفكر كان قلب الحكم على اللي فية من زمان بس الناس دايخة في ساقية السعي وراء الرزق. كل الكلام دة سمعتة من كل اعضاء الطبقة المتوسطة في مصر. اللي هما اكتر الناس علما والتساعا افقيا !!!!!!!!!!!!. (اعتقد دة لرغبتهم اكتر في وقت زيادة للاشباع هوايتهم او الشيء التاني اللي يحبوا يعملوة غير السعي ورا لقمة العيش. ودة اللي بيكون في الغالب تثقيفي مع اختلاف نوع الثقافة)

الغريب جدا ان دول اللي شايفين ان السعي وراء الرزق لايسمح للفرد بمجال انة يزيد ثقافتة الفكرية ايا كان اشكالها عشان انغماسة في همومة. وتوقعهم الشديد ان لو الواحد اصبح يملك من الرفاهية مايجعلة غير منصب بهذا الشكل في الجري وراء لقمة العيش. شايفين ان الطبقة الغنية من الشعب والتي بالتالي عندها سعة من الرزق. وعدم خوف من بكرة. اقل ثقافة في العموم (دة من وجهة نظرهم). واولادهم اقل اهتماما بموضوع الثقافة برغم قدرتهم المادية على تثقيف نفسهم. وتجد ان ميولة اما هوائية او تجارية. ولست اطلاقا هموم تثقيفية. ولا تجد له اتجاة فكري.

وجي نظري واللي تعكس اللي شوفتة فعلا. ان التعميم هو اكبر خطاء, بل هو الجهل بحد ذاتة.

و بلعكس اكتر الناس نجاحا الذي تجدة يماريس عمل وهواية. او على الاقل يعرف تمام المعرفة ماذا يحب ان يفعل غير الاهتمام بلقمة العيش ويحدد وقت لها مهما كانت الظروف. ومهما كانت ضغوطة.

وهذا فعلا مايؤدي الي الابداع والتفوق. وتجد افرادا من كل الطبقات متوسطة وغنية وفقيرة يتسم بالنبوغ. والفكر الراقي. والذهن الواعي. والاستقرار النفسي.

وبالتالي لا اعتقد ان الوضع المادي ممكن ان يكون سبب تقدم او تاخر فرد. برغم اهميتة القصوي للشعوب والدول. ولكن لا اعتقد على مستوى الافراد.

[Nassarlink]

اغلب الناس فى كندا ملهومش فى السياسه ولا اللى بيحصل بره كندا

ياعزيزي النشرة الجوية آخرها امريكا و لو جابوا بلدين في اوروبا يبقي كويس...صدق او لا تصدق فيه كندنين مايعرفوش غزة فين ؟كل ايلي يعرفوه في العالم كله افغانستان ..طبعا و امريكا....طب خد دي جاري عنده 48 سنة كندي ابا عن جد لغاية الاسبوع اللي فات فاكر ان الاهرامات في اليونان ...واخيرا في ناس كنديين كتيرة عايشين في كيبيك سيتي عمرهم ماخرجوا منها...حتي ماراحوش مونتريال.

انا لي راي تاني يا تورونتو

خلال ال14 يوم الي فاتوا يوميا علي راديو كندا الساعه 9 صباحا بتوقيت القاهره علي قناة TV5

مده النشره الاخباريه 20 دقيقه منهم ميقلش عن 5 دقائق عن غزه بشكل محايد

وكمان خلفيه المزيع او المزيعه صوره ام بتصرخ من هول الحرب ومكتوب غزه بالعربي وبالانجليزي

يعني الناس هناك مبتتفرجش علي الاخبار دي هناك ولا بيشغلوا التلفزيون

ولا الاخبار دي بتتبث لينا في الشرق الاوسط بس

[Virus]

بمناسبة الإعلام الغربي..لدينا شغالة فلبينية وجامعية..عندما رأت ما تفعله إسرائيل في غزة اندهشت جداً جداً..وتعجبت كيف أن اسرائيل الدولة العظيمة المتحضرة تذبح الأطفال الفلسطينيين هكذا ولما جرجرتها في الكلام شوية أفادت بالتالي ..

- اسرائيل دول عظيمة جدا عندما ينطق اسمها في الفلبين يكون له وقع كبير في القلوب!!

- القدس عاصمة إسرائيل وهي أرض الميعاد!!!!!

- الإسرائيليون هم من هزموا المصريون في 73 ثم تعطفوا علينا بسيناء لأنهم لم يريدوا الحرب ولكن فقط تلقيننا درسا قاسيا!!!!!!!!

-الإسرائيليون هم من بنوا الأهرام ولكن المصريين سرقوا الإنجاز ونسبوه لأنفسهم!!!!!!!!!!!!!!!!!!!!!!!!!!!!!!!!!!!!!!

هذا بالضبط ما قالته بكل صدق وعفوية وهو أيضا ما أخبرتني أنهم يدرسوه في المدرسة كجزء من التاريخ..وماخفي كان أعظم

وأترك لكم التعليق :lol: wst::

تم تعديل 10 يناير 2009 بواسطة Virus

[ghallab]

بمناسبة الإعلام الغربي..لدينا شغالة فلبينية وجامعية..عندما رأت ما تفعله إسرائيل في غزة اندهشت جداً جداً..وتعجبت كيف أن اسرائيل الدولة العظيمة المتحضرة تذبح الأطفال الفلسطينيين هكذا ولما جرجرتها في الكلام شوية أفادت بالتالي ..

- اسرائيل دول عظيمة جدا عندما ينطق اسمها في الفلبين يكون له وقع كبير في القلوب!!

- القدس عاصمة إسرائيل وهي أرض الميعاد!!!!!

- الإسرائيليون هم من هزموا المصريون في 73 ثم تعطفوا علينا بسيناء لأنهم لم يريدوا الحرب ولكن فقط تلقيننا درسا قاسيا!!!!!!!!

-الإسرائيليون هم من بنوا الأهرام ولكن المصريين سرقوا الإنجاز ونسبوه لأنفسهم!!!!!!!!!!!!!!!!!!!!!!!!!!!!!!!!!!!!!!

هذا بالضبط ما قالته بكل صدق وعفوية وهو أيضا ما أخبرتني أنهم يدرسوه في المدرسة كجزء من التاريخ..وماخفي كان أعظم

وأترك لكم التعليق :sad: :sad:

ساره بالين الى كانت مرشحه نبقى نائب رئيس فى الانتخابات الامريكيه مكانتش تعرف ان افريقيا قاره و لا مكانتش تعرف ان فى دوله اسمها جنوب افريفيا كانت فاكره ان جنوب الفريقيا هو الجزء الجنوبى من افريقيا