نهاية ديكتاتور إسمه شاوشيسكو

[se_ Elsyed]

الأسبوع الماضي شاهدت تقرير وثائقي عن سقوط الديكتاتور الطاغية الروماني " نيكولاي شاوشيسكو " سنة 1989 وكان قد حكم بلاده لمدة 25 سنة ( الحمد لله فاضل لنفاقستان سنتين ) وأذاق بلده مختلف ألوان العذاب السياسي والإقتصادي وتمسك بإهداب الشيوعية البائدة حتى أخر لحظه ، والطريف في الأمر أنه أطلق على نفسه لقب " العبقري " يعني ماحدش يقولي يا شاويش إسكو حاف لازم يقول يا عبقرينو ، وعندما فاض الكيل بالشعب وكان وقتها يخطب في جموع شعبه اللي لاممهم بالقوة من على القهاوي أمام القصر الجمهوري وكانوا بالألاف فقاطعه الناس وهتفوا ضده " إيه يا اخي بقى حرام على أهلك .. إنت جبار ..25 سنة وبلغت من العمر أرذلة ولسه لازق في الكرسي .. ومش بس كده لأ مراتك كمان بتحكم معاك .... آه يا جبابرة "

وانقطع الإرسال التليفزيوني بحجة عطل فني .. ثم عاد بعد دقائق وعندما هم بالكلام ثانية هتفوا ضده ... وأشتعلت شرارة الغضب ونزل الشعب إلى الشوارع وأمر الطاغية الدبابات والجيش بالنزول للشوارع والقضاء على " إنتفاضة الحرامية " ولم يتراجع الشعب وتطورت الأمور بشكل سريع وقضى على المئات من الشعب وأصبح منظراً مألوفاً أن ترى سيارات النقل وهي تحمل عشرات التوابيت ، وتكونت مجموعة من المعارضة لتولي امور البلاد مؤقتاً وفر الديكتاتور والحيزبونة مراته بجلدهم وتحفظ عليهم الجيش في مكان أمين ، كله ده وهو في ذهول ويظن بإنها سحابة صيف وتعدي ، وتقرر محاكمته وذهبوا به وبزوجته إلى المحكمة العليا ومش في القاعة الرئيسية ولكن في غرفة قذرة وكراسيها متهالكه وواجهوه بالفظائع والاهوال التى أرتكبها ضد شعبه وحاول ان يشكك في شرعية المحكمة ولكن كان فيه كام امين شرطة إدولوا على قفاه عشان يخرس وحكموا في النهاية عليه بالإعدام هو والحيزبونة مراته اللي كانت شبه الساحرة الشريرة اللي بتطلع في أفلام الكارتون راكبه المقشه .

المنظر الغريب اللي عجبني وإتكيفت منه بصراحة وهما واخدينهم على الإعدام ورابطينه هو ومراته بحبل زي بتوع الغسيل كده بل بالعكس الحبل بالظبط كان عامل زي الأحبال اللي بيربطوا بها أقفاص البرتقال بالظبط بالظبط ،

وبالفعل نفذوا فيهم حكم الإعدام ويظهر إن العيال القناصة كانت مبؤؤه منهم جامد عشان شفت منظر الحيطة اللي وراهم متنقرشة بطلقات رصاص كتـــــــــــــــــير وكأنهم كان بيخلصوا فيهم كل سنين الظلم والعذاب .

وكانت هناك راغبه عارمة لإذاعة منظ الإعدام على الهواء ولكن رئيس التليفزيون راعى مشاعر الناس ومنظر الدم ،

ودخلت المجموعة الحاكمة في جدال على مكان دفن الجثث وهل يدفنوها في تُرب الغفير العامة ولا فين بالظبط .. والعجيب بقى إن جثتيهما فضلت مرميه في مكانها 4 أيام زي ما يكون كلاب ضاله وخلصوا عليهم والتانيين عمالين يتناقشوا ، لحد ما اختاروا خرابه متطرفة تليق بمقامهم ولم يخبروا احد عن المكان خوفاً من هجوم الشعب المقهور على المقبرة وممكن ساعتها يقطعوهم حتت ...

وكل ده والناس في رومانيا في حالة ذهول ومافيش حد مصدق إن الكابوس الذي ظل 25 سنة قاعد على مراوح قلبهم إنزاح وإن مراته اللي كانت الراعية الرسمية لكل البطولات الرياضية وكل المكتبات الثقافية وكل الكباري العلوية وكل المؤسسات الخيرية راحت في الوبا هي كمان ....

وسرحت مع نفسي كده وقولت ياه ... معقول ده يحصل عندكوا يا شعب نفاقستان العظيم ... وأفقت على زغد من المدام عشان انزل أروح الفرن وأقف في طابور العيش لأن العيال عايزه تتعشى ..

وقولت خليك في حالك يا س س ومالكش دعوة لا برومانيا ولا دياولوا وأحسن لك تمشي جنب الحيط او إذا قدرت تمشي على الحيط يكون أفضل ..

[فــيــروز]

بل بالعكس الحبل بالظبط كان عامل زي الأحبال اللي بيربطوا بها أقفاص البرتقال بالظبط بالظبط ،

ملاحظه ان قافية الفواكه منتشره فى الموضوعات السياسيه اليومين دول :P

اشى موز و اشى برتقال و اشى لارينج :P :P يا ترى هل لهذا اى دلاله سيكولوجيه فى الذات المكبوته وراء العقل الباطن فى اللا وعى الشعورى!! :P

تم تعديل 19 أبريل 2004 بواسطة فــيــروز

[ragab2]

أعتقد

أنه تم اذاعة الإعدام على الهواء

لأنى شاهدت اعدامهم يالرصاص الحى

وتمت المحاكمة فى غضون ساعات

وهذا هو مصير كل ديكتاتور جبار

شكرا

لتذكيرنا بمصير هذا الديكتاتور الرومانى

[arabawy]

... معقول ده يحصل عندكوا يا شعب نفاقستان العظيم ...

مش معقول .. وهوا الحبيب بيعمل شنو ؟

اذا كان شاويشسكو نجح في تحرير رومانيا من ديون متلتلة واتعمل فية كدا .. طب يبقي احنا نعمل في شاويشسنا اية ؟

[دكتور عادل الليثي]

هذه صورة من على السطح

وما تقدمه مثل هذه الأفلام الدعائية

ولكن لو تعمقنا قليلا وببعض التحليل ..... سنجد أن الأمور لم تكن هكذا بالضبط

فما حدث في رومانيا عندئذ ..... لا ينفصل عما حدث في كل المعسكر الشرقي هذه السنة .....

فمع إحساس جورباتشوف بأن الحمل الخارجي على الاتحاد السوفييتي أصبح ثقيلا .... وأن الأوضاع الداخلية لم تعد على مايرام ...... أطلق أفكاره الجديدة ............. إعادة الهيكلة والمصارحة

وخارجيا أراد إيقاف ما كان يسمى بالحرب الباردة وتسابق التسلح الذي أنهك الاتحاد السوفييتي

والسماح ببعض الحريات في دول شرق أوروبا ....

وكان يتصور أنه بفك الحزام بعض الشيء ممكن أن تتحسن الأمور

ولكن الأوضاع انفجرت

وتغيرت الأوضاع في كل دول شرق أوروبا .... ما عدا رومانيا .........

فكان لابد من تدخل

وهذا ما حدث بالاتفاق بين السي آي إيه ... والـ كي جي بي

وكان الهدف إعطاء إنقلاب عسكري مدبر شكل ثورة شعبية

فتم تفجير الأوضاع في مدينة تمشوارا على حدود يوغوسلافيا .... حيث بها أعداد كبيرة من المجريين الرومان

ثم تم الإعداد لخطاب جماهيري ...... ليشرح تشاوشيسكو الأمور للشعب .... وأثناء الخطاب .... تم تغيير شرائط التسجيل المركبة على الميكروفونات لتساعد على ضبط هتافات الجماهير .... بشرائط تهتف بسقوطه ..... وهذه كانت نقطة الصفر والبداية في تنفيذ الانقلاب حيث كانت كل المؤسسات تحت رقابة الجيش بما فيها التليفزيون

وفي هذه اللحظة كان تشاوشيسكو قد أصبح وحيدا مع زوجته

فقد استقل الطائرة الهلوكبتر من فوق سطح المبنى الذي كان يخطب منه ..... حيث كان قد تحول قائد طائرته مع الجانب الآخر ...... وأخذه إلى إحدى القواعد العسكرية المتفق عليها ... وهناك ظل في سيارة مصفحة لمدة ثلاث أيام وعليه حراسة مشددة .... إلى أن تم الاتفاق مع الدول الكبرى على مصيره الذي تحدد بإعدامه رميا بالرصاص

وقد تمت في نفس القاعدة محاكمة صورية .....حتى أن المحامي الذي كان من المفروض أن يقوم بدور الدفاع عنه ... كان يدينه .......!!!

ومعظم أفراد هذه المحكمة العسكرية مات في أحداث غامضة بعد ذلك ... وكذلك قائد الطائرة الهليوكبتر ... حيث مات في حادث سقوط طائرة هليوكبتر

أما عملية الإعدام نفسها .... كانت متنافية مع الهدف من التغيير ...... فحيث أن التغيير يتم في اتجاه الديموقراطية ... فإن المحاكمة المتعجلة والتنفيذ الفوري .... يتنافى مع ذلك ..........!!

فكان من المفروض ......محاكمته محاكمة شعبية وعادلة ..... بعد ذلك .... وعلى مدة طويلة ...

بالإضافة أن تشاوشيسكو لم يكن يختلف عن باقي رؤساء دول شرق أوروبا الشيوعية ..... فكل ما كان يحدث في رومانيا كان يحدث في هذه الدول

بل العكس .... فقد كان تشاوشيسكو .... دلوعة الغرب .... وكان يقابل أفضل مقابلة في إنجلترا وأمريكا ..... ولهذا أصبح أشهر رؤساء دول شرق أوروبا ...... حيث أنه لم يكن مشارك في حلف وارسو بقوات .... وأدان تدخل الاتحاد السوفييتي في تشيكوسلوفاكيا ...... وكان صديقا لليهود ...... ويقال أنه سرب معلومات عن معدات عسكرية سوفيتية مهمة.... للغرب .............

ولكن في السياسة لا يوجد أصدقاء ..........

وأن الدول ..... كلما صغرت .... كلما خرجت مصائرها من يدها............وأصبحت في أيدي الآخرين

[فــيــروز]

يا سلام

ايه الجمال ده

حقيقى العلم نور

الله ينور يا استاذ طه :P معلومات جميله جدا :P

[lonewolf]

باقي فقط ان نقول انة كان صديق صدوق للزعيم المؤمن و كان المورد الاول للحديد الفاسد الذي بنيت بة معظم مباني سبعينات و ثمانينات مصر :P

[دكتور عادل الليثي]

شكرا يا ست الكل .... فيروز .......

مش بس كده

فمثلا في مارس ـ أبريل 1986 نشرت جريدة لوموند الفرنسية مقال طويل عريض عن الشخص الذي سوف يخلف تشاوشيسكو ..... والذي كان زميلا وصديقا لجورباتشوف ....إلخ إلخ

وفعلا فهذا الشخص هو الذي ظهر على رأس النظام الجديد سنة 1989...... وهو الرئيس الحالي لرومانيا ... يون إلييسكو...!!........

شيء آخر

كانت الأخبار تتوالى عن مقاومة عنيفة من ( السكوريتاتا ) أو جهاز المخابرات أو الأمن... الموالي لتشاوشيسكو .... وخاصة حول التليفزيون.......

وكل هذه الأخبار كانت فشنك ..... رغم موت حوالي 70 شخص....

والدليل على ذلك هو أن المباني المحيطة بالتليفزيون كانت مليئة بآثار آلاف الطلقات .... أما التليفزيون نفسه فلم يكن عليه أي أثر لرصاصة واحدة ...... وهذه كانت ملاحظة سفير رومانيا في فرنسا بعد ( الثورة )

ثانيا ..... لم يلقى القبض على أحد ...... أو تم العثور على قتلى ..... من هذه المقاومة الموالية لتشاوشيسكو

أو حتى تسجيل هروب أحد...................

ولكن هؤلاء القتلى للأسف كانوا ضحايا لهذا السيناريو...............وكلهم من عامة الشعب أو جنود بسيطة في الجيش ..................

أما عن الحديد الفاسد ..... فالفاسد هي نفوس المستثمرين الجشعين المصريين في هذه المرحلة ...........والإدارة الموالسة معاهم ............!!

[فــيــروز]

يعنى شاوشيسكو كان كبش فداء تمت التضحيه به وقت اللزوم بعد ان انتهت الحاجه اليه !! wlch:: واحنا قاعدين ولا بنتعلم gt:

هيئة تكبير الخطوط مرت من هنا :D وى وا وى وا

تم تعديل 20 أبريل 2004 بواسطة فــيــروز

[se_ Elsyed]

أنا المفروض بقى أمسك حاجه في البلد ..

حرام كده

إن شالله أبقى رئيس مباحث قسم الوايلي يا ناس

[الباشمهندس ياسر]

باقي فقط ان نقول انة كان صديق صدوق للزعيم المؤمن و كان المورد الاول للحديد الفاسد الذي بنيت بة معظم مباني سبعينات و ثمانينات مصر :P

معلش يا جماعه .. الصنعة تحكم

فاااااااااااسد و البيوت ماسكة نفسها م السبعينيااااات

اومال لو سليم هيعيش لامتي

أنا المفروض بقى أمسك حاجه في البلد ..

حرام كده

إن شالله أبقى رئيس مباحث قسم الوايلي يا ناس

و ماله يا عم

اهو حتي بقي رئيس مباحث ابن نكتة

علي جنب : طه ..تحليلك جميل بس عايزين مصادر يا عم

ده شغل مخابرات توغلت داخل رومانيا حتي اتت ع الاخضر و اليابس و انهت النظام تماما