لماذا لا تظهر موضوعات كندا في شريط المواضيع

[ايهاب سالم]

لاحظت أن موضوعات باب الهجره إلى كندا أصبحت لا تظهر في شريط المواضيع حتى لو كانت أخر موضوع تم تحديثه

[Scorpion]

الفاضل ايهاب ...

كان مقررآ القيام بالإعلان عن هذا الأجراء الذي تم اتخاذه بخصوص حجب مواضيع كندا من شريط العناوين ... و لكن حضرتك سبقتنا بسؤالك هذا مما يجعلني شخصيآ ( و كممثل عن فريق المشرفين ) أستغل موضوعك هذا لتوضيح الأسباب بدلآ من فتح موضوعآ جديدآ ...

أعتقد ان حضرتك ....مثل الكثيرين .... لاحظت طغيان المواضيع التي تدور حول الهجرة الي كندا بصورة لن أقول مبالغآ فيها ... و لكن بصورة تصل الي مرحلة الهوس بالفعل ... لدرجة الطغيان علي جميع الموضوعات الأخري ... أصبح لكل سؤال مهما كان موضوعآ منفصلآ ... و يا ليتها كلها اسئلة جادة ... و لكن معظمها يدور حول قلق و ترقب من يرغب في الهجرة ... أو نفس الأسئلة التي تتكرر و كلها بمواضيع منفصلة دون أدني أهتمام بالبحث ... لدرجة متي فتحت في أي وقت المحاورات تجد ان شريط العناوين يحمل غالبآ 80% عناوين تدور حول الهجرة الي كندا ... طامسة خلفها مواضيع أخري تتفاوت أهميتها .. و لكنها موجهة أيضآ الي معظم قراء محاورات المصريين الذين لا تمثل لهم الهجرة الي كندا أي أهمية ...

بدأنا في فتح مواضيع تدعو الي "ترشيد" الكتابة حول كندا .. أو عدم اتخاذ المحاورات كمجرد مكتب اعلامي تابع لسفارة كندا ... و لكن من الواضح ان الموضوع كان في باب لا يطرقه من يكتبون في باب الهجرة الي كندا ... لأن الأمر لم يهدأ بل تزايد بصورة مريضة ... لذا تم فتح النقاش بين المشرفين للعثور علي الحل الأمثل لتلك الظاهرة .. و أصدقك القول أن معظمنا كان يميل في البدء إلي ايقاف الكتابة تمامآ و منع اي إضافات جديدة في هذ الباب لفترة زمنية ... و لكننا في النهاية وصلنا إلي هذا القرار بتجربة حجب عناوين هذا الباب الجديدة من الشريط المتحرك لنري كيف ستكون النتيجة في النهاية ....

قد يكون هذ قرارآ آخر من سلسلة القرارات التي لا تروق للبعض و نصل اليها من فترة للأخري عندما تستجد ظاهرة غير عادية .. متحملين اتهامنا بالديكتاتورية علي أن نحيد علي قرار تم أخذه بعد تجارب و دراسات طويلة جدآ ... و نؤمن الي أقصي حد أنه في صالح المحاورات ....

أتمني أن تكون إجابتي واضحة و بالأخص مقنعة لبيان سبب عدم ظهور العناوين حول مواضيع الهجرة الي كندا.

تحياتي

عن فريق المشرفين

سكوربيون

[حسام يوسف]

قبل أن يتقدم باشمهندس ايهاب سالم بسؤالة

سمعت هذا التساؤل

ولاحظتة بالفعل

وبسرعة شوشو اشتغل

(طبعا احنا فى رمضان شوشو المتاح شوشو النفس)

قلت اة انا عارف الادارة واخدة موقف من الهجرة وكندا والمهاجرين فى الفترة الاخيرة

لكن قبل ما أصدر حكمى وأزعل أو استفسر وأشتكى

سألت نفسى

همة عملوا كدة لية؟

ومع انى من حزب كندا بلادى السمرا بلادى الحرة بلادىمع الاعتذار لوردة الجزائرية

(ومحدش يقولى ازاى تحرف نشيد مصرى وانت مش بتحب مصر والكلمتين اللى مالهومش لازمة دول والله بحبها بس عايز اعيش أحسن)

لقيت ان عند الادارة حق

ناس داخلة المنتدى جديد

وطاخ طاخ فى أسئلة لو تعبوا نفسهم شوية هيلاقوا اجابات

وطاخ كتابة بحروف لا انا عارف عربى ولا انجليزى

حرف الحاء سيفين

والعين ثرى

وطريقة مايعلم بيها الا ربنا

حاسس ان احنا فعلا هنبقى شونبونجو مش مصر ال 7 الاف سنة اللى علمت الناس الكتابة

على استظراف-انا اسف يعنى

وبجد والله باب كندا بقى شكلة سيئ

وخلى المنتدى عندة مشاكل فى الشكل والنظام

ومع انى من بتوع كندا

لكنى مع الاجراء

لكن لية عتب لو تسمحلى الادارة

ان يتقال الاجراء ويعلن قبل ما يتنفذ

ياريت العتب دة مايعتبرش سبب لانذارى

عشان انا عارف الأخ عصام شوقى شكلة عايز يخدمنى فى انذار

كل سنة وانتوا طيبين يا جماعة

ادارة

واعضاء

وحالمين بالهجرة

ورافضين لمبدأ الهجرة

وياريت كلنا نتوحد ورا حملة شيلوا ألغامكم

[الباشمهندس ياسر]

لقد اردت ان اتحدث فى هذا الامر الى الادارة

و لكن لانى ممن يرفض الهجرة شكلا و موضوعا خشيت

من ان يفهمنى البعض بصورة خاطئة

عموما

انا احى الادارة على هذا القرار

لان شكل المحاورات تحول بالفعل الى مكتب دعاية للهجرة

و اصدقكم القول لقد كففت عن دعوة معارفى الى منتدانا المصون

لما رايته من صديق دعوته الى المنتدى فاذا بى افاجى به وقد تحول

بكل حياته الى الهجرة وكأنها الجنة المفقوده

تم تعديل 26 سبتمبر 2008 بواسطة الباشمهندس ياسر

[مهاجرة]

فعلا اجراء سليم من قبل الادارة وانا لاحظت كثيرا انه هنالك مواضيع مكررة وانا ابقى ساعة بدور على موضوع انا متابعته وصار بالصفحات 2 و3 و4 و....

وكان الاخ س س قد بدأ بموضوع جيد جدا وهو

ملف كامل وشامل عن كندا

http://www.egyptiantalks.org/invb/index.php?showtopic=46014

وهو الموضوع عامل مثل الفهرس لجميع المواضيع بخصوص كندا واي واحد يحب يدور على موضوع معين يفتح الموضوع هذا ويدور فياريت الاخ س س يكمله ويكون على استمرار بتحديثه والاضافة اليه علشان بتسهل عملية البحث وكمان علشان لاتتكرر المواضيع

تقبلوا خالص تحياتي

[OmYazan]

انا عن نفسي اشوف ان شريط واحد لا يكفي لعرض مواضيع كندا، وإذا نظرنا للقرار نظرة جانبية نلاقي انا دة صحي اكتر للمهاجرين، عشان بيكون فيه اجبار على دخول الموضوع من بابه مش من عنوانه!!، يعني يضمن للاخرين قراءة مواضيعهم الي تاهت ومطلعتش في الشريط الاخباري.

ما ذنب الاخرين مشاركي الموضوعات الاخرى في طغيان مواضيع كندا عليهم في شريط العنوان، إن كان لكل مجموعة حاجياتها وغرضها من المحاورات ككل. انا أؤيد القرار لهذه اللحظة، استنتاجاً ان كل اعضاء الهجرة يدخلون باب الهجرة مباشرة بعد تسجيل الدخول.

[se_ Elsyed]

وكان الاخ س س قد بدأ بموضوع جيد جدا وهو

ملف كامل وشامل عن كندا

http://www.egyptiantalks.org/invb/index.php?showtopic=46014

وهو الموضوع عامل مثل الفهرس لجميع المواضيع بخصوص كندا واي واحد يحب يدور على موضوع معين يفتح الموضوع هذا ويدور فياريت الاخ س س يكمله ويكون على استمرار بتحديثه والاضافة اليه علشان بتسهل عملية البحث وكمان علشان لاتتكرر المواضيع

هو ده بقى لُب الموضوع ( اللب والسوداني والمقلة كلها )

يا أختنا الفاضلة س س مجرد عضو مثله مثل أي واحد ولكنه يتحمل أعباء تنظيمية ليس إلا ... وبالتالي ممكن أي زميل فاضل عايز يخدم الناس يكمل الفهرس بكل سهولة أو يساعدنا في ذلك ..

لكن - والكلام ليس موجهاً لحضرتك - .. ولكن إبتسم فأنت في العالم الثالث بتاع أغاني من عينة " هاتوا لي حبيبي " مع اقتباسي لعنوان هذه الأغنية من ا عادل ابو زيد ..

تخيلي حضرتك واحد طول بعرض قاعد حاطط إيه على خده وعايز الناس تروح تجيب له حبيبه وهو مش عايز يهز طوله وستعب أحسن يخس ...

بُصي حضرتك كده للمجتمع من حواليكي وشوفي كام واحد عايز حبيبه يجيله ..

وشوفي السلبية والإتكالية وأنتظار المبادرة من الأخرين ...

[iloveegypt]

بصراحة قرار عشرة على عشرة

لانه بجد اصبح الشريط ممل واحد قلقان علشان الفايل نمبر اتأخر وواحد زعلان علشان ملفه ضاع وواحد بيسأل كندا ولا استرالياوواحد بيسأل على الانترفيو كل وكل ده موجود بالتفصيل داخل باب الهجرة بس محدش عايز يقرأ

[حسام يوسف]

فعلا حاجات مش مهمة

الاهم هو البرص

[nona alawaal]

فعلا حاجات مش مهمة

الاهم هو البرص

و فيه حلجات تانية كمان اهم اللى عايز اسم بنت

الاسماء كتييييييييييييييييييييييييييييييييرة

بس ازاى لازم نفتح لها توبيك خاص

[حسام يوسف]

والله يا أخت نونا مش عايز انقل الخلاف من باب كندا لبرة

لكن كل اللى عايز اقولة

اه

باب كندا بة سلبيات

لكنها

أى السلبيات ليست حكرا على باب كندا

ومتحطيش اسم هدية ربنا باعتهالك

جنب

-----------

برضة دى غير دى

تقبلى تحياتى

[gadolly]

فعلا حاجات مش مهمة

الاهم هو البرص

:) :lol:

و فيه حلجات تانية كمان اهم اللى عايز اسم بنت

الاسماء كتييييييييييييييييييييييييييييييييرة

بس ازاى لازم نفتح لها توبيك خاص

لا لا في اهم من كدة, موضوع البقعة اللي في البنطلون

[Scorpion]

نظرآ لإنتفاء الغرض من هذا الموضوع بعد الرد علي الأستفسار الذي طرحه الفاضل ايهاب سالم ... و حتي لا يتحول هذا الموضوع الي مهاترات ننأي بها عن الأعضاء ... سيتم غلقه ....

كلنا ثقة في تفهمكم ...

عن فريق المشرفين

سكوربيون