التحالف والمحور فى المنتدى !!!

[حشيش]

بعد إزدياد العنصر النسائى فى المنتدى بصورة مخيفة ومريبة وما تبع ذلك من إختلال لموازين القوى فيه فقد قررت إقامة (تحالف إستراتيجى) وإتفاقية دفاع مشترك مع أخى وصديقى العزيز سى السيد الذى يتعرض فى الوقت الراهن لهجمة شرسة من بنات ونساء المنتدى :P ....بحيث أن أى إعتداء على سى السيد يعتبر إعتداء على حشيش مساوى له فى القوة ومضاد له فى الإتجاه (خدناها كده فى الكيميا gt: )....كما يدعو العضو الثائر حشيش جميع رجال المنتدى للإنضمام للتحالف (مطلوب متطوعين) الموجه فى المقام الأول ضد محور الشر المكون من (كليو...فيروز...لايت...نورا...كروساية) وإلى درجة أقل (نشوى...جيفارا...سلمى) إلى أن يثبت ولائهم التام لنا mf-:

والأن.............................

أنا حشيش.....هل من مبارز (فلم يرد أحد rs: )

أنا حشيش.....هل من مبارز (فلم يرد أحد :P )

أنا حشيش.....هل من مبارز (فلم يرد أحد :o )

يبقوا خافوا ومشيوا mfb: ...دلوقتى بقى أروح أعمل كباية شاى أسقى فيها القراقيش اللى أمى باعتاها لى علشان يشتد عودى قبل المعركة :D

[se_ Elsyed]

[ أى إعتداء على سى السيد يعتبر إعتداء على حشيش مساوى له فى القوة ومضاد له فى الإتجاه (خدناها كده فى الكيميا  mf-: )....

من اولها بتعجن .... يا بني البتاعة دي كانت في الفيزياء أنا فاكرها كويس من سنة أول ثانوي قبل ما أبقى أدبي ... مش مهم مش هانقف عند التفاصيل الصغننة دي وإذا كان المقاتل الأشوس حشيش قال كيميا تبقى كيميا غصبٍ عن عين إسحاق نيوتن نفسه .

أخي حشيش : عهدتك دائماً محارباً مغواراً تغشى الوغى وتعف عند المغنمي ... وكم قاتلنا سوياً وجنباً إلى جنب في العديد من الخناقات ببولاق والدرب الاحمر وشبرا المظلات وإتحبسنا سوى على ذمة التحقيق وشلت إنت القضايا عني لأن صحتي مابتجيش على إقسام الشرطة ... وتلك جمايل في عنقي هاردهالك مع النقطة يوم فرحك اللي مش باين له معالم .

سر يا حشيش على بركة الله وانا ورائك وستجدني مقاتلاً صنديداً وأضرب بسيفك البتار وسنجتك التي لا يشق لها غبار على رؤوس الاعداء الذين ذكرتهم فأقتل منهن من شئت وأأسر من شئت واعمل الباقي كوستاليته ( إلا يعني كوستاليته .. دي غير البفتيك ولحمة الراس ؟) وما تعملش حسابي عشان أنا متجوز ومراتي هاتزعل مني لو لقيتني في يوم داخل وجارر ورايا سبايا حرب روميات ( إبقى خليهم عندك وانا هاتصرف في نصيبي )

وانا متأكد إن طلبات التطوع هاتنهال علينا خاصة من رجالة المنتدى اللي مش لاقيين شغل ..

بهذا نبايعك يا حشيش قائداً عاماً لقوات المحور ورئيساً لأركان حرب الرجالة ..

وعندي ليك كام محارب إيه gt: فراوده ويعجبوك قوي دول هاشيهم لك على جنب كحراسة خاصة .. إنت حياتك تهمنا يا ريس ... وهانسمي الفرقة دي الحرس الحشيشي ( على وزن الحرس الحديدي بتاع إيران )

وبالنسة ليومية الرجالة واكلهم والحاجات دي .. هانبقى نتفاهم فيها بعدين لما أقابلك على قهوة المحاربين القدماء اللي في التحرير .

دندي مدند س س .

[فــيــروز]

هش هش يا ديك mf-: ax:

وبعدين التحالف آخرته سودا rs: وانتو احرار بقى gt:

تم تعديل 12 يوليو 2004 بواسطة فــيــروز

[حشيش]

بهذا نبايعك يا حشيش قائداً عاماً لقوات المحور ورئيساً لأركان حرب الرجالة

يابنى إحنا التحالف وهما المحور mf-:...إفففف....شكلك كده منتش فاهم حاجة وحتكمل على بقيتى gt: .....مطلوب متطوعين rs:

[moody00x]

ولكنكم تحرقون غصون الزيتون.....

إذآ فهى الحرب...

من حكمدار بوليس العاصمة إلى حشيش القاطن بدير النحاس ...سر يا حشيش ونحن وراءك....

مودى

قائد الجناح والورك والقفص الصدرى

[Masrawy Abroad]

حشو

من الملاحظ ان أعضاء المحور يتميزون بصغر السن ودي ميزة لصالحنا.... لأننا ها نكسبهم بالخبرة......زائد إن فيه صف تاني من المحاربين وهم أبناء أعضاء التحالف....يعني فيه جيل تاني ممكن يتم تصعيده زي عمر بن سي السيد...ودول يمسكوا الراية بعدينا في حالة هروبنا من الجبهة

hpc:!: :P

مصراوي

خبير استراتيجي ومحلل عسكري (برنامج قاعد على الكنبة)

[salma-7]

يا نهار أبيض

بقى أول ما ادخل المنتدى برجلى اليمين

ألاقى التحالف و المحور

يعنى أسيب السياسة فى البيت تطلع لى فى المنتدى hpc:!:

حشيش و سى السيد

شكلنا كده نحن النسوة هنريحوووووووووووووووووووووووووووووووكوا :P

[الأفوكاتو]

الأخ العزيز " حشيش"

نصيحة أخوية:

إذا لم تغير إسمك, سيعتقد البعض ان الأيام الماضية قد رجعت, و ترأس قواتنا المسلحة, مشير " حشاش"

[DARWEEN]

أنا لها ... أنا لها

هلموا يارجال فوالله إني أرى أنهن لا يطلبن صلحا ولاسلما

وبعدين التحالف آخرته سودا  وانتو احرار بقى

شكلنا كده نحن النسوة هنريحوووووووووووووووووووووووووووووووكوا

hpc:!: :P :) :)

[حشيش]

شكرا لمن هبوا هبّة رجل واحد وتقدموا الصفوف mc: ...س.س...مودييكس...مصراوى...داروين...واستاذنا الافوكاتو hpc:!: ...لقد ذكرتمونى بقول ابو فراس الحمدانى (الحلو مخاصمنى شاهده يمه) قصدى (السيف اصدق انباء من الكتب... فى حده الحد بين الجد واللعب) hpc:!:

[kfaya]

أذا كانت الحرب ......... فلتكن الحرب .....

فأنا و اللة لها ...... ورثناها كابرا عن كابر ......

[الأفوكاتو]

يبدوا أنكم فهمتونى غلط,

أنا أدافع عن المظلوم,

و شكلكم يا رجال لا يبدوا " مظلوما " hpc:!:

بل "ظالمـــــــــــا" :P

[ســيد مرزوق]

أنا ممكن أحجًز بس ....

موافقين؟؟؟ fsh::

[KWA]

أنا حشيش.....هل من مبارز (فلم يرد أحد  hpc:!: )

أنا حشيش.....هل من مبارز (فلم يرد أحد  :P )

أنا حشيش.....هل من مبارز (فلم يرد أحد  :) )

يبقوا خافوا ومشيوا  :) ...دلوقتى بقى أروح أعمل كباية شاى أسقى فيها القراقيش اللى أمى باعتاها لى علشان يشتد عودى قبل المعركة  :)

DELTA FORCE

[hamo90]

يا أخوانا ما ينفعش كده

أحنا نتحاور مش نقضيها سنج ومطاوي وتقفيل شوارع

يا عم حشيش

طب ياعم سي السيد

يا أخوانا ما ينفعش كده

يوووووووووووووه

أنا معاكم وأمرنا لله

وأستعنا علي الشقي بالله :P

hamo hpc:!:

[se_ Elsyed]

نظراً لعدم ظهور أي مقاتلة من القوات المعادية لإحساسهم بالإندحار والإنسحاق ولوجود فارق في الخبرة على رأي مصراوي .. وإستشعاري بوجود رغبة صاقة لدى مقاتلي جيشنا المغاويرلوقف إراة الدماء والكريم شانتيه .. إحنا ممكن نجنح للسلم ونقعد سوياً على تربيزة المفاوضات المدورة ... بس أول شرط لينا هو إننا نحصل على ثلاثة أرباع الطبيخ اللي بتطبخه نسوة الجيش المعادي يومياً ويكون الطبيخ مغمس يعني لحمة فراخ سمك وخلافه ... في أفراد من جيشي قاعدين عزاب وحالتهم كرب ... وأحب أسمع شروط بقية المقاتلين في حالة إذا رغبوا في المفاوضات ..

أما إذا أجمعوا على الحرب فأنا لها ولسه لابس الجلابية ومعلق الكزلك في الجزمة أم بوت وجاهز 24 لصدور الأوامر بالهجوم .

[فــيــروز]

بس أول شرط لينا هو إننا نحصل على ثلاثة أرباع الطبيخ اللي بتطبخه نسوة الجيش المعادي يومياً ويكون الطبيخ مغمس يعني لحمة فراخ سمك وخلافه ... في أفراد من جيشي قاعدين عزاب وحالتهم كرب ...

ما تاخد لك كام قرقوشه من قائدكم حشيش ترم بيهم عضمك aln::

حلو جدا الجيش المقرقش ده :) :)

حشيش و جيش القراقيش hpc:!:

"ده مايقربش لقراقوش ولا حاجه ده بس تشابه فى السمسم" :P

[R.M.G.]

الأخين العزيزين حشيش وسي السيد

أناشدكما باسم أطفال المنتدى والعواجيز اللي فيه أن توقفوا نزيف الدم وان تقبلا الخيار سلاما استراتيجيا وألا تتورطا في حرب قد تجدا نفسيكما بعد لأي وحيدين في مواجهة جحافل النسوة ولا يغرنكما سكوتهن وآه من سكوتهن فسكوت النساء يخيف أكثر من أحاديث الرجال

وهاهي البشائر....سلمى التي انهلنا عليها ترحيبا واسمها لسه بالرصاص آل إيه ياخويا بتقول هنريحووووووووووووووكو ياعم دي عالم باين عليهم مسجلين خطر

أخواتي العزيزات من هنا أعلنها أنا اقبل الخيار سلاما استراتيجيا وأعلن عن قطع كل علاقة لي بكل المتهورين اللي كتبوا ويريدونها فتنه

عاشت كليو وعاشت سلمى

عاشت كروس وعاشت سلوى

عاشت فريوز وعاشت فريده

عاشت كل واحده جديده

كل كبيرة و صغنونه

ولا تنسوش الشعنونه

أنا يااخونا ماليش في الحرب

انا مافياش حيل للضرب

التوقيع

r.m.g. عدو النفاق الأول

[kfaya]

البيان الأول من القيادة العام :

تراجع عام لقوات التحالف على كافة الجبهات الى خط الدفاع الثانى و ذلك بعد انسحاب كتائب ر م ج من العركة .... و المهادنة الواضحة من الأفوكاتو و سيد مرزوق .......

وذلك عقب تهديدات سلمى 7 بأنها سوف " تريحنا" ... هذا و قد تم توزيع القراقيش لكافة القوات مع وعد بالمربى و صوانى البطاطس و حلل القرع العسلى و الشعرية ام لبن و مكسرات لكل الصامدين ...

هنا القاهرة

[se_ Elsyed]

التوقيع

r.m.g. عدو النفاق الأول

أيوه كده إفصح عن نواياك وأخلع عنك القناع الزائف .. أنا شكيت فيك من ساعة ما أقرضت الشعر في المدعوه فريوز وعملت فيها البثحتري والان تتخلى عن بني جنسك وتنضم لتحالف الشر .. والحمد لله كان شكي في محله .

إلى جميع القوات الرجالية ... عندنا إجتماع هام النهاردة بالليل على قهوة المحاربين القدامى للبت في أمر الجندي المارق أر بي جي وتقرير مصيره الذي لن يخرج عن عقوبتين :

1- إننا نعلقه من رجليه على باب القهوة عشان يبقى أنصاره الستات يشوفوه وترتعد فرائصهم .

2- نركبه على ضهر دبابة بالمقلوب ونزفه في ميادين وأزقة القاهرة الكبرى برضوا عشان يبصوا عليه من البلكونات ويرفعوا راية الإستسلام ...

وأمامك فرصة أخيرة يا أر بي جي لحد الساعة واحده ونص الظهر لو ما أعلنتش التوبة ورجعت للصفوف الامامية لقوات التحالف الرجالية .. ومطلوب منك 5 قصايد شعر طويل ما تقلش القصيدة فيهم عن مترين تُمجد فيها القادة الرجال وعلى رأسهم قائدنا وحامي الحمى حشيش الشنتوري .... وأركان حربه س س وجميع قادة أفرع الجيش وأخص بالذكر اخونا داروين قائد الجناح العسكري للتنظيم الرجالي وكي دبليو أيه خبير ألعاب الدفاع عن النِفس وقلب الدفاع كفائه وظابط المخلة حمو وعم سيد مرزوق المحجزاتي ومن ماما وباب وسوسو وتوتو إلى جميع الاهل والأصدقاء بمنيا القمح وأحب أسمع أغنية والله زمان يا كفاحي وإشتقت لك يا سلاحي أو مقطع من فيلم حافية على جسر الدهب .