se_ Elsyed بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 من كُتر ما بتتقال لي .. بأفكر دلوقت أغير مذهبي من مذهب الأمام أحمد بن حنبل إلى مذهب الأمام أبو حنيفة النعمان وعلى الصداق المُسمى بيننا .. والله العظيم بقيت أشك في نفسي ... خصوصاً بعد ما أخويا الكبير لسه قايلها لي صراحة في وشي " إنت بقيت مريض نفسياً ومحتاج تتعالج " ما حدش يعرف دكتور نفساوي كويس بيعالج بالكهربا ؟ بس خايف أكون محطوط على التونجر وبأتشحن تقوم الكهربا قاطعه وأهنج أنا او يحصل كوريبشن للسوفت وير وإيه السبب بتاع العلاج النفسي ؟ مش هاتصدقوا .. السبب إني بأحب أحافظ على مواعيدي ... وأحترم كل إنسان يفعل مثلي .. ومش ممشيها سبهلله وترجع أحداث هذه القصة إلى إني كنت مسافر مصر من كام أسبوع .. قريب يعني .. ويادوب هما 4 أيام على السريع وفي الرحلة وقبل الرحلة عملت خناقتين جامدين مع أخواتي الصبيان الإتنين الأول أخويا الصغير هنا ... أنا رحلتي كانت الفجر .. وكنت مفحوت في الشغل في نفس اليوم .. ونفسي أنام ساعتين قبل ما اروح المطار .. أتصلت الساعة 10 مساءً بأخويا عشان كان عنده شنطة سفر فيها أغراض لازم أخدها مصر ... إنت فين يابني ؟ قال لي أنا بره ... قدامك قد إيه وتيجي لي ؟ رد وقال : قدامي نُصايه !!! بالمناسبة .. التوقيت والزمن في مصر بقى بالكيلو دلوقت أه والله ... حتى مراتي لسه راجعه من أسبوعين وبقت تتكلم زيهم ... يا سين سين الأكل هايخلص بعد ربعايه .. أو نصايه أو تلتايه ... كده يعني ... المهم قلت له طب بسرعه الله يخليك عشان نفسي أنام لأني مرهق جداً ... النصاية سحبت لإتنين كيلو ونص ودخلنا في الساعة 1 والبيه كل شوية يقول لي نصاية واوصل لك لحد ما أنفجرت فيه وزوجته كانت معاه وبهدلتهم هما الإتنين .. وزعل وما جاش يسلم عليه ولا يودعني ورمى لي الشنطة في عربيتي تحت البيت ... وقلت له إزعل ولا أتفلق .. ... خلصنا على كده ؟ لأ إزاي .. أنا نازل مصر لعدة ساعات وورايا 100 حاجه ... ووقتي محدود ... أتفقت مع أخويا الكبير إننا نروح مشوار ضروري يوم الجمعة ... وكان الكلام ده على الفطار الصبح .. وقولت له نصلي ونشد على الساعة واحده ونصف لأني خلاص مسافر تاني يوم ومافيش فيمتو ثانية فاضية عندي وكان أولادي معايا وجاهزين وروحت أصلي واولادي عنده بيلعبوا مع أولاد عمهم . رجعنا من الصلاة لقيته بيقول لي إديني نصايه بالكتير قوي هاوصل مشوار وأجي طيران .. قلت له أنا عارف الزحمه في الطرق بعد الصلاة والنصاية دي ممكن تسحب لأتنين ونص وتعالى وبص ... قال لي عيب .. هي نصاية وأمسك الساعة وأحسب لي ... المهم .. الساعة بقت 3 ... إنت فين يابني ؟ قال لي أنا في الميدان أهو جنب البيت وبالكتير قوي إديني ربعايه .. والله بنفس اللفظ الربعاية بقت حته كاملة وبقت الساعة 4 إنت فين يابني ... قال لي ربعايه والله وخلاص أنا في العربية أهو قلت أقلبه وأروح أخد ولادي من عنده أكتشفت المصيبة الكبرى ... خرج هو وزوجته وقفلوا على العيال كلهم بالمفتاح .. وولادي بقوا يكلموني من خلف الجدران وولا عارف أتحرك أنا ولا أخد أودلاي وما أنفعش أسيبهم الربعاية يا سادة وصلت إلى الساعة 6 مساءً بالتمام والكمال .. خلوا بالكم من كام ؟ من الساعة 1.30 واللي قطع قلبي أكتر إن العيال كلهم محبوسين وعمالين يقولوا لي إحنا جعانين يا بابا وعاوزين نخرج من السجن ونتغدا شرف البيه الساعة 6 ومن غير ما اكلمه قلت له أفرج عن الرهائن من سكات وما تقولش حاجه ...وأخدتهم ومشيت . جري ورايا وهو بيقول لي : هو حصل إيه لده كله ؟ وبراءة الأطفال في عينينه .... ما رضيتش عليه وكتمت غيظي .. وفي الأخر يقول لي : إنت محتاج تتعالج نفسياً لإنك بقيت حنبلي أكتر من اللازم يُتبع .. بعد ما أخد حباية الضغط وأهدى شويه ( الدكتور النفساني قال لي كده :lol: ) الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
عبير يونس بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 الأول ده بجد و الا حاجة من كتاباتك الساخرة؟؟:blink: أصله لو بجد ما ينفعش أبدا لموضوعات خفيفة ده موضوع في منتهى الخطورة احترام الوقت عمره ما كان مرض نفسي و لا تشدد يا لهووووووووووووووي ده أنا دمي اتحرق و أنا بس بأقرأ يكون في عونك يا شيخ موقفين يفوروا الدم و يعلوا الضغط و يجيبوا السكر كمان (عافانا الله جميعا) خصوصا التاني عن اذنك بس حيغمى عليا شوية و راجعة تاني mfb: أعد شحن طاقتك حدد وجهتك و اطلق قواك رابط هذا التعليق شارك المزيد من خيارات المشاركة
أبو حميد المسافر بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 انت متأكد ان دول اخواتك يا سين سين ؟ اذا كنت انت حنبلي فى مواعيدك فهما بقي مينفعش معاهم الحنفي ولا الشافعي دول عايزين مذهب شيعي وش معتبر رابط هذا التعليق شارك المزيد من خيارات المشاركة
اغابي بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 (معدل) طيب يا استاذ س س الراجل عنده حق - انت فعلا حنبلى فيها ايه لما الربعاية توصل 3.5 ايه يعنى خربت مالطة حاجة غريبة ايه يعنى لما ال10 دقايق تبقى ساعة و10 دقايق شوف يا استاذ س س هى ملهاش علاقة غير بالانسان نفسه بس انا مش بعتب على اللى فى مصر هما فى عالم تانى انا لما باروح اجازة بحس هيصة وعالم تانى ولا ليهم حاجة بحاجة وكل واحده عنده اللى مكفيه وزيادة او يمكن احنا اللى فى الخليج منظمين شويه مع ان اخوك برضوه فى الخليج مش عارفة بس انا لما بنزل مصر كل الناس اللى حواليا فى موالد وعالم تانى بصراحة مش عارفة اقول الله يعينهم ولا يعينا احنا تحياتى اغابي تم تعديل 21 سبتمبر 2010 بواسطة اغابي نـحن البلـــــدان الحقيقـيــة فى هــذا العـــالم . . . وليـــــس مــا يرســــم فـــوق الخرائــط نـحن الرمـــوز الحقيقيــــة فى هــــذا العــالم . . . وليــــــس اسمـــــاء القـــــادة العظمــاء . . . لاننـا نحـن من صنعـناهـم فرسـان العالـم الحقيقيـون . . هــم شعــوب الارض رابط هذا التعليق شارك المزيد من خيارات المشاركة
engmido بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 يا خبر ...حباية الضغط لا اخواتى ع العين والراس ..انما يجيبولى الضغط اتبرى منهم هههههههههههههه ﴿ قال رسول الله صلى الله عليه وسلم كلمتان خفيفتان على اللسان ثقيلتان فى الميزان حبيبتان الى الرحمن ﴾ رابط هذا التعليق شارك المزيد من خيارات المشاركة
Mr MAGED بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 (معدل) الغالي سين سين الموضوع فعلا أهم من انك تحطه في موضوعات خفيفة لأنه مش بيناقش خناقتك واختلافك مع اخواتك بس ده بيدينا صورة مبسطة عن سلوكيات المواطن المصري بصفة عامة اللي غالبا( مش باعمم اهه عشان محدش يزعل ) مش بيحب النظام ولا الالتزام وده سبب أساسي ورئيسي في اننا أصبحنا دولة نامية .. بعد ما كنا في مقدمة الدول وكنا فعلا في مقدمة الدول بجد .. مش بالصورة المتفبركة بتاعة القمة الأمريكية ( الا مشفتش حد جاب سيرتها يعني - ولا الموقع متراقب) اتمني فعلا ده يكون جرس انذار لينا كلنا ... لأن التقدم والرقي بيبدأ بالسلوك الشخصي لكل فرد وانا متأكد انهم لو اجتمعم مع شخصية الانسان المصري وقدرته علي الكفاح والاجتهاد أكيد هيكون لينا وضع تاني فاصل ونواصل تم تعديل 21 سبتمبر 2010 بواسطة INVESTOR العقول الكبيرة تبحث عن الأفكار .. والعقول المتفتحة تناقش الأحداث ... والعقول الصغيرة تتطفل علي شؤون الناس .... رابط هذا التعليق شارك المزيد من خيارات المشاركة
se_ Elsyed بتاريخ: 21 سبتمبر 2010 كاتب الموضوع تقديم بلاغ مشاركة بتاريخ: 21 سبتمبر 2010 حقيقي والله بس إنتوا ليه محسسني إني جاي من بلاد بتركب الأفيال ؟ هو ده مش منتشر في الدول العربية وخلينا نكون أكثر تحديداً في مصر ؟ حد جرب ياخد موعد من صنايعي والراجل ياكد له إنه بكره بإذن الله هايبقى عنده وتلاقي بكره ده بقى أسبوع وولا إعتذار ولا حاجه ولو ظهر تلاقي علامات الثقة مرسومه على وشه وكأنه ما عملش مصيبة ؟ حد جرب يلاقي ضيف طابب عليه زي القضا المستعجل بدون موعد أو بدون ما يديله ميسد حتى ... وكإن الناس بتبقى قاعدة في بيتها 24 ساعة مستعدة لأستقبال الحبايب ؟ الأغرب بقى .. إنتو ما بتسمعوش المصطلحات الشهيرة ؟.. أنا إن شاء الله جاي لك بعد العشا .... أيوه يا عم الحج ما هو بعد العشا ده ممتد لحد الفجر ... فسيادتك إمتى يعني ؟ هههههههههههههه ------------ للامانة بقى .. إتعاملت مع شخصيات .. تجبرك على إحترامها ومبادلتها نفس الإلتزام ..ومنهم صديقي الهُمام والمشرف التمام وملجأ المشردين والإيتام .. الصدر الأعظم الأستاذ أسد الشهير بأبو أدهم ... بصراحة مواعيده مواعيد طيارين بتوع شركة بريتيش إير وايز ليميتد :lol: وبالرغم من إن 99.9% من الزملاء ما بيحبوش زهيري لإنه حادف شمال وعاوز تربيط صواميل .. لكن مواعيده برضوا مظبوطه بالميزان زي مربى الرشيدي .. لكن اللي بيقهر الواحد إنك تكون إنت اللي صح لكن يتبص لك على إنك مجنون أو ماشي عكس الإتجاه بالرغم من إن دي الحارة بتاعتك ههههههههه ------------- الأغرب من هذا كله إن ثقافة تقدر الوقت ومعرفة قيمته غايبة عن ناس كتير .. بلاش يا سيدي وقتك إنت .... إنت عايش في سلام مع نفسك ومرتاح بالهيصه اللي إنت عايش فيها ... طب وقت الناس اللي إنت بتعامل معاهم وتعذبهم ... دول ذنبهم إيه ؟ عشان كده أفضل عقاب للتعامل مع مثل هؤلاء إنك تنفض لهم .. أيوه ... يعني إتأخر عن ميعاده ولم يتعذر وكنت إنت مش محتاج له .. ويا سلام لو هو محتاج لك إنت .. يبقى تقفل السكة في وشه وتقول له أقابلك في ظروف أحسن إن شاء الله لما تبقى محترم ... فوق كل هذا والحاجه فعلاً اللي تخليك دايماً شايل دوا الضغط في المحفظة .. هو غياب ثقافة الإعتذار المبرر...طب إعتذر وقول والله الطريق زحمه أو مش جاي أو الطريق ولع بي ومش هاقدر أجي في ميعادي .. لأ بالعكس ده أنت ممكن تلاقي عكس ذلك كله وتجد بجاحه منطقعة النظير من الشخص اللي لا يحترم وقته ولا يحترم الأخرين الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
se_ Elsyed بتاريخ: 21 سبتمبر 2010 كاتب الموضوع تقديم بلاغ مشاركة بتاريخ: 21 سبتمبر 2010 لموضوع فعلا أهم من انك تحطه في موضوعات خفيفة لأنه مش بيناقش خناقتك واختلافك مع اخواتك بس ده بيدينا صورة مبسطة عن سلوكيات المواطن المصري بصفة عامة اللي غالبا( مش باعمم اهه عشان محدش يزعل ) مش بيحب النظام ولا الالتزام معلم وأصلي يا أنفيستور هو ده اللي أنا اقصده ... بالرغم من إن موقف الوقت حصل من شهر أو أكثر بقليل إلا إن ما دفعني لكتابة هذا الموضوع هو عشق وأدمان الكثيرين للهرجلة ومخالفة النظام أفيون يا عم أنفيستور أفيون - إسمع القصة والموقف ده وإتعظ يا مؤمن ... من يومين أتصلت بنا إدارة مدرسة الأولاد وقالوا تعالوا أستلموا اليونيفورم ... الفترة الصباحة لتسليم السيدات فقط.. والفترة المسائية للرجال .. على اساس لو أب مثلاً أولاده خارج السعودية وهو هنا لوحده .. يجيب الإيصال ويستلم عادي أخدت زوجتي في الصباح والدنيا كانت رايقه وأنتظرتها بالخارج وهي أستلمت عادي وفي وقت قياسي .. شويه ولقيت شخص إتنين في أربعة عملاق داخل على الموظفين بتوع التسليم وهو مقفهر الوجه وعابس الملامح وجاي عنده إستعداد يضرب حد .. فالموظفة بشكل تلقائي قالت له لو سمحت تسليم الرجال بالليل ... وفجأة هاج وماج وشتيمة وقلة أدب ليه وليه لإن البيه نزل من بيتهم وعطل نفسه وجه المدرسة وبالتالي لازمن ولابد ينفذ العملية ويعني ما جاتش عليه والدنيا مش هاتخرب وإنتو محبكينها والكلام الفاضي ده المهم ... قلت لاحد زملائي في العمل خد زوجتك وروحوا أستلموا اليونيفورم بسرعة لإن الدراسة على الأبواب خلاص ... مشي الساعة 11 الصبح .. جالي الساعة واحده ونص هدومه مقطعه ومتبهدل وكإنه جاي من موقعه حربية ... أنا باتكلم بدون مبالغة إيه يابني اللي حصل ؟ قال لي روحت لقيت الدنيا أخر قلة أدب وستات على رجاله والعملية معجونه وخناقات وحاجه تخلي الواحد يقول العيال تروح المدرسة من غير هدوم أفضل وأهو برضوا يبقى شايل الشنطة على ضهره عشان لو حد عدى ولا حاجه .. عشق وأدمان للفوضى .... الغريب بقى .... ودي ملاحظه مهمه .. إن 5 أشخاص في حالة فوضى = 100 شخص منظم .. هاقول لكم حاجه ظريفة ... في يوم قاعد كده بأبص على رخصة العربية أكتشفت إني نسيت إنها تستحق التجديد .. وفي فترة سماح كمان تقريباً أسبوع وبعدها تدفع غرامة ... يشاء السميع العليم إن اليوم ده كان أخر يوم في فترة السماح .. بأبص في الساعة عشان تكمل الحدوتة ما هي لما بتحكم بتحكم يعني .. لقيت الساعة واحده ونص وفاضل نص ساعة والدوام الحكومي ينتهي .. جريت على إدارة المرور وهي جنبي بحي الملز . سحبت رقم .. إلا والاقي قدامي لا يقل عن 30 شخص .. قلت حلو قوي فيها للمغرب .... والله يا جماعة بالنظام والإلتزام كلنا أنجزنا معاملتنا في خلال النصف ساعة دي في منتهى الهدوء طب خلي كده 4 أو 5 أشخاص يهجموا على الشباك بنفس المعاملات وشوفوا هايخلصوا أمتى ؟ كذلك هو ما حدث مع صديقي بالأمس .. هما 10 أشخاص بالكتير واقفين لكن الكل بيتكلم في نفس الوقت .. والكل عاوز يخلص قبل التاني والكل بيضرب بإيده ورجله في سباق سرعة وقوة .... منتهى قلة الإحترام وبجد في ناس كتير عاوزه تتفرمت من تاني الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
se_ Elsyed بتاريخ: 21 سبتمبر 2010 كاتب الموضوع تقديم بلاغ مشاركة بتاريخ: 21 سبتمبر 2010 واحد صاحبي بيحكي لي موقف خلاني وقعت على الأرض من الضحك بيقول لي واقف بالعربية في اشارة حمرا ... زي أي بني أدم لما بيحفظ الأغنية الشهيرة اللي خدناها في حضانة ومطلعها بيقول : الإشارة خضرا عدي الإشارة صفرا هدي الإشارة حمرا ستوب لقى واحد واقف وراه وعمال يزمر جامد وراح فالت منه وجاي جنبه وفاتح القزاز وقايل له " مش شايف الإشارة حمرا ... واقف ليه يا حيوان ؟ " وجري بالعربية الندل .. بيقول لي أنا شكيت في قوايا العربية وأتصلت بواحد صاحبي عشان اقول له : هما غيروا نظام الإشارات أثناء ما كنت نايم ؟ الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
Mr MAGED بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 لقى واحد واقف وراه وعمال يزمر جامد وراح فالت منه وجاي جنبه وفاتح القزاز وقايل له " مش شايف الإشارة حمرا ... واقف ليه يا حيوان ؟ " لا لا لا يا سين سين ... دي جامدة بجد انا هيجرالي حاجة من كتر الضحك هو صحيح ايه اللي موقفه والاشارة حمرا .. عبيط ده ولا ايه العقول الكبيرة تبحث عن الأفكار .. والعقول المتفتحة تناقش الأحداث ... والعقول الصغيرة تتطفل علي شؤون الناس .... رابط هذا التعليق شارك المزيد من خيارات المشاركة
raouf بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 والله انت جيت على الوجيعة يا سين سين ومعظم مشاكلى مع اصحابى بسبب عدم الاتزام بالمواعيد واللى اعتقد اصبح من العادات اليومية لمعظم المصريين بقالى 7 سنين باحاول ابرمج مراتى على احترام المواعيد معايا وخصوصا لما نيجى نخرج او اروح اجيبها من مكان او شىء مش قادر لدرجة انى السنة دى سافرت السعودية وسيبتها فى مصر علشان اخرتنى عن الميعاد اللى محددينه للتحرك ( اه والله حصل لانى اتنرفزت جدا وصممت على احترام الميعاد المتفق عليه ) وبسبب التزامى بالميعاد ده كمثال دفعت 6000 جنيه تذاكر طيران علشان تحصلنى mfb: mfb: mfb: mfb: إذا مــات الـسـيـد فـأقـتــل حـتـى كـلبــه لأنــه لــن يــكـون وفيـا لـغير سـيـده الأول اذا جالست الجهال فانصت لهم واذا جالست العلماء فانصت لهم فان فى انصاتك للجهال زيادة فى الحلم وفى انصاتك للعلماء زيادة فى العلم رابط هذا التعليق شارك المزيد من خيارات المشاركة
مغتربة بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 و الله موضوع الاشاره حصل معانا فى اخر زياره لمصر الاشاره كانت حمرا فوقفنا عادى لقينا كل الى ورانا بيزمرلنا بهستيريا لغايه ما اجبرونا نطلع و طلعوا ورانا عادى المشكله ان الاشاره دى كانت تقاطع يعنى كان فى عربيات جايه من الناحيه التانيه و طبعا اتعجنت و اتكربست العربيات كلها فى النص و كل واحد و شطرته فى انه يزنق على التانى و يعرف ينفد طيب ما النظام و الله حلو ساعات بقيت احس ان فى الزمن دا الغلط بقى هو العادى و الصح هو الغريب بحيث ان الى يمشى صح معظم الناس بقت تبصله كانه جاى من كوكب اخر ما اجمل الانوثه عندما تمتطى صهوه الحياه رابط هذا التعليق شارك المزيد من خيارات المشاركة
shiko بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 (معدل) ..الفاضل سى السيد ... من الواضح انك موش مراعى فروق التوقيت مابين الولايات وبعضها .... يعنى اخوك لما قالك ربعاية ...كان فى ولاية كوكب تانى .... والايام على الارض بتفرق حسابها مع الكواكب التانية ..... وبعدين ماتبقاش حنبلى كدة .... خد عندك دى عصر رمضان الساعة تعدت الرابعة ...والاسرة كلها تجتمع لتجهيز عبوات العصير والمياه لتوزيعها فى الطريق ... شيكو :ايه ده مافيش شاليمو ..العصير جه من غير شاليمو سبايكى :خلاص انا هاروح اجيب واجى على السريع ... الساعة خامسة سبايكى : خلاص حبة سيكا كده ...وهاكون ادامك الساعة الخامسة والنصف سبايكى : شرذ كده وجاى على طول .... الساعة السادسة الاعشر سبايكى : شرزين ...وهابقى هنا ... الساعة السابعة ...mfb: ايه لزومه الزن ده كله ......اووووووووف بقى ...md2: والخلاصة ان الوقت مابقاش بالكيلو بس ...ده بقى بالشرذ والشرذين (بكسر الراء) سيبك من الحنابلة ...واتعامل مع التنابلة ....:rolleyes: تم تعديل 21 سبتمبر 2010 بواسطة shiko رابط هذا التعليق شارك المزيد من خيارات المشاركة
شريف مان بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 يا سيد بك لو انت حنبلى فانا اللى اخترعت المذهب دا فى نظر بعض اللى اعرفهم انا بقى تظبط عليا الساعة وربنا ابتلانى بشوية مخلوقات من اصحابى والله اى ميعاد يوم لما يجوا بدرى يبقى بعد الميعاد بنصف ساعة وانا قاعد بغلى ولما الباشا يشرف اديله فى جنابه واهزقه وهوا ولا فارقة مع اى حد فيهم وتانى يوم بردوااااااااااااااااااااااا نفس الحكاية بجد انا حاسس انى بقيت غريب ( عوكل الجن بقى شبح ) :lol: بص يا سى السيد العيب مش فينا العيب فى النظام :lol: اللهم يــامن أجــاب نوحــــــــــــا حين ناداه ويامن كشف الضر عن أيوب في بلــــــواه ويامن سمع يعقوب في شكــــــــــــــــــــواه ورد إليه يوسف وأخـــــــــــــــــــــــــــــــــاه وبرحمته أرتد بصيرا وعادت النور عيناه اللهم آتنا في الدنيا حسنة وفي الآخرة حسنة وقنا عذاب النار رابط هذا التعليق شارك المزيد من خيارات المشاركة
se_ Elsyed بتاريخ: 21 سبتمبر 2010 كاتب الموضوع تقديم بلاغ مشاركة بتاريخ: 21 سبتمبر 2010 بُص يا شيخ شريف :lol: المصيبة بتكمُن في إن كل واحد مستصغر اللي بيعمله يعني يبقى طابور طويل عرررريض وييجي لا مؤخذه نطع ويقوم دافس نفسه في وسط الطابور وتيجي تكلمه يقول لك : يعني هي جت عليه ؟ طب هنا في مشكلة يا ترى لما بيتعاملوا مع جهات لا تنتظر أحد .. زي رحلات الطيران بتاعت زميلنا الكابتن طيار رؤوف ههههه او قطارات او أمتحانات بيعملوا إيه ؟ ولا الناس دي لها حيطان مايلة بتميل عليها ومع الباقي بتمشي زي الألف ؟ --------- شيكوز .. شيكوز يعني إيه دي سبايكى : خلاص حبة سيكا كده ...وهاكون ادامك مش سيكا دي مقام في المزيكا زي النهاوند والبياتي ؟ إيه حولوها دي روخره بقت من مقاييس الزمن ؟ -------------------- أشكر كل الأخوه البانكتشوال :lol: وأدعوهم للأعتصام غداً على سلالم نقابة الصحفيين للمطالبة بإنشاء تجمع أو رابطة نسميها " الساعة معاك كام لو سمحت ؟ " الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
mekkawy بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 يا عم س س ما تبقاش حنبلي يا أخي الفاضلة سيكوز بتقولك سيكا .. خلاص ما تبقاش حنبلي كدة و عشان محدش يزعل يا سيدي و بم إن ال(سيكا) من أحد مفرداتي اليومية إليك الشرح: السيكا لغةً: السيكا هي الجزء اليسير من أي شئ السيكا اصطلاحاً: و تستخدم السيكا للتعبير عن كل ما هو قليل .. كأن تسأل الزوجة زوجها جعان يا مخفي فيرد قائلاً سيكا !! أمثلة على السيكا: زعلان سيكا .. هأتأخر سيكا .. هو كويس بس غالي سيكا.. إلخ إلخ إلخ أرجو أن أكون وضحت النظرية السيكاوية و بالله يا شيخ متبقاش حنبلي للإشارة بس و لإنصاف علم من أعلام الأمة فإن استخدام كلمة حنبلي في الوضع اللي الناس بتتهم بيه أخونا س س أو أحد يتحرى الدقة إنما هي اساءة أدب أولاً مع صاحب المذهب الامام العلم ثم مع الدين ككل ثم مع الشخص الذي يتحرى الدقة في حياته .. و يا ريتنا كلنا حنبلة مكاوى .. حنبلي سيكا كدة رابط هذا التعليق شارك المزيد من خيارات المشاركة
doha بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 عادي جدا . . لما رجعت مصر بشكل نهائي اكتشفت ـ أو لنقل انتبهت ـ لعدة خصائص في الشعب المصري الاصيل بفكر انزلها في كتاب مستقل .. احد اهم هذه الخصائص على الاطلاق ان المصريين ـ القاطنين في مصر المحروسة ـ اجمالا بقوا عايشين ( في قهوة كبيرة ) .. تروح تقضي مصلحه في اي جهة حكومية كانت او خاصة .. المشهد المألوف اثنين ثلاثه موظفين قاعدين حوالين مكتب او طاولة وبيتجاذبوا اطراف الحديث .. تسألهم عن المعاملة الخاصة بيك يقولك مع فلان الموظف او المدير او وت ايفر الي هيكون حظك يخلص لك معاملتك ولازم بطبيعه الحال اما انه مش موجود او موجود بس لازم امضة او توقيع من حد تاني هو الي مش موجود .. هتقولهم طيب هيجي امتى تلاقي كرسي بينسحب ويقولك اتفضل اتفضل ارتاح شويه على وصول .. وعلى وصول دي ممكن تكون ساعه اثنين ثلاثه وممكن ميجيش من اساسه عادي جدا .. مهو احنا قاعدين على قهوة عادي وانت يعني وراك ايه ؟ اهو الدردشة احسن من المرواح .. نفس الشيء هتلاقيه بيحصل لاي حد بيروح شغل او حتى عنده دكان او اي مصدر دخل .. هتلاقي مواعيده الهامه ولقاءاته كلها بيعملها في محل عمله مش سكنه .. عدي على النهرده في الشغل او في المحل ... وبرضه هو الكرسي هينسحب والسجاير هينعزم بيها والاثنين هيتجاذبوا اطراف الحديث اثناء مراقبة الرايح والجاي .. ونتيجه لاننا كلنا قاعدين على القهوة فطبيعي جدا ان لما يكون في عمل ( مهم ) محتاج مجهود او تركيز اننا نأجله او نتخلص منه خالص لان كتر الراحة بتصعب التعب تعبين .. وزي ماهو مستحيل حد على قهوة يعمل حاجه عليها القيمه او لها لازمه فكذلك توقع من اي حد بيؤدي اي مهمه طول ماهو معتاد على سلوك القهوجية .. طبيعي جدا في مصر لو رايح تخلص ورق او تكشف عند دكتور او غيرها من الامور الي تتعلق بالمواعيد انك تفرغ نفسك ليوم كامل لهذا المشوار تحديدا ومش بس كده ده انت تعمل حسابك ان محتمل جدا هيتكرر الامر يومين تلاته كمان لغايه ماتقضي الي مفروض يتعمل في ربع ساعه لو اننا كنا زي خلق الله قاعدين في مصالح مش على قهاوي .. زمان كنت زيك كده بيضيق خلقي من الانتظار وبتضايق لو لم انجز المطلوب في الوقت المناسب لكن بعد مااكتشفت حقيقة الاشياء بقيت رايحه من البدايه ومتوقعه هنتظر قد ايه على وقت التقريب وبحاول قدر الامكان اثناء انتظاري الاستمتاع بالروح الودوده الي بتكون مابين رواد القهوة حوالي بينهم وبين بعض حتى لو مكانش في سابق معرفة !! ..إذا دعتك قدرتك على ظلم الناس فتذكر قدرة الله عليك .. رابط هذا التعليق شارك المزيد من خيارات المشاركة
Amr Radwan بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 (معدل) انا فعلا بعاني من الموضوع ده و بشدة مع الناس و خاصة اي صنايعي حتي و لو هيعمل خرم في الحيطة بيلطعك كام يوم بس من متابعتي للموضوع و ردود الناس و مقارنتها بمشكلتي في الحياة لقيت اننا كلنا (المحاوراتيه) متفقين علي نفس المشكلة و كلنا بنعاني منها و هي ان كل من هو غير محاوراتي بيكون غير منظم !!! و غير مهتم بالمواعيد فعلا انا ملاحظ ان معظم المحاوراتية ان لم يكن كلهم اللي عاشرتهم و اتعاملت معاهم مباشرة انهم منظمين في عملهم و مواعيدهم و تفكيرهم !!! تم تعديل 21 سبتمبر 2010 بواسطة Amr Radwan "إِنَّ اللَّهَ لاَ يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ" قال صلى الله عليه وسلم : من نفس عن مؤمن كربة من كرب الدنيا نفس الله عنه كربة من كرب يوم القيامة، ومن يسر عن معسر يسر الله عليه في الدنيا والآخرة، ومن ستر مسلما ستره الله في الدنيا والآخرة، والله في عون العبد ما كان العبد في عون أخيه ... رواه مسلم رابط هذا التعليق شارك المزيد من خيارات المشاركة
عبير يونس بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 حأحكيلكم على موقف كده (بس يا ريت كله يحضر حباية الضغط احتياطي) اليومين دول بندور على شقة ننقل فيها و ما أدراكم على النقل في التوقيت ده في مكة و طبعا الكل بيبيع و يشتري فينا المهم كل يوم كعب داير مع مكاتب العقارات انا و زوجي عشان نشوف شقة و طبعا بأروح معاه عشان نشوف على طول و اذا في حاجة كويسة نخلص على طول مش لسه يقول له حأجيب المدام تشوف الشقة و طبعا بأسيب الولاد في البيت طبعا مش عايزة أقول ان اليوم بيبتدي هنا بعد صلاة العصر طبعا حاولنا كام يوم كده الصبح كانت النتيجة اننا كنا بنرجع قفانا يقمر عيش المهم مرة واحد معرفة ادانا رقم مكتب و قاللنا بس قولوا له من طرف فلان زوجي المحترم اتصل بأخينا 11 صباحا طبعا الباشا كان نايم المهم قال لزوجي بعد العصر تعالى المكتب نزلنا بعد العصر ( و المكتب بعيد عن البيت) طبعا ملقناش الباشا و الحارس قال لزوجي تعالى المغرب بالضبط و صلي معانا هنا طبعا قعدنا نلف في المنطقة لحد المغرب نزل زوجي من العربية و انا قاعدة استناه قابل الراجل و صلوا المغرب و بمجرد ما سلّم اخينا اختفى و زوجي قاعد يدور عليه اتصل بالتاني قال له اصلي انا صايم و بأفطر زوجي جا لي العربية و انا كنت على آخري و عمالة كل شوية اتصل بالولاد اطمن عليهم و قال لي اللي حصل و كان مستني الباشا لما يفطر المهم بعد شوية اتصل بيه و جاوبه بالعافية و الأكل في بقه و قاله عندي شقة لموسم الحج زوجي قال له يا سيدي انا من الصبح بأقولك ايجار سنوي قال له لا والله ما عندي :blink: بعد كل المواعيد ال.... دي و في الآخر معندوش طلبنا أصلا؟؟؟!!! مع ان زوجي في كل اتصال بيؤكد طلبنا اللي احنا عايزينه:sad: الخلاصة عدم احترام المواعيد مش بس في مصر أعد شحن طاقتك حدد وجهتك و اطلق قواك رابط هذا التعليق شارك المزيد من خيارات المشاركة
masraweya بتاريخ: 21 سبتمبر 2010 تقديم بلاغ مشاركة بتاريخ: 21 سبتمبر 2010 السلام عليكم أنا مهما عملت لا يمكن أوصل في ميعادي بس الجميل اني برضة بوصل الأول .. و برضة أقعد أستنى رابط هذا التعليق شارك المزيد من خيارات المشاركة
Recommended Posts
انشئ حساب جديد أو قم بتسجيل دخولك لتتمكن من إضافة تعليق جديد
يجب ان تكون عضوا لدينا لتتمكن من التعليق
انشئ حساب جديد
سجل حسابك الجديد لدينا في الموقع بمنتهي السهوله .
سجل حساب جديدتسجيل دخول
هل تمتلك حساب بالفعل؟ سجل دخولك من هنا.
سجل دخولك الان