شعر صعيدي....مذاق مختلف

[لماضة مصرية جدا]

السلام عليكم و رحمة الله و بركاته

اعرفكم بالشاعر "هشام الجخ".....اول مرة أأقرا ليه النهاردة....و لو نفع ان احنا نسمي شعره شعر صعيدي....يبقي هو كده

اينعم مافيش في التصنيفات حاجة اسمها صعيدي...و اسكندراني و اسوانلي

بس الميزة اللي في كلامه

هي العفوية.....زي ما هو معروف عو الصعايدة...مش بتوع الحايل المايل....و لا مواربة الكلام

يا رب يعجبكم

أول حاجة ليه في التوبيك دوت

اسمها

"أيوة بغير"

لا انا نقصان ولا ضعفان

ولا مسطول ولا سكران

ولا زايغ من عيني الضيّ

ولا حد احسن مني في شيّ

بس بغير

واللي قالولك غيرة الراجل

قِلّة ثقة او قلة فَهم

خَلْق حمير

غيرة الراجل نار في مَرَاجِل

نار بتنوّر مابتحرقش

واحنا صعايدة بنستحملش

شمسنا حامية وعِرْقنا حامي وطبعنا حامي

واللي تخلّي صعيدي يحبها

يبقى يا غُلْبها

اصلنا ناس على قد الطيبة

كلنا هيبة

والنسوان في بلادنا جواهر

طب لو عندك حتة ماس

حتخلّيها مداس للناس؟؟

ولا حتقفلي اوضة عليها بميت ترباس

يمكن حتى تأجري ليها جوزين حراس

يبقى انا لا انا جاهل ولا غافل

كل الفرق ما بيني وبينك اني صعيدي

ينعل ابو ده اليوم الاكحل

اللي لا ليه اخر ولا اول

اللي طلعت لقيتني صعيدي

لو كان بايدي

كنت اعملك هندي بريش

واقلب شعري كنيش كرابيش

والبس لك سلسلة متدلدلة خرزة وقلب

بس ازاي البس لك سلسلة ؟؟ هو انا كلب ؟؟

ثم العبرة ماهيش في اللبس

اصل المشكلة عندك .. عندك ..

قلت حاسيبها وبكرة تحس

بعده تحس

بعده تحس

ده انا لو جبس كنت زعقت

ماشي صداقة وماشي زمالة

بس ماجَتْش على الرجالة

ماهي نسوان الدنيا كتير

وانا ما بقولش تخاصمي الناس

ولا تِتْحِجبي عن الرجالة

ولا تعتكفي وتسكني دير

بس يا ريت حبة تقدير

اني بحبك

واني بريدك

واني زرعت حياتي في ايدك

واني غزلت بنات الدنيا عقود على جيدك

واني تعبت من التفكير

واني بغير

======================

لو عجبكم هنزل بحاجات تانية

تحياتي

تم تعديل 2 أغسطس 2010 بواسطة Salwa

[لماضة مصرية جدا]

ده هشام

و قال عن نفسه

"انا هشام الجخ

هشام الجخ بس

حاقعد اقول سافرت وحصلت وعملت ؟؟؟

حاسس انها شكل من اشكال (السهوكة) الغير مبررة

عموما

اسمي بالكامل

هشام كامل عباس محمود الجخ مهدي محمد علي سالم ابو جاموس

عمامي من قنا وخوالي من سوهاج

اتربيت في سوهاج ودخلت كلية التجارة هناك

كانت اياميها تبع جامعة اسيوط

حولت لجامعة عين شمس واتخرجت منها سنة 2003 وعملت دراسات عليا في ادارة الاعمال في جامعة عين شمس

اتعينت في الجامعة مسؤول عن المركز الثقافي في نفس سنة التخرج واستقلت من الجامعة في 11/ 2009

ومحدش يقول لي ليه

انا منفعش ابقى موظف من الاخر

مواليد اول اكتوبر برج الميزان يعني

بسمع حنان ماضي وانغام وشيرين ووائل جسار

بعشق منير ومارسيل خليفة

بموت في ام كلثوم .. لكن كوكب الشرق عندي فيروز طبعا

بكتب شعر على مهلي

على مهلي جدا

بحترم الشعر

بحب الشعر وبذاكره وبهتم بيه ومش بقوله غير وانا عايز اقوله

بعشق عيون الناس وهي بتلمع

وانا واقف على خشبة المسرح

وبموت في كلمة الله لما تطلع من الناس

وامنية حياتي اني لما اموت .. العالم كله يعرف ان هشام الجخ مات

اظن كدة كفاية كلام"

====================================

و ده طبعا شايلاه علي قلبي من صفحته ع الفيس توك لغاية هنا

تحياتي

[لماضة مصرية جدا]

السلام عليكم و رحمة الله و بركاته

دي عجبتني أوي

قصيدة جحا

شعور سخيف

إنك تحس بإن وطنك شيء ضعيف

صوتك ضعيف

رأيك ضعيف

إنك تبيع قلبك وجسمك

وإنك تبيع قلمك وإسمك

ما يجيبوش حق الرغيف

سألوا جحا عن سر ضحكه

قالك أصل اتنين وشبكو

اللى كان من تحت ميت

واللى كان من فوق كفيف

دا شعور سخيف

وشعور سخيف

إنك تكون رمز الشحاتة

تبنى مبنى للشحاتة

تعمل وزراة للشحاتة

يا ساقية دورى … عدى فوقى ودوسى

نصبوا عليا وشحتونى فلوسى

ربطونى فيكى .. حتى ما اتغميت

هما اللى فرحوا ووحدى أنا اتغميت

أنا اللى صاحب البيت

عايش بدون لازمة

ولما مرة شكيت

إدونى بالجزمة

أنا اللى زارعك دهب

بتأكلينى سباخ

إن كان دة تقل ودلع

بزيادة دلعك باخ

لا شفت فيكى هنا

ولا شفت فيكى ترف

كل اللى فيكى قرف

كرامتنا متهانة

واللقمة بإهانة

بتخلفينا ليه لما انتى كارهانا

يعنى ايه تبقى إنتى هبة النيل يا مزة

وكل يوم المية تقطع

يعنى ايه لما اشتكى غلو الفاتورة

يقولو تشكى بس تدفع

لما قش الرز ثروة بتتحرق

وأما نفط الأمة ثروة بتتسرق

وأما جلادك على ولادك بيبطش

وأما علمك ما يلاقيش يآكل فيطفش

يعنى ايه نرفع ايدينا بالسلام لجل الغزاة

ويعنى ايه لما ابقى ماشى فى حالى اتشد اشتباه

يعنى ايه لما اتحبس أربع سنين حبس احتياطى

يعنى ايه مش حاسة بالعمر وغلاوته

بتصبى مر العمر ليه

دة انا كنت ح اوهب لك حلاوته

أنا عمرى ما أتأمرت

ولا حطيت شروطى

ومكان ما ترسى مركبك

بابنى شطوطى

أنا كنت جيشك لما مماليلك باعوكى

وكنت يوسف لما عشتى سنين عجاف

وضلوعى دى اللى فى معركة قادش حموكى

وشفايفى دى اللى ما بطلتش فى يوم هتاف

دة انا كل شبر فى أرضك اتمرمغت فيه

وكل يوم عشتيه

أنا اتعذبت بيه

بتكرهينى عيونك السودة

وأيامى اللى فاتت

مانتيش حبيبيتى من النهاردة

حبيبتى ماتت

علا صوت أدانك جرس

فى الشدة صاحينلك

من امتى كانوا الحرس

هما اللى باقينلك

بعتينى علشانهم

وعنيكى معصوبة

ياهلترى خاينة

ولا زيى مغصوبة

كل الكلام اتقال

والشعر بقى ماسخ

والصبر علو جبال

والظلم شىء راسخ

وطن وغرقان فى النطاعة

كل شىء ريحته نطاعة

علمونا بالعصاية

ورضعونا الخوف رضاعة

علمونا فى المدارس

يعنى ايه كلمة قيام

علمونا نخاف من الناظر

فيتمنع الكلام

علمونا ازاى نخاف

وازاى نكش

بس نسيوا يعلمونا الاحترام

فمتزعلوش

لما ابقى مش باسمع كلامكم

وماتزعلوش لما ابقى خارج عن النظام

مستنى ايه من طفل ربوه بالزعاق

غير المشاكل والخناق

كل اللى بيقولك بحبك دول نفاق

أنا لما قلت لك بحبك

كان نفاق

الحب يعنى اتين بيدوا

مش ايد بتبنى وستميت تيت تيت يهدو

الحب حالة

الحب مش شعر وقوالة

الحب يعنى براح فى قلب العاشقين للمعشوقين

يعنى الغلابة يناموا فى الليل دفيانين

الحب يعنى جواب لكل المسجونين

هما ليه بقوا مسجونين

يعنى أعيش علشان هدف

علشان رسالة

يعنى احس بقيمتى فيكى

إنى مش عايش عوالة

يعنى لما اعرق تكافئيى بعدالة

الحب حالة

الحب مش شعر وقوالة

الحب حاجة ما تتوجدش فى وسط ناس

بتجيب غداها من صناديق الزبالة

بارت مراعينا والبئر قد جفَ

والجوع يكوينا والصبر ما كّفى

والقلب لا يهدا والجرح لا يشفى

ولأننا طوع

زنا لهم خفا

جاءوا بموكبهم

واشتغلت الزفة

الدفة مظبوطة

وأصلا مافيش دفة

والكفة مش مايلة

علشان مافيش كفة

و جحا اللى جاى بالليل لساه بيتخفى

شايف ديدان الغيط سارحة ومارحماشى

من جبنه شاف الدود سابه وراح ماشى

ولا اتكسف للناس

ولا حس على طوله

الناس عشمها كبير جريوا بيشكوله

ضحك جحا ضحكة مواشى

مادام بعيد عن طينى … ماشى

الدود قاعد لك يا جحا ولابد فى طينك

بعد ما يمص فى دمانا مش حيحلاله الا طينك

احنا اهلك

احنا رجالتك

أمانك

إحنا وقت الشدة سندك

إحنا زادك

يا جحا احمى ولادك

لو كنت عايز تحمى طينك

سوف أرحل

ربما يلقانى من ارجو لقاه

هامشى ويا الشحاتين

وابكى على حلمى اللى تاه

بس مش هاشحت رغيف

هاشحت وطن لله

[Mr MAGED]

الشاعر هشام الجخ ... أكيد سمعتوا الاسم ده قبل كده

انا عن نفسي سمعت عنه وقريت بعض أعماله لكن أول مرة اشوفه

استضافته مني الشاذلي في حلقة فعلا متميزة

وان كنت معترض علي حركاته الزيادة عن اللزوم بس من الواضح ان دي طبيعته

لكن فعلا هو شاعر متميز ... ويستحق الاشادة والمتابعة

ده الجزء الأخير اللي نهي بيه الحلقة ... قصيدة جحا

جحا - شعور سخيف

وتقدروا تتابعوا جميع أجزاء الحلقة علي اللينك ده

هشام الجخ - العاشرة مساءا ً

أتمني انه يعجبكوا

تحياتي

[شريف مان]

شعور سخيف انك تحس ان وطنك شىء ضعيف

صوتك ضعيف رأيك ضعيف

وانك تبيع قلبك وجسمك وانك تبيع قلمك واسمك

ميجبوش حق الرعيف

سألوا حجا عن سر ضحكه قالك أصل اتنين وشبكوا

اللى كان من تحت ميت واللى كان من فوق كفيف

دا شعور سخيف

وشعور سخيف انك تكون رمز الشحاته

تبنى مبنى للشحاته تعمل وزاره للشحاته

يا ساقيه دورى عدى فوقى ودوسى

نصبوا عليا وشحتونى فلوسى

ربطونى فيكى حتى ماتغميت هما اللى فرحوا وحدى انا اتغميت

انا اللى صاحب البيت عايش بدون لازمة

ولما مرة شكيت ادونى بالجزمة

مش لاقى تطفح أديك

هاتولنا وجيبولنا وادونا ودونا

هنجيب منين نديك مش لاقى تطفح أديك

طافح يابلدى غدايا ولوعتى غدايا

وآدى الاحبه التقوا واتجمعوا عدايا

أنا اللى زارعك دهب بتأكلينى سباخ

ما ان كان دا تقل ودلع ماكفايا دلعك باخ

ما شفت فيكى هنا ولا شفت فيكى ترف كل اللى فيكى قرف

كرامتنا متهانه واللقمة باهانه

بتخلفينا ليه لما انتى كرهانا

يعنى ايه تبقى انتى هبة النيل يا موززة وكل يوم المية تقطع

يعنى ايه لما اشتكى غلو الفاتورة يقولى تشكى بس تدفع

لما قش الرز ثروة بتتحرق وأما نفط الامة ثروة بتتسرق

أما جلادك على ولادك بيبطش واما علمك مايلاقيش ياكل فيطفش

يعنى ايه نرفع ايدينا بالسلام لاجل الغذاء ويعنى ايه لما ابقى ماشى فى حالى اتشد اشتباه

يعنى ايه لما اتحبس 4 سنين حبس احتياط حبس اعتباط

يعنى ايه مش حاسه بالعمر وغلاوته

بتصبى مر العمر ليه دا انا كنت هوهبلك حلاوته

داانا عمرى مااتأمرت ولا حطيت شروطى ومكان ماترسى مركبك بيبنى شطوطى

انا كنت جيشك لما مماليكك باعوكى وكنت يوسف لما عشتى سنين عجاف

وضلوعى دى اللى فى معركة قادش حموكى

وشفايفى دى اللى مابطلطش فى يوم هتاف

انا كل شبر فى أرضك اتمرمغت فيه

وكل يوم عشتيه انا اتمرمغت فيه

بتكرهينى عيونك السودة وأيامى اللى فاتت

ماانتيش حبيبتى من النهاردة حبيبتى ماتت

مع صوت أذان الجرس فى الشده صاحينلك من امتى كان الحرس هما اللى باقينلك

بعتينى علشانهم وعنيكى معصوبة يا هل ترى خاينة وللا زيى مغصوبة

كل الكلام اتقال والشعر بقى ماسخ

والصبر علو جبال والظلم شىء راسخ

وطن وغرقان فى النطاعة كل شىء ريحته نطاعه

علمونا بالعصايه ورضعونا الخوف رضاعه

علمونا فى المدارس يعنى ايه كلمة قيام علمونا نخاف من الناظر فيتمنع الكلام

علمونا ازاى نخاف وازاى نكش بس نسيوا يعلمونا الاحترام

فمتزعلوش لما ابقى مش بسمع كلامكم ومتزعلوش .....

مستنى ايه من طفل ربوه بالزعاق غير المشاكل والخناق

كل اللى بيقولك بحبك دول نفاق

انا لما قولتلك بحبك كان نفاق

الحب يعنى 2 بيدوا مش ايد بتبنى

و600 تيت تيت يهدوا

الحب حالة الحب مش شعر وقواله

الحب يعنى براح فى قلب العاشقين للمعشوقين

يعنى الغلابة يناموا فى الليل دفيانين

الحب يعنى جواب لكل المسجونين هما ليه بقوا مسجونين

يعنى اعيش علشان هدف علشان رسالة

يعنى احس بقيمتى فيكى انى مش عايش عواله

يعنى لما اعرق تكافئينى بعداله

الحب حالة الحب مش شعر وقواله

الحب حاجة متتوجدش فى وسط ناس بتجيب غداها من صناديق الزبالة

الحب جواكى استحالة

[Salwa]

موضوع رائع ..

تحية من القلب لكل من شارك بالقاء الضوء على هذا الانسان المصرى الجميل ..

لكم جميعا خالص الشكر .. :roseop:

لنا عودة ان شاء الله..

[se_ Elsyed]

بجد ... اتكعبلت في الحلقة اللي أستضافته فيها منى الحسيني يوم 28-7 وكنت مسافر فجر اليوم التالي وكانت هاتفوتني الطيارة لأني أنجذبت للحلقة ونسيت أنام .... وبصراحة لم أندم على هذا الانجذاب

مش هاتكلم وهاعرض جزء من الحلقة والباقي هاتلاقيه على يمينك في اليوتيوب لما تشوف الجزء ده

بالرغم من انه مأفورها في التعبير بإيده وعينه ... لكن كلماته ...... رصاص ....

الغريب بقى .... بصوا وشوفوا عدد من شاهدوا المقطع في خلال اسبوع ... 150 الف .... تخيلوا ؟

http://www.youtube.com/watch?v=z90qk08RKkM

[se_ Elsyed]

أيوه بأغير أصلي صعيدي

http://www.youtube.com/watch?v=CzOwwqSe9bY&feature=related

عندي اعتقاد لن يتغير وهو إن الشعراء الموهوبين يسكنهم جن ... بصراحة .... مش طبيعيين

[ياسر]

أيوه بأغير أصلي صعيدي

http://www.youtube.com/watch?v=CzOwwqSe9bY&feature=related

عندي اعتقاد لن يتغير وهو إن الشعراء الموهوبين يسكنهم جن ... بصراحة .... مش طبيعيين

استاذ س س ,

تحياتي لحضرتك و احب اقول ان فعلا الانسان لما ربنا يديلة ملكة ما فعلا بيصاب بنوع من اللوثة العقلية و دة لانة بيبقي مستغرق في الحالة اللي هو فيها,, والحالة دي مايحسهاش الا اللي براها,عشان كدة انت بتعلق علي حركة ايدة و انفعالاتة, حتي لو كان عندة نفس الملكةالابداعية لكن حاليا مش متواجد جوة الحالة دي.

اما هشام فهو ابنودي جديد في رأي رغم ان هو شخصيا ما يحبش يبقي أبنودي تاني بل هشام اول, بنص كلامة,,, ادعوك و ادعو حبايبنا في المنتدي انهم يسمعو اكتر لهشام , معظم اشعارة علي اليوتيوب,, او يحضرولة لو في مصر

اسمعولة ايوة بغير,, اباتشي,, ايزيس, مش كفاية,المربعات و المثلثات,,كنت عبيط,,نانا~,جحا,, تلات خرفان.

تحياتي

تم تعديل 6 أغسطس 2010 بواسطة ياسر

[shiko]

....جحا,,,

قصدى س س...بالرغم من انى فوجئت بالست لماضة هانم فتح الباب سبقت الكل فى اكتشافها للشاعر ده ...فى اللينك بتاع شعر صعيدى ...

الا انى لما شوفته لايف فى ساقية الصاوى وجيت شوفت اللينك ده على اليوتيوب فوجئت ...لا ذهلت ...لا لا اذبهليت ...

بجد شعور سخيف انك يكون جواك شعور ...موش عارف تعبر عنه وفجائة تتخبط فى واحد بقولهولك بالظبط ...زى هشام ...

ده عبقرى وعلى فكرة ..بالنسبة للبدى لانجوتش بتاعته ...انا معجبة بيها جدا ...ده كمان حنى نبرة صوته ...لكنته ....بجد عبقرى ...

وعلى فكرى قصيدة ...ايوة بغير ...دى حسستنى انه لسه فى كوبى من مخلوقات ... اسمها.... رجالة ..

..مقتطفات ....من اجمل ما سمعت منه

موش لاجى تطفح اديك ....؟؟

هانجيب منين نديك ...؟؟

=====================

نصبوا عليا وشحتونى فلوسى ....

=====================

بزيادة دلعك باخ لا شفت فيكى هنا

ولا شفت فيكى ترف كل اللى فيكى جرف

=====================

كرامتنا متهانة

واللقمة بإهانة

بتخلفينا ليه لما انتى كارهانا

===============

الحب حاجة ما تتوجدش فى وسط ناس

بتجيب غداها من صناديق الزبالة

...

مساكم مشاعر الدفينة ...تلاقى واحد عبقرى ..زى هشام ...يعرف يطلعها صح

[Diab]

لا بجد كدة كتير

أصل إبن خالة هشام الجخ صاحبي هنا في السعودية وهاريني بيه ع الفيس بوك

[se_ Elsyed]

أسف جداً يا لماضه باشا

ما أخدتش بالي إنك بتتكلمي عن نفسي الشاعر ... أنا قريت العنوان من فترة وقلت ريهام داخله تقول لنا " حسانين ومحيمادين زينة الشباب الأتنين " على أعتبار إن ده شعر صعيدي

على العموم هاقوم بضم الغله .. قصدي ضم الموضوعين ....

[Diab]

يعني انت تضم موضوعين وتكرر الرد مرتين

[se_ Elsyed]

يعني انت تضم موضوعين وتكرر الرد مرتين

أنا قاصد كده يا دياب

عشان أعذبك أكتر

ممكن أبعت لك لنكات للقصائد بتاعته ؟ بليز ....

[عنبو]

الغريب بقى ان لما تسمع الشعر منه غير لما تقراه

الواد ده موهوووووووب بجد

الى جانب انك تحس انه مصرى متأصل قوى سواء بلونه ولا كلامه ولا العروق الظاهره فى رقبته

تحس وهو بيتكلم انه ماسك فأس وبيزرع ارض

طيب ممكن أسأل سؤال

مهو الصعايده حلوين اهو

ليه بقى كل شويه سين سين يقول عليهم نكت

انا شخصياً معرفش

[pocy]

شكلك بتهدى النفوس يا عنبي بين الصعايده واللى افتخر ان اجدادى منهم وبين الاخ الفاضل سين سين اللى هاريهم نكت

بس بجد تحيه واجبه من كل مصري لهذا الشاعر العظيم واللى لسه مكتشفاه من موضوع الاخ الفاضل سين سين واللى سبقته اختى لمضمض فيه بجد جزاكم الله كل الخير على الموضوع الجميل قلبا وقالبا

اه نسيت كل سنه وانتم طيبين

[herohero]

هشام الجخ من نجوم ساقية الصاوي

ولو عندكم وقت ياريات تبقوا تبصوا على

1- علي سلامة

2- هشام الجخ

3- أمين الديب

ناس كلامها من قلب الشارع المصري يعني بتحس انهم كده اعضاء ف محاورات المصريين

http://www.youtube.com/watch?v=E9QfB8OdusM&feature=related

[لماضة مصرية جدا]

السلام عليكم و رحمة الله و بركاته

هشام....الجخ.....الشاب الصعيدي

قعدت افكر و ابص لهشام....هو ليه صعيدي؟؟

عشان يعني بينطق الجيم....جيم (تقيلة يعني)...بس الحقيقة احنا مش بنعمل كده

عشان بيتكلم بصوت عالي مثلا...و بيستخدم ايديه.....الحقيقة ممكن جدا جدا....(معظم الرجالة هنا بيعتمدوا ع الحاجتين دولت لاثبات وجهة نظرهم في اي حوار حتي لو بيعزم عليك تاكل البطة اللي قدامك)

عشان اسمر ...و سماره بيفكرك بالفلاح اللي قضي طول النهار يعزق في الغيط...عشان ارضه...(بس الصعيد مش بس سمر...الرجالة ممكن)

عشان بيتكلم بعفوية.....ممكن بعض الناس تقولك ده مدب في الكلام....يعني بيقول اللي بيفكر فيه من غير ما يفكر فيه...و دايما يحطك في حالة مفاجاة

يمكن

بس الاكيد

عشان هو ببساطة بيفكرك بحاجات حلوة كتير بتغيب عن الواحد لما بتبلعه المدينة الكبيرة

بيصحي فيك مشاعر...بسيطة.....بتخبط ع الباب و بتدخل من غير استئذان

بيقولك.....جواك احساس حلو...

يوم ما بتسمع....

يوم ما بتنفعل باللي بيقوله...

يوم ما بتفتكر حبيبتك معاه....

يوم ما بتغير معاه....

يوم ما بتبص علي جحا و تضحك...

و تبكي معاه

هو ده

الفطرة

الصعيدي.....يبقي الارض العفية.....اللي لسه بخيرها و بكارتها

متحيزة.....اكيد.....و جدا...و اوي كمان

و يمكن احيانا زي استاذي سين سين.....بتريق ع الصعيدي دوت.....عشان لما بتوه ملامحه...و يصر انه يحرث في ارض مش ارضه و يلبس جلابية مش ع مقاسه...لازم نتريق عليه....بس احنا الصعايدة نتريق ع بعض.....مننا فينا

مسااااااكم كوباية شاي صعيدي تقيل موووت (انا جيل الصعايدة الماسخ بتاع النسكافيه.....بس ابي و عمي....صعايدة بحق)

[لماضة مصرية جدا]

هشام الجخ من نجوم ساقية الصاوي

ولو عندكم وقت ياريات تبقوا تبصوا على

1- علي سلامة

2- هشام الجخ

3- أمين الديب

ناس كلامها من قلب الشارع المصري يعني بتحس انهم كده اعضاء ف محاورات المصريين

http://www.youtube.com/watch?v=E9QfB8OdusM&feature=related

السلام عليكم و رحمة الله و بركاته

اتصدق يا استاذ هيرو...انا هعيط...ايون و ربنا

اصلي كنت فتحت توبيك اسمه "البت باتعة"...لعم الحاج امين الديب و بجد كنت معجبة اوي باللي بيقوله.....و بعدين كملت باستاذ علي سلامة لاني بحب مفرداته و احساسه جدا...و فضلت ازعق... يا اخوانا يا اللي هنا...اكمل و لا لا و محدش رد عليا :sad:

الحمد لله كده ممكن ارجع اكتب في التوبيك تاني.....بس مش هعرف هو فين اصلا....حدش ياخد بايدي و يعديني الشارع....قصدي يوديني هناك...

انا مستنية اهه....(وش واحدة واقفة ع الرصيف بتقول يا رب اعدي الناحية التانية)

ع جنب بقي

هو فيه في مصر مشكلة في تعدية الشارع...انا بجد مبعرفشي اقطع الطريق....و لما بيكون معايا اطفال ممكن نقف حوال 10 دقايق...اتهريت فيهم تريقة...م القروود اللي مسكاهم في ايدي و من الاخوة المواطنين الشرفاء اللي ماكنوش عارفين مشكلتي ايه :blink:

تفتفكروا كده ابقي صعيدية بقي و لا ايه..... :lol:

[se_ Elsyed]

عنبو فعلاً بيهدي النفوس

وعلى فكره هو دايماً اللي بيبعت لي ويقول لي : يالا نتريق على الصعايده ... أنا هاعترف يا باشا ...

عنبو هو اللي مُحرضني ودايماً بيقول لي إن الشراقوة اجدع من الصعايده وكدهوت ....

وأنا اقول له لأ يا عنبو ... غلط يا عنبو .. الصعايدة جدعان وحبايبنا يا عنبو ..

أستلم بقى يا معلم عنبو .. اتوقع هاتبقى زبيب الأيام الجاية دي ... وضبر الزبيب زي أكل الحبيب ...