كيف تعرف انك احد ابناء الجيل الموكوس؟

[joo]

كيف تعرف انك احد ابناء الجيل الموكوس؟

والجيل الموكوس هو جيلي جيل المواليد من 1975 وحتى 1988 اللى كانوا ضحية مجتمع تحول حديثا من قمة الاشتراكية لقمة الانفتاح فخرج الجيل بلا رموز فكرية أو ثقافية أو فنية أو حتى في الشكل والملبس..

عايز تتأكد أنك من الجيل الموكوس؟؟ راجع معايا..

1. اذا كان لبسك الصيفي في يوم من الايام مكون من مجموعة تيشرتات (كيلفن كلاين) مضروبة وبناطيل تلجي شارل ستون يا حبذا لو كانت ماركة انتربول التركية كنت تبقى ملك

2. اذا كان لبسك الشتوي في يوم من الايام مكون من مجموعة مختلفة من (الهاي كول) ترتدي فوقها قميص كاروهات أو جاكيت هافان.

3. اذا كنت تعشق مسرحيتي (العيال كبرت) و (مدرسة المشاغبين) وحفظت كل كلمة فيهما ثم فوجئت عند مشاهدتهما على الفضائيات ان التليفزيون المصري كان يخدعك طوال هذه السنوات ويعرض لك (ربع المسرحية)

4. اذا كانت الخيارات المتاحة امامك لمشاهدة فيلم في السينما هي فيلم نادية الجندى (نجمة الجماهير) وفيلم نبيلة عبيد (نجمة مصر الأولى) وفيلم عادل امام (مكانش ب قى زعيم لسه)

5. اذا كانت الخيارات المتاحة امامك لمشاهدة مسلسل في التليفزيون هي مسلسل أحمد عبد العزيز التاريخي أو مسلسل أحمد عبد العزيز الرومانسي أو مسلسل أحمد عبد العزيز الصعيدي

6. إذا كانت كل البنات من حولك معجبين بأحمد عبد العزيز ويرونه فارس أحلامهن (رغم قصر قامته وشنبه اللي مش عاطفي اطلاقا)

7. اذا كنت متابعا جيدا لسهرات التليفزيون الممتعة (اخترنا لك - تاكسي السهرة - بانوراما فرنسية))

8. اذا كنت شاهدت اثنين او اكثر من حفلات ليالي التليفزيون والتي كان الاعلان عنها يصحبه رقم الليلة (ليالي التليفزيون..الليلة السادسة والعشرين)...حتى جاء الاختراع اللى اسمه مارينا وقرروا ينقلوا الحفلات فيه لتقضى نحبها وتدفن بمقابر الساحل الشمالي

9. اذا كنت تشاهد عند عودتك من المدرسة أو الجامعة برنامج (أماني وأغاني) لتشاهد أحدث الكليبات المكررة يوميا متحملا في سبيلها سماجة مذيع البرنامج (احمد مختارأو جمال الشاعر)

10. اذا كنت تنتظر بلهفة برنامج (كلام من دهب) رغم مذيعه الأكثر سماجة طارق علام

11. اذا كنت عاصرت مشكلة ادمان الهيروين وحاصرتك تماما في الافلام والمسلسلات والاعلانات والصحف (جميع نجومنا ونجماتنا تقريبا لعبوا دور المدمن وتألموا وهم يطلبون "شمة واحدة" رغم ان المتعاطي لا تصبح حالته بهذا السوء إلا بعد أن يتعدى مرحلة الشم لمرحلة الحقن

12. اذا تكون عاصرت انحسار مشكلة ادمان الهيروين بعد ادراك الشباب لاخطاره واتجاه العاقلين منهم للحل السحري الأكثر أمانا ومتعة (الحشيش)!!!

13. اذا تكون شاهدت على الحجار مرتين في يوم واحد على نفس القناة... مرة العصر مرتديا التيشرت والشورت والنضارة الشمس وهو يغنى (يا اسكندرية يا مدوبانى) ومرة الفجر مرتديا الجلباب والجبة وهو يغني (صلينا الفجر فين)

14. اذا كنت اعتدت ارتداء الكاسكيت بشكل مقلوب حاميا قفاك من الشمس ولم يكن شكلك بتاع انابيب))

15. اذا كنت تمتلك مجموعة من روايات رجل المستحيل وملف المستقبل وتعتبرها قمة فى الادب..وكنت تقوم باستبدالها من المكتبة باعطاءه العدد وربع جنيه لتحصل على عدد آخر

16. اذا كنت قد عاصرت الصراع على قمة مبيعات الكاسيت بين عمرو دياب (قبل ان يتجه للعالمية التى لا يؤمن بها إلا هو ومجموعة من محبيه) ومحمد فؤاد (قبل ان يتحول لدب قطبي)

17. اذا كنت تترقب بشدة أى حفلة بها فقرة (عزب شو) وتستمتع بمحمود عزب وهو يقلد محمد منير ومحمد نوح

18. اذا كنت شاهدت (بولا بولا بالومبيلا) معجبا بالطفله الجميله وهي بتغني وانت معتقد ان معنا الجمله دي هي طيري طيري يا عصفوره بس بلغة الهنولولو

19. إذا كان قمة الثقافة والعلم في رأيك ان تشاهد بانتظام حلقات برنامج د.مصطفى محمود (العلم والايمان) رغم الاخطاء العلمية الجسيمة به

20. اذا كنت قد مشيت في شوارع المعمورة لتجدها كلها تستمع لأغنية (عبد القادر) للشاب خالد أو (حوا) لمجدي خوري أو شريط (سحراني) لايهاب توفيق

21. اذا كنت قد حضرت فرحا او اكثر استمعت فيه لاغنية (بدنا نتجوز عالعيد)

22. أن تكون قد عاصرت قنبلة (كابوريا) التي جعلت كل الشباب يزيل الشعر من جانبي رأسه ليبدو مثل (حسن هدهد) وبعدها عاصرت امم أفريقيا 1998 وشوفت الناس حالقاها زيرو زي حسام وابراهيم رغم انهم ماكانوش حالقين!!

23. ان تكون (امعانا فى الثقافة الموسيقية) قد اشتريت اصدار او اكثر من شريط الكوكتيل الغربي (واتس ناو97)

25. ان تكون شاهدت كليب المغنية حنان الشهير (اضحك بقى وافرجها ياعم).. واطلقت على المغنية بينك وبين اصدقائك لقب (المعزة)

26. اذا كنت تمتلك البومين أو أكثر لتجميع الستيكرز (صور لاعبين كرة أو شخصيات كارتون) حسب ميولك وقتها أو شوفت طاهر القويري ومراته وهم بيسلمو جوايز الشمعدان

27. اذا تكون قد منعت لعدة أيام من اللعب في الشارع بسبب خوف أهلك عليك من (السلعوة)

28. إذا كنت قد تابعت بشغف واحد من مسلسلات (ذئاب الجبل - المال والبنون - ليالي الحلمية - من الذي لا يحب فاطمة - الضوء الشارد)

29. اذا تكون قد شربت أكثر من مائتي زجاجة كوكاكولا في شهرين من أجل رحلة (البحث عن الجادون)

30. اذا اعتدت في الصيف ان تشغل الكاسيت بصوت عالي عصرا وتقف في البلكونة بالفانلة الداخلية والسلسلة وفي يدك كوب الشاي والسيجارة (لو كنت مدخنا) مستمتعا بسماع الموسيقى ومعاكسة البنات وانت متأكد من أن الحوار الدائر بينهن يدور حول وسامتك

31. اذا تكون قد استخدمت علبة جيل الشعر كلها مرة واحدة (لو كنت ابن ناس ومعاك فلوس) او قمت بفرد شعرك بكريم جلات (لو كنت ابن ناس برضه بس مش معاك فلوس) لتقوم بزحلقة شعرك ليبدو مثل عمرو دياب في أغنية نور العين

32. اذا كنت قد لعبت في طفولتك باحدى اشكال لعبة (الميكا نو) و قعدت تكسب في (البلي) وتعمل كيس كبير وتيجي والدتك ترميه في الشارع معاقبة لك

33. اذا كنت قد حضرت وقت امتازت فيه أسماء الشهرة للسيارات الفاخرة بالرومانسية الشديدة (الخنزيرة - التمساحة - البودرة – الشبح)

34. اذا كنت قد اشتريت (بلوفر تملى معاك) بالوانه الشهيرة الابيض والاسود والبترولي

35. اذا شاهدت يوميا بعد الافطار في رمضان برنامج (بدون كلام) الذي يقدمه الممثل حسن مصطفى والذى اعتاد ان يستضيف زوجته ميمي جمال في أحد الفريقين وان يتحيز للفريق الذي تشارك فيه ويقوم بتغشيشهم

36. ان تكون قد لاحظت حسن مصطفى وهو يميل على اذن فيفي عبده ليقرأ لها اسم الفيلم في الورقة (لم تكن قد تعلمت القراءة بعد)

37. اذا شهدت النجاح الساحق لاغنية حمدي باتشان (ايه الاساتوك ده .. اللى ماشي يتوك ده)

38. اذا شهدت تحويل نفس الاغنية لاعلان مسحوق غسيل سافو بمشاركة حمدي باتشان والموديل الأشهر في مصر وقتها نسرينا

39. اذا كنت قد شهدت انحدار ذوق ذكور مصر لدرجة جعلت وفاء عامر ملكة للأغراء ونهلة سلامة نموذج للأنوثة وجعلت هيات م تغوي جميع الرجال بجاذبيتها

40. اذا كنت قد شاهدت نادي الزمالك يترك أفضل لاعب في مصر (رضا عبد العال) يرحل للغريم التقليدي الأهلي بسبب رفض طلبه لزيادة راتبه السنوي برقم ضخم للغاية (خمستاشر ألف جنيه)

41. اذا كان المسلسل الكوميدي المفضل لك في الابتدائية هو (بكيزة وزغلول) وفي الأعدادية هو (وانت عامل ايه) وفي الثانوية (يارجال العالم اتحدوا) ... خا صة شخصية بطرس منقريوس التي لعبها النجم حسن حسني.

42. اذا طاردتك ايمان الطوخي لفترة من حياتك .. تجدها صباحا بطلة لمسلسل الأطفال (كوكي كاك) وعصرا مغنية تقول (انا من النظرة الأولى شفت الدنيا بلون الورد) ومساءا ممثلة تلعب دور استر بولونسكى فى رأفت الهجان

43. اذا كانت الألعاب الألكترونية المتاحة لك تتراوح بين الاتاري الاسود (ابو دراعين كبار) او كومبيوتر صخر التعليمي (صاحب الالعاب السخيفة) أو الاتارى الفاميلى ( سوبر ماريو وكابتن ماجد طبعا) أو الأميجا أبو ديسكات (ولعبته الشهيرة سينس بول)

44. اذا كنت قد تابعت بشغف مسلسل (الرقص على سلالم متحركة) وتحدثت مع اصدقاءك عن شخصياته (دينا طحن ووديدة صاروخ وناصر اورجنايزر ونفيسي الدحيح)

45. اذا سهرت لنهاية الارسال في التليفزيون المصري واستمعت الى اوتار الليل بصوت عادل هاش م أو مدحت مرسي

46. اذا شاهدت مسلسلا للمخرج حسام الدين مصطفي ورأيته في أخر التتر بصلعته اللامعة وسلسلتة الذهبية ينظر للكاميرا بابتسامة غريبة وهو يشير بابهامه لأعلى

47. اذا كان مسلسل الأطفال المفضل لديك في رمضان يتراوح بين (سلاحف النينجا) و (باور رينجرز))

48. اذا قمت بتركيب (موتور) لتحريك الاريال فوق السطوح وقمت بتزويده بجهاز (بوستر) لتقوية الاستقبال وسهرت في ليلة صيفية تحرك الاريال بحثا عن قنوات المستقبل والتي في لاند والام تي في وسيجما واسرائيل الثانية!!

49. اذا كرهت الشخصية التي لعبتها تيسير فهمي في مسلسل (أبناء ولكن) والتي تسببت في تحويل حياة جميع الشخصيات الأخرى إلى جحيم .. وفوجئت بها في الحلقة الأخيرة تندم على افعالها وتتحو ل لحمل وديع ويتصالح الجميع ولا عزاء لمرارتك المفقوعة

50. اذا كنت قد شاهدت الزمالك ينسحب مرتين من مباراته مع الأهلي .. مرة في أخر خمس دقائق بسبب هدف صحيح ومرة في أول خمس دقائق بسبب كارت أحمر مشكوك في صحته

"Life can give u a hundred reasons to cry,

But you can give life a thousand reasons to smile."

Some people make the world SPECIAL just by being in it !

[engmido]

مع انى انتمى الى هذا الجيل قلبا وقالبا

انما ما سبب وكسته؟؟؟!!!!

بالعكس انا اجد هذا الجيل جيل غلابة ومحترمين ومن الممكن ان نطلق عليه اخر الاجيال المحترمة

واتفرج ان شئت على اجيال اليومين دول اللى لا ادب ولا علم ولاحتى ذوق فى اى حاجة لا سمعى وزلا بصرى ولا هدوم وملابس

فعلااااااااا الواحد لما بيشوف حد من الجيل الجديد الذى لا يبعد عنا بمسافة شاسعة ....نفسه بتتسد عن الدنيا

ولا حول ولا قوة الا بالله

[joo]

انا معاك فى جيل اليومين دول

بس بردو احنا كنا غلابة معشناش طفولتنا ولا شبابنا زيهم

لاقنوات فضائية ( كان اخرنا 3 قنوات ويمكن الثالثة مكنت بتيجى كويس )

ولا موبايل ولا كمبيوتر ولالبس حلو ولاتعليم كويس

احنا بجد انظلمنا اوى لو الزمان يرجع تانى بيا كنت غيرت مسار تعليمى لان اللغة مهمة جدا جدا الان

لانى نفسى اتعلم كل اللغات انا الان كويس فى الانجليزى والفرنساوى بس طموحى اكبر من كدة وللاسف معنديس ويمكن

مفيش دماغ

[doha]

ياخبر ابيااااااض ده انت مسبتش حاجه ياجدع ..

كل الي قلته حصل ماعدا حاجتين .. اولا مسلسل دينا طحن واورجنايزر كان بايخ اوي ولاينتمي للجيل خاصه وطحن دي ( مش بتاعتنا ) .. وثانيا مصطفى محمود بجد مصر مدينة له الله يرحمه ببرنامجه ده بالذات يكاد يكون البرنامج العلمي الوحيد الي انتاج مصري وقال شيء ..

نسيت بقى موضه الاسبانش .. والشراشيب .. والآيلينر الاسود العريض ومحدد الشفايف غامق مش لون الجلوس ( ملكش انت في الحاجات دي عارفه )

ونسيت كمان افلام المقاولات وسمير غانم ويونس شلبي .. والفيديو ابو شريط كبير مكانش في دش ولا حتى وصله .

والنت اول مابدأ وعلى خط التليفون وعشر دقائق على مايشبك وياويله الي يفكر يرفع سماعه التليفون يعمل مكالمه وانت على النت ..

والتلفزيون الي بالريموت واول ماطلع وادينا ( ابو قرص ) اجازه ..

وهشام عباس لما كان بشنب ..

ومصطفى قمر قبل مايفرد شعره ..

وشيرين وجدي وهي لسه رخمه قبل ماتبقى رخمه موت ..

وانغام وغاده رجب قبل مايكبروا وسميرة سعيد وهي بتغني بجلابية بكم وشعرها ( كعكه ) ..

وعلى ذكر سميرة سعيد اكيد الف ليلة وليلة وحسين فهمي ونجلاء فتحي . .

ولا عبد الله غيث و الكتابة على لحم يحترق .. حد فاكرها؟

والجزء الاول من رافت الهجان الي حبيناه قبل مايشلنا بالجزء الثاني ..

وعبد الوهاب مطاوع الف رحمه ونور تنزل عليه ..

وحاجات تانية كتييييييييييييييييييير اييه كانت ايام ..

شكلنا والله اعلم كده عجزنا .. يااالله حسن الختام ..

[عاشق الترحال]

موكووووووووووس وأفتخر :lol:

تسجيل متابعه :lol:

[engmido]

لا مش شكلنا .... ده اكيد عجزنا

[pocy]

ايه الحاجات الحلوه دى انا من الجيل الحلو ده

ويا سلام على المسلسل اللى كان بيجي الساعه 7.30 فى الشتى او 8 فى الصيف واخبار الساعه 9 والمسلسل الاجنبي على الساعه 9.30 على القناه التانيه و حكمت المحكه على القناه الرابعه

ياه واما نىواغانى والثانويه العامه ياهه والله كانت ايام جميله واحمد مختار وجميله اسمماعيل وجمال الشاعر فين ايام زمان

قلبتوا علينا الايام اللى فاتت وقعده الشاي في البلكونه انا وامى واخواتى

والنسمه العليه اللى جايه من ناحيه جبل عتاقه

والبحر والشمس والوجه الحسن فى العين السخنه

ذكريات جميله جميله ياولالالالالالالالالالالالالالالالالالالالالالالالالالالالادد

ياريتها ترجع تانى مكنش الواحد متحمل اى مسئوليه ولا كان بيفكر بالطريقه دى

[اغابي]

[color="#FF0000"]وبما انى من الجيل الموكوس :lol: - احب اقولك لخصت مصر فى كلمتين يا على :lol: -

اد ايه مصر بلد جميلة واستحملت كتير زى ( سمك ولبن وتمر هندي ) اللى كانو مجنينين الناس والاطفال بيهم من برامج لافلام لكوسة لسلطة - مع حبه مهازل من الغير موهوبين -

ضحكتنى يا جوو - وخاصة تعليقك على الشخصيات الرائعة اللى انا مش باطيقهم اساسا زى

احمد عبد العزيز و طارق رخام قصدى علام

وهياتم و تيسير فهمة وعادل هاشم ورخامته

بس برضوه كان فيه حاجات كويسة زى ماكجيفر واخترنالك هع هع :lol:

زى برنامج كل جمعة الصبح - سينما الاطفال - واغنية ياللاه ياللاه بينا - دي الشموسة طاله وبتنده علينا -

يا صبايا يا بنور العصفور بيدوووور - واحنا كمان بندور ونغنى .... علشان انت هادى - انا حاخدك لنادي - ياللا يا روحى اركب متخافشي دى الحيطة ماتينة - باللاه بينا

وبرنامج الباليه علشان كنت اقوم ارقص باليه فى الشقة كلها واقلدهم - زى رقصة البجعة وبحيرة البط وسندريلا .

وماتشات التنس والمعلق الصاعد الواعد عادل شريف (الله يرحمه ) :lol:

تم تعديل 12 أبريل 2010 بواسطة اغابي

[fatfouta]

يبقى انا كده من الجيل ال........برضوا

وعلى رأى عاشق الترحال

موكوس وافتخر انا كمان

وشكراااااااا

[mekkawy]

بتهيأليي نسيتوا عالم الحيوان :blush2:

و what's now 97 اييه ولا الملك باة اللي آخر حاجة اللي قدر يتحصل على what's now 98 يا خبر أبيض ... أيااااام كانت جميلة .

نيجي للجد باة .. انا شايف ان الجيل ده اخر جيل ناجح ... و الله بجد ... تعالوا نتفرج ع الدفعات اللي بعدنا ... لسة بيبدأوا يتخرجوا النهاردة ... ليا واحد قريبي ... قريبي أوي يعني ... اصغر مني ب3 سنين ... لسة متخرجش لغاية النهاردة و أنا بقالي 5 سنين متخرج ... و الله الغلابة اللي طالعين هما اللي مواكيس.

ربنا يستر علي عيالنا بأة

مكاوى

[engmido]

ارجو تغيير اسم الموضوع

من موكوس الى غلبان

لانه فعلا جيل مش موكوس ولا حاجة....بالعكس يمكن فى بعض الاحيان اعتبره جيل مبخت

[doha]

وحته اذاعه ..

احنا شباب تحت العشرين ..

وغمض عينيك وامشي بخفة ودلع الدنيا هي الشابة وانت الجدع ..

والصبح في التلفزيون وانا بجهز اخويه للمدرسة .. عوزينها تبقى خاااضرة الارض الي في الصحرة ونقدمها لمصر هدية حاجة جميلة ومفتخرة هي ايه .. الصاااحراااا .. تبقى ايه .. خاضراااا ( ثم اتضح ان عندهم عمى الوان ) .

وهيجوزوني ماتتجوز انا مش شايف بروبليم ..

وكوفرتينا على العريس .. موافقين .. يبقى هتتجوز وهتيص ... كوفرتينا في الخطوبة .. موافقين .. تبقى الجوازه مطلوووبه ..

وبليل الساعه 12 حلقة من فوازير شيريهان وياشي ياشي مين فيكم معرفهاشي .. وساعات الخاطبة لنيلي .. واخيرا لما الارسال يقرب يقفل نقلب على القناه الخامسة بتكون مش واضحه اوي بس جايبه اغاني حلوة ( بمقاييس ذلك الزمان ) ..

واين تسهر هذا المساء والاعلانات الي بتلف على بكرة ورق وبتتحرك يدوي ..

وسر شويبس .. تشششش

فاصل ونعود ...

[ابوهنا]

شكرا مستر جو على ذكر الايام الجميله

وعلى حد تعبيرك اذا كان من عاصر هذه الاحداث هو جيل موكوس فارجوك سرد البديل لهذا الجيل الحالى

[اغابي]

وحته اذاعه ..

احنا شباب تحت العشرين ..

وغمض عينيك وامشي بخفة ودلع الدنيا هي الشابة وانت الجدع ..

والصبح في التلفزيون وانا بجهز اخويه للمدرسة .. عوزينها تبقى خاااضرة الارض الي في الصحرة ونقدمها لمصر هدية حاجة جميلة ومفتخرة هي ايه .. الصاااحراااا .. تبقى ايه .. خاضراااا ( ثم اتضح ان عندهم عمى الوان ) .

وهيجوزوني ماتتجوز انا مش شايف بروبليم ..

وكوفرتينا على العريس .. موافقين .. يبقى هتتجوز وهتيص ... كوفرتينا في الخطوبة .. موافقين .. تبقى الجوازه مطلوووبه ..

وبليل الساعه 12 حلقة من فوازير شيريهان وياشي ياشي مين فيكم معرفهاشي .. وساعات الخاطبة لنيلي .. واخيرا لما الارسال يقرب يقفل نقلب على القناه الخامسة بتكون مش واضحه اوي بس جايبه اغاني حلوة ( بمقاييس ذلك الزمان ) ..

واين تسهر هذا المساء والاعلانات الي بتلف على بكرة ورق وبتتحرك يدوي ..

وسر شويبس .. تشششش

فاصل ونعود ...

جميلة الكام مقطع دول يا ضحى -

بس قلبتى على الذكريات ليه

بجد ضحكتوني يا جماعة

:blush2:

[هشام عباس]

انا كمان من نفس الجيل

[msayed]

وماك جايفر لما كان بيعمل الصاروخ من علب الجبنة الفاضية وغطيان الكازوزة

تم تعديل 12 أبريل 2010 بواسطة msayed

[ام نور محمود]

انا كمان من الجيل ده

وفعلا الاجيال الموكوسة هي بتاعة اليومين دول

دول حتى معندهمش حاجة يفتكرها لما يكبروا

التكنولوجيا كلت دماغهم وخلصت على برائتهم

لما تبقى بنتي ام اربع سنين بتسيب ريموت الرسيفر عشان تمسك ذراع البلاي ستيشن وتسيبه عشان تمسك الكاميرا الديجيتال او الموبايل تبقى دي حاجة ظريفة ؟

دي بتقلب قنوات الكارتون بمنتهى الزهق والملل ولا كانها عندها 80 سنة

احنا كانت اي حاجة تبسطنا وترضينا

حتى لو كانت الحاجة دي فقرة اعلانات تجارية في التلفزيون ابو زراير اللي مالهوش ريموت ( وبعدين اخترعوا الريموت اللي بيتوصل بسلك في التلفزيون )

كانت العيون فيها بكارة وبتشوف كل حاجة جديدة ولامعة .. دلوقتي بحس ان عنيا زي لوح ازاز مترب وعليه بقعة ايس كريم كبيرة مخلياه مغبش وببقى نفسي اكب عليه جردل ميه بصابون وامسحه مسحه محترمه يمكن ارجع اشوف الحاجات زي زمان

كلامكم رجعني لايام جميله اوي

ايام الاجازة اللي هي شهر واحد في السنة

مش انا بنت ؟ بس كنت بلعب بالطيارات اللي هي عباره عن 3 عصيان محيطهم بيشكل شكل سداسي ومتغطيه بالنايلون وليها ديل طوييييييييييييييييييييييييل من شرايط ملونة وياما قعدت بالساعات اعمللها ميزان واظبطه عشان تطير كويس

كنت بعيش على الذكريات الحلوة دي لغايه الاجازة اللي بعدها

دلوقتي عايشة برضه على الذكريات بس مش عارفه الاجازة امتى .. الحكايه طولت اوي ومافيش اخبار عنها

بجد بجد ماتبطلوش كلام

[msayed]

وفى الكورة

على زيوار الله يرحمه إللى من أقواله الشهيرة:

- على فكرة ده إسمه فلساو مش فلكاو، ما هى دى من ضمن اللغات

- وشايفين جمهور النمسا ماسك يافطاط مكتوب عليها "VORZA AUSTRIA" يعنى فرصة للنمسا، أهى دى من ضمن اللغات برضه.

- خودو بالكو القميص إللى لابسه مايكل إيفرت ده مش سادة، ده مشجر بس الشجر صغير أوى مش ها تشفوه فى التليفزيون"

- و أنا أكثر واحدة بأحبها هى الست أمى الله يرحمها علشن هى إللى جابت كل الهلمة إللى قدامكم دى.

- وداخل وماراضونا داخل وماراضونا داخل وماراضونا ... وجون

والمذيعين اللذاذ محمود مدكور وأحمد عفت وميمى الشربينى والحمامصى إللى كان بيجهز ورقة بعد الماتش يسمع لنا الدروس المستفادة علشان لما نتفرج مرة تانية نعرف اللعيبة يعرفوا يلعبوا كويس.

وشوبير لما كان عيل صغير والناس لسه بتحبه قبل ما يدخل لجنة السياسات ولسانه يبقى زفر.

تم تعديل 12 أبريل 2010 بواسطة msayed

[a m ghazi]

انا موكوس ولا فخر

بس اللي بعدنا يبقو ايه

ايييييييييييييييييييييييييييييه ليتني عدت صغيرا كان اكبر همي لعبا

[Amr Radwan]

مش عارف ايه اللي خلاه جيل موكوووس

دي ايام جميلة و فكرتنا بيها يا جوو :blush2:

و قعدت افتكر حاجة حاجة .. wst::