أنا مش فاهم هو احنا بنصدر القمح ولا بنستورده ؟

[se_ Elsyed]

بعد ما قرات الخبر ه أنا بأعمل كده دلوقت

وخلاص فاضل حتت زعروره على رأي لماضه وأبقى أقرع ...

هو أحنا بنصدر القمح ولا بنستوردة ؟؟؟؟؟؟؟

ولا نكونش بنصدر بس عشان الحسد بنستهبل وبندعي الفقر ونقول إحنا من أكبر مستوردي القمح في العالم وعندنا كارثة فعلية دائمه وطوابير عيش للصبح والناس بتقطع بعضها قدام الأفران ؟

مصر ستصدر 150 طن قمح مطور إلى أفغانستان

الأحد، 8 أغسطس 2010 - 14:11

مركز البحوث الزراعية طور سلالة جديدة من القمح

كتبت ميريت إبراهيم

وقعت مصر اتفاقية تعاون ثلاثى مع أفغانستان والولايات المتحدة الأمريكية، فى مجال تصدير القمح إلى أفغانستان لمساعدتها فى تغطية احتياجاتها الاستهلاكية، ومن المنتظر أن تقوم مصر فى إطار الاتفاقية بتصدير حوالى 150 طنا من القمح لكابول.

وقام مركز البحوث الزراعية بالتعاون مع وزارة الزراعة بتطوير سلاسة من القمح أطلق عليها "مصر1" لكى يتم تصديرها إلى أفغانستان التى تعانى من سوء وضعف سلالات القمح التى تزرع لديها، وفقا لما صرح به مصدر بالسفارة الأمريكية.

وعلم "اليوم السابع" أن الاتفاقية يتم الإعداد لها منذ حوالى أسبوع أو أكثر، أى قبل إعلان روسيا وقف تصدير القمح الروسى لحين تخطيها أزمة الحرائق الحالية، وهو الأمر الذى تسبب فى إثارة مخاوف مصر من ظهور أزمة فى الكميات التى يحتاجها السوق المصرى من القمح.

ومن المنتظر أن يعقد مؤتمر صحفى بمركز البحوث الزراعية يوم الثلاثاء المقبل للإعلان عن التفاصيل الخاصة بالاتفاقية.

إزاي لا مؤخذه ؟

وليه إتفاق ثلاثي أمريكا داخله فيه ؟

على أساسا إنها سمسار يعني ولا عشان هي تحتل أفغانستان دلوقت ؟

الغريبة إن في إجتماع وزاري موسع النهاردة في مصر لبحث القرار الذي أتخذته روسيا بوقف تصدير القمح إلى حين الكشف عن حجم الخسائر التي ستُخلفها حرئق الغابات في روسيا واللي خلى موسكو تختفي تحت دخان الحرئق وهما فعلاً في أزمة دلوقت

وزي ما يكون روسيا هي المصدر الوحيد للقمح

وإن كنت أشك إن العملية داخل فيها بيزنس زي ما في الشهور اللي فاتت أستوردوا قمح بتاع حيوانات على إنه قمح للدقيق ... وكُل وزيح يا عم الحج العيا مُر

ولما مركز البحوث اللي في الدقي شاطر قوي كده في التطوير والتطور والنشوء والأرتقاء .. ما بيطورش ليه سلالات تخلينا نعدي حتى موضوع إنتاج ربع أستهلاكنا فقط .. يعني نفسنا نوصل النص حتى ونستورد النص ....

مش بأقول لكم دماغي هاتفرقع

[doha]

في معلومه كنت سمعتها زمان بس مش متاكده اوي من صحتها ان مصر بتصدر قمح لامريكا ذو مواصفات وجوده معينة وتستورد منها قمح آخر بكمية اكبر في مقابل ان المواصفات اقل او جوده مختلفة عن الي صدرت بيه ..

الوضع ده يشبه لو معاك رغيف عيش كايزر لسه طالع م الفرن وقدامك خمس بطون جعانه تاكل كل واحد منهم فتفوته ويفضل جعان ولا تضحي وامرك لله وتروح تديه لواحد مقتدر وتاخذ بداله خمس ارغفه بلدي مقدد صحيح مش جيده بس اهي حاجه تسد الجوع ..

ده الكلام الي سمعته زمان وربما ان الوضع كده خاصه والخبر بيقول ان ( السلالات ) عندنا افضل يعني بالتاكيد هنبيعها بسعر اعلى من الي هنشتري بيه والفرق هيبقى لصالح الكمية ..

ده من جهة ومن جهة تانيه طالما في بيع وشرا يبقى في ناس هتبيع وناس هتشتري يعني في ناس هتنفع وناس تستنفع واهي ارزاق ومقسمها الخلاق متبصش بقى للناس في لقمتها .. :closedeyes:

تم تعديل 8 أغسطس 2010 بواسطة doha

[se_ Elsyed]

كلام جميل .. كلام معقول ... لايلا لايلا .. واشهد عليه يا ليل ..

يا ضُحى إنتي تقربي لسامح فهمي وزير البترول والمنجنيزات المعدنية ؟

والله باتكلم جد

اصل ده كان نفس تفسيرة عند سؤاله عن تصدير الغاز لأسرائيل ..

قال بنصدره عشان نجيب عمله صعبه للبلد

في حين إن عنده أزمة طاحنة في انابيب الغاز .. واللي الشعب المصري كله ما حدش كان يعرف إننا بنستورد غاز بوتاجاز من الجزائر ولما حصل موضوع الكورة .. قطعوا عننا الحنفيات وظهرت المشكلة على السطح وشكلنا ممكن نرجع لبوابير الجاز نعمر ..

في حين إن إسرائيل بتشغل محطات إنتاج الكهربا عندها .. بالغاز المصري ...

على الجانب الأخر محطاتنا بقت تضرب عشان الضغط عليها شديد ومش ملاحقه ويا عيني الصعيد دلوقتي متبهدل من بعد بني سويف وإنتي نازله ورجعنا للقرون الوسطى تاني وبقت الكهربا تقطع عندهم بشكل يومي .. وسمعت إن في معظم مناطق الأسكندرية الكهربا بقت تقطع بانتظام يومياً من 8-10

نقوم بعد ده كله نصدر كيزر ونستورد عيش بتاو ؟

وبرضوا السؤال مره أخرى .... السلالات النضيفة دي ما حلتش المشكلة ليه عندنا ؟

[Diab]

بص احنا بنصدر- تورده

يعني بنبعت الحاجة خام بدولار تتظبط برة بدولارين يرجعوا يبيعوا لنا نفس الحاجة ب 10000000000000000000000000 دولار

قس علي كدة كل حاجة غاز قطن بترول سكر اي حاجة

وتحياتي ورمضان كريم

تم تعديل 8 أغسطس 2010 بواسطة Diab

[akramgroup]

للاسف ياجماعة انى قريت انهارده ان السى ان ان كتبت بتقول ان مصر اكبر دولة مستوردة للقمح فى العاااااالم ومعظمه طبعا من روسيا

حد يقولى ان السى ان ان محطة كذابه ومبيفهموش حاجه عن بلدنا هما اكيد ميعرفوش اننا بس بنحب نخزى العين

او بيتهيألى بنستوردة عشان نصدرة ويبقى ده الشغل العالى فعلا :happy:

اوعى يكون اى حلوانى فى مصر هو اللى حرق غابات روسيا عشان يحصل كده ويغلى الدقيق فى رمضان والناس تشترى منه كحك العيد :D :D

بريء يابيه

اكرم,,,

[جسار]

موجة الجفاف التى ضربت روسيا ستؤذى سوق الحبوب العالمية بشدة لان أنتاج

روسيا من القمح بيحتل مرتبة متقدمة فى أنتاج الحبوب ، وطبعا ستزيد أسعار الحبوب كلها وبدائلها ،

وقد ظهرت بوادرها فى السوق المصرى بأرتفاع أسعار المكرونة حوالى 50 % قبل حلول رمضان

وبالنسبة لغاز الانابيب المستورد من الجزائر فهو غاز البوتان ويختلف عن الغاز الطبيعى

التى تنتجه مصر وتصدره لاسرائيل .

[se_ Elsyed]

موجة الجفاف التى ضربت روسيا ستؤذى سوق الحبوب العالمية بشدة لان أنتاج

روسيا من القمح بيحتل مرتبة متقدمة فى أنتاج الحبوب ، وطبعا ستزيد أسعار الحبوب كلها وبدائلها ،

وقد ظهرت بوادرها فى السوق المصرى بأرتفاع أسعار المكرونة حوالى 50 % قبل حلول رمضان

وبالنسبة لغاز الانابيب المستورد من الجزائر فهو غاز البوتان ويختلف عن الغاز الطبيعى

التى تنتجه مصر وتصدره لاسرائيل .

إيه يا عم جسار هو في ايه ؟

بقى حريقة تحصل أمبارح تقوم أسعار المعكرونه - على رأي اللبنانيين - ترتفع 50 % في يوم ؟

لأ الموضوع مش كده

الموضوع إن الحكومة تفتق ذهنها إنها تستبدل الرز بتاع التومين بالمكرونه هههههههههههه

وبدل ما تعمل رز بلبن أعمل مكرونة باللبن والمكسرات

او كل الطبيخ بالمكرونه

أو كلوا جاتوه او كيزر ومعجنات من اللي ضحى بتعملهم وكدهوت يعني :lol:

عشان كده سعر المكرونة زاد

وفي نفس الوقت أنخفض سعر الرز لأن المعروض هايكتر