هل يوجد توكيل لماركة Bosch الألمانية في مصر ؟

[se_ Elsyed]

دي ماركة أجهزة منزلية ..

لإننا نويني نتوكل على الله ونشتري غسالة أطباق ... فنزلنا عملنا مسح ذري لسوق الاجهزة المنزلية وأكشتفنا حاجه غريبة جداً ..

وهو إن كل الماركات في السوق السعودي بتشتغل 60 هيرتز ... إلا " بوش " بتشتغل 50/60 وهو نفس تردد مصر .. بغض النظر هي كهربا 220 أو 110

وأكتشفت حاجه غريبة أكتر

كنت فاكر إن غسالة الأطباق دي يوم ما يضربها الدم هاتبقى بـ 1500 ريال وتقول بابا وماما كمان ... إكتشفت إن بوش مثلاً وهي ألمانية الصنع 100 % في منها نوعين واحده بـ 2660 والتانية بـ 3000 ريال

يا نهار يا ولاد .... يعني مش الطماطم بس اللي غليت ....

دي أغلى بمراحل من الغسالة الفول أتوماتيك وتقترب من سعر ثلاجة محترمة ....

قولنا ماشي

لكن بعد ده كله نجيب حاجه تشتغل في السعودية بس كمان ؟

لأ كده كتير قوي ... خصوصاً إنها ضمان 10 سنوات ... يعني الماركات المحترمة معروف إن ضمانها دولي وحصلت معايا كنت شاري أجهزه من هنا زمان وعملت لها صيانة مجانية في مصر ...

يعني معنى كده إحنا أتحسرنا في بوش الإبن والأب ....

فينوبكو ثواب واللهي يطعمكو ما يحرمكو ... في حد عنده فكره الماركة دي موجود لها وكيل معتمد ومحترم ومراكز صيانة في مصر .. ولا نخلينا في الليفة والصابونه ومسحوق فيري قاهر الدهون وبلاها غسالات وحركات ؟

[م تيمور المراغي]

السادةالكرام عملاء شركة بوش:

تعلنالشركة عن عروض لصيانة اجهزة بوش للحصول على ضمان شامل لأجهزة بوش وقطع غيار بوش بالأضافة الى المتابعة المستمرةمن فريق عمل بوش.

ومعناالدعم الفنى من العميل الى بوش مباشرةً منالسبت الى الخميس.

لقبولطلبات صيانة بوش،وتركيب كافة اجهزة بوش،والتمتع بميزات القسم الخاصبالتجديد الشامل.

يرجىالاتصال على:35710008-35699066

[م تيمور المراغي]

س س يا كبير

انا اتصلت بعدة مراكز بتعلن عن نفسها انها توكيل بوش في مصر ,,

قلتلهم قريبي في السعوديه ومعاه ضمان انترناشيونال هل الضمان الدولي يسري هنا في مصر ؟

معلش قالوا لي لا ,, احنا بنقدم خدمة ما بعد الضمان ,, يعني لا قدر الله لو اي جزء في المنتج حصل فيه مشكلة بيتم تصليحها او استبدالها بمقابل ,,

وعندي ارقام تليفونات عديده تانيه لو حبيت

[المهندسه]

حاسب يا س س هذا الدواء فيه سم قاتل...اوعى

بوش مالهاش صيانه فى مصر لانى سألت من شهرين كده وكنت عاوزه اشترى محضره الطعام بتاعتها

ماركه بوش بتغرى الناس انها المانيه فعلا و سعرها بالمقارن بأمكانياتها وامكانيه نظيرها من الماركات التانيه افضل..احنا سألنا كويس و الولد ال كان واقف بيبيع فى اكسترا ال على خريص كان مصرى ..خدناه على جنب و قولناله وحياه الاخوه يا شيخ و الظروف الصعبه العيشنا و اتمرمطنا فيها يا شيخ وحياة ميدان رمسيس و العتبه والاخ الكبره القاعد فى مصر الجديده ورا البنزينه ..تقولنا الخير و الصالح علشان نعمله و نتوكل على الله.قالنا خلاص الدمعه هتفر من عينى و صعبتو عليا ..قالينا بوش لاء وفيليبس لاء لان مالهومش صيانه فى مصر خاالص ..خليكوا فى ماركه براون ..مولينكس (بالنسبه لمحضره الطعام)

بلاش يا س س قول لام عمر تصبر شويه عقبال ما تدور على ماركه تنفع تاخدها مصر

ملحوظه على جنب بس اوعى المدام تشوفها:غساله الاطباق مش عمليه لانها محتاجه مواعين كتير ...عزومه يعنى فتنجدك من المواعين لكن ان جات على الاطباق و الكوبايات اليوميه دى حاجه هايفه تخلص بسرعه...مش ممكن هشغلها علشان 4 اطباق و كوبين (ماتنساش ان ليها مسحوق مخصوص) انا عندى فى مصر والله ما استخدمتها خااالص.

[nightmare]

حبيبي يا سى السيد

اوحتلى بال franchise اللى بدور عليه بقالى سنة

يا مسهل نقول باسم الله , والغسالة عندي هدية لصاحب الفكرةbv:-

مع تحياتي

[doha]

لو لقيت لها مركز صيانة فتأكد انه بيعمل لها هي بس الصيانه دي مش لكذا ماركه تانية معاها لان التوكيل بيكون لماركه واحده فقط اما الي كذا حاجه في بعض دول مراكز تحت بير السلم مش معتمده من الشركه الام ..

دي نصيحه مسؤول في حماية المستهلك وبصراحه اجدها منطقية جدا وتستحق التطبيق ..

[se_ Elsyed]

كان جلبي حاسس يا ولاد

شكراً لكم جميعاً ...

لكن إذا رسيت في الأخر يبقى هاجيب " بوش " واللي يحصل يحصل ...

يا مسهل نقول باسم الله , والغسالة عندي هدية لصاحب الفكرة

حد شاف منكو حاجه

ده أنا من ساعة ما دخلت المنتدى ده وأنا بادفع مش بأقبض

[se_ Elsyed]

دي نصيحه مسؤول في حماية المستهلك وبصراحه اجدها منطقية جدا وتستحق التطبيق ..

ده مش مسئول وبس .. ده أنا ليه واحد قريبة شغال في مركز من دول بيحكي لي عن جرائم حرب بيرتكبها بتوع بير السلم دول اللي إعلاناتهم ماليه الجرايد من غير لا رقيب ولا حسيب ..

بس تعرفوا يا ولاد

إحنا كمواطنين مشاركين في الجريمة ... عارفين ليه ؟

إنتشرت دلوقت ظاهرة إن يبقى عندك جهاز .. تكييف مثلاً تحت الضمان ... ويحصل عطل معين .. تقوم تتصل بالشركة يروح باعتين لك فني صيانة وتمام التمام ..... اللي حصل إيه بقى ؟

ييجي الباشا يقول لك .. في قطع مش تحت الضمان .. أوك ماشي ... ممكن تبقى معروفه على فكرة ... هانقول مثلا الكمبروسور بس هو اللي تحت الضمان والباقي لأ ..

يقوم يعرض عليك إن القطعة دي من الشركة بـ 200 ج .

لكن مع شركة هانسرقكو للتجارة والتوريد .. ممكن أجبيهالك واركبها كمان بـ 100

فبتكون النتيجة إن ناس كتير بتوافق عشان توفر

وهو ما يعرفش إنه شارك في جريمة شغل عديم الضمير شركته أستامنته على عمل ومصالح ناس .. يروح هو عامل شغل من الباطن لحسابه ....