شعنونة و الأخطبوط الرهيب

[عادل أبوزيد]

تذكرون الصدمات التى تلقتها شعنونة فى عملها الجديد.

و أن الجميع كانوا ينكرون عليها حماسها و إخلاصها فى العمل و ليت الأمر توقف عند هذا الحد و لكنهم بدأوا فى مناورات وظيفية أو مهنية بقصد إحراجها أو إظهارها بمظهر الفشل و فى نفس محاولات متكررة لإقناعها بالعمل بالطريقة السائدة.

آخر معلوماتنا من الزيارة السابقة أنها إكتسبت جزء كبير من ثقة الإدارة و عهد إليها إعداد الإحصاءات الخاصة بنشاط المستشفى.

كما أنها نجحت فى إقناع المديرة لإدخال الإنترنت ...تصوروا الإنترنت فى منطقة ربما لم تعرف بعد ماء الشرب النقى.

و فى زيارتها السابقة تكلمت عن رغبتها فى تسجيل البيانات الطبية لمرضاها على الكومبيوتر و على ما أذكر أن أحد الأعضاء أرسل إليها برنامجا لهذا الغرض.

ترى ما موقف شعنونة الآن هل نجحت فى أن تؤثر إيجابيا فى المحيطين بها و بعضهم أو منهم من يفكر فى أن يؤدى عمله بنفس إخلاص و حماسة شعنونة.

و باقى الخيارات على نفس المنوال.

شعنونة و باقى الخريجين الجدد و منهم من هم فى مثل موقف شعنونة هؤلاء هم أمل الوطن فى التغيير ...هل ينجح جيلنا فى فرض الإستسلام عليهم و بالتالى على مصر أن تنتظر جيلا آخر

أم أن هؤلاء الشباب لم ينهزموا و ما يزالون يكافحون من أجل فرض فكر جديد و نمط جديد فى الأداء.

شعنونة أنت و زملائك أمل مصر ليتك لا تخذلينا.

قبل المشاركة فى الإستفتاء دعونا نرى ماذا ستقول شعنونة و بعدها يمكننا أن نراهن على مستقبل ذلك الوطن.

[بنت شعنونة]

يا نهار ابيض!!!!!!!!!!!

لالالالالالالالالالا

انا مش قد الكلام دا والله يا استاذ عادل

اتمنى لو حضرتك تغير اسم الموضوع ل الشباب و الأخطبوط

عشان في كتيييييييييير كتيييييييير احسن مني

ها اقول لحضرتك على حاجا او حاجات وانتوا حاولوا تنظموها

المديرة بتاعتي لها الفضل بعد الله اني ما يسأتش رغم ما بها من بعض السلبيات الا انها تعشق العمل و التفاني وتقدر الأنسان العامل

- انا بحب الشغل جداااااا ونشيطة جدا يمكن دي اكتر حاجا فرقتني عن زمايلي.. رغم اني اول ما جيت كله قعد يقولي كلها شهرين وها تزهقي وتبقى زينا لكن انا بزهق من القعدة!! رغم تذمري الدااااااااااائم من كثرة الشغل "لآني احترم النوم جدا" لكن مجرد اني اشتغل واسمع كلمة حلوة من عيان او ممرضة اوحتى مديرة المستشفى بنسى التعب كله

-زمايلنا بقالهم سنتين وها يموتوا يرجعوا بيوتهم وخلاص زهقوا وهدفهم انهم يضيعوا الأيام اللي فاضلة بدون ادني مجهود

- اه انا عملت تغير رغم انه تغيير صغير جدااااااااا

النت دخلت عندي

قسم الأورام بقى معمول معظم الفايلز بتاعته على الكمبيوتر

بقية الأقسام غيرانة وطلبوا كمبيوترات جديدة وفعلا المديرة جابت 6 كمبيوتر جداد

طلبت مكافات للمرضات المجتهدات في قسمي والمديرة لم تتاخر

ودا خلا كل البنات تفوق وتشتغل بضمير معايا عشان اصرفلهم مكافات كمان

ممرضات تانيين لهم بعض السلطة ابتدوا يهددوني بامكانية تغير مكاني من الأورام لو ما صرفتلهمش مكافاة

وكان رد فعلي سخيف امام نفسي لآني نيمتهم بالكلام " ودي غلطة كبيرة انا معترفة بيها" انما حرب غير متكافاة ما تلزمنيش دلوقتي ف مش ها اعلن الهجوم قبل ما اكون متطمنة على نفسي وموقفي

المديرة صرفت ليا الشهر اللي فات مكافا 170 جنيه وكنت طااااااااايرة بيها من الفرح بجد

حسيت اني مميزة وان التعب ما يروحش هدر

لو فيه مشكلة البنات عندنا بيمشوا جنب الحيط

انما انا بحب اعمل جعجة كتييييييير

العيار اللي ما يصيبش يدوش

واوحش حاجا الزن

وانا زنااااااااااانة في الحق

اندفاعي غير منظم

وخوف البنات اللي حواليا كان بيفرملني كتيييييير عن كوارث كان ممكن اعملها

الجنون حلو صحيح وبيخوف اللي قدامك

انما العقل مهم جدا برضه

[Salwa]

مساء الفل ياست الكل......

مش غريبة عليك الجدعنة ...

طبعا لما اخونا ابن مصر فكرنا بالبنت المشاكسة الصريحة اللى صارحت اهل المريض بالحقيقة ..

وايضا اخونا عادل ابو زيد فكرنا بكل المتاهات اللى فاتت ....

افتكرت ازاى كلهم فى ذلك الوقت ....راهنوا على استمرار وجودك بلا تململ او يأس ...

الصراحة ...راهنوا على حصان كسبان ...// كما يقولوا //..

انا كنت خايفة ......

كنت عارفة انك قوية جدا بقدر ضعفك ..

كنت عارفة انك نقطة نور ...ممكن تنتشر وتنور كل شئ وممكن يكون سهل اطفاءها ...كنت خايفة فعلا فعلا ..

كنت اظنك ضوء شمعة .....كنت خايفة ييجى وقت وتذوبى من الارهاق .

لكنك اثبتى لنا فعلا ان ضوءك نابع من داخلك ..ضوء كضوء القمر .......والشمس ..

دايما بقول فيه امل ......وكنت واثقة ومازلت ان التغيير شئ لابد منه سيقوم به الشباب ....

ورغم انى امرأة قوية .....لكنى اعلم ان قوة الرجل اكبر وتختلف مهما طالبنا بالمساواة .....وانتى علمتينا بموقفك هذا ....ان فى الحق لافرق ...

تعرفى ياشنشن ....فيه موضوع قالب الدنيا هنا ..بحث كامل عن استغلال عمالة الاطفال والشباب فى الدول الفقيرة .....استعباد المحتاج بمعنى اصح .......واحتاروا يسموا الموضوع ده ايه ؟؟

وسألوا بنت صغيرة فى بلد افريقى .....ايه اللى بينور ده فى السماء ؟؟

وردت ببساطة وقالت ........شمس الليل .

هى لا تعرف اسم القمر .....وماترى ...هو ايضا شمس ...

شمس تظهر فى الظلمة ...

ولا اجد افضل من تعبير الطفلة البريئة ....

انتم ياشبابنا فعلا .....شموس ...سوف تضىء مصر..ليلا ونهارا .

حظ سعيد ياشنشن ...

يارب تفضلى كدة على طول ....يارب // تعدى // كل من حولك.

احيانا تكون النار تحت الرماد ....فقط ...تنتظر من يؤججها ...

علميهم يا ابنتى معنى ..النزاهة ....مع النفس والغير..

تحياتى.

[kfaya]

مساء الفل يا شنشونة .....

و اللة بتفكرينى بنفسى ايام زمان بعد ما خلصت الكلية و كان عندى طموح يصل لأعلى عنان السماء و يكاد يلامس السحاب , طاقة , علم , أمل ..... لم ينقصنى , أو بالاحرى ينقص جيلى سوف من يأخذ بيدنا , يكون لنا القدوة , يضعنا على أول الطريق .... طاقات الشباب بلا حدود , قادرة على صنع المعجزات .... ياخسارة و يا ألف خسارة .... دمرونا شوية شوية ... قتلوا كل الامال و الاحلام .....

معقولة الحلم يرجع يتحقق تانى .... يرجع حد يحلم ان البلد دى تصحى تانى .....لو فى ألف شانا فى ألف مستشفى فى مصر ... وزارة الصحة تكسب مونديال 2010 .....

[عادل أبوزيد]

مساء الفل يا شنشونة .....

و اللة بتفكرينى بنفسى ايام زمان بعد ما خلصت الكلية و كان عندى طموح يصل لأعلى عنان السماء و يكاد يلامس السحاب , طاقة , علم , أمل ..... لم ينقصنى , أو بالاحرى ينقص جيلى سوف من يأخذ بيدنا , يكون لنا القدوة , يضعنا على أول الطريق .... طاقات الشباب بلا حدود , قادرة على صنع المعجزات .... ياخسارة  و يا ألف خسارة .... دمرونا شوية شوية ... قتلوا كل الامال و الاحلام .....

معقولة الحلم يرجع يتحقق تانى .... يرجع حد يحلم ان البلد دى تصحى تانى .....لو فى ألف شانا فى ألف مستشفى فى مصر ... وزارة الصحة تكسب مونديال 2010 .....

الفاضل كفاية

سيدى الفاضل ... مقولة "خلاص اللى ذاكر ذاكر" مقولة خاطئة . أنظر إلى المرآه ... إرفع رأسك و إفرد صدرك و إستحضر كل معانى الشرف و الكبرياء و إنطلق فى الحياة

من هذه اللحظة ... ما زال الطريق طويل ... أيا كان عمرك.

و دعنى أستطرد و كلامى هذا ليس للفاضل كفاية فقط و لكن لنا كلنا.

من الأخطاء التى تعانى منها بلادنا هو تصور التشابه الكامل بين كل الناس ... كل الناس تدخل ثانوية عامة ... كل الناس تدخل كلية الطب ....كل الناس ...إلخ إلخ

سادتى الأفاضل نحن كلنا مختلفون كل إنسان عالم كامل وحده فى المشاعر و الأحلام و الإمكانيات و نقاط التميز ..

و فى هذه الحياة النجاح ليس بالضرورة الحصول على 100% بل أحيانا كثيرة الحصول على 10% يعتبر إنجازا كبيرا.

هل تتذكرون فصول المدرسة لا تتعجب إذا إلتقيت بهذا الفتى الذى كان دائما أول الفصل ووجدته يؤدى عملا متواضعا كالذى يؤديه أواسط الناس.

أقول ذلك لأؤكد ضرورة تحصين الذات من الإحباط - و عندما أقول الذات أعنى نفسى و الآخرين الذين أتحدث معهم - الإحباط عدو النجاح الأول و وجود ناجح فى مقدمة الصفوف لا يعنى أن الباقين لم ينجحوا ...

فى أحدى المرات قيل أن مصر لا تعترف إلا بالعبقريات أو القمم و يستدلون على ذلك أننا لا نذكر إلا طه حسين و أحمدشوقى و أم كلثوم رغم أن الصف الثانى و الثالث و ... و العاشر يمثلون قمة فى النجاح !

و ربما بسبب ذلك كموروث يسقط الكثيرين فى مصيدة الإحباط فى إحدى مراحل حياتهم.

فيروز ... لايتهاوس ... MHM براود مسلم كليو لانسلوت منمان ... نحن فى أمس الحاجة لكلماتكم و تجاربكم ..

و لنرفع رؤوسنا بكبرياء و نشد صدورنا و نقولها بصدق ... ستكون يوما هنا على ضفاف النيل ماليزيا أخرى و سنغافورة أخرى

[se_ Elsyed]

لو كل الناس عملوا زي ما كفاية بيقول كده كان زمان اليابانيين والالمان جايبين شوله وفرشانها قدام باب السيدة وبيشحتوا ( زي حكومتنا كده )

مع العلم بإننا كلنا عارفين إنهم كانوا خارجين من الحرب العالمية الثانية أنضف من الصيني بعد غسيله لا موارد طبيعية لا بنية أساسية ( بتاعت مارينجوس )ولكنهم كانوا يملكون اخطر واهم شيء في الوجود وهو العزيمة والعقول والقلوب البشرية المخلصة التي لا تعرف اليأس .

طالما الإنسان لسه بيتنفس ولسه فيه الروح يبقى هناك أمل ، وكما قال الرسول الكريم في حديثة الشريف ما معناه حتى لو القيامة قامت وفي يد أحدكم فسيلة ( الشتلة بتاعت النخلة الصغيرة ) فليزرعها ... وهو حديث يدل على ضرورة العمل وعدم اليأس مهما كانت الظروف ...

تحية لأختنا شعنونة على إخلاصها في عملها .. وتحية لها أكثر لو كانت تعمل هذا لوجه الله وبدون إنتظار ثناء او شكر من أحد وتحية لها اكثر وأكثر عندما تترك شيء مفيد وجيد لمن سيأتون بعدها ...

أبشع شيء في الدنيا الإنسان اللي بيعمل لنفسه أو انه يفتكر إن العمل الذي يقوم به وياخذ عليه مرتب لابد ان يكون مرتبط به ...

ساحكي لكم موقف بسيط ... كنت اعمل بقسم الـ HR وكان مديري السابق رجل كبير وعلامات الورع باينه على وشه وحاجة إيه ماحصلتش .. لكن انا لما أرتاح له من اول اليوم .. المهم مرت الأيام وخد إستمارة 6 لعدم قدرته على مواكبه روح العصر ... والمفروض بقى يسلمني الدنيا اللي عنده من ملفات وبلاوي زرقا ... لكن هذا لم يحدث ولا قالي حاجة ..

ولأني كنت متوقع ذلك فلم أشتكي للإدارة العليا او أجبره على تسليمي ما يخص العمل ولأنه ماكنش له خبره في الحاسب الآلي فكان يستعين بي من وقت للآخر لحل أي مشكلة تواجهه فقبل أن يترك العمل بأيام قليلة قمت بالدخول على جهازه الشخصي ولحقت على الأواخر حاجات خطيرة كان عامل لها ديليت واخدت كوبي من كل ملفات العمل اللي المفروض الشركة كانت بتدفع له مرتب في السنين اللي فاتت عشانها ... ولكن لم أنسى بأن أرفع هذا الأمر للإدارة العليا ولكن بعد ما كان اخد مستحقاته ومشي ، ولكم ان تتخيلوا بإن كان عنده عشرات الملفات التى تخص الشركة ... وبالفعل زي ما توقعت بالظبط جيت بأشوف جهازة في اليوم اللي ماشي فيه لقيته مسح كـــــــــــــــــــــــــــــــــــل الملفات .

[ابو خليل]

من زمان وانا مطحون في الشغل ومفيش وقت ادخل محاورات المصريين واكتب أي شيء ..

الشغل في الغربة طحن

جايبنك من بلدك عارفين انك محتاج الشغل

وعارفين انهم لولا انهم محتاجين لك مكانوش جابوك

وجابينك لهدف خاص

بيحولوا يستغلوا كل ثانية في دوام العمل لهدفهم

(( انا مجرد ترس في ماكينة ))

دي الحقيقة اللي عرفتها بعد سنتين من الغربة .. والغربة كربة ..

وكل ما تضيق عليه الدنيا ..

أفتكر اللي كانوا السبب في خروجي من مصر !!!

وادعي عليهم ..( الله يخرب ... )

حزب أعداء النجاح ...

شوفي يا دكتورة شانا لديك ثلاثة اختيارات :

1- السباحة مع التيار

2- الهروب

3- المقاومة....

وبما ان الحقيقة الواقعية والمؤلمة تقول أن (وردة واحدة لا تصنع فصل ربيع

) !!!!

وبما اني حربت الحل الثاني ( الهروب )ووجدته اسخف الحلول ...

كما أني اعتقد ان الحل الأول ممكن يكون حل مريح لكنه يفقد الانسان احترامه الداخلي لنفسه

( وما فائدة أن تكسب العالم كله وتخسر نفسك ) !!

لذلك اقترح عليك ان تقاومي

وتظلي علي مبادئك

قاومي

حتي

لو لم يكن في الخندق الا انت فقط ...

والا سيبلع الاخطوط ما بقي من مصر ...