والله وكبرتوا ... وبقيتوا عرايس !!

[مصرية الهوى]

قاعدة في أمان الله بقرأ الجرنال .. فجأة بلاقي خبر مفرح جداً جداً جداً :

ابنتا بوش تتسابقان للزواج في البيت الأبيض قبل انتهاء فترة رئاسته الثانية ..

اقرأ الخبر وزغررررط ..

الله .. ايه الخبر الجميل ده ... وفريرا على التليفون ... وطلبت نمرة البيت الأبيض .. ما اهو احنا برضه اصحاب واجب وبنفهم في الأصول .. وخصوصا ان الخبر ده خاص بعمنا الكبير .. يعني مش معقول برضه منباركلوش ...

المهم .. ردت عليا وحده ست ..

جيجي:ازيك ياحبيبتي وعامله ايه ؟

الست: كويسة الحمد لله ..

جيجي: انتي اسمك ايه ؟ ..

الست: اسمي هيلين ..

جيجي: اول حاجة انا عايزه اباركلك بالمناسبة الجميلة اللي حاصله عندكو في البيت الكبير ..

هيلين : الله يبارك فيكي يا حاجه .. عقبال عيالك ..

جيجي : ياريت يا بنتي تديني الحاج والا الحاجة .. عشان اباركلهم ..

هيلين : معليش يا طنط الحاج في الحمام والحاجة ريحة السوق عشان تشتري جهاز البنات ..

جيجي: طب مش مشكلة ارغي معاكي شويا .. لحد ما الحاج يخرج من الحمام بالسلامة ..

هيلين: تفضلي يا حاجة ..

جيجي : طب يا هيلين انتي مبسوطة في الشغل يا روحي ؟

هيلين : ايوى يا طنط .. انتي بتسألي ليه ؟

جيجي : لا بس كده يا بنتي .. اصله زي ما انتي عارفه .. يعني .. بيطلعوا اشاعات وبيقولوا كلام وحش على البنات اللي بيشتغلوا حداكم ..

هيلين: قصدك مونيكا يا طنط ؟

جيجي: ايوى يا حبيبتي .. وانا بصراحة خايفه عليكي .. وعلى سمعتك وسمعة اهلك ..

هيلين: لا يا طنط متقلقيش .. انا بنت ناس مؤدبة ومتربية .. وكمان الاشكال الموجودة دلوقتي ..بتكره الواحد في الانحراف .. والحاج معندوش وقت للصياعة ... من البيت للبتنجان ومن البتنجان للبيت ..الله يرحمك يا ايام كلينتون.. ايام النايت كلوب والسهر والونس ..

جيجي : بس يا حبيبتي الناس زي ما انتي عارفه .. مورهاش غير الكلام .. فعشان كده ياريت يا حبيبتي تشتغلي شغلانة غير دي ..

هيلين : زي ايه يا طنط ؟

جيجي: يعني .. تبيعي كبده في شوراع واشنطن .. والا تفتحيلك محل تبيعي فيه جلاليب وايشاربات ومناديل .. حاجه زي كده .. تنفعك والناس متجيبش في سيرتك .. والا تقعدي في البيت تستني ابن الحلال احسنلك ..

هيلين : ياريت والله ياطنط .. يا ريت لو تعرفي حد يتوسطلي في شغل احسن من ده .. الحاج خرج من الحمام يا طنط .. اندهولك ؟؟ ..

جيجي: ياريت يا حبيبتي ...

عمنا الكبير : ايوى .. سلامو عليكو ..

جيجي : وعليكم السلام ورحمة الله وبركاته .. اهلا اهلا يا حاج .. ازيك ؟

عمنا الكبير : الحمد لله ..

جيجي : ألف ألف مبرووووك يا حاج جواز البنات ..

عمنا الكبير : الله يبارك فيكي .. عقبال عيالك يارب ..

جيجي : في حياتك .. والله يا حاج انت متتصورش فرحتي كانت عامله ازاي لما قريت الخبر الجميل ده .. دي الدنيا مكنتش سيعاني من الفرح .. بناتك الامامير يستاهلوا كل خير .. والله والبنات كبرت وبقت عرايس .. والله زي ما يكون امبارح .. لما كنتوا تزورونا في البلد .. وكانوا يادوب لسا في اللفة ..

عمنا الكبير : الله يخليكي .. انتي عارفه جواز البنات سترة .. وضل راجل ولا ضل حيطة .. والبنت ملهاش الا بيت جوزها ..

جيجي : وان شاء الله يا حاج تكونوا سألتوا عن الخطاب ..

عمنا الكبير : اه .. اكيد .. بس اتطمني .. طلعوا عيال حلال .. شباب طيبين ومتربيين ويقدروا يفتحوا بيت ويتحملوا مسئولية .. هنري وجاي اولاد ناس بحق وحقيق ..

جيجي : الحمد لله .. ريحت قلبي الله يريح قلبك ..

عمنا الكبير : كمان جاي خطيب باربارا بيشتغل عندنا هنا ..

جيجي : والله !! .. طب كويس يا حاج .. يعني بتشوفه وبتعرف اخلاقه ... اه صحيح يا حاج بيقول انه حلو ووسيم .. وفي الجامعة كان من اجمل خمسين واحد ( اوعدنا يارب :unsure: )

عمنا الكبير : اه فعلاً .. بس ده مش مهم .. احنا بنشتري راجل .. لا فلوس ولا وسامة ولاحاجه .. اهم حاجه الاخلاق

جيجي : درر .. درر .. كلام في منتهى الحكمة والله يا حاج .. اهم حاجه انه ابن حلال .. تتطمن على بنتك معاه .. طيب ياحاج .. الحاجه عامله ايه ؟

عمنا الكبير : كويسة الحمد لله .. لولا انها مهدودة حبيتن .. يعني .. كل يوم بتنزل هي والبنات .. يشتروا هدوم وحاجات البيت .. عارفه جهاز البنات بيبقى متعب قد ايه ..

جيجي : ربنا يكون في عونها .. ربنا يفرحها ويطمن قلبها عليهم وتشوف عيال عيالهم

عمنا الكبير : في حياتك .. الا بأقولك يا أم حسنين .. انتي سمعتي الكلام اللي اتقال على بناتي ؟

جيجي : خير .. اللهم اجعله خير ..

عمنا الكبير: حسبي الله ونعم الوكيل .. فيه ناس بتقول على بناتي انهم بيشربوا خمرة ..

جيجي : خمرة !!!! .. يالهووووووووووووووووووووووووووووي .. جاه قطع لسانه اللي يتكلم بنص كلمة وحشه على بناتك .. دول بناتك اشرف من الشرف .. يا مصيبتي .. ازاي قلالات الحيا بيقولوا كده .. خمرة مرة وحده .. على الاقل كانوا يقولوا سجاير :blink: ... ربنا ياخدهم .. اللي عايزين يشوهوا سمعة بناتك .. ويطلعوا كلام بطال عليهم .. بس الحمد لله .. اهو الحق ظهر وبان .. والبنات هيتجوزوا ..

عمنا الكبير : الحمد لله .. بس عشان الناس تعرف .. ان بناتي اكتر بنات متربية في الدنيا ..

جيجي : انت هتقولي .. دول تربيتك يا حاج وتربية الحاجه لورا .. وفي حد يقدر يتكلم على تربيتك :angry: ..

عمنا الكبير : ربنا يخليكي ..

جيجي : طب يا حاج وناويين تعملوا الفرح فين ؟

عمنا الكبير : في الجنينة عندنا.. كمان اسبوع بالكتير وهنبدأ نعلق الزينة واللمبات ونصف الكراسي .. ونظبط الكوشة ..

جيجي: كويس .. واهو بكده يحفظوا فلوسهم .. يعني لازمتها ايه البعزقة وفنادق الفايف ستارز والكلام ده ..

عمنا الكبير : معاكي حق .. الحمد لله الحاجه قدرت تقنع البنات بكده ..

جيجي : عن اذنك يا حاج دلوقتي .. وابقى سلملي على البنات وامهم ..

عمنا الكبير : ربنا يخليكي .. تعبناكي معانا .. و انتي بتتكلمي دولي

جيجي : متقولش كده يا حاج ولا تعب ولاحاجه .. ده تعبكوا راحة .. ولو على الفاتورة .. اول حاجه انا مشتركة في خدمة الاصدقاء يعني هاخد ديسكاونت .. وكمان اصحابي في المحاورات هيساعدوني ..

عمنا الكبير : محاورات ؟

جيجي : ايوى يا حاج .. دول ناس صحابي زي العسل .. بيسلموا عليك اوي اوي .. ويباركولك وهما فرحانين جدا جدا ..

عمنا الكبير : ربنا يخليهم .. ابقي سلميلي عليهم

جيجي : يوصل يا حاج .. مع السلامة

عمنا الكبير : مع السلامة ..

انتهت المكالمة ..

وقررت التالي ..

لازم نعمل اجتماع طارئ وعاجل في المحاورات .. عشان نتفق على هدايا العرسان .. عايزين نفاجئ الحاج والحاجة ويعرفوا ان احنا بنعرف الاصول :sad: .. وبعدين دول مش أي حد .. دول بابارا وجينا .. عايزين نجيب لهم حاجات معتبرة وعليها القيمة .. وكمان برضه عايزين نلم فلوس عشان ننقط العرسان بيهم ... والمفاجأة الكبيرة اوي اوي .. عايزين نفاجأ الحاج بشعبولا وفيفي عبده :angry: .. عايزين نتفق مع شعبولا عشان يغني في الفرح وفيفي عبده ترقصلنا .. بس لازم نمسح اغنية انا بكره اسرائيل من الميموري بتاعت شعبولا .. عشان مايسودش وشوشنا قدام الحبايب ..

والا ايه رايكم ؟؟