ما لا يري و ما لا يوصف .. في اختيار مايوسف

[Scorpion]

بما ان سي السيد واخد توكيل الفريسكا و الكلوكلو حصري في راس البر و المحاورات ... و كل شوية يكتبلنا كصة مشرف من المشرفين و يهبر من ورا العملية دي شيء و شويات ... و بما اانا في منتدي ديموكراطي تعاوني اشتراكي طحن ... قررت آخد توكيل السميط و الجبنة و اللب و أسرح بقفص انا راخر ... قصدي اكتبلي كصة مشرف انا راخر ...

هنا سنكون في موقع الحدث و تحديدآ في اوضة الصالون الرئيسية و انت داخل عالمحاورات من اليمة القبلية .. اما لو انت جاي عن طريق المحور حتلاقيها في الشمال الشرقي ...

انتظروا معرفة ملابسات و افتكاسات دخول مايوسف الي المجلس ....


و لغاية ما ننزل باول حلقة .. علي مدخل المحاورات حتلاقوا ما يساعدكم علي قضاء وقت ممتع ...










ايوه .. سميط ... سميط جبنة .. سميط جبنة بيض...

 

 

[MZohairy]

بما ان سي السيد واخد توكيل الفريسكا و الكلوكلو حصري في راس البر و المحاورات ... و كل شوية يكتبلنا كصة مشرف من المشرفين و يهبر من ورا العملية دي شيء و شويات ... و بما اانا في منتدي ديموكراطي تعاوني اشتراكي طحن ... قررت آخد توكيل السميط و الجبنة و اللب و أسرح بقفص انا راخر ... قصدي اكتبلي كصة مشرف انا راخر ...

هنا سنكون في موقع الحدث و تحديدآ في اوضة الصالون الرئيسية و انت داخل عالمحاورات من اليمة القبلية .. اما لو انت جاي عن طريق المحور حتلاقيها في الشمال الشرقي ...

انتظروا معرفة ملابسات و افتكاسات دخول مايوسف الي المجلس ....

و لغاية ما ننزل باول حلقة .. علي مدخل المحاورات حتلاقوا ما يساعدكم علي قضاء وقت ممتع ...

ايوه .. سميط ... سميط جبنة .. سميط جبنة لـِــــــــــــــــــــــــــب ...

انا عايز كاسكروت فروماج بالكونكومبر لو سمحت

[Scorpion]

ما عندناش يا افندي البتاعة دي .. روح لأجزخانة الأسعاف اسأل عندهم يمكن تلاقيها ...

شكلي كده مش حبتدي الكصة من اساسه .... و حيتقبض عليا في قضية ضرب أفضي الي الشنق ...

bsh:)

[Dreamwithme]

لا يا أستاذ سكوربيون أحكي أحكي من فضلك

وأنا باسجل متابعة وأعجاب مقدما

ع جنب أنا هأخد سميطة....بفلوس ولا أنت عازمنا؟! ;)

[Scorpion]

المشهد :

عنبر النوم الرجالي الملحق بمبني المشرفين خارج المحاورات ..

الأشخاص :

سي السيد يغط في نومآ عميقآ مصدرآ مقطوعة موسيقية تماثل السيمفونية السابعة لبيتهوفن و لكن يغلب عليها النشاز كونها تصدر من نخاشيشه مباشرة ..

سكوب علي السرير الآخر ينظر اليه بغضب مشوب بالقلق ... و هو يقرقض ضوافره ..

يستمر هذا الموقف لعدة دقائق حتي يعقد سكوب العزم و يتجه الي سي السيد ....

- سي السيد

لا رد

- سي السيد ... سي السيد ... سي الســــــــــــــــــــيد

يرد عليه باصوات مبهمة لا معني لها ثم ينقلب الي الجهة الأخري

- انت يا بني آدم انت ...

( يقولها سكوب صائحآ بغل)

- يا دي النيلة .. يادي النيلة .. فيه ايه يا سي زفت .. مش حنعرف ننام في يومنا ...

- انا مش عارف جايلك نوم ازاي ... يا برودك يا اخي

- و ما نامش ليه يا خويا .. واحد مطبق نباطشيتين .. و فاتحلي 6 موضوعات .. و رادد علي 18 موضوع تانيين .. و مفور 4 عقود بالكفيل بهم .. ايه المفروض اعمله بعد كده

- نشوفلنا حل في المصيبة اللي حتحل علينا

- مصيبة ايه بس يا سكوب

- انت مش واخد بالك يا سي السيد ... مجموعتنا ابتدت تختل الموازين فيها ...

- مخاليل .. مخاليل ايه اللي بتتوزن ؟؟؟

- ما تصحي يا جدع .. حد جاب سيرة مخاليل .. بقول لك تختل الموازين

- الصبر يا رب .. واحدة واحدة يا سكوب و اشرح لأخوك بالراحة عايز تقول ايه .. حاكم لما العرق الطلياني بيمسكك بيبقي يوم اغبر انا عارف ...

- يا احمد المشرفين نقصوا و لما الأدفايزور اختار .. اختار واحدة ست

- طب فين المشكلة .. ما ده مكان فاضي من ساعة ما لولا جالها عقد في موريتانيا و قدمت استقالتها .. مش شايف فين المشكلة ...

- دي ايه الحلاوة دي ... امال التلاته اللي مشيوا برضه احمد محمود و عصام و احمد سيف مافيش حد جه مكانهم ليه

- قصدك ايه يا غراب البين انت

- احسبها انت .. احنا كام مشرف .. حتلاقيهم صفصفوا علي التعادل

- تعادل ايه يا افندينا .. احنا 6 دكورره ... و 3 ستات

- ده اللي عالورق و اللي الأدفايزور بيدفع عليه الضرايب .. لكن لو بصيتلها حتلاقي ان شريف بره اللعبة لأنه لابد في باب الأعلام ما بيطلعش منه ...أسد مشغول لشوشته بقاله فترة ... يبقي مافيش غير ابو محمد و محمد و انت ...

- و جناب سعادتك مش دكر برضه و لا كانوا مدييني معلومة غلط ...

- لأ انا قبطي معفي من الضرايب ... بس دكر غصب عن عين التخين

- و بعدين بقـــــــــي ... يعني ايه ... بعد السنين دي كلها حييجوا شوية فكيهات يقلبونا.. ده انا كنت اسور قتيل و لا ده ( يشاور علي شنبه ) ما يكونش علي راجل

- و لا قتيل و لا حاجة .. احنا ندرسها بالعقل و نكلم بتوع النقابة يطالبوا الأدفايزور بسد الأماكن الفاضية بأمارة النباطشيات الدوبل اللي عمالين نطبقها دي ..

- و ندخل النقابة ليه في حاجة ممكن نحلها .. احنا من الفجر نطلع للأدفايوزر و نكلمه علي بلاطة .. احنا طول عمرنا رجالته و حيسمعنا ...

- ماشي .. بس حنكلمه علي مين .. يعني مين اللي حنرشحله اسمه لو سألنا

- تصدق ما فكرتش في الحكاية دي .. طب بقوللك ايه ما تكلم ابو محمد و محمد ناخد رأيهم برضه ...

- يا عم مكالمة محمد بتكلف شيء و شويات ده في امريكا .. احنا ناخد رأي ابو محمد و نوفر ...

- ماشي ... اتصل بيه ...

- الو .. الو ... ابو محمد

- ايوه يا سكوب ازيك ... خير ..

- كنا عايزين رأيك في مشرف جديد معانا

- ايه رأيك في مغتربة و لا زهرة الجبل ....

- يا دي النيلة .. مشرف يا ابو محمد مشرف ... راجل يعني

- مش سامعك يا سكوب بتقول ايه ...

- مشرف راجل يا ابو محمد ...

- دقيقة واحدة يا سكوب اصل عقبال عندك مرات ابني حامل ..

يترك ابو محمد السماعة و يحادث أم محمد متسائلآ :

- بتتوحم علي ايه ؟؟

- يوستفندي يا ابو محمد .. يوستفندي ...

- و انا اجيبلها يوستفندي منين دلوقتي .. و يسرح .. بينما سكوب يصيح في التليفون :

- الو ... الو... ابو محمد ... الو

ينتبه قليلآ ابو محمد و يرد شاردآ علي التليفون :

- ايوه

- قلت ايه يا ابو محمد

- يوستفندي ... يوستفندي ...

- هو ايه اللي يوستفندي .. الووووو ... ابو محمد ... الوووووو

ينقطع الخط

سي السيد : قالك ايه

- يوستفندي

- يوستفندي ايه بس يا سكوب

- آه والله سمعتها كده .. يوستفندي ... الخط كان مشوش و مش واضح قوي

- يكونش قصده يوسف افندي .. ما انا بيقوللي يا سي السيد افندي .. و انت سكوب افندي .. يبقي اكيد قصده يوسف افندي

- هو احنا عندنا في المحاورات عضو بالأسم ده

تفكير قليلآ ... ثم يخبط سي السيد يده علي ظهر سكوب بقوة تدفعه الي السقوط علي الأرض ..

- ما يوووووووووسف

- تصدق عندك حق ... هو مافيش غيره ... بكره و احنا بنرشحه للأدفايزور نبقي نقول انه اختيار ابو محمد .. الراجل بيحيه و ما بيكسرلوهوش كلمة ابدآ ...

- عالبركة ... تصبح علي خير

- و انت من أهله

موسيقي تصويرية لعزف ثنائي من نخاشيش الريس متقال شخصيآ و لكن بدون ربابة ...

[MaYousof]

مش ممكن .. مش ممممممممكن hypr:

فظييييييييييعة فظيييييييييييييييييعة فظيييييييييييييييييييييييعة lo::

jmb-) jmb-)

أقسم بالله ماكنت عارف اخد نَفَسي من كتر الضحك

خزعبلية والله يا سكوب bv:-

الله يحظك يابوجنيور

[أبوعمار]

أنا داخل أبصم بالعشرة انكم ناس عسل

كل موضوع أحلى من اللي قبله

المنتدى طلع كله كتّاب وأدباء ومخرجين آخر حاجة

أودي وشي فين منكم

ربنا يسعدكم

ويزيدكم الهام كمان وكمان

ونفس الكلام للساري ولماضة ... سي السيد ... مصرية مغتربة... مصرية

أغابي ... وطبعا سمبا شاعر المنتدى

وكل الأقلام اللي أمتعتنا بالأدب "أصلهم فضلوه عن العلم"

أدباء عظام يا جدعان "محتاج أعمل أشعة × عشان أكون على مستواكم

[doha]

ياخبار ابياااااض

بجد جامده ملهاش حل .... كنت هقع على الارض من الضحك لما الخط شوش ومسمعتش غير يوستفندي ..

ملعووبة ..

عموما .. ربنا ينتعها بالسلامة ...

[se_ Elsyed]

عفارم يا سكوب

والله وعرفت أربي وأكبر وأزغط

على فكرة ..

فور الحته اللي في إيدك

وأنا هابقى لي كلام تاني خالصصصصصصصصصصصصصص

وهانزل في الهاي سيزون بقصتي اللي هاتكير الدُنيا " الحكاية بالتفصيل .. في عملية إختيار حساس الجيل "

وبرضوا تتعلق بأختيار يوستفدي بس بعيون سين سينية ..

[Scorpion]

ربنا ما يجعلنا من قطاعين الأرزاق ....

انت يا جدع انت مش هاين عليك ابيعلي كام سميطة و لا كيس لب .. جاي تبيع هنا كمان ...

طب عليا و علي اعدائي بقي ...

علي فكرة يا جماعة ثبت علميآ ان البسيمة بتسبب عجز معين يخللي البني آدم شكله مش حلو خالص .. و الكلوكلو بيسبب امساك مستديم ...

انا قلت اللي يخلص ضميري و كل واحد عقله في راسه ...

ايوه سميط طازة .. سميط جبنة لب ...

[Scorpion]

المكان : غرفة السكرتارية خارج مكتب الأدفايزور

الساعة : 8.45 صباحآ

الأشخاص :

مسز Moneypenny السكرتيرة الخاصة للأدفايزور

سي السيد و سكوربيون ..

يتقدم سي السيد أولآ قاذفآ بالكاسكيت الذي كان يرتديه جهة حاملة الملابس ليطير و يستقر كالعادة علي الأرض فيتمتم : نفسي مرة يرشق في الحمالة

بينما يصيح سكوربيون : جووود مورنينج يا ست pina

Moneypenny ... هاندرد تايمز قولتيليك اسمي Moneypenny ترد السكرتيرة بحنق

سي السيد : الجدع بيبسط معاكي يا ست الكل .. ما تبقيش كده حنبلية

اوكيه اوكيه ... انتي آوزة ايه ؟؟

- سكوربيون يلبس منديل فوق رأسه و يحول عينيه و يقول لسي السيد : انتي جاية اشتغلي ايه ؟؟؟

تبدأ Mrs. Moneypenny في السب و اللعن بالأنجليزية .. و ما هي الا لحظات و يظهر الأدفايزور فجآة علي باب مكتبه .. صائحآ .. فيه ايه .. ايه الهوسة دي كلها ...

فيصمت الجميع ..

-أدفايزور : آه هو انتم ... خشوا انا عايزكم

و يدخل الي مكتبه .. فيتبعه سي السيد و سكوربيون .. و لكن سي السيد يعود بسرعة الي السكرتيرة مرة أخري و يقول لها : بس التوتنهام شحوركم امبارح ... و يسرع بالدخول الي مكتب الأدفايزور و ابتسامة الأنتصار علي شفتيه ..

الأدفايزر مدخنآ البايب و ناظرآ في اوراق امامه يقول :

- انت خرجت امتي يا سكوربيون

- امبارح يا Boss .. ابلة فولانة كتر خيرها بعتت سي الأوستاذ جوزها ضمني

- طيب طيب .. ما تبقاش من فضلك تزقل البوليس بالطوب و بلاش تروح العمرانية من اساسه اليومين دول ..

- والله مظلوم يا Boss انا كنت بزور الأهرامات و انا راجع أخدتلي طوبة تذكار من دقن ابو الهول .. شافوها في ايدي مسكوني ...

- طيب طيب .... و انت يا سي السيد .. الساعة بقت 9 الصبح و مش شايفلك غير 16 مداخلة بس ... ايه حنبتدي نخستك و الا ايه ...

- نخستك ايه بس يا Boss .. ده انا بقيت انام اتكتك عالمخدة كانها كيبورد ..

- طيب طيب .. بلاش كلام كتير ... سايبين شغلكم ليه و جايين هنا انتوا الأتنين .. انا لما بشوفكم مع بعض بعرف ان فيه مصيبة حتحصل ...

- ربنا ما يجيب مصايب ... الموضوع ان بيبقي فيه دايمآ نباطشية ناقصة ... بالذات بتاعت بالليل ... كله خلع منها و اللي بيلبسها دايمآ سكوب و انا ....

- طب عايزنني اعملكم ايه يعني .. البس العفريتة و انزل انا بالليل و الا ايه ...

سكوب : لأ يا Boss لا سمح الله .. اصل .. اصل ...

- اصل ايه و فصل ايه يا بني ما تتكلم

تلمع عينين سكوب بفكرة

أصل ابو محمد امبارح اتصل بينا علشان نفاتح حضرتك في مشرف جديد معانا.. كان بيقول يعني اننا محتاجين علي الأقل واحد جديد معانا بدل التلاتة اللي مشيوا ...

- عنده حق طبعآ ... انا مابقتش شايف حد عنده حماس في الأشراف غير الستات بس .. و حضراتكم سلمتم النمر خلاص ..

- يرد سي السيد ببعض الضيق : سبحان الله يا Boss .. طب الواحد يعمل ايه يعني اكتر من كده

- يمسك سكوب بيده قائلآ .. و لا حاجة و لا حاجة ... ايه رأيك يا Boss في موضوع المشرف ده

- سيبوني افكر و كمان كام اسبوع حبقي اقول لكم

- و نستني ليه بس يا Boss ... ابو محمد كان قال كام اسم كده نعرضهم علي حضرتك علشان ما نضيعش وقتك .. و كان بيشكر كتير في واحد معين

- ده مين ده ؟؟

- عضو اسمه مايوسف

- ما يوسف ... ما يوسف .. ما يوسف ... ده كويس يا ولاد ؟؟

- سي السيد ... كويس خالص يا Boss .. واد مثقف بجد .. ده كفاية العضو من دول يقول له صباح الخير يقوم رازعه رد من 4 صفحات مقاس A3 يِحْولُه و يخليه ما يعرفش يقول ايه و لا يرد ازاي

- طب كويس .. خاصية زي دي تنفعنا لما حد يشتكي و لا حاجة ... طيب .. شفتم بيرد ازاي علي اللي بيختلف معاه ؟؟

سكوب : في غاية الأدب و عهد الله ... هو كبيره انه يهبده كام دعوة تجيب اجل اللي يتشدد له

أدفايزور : رائع خالص .. كان مستخبي فين ده كله ... عفارم علي اختياراتك يا ابو محمد ... طيب عالبركة .. روحوا هاتوه .. بس ما تنسوش الأجراءات السرية المعتادة ...

يخبط سي السيد قبضته بقبضة سكوب باسمآ و يهما بالخروج ..

سي السيد : ممكن سؤال يا Boss ...

- خير

الست مونيبيني اللي بره دي ازاي يعني بتشتغل معانا هنا

أدفايزور : لأ دي حكاية قديمة كده لما كنت عايش في انجلترا .. كانوا اتعذروا في باقي مبلغ نهاية الخدمة معاهم فادولي بداله الغفير الأنجليزي ده .. بس مش بطالة والله بتوفرلي ورق و كهربا.. ياللا بقي و ما تضيعوش وقتي ...

[MaYousof]

hypr: hypr: hypr:

بجد ابدااااااااااع jmb-) .. بجد مش ممكن خاااااااالص jmb-) jmb-)

على فكرة .. أنا حاسس إن فيه حالة ترقب كامل في المنتدى دلوقتي ..

الكل منتظر الأحداث بتاعت الإجراءات السرية المعتادة bag):

[om marawan]

- قلت ايه يا ابو محمد

- يوستفندي ... يوستفندي ...

- هو ايه اللي يوستفندي .. الووووو ... ابو محمد ... الوووووو

ينقطع الخط

سي السيد : قالك ايه

- يوستفندي

- يوستفندي ايه بس يا سكوب

- آه والله سمعتها كده .. يوستفندي ... الخط كان مشوش و مش واضح قوي

- يكونش قصده يوسف افندي .. ما انا بيقوللي يا سي السيد افندي .. و انت سكوب افندي .. يبقي اكيد قصده يوسف افندي

- هو احنا عندنا في المحاورات عضو بالأسم ده

تفكير قليلآ ... ثم يخبط سي السيد يده علي ظهر سكوب بقوة تدفعه الي السقوط علي الأرض ..

- ما يوووووووووسف

الحتة دى قاااااااتلة مالهااااااش حل

[باهى الطائر الحزين]

( الله )

عليك يا ابو العقابر

عرفت تدى ذنب ل : سي السيد

اوعى يكون الجبه بتاعتك

فاسده ذى اياها فكرها

انا زبزن : تخصص سميط قسم دقه

انت بتقف فى انهى اشاره.؟

اهو برده انت اولى

اعرف واحد محاسب مش لاقى شغل

ام اشترى تاكسي وبرده مافيش

ركاب ولا زباين بتشاورله

بيقف على باب القهوه ويقول

تاكسى وبيض وجبنه.

انت زى العسل..

كامل احترامى

[Scorpion]

سكوب : انا تعبت من شغلانة المخبرين دي .. هو مكتوب علينا احنا بس نروح نجيب المشرفين الجداد كل مرة ...

سي السيد : محسسني اني شيخ حارة و راح اعكش واحد هربان من الجهادية ... مش كفاية وافق علي مشرف جديد حنبتدي بقي في المناهدة ..

سكوب : ولا مناهدة و لا حاجة .... بس خد بالك ان الزبون المرة دي مش عضواية تاكل بعقلها حلاوة و تخاف و تكش منك اول ما تطلعها الكارنيه ...

سي السيد : تصدق عندك حق .. الواد ده عقر .. و عايزله ترتيبات خاصة

سكوب : يعني ايه العمل معاه ؟؟

سي السيد : احنا ندرس شخصيته كويس الأول و بعدين نشوف اكتر حاجة بيهتم بيها و دي تبقي نقطة ضعفه اللي نخشله منها... انت تعرفه شخصيآ يا سكوب

سكوب : و حعرفه شخصيآمنين ... بس انا امبارح قعدت اقراله شوية ... الجدع مالهوش حتة بيتهد فيها شوية ..اجتماعيات ماشي .. دين تلاقيه .. سياسة ما شاءالله ... حروب موجود ... كندا و ناقص يفتح مكتب محامي فيها .. كومبيوتر جِن ..

سي السيد : خلاص نروح نقول له السيرفر بتاعتنا عطلان و محتاجين نصلحه ..

سكوب : و تفتكر حتخش عليه ... اشمعني دلوقتي يعني ...

سي السيد : استني بس احنا نسينا اهم حاجة .. مش هو اللي واخد عقد صيانة اللوجوهات بتاعتنا

سكوب : آه هو

سي السيد : عالبركة .. تاهت و لقيناها .. و رايا يا سكوب .. افتكرت تجيب الأيبي آدرس بتاعه و لا حنلف عليه بمنادي

سكوب : معايا يا أخي هما 5 دقايق بالعربية و نكون هناك...

امام بيت مايوسف يقوم سكوب بالنقر بهدؤ علي بابه...

مايوسف : مين ؟

سكوربيون : انا سكوربيون يا استاذ مايوسف... بتاع المحاورات

ما يوسف : سكوربيون !! ... علي فكرة انت ما وحشتنيش

سي السيد يهمس : بدايتها كفر .. ثم يطرق الباب بقوة اكثر

مايوسف : مين ؟

سي السيد : هو ايه اللي مين .. انايا سيدي سي السيد

مايوسف : بتاع رائعة نجيب محفوظ الثلاثية اللي تحولت الي فيلم سينمائي و خد دور البطولة المطلقة فيه الرائع يحيي شاهين في دور رجب العطار و اللي ..

سي السيد : يا نهار اسود .. لأ لأ لأ ... سي السيد بتاع المحاورات

فترة سكوت قصيرة

ما يوسف : انت كمان ما وحشتنيش

سي السيد : ما تشوفش وحش يا سيدي .. بس افتح لحظة محتاجينك في مصلحة

ما يوسف : اعرف هي ايه المصلحة الأول و بعدين افتحلكم ... سمعتكم كمشرفين زرق في المحاورات تجعل هناك هاجس يمنعني من فتح الباب

سي السيد : هاجس !!؟ ... يا عم افتح بقي ده انا جايبلك سبوبة حلوة

ما ان يسمع مايوسف ان الأمر به "سبوبة" حتي يفتح الباب مباشرة

مايوسف : لايمني

سكوب : مش تعرف العملية ايه الأول و بعدين نبقي نلايمك

سي السيد : انت برضه مش بتاع يفط و اعلانات و كده ...

مايوسف : يفط و اعلانات ؟؟؟!!! أنا .... غلطوا في العنوان يا اساتذة .. انا تخصصي لوجوهات و ديجيتال

سي السيد : ما تفرقش ...

مايوسف : لأ تفرق .. و كتير كمان .... ده مش مستوايا .. مع السلامة و يهم بغلق الباب

سي السيد : يا عم اسمع بقي و ما تبقاش عنيد كده ... الموضوع ببساطة ان السفارة الكندية ( قالها مركزآ بعناية علي كلمة السفارة الكندية ) اتصلت بينا علشان محتاجة تعمل كام يفط و اعلانات عن فتح مكتب الهجرة الجديد لمقاطعة ساسكاتشيوان ..

و هنا فتح مايوسف الباب علي مصراعيه و عيناه تلمعان كعيون عم دهب عندما يجد منجم جديد.

ما يوسف : ايه ده ... هو فيه مكتب هجرة جديد اتفتح في سفارة كندا...

سكوب : ايوه يا سيدي .. بس لسه ما حدش يعرف .. علشان كده محتاجين اليفط دي

مايوسف : و طبعآ اللي حيركبها حيخش السفارة علي طول من غير تحديد مواعيد مقابلة .. و لا سوريا و لا فايل نمبر و لا حاجة من الكلام ده كله ..

سي السيد : طبعآ .. ما له هو و مال الطوابير .. عالعموم ما نأخركش بقي نروح ندور علي حد تاني يعمل اليفط ..

مايوسف يكلبش في ياقات قمصانهم صارخآ ... اللي حيمد ايده علي اليفط دي حقطعها .. ده مجالي الرئيسي و مادة التخصص اللي أخدت فيها الدكتوراة ..

سكوب : يعني حتيجي معانا ...

مايوسف : حالآ .. ياللا بينا .. و يهم بالخروج

سي السيد : طب مش تغير البيجامة اللي لابسها

مايوسف ينظر الي نفسه ... ثم يقول .. 20 ثانية و حكون جاهز اوعوا تمشوا

سكوب : نمشي و نروح فين يا خويا .. هو الواحد مستغني عن عمره ..

و ما ان يختفي مايوسف حتي يبتسما و يخبط كلاهما قبضته بقبضة الآخر

سي السيد : الكيس القماش و البلاستر موجودين ؟؟

سكوب : تحت كرسي العربية .. بس بقول لك ايه .. المرة دي انا اللي اسوق و انت تكتفه ...

سي السيد : ماشي

سكوب : اللا ايه مقاطعة ساسقشوان دي .. مش دي الجبنة بتاعت زهيري برضه

سي السيد : انا ايش عارفني .. اهه جات كده و خلاص ... اهه جه .. بينا

ما يوسف : بينا يا جماعة يا قدم السعد يا وش الخير ...

سي السيد : ده انت حتشوووووف خير لما تقول كفاية مش قادر

و يتجهوا الي السيارة .....

[أبو محمد]

مايوسف .. يامايوسف .. يابو يعقوب .. رد يابنى .. إنطق قول أى حاجة

آدى اللى انا كنت خايف منه .. أنا يابنى مش قلت لك ميت مرة بطل تخطف السندويشت من إيد أخوك سكوب وتجرى ؟ .. إتفضل ، أهو بينشر مذكراته عن عملية أشكفتك وبكرة حتلاقى الوكالات كلها جايبة فى سيرتك .. وكالة البلح ووكالة اللمون ووكالة الخضار اللى فى الحضرة

ياترى انت فين يابو يعقوب :cry:

[MaYousof]

مايوسف .. يامايوسف .. يابو يعقوب .. رد يابنى .. إنطق قول أى حاجة

آدى اللى انا كنت خايف منه .. أنا يابنى مش قلت لك ميت مرة بطل تخطف السندويشت من إيد أخوك سكوب وتجرى ؟ .. إتفضل ، أهو بينشر مذكراته عن عملية أشكفتك وبكرة حتلاقى الوكالات كلها جايبة فى سيرتك .. وكالة البلح ووكالة اللمون ووكالة الخضار اللى فى الحضرة

ياترى انت فين يابو يعقوب :cry:

س س مايوسف سكوب

[عبير يونس]

س س مايوسف سكوب

مصرية متغربة ( شجرة الدر)

:110:

[Scorpion]

و هم في طريقهم الي السيارة يقف مايوسف فجأة و يقول :

- اما انا ماعنديش ذوق صحيح .. تيجوا عندي و ما قدملكوش حاجة

سكوب : بعدين يا مايوسف .. بعدين

- طب دقيقة واحدة عند الكشك اللي عالناصية افتحلكم ازازتين حاجة ساقعة

سكوب : بعدين يا سيدي بعدين

- طب نضرب طبقين كشري في السريع

سي السيد : يا عمي بعدين .. يا حبيبي بعدين .. انجز بقي ابوس ايديك ..

- ماهو ما ينفعش .. تقولوا عليا ايه .. طب خمسة عالقهوة كوباية شيح او كراوية او مغات

سكوب : مغات ؟؟؟ بعدين يا مايوسف .. لما ربنا ينتع العملية دي بالسلامة ..

- طب ..

سي السيد مقاطعآ : يمين تلاتة لو ما دخلتش العربية دلوقتي لحلعب في وشك سيجا

- طيب طيب .. هدوا نفسكم ... الواحد بيعمل بأصله ... و يركب في المقعد الخلفي .. بينما يركب سي السيد بجانبه و يهم سكوب بالقيادة ..

مايوسف : ايه ده .. ما يصحش .. كده شكل سكوب السواق بتاعنا ... اتفضل قدام يا سي السيد

سي السيد : سكوب سواقته زفت .. و كل مرة يضرب مقص بحس اني عايز استفرغ .. مالكش دعوة انت احنا واخدين علي كده ..

مايوسف : لا لا لا ... انا مقدرش ابدآ اقعد ورا و الأستاذ سكوب يسوقلي

سكوب : يمين تلاتة علي يمين سي السيد لو فتحت بقك تاني لحلبس بالعربية في اول شجرة قابلها ..

- انتوا حرين ... بس ما حدش بعد كده ييجـ ...

يفرمل سكوب السيارة بعد ان كان بدأ في التحرك بها ..و يقفز علي الكرسي الخلفي خانقآ مايوسف بكلتا يديه بينما يتناول سي السيد كيس القماش يغطي به رأسه ثم يقيد يداه بالسكوتش ..

يصرخ مايوسف بفزع : هو فيه ايه ؟؟؟ ايه ؟؟ بتعملوا كده ليه

سي السيد : مش عايز اسمع حس لحد ما نوصل ...

- طيب طيب ... اهدوا .. ده مش اسلوب ابدآ ...

تمر فترة سكون تسمع فيها فقط انفاس مايوسف المتهدجة ... ثم يبتدأ في التمتمة :

- اللهم اخسف بهم الأرض ... اللهم شل يدهم .. و اكتم السنتهم ... و سد آذانهم ...

اللهم اجعل لهم في كل منعطف عسكري مرور يسحب رخصهم .. اللهم اصبهم باسهال مزمن .. ثم بامساك قاتل ... اللهم اصبهم بطفح جلدي و دمامل .. اللهم لا تجعلهم يجدوا اي اجزخانة مفتوحة ... اللهم ...

سي السيد : انت بتدعي علي مين يا مايوسف

- عاليهود يا خويا .. بدعي عاليهود ... ايه حتي الدعا حتمنعوه

- طب ادعي في سرك .. ربنا يعدي اليوم ده علي خير .. ما تسرع شوية يا عم سكوب .. انت سايق عربية مش تريسيكل ...

و أخيرآ يصلوا الي مركز المحاورات الرئيسي .. و يصطحبوه الي مدخل جانبي مؤدي الي ممر طويل علي جوانبه غرف المشرفين الخاصة ... حتي يصلوا الي غرفة سرية ملحقة بصالة الأجتماعات .. و يتركوه علي كرسي فيها و يخرجوا بحثا عن الأدفايزور و يخبراه بتواجد مايوسف .. فيتجه معهما الي الغرفة السرية متسائلآ :

- هو عرف هو ليه هنا

- لا يا Boss احنا بنسيب الموضوع ده دايمآ لحضرتك .. يرد سي السيد

- طب عاملتوه كويس يا ولاد ... مش عايزينه يكش مننا من قبل ما يبتدي

سكوب : طبعآ يا Boss ... معلوم .. ده احنا في السكة عزمناه علي سفن آب و كشري و و كباية كراوية مخصوص ... بالاضافة طبعآ للبنزين رايح جاي لبيته ...

الأدفايزور : فاهم فاهم .. بلاش لف و دوران كتير .. ابقي املا اذن المصروفات و عدي علي مس موني بيني تصرفهملك ..

و يدخلوا الغرفة حيث مازال صاحبنا بكيس القماش علي رأسه يلهج في الدعاء :

- يا رب خد المشرفين ... يا رب خد المشرفات ... يا رب خد الأعضاء .. يا رب خد الزوار ... يا رب خـد اي حد يخش بالغلط عالمنتدي بتاعهم ... يارب خد الأدفا...

في تلك اللحظة يزيح سي السيد الكيس من علي راسه و يقول لما يوسف :

- أقدملك الأدفايزور يا كنج ...

ينظر مايوسف الي الأدفايزور ساهمآ .. ثم يكمل دعائه : .... يزورررر ... خدهم يا رب الي جنة وسعها وسع السماء و الأرض ...

الأدفايزور بغضب شديد : ايه اللي انتوا نيلتوه ده .. فكوه بسرعة .. فكوه

يخرج سي السيد مطوة قرن غزال موديل 66 من جيبه و بحركة خاطفة يقطع السكوتش بمهارة لا يلمس بها شعرة من يد مايوسف

لا يستطيع الأدفايزور ان يكبح جماح غضبه فيستمر في تقريعهم

- ممكن افهم انتوا جايبينه كده ليه .. و من امتي بنستخدم اساليب الجستابو دي

سكوب : هو مش حضرتك طلبت مننا اتخاذ الأجراءات السرية المعتادة

الأدفايزور : ايوه .. يعني ماحدش يعرف انه حيبقي مشرف و ما حدش يعرف المكان بتاعنا مش تسحلوه بالشكل ده ..

مايوسف : مشرف ... مشرف علي ايه ... هي فيه وظايف مشرف فاضية في كندا

الأدفايزور : كندا ايه يا ابني .. الله يجازيك يا سي السيد انت و سكوربيون في يوم واحد .. بوظتولي مخ الجدع من قبل حتي ما يبتدي معانا ...

مايوسف ناظرآ الي الأدفايزور : آآآه .. ايوه .. انا اعرف حضرتك .. حضرتك اللي بتطلع في نشرة الأخبار المحاورتية و دايمآ بتقول هذا استهلال لازم منه ...

الأدفايزور : لابد منه

مايوسف : نعم ؟؟

الأدفايزور : لابد منه يا ابني ... هذا استهلال لابد منه .. انتم جايبينلي واحد أطرش

مايوسف : يا خبر ابيض ... استهلال لابد منه .. حضرتك الأدفايزور بتاع محاورات المصريين

سي السيد : ده كان يوم اسود ... لسه وصلالك دلوقتي ؟؟

مايوسف : و انا مالي و مال الراس الكبيرة .. انا طول عمري ماشي في حالي في المحاورات يا باشا

الأدفايزور : مافيش حد قال حاجة مختلفة يا استاذ مايوسف .. الحكاية و ما فيها اننا عايزينك معانا كمشرف ...

مايوسف : مشرف ... انا ؟؟؟ و المواويل دي كلها .. و كندا .. و مقصات العربية .. و اكياس المخدات علشان تعينوني مشرف ...

الأدفايزور : فلنضع جانبآ الأساليب اللي انا ما طلبتهاش .. لكن الخلاصة هي وظيفة مشرف .. ايه رأيك ؟؟

مايوسف : بصراحة حضرتك فاجئتني ... ممكن تديني فرصة أفكر ..

الأدفايزور : قدامك 5 ثواني ... خلاص عدوا .. ايه رأيك

مايوسف : و لو رفضت

الأدفايزور : بصراحة حتبقي اول حالة رفض تحصل .. و بكده حنبقي في مشكلة .. لأنك خلاص عرفت المكان و شفت شكلي ... ثم يوجه حديثه لسي السيد :

انت معاك ترخيص بالمطوة اللي معاك دي

مايوسف : يا باشا انا مولود مشرف ... أمنية حياتي اني اكون مشرف ... والدتي كانت دايمآ بتدعيلي و تقول لي نفسي اشوفك كبير و مشرف قد الدنيا يا مايوسف يا ابني ... هو انا فديك الساعة اني اكون مشرف معاكم ..

سي السيد : و لا ديك و لا فرخة .. يعني موافق ..

مايوسف : طبعآ طبعآ ...

سكوب : طب نفرا الفاتحة ...

[الســـاري]

روعة يا استاذ سكوربيون ... روعة بحق والله

متابع ومنسجم ... واسجل الاعجاب