ليه تشتريها لما ممكن تعملها - أدوات ومواد منزلية مختلفة

[doha]

الموضوع ده شفته امبارح في احد المنتديات وعجبتني اوي الفكرة .. تجميع لطريقة عمل اشياء بنشتريها عادة بس البعض اكتشف انه ممكن يصنعها في البيت وباقل التكاليف وبنتائج مماثلة تماما للي كان هيشتريه ..

اجمل مافي الموضوع ان كلها تجارب حقيقية الناس عملتها بنفسها فعلا وتاكدت من فاعليتها مش مجرد افكار منقوله ..

فكرت انقل لكم الموضوع هنا ونحاول نثريه بتجاربنا الخاصة احنا كمان ..

تم تعديل 12 ديسمبر 2010 بواسطة MaYousof
تنسيق

[رضوي]

السلام عليكم ورحمة الله وبركاته

مرة كنت بشتري شوية حاجات وعجبتني فكرة سبت غسيل جديدة وجميلة

خامته من الخوص ( اللي هو بيتعمل من النخل دة )

ومرشوش بدوكو الوان جميلة ........ وله ايد عبارة عن دبدوب لذيذ

الفكرة سهلة جدا وجميلة ....... وهتفرحنا اكتر لما نعملها بايدينا

عن نفسي بحب ارسم جداً علي الزجاج .......... واعمل منه اشكال زخرفية بتعجبني جدا

واكتب عليه بالخط العربي

بس للاسف الحاجات دي كنت بعملها ايام المدرسة ........... ونفسي ارجعلها تاني

اقولكم فكرة مفرش انتريه تحفة عجبني انا واصحابي وقررنا نعلمه

هوعبارة عن قماش اورجانزا ...... طبعاً بنقطعه علي حسب المقاس اللي احنا عايزينه ....... وبنشتري خرج النجف اللي بنطرز بيه وشوية ترتر صغير اوي لون واحد ( الالوان دي حسب اختياركم ) وبنرسم رسمه زخرفية عليه بالمارك - ممكن نستخدم صابونة ناشفة لو مافيش مارك - وبنبدأ نطرزه علي الرسمة مجدول او سمبل عادي

والنتيجة خرافة ....... وكفاية اننا اللي عملناه بايدينا

صحيح بياخد وقت كبير ......... بس بيفرحنا اوي

كمان الطرح بتاعتنا السواريه بقينا نطرزها بنفسنا ......... يعني علي ادنا من وقت للتاني نظرا لضيق الوقت

اخر مرة صاحبتي اشترت عباية بيت سيمبل اوي ,,,,,,,, واشتغلت عليها شغل تطريز بخرج النجف لوحده ............. النتيجة ...... عباية هايلة جداً وشكلها فوق الممتاز

كل الحاجات دي ممكن نعملها ف البيت وبجد بنفرح بيها اوي

[doha]

خدوا الفكره دى كمان

انا كنت محتاجه اشترى شجر صناعى كبير

لقيت الواحده تمنها 150

وفكرت لو انى عملتها مش هتكلفنى 50

لما نزلت اسكندريه عند ماما نزلت المنشيه واشتريت صحبه الشجر اللى انا عايزاها ب 45 جنيه اشتريت اتنبن

واشتريت كمانالقاعده اللى يتعمل عليها الشجره ب 4 جنيه ومعرفتش اوصل للمكان اللى بيجيبه منه العمود اليف اللى يتلزق عليه الورق

ولما رجعت الصعيد انا متزوجه فى اسيوط

وفى البيت عننا نخله ولما بيجوا يقطعوا البلح بيخرجوا منها اليف البنى ده اخدت منه ولفيته على الرول اللى بيلفه عليه الستاير فى المحلات كنت جيبت من عند الراجل مره وانا باشترى ستاير

وثبته فى العلبه باسمنت ابيض او اسود

وكنت عايزه الف على اليف شبك عشان يكون زى الجاهز بالظبط بس ما لقيتش غير شبك البطاطس الاحمر

لفيته عليها عشان بيسهل عمليه تركيب الورق وركبت الصحبه عليها واخدت ورق لزقته بالجنب عشان ادارى الشبك الاحمر

وكانت النتيجه مش بطاله وعملت اتنين ووفرت 200 جنيه

وعملت شجر تانى برضه صحبته رخيصه الصحبه ب 12 جنيه عملت 3 وحاطه منه فى الحمام

[doha]

طريقة عمل صابون غسيل للصحون من الزيت المتخلف عن القلي .. طبعا الطريقة منقوله من منتدى تاني واكثر من عضوة فيه اكدت انها طريقة ناجحة جدا ..

انا بجمع بواقى زيت القلى واعبيها فى زجاجة وبعد ما تكمل كمية حوالى لتر ونصف او2

اعملهم صابون مواعين ومش قادرة اقولك علية تحفة روعة بينضف المواعين وبعمل بية كمان السيراميك

ولما سألوها عن الطريقة وضعت الرابط للطريقة دي ...

اعملى صابون للمواعين بزيت القلى اللى اصلا انتى هترمية

بوصى بقى هتحوشى الزيت الى بتخلصى استعمالة فى ازازة من بتاع المية

وهتصفية هنجيب قومع ونلبسة شراب قديم نضيف فلية وتصفى

ولما المقدار يوصل الى لترونصف

هتشترى حجات بسيطة وسهلة قوىواصلا الوصفة دى سهلة وبستعملها على طول

ربع كيلو بطاس ونصف كيلو دقيق ممكن ريحة وجلسرين من عند بتاع المنظفات

نبدء

هنجيب جردل صغير علشان ندوب المكونات فية

هندفى الزيت على النار ما تسخنيش قوى هندفى بس

وبعدين هنضيف الدقيق بالتدريج علشان ميكلكعش ونقلب بعصا اثناء نزول الدقيق

وفى وعاء واسع اخر هنضع 2 كوب من الماء الفاتر ونضيف البطاس بحرس ونبعد

لازم يكون الوعاء واسع علشان فوران البطاس ونقلب ايضا و الخطوة دى بعد ما دوبنا الدقيق خلاص

فى الزيت وبعد زوبان البطاس نضعة على باقى المكونات ونقلب بسرعة ونضيف الريحة وشوية جلسرين

وهتلقية بيتقل معاكى تصبية فى بلستكاية بعد فرشها بكيس كبير بلاستك على الارضية والجوانب وعندما ينشف شوية قطعية واتركية فى مكانة ليجف لتانى يوم

وهتلاقى ان شاء اللة صابون جميل ورغوة ونظافة

بتقول انها استعاضت عن رائحه الصابون بوضع ملعقتين من داوني بس اعتقد عشان ميضرش البشرة فالافضل استبدالها بملعقة من اي عطر بتستخدميه .. وطبعا البطاس هو ( البوتاس ) وهو ماده كيماويه بتتباع عند العطار او اي محل بيع منظفات ..

[doha]

تابع موضوع الصابون ردود لصاحبة الطريقة ..

اولا البطاس هو الصودا الكاويا

ثانيا دة صابون مواعين بينظف الاوانى جداجدا

ثالثا انة لونة فى الاخر بيكون ابيض

رابعا الزيت من بعدالاستخدام حتى ولو كان من المتبقى من قلى السمك او البانية او لى شىء

خامسا انتى بتضيفى جلسرين للتنعيم وانا بحط نصف الزجاجةاللى 2او3 جنية

وكمان بكون مضاعفة الكمية لان عندى زيت كتير وكمان الريحة

انتى بتختارى ب50 قرش من عند المنظفات( ريحة برتقال او ليمون او تفاح الى يعجبك)

وانا بعمل المقدار اللى كتبتة وبيعقعد عندى اكتر من شهر وممكن شهرين

مينفعش نستخدم اواني معدن نصب فيها الخليط لازم تصبى المكونات فى بلاستيك

علشان الاوانى المعدن زى الصوانى مثلا ممكن تطوس فبلاش

حطى فى اى بلاستكاية بس افرشيها الاول بكيس او مشمع او اى شىء يسهل خروجها

[doha]

الموضوع ده امتداد لموضوع تاني عن افكار لاشياء بنشتريها عاده بس اتضح ان ممكن جدا نعملها في البيت وبتكاليف اقل .. عشان ميكونش في لخبطه فالموضوع الاول هيخصص لاشياء بتتاكل او تنطبخ والموضوع ده لحاجات ملهاش علاقه خالص مالص باي حاجه ممكن ينقال عليها أكل ..

قبل ماانسى ده رابط الموضوع الاولاني بتاع الطبخ هتلاقوا فيه طريقة عمل الكاتشب والمايونيز واللبنة وحاجات تانية كتير لذيذة انا شخصيا مكنتش اعرف ان ممكن اعملها في البيت بس اهو حصل وطلع ممكن ..

مكونات غذائية وأطعمة يمكن صناعتها منزليا

[doha]

وده بديل لملح الليمون . وبالمناسبة ملح الليمون له مفعول خطير في تنظيف السيراميك خاصة الحزوز الي مابين البلاطات بيرجعها ناصعه البياض كان الارضيه لسه جديده ..

انا باعمل حاجة شبه ملح الليمون بس بيبقى سائل باجيب الليمون بعد ما يتعصر يعنى نصف ليمونة او اكثر واحطهم فى برطمان واحط عليهم ميه من الحنفية واسيبهم يومين كده وكل ما عصر ليمون احط القشر معاه وبعدين اخد الميه احطها فى ازازة ازاز واحط عليها شوية ملح من بتاع الاكل وارجها كويس واحطها على الحوض وارش منها على الاحواض السيراميك والحمام وكمان باحط شوية على جردل الزبالة بعد ما اشيل الكيس و ارجه وبعدين اشطفه وكده يمنع الريحة والجراثيم

[doha]

حاجه بقى نفسي اعرف بيعملوها ازاي لاني حاولت ومعرفتش .. اصبع الصمغ الخاص بلصق الورق ..

سمعت ان ممكن نعمل صمغ من النشا بس حاولت ومظبطش معايا .. ياريت لو حد عنده الطريقة سواء لعمل اصبع صمغ او حتى صمغ نشا من التقليدي بس تكون مظبوطه وياريت لو في امكانية لحفظها مده طويلة من غير ماتخرب ..

[MaYousof]

رواد المحاورات الكرام,

تم فصل جميع المداخلات الخاصة بالوصفات والمأكولات في موضوع مستقل باسم "مكونات غذائية وأطعمة يمكن صناعتها منزليا" للفاضلة ضحى ليصبح الموضوع الجديد مرجعا متميزا للجميع ومتخصصا في وصفات الطعام والمأكولات ..

المداخلات الخاصة بتنسيق كلا الموضوعين تم نقلها إلى موضوع منفصل بعنوان "مداخلات مفصولة من موضوع ليه تشتريها (بخصوص التنسيق)"

نشكر جميعا الفاضلة ضحى على مجهودها المتميز في جمع وترتيب ومتابعة كلا الموضوعين

الإدارة