شراء منزل في مصر

[KWA]

بسم الله الرحمن الرحيم

السلام عليكم و رحمه الله و بركاته....

الأخوه الأفاضل....ليه استفسار عن من له تجربه من المغتربين لشراء منزل في مصر...في الحقيقه بحثت عن اي معلومه عن اسعار و شركات و افضل المواقع و لكن حسيت اني توهت من الذي وجدته علي النت فحبيت اسأل من له تجربه تعامل سواء مع شركات مثل التي موجوده في اللينك المرفق او تجربه شخصيه و ماهو متوسط اسعار بوجه عام ....و لكم جزيل الشكر

http://www.realestateegypt.com/default.asp

[se_ Elsyed]

الموضوع كبير يا كي دبليو ياخويا .. والأسعار هاتختلف إختلاف كلي وجذري من منطقة لأخرى وحسب المساحة وحسب توضيب البيت وإذا كان البيت مرخص ام لا ... إلخ

بس نصيحة أخ بقى .. إنت ممكن تاخد حتة أرض في أي منطقة جديدة وما أكثرهم زي الشروق ، العبور ، القاهرة الجديدة ، التجمع ، مدينة الشيخ زايد في 6 اكتوبر ، وهما هايلزموك بالتصميم سواء اكان فيلا أو بيت ... وأسعارها بتكون معقولة جداً وهاتضمن غن مافيش حد ينطلك ويقولك ترخيص ولا مرافق ولا الكلام ده لأن المناطق دي بتبقى المرافق فيها سالكه وسهله عن إذا كنت هاتشتري أرض من أفراد عاديين ..... وبصراحة لو زرت المناطق دي هاتلاقي حاجات مبنية هناك تجنن تقولش بيفرلي هيلز يا جدع .

طب هاتقولي يا س س يا فالح إذا كنت أنا بانزل أجازة كل سنتين لمدة شهر واحد بس والهيديك بتاع البنا بيحتاج شهور .. أقولك طلبك موجود يا سيدي وكل الحلول جاهزة عند س س اللي كان شغال مقاول انفار زمان ..

ممكن سيادتك تتعاقد مع أي مكتب ديكور او شركة مقاولات ويكون في بينكم عقد لتصميم النموذج اللي إنت عايزه ... طب هنا سؤال .. يعني أسافر وأسيبهم يعجنوا ومافيش حد يراعيهم؟

مش هاقولك خلي أخ أو قريب لك يتابعهم لأن كل واحد عنده مشاغلة وموضوع متابعة عمال المقاولات عايز واحد مجرم ويكون عليه احكام كمان ... يبقى ممكن تفوض أي محامي بأتعاب وهو ياخد باله من الموضوع ده لحد ما يسلمولك البيت على المفتاح .

اما لو عايز تستسهل وتشتري بيت .. فعندك بقى جريدة الاهرام العدد الصادر من داخل مصر يوم الجمعة وبتلاقي فيه إعلانات عن منازل للبيع .

بس خلي بالك إنت قولت منزل مش شقة ... لأن شراء شقة أسهل بكتــــــــــــــير من حكاية المنزل دي .

بس بأي حال من الاحوال سعر المتر مش هايقل عن 1000 جنية ده في المناطق المتعمرة اما المناطق الجديدة فبيبقى أقل من كده وممكن تلاقيه بـ 300 وانت طالع ...

[ragab2]

بصراحة

أردت أن أذكى الرحاب

ولكنى فوجئت بها موجودة بعد فتح اللينك

فهى شركة محترمة وتخدم مشاريعها

ولى صديق يمتلك فيها شقة بطريق مصر الاسماعيلية

ويشكر لى فيها

ولا تنسى

حقنا فى الكوميشن وبالدولار الأمريكى

[سيد كبريتة]

سعر المتر 1000 جنيه

في 250 متر = 250 ألف جنيه

وكمان 250 ألف بناء

و100 الف فرش وتأثيث

يعني في حدود 600 ألف

أنا أعرف ناس مرتبها حوالي 10 آلاف ريال وليها 10 سنين في الخارج ولم تحوش نصف هذا المبلغ

[سقراط المصري]

الاخوه الافاضل

انصح بشراء بيت جاهز على شراء قطعة ارض ثم بنايتها للغلاء الحادث في اسعار مواد البناء وبخاصة حديد التسليح.

سقرااط

[Lighthouse]

كان نفسي افيدك يااخي الكريم

ولكن البركة في الاخوة الكرام

ولكن حبيت ادعي لك بالتوفيق

وان ربنا ييسر لك العسير ويبارك لك في اي عمل ستقوم به ان شاء الله

:unsure: :blink:

[se_ Elsyed]

ولكن حبيت ادعي لك بالتوفيق

وان ربنا ييسر لك العسير ويبارك لك في اي عمل ستقوم به ان شاء الله

:unsure:  :blink:

شكراً يا خالتي أم أبراهيم إن شالله ماعدمك يارب.

[Masrawy Abroad]

www.edar.com

[KWA]

بسم الله الرحمن الرحيم

السلام عليكم ورحمة الله وبركاته

الأخوه و الأخوات الأفاضل....لكم مني جزيل الشكر علي استجابتكم في مساعدتي و علي اقتراحتكم المفيده ...الأخ الفاضل se_ Elsyed انت كأنك بتقرأ افكاري الي حد كبير و اقتراحك انت و الأخ لفاضل سقراط المصري بشراء قطعه ارض و بناء المنزل فكره جيده جدا و يبدو انها هي الأرجح ....و المناطق القترحه للشراء فيها هي اللي فكرت فيها و خصوصا مدينه 6 اكتوبر.....اما كلامك عن ان شراء شقه ارخص و اسرع من المنزل فكرت فيها لكن متوسط مساحه الشقه حوالي 200 متر ....و فكرت في شراء شقتين و فتحهم علي بعض و جدت ان تملك منزل بذاته افضل من ناحيه الخصوصيه و عدم المشاركه في عماره و لا اتحاد ملاك و مشاكلهم ....و كمان انا بعمل ده للمستقبل لما استقر في مصر متي الله اعلم....

الأخ الفاضل دكتور رجب ....طلباتك اوامر يا دكتور رجب ....بس يعني العموله دي ماتنفعش بالمصري و لا انت مصمم بالدولار......الاخت الفاضله Lighthouse يكفيني كلماتك الجميله و دعواتك و شعورك النبيل لك كل التقدير و الأحترام.....و علي فكره ابنتي معجبه بالوجو بتاعك جدا و عايزاني اشترلها العروسه اللي في اللوجو لما ننزل مصر و سمتها باربي المصريه....الأخ الفاضل Masrawy Abroad ....شكرا جزيلا علي اللينك المرسل لأنه يحمل افكار جديده بالنسبه لي.....الأخ الفاضل سيد كبريتة.....مشاركتك للرد علي استفساري لا اجد لها اي تفسير و انا شكرت كل الأخوه الذين استجابوا لأستفساري الكل بأسمه و وجدت ان علي الأقل اشكرك علي مشاركتك و عدم الرد او عدم الشكر علي رسالتك شئ واجب حتي لا تظن انني تعمدت تجاهلك و ليس هذا من طبعي ....تحياتي للجميع.....

[سيد كبريتة]

بأي حال من الاحوال سعر المتر مش هايقل عن 1000 جنية ده في المناطق المتعمرة اما المناطق الجديدة فبيبقى أقل من كده وممكن تلاقيه بـ 300 وانت طالع ...

هذا هو سبب الرد وهو قائم على افتراض انك تعمل في الخارج، وتريد شراء منزل في مصر

ما قصدت اقوله لك في هذا الصدد هو كلمة واحدة فقط يبدو أنها لابد أن أقولها لك بطريق مباشر

لا تتعجل

لا تتعجل

لا تتعجل

ولا تسأل أحد

ولا تسأل أحد

ولا تسأل أحد

انظر إلى ظروفك وإمكانياتك وقرر على أساس ما ستراه

هل تعلم لما أقول لك هذا الكلام

لأنه خلاصة تجربتي المريرة في بناء منزل

ستجد ألف نصيحة وألف رأي عند البدء في شراء الأرض

وحين تتوجه للشراء ستجد من يحاول أن يسمسر فيك ومن يحاول أن يلزق لك اي حاجة وطبعا هناك المخلصين ولكن قلة

عند البناء لا تتخيل ماذا ييحدث

التصميم والرخص السملات وعمود مجوف ومعرفش ايه

وكله كوم والتشطيب كوم تاني

عند التشطيب

ستجد ان كل حسابات التكاليف التي حسبتها

لا وجود لها

وان التكاليف الحقيقة اكثر بكثير مما توقعت او تخيلت

انا كان ممكن اقولك على البركة يلا اتوكل على الله وخد فيم ومعرفش فين

لكن صدقني انا مغترب وعارف القرش اللي بييجي من الغربة بيكون طالع من الدم، فنصيحتي الوحيدة لك الموضوع ليس سهلا والنصائح فيه لا تكون بالمراسلة

ويا بخت من بكاني وبكا عليا

احسن من اللي ضحكني وترك الناس تضحك عليا

تقبل تحياتي

[KWA]

بسم الله الرحمن الرحيم

السلام عليكم ورحمة الله وبركاته

كلامك صحيح و كل شئ بيختلف علي ارض الواقع و ساعه الجد....و انا عانيت من الصناعيه و التشطيبات و تغير بعض الأفكار بعد البناء....و المتابعه و المفاوضات و كل هذا عانيت منه عند بناء منزلي هنا في امريكا..و الشئ المشترك بين الدولتين هو الصناعيه و اسلوبهم في المواعيد .....و كان هدفي من السؤال هو معرفه الخبره المباشره من بعض الأعضاء و رآيهم في افضل المناطق في حاله شراء ارض للبناء او من اشتري فعلا من احد شركات البناء .....و شكرا علي مشاركتك و نصائحك...

[سقراط المصري]

الاخ kwa برجاء قراءة مداخلتي السابقه حيث انني قد نصحت بشراء بيت جاهز افضل.

فعلاً شراء ارض ثم بنايتها امر صعب وعاوز وقت (لايقل عن عام مع التفرغ) وهيطلع لك ميت عفريت وانت بتبني.

سقراط

[msamaan]

www.Egypthome.com

[KWA]

الاخ kwa برجاء قراءة مداخلتي السابقه حيث انني قد نصحت بشراء بيت جاهز افضل.

فعلاً شراء ارض ثم بنايتها امر صعب وعاوز وقت  (لايقل عن عام مع التفرغ) وهيطلع لك ميت عفريت وانت بتبني.

سقراط

بسم الله الرحمن الرحيم

السلام عليكم ورحمة الله وبركاته

الأخ الفاضل سقراط...انا مدين لك بأعتذار بخصوص مداخلتك الأولي انا مش عارف ازاي انا فهمتها علي انك تنصحني بالبناء و في الحقيقه فكره شراء منزل جاهز او بناء منزل ....لازم ادرس ده و ده و كل اللي انا بعمله الأن جمع معلومات سواء من النت او اصدقاء او اخوه في محاورات المصريين و اراء الجميع و من خلال كل هذا احدد ما سوف اراه و اسأل عنه في مصر لأن كل الأجازه 3 اسابيع فقط ....

www.Egypthome.com

الأخ الفاضل msamaan ....شكرا علي مساهمتك و لكن حاولت افتح اللينك او الموقع و لكن لايعمل